رواية لأني عاقر الفصل الأربعون بقلم مريم خفاجة
لزمت الكاونتر وغمضت عيوني
حيل واني لازمة راسي
الدوخة كتلتني كتل
سمعت صوتة گال:-راح اطلع اجيب...
سكت ماكمل الجملة
واجة يمة دارني الة وهو يباوعلي
گال:-شبيج
ملاك:-دخت
غيث:-تعالي
جرني من ايدي واخذني للصالة
ملاك:-تؤ تؤ احس الدنيا تفتر براسي
غيث:-مو انتي تعاندين گتلج لاتضلين وحدج
صيحي رغد
ضليت متمددة ؏ التخم ولازمة راسي
ومغمضة عيوني
اجة بيدة گلاص عصير خلاه ؏ الطبلة
وگومني يشربني ؏ كيف
وخرت الكلاص عن حلگي
وابتسمتلة:-كافي
غيث:-اشربي انجبي
كرصت ايدة عض ايدي
ضحكت وگلت:-روح صيحلي رغد
غيث:-اذا طبيتي للمطبخ رجليج اكسرهن
ملاك:- يا جا شلون
غيث:-اكعدي واتأدبي شبقالج بعد؟
ملاك:-بس التمن
غيث:-اي رغد تسوي اكعدي انتي
ابتسمت وهو راح يصيحها
شوية واجت لابسة عبايتها طبت تصيح
رغد:-عمي ووواااالله خبصتوووني
غيث:-اشتغلي غصباً ؏ راسج
رغد:-ايا ادبسز عود اني اختك
غيث:-رايح اجيب السمج لاتخليها
تدخل للمطبخ
خلة وطلع
واني گمت شلت الكلاص ورحت يمها
رغد:-تؤ تؤ ماتگعد راحة هاي البت
ملاك:-ولي عني انتي
ركعتني بالجفجير صحت:-مو هسة اخابر
رجلي يطيح حضج
رغد:-دكلي تبن لج هم عوزة يجي يضربني علمودج
ضليت اضحك واساعدها
جنت مسوية ثواب لأمي وعازمة اخواني
وبيت عيال رغد
من التعب ضليت كل ساعة ادوخ
لحد ما خلصنة كلشي
واني افتر اعزل بالغراض
دخل غيث بيدة السمج ضيك عيونة
وصاح:-عمي مرررة ماتگعدد رااااحة وتالي وياج انتي
ملاك:-شكووو
غيث:-وجعوو مو گتلج لاتطبين للمطبخ
ضحكت واخذت السمج من ايدة
وگتلة واني انصي صوتي:-ياعيني شلون لعد اخليها اختك وحدها غير تخبصنة خبص
دمغتني رغد من
ورا وصاحت:-هووووو موووووو صوووووجج لاااااا وووووووااااااللله مو صوووووجكم
ضحكت اكثر وهو ضمني
جوة ايدة وگالها:-لج شو تمدين ايدج ؏ مرتي
اكسرها لأيدج واعلكها برگبتج والله
تخصرت و وكفت:-لا بالله
غيث:-مدي ايدج بعد وشوفي شسوي
رغد:-والعباس راح اطلع
ملاك:-حبيبتي اني محد يندك وياي
رغد:-اطيح حضج والله
غيث:-اي ديلا اوصليلها
رغد:-خو انتَ سـ *** تبيع اختك علمود
هاي ام عيون البزون
دارني عليّ وباس
عيوني ثنينهن:-هو اكو احلى من هيج عيون
رغد:-والله يالله
ملاك:-؏ كيفج حبي راح توجين
شمرتني بالخاشوكة وضلينة نچايد
بيها وهي شوية وتبجي
باسها غيث وراح گعد يم جاسر والولد
طبت ريم لابسة عباية ابتسمت:-حلوة
عليج العباية
ضحكت:-صدك؟ ماعرف البسها
ملاك:-هو شوية شوية تتعودين
ريم:-مادري تخرط مني
رغد:-ليش لبستيها شعجب
ريم:-جاسر يگولي نوب لبسي عباية
تقربت من يمها وعدلتلها
الحجاب وكلت:-احسن حلوة عليج
رغد:-انطيها جبة لو اجيبلها من ميار
خطية تتقيد
ملاك:-لا عندي فوك جبب تعاي وياي
اخذتها من ايدها وصعدنة
وهي تصعد ؏ كيفها بهدوء وكل ما اباوعلها
نسخة من أمي وهدوء وجهها
انطيتها جبة وهي
كالت:-بعد يجون زلم
ملاك:-لا هو بس اخوان ازهر وحسين
زوج ملك
ريم:-تمام
ملاك:-شلونكم بالبيت مرتاحين؟
ريم:-اي مرتاحة احسلي
ملاك:-وذاك البيت بعتوه
ريم:-لا گعدوا بي ابوية ونجلاء
هزيت راسي بأسف
ونزلنة ثنيناتنة گعدتنة ننضر ملك
شوية وطبت وهي تسب وتغلط ؏ عراق لان حارة
صبيت الغدة جان كلشي موجود ؏
السفرة والكُل يترحم لأمي ؏ الأكل والترتيب
وكل ما يمدحني زوج رغد
غيث يبتسملي بهدوء ونضراتة الحلوة
الأحبهن تلاحكني
لحد ما خلصوا ذبيت الاماعين
؏ ملك وريم
ضلت ملك تدردم
ملك:-هسة شني جاي اني خطار تكربوني
بالاماعين
رغد:-انجبي لج اشتغلنة اني وملاك
حد ما انكسر ضهرنة
ملك:-هو بيتجن اني شعلييييية
ملاك:-اشتغلي وسكتي
مو ريمة وياج ساكتة الة تدردمين
ملك:-انجبي وانتي ولج احجي مرض براسج
بس اني اصيح احنة خطار يكربن علينة
ريم:-الخطار بس ياكل ويمسح ايدة بالحايط
قلة ذوق
دفرتها برجلها وضلت تتعارك وياها
وريم ساكتة ماتحجي وياها ابد
واني اكدر اغسل الاماعين بس
هواي كلش واني اكرههن لو تنطوني اغسل
بيتين طبك ولا اغسل اماعين واوكف
؏ السنك
خلصنة وسويتلهم جاي
و وديتة الهم گعدنة نسولف ونضحك
عاداتهم حلوة كل لمة لازم ضحك
يونسون كلش
اساساً رغد وعيالها كل جمعة يتلمون
ببيتنة ويجيبون كرزات وحب
ويضلون يسولفون
من بين هاي الهوسة
كلها والسوالف والضحك
من بينهم الوحيد الساكت وعينة تترقب
اختي
هو قيس اخو ازهر
ما مسولفتلكم عنة
يمكن نگول هو اكثر شخص مكروه
بيناتهم وماينطاق
واساساً محد يطيقة ولا احد يسولف وياه
عيونة اكلت ريم اكل
وهو يباوعلها بتأمل درت وجهي
لريم مدنگة راسها تلعب بأضافرها
رجعت باوعتلة نزل عيونة ؏ رجليها
ويباوعلها مبتسم
ضليت اراقب بي وهو
ما انتبهه لأي احد ولا سولف وي اي شخص
فصل عن العالم وضل يباوعلها
شالتني الغيرة ؏ اختي
همست:-كومي ريم وياي
ريم:-وين
ملاك:-تعاي
اخذتها وصعدت تحت انضارة
ملاك:-ضلي هنا لاتنزلين بعد
ريم:-اي ضجت هوسة جوة
انطيني تلفونج موبايلي
نسيتة
انطيتهيا ونزلت
حطيت عيني بعينة قابلني بنضرة خبيثة
انطيتة نفس النضرة وكعدت يم غيث
وملك بصفي گالت:-ليش صعدت ريم
ملاك:-احسن
ملك:-شكو
ملاك:-بعدين اكلج
ملك:-حسين وين هم يلا اروح
ملاك:-ليش خو ضلوا بعد للعصر
ملك:-يمعودة مابية حيل عمتي تضل تصيح
وتحجي وتدردم واني اذا حجت اكب
وياها وتصير عركة
ملاك:-بعدها ؏ طبعها
ملك:-تريد طفل
ملاك:-لعد ليش ماتسون
ملك:-دكتورتي ماتقبل اصلاً تكول بعدج
؏ اقل سنة ستوني ذبيت طفل عمرة 8 اشهر
ملاك:-اني اخاف من تطولين بدون
حمل
ملك:-لا ولج شسالفة غير مسوية تحليلات
كاملة
هزيت راسي وسكتت وذبيت نفس
وقيس يتخازر وياي
للعصر وكلها راحت
رتبت البيت انفتح باب الاستقبال
ودخل غيث كال:-شتسوين
ملاك:-هاي گطوف الجكاير جاي المهن
بعدني مدنكة جاي اشيلهن
واحس روحي صرت بالهوا ضحك واني
بين ايدة باسني حييل وصعدنة
لفوك...
لعب بشعري وباس خدي
غيث:-احبج هواي
ملاك:-اموت عليك اصلاً
غيث:-راح اقرالج شعر
ملاك:-اي
غيث:-بس هو بي اشكال شرعي
يعني رأي الدين يختلف عن رأي الشاعر
بس اني معلية البيت عجبني
ضحكت:-اممم يلا اقرالي
غيث:-باعي يگول
استغفُرالله ألا من محبتهِ
فأنها حسناتً يوم القاهُ
وأن زعمتُم بأن الحُب
معصيةً
فالحُب أحسن مايُعصي
به الله
ضحكت بصوت عالي وهمست:-الله حلووو
غيث:-اقرالج بعد بيت
ملاك:-اليوم انكلبت شاعر
غيث:-؏ ساعة تكلبيني اخطبوط
ضحكت اكثر وجسمي يهتز
وهو كال:-حبيبي عيونة مصدر شاعريتي
ملاك:-اممم
غيث:-ومن گد ما كبار تشوف نيتي
احب عيونة نعسانات وكبار
واذا باوعلي اتيه باب بيتي
رفعت جسمي وضحكت
واني عيوني تدمع خجل مادري من الضحك
وهو يضحك وياي
ملاك:-حلووووات
غيث:-شترديني اصيرلج اصير
ملاك:-اممم بس اني احب اغنيتك
غيث:-ياهيّ
ملاك:-هذا اللون عليك يجنن
يشبه لون عيونك
غيث:-نضرات العالم ماتطمن
احذر ليحسدونك
ملاك:-سحلتك سحل بيها
دمغني وهمس:-ادبسز
ملاك:-شگد تحبني
غيث:-يومية هذا السؤال ماتملن انتن
ملاك:-لع
غيث:-لعلاعة نامي يلا
ملاك:-تعبانة كلش
غيث:-نامي يلا
ملاك:-ماريد انام خلي نضل نحجي
شنو تريد تخلص مني
غيث:-هو اني
اول ما اگعد من النوم اول بشر احتاج
احاجي انتي شلون امل منج بعد؟
ملاك:-امممم وهو اليگعد من النوم
مايحب يحجي
غيث:-اي اني اختلف
ملاك:-اويلي بأختلافك
غيث:-انطمري يلا نعسان
ملاك:-والله مانام سوووووولف ويااااااااي
غيث:-گمتي توهوسين من النعس
ملاك:-احضني حيييل
شبگني اكثر وهو يبوس
براسي
ملاك:-احبك
غيث:-واني هم
ابتسمت ونمنة بهدوء تام...
ومَرت أشهر
وإمي بكل لحظة اذكرها
ومرات انسى وافتح تلفوني
وادك عليها بعدها اصفن
على منو جاي اتصل؟
تطلعلي ريم تبجي وتصيح تكول لاتتصلون
؏ تلفون أمي
اخواني جاسر وريم
عايشين وحدهم ببيت لان ريم
ماترضى ترجع لذاك البيت واساساً راح
تخدم عليها نجلاء
جاسر سوة فضل من شال هو وياها
لا هو يگدر يضل بمكان امي ولا ريم
واني ارتاحيت لان هُمة
يمي اروحلهم دائماً
وبيوم جنت گاعدة اقرة قُرآن
بالصالة واسمع صوت رغد وعمتها
صحت:-اتفضلوا ادخلوا
دخلن گمت سلمت عليهن
ورحت جبتلهن ماي وهنه يسولفن
گعدت بالچادر كبالهن
مستغربة من جيتهن
زهرة:-يمة احنة جاينج بسالفة
عگدت حاجبي واني مبتسمة:-اي عمة احجي
زهرة:-جاين نخطب منكم
باوعت لرغد كلبت وجها
وضلت دايرة وجها لغير جهه
ضحكت:-شنو تخطبين ما افتهمت
ذبت نفس قوي
مبينة اساساً مجبورة جايتني
زهرة:-اختج ريم قيس يريدها
رفعت حاجبي وضحكت:-عمة شدتحجين؟
زهرة:-اعرف مو وكتة هسة لان انتوا
حزانة بس تعرفين عناد قيس كال بس ينطوني
كلمة
ملاك:-اعذريني عمة بس يعني شلون
دتفتهمين؟ ريم زغيرة وينها وين الزواج
سكتن ثنينهن
وهي گالت:-قابل بيدي يا يمة
ادري بيها زغيرونة ومو مال زواج اصلاً
بس غير هوَ دگلي رجل ألة ترحين هسة هاي
اسالي رغد
رغد:-والله اني لو منكم ما انطي مرة هذا
ضحكت عمتها وگالت:-ادبسز تحجيها كبالي
رغد:-تدرين بية شلون اكرهه
زهرة:-هسة دعوفج من هاي السالفة ها
شگلتي
ملاك:-اعتذر حتى لو اني اوافق جاسر
مليون بالمية راح يرفض
زهرة:-هذا هو لعد والبنية زغير
رغد:-مو قصة زغيرة او لا هو هذا الوحش
منو تتحمل تعيش يمة شكم مرة خطبنالة
وشرد البنات حُبي عوفي اختج
؏ كلبج
رجعت تضرب بيها وتتشاقة وياها
وراحن
بقيت آكل بگلبي
عرفتة النذل راح يجي يخطبها
بس ماتوقعت بهاي السرعة
نضراتة الوصخة لأختي موتتني كل ما
اتذكرها اموت رعب
انتوا لو تشوفون طولة
يگول عمود وهو ضخم وعسكري يخوف
وريم ناعمة ستوها عود طب وزنها
40 من كد ما عضمها ناعم
وجسمها ضعيف
تتحمل هذا؟
دگيت ؏ ملك سولفتلها
ضلت تصيح وحتى هي رفضت
للعصر ولبست عبايتي
ورحتلهم سحبتني رغد للمطبخ
ملاك:-ها گلتولة؟
رغد:-اي ولج ضل يضحك يگول
اي الله كريم
بلعت ريگي بخوف:-شنو يعني
رغد:-اني ادري بي هذا ولج يمة خفت
؏ ريم خاف تضل وحدها بالبيت ويجي....
قاطعتها:-انجبي لااا جاسر حط كامرات
مفتوحات بتلفونة
رغد:-ترة كلشي يسوي هذا
ملاك:-يخوف ياربي شنو من بلوة
واصلاً مو اني ما ارضى حتى ريم ماترضى
رغد:-بعد احسن اصلا ماردت اجي
ويا عمتي بس هو خبصني خبص من الصبح
لسة يفتر ورانة
يمعودة مخبل هذا باع ريم الفاهية
التتحملة والله يالله
رايدلة وحدة هذا اذا ينطيها راشدي
تنطي راشدي
ضحكت وانخلسنة بصوتة
وهو داخل للمطبخ
مضيك عيونة ؏ رغد هو اني
شفتة لو متت بدمي
ولكم يخوف
قيس:-شبية عيني مخبل ست رغد شايفتني
ارگص بالشارع مصلخ؟
اندار علية وگال:-وانتي ست منو اختج
حتى ماترضة بت انجلينا جولي واني مادري
ملاك:-ماتريد تتزوج
قيس:-اي عود اصدك
اتجهه للثلاجة وطلع خيارة
وراح للسنگ يغسلها واني ورغد
بايگات هوى
گرطها وهو يباوعلنة عافنة
وطلع واني كلبي يدك
عفتها ورجعت لبيتي
هو من كد ما خبل مخليلة بيت
وحدة مو ويا اهلة گاعد
اجة غيث سولفتلة
گال:-عادي بابا عليمن خايفة هو هذا
بس يهوبز معليج اني احاجي
ملاك:-باجر وديني لجاسر
هز راسة وباسني وسحبني
الة
ثاني يوم الصبح ذبني ببابهم
وراح لدوامة
دگيت باب البيت
طلعلي جاسر سلمت عليّ وطبيت
وهو هم راح للدوام
گلت من يجي اگلة
نمت بصف ريم المخلية
صورة امي بصفها حضنتها ونمت
للضهر يلا گعدتني
ابتسمت وبوستها وكمت اسوي وياها
الغدة
ملاك:-شلونج بالدوام
ريم:-زينة
ملاك:-تدخلين وزاري؟
ريم:-والله ما ادري
ذببت البيدي وتخصرتلها:-شلون
يعني ماتدرين؟ بشكم درس واگعة؟
دنگت راسها وتضحك
ملاك:-احححججي؟؟؟؟
ريم:-بنص السنة غير وگعت بكلهن
وهسة جاي اعدلهن مايتعدلن شسويلهن
ملاك:-ريم هاي ثالث سنة؟؟؟؟
تردين تعيدين هم؟
ريم:-جا شسوي اگلج يعني جاي اقرة
بس ما انجح
ملاك:-هو شكم درس الدخول؟
ريم:-3 دروس وعشر درجات
ملاك:-هلو وانتي واگعة بسبعة صدك
تحجين جاي تضيعين عمرج بالسادس
ريم:-مالي خلك حتى أقرة
ملاك:-دنجبي خليلج مستقبل يغبرة
هم تصيرين مثلي والله بس ملك البيها حظ
تعرف تفكر
ريم:-يوو مابية حيل خلي نخلص لايجي جاسر
بلعت ريگي وسألتها:-زين اذا اجوج خطابة
توافقين؟
عگدت حاجبها نوب ضحكت:-اوافق بشرط
ملاك:-اي؟
ريم:-يبطلني من السادس
دمغتها حيل وضليت اصيح عليها
لحد ما اجة جاسر
شبگني حيل وگال:-مشتاقلج
ابتسمت واني حاطة راسي
برگبتة:-يابعد روحي
گعدنة تغدينة وكملنة صعد
لغرفتة صعدت وراه دگيت الباب صاح
تفصلي
دخلت وگتلة:-اريد اسولفلك شغلة
عگد حاجبة وگال:-اي تعالي شكو
گعدت ؏ الكرسي وهو گبالي:-شكو؟
ملاك:-اجت خطابة ؏ ريم
رفع حواجبة وگال:-منو؟
ملاك:-قيس اخو ازهر
جاسر:-شجابة ؏ ريم؟
ملاك:-هو يمكن شايفها بفاتحة أمي ومن
ذاك اليوم العزيمة
جاسر:-اي؟
ملاك:-اي شتگول
جاسر:-لا بالله شو جاي تسأليني؟
گليلهم ماكو مرة عدنة بعدها طفلة وجاي تدرس
وريم ما ازوجها الة تتخرج من الجامعة وشهادتها
بيدها وبعدين اذا انطيها
ما انطيها لشكولات قيس مخبل
ملاك:-هو اني هم گتلهم هيج
جاسر:-اي هذا هو
عفتة ونزلت
للعصر واجة غيث رجعت للبيت
سألتني رغد كتلها مايقبلون
وانسدت السالفة
دخلت للمطبخ وهو وراي يفتر
سحبني من ايدي وصار هوَ كبالي واني
ضهري ؏ الثلاجة
ضحكت:-كااافي شبيك تفتر وراي اليوم
شكووو
غيث:-اموت عليج
ملاك:-ايييي وخررر عني
رفع راسي بأصبعة وباسني بعمق
بادلتة بهدوء
ابتعد وهو مبتسم واني كذلك
همس:-شفتج تمر حَلان يكتل حلاها
ضحكت ودفعتة وهو اتجهه
للبراد وترس الكلاص ورجع
گال:-بوستج لازم ماي نشرب وراها
اهتز جسمي من الضحك وضل
يفتر وراي ويبوس بية
هو دائما من عندة عطلة يشلع
گلبي
للعصر وجنت اشتغل
دخل غيث وباوعت وياه ثنين زلم
طببهم للاستقبال عكدت حاجبي مستغربة
وضليت منتضرتة يجي
دخل گتلة:-هاي منو اجة؟
غيث:-ولد خوالج
ملاك:-منو؟؟
غيث:-امير وكمال
فتحت عيوني ؏ وسعها وبلعت
ريگي وكلبي دك سريع وانفاسي تسارعت
كذلك احس عيوني بعد ما ترمش
ضل يحجي وياي واني صافنة
غيث:-ملاك؟ شبيج؟
ملاك:-مابية شي شسمة شلون اجو
غيث:-شفتهم بالمعرض مال سيارات
ملاك:-ها تمام
غيث:-سويلنة جاي تگدرين تدخلين لو تستحين منهم؟
ملاك:-لا عادي اطب اسلم
غيث:-يلا بس لبسي عدل
ملاك:-اي
عافني وطب لزمت گلبي
وگعدت بالگاع جسمي كلة يرجف
وكلبي يدك ؏ سريع
لعبت روحي واحسها صعدت
للخالق عصرت دماغي حيل يارب يارب
الله لاينطيك الله لا يوفقك
شجابة يالله شجابك عليييييه نسيتة
ليش يطلع بدربي كل ما اگول
وصلت للنهاية الگاه هو واگف بالطريق
ويعيق كل مساراتي
ضليت اضرب ؏ گلبي
اريدة يهدئ واسمع صوت ضحكتة
وسوالفة وغيث مندمج وياه
كمت سويت سم ان شاءلله بگلبك
واخلص منك
ركضت لبست واني ارجف
الله يلعنك بجاه النبي محمد شوكت اخلص
منك
نزلت شلت الصينية ومن گد
ما رجفت الچاي كلة وگع
ذبيتة واني دموعي تنزل
اني جاي اخون غيث؟
استغفلتة؟ وجذبت عليّ
وهو گاعد يم طليقي وميعرف شجاي
يصير وراه؟
شسويت بروووحي شسويت
فتحت الباب برجلي
بعد عدة مرات محاولة اروح وارجع
دخلت وهمست
بصوت يرجف:-السلام عليكم
ردو علية
اجة غيث اخذ الصينية من ايدي
رفعت عيوني المدمعة عليّ
معقولة الآسفة تشفعلي اذا عرفت؟
درت عيوني عليّ وهو يخوط
بالچاي انتبهلي ورفع عيونة وشرب الجاي
وهو مضيك عيونة علية
ملاك:-شلونك امير
امير:-هلا بيج شلونج شخبارج
واني استنجد بي بعيوني گلت:-زينة الحمدلله
شلونهم الجهال وردة شلونها
امير:-الحمدلله ؏ الله
هزيت راسي وهمست:-ان شاءلله دوم
كمال:-شلونج شخبارج مشتاقين
دار عليّ غيث ورفعلة
حاجبة وخزرة:-لك شنو مشتاقين؟ مو اركعك جلاق هسة تعرف وين اوديك
كمال:-بت العمة هاي تاج وباج
اختنة بالاسلام غيوثي
انخفض نفس بدة
يذب ميانة وياه يالله انقذني
كلبي يدك
وقررت اگولة اليوم وانهي هاي المهزلة كلها
غمزلي غمزة خفيفة خزرتة
وكمت افتر بالمطبخ
شوية واجة امير
اشرتلة يطب للمطبخ
اول ما دخل ضربت الكاونتر
بايدي:-ششششجااااابككمم لهنااااا
امير:-اسكتي لاتفضحينة ماندري جنة
بالمعرض نبيع سيارة كمال وهو
رجلج اجة علينة واصر نجي وياه للبيت
لاتخافين هسة راح اخذة ونرجع
ملاك:-بسسسرعة يلا لاتخبلوني
اخذ كلاص ماي وراح
واني منتضرتهم يطلعون
واسمع صوت صياح
كلبي دگاتة سكتت وانخفض النفس
تقربت من الباب ورجلية
ترجف
واسمعة يجبرهم مايطلعون يضلون
؏ عشة شجاي يصير يارب
ضليت ادعي يسهل الامر
خنسوا معناها قنعهم يضلون ؏ عشة؟
دخل مستعجل گال:-راح اجيب من برة
لاتطبخين انتي
ملاك:-خاف عدهم شغل ليش خليتهم
غيث:-لا بابا عيب اول مرة يجون هنا
ونطلعهم بدون عشة
ملاك:-تمام اذا تريد اني اسوي هنا
غيث:-شوفي اي شي يعجبج سوي بس لاتسوين هواي
هزيت راسي وهو راح
ورجع گال:-لاتطلعين ضلي هنا قفلي
هاي الباب
سكتت وهو طلع انتضرت شوية
كلت خاف يرجع
مشيت متوجهه للاستقبال
فتحت الباب عليهم وهو متمدد ويلعب
بالتلفون دار وجهه علية وضيك عيونة
ملاك:-ولكككك انتتتتتتت شنوووووو من بشششششششررررر فهممممممننننني
كمال:-شكو؟
ملاك:-شككوووووو لييييييش تلحگننننني
ليييييش مستمررررر تدددددممممررررني
لييييييش لييييييش فهمممممني
ماكفااااك السنين العشتتتتتههنننن ويااااك
بالذذذذذل لسسسسة جاااي تلحگنننني
لممممن ارتااااااحيت ولككك كااااافي اطللللع
اطللللع من حياتتتتي رووووح
كمال:-اني شعلية هو رجلج
جلب بينة
رحت متوجهه الة ولزمت من
خوانيگة واني ابجي مستمرة:-كاااافي عوووفني
بحاااااااالللي رووووح اطللللللع برررررررررة
امير:-ملااااك شبييييج انتتتتي تخبللللتي
راح يجي رجلج وخرررري عنة
ملاك:-اااااااي تخخخخخبببببللللت
طلعععععة بررررة مااااااريد اشووووف شكلللة
ماطيقك اكرهك ولك كمت من يجيبون اسمك
اتقرف وبطني تگلب رووووح عووووفني
بحااالي ماملييييت صارت عندك عائلة
بعد شعنددددك تركض وراااااي
كمال:-منو راكض وراج انتي
عفتة وطلعت برة ركضت
لفوك وسديت باب الغرفة وضليت اصيح
واشمر بالغراض الله لاينطيك
اخذت تلفوني ارجف كلما اريد
افتحة يوكع من ايدي
دكيت ؏ جاسر وحاجيتة
واني ابجي تخبل وضل يصيح وكال
جايكم
ضليت كاعدة انتضر وامسح عيوني
شوية وانفتح الباب رفعت راسي
علي
جاسر:-شبيج انتي مخبلة انعل ابو لابو حتى
الجابة شمسوية بروحج
شالني من مكاني واني مكطعة
روحي شبگني همست متقطع:-اخاااف والله اخاااف يموتني غيث والله يذبحني
جاسر:-اششش بابا اسكتي هسة اشگة بالنص
امسحي عيونج وغسلي وجهج
ابتعدت عنة ورتبت شكلي
سمعت صوت غيث جوة هفيت ؏ وجهي
ونزلت واني مخلية الشال ؏ متوني
وجاسر يهمسلة:-انت صدك تحجي شعندك
مدخل هذا النعال للبيت
غيث:-يمعودين شبيكم شفتهم بالمعرض عيب
لاتفضحنة جاسر اسكت
جاسر:-انعل هسة اسبك واسب العيب
غيث:-عمي شبيكم ويا الولد مابي شي
شكم مرة جربتة لا مثل ذولة
السرسرية ولا عندة سوالف مو زينة
سكت جاسر ومسح وجهه يباوعلي
واني رحت للمطبخ اشتغل وارجف كوة جبتها
؏ الدرب العدل
خلصت وهمه اخذوا الأكل
وجاسر يهديني اكلوا وكملوا
ورادو يطلعون جنت واكفة
بباب المطبخ
سلم كمال ودار نفسة علية
وابتسم وصاح بصوت
عالي وهو يوجهلي تحية:-مع السلامه خالي
هزيت راسي واني ساكتة
وراحوا وجاسر راح وراهم يلا كدرت
ارتاح
صعدت ورا غيث واني انشف
بأدية
شفتة يبدل ابتسمتلة
كال:-شو ما عجبتني وجهج اصفر شبيج؟
ملاك:-مابية شي يمكن مريضة
غيث:-اجازة من الله؟
ضحكت:-اي
جرني من خصري وباسني
تلمست شواربة وگتلة:-غيث
غيث:-عمامة وخوالة
ملاك:-ماعندك خوال
غيث:-الله ياخذج
ضحكنة ثنينة
واني بعدني اتلمس
شواربة:-هم يجي يوم وتعوفني؟
غيث:-بس من انزل للكبر
باس ايدي متقطع
بلعت ريگي وگلت:-واذا فد يوم سويت شغلة
انتَ ما راضي عليها؟
غيث:-مثل شنو يعني؟
ملاك:-يعني اي شي مسويتة انت ماترضى
او ماتدري اني مسويه هذا الشي
شراح تسوي
غيث:-زين هذا الشي جبير زغير
ملاك:-مادري كتلك اذا هيج شي صادف
اخذ ادية وباس اصابيعي:-مانزعل هالعيون الحلوة
ملاك:-للأبد؟
غيث:-للأبد
ملاك:-واذا خلفت؟
غيث:-اعاقب نفسي بأيدي
ملاك:-لاتعوفني ابد حتى لو جنت مسوية
اشياء جبيرة لاتعوفني اني بس يمك
لكيت الأمان لاتخذلني انتَ هم
عكد حاجبة:-ليش هيج تحجين
صاير شي؟ گتلج وجهج ماعاجبني شكو؟
وجاسر لگيتة هنا؟ احجي ملاك لاتضمين علية
ترة اكره بشر يضم علية شي
ضامة عليك اشياء؟
شلون اصارحك فهمني
هزيت راسي متكرر:-لا ماكو شي
وجاسر اجة علمود ياخذ شغلة لريم
لايضل بالك
غيث:-متأكدة؟
ملاك:-اي
شال كذلتي عن عيوني وباسهن
ثنينهن:-مازعلج ابد بس صارحيني بكلشي
يصير وياج واني اوگف بحدج
ليش ما جاي اكدر اگلة؟
هو يعرفني مطلقة؟ ويمكن لو كايلتلة قبل
جان اتفهم الموضوع؟ ومو بهالحالة اني؟
ومَرت وعبرت أيام
حاولت انسى الموضوع كلة
ماخليتة ببالي
بس من اصفن بعيون غيث
وفكرة اني مجذبة عليّ اموت بدمي
وبيوم
جنت گاعدة فوك اكرز حب
واكلب بتلفوني
وغيث جوة يم عمامة و ولد عمة
هُمة كل اسبوع يلتمون عد بيت واحد
حتى بيت ابو عبدالله الي بغير محافظة هم يجي
گاعدة واگلب
ماكو اقل النص ساعة واسمع صوت صياح
ضليت كاعدة كلت
يمكن ؏ الطوبة
الصياح يزداد واني كاعدة
؏ نار اهدي نفسي اكول ؏ طوبة يمكن
لو شي ثاني
بس صياح غيث وعمة فقط
مثل الديتعاركون
فتحت باب غرفتي و وگفت
؏ محجر وصياحهم مالة والي
اسمع وكلبي يدك سريع
لا ياربي!
معقولة يسووها؟
صارت اصوات عالية والكُل
انتفض وغيث وحدة اليدافع
ويحجي
يعوفني ويسويها؟
بحجة مجبور؟
لا لا غيث مايسويها ادري
شلون اثق؟
حطيت ايدي ؏ گلبي
ودموعي نزلت بهداوتها وافتر فوك
لا اگدر انزل وادخللهم ولا بية الأضل انتضر
اكثر من ساعة همه يتعاركون
وغيث يصيح وحتى غلط كام يغلط
لحد ما اخر شي گال:-بررررررراااااا يلاااااا
ابو عبدالله:-لللللكككك تطررررردددددني
علموووووود مررررررة امدددددة تربيتي اذا صدك
غيث:-الكُل برررة يطللللع
بدت الاصوات تخف
ويطلعون واحد ورا واحد وهو
اخذ البيت كلة بصياحة
لحد ما اتأكدت فرغ البيت
نزلت درجات واني احس روحي انسلبت
من جسمي
لاتعيدون الماضي
ماريد ارجع اتعذب
دخل غيث يسدد البيبان
شافني واكفة بنص الدرج همس:-عيون أمي
ملاك:-اموت والله اموت
نزلت اركض وهو اتقدم
فتحلي ايدة حضنتة بكل قوتي
ملاك:-لاتسووووويهاااا امووووت غييييث
والله مااااگدررررر
غيث:-اششش يخسون اتزوج عليج
بابا لاتفكرين بيهم
ملاك:-لييييش هييييج يسووون بية
وااالله ما مأذية احدددد
غيث:-امشي نصعد تعاي
اخذني وصعدنة لفوك
گعدنة ؏ التخم واني امسح دمعة
ينزلن مية
كعد يسولف وياي واني فاصلة
ماضي كمال ستوني تخطيتة؟
يريدون يعيدون كلشي
نمت ؏ كلامة وهو يهديني
بكلمة "معليج بالدنيا كلها"
اخر شي نطقتة قبل لا انام:-لا تعوفني
غيث:-اعوف روحي وما اعوفج
وثاني يوم
نزلت الصبح لگيتة گاعد ؏ التخم
ويخابر بدون ما اغسل ولا اسوي اي
شي كعدت بصفة اخذ ادية وباسهن وهو
يحجي بالتلفون همستلة:-منو؟
هز بيدة سكتت
وضليت استمع للمكالمة
اخر شي قبل لا يسدة گال:-الله كريم خلي يجون العصر وافتهم
وطبگة حط الموبايل
؏ جهه وهو مشابك اصابعة
سوة گال:-هسة لو احطج واكتلج كتلة معدلة
اكو واحد يگلي ليش؟
ملاك:-لا بالله؟
غيث:-و وجعة براسج
ملاك:-شكو
غيث:-ليش كايلتلهن مايصير عندي اطفال
انتي وتالي ويا غبائج ليش من اگلج
شي ماتسوينة؟ اني اعرف اوادمي عدل
من اگلج سوي هيج سوي وانتي ملصومة ؏ حلگج
ارتاحيتي هسة؟
ملاك:-جنت ضايجة وگلت
غيث:-شلون بلا سولفيلي خلي اعرف شلون
اصفگج راشديات
بلعت ريكي وهمستة:-
جنت عازمتهم بالجمعة الثالثة مالت أمي
وهنه نسوان عمامة جايات
كلهن كاعدات بالصالة
اطبخ ودموعي تجري واتذكر كلام
أمي وصوتها يرن بأذني
وصدك جان گلبي مقبوض
سمعت صوت وراي درت وجهي
شفتها ام عبدالله:-ها عمة
گعدت ؏ كرسي وكالت:-ولو هي مو وكتها
بس شو اني ما مرتاحة
ملاك:-لشنو؟
ام عبدالله:-انتي حامل؟
قبط صدري من النفس گتلها:-لا!
ام عبدالله:-جا ليش مالج خلك
ملاك:-لا مابية شي بس هيج ؏ امي
ام عبدالله:-الله يرحمها
بس يمة ليش لسة ماصار عندكم اطفال؟
احس تأخرتوا هواي صارلكم خمس سنين
غمضت عيوني
وجريت نفس عميق
وبدون وعي ولا تفكير ولا
حتى ندم ؏ الگلتة الها
ملاك:-اني عاقر
صفنت بوجهي ثواني وهمست:-شنو؟
ملاك:-عاگر مايصير عندي اطفال
شهگت بصوت عالي ولطمت
؏ صدرها وصاحت:-يااااا يمممممة
درت وجهي عنها وشهگت
اكثر وما اسمع الة صوت ركضة وراي
باوعتلهن بسرعة
جانت واگعة ومايعة روحها
شالنها البنات وبناتها يبجن اخذت
كلاص ماي ورحت وراهن يحاول يصحنها
وهي تهمس بصوت ناصي
خدران:-يا يمة يا يمة
ماعرف كلمة "عاگر"
هي مثل العار لو شنو بضبط؟
گعدت بعد ما انخبصن بيها
البنات اول مافتحت عيونها باوعتلي
وكالت:-شلون فهميني شلون
بقيت ساكتة اباوعلها والبنات
يگللها شكو وعمات غيث كذلك يردن يعرفن
السالفه
گالتلهن بصوت ناصي:-مايصير عندهم اطفال
الكُل سكت وصارت الصالة هدوء
والنضرات تتوجه الي
عفتهن واتجهت للمطبخ
وسمعت وحدة منهن گالت:-منها لو منة؟
ام عبدالله:-لا هي عاقر
غمضت عيوني وشهگت
ودخلت للمطبخ
ورغد اجت يمي ترزل بية
غيث:-مال هسة راشدي وافر راسج فر
يعني ليش ماتفتهمين الكلام
اني مو من البداية كايلج لاتجيبين هذا الطاري
ملاك:-معبالي همه هيج
غيث:-مو بس همه بابا الناس كلها هيج
لا عبالج كلها مثلج
يستغلون نقطة ضعف البشر
ملاك:-بس اني ما مأذيتهم
غيث:-وعبالج من ما اتأذيهم ما يأذوج؟
ملاك:-ما ادري
ضل ساكت
رجعت گتلة:-المن يردون تاخذ؟
ضحك:-زينب بت عمي ابو عبدالله
دمعت عيوني
وسكتت باوعلي وحضني وباس راسي
للعصر ودخلو عمامة
وجان الكُل جاي حرفياً
بدون استثناء استغربت جيتهم
وهمه يقنعون بي وصياح وهوسة
واني كاعدة استمعلهم
ادخلوا عمامة كلهم
بقو يرزلون بي لأن يصيح
ختم كلام بـ:-لحد يدخل بحياتي شيلو ايدكم عني
ابو احمد:-ولكك شنو مالنه دخل بعد ما كبرك وكسر ضهرة علمودك تگلة مالك دخل
غيث:-شنو تعيروني يابة؟ جاي اگللكم
زوجتي مكتفي بيها لا اريد طفل ولا اريد صخام
ابو احمد:-رايد مصلحتك ماجاي يعيرك
شنو تضل طول العمر
بلا جاهل المن متزوج لعد اذا ماتأسس اسرة
غيث:-مااريد اسرة اني مقتنع هيج
محد اله دخل
ابو عبدلله:-وليش هي بكيفك
غيث:-مو طفل اني حتى انجبر ؏ شي مارايدة
مرتي ورايدها بعد مالكم شي يمي مادام
اعرف الأريدة والماريدة
ابو عبدلله:-اوصل مرحححححللللة تررررة
حتتتتتتى جبببببرررر اجبرررررك ووووواااالله
ضحك بصوت عالي
وگال:-ديلا اجبرني خلي اشوف
ابو عبدالله:-غصباً ؏ راسك فاهم وتتزوج بت عمك ورجلك فوك راسك
غيث:-مو بكيف احد اتزوج
ابو علي:-غيييث احترررم عمك مو زين ينطيك بنته ومفضل الزلم كلهااا وانطاها الك فوكاها
غيث:-موووو بكييييفكمممم محدددد اللللله
دخلللل بحيااااتي ماااتزوج على مرررررتي لووو
تنطبكك السماااا على الكااااع فاهمييين لووو لا
بنتك عمي على عيني ورراسي بس مستحيييل اخذهاا زوجة اللي
ابو علي:-ولككك جاييين مناك لهنااا
وتاااااليها تحححححجي راااافع خششششممممك
اسمع صوت انفاسة العالية
گال بهدوء:-جيتكم على عيني وراسي وتفكيركم
بمستقبلي هم مقبول ابنكم وحقكم تفكرون بيه
بس فكرة اتزوج شيلوها من عقلكم تردون
طفل؟
تدللون اكو هواي اطفال بالميتم اخذ يتيم
واربي واكسب الأجر بي
ابو عبدالله:-ششنووو تررريد تربيلك نغل؟
غيث:-شنوو نغل ميتمم ميتمم
مماخذة من الشارع
ابو عبدلله:-وانت شمدريك منين اجه شمدريك
منو ابو ومنو امه؟ والله يغيث اذا صدك سويتها لا
اعرفك ولاتعرفني ورجلك اكسرها اذا عتبت باب
بيتي فاهم لولا؟ وعمامك كلها يتبرون منك
لاعبالك مانكدرلك
الباقيين أيدو كلامه
سمعت صوت ضحكتة وصوتة
؏ خفيف:-تبروا مني قابل شكو شراح يصير
تنگلب الكائنات
ابو علي:-احترم شيباتنة ؏ اقل غيث
غيث:-المطلوب هسة؟
ابو عبدالله:-تتزوج زينب بتي
غيث:-والعباس ما اتزوجها وهاي حلفت
ابو علي:-گوموا هذا ما محترمنة
كول من الأخير مرتك ماترضى وصاير خرخاشة
بيدها
غيث:-اي هو اني صاير خرخاشة شتردون بعد
ابو عبدالله:-هاي اني ربيتك هيج؟
كسرت ضهر عمتك هيج تجازيها علمود مرتك؟
تفضل البنية العشت وياها وتربيت وياها
؏ غريبة وفوگاها عاكر؟
زلزل البيت بصياح
غيث مرة الثانية واني مغمضة عيوني
استمع واطحن بروحي اكثر
وللمرة الثانية طلعوا من البيت
واني ابجي واشاهك
شجاي يصير ياربي
همه يحبوا ليش هيج يسون؟
رغد:-اسكتي يمعودة مايتزوج راح تموتين
ملاك:-الله ياخذني واخلص شووووكت
ارتااااح شووكت والله تعبت والله
قيس:-خلي يتزوجون عليجن بلكي
يكسرون خشومجن هاي المرفوعة للسگف
رفعت عيني وخزرتة وهو
يدخن ويضحك ويحشش ماخذ السالفة
كلها بضحك
رغد:-مو وكتك انت انلصم
قيس:-مو اجي تعرفين شسوي
رغد:-واخوي يعرف شيسوي اتجفي شري
احسلك
قيس:-ضلن نوحن غييييث تعاااال خوية
طب يمشي بثگل
باوعلي وجر نفس ودار وجهه
لقيس:-شعندك هنا
قيس:-اضحك عليكم
غيث:-امشي اطلع برة
قيس:-هو هم صوجي اهدي النفوس
عافنة وطلع وهو يدردم
طب گعد وعمتة زهرة تحجي وياه
وتكلة معليك خلي يولون اني احاجيهم
وهو يباوعلي ويهديني بعيونة
كلها راحت وضل هو يمي يبوس بأصابعي
غيث:-لو تنصب ذهب هم ما اخذها
ملاك:-گلبي مقبوض
غيث:-ماتزوج وداعة امي اكو اعز من امي؟
وحلفتلج بيها ولو ادري اخذج
واشرد واشوف يا نغل اليندل مكاني
ولا انزل دمعة من عيونج الحلوات
مسحت دموعي
وباوعتلة:-شنو تكول اكو اعز مني امي؟
يعني اني مو عزيزة عندك
غيث:-هو انتي امي
ضحكت وشبگتة وبست ركبتة
وهو يبوس بشعري ويگلي:-ولج اني بس بعيونج
اكدر اعيش شلون ترديني اباوع بعيون
غيرج؟
ملاك:-اني هم احب عيونك
غيث:-دنجبي هو اني لو عندي عيونج
اباوع بعيون الناس بعد
ضحكت وضربتة بفخذة
شالني وصعدنة لفوك
ثاني يوم راح لدوامة
قفلت البيبان ورجعت نمت
نص ساعه
وموبايلي يدك فتحت تك عين
احاول اشوف الأسم عدل
معقولة لو اني اتوهم؟
فتحت الخط وهمست بصوت نعسان:-الوو
حجت سريع:-ها يمة ملوكة انزلي افتحيلي الباب
عگدت حاجبي وگلت:-شنو افتح الباب يا
باب؟
ام عبدالله:-دنزليلي هسة
كمت غلقت الخط
باوعت الساعة بـ9 الصبح
شتريد مني؟
گمت غيرت ملابسي
ونزلت خطوة اتقدم بيها وخطوة لا
وصافنة بالفراغ
فتحت باب البيت وهي دخلت
بسرعة عگدت حاجبي
شبگتني وهمست بصوت
مخنوك:-شلونج حبيبتي
ملاك:-هلو عمة
ام عبدالله:-ادري انتي مصدومة مني لان
اجيتج بهيج وقت
ملاك:-اي والله اتفاجأت
تعاي ادخلي
ام عبدالله:-لا لا خليني هنا
ملاك:-عمة خوفتيني احجي شكو
دمعت عيونها وگالت:-اعتبريني امج
خالتج عمتج اعتبري بنتي اختج
اعتبريها مثل ريم يمة ابوس ايدج
نزلن دموعها وشهگت:-عمة شكو
بدت تحجيلي واني صافنة
؏ كلمة كلمة تحجيها احس راسي شيب
انخفضت انفاسي وهي تراويني الصور
واديها ترجف وتحجي وتشهك
ام عبدالله:-يكتلها وووااالله يكتلها
تعاي تعاي شوفي حال عمج تعاي
فتحت الباب شوية واني اشوفة
گاعد ؏ بنيد السيارة ويدخن
وعيونة حمر
ملاك:-عمة ماكدر
ام عبدالله:-ابوس ايدج والله تنذبح بتي
والله تنكتل ولج يمة والله يكتلها اخوها
ماريد اخسر بتي ماريد ابوس رجليج
بداعة امج
ملاك:-بس اني ما مجبورة عمة
شلون ضيعتي بتج هيج
السبب منج
تمتمت بكلماتها وحجاياتها ترعبني
اكثر واني اتخيل ريم ببدالها!
الف فكرة وفكرة صارت براسي
دكت ؏ بتها رقية وهمست وهي
تبجي وتشهك وتحجي ماتنفهم كلماتها
ام عبدالله:-فتحيلي كامرة ؏ زينب
فتحت كامرة وخلت التلفون
بيدي
رموش عيوني وكفت واني اشوفها
بهالمنضر المُرعب
همست:-زينب!
ماجنت أعرف بهالحظة تنگلب حياتي؟
ولا جنت اعرف الأريدة
مضموم بين احشائها؟...
