رواية ذاري النجوم الفصل الرابع بقلم زهراء السراي
:✥━━━༺ زهراء جودة السراي ༻━━━✥
الجزاء من جنس العمل
سنة لا تخون
وإن أمهلت لا تُهمِل
تُعيد لكل يدٍ ما بسطت
ولكل روحٍ ما اختارت
#ذاري_النجوم{ملحمة الكبرياء ✥━━━༺✦༻━━━✥
ياثگل ساعات استرجاع
الحق على الظالم
ويا خفتها على المظلوم
بساعة الخلص عمي كلامه
هاجس تسودن وگف وگفة وعيونه
گامت تذب نار وشرار وصاح
- بوووووويه حلفتلي
-وانت حلفتلها أيمان غليظة وچنت تشهدني
وتگلي مااريد غيرها
انت مثل الواوي خاااااااين
طمعتك بالشهر حتى ابردك عنها
-بوووووووووووويه
-أنا مو أبو أحد أنا أبووووو
الحقققققققگ وعذبة هي الحگ
-يعني شنيييييي بووووويه
-يعني مالك مرة يمي
عذبة مهرة أصيلة
واجاها خيالها
-ماااااااتعرس وراسي يشم الهووووا
ورووووح أمي
-ازززفها وعينك تشوووف وافوتها على خشمك
فجررررت ولك وعبالك مالها أحد
أنا الها انت عرررست والله قسملك
حتى جاهل بعد شعندك يم بتي
صفنت علي اريد اصدگ
السمعته
-بوووويه
-ووجعة ابوي مو طرشتلي اروح للشيخ
ورحت گالي ابنك مرته حبلة راضي
زحمة گدام الناس نسابته
الابو ماراضي على ابنه وطلب مني
اراضيكم واعرسلك انت وعذبة لأن بس تسمع
بيك راح تخلف تعووووفك لو لا
وگفت درت وجهي وطلعت من الحجرة
ركض وراي عتني من چتافي
-بس نحجييييي شبييييج
-نحچي چا شعدنه
-خوووش اسمعيني والله من ليلة
العرس حبلت وروح امي ماواصلها
-مرتك عيبببب تگلي هالحچي توصلها
ماتوصلها بكيفك
-شترررررردين اسوي گووولي
على شررررطچ ماشي بس خل نروح
منا وهناك نعرس
-خوووش أرجع بس بشرط
ضحكت عيونه ويعاين لحلگي
متاني شرطي
-تطلگ بت اللواء ونعرس
بلع ريگه وسكت وطالت
سكتة
طبطبت على صدره ومشيت
-مبروك ماجالك
درت وجهي ونمت بحجرتي
اقره القرآن على گلبي حتى
يبرد
صوتة العالي وسكتة عمي خلا
يحير شيسوي
لحد ما ثاني يوم دگ الباب طلعتله
-تعااااااي يم ابووووي
دخلت الحجرررة وعمي گاعد
وجهه يضحك وانا اعرف هو مرتاح
لأن اخذلي حگي
-بوووووويه هاي گدامممممك شتشرط
اخليلها تردييييين البيت احطه بأسمچ
-وتظل رايح اسمر طويل وراد اسمر
طويل تگاسم الليالي بيني وبين مرتك
-الليالي اكثررررها الچ
-ومرتك بت الباشا تدرررررررري
-معليچ بكل شي بس گولي أي
-ماااگوووول اي طاااارت الطيوووووور
بأرزاقها انت عرست ومرتك حبلة انا شتسوي بيه
التفت حااااير صرخ
-بوووووويه ردها الي انت طلگتها مني بحيلة
-نفسها الحيلة الخليت بيها بنيت
عمك تطبخ وتنظف وانت ناوي على خراب
روحها بوووويه لو تموووت مااردها الك
-بووووووويه لا تسووودني
وعليييييييي انهي عليها واگعدها
طوووول عمرها
وگف عمي وطگ عصاته بالگاع
-أن چانك زلمة ياهوووويجس سويها
وشوووف ياهو اليرضى عليك بعد
-ورووووح امي مصلحة
-بووووية انا زلمة مثلك لا تشوفني اعمى
ماكو مصلحة وانت محبل مرتك اسكتتتتت عيب
لا تعيدها
عاينتله وطلعت وانا انشد عمي
-شتتريگ عمي
-بيضات سلگ بعد ابووج
وسوي لأخيج ريوگ گلبه يابس من البارحة
درت وجهي اطلع وانرگعت طاسة الاستكانات
بالحايط بصفي
-بوووووية يااخيييج لا تسووودني
مررررتي مرررتي
-شنو بوية انطگيت براااااسك
مو جبت المومن گبل شهرين وطلگتها
-غيييير انتَ گلتلي اردها الك
-ليش بويه هو شظال بالعمر
حتى اظلم البت
واتحاسب يم الله حساب عسيير
-مااااارد حتى لدوامي ان چان
مارديتها لذمتي
رد اجاني للمطبخ
-عذبة مايصييير سنين عمرنا تضيع
خسارة
-سنين عمري انت ماخسرت شي
مرتك حبلة وگاعدة معززة مكرمة
بت الباشووووات شلك بعذبة بعددددد
-عذببببببببة أنا هااااااجس
-وأنا عذببببببببببة والله والله لو امووووت
وردة الروح معلگة بيك اذب روحي امووووت
دفر الباب وطلع وهج من البيت
فررررد نوووووب
للمغرب رد لم هدووومه
وطلع البدلة وشجايبلي خلاهن بتنور الطين
وشعلهن وگعد گبال التنور
أنا گلبي جلد وچن ثلج الدنيا
انصب بي طلعت قوري الچاي ورحت للتنور
هو يعاينلي بيدي طاسة بيها عجين
وبيضات لفيت البيضة بالعجينة
ودهربتها بالتنور لمن سويتهن خمسة
وگف يعاين وعيونه ظلمت وأعصابه تتخافگ
-شگاعد تسوين
-اشويلك انت وعمي بيضات واخدر الچاي
عالجمرية خسارة تهفت هي نار ومشتعلة
أستفيد منها للبيضات نتعشى
ماگدر يلزم روحه لزم متوني وهزني هز
-تسوووودنتي ولچ عذببببببة
تدووووسين جرحي وتتعدين هيچ
-أنا
-چا امييييييي هذا نيشانچ بالتنور وتگليلي
اشويلي بيضات
-صدگ ولو بعدها العجينة مامختمرة
اخبزلي چم گرصة للعشا بهالجمرية
دفعني ومشى للحجرة وعله حسه
وهو يتوسل عمي
-بووووويه بروووح امي شوفلك حل
-يابويه مااگدر هي بت بالغة رشيييد
امرها بيدها
-اذا انتَ حاجيتها ترضى
-أنا نفسي ماارضالها تردلك شني بويه
الدنيا بس الك
-أنت ببالك تطيها لواحد گلي ياهو
حتى اترس حلگة رصاص
-بعد انطر ياهو اليستاهل ياخذ
بنيتي
-بوووويه لا تدولبني
-اگلك انت دوختني بووويه عذبة
أستكين چاي من ايدچ
طبيت للحجرة
-هسه يخدر والبيضات يستون ونتعشى
-فدوة لأيدچ بعد ابوچ
شويه وحطيت العشه گاعدة واطيح بالعجين
المحترگ واكشر بالبيضات خليت گدامهم
كل واحد أثنين
عاينلي سويت روحي كلش
گعدت اكل وعمي يسولف
-البيضات اليوم طيبات
-شويتهن شوي هاجس شعل جمرية وخليتلك
البيضات ببطنها
-بس هذني كبار
-مال بشوش
-مو هالأگول
هو ياكل وساكت صبيتله استكان
چاي تناوشه مني وعيونة تجدح
-بويه شني تروح لبيتك باچر
عمي سأله وهو غص بالچاي ورد جاوب
-بوية نازل لدوامي يابيت
-شني بويه اليوم كله نسيان چا مرتك
وين تظل
صفن وسكت يعاينلي
نكتت ايدي من الاكل وگمت
لحگني راكض
-عذبة رديلي وعلي مااگدر بلياچ
-لا تگدر وگدرت تدري ليش كاتل روحك علي
هسة چيف ماحصلتني وطرت من ايدك
مثل المشتهيلة اكلة بس ياكلهة يذب الزايد
منها للچلاب وهاي انت تريدني چيف ماحصلتني
ماميت علي
-هذااااا انا هيچ تظنين عذبة
-ماااااظن ادرررري دراية بس هااااي
ربك نجدني وخلالي عمييييي ياخذلي
حگي من بييين عيوووونك
لزم چفوفي يريدني اهدة
-شلوووون ترضين گليلي
عاينتله وبحرگة گتله
-هذا اليرضيني من انت ورتبتك والنفخ
النافخ روحك بي والكبارة وشوفة الحال
كلهن صارن حدر رجليه هيييييييچ
أنا رضيت ………
ضربني وفر وجهي فر
-هههههههههه أبن عمي انداست نجومك
حدر جدام عذبة وصرتلك مثل حلم ابليس بالجنة
جرني من راسي ووگعت چفيتي
-أنا الطابت نفسي منچ ومو هاجس التدوسه مرة
دفعت ايده عدلت چفيتي ومشيت للحجرة
بچيت وطگ گلبي من القهر بس
المهم دست على گلبه وخليته يعرف
ويامن دگ روحه
الفجرية سمعت صوت الباب انفتح وصوت
عمي يحاچي
-لا تظل تاكل بروحك كل شي بالدنيا قسمة
وانت قسمتك ويه بت اللواء
وعذبة تروح لصاحب نصيبها
-نشووف بوووويه
طلعت عاينلي بيدي طاسة الماي
وجهه ابتشر وضحك
وگفت بالباب رشيت ورا طاسة الماي
وگلتلة
-الله وياك خووووويه
التفتت جدحت عيونه ورد ماشي الي
بسرعة سديت الباب واخذت عمي بيدي
ماسمعت بعدها بس صوت السيارة وهي
تحرك وعمي يضحك
-يابوووويه انچلبتي فرد نوب
جريت ايدة بستها
-الله يخليك اليه ماانسى السويته علمودي
-انچبي رديني لفراشي هذا ظل الليل
كله يدخن تتن وياكل بروحه مانمت من ورا خل ارد نومتي
رد عمي نام وانا هم نمت
مااگول مرتاحة بس يمكن لأن حطيت
حد اله ارتاحيت
الأيام البعدها التهيت بعمي والبيت
واختي سنية جابت خليتها
هي وجهالها يمي لحد ماصارت زينة
شهر زمان مر
واجتني نعمة تهف گلبها نار وعيونها
تمطر گعدتها بحجرتي وهي طگت
علي مثل بابور النار
-شمتااااانية بعد ما هويجس
طلگج ليش ماترضين بالاجاچ
-حماچ حسن خل يكف عني مااخذه
-ليييييش فهميني ليوين تظلين
بلايه عرس ومگابلة الرازقيات
وتحنين للگ***د الضحك عليچ
وخلاچ مثل البيت الوگف
-ماحانة لأحد بس حسيون نسيواني
ووين ماكو نسوان لاز روحه انا
مااريد اخذ حرمة مثلي اريدلي
رجال معدل وهم مااگدر اعرس
وعمي يظل لوحده
-عمي مسؤولية هويييجس ياخذه
يمه يم الخاتووونة الاخذها
-ماااااريد لا تلحين
-ولچ البگدچ مخلفات ومعييييلات
-عوووووع وماظل بس حسيوون اعرسله
واخلف منه خليييني گاعدة احسنلي
طب عمي للحجرة ويه ابن نعمة
هي كامت حبت راسه
-عميييي
-سمعتچ بعد ابوووچ
انا هم تردين الصدگ حماچ حسيون
مااحبة اثيول وحلگه يمطگ تمطگ من يحچي مو مثل اخوته رجلج ورجل سنية
-چا عمي شلوووون تظل وهي
كبررت مو حدثة بعد
-حدثة وخاتونة البنات والاريدها
اله اجاني ودگ بابي وانا مااطيته
رد منا لمن انشدها
-يااااااهوووو عمي
-واحد معدل مفصل تفصال خير
متعلم وسبع كلهن حاويهن
فزيت رغم عملة هاجس بعدة گلبي يدگ اله وروحي
رادة من سالفة العرس صاحت نعمة
-ظلييييي گاعدة وسمعي
عمميييي هاي گدامك ترررررى ماترضى
وكل ماگللها صاحت ماااريد اعررررس
-تعرررررس ونص ماعليچ بيها
خليها
-شلوون……
-هذا اللون ماعليچ بييييها
سلمت نعمة وطلعت وعمي
گعد وصاحلي يمه
-اگعدي احاچيچ
گعدت وهو لزم چفوفي
-حچي اختچ صدگ بووويه
-عمي
-ها بعد ابوچ
بچيت وعله صوووتي من القهر
خلاني اسكت وحدي
-حقچ وماالومچ يابويه بس ………
-اذا اني بنيتك وتودني لا تطيني
-والله اكثر من بنيتي
خايبة انا مصبح مروح مريض
من التتن ياساعة تلگيني ميت
بفراشي وهذا المسودن ساعتها
ياخذچ غصب الاجاچ ابن اجاويد
معدل ومعلم ومأدب
-معلم
-ايييييييي وتعرفينه راسه مايشيله اذا فاتت حرمة
-ماعدنه معلم هنا بس خزعل
-هو بعينه وعيانه خززززعل
اجاني نوبتين للگاع
وانا راضي بدينه واخلاقه الچ
دانشي عقلچ الشيخ البارحة
يم ربعي اجاني يريد اراضي
هاجس وانا ماعندي شي
ويا بسسسس مااريده يفشلني
ويا الناس وياخذچ غصبا عليه
گال نازل براس الشهر هذا
بكل حرگة گلبي وقهرتي وگفت
ورديت بشهگة على عمي
-عمي انا راضية بس بشرط
-على راسي انا اگله
-نگطع مهر گبل لا يرد هاجس
-تمممم على راسي
طلعت من الحجرة ويا بچي البچيته
وأنا اگطع بالرازقي والجوري الزارعليا
طيحت سياج السگيفة
ولميته وحرگته حدر السدرة
على راگ الشط صار رماد
تطاير ويه الهوه
بس رديت وشفت مكان السگيفة فارغ
الله ذب عليه بچي
وگعدت اريد اعدلهن مااجن بيدي
لميت الوردات
ودشيت لحجرتي حاضنتهن وانوح
-شلون اطاك گلبك تغدر بيه
وانا المناطرتك مثل الام التناطر
سباح گلبها وليدها يكبر
گدام عيووونها
شلون اطاك گلبك توسد وحدة
غير عذبة على صدرك
وين ليالي وسهري ومناطر الفجر
عن لا تغفى عيني وافوتك وانت
رايح لشغلك وماالحگ احصنك بالمعوذات
واطش وراك طاسة الماي حتى تردلي سالم
كل شي بعته من شفت زخرف الدنيا ولمعتها
عاينت للوردات بحضني مردتهن مرد بالگاع
وانا اعاهد روحي
-من هالساعة ياهاجس
لا اعرفك ولا تعرفني
خييييط وانگطع ومحلة وانجسمت نصين
نمت هالليلة بعذاب لحد ماطر
الفجر فزيت اصلي واذكر
الله عسى يبرد نار گلبي
وره يومين يصادف خميس
التمت الزلام واخواتي وزلمهن
وصارت گعدتي واتفق عمي ويه
خزعل عالعداد مالتي وشرط علي
نگطع مهر بهالاسبوع
رضة عالكلام وصاحني رجل نعمة
-خوية عذبة الولد شاريچ
واخيتچ گالتلي تبجي ومقهورة
من الصار هذا حگچ بس انتِ راح
تصيرين على ذمة زلمة ثاني الراح راح
هسه عليج بالولد الناطرچ يحاجيچ بره خوش
هزيت راسي واشرلي
-لبسي عباتچ وتعاي
لبست وطلعت وره رجل نعمة يم گاعنا
عاينتله بقاط الافندية
هو اسمر مربوع مرتب عيونه وسيعة
وشعره يهف ويه الهوا
-خويه هاي البت تحاجيها التريده
صار رجل نعمة على صفحة وانا منزلة راسي
-عذبة شو رفعي راسچ احاجيچ
رفعت راسي ضحك وسمى بسم الله
-بسم الله ماشاء الله
شوفي يمكن سمعتي عدادچ شگد
اذا ماعاجبچ ازيده الچ
-لا هاي هي الفلوس ماتكبر بخت
-معدلة بس التطلبي يتم على راسي
-ماتقصر بس اريد منك شي
-شنهو
-اريد اروح وارد على عمي
واذا رضى يعيش وياي
حط ايده على راسه
-هاي سهلة عگب باچر اجيب المومن
واعدادچ اخذج للولاية تشترين التردينه
-لا مااكلفك انت جيب
رد عليه بس بكلام مثل لسان اهل الولاية
-لا تقللين من قيمة نفسچ هذا حقچ
تشترين وتحطين التردينه
-خوش يعلي شانك ان شاء الله
-امييين بوجود مرة اصيلة مثلج
سلم عليه وعلى رجل نعمة وراح
رديت للحوش بس عبالك طايرة
من روحي وصلة لاانا لهاجس
ولا انا لخزعل حيييرة الگلب حيرة
چبيرة
الدموع لثاني يوم مافارگتني
اشتغل وافتر واروح وأرد
بلا واهس وبلايا روح
اندگ باب الحوش رحتله
فتحتة واگف خزعل وبيدة علاگة چبيرة سلم عليه بأدب
-الحجي موجود
-موجود هلا بيك
سويتله درب ودش للربعة وصلتله عمي
ورديت شويه واخذت الچاي وصاحلي عمي
-تعاي بويه بعد مابينه غريب
شوفي زلمتچ شيريد
-رايد سلامتك عمي
بس هذا ثوب گطعان المهر مال عذبة
وتلگه ويا كل سوالف العروس
باچر بحيل الله نگطع مهر
سلم وطلع اخذت العلاگة
وعمي رد طلع للگاع يتونس
عالبطات فتحتها بيها ثوب وردي
مطرز بكلبدون فضة ويا قندرة
بلونه ووردات بلونه بيهن شكالات
يتشكلن بالراس
وشمعات مفضضات اثنين كبار
وشيشة بيها لون وردي مثل
الدهن خفيف مكتوب عليهة (ماء الأحسان)
قريت المكتوب للوجه للخدود توردهن
وحمرة قلمها ازرك وكحلة وشيشة ريحة
حلوووات ويردن الروح
بس أنا روحي مكسورة
مااادري راح اكسر روحي
اذا عرست لو اكسر خشم هاجس
للعصر اجني اخواتي وتطيح نعمة
وتاخذ الاذن من عمي وتاخذني
للحفافة
رحت وحدة رديت وحدة ثانية
عيوني وسعت زيادة من رفعتلي حاجبي
ووجهي زاد بياضه وصار بحمار
من شالت الشعر
گصتلي گذلة وردينة للحوش
گعدن خواتي وياي نعمة عصبية
-شوفي هاي كشرتچ فكيها
خوووش ولچ معلم ومعدل ووحيد
وبيتچ وحدچ خايبة سنين تتانين
ذاك الچلب تاليتها بس شاف
الولاية تسووودن
-شبيچ وياها نعمة على كيفج
حضنتني سنية وأنا أبچي
-مابببببيه شي اخيتچ راسها
وروحها وگلبها ويه ذاك الباع
العشررررة
-حقها نعمة شني تردينها تنسى بساع بساع
عوووفيها عذووبة معدلة وتعرف
حلال الله وحرامه وتدري
گبل لا تروح لبيت رجلها
لزوم عليهه تنسى ابن عمها
مووووو
هزيتلها راسي باستني
وطلعت هي ونعمة ثاني يوم
الصبح گعدت ريگت عمي
وطبيت سبحت واجن اخواتي
وجهالهن وياهن الحفافة حلت شعري ولبست الثوب
وخلتلي الشكالات بصفحة نزلت
گذلتي على عيوني
ومن هذا مال الخدود لونت خدودي
وردن وشوية حمرة وكحلة
انا مبوزة واحس صفحة من گلبي
ماتت وره نزلة الشمس التمت
العالم بالحوش ويم عمي
بالربعة دشو وياهم المومن
اخواتي وزعن كليجة وشربت
لحد ما بده گطعان المهر
وانا وره باب الربعة صاحولي
وسكتت مرة واثنين بالثالثة
ندستني نعمة اطيت موافقتي
ورديت لحجرتي
ساعة وكفت الناس وصاحولي
للربعة عمي گاعد واخواتي لفلفن ارواحهن
بالعبي
لگيته گاعد بقاط مال أفندي
وشعر يتلامع وگف من شافني
عمي صاح لأخواتي
-بويه خلن الزلمة ويه مرته
وتعالن اخذني اتكرم
طلعو وهو تدنى عليه
-عذبة
-هااا
-شو خل اشوفچ
رفعت راسي ضحك
-لايگلچ هاللون وگاعد ويه
ورد خدودچ
-وانت هم
ضحك ووگف
-شو اوگفي
وگفت جر الچفية من راسي
وعدل شعري على چتافي
-اول مرة اشوف گمر بوجهه ثلمة
مسح مكان الجرح القديم وضحك
اكو علاگة سودة بيها سحابة فتحها
-جبتلچ كاميرا نتصور
فتحت عيوني ماعدى صورة الهوية
ماماخذة تصاوير
گعد عدل روحة وعدل شعري ومدري شسوالها وصاح لنعمة
-خوية عايني منا وبس تشوفينة صرنة بالنص
دوسي الدگمة خوش
علمها ووگف بصفي
لفني حدر جنحه كشيت ونزلت راسي
-بسررررعة رفعي راسچ راح نتصور
رفعت راسي وفزيت فاتحة عيوني
من نغزني بصفحتي
وصورة ثانية وثالثة
عاينلي وهو يلم كامرته بعد ماطلعت نعمة
-هاي عندي مدير مدرستي سافر
ووصيته جاب هاي
الكاميرا نادرة ومكلفة
بس لخاطرچ جبتها
-يجبر بخاطرك
-اگلچ عذبة
-هاا
بعدني مارادة حجايته بسرعة
باس خدي ووعدل وگفته
-على يوم الاثنين اخذچ تشترين نيشانچ
-الله كريم
طلع بعد ماسلم على عمي وخله بيدي
فلوس گال ذني قريان فاتحة
رديت للحجرة اخواتي متانيات نزعت
ولبست هدومي وهن يعاينن
-بس التگدر منچن تظل تعشي عمي
-شبيچ عذوبة
-ارد انام
رادت تحجي نعمة ردتها سنية واخذتها
وطلعت من الحجرة وانا غطيت بفراشي
امسح بوجهي مچان بوسته
ومكان ادي وگلبي يخفگ
-شسوووووووويت بينه هاجس
الله لا يشووووفك الراحة
ظليت ابجي بخنيگ وللعصر انا
بس اتگلب بمكاني اسأل روحي
شلون رضيت
شلون راح اعيش ويا
حرام عليه وانا گلبي بعده
يم ذاك الخاني وحرگ گلبي
شلون هانت علي سنينه
ووگفاتنا حدر الشمس
ومراكضنا بالتراب واللعب
بالساجية
مافاد العتب واللوم
ويه روحي گمت لعمي
موو ذنبه الصار حتى مااگعد
وياه وأداري
مر اليوم والثاني واندگ باب الحوش
فتحته وطب هاجس حليان اكثر
وبهدومه العسكرية وقيافته
ايدي مترسة علاليگ وغراض
-الله يساعدك
حاجيته بدون مااباوع بوجهه
-يساعد بختچ شلونچ عذبة
-بخير
عاونته بالغراض ورحت
طبيت ركض لعمي حضنه ويتعذر
على رفعة صوته وصياحة بآخر مرة
گعدو وحطيت الغدة من المسواگ الجايبة
حطيت الصينية وطلعت سمعت صوته ورايه
-عذوبة
-ها
-تعاي تغدي وين رايحة
-مالي نفس
مشيت وهو رد للحجرة
سويتلهم چاي ويسولفون
شويه وگال عمي الچاي برد عمي
اخذتة احمي واسمع حجيهم بالحجرة
-بووويه شتگول اعدل البيت وابني طابوگ
-عليمن بويه هو راح يطيح
-يطيح عليش
-اسوي بس گاع
-گاعيش بويه بس يلا خلي گاع
احسن حتى اخذكم وياي
انت وعذبة
-أنا يمكن اروح وياك
والبت تروح لبيت زلمتها
ماسمعت حسه بس صوت صيحته
-يازلممممممممة بويه
رجف گلبي واسمع صوته يهدر
اجاني يركض وانعتيت فرد عته
من متوني ردت اطيح
يتراجف وگوه يحچي
-يااااااااهو العار الرضيتي بي
غيييير هاااااجس
عاينتله ورديت درت للبريمز
-واحد آدميييي
رد دارني علي
-ياااااهو الآدمي غيري اليستاهلج
-واحد شارررريني
طگت عيونه وتدنالي يعاين لوجهي
-وصابببببغة عيونچ كحل علموده
مد ايده لوجهي تدنيت منة لزم فچوچي حيل
وصابغة شفافچ دييييرم اله مووووووو
ونابتة الحاجب نبت لخاااااااااطره يااااااهو
هوووووووو
مرد حلگي مرد بأصابعه ورد يركض
-المن اطييييتها بويه
-لخزعل اجاني وطلبها
-غصبتها
-لا برضاتها
رد واجاني بعدني اخوط بالقوري
شاله وطشه عالحايط وتطافر الچاي
الحار على چفوفي ومتوني صرخت
بس طفار
-شلوووون رضيتي
-رضيت چا شني الدنيا بس الك
شنييييي انت تعرس وتعيش وانا
مكانك رررررراوح
-مااااتعرسسسين وانا اشم الهوا
-مالك حگ عليه انت البعت
وهذا عمي برضاته گطعت مهر
وبرضاته يجي يعيش وياي
ماعرست وحدييييي
-يعيش وياااااچ ابووووي تاخذينه
لبيت هذا العار
-موووووو عار زلمة معدل دگ الباب
ورضيت على دينه واخلاقه
وعمي مو فرخ جاهل حتى تاخذه لو
انا اخذه غصب بكيفه عمي وين يريد
غصباً عليك وعليه نحطه على راسنا خووووش
وعمي هذا اشييييله برموش عيوووني
مثل ماشلته ثلث سنين وانت ماتعرف بي
-ماااااتعررررسين
صوت عمي صاح
-ليش بوووويه هي سايبة زلمتها عاقدها
هسه ياخذها بثوبها اذا يريد
-لا تگلي زلمتهاااا لا تگووولها
-بويه محرمة البت عليك عرست
بعد گطعت مهرها
-ماااااكو ناهيها أنا وشني گطعان المهر
النسوان للكلة وتخرب اعراسهن ظلت عليها
-هاجس بويه
هدأ صوته وراح لعمي
-بويه البت طابت نفسها منك وان چان
غصبتها تكتل روحها عوووفها بويه
-منهييييية بووووويه منهية
وانت ترووووح وياي لبغداد وهي
اخذها
-البت تعرس وانا مو طوووع احد
لا انت ولا هي ابقى ببيتي ووحدي
شني بووووووية عاللگمة
احشم اي واحد يوكلني
افتر افتر وركض لمسدسه صحت
لعمي صاح بعلو صوته
-هاااااااجس ان چانك رايح لخزعل وروح
امك العزيزة اشوفلي درب واخذ البت وياي
ولا انت تحصلها ولا غيييييرك
عييييب بوووويه عيب تقلل من قدر روووووحك
-چا انا الضابط يجي واحد مثل خزعل
ياخذ حررررمتي
-هااااااي نجماتك ادووووسهن بگيوتي
بالقنننندرة يندااااسن شما تكبر ماتكبر على
نااااسك عذبة تعررررررس
غصباً علييييك شني بويه
طالبها طلابة زلمة معرس ومرتك
حبلة
-لوووو انا لوووووو هي اختار بويه
-لا انت ولا هي
دار عمي وجهه ودش حجرته وصاحله
-انا مناطر للفجر اذا سمعت بس نفس
لعذبة انت مأذيها وروح امك اذبحك بمچانك
ومايرفلي جفن
راح عمي وهو مثل الطير المذبوح
يلووووب للمغرب عمي ماقبل ياكل
وهو يفتر حواليه مثل الذيب يريد
بس يغافل عمي ويغدر
الساعات مرت وانا بحجرتي
مليت حطيت راسي عالمخدة
وتعبت من البچي نمت
وغفيت بس مامرتاحة
سبة وكت ونفس صار برگبتي
وصوته يرجف
-تبيعيني ولچ عذبة
فزيت وگمت وتعثرت من جرني جر
من چفوف رجليه لحد ماصرت بين ايدي
-ولچ تبدلين هاااااجس بخزعل
تبدلين النجم بالترااااب
سحلني من گصيبتي وهو مثل المسودن
يأشرلي على حجرة عمي
-اشششش اموتچ بمكانچ
وعلي
وگف وجرني ويا طلعني بالحوش ساد
حلگي وفك الباب وطلعنا يم الساجية
-عووود شلعتي الرازقيات
حتى تشلعيني من گلبچ
معشعش أنااااااا هنا
دگ على گلبي حيل وبيده
خنجره المفضض يأشرلي
امشي
مشى بيه لراگ الشط حدر السدرة
خانگني خنگ بس ارافس
جر شكالتي وفل الضفيرة
وگام يمشط بيها بأصابعه
-هذااااا الشعر راح يتوسد صدر
خززززيعل الفاااهي
عت راسي حيل ركعت بالگاع وگعد وياي
-ترضيييين واحد غير هاجس
يتنشگ ريحتچ
لم شعري بيده وهد حلگي
يدريني اخاف من الفضيحة ومااصرخ
اريد اشرد عت راسي عت
وشعري ملموم بين ادي
الگمرية تضرب على وجهه وعيونه
تنطق بالخراب
-هاي الضفيييرة ما تنحل بس على صدرررررري
گال حچايته ومشى الخنجر بشعري
اسمع صوت الشعر يتگطع
شعره شعرررره لحد ماطاح حدر رجليه
وصار يلاعب متوني من بعد ماچان
واصل لركبي
هدني ودفعني بالگاع وهو يذر بي
بالماي ويون بصوت
ركضت للحوش وشعري يلوح
متوني وأنا ما مصدگة
دشيت الحجرة عليت الفانوووس
واتنوع بكسرة المراية بالحايط
بلعت ريگي وانا اشوفه مبتور بتر
بلا شعوووور ملخت وجهي تملخ لطمت
ولطمت لحد ماتعبت ايديه
ناطرت الفجر يطلع وعمي يگعد وافك
الباب بس صار الفجر طلعت
على حس عمي وهو يصيح
-يااااهو
والباب يندگ حييييل وصوت جعفر يصيح
-عمي حشدووونة الوضع خربان وين هاااااجس
صاح عمي وعلة صوتة وهو يحچي وية عمي
-انا رااااايح بووووية بس اررررد اخذهااااااا
ماتعررسلها لو عرستلها اكتلها واكتل خزعل واكتل رووووحي
-رووووح بووويه روح لا تسويلنه
لعبة ابوك انا كبررررت ماكو بالحيل
بااااقي حتى اسد ووووووراك
طلع ينفث بالنفس نفث تتلاگينة عين بعين
فتح الباب وصاحلي
-عذبة سدي الباب تعاي
مشيت وانا دموعي تجري
عاينلي وهو خازرني
مد چفه اليه
-كل مرررة تطشين ماي لسلامتي
فتح چفه وخله بيدي خصل من ضفيرتي
-طشييييلي شعررررررج هالمررررررة
والله والله بس اررررد اطشلج دم
خزززززعل اخلي الدييييرة تسبح بي
طلع وانا ابچي واهجس روحي مبسولة
وضااايعة مني الصبح كله انا بفراشي
بس ريگت عمي وطلعته يفضي خلگه
يم جماعته للظهر بيه مابيه گمت
للبيت رد عمي وگعد وياي
-شوفي بويه أنا طرشت لخزعل
فزيت
-ليش عمييي
-هذا الخميس العرس
هااااجس ابني واعرفه
خل اسبگة انا واعرسلكم
-عمي فدووووة اترجاك
-بووووية انا مووو ابوج وطابگتچ حتى
على ابني العرس هذا الخميس
ومشي يابويه
بست ايده وسكتت للعصر اندگ باب
الحوش فتحته لخزعل چان وجهه يضحك
بس شاف وجهي مخرمش ومزلغ فتح عيونه
-شبييييج عذبة
حرت شگله جريت چفيتي وصفن
على راسي
-گصيبتي طاحت بالتنور وأنا اخبز واحترگ نصها وگصيتها
مد ايده يلاعب طرف شعري على متوني
-بالطويل گمممممر
وبالگصيييير گمرين
حب خدي ودش لعمي للربعة
وبعد كلام وسلام اتفق على باجر
ياخذني للولاية اتجهز
طلع وعينه مني
-عذبة
-ها
-تردين ناخذ وحدة من اخواتچ
ويانه
-اي ناخذ سنية
-خووش راح امر برجلها حتى يروح
ويان ها شگلتي
-بكيفك انت
طلع وانا رحت يم عمي صاحلي
وحب راسي
-أنا مو مستعجل غير علمودچ
لا يضيگ خلگچ بعد أبوچ
بست راسه وگمت لشغلي
لثاني يوم الصبح
اندگ الباب
فتحته سنية اختي
-صباح العافية
بستها وطبت لحجرة عمي
تصبح علي گعدت ويا تسولف
وانا البس لحد مااجه خزعل
ورحنه رجل سنية مارضى يروح
عندة شغل
عمي تمشى ويانه لبيت نعمة
يظل يمها
خزعل عنده سيارة ومشينا
ويا للولاية انا گاعدة يمه
وسنية وره كل ساعة تندسني
تريدني اسولف وانا استحي
وصلنا الولاية ونزلنا لسوگ الذهب
اشترالي سبحة طويلة وياها خناگي
مشذر ازرگ وچف على گد اربع اصابع
هم مشذر
تراچي وحلقة
وطلع بينه للسوگ صدگ تفضى خلگي
وظليت أعاين كل شي حلو الهدوم
والناس والغراض عاد بديت اسولف
ويا وهو يختار وانا اختار لحد ماالتم
النيشان وردينا للقرية
الدنيا مغرب نعمة جابتلي عمي
وشافت النيشان گالت راح تخيطلي
صرر ملونة نسفط بيهن
ثاني يوم جابلي الحفافة حفتلي وزلغتني
زلغ ماخلت بيه ولا شعرة
ورديت للحزن وانا اعدل شعري بالمگص
حتى مايظل مذايل
ثوب العرس جابة ابيض ساگ مطرز
بكلبدون مذهب وويا برگع گصير
يوم الاربعاء لبسني اخواتي
ولمن البنيات حواليه بنات
خالتي وصاحباتي سونلي حنة وتحنيت
لثاني يوم الزفة الحفافة اجت شالتلي
شعري شيلل بشكالات وخلتلي البرگع
والحمرة والكحلة والثوب المگسم
عالجسم ورشتلي ريحة
اجت عراضة الزفة خزعل وولد عمامة
وصحبانة والجيران يمشون ويهوسون
وانزفيت وانا مستورة بعباتي
لبيت خزعل اخواتي وياي
والناس ساعة زمان وطشت وانا اوصي بيهن
-فدددوة عينجن على عمي گليله بااااجر
اخذه هنا شفتي خزعل مسويله حجرة اله
-انجبي عمي يمي اسبوع واجيبه الج
-ماااااااكو وروح اهلي هسه ارد وياچن
يردن يحجن وعله صوت الزلم يزفونه
طلعن خواتي وهن يوصني
بالصبر والنسيان
دش خزعل الحجرة بطوله المربوع
وشعرة اليتلامع وقاطه
-السلام عليكم
رديت السلام وهو طبگ الباب وبيده
صينية العشة خلاها على الگاع
يم مندر مفروش بصف القريولة
مشالي ووگف گبالي رفع البرگع
-ماشاء الله
وگفني ومشى للكنتور طلع كامرته
وگعد ياخذلي صور انا اهجس روحي من جوه ترجف
وبرد صايب ضلوعي
-بدلي هدومچ وخل نتعشى الليل طويل
-شلون والناس
-محد ظل راحت الناس وقفلت بيتي
طلعت وهو وياي شگد حلو
مو حوش مثلنا لا مسگوف شلون بيوت
الولاية والحمام معزول
طبيت الحمام بيدي هدومي
ذبيت الثوب الابيض وغسلت
ولبست ثوب وردي يلمع حليت
شعري وسويته ضفيرة غسلت
وجهي من الالوان وطلعت
لاگاني بباب الحمام يضحك
-والله الالوان چانت مخربتچ هيج
طالعة گمر
گرص خدي وراح للحمام شويه وطلع
لابس دشداشة بيضة مرتبة
صاحلي انزل من القريولة وگعد بصفي
يخليلي اكل وياكل وياي
-هذا كله انا مسوي
عاينت للصينية شاوي اللحم شوي
والطماطة والخضورات
-ليش مايسوولك نساوين بيت عمامك
-خل اگلج شغلة تخلينها ترچية باذانچ
-ان شاء الله
-اللگمة التجي من نساوين عمامي
من ايدج تذبينها لگن الدجاج وره
الحوش فهمتي
-ان شاء الله بس ليش
-الليش طووووويلة يرادلها گعدة
خلة لگمة بحلگي وسكتني كملنا عشانا
شلت انا الصينية وهو وياي غسلنا
وردينا للغرفة نصه ضوه الفانوس
وهدا
وصاحلي وانا واگفة على صفحة مدري
شمالني أتراجف
-تعاي يمي هنا
مشيتله وگف لزم ايديه
-عذبة
-ها
-اسمعيني الليلة اليصير لازززم ولا بد
احنة بسلف وهالشغلة عدهم بيها عار ومعيار
ماشيني وخل نتممها لا تخافين انا بعد صرت زلمتچ
ماادري شلون ماشلون تم اليريده
خزعل مثل كل اثنين عرسان
وراها باس راسي وطلع بيده سلاح
رمى الطلق صلي وردو علي الزلام من حواشهم رمو
ردلي وانا الم بروحي واروح للحمام
انا طبيت الحمام وبچيت من كل گلبي
وانا اتوسل ربي يشيل طيف هاجس
من راسي وعيوني وماارتكب الحرام بفكري
طلعت وهو راح شوي وطلع اجاني
بيده گلاص بي حليب دافي
-شربي عذبة
اشرب وهو گاعد بصفي خلصت وجرني
ويا عالقريولة اصابعه تتلاعب بشعري
-تعرفين عذبة ليش اختاريتچ من دون هالبنات
-ليش
-لحاجتين اولهن انچ يتيمة مثلي وتفهمين عيشة اليتم شلونها
-والثانية
-معدلة
صفنت علي ورد
-انا سامع انتِ مدارية عمچ من انتِ بت جاهلة
وعينچ منة وشايلة بيت على راسچ
هزيت راسي ساكتة وهو يسولف
عن شغلة
-انا اطلع لدوامي الفجر وارد الظهر
اتغدى وارتاح واطلع لگاعي
الگاع هاي راح تشوفين عليها الف عييين
وكل واحد يگول انا اعاونك من الگرابة بس
انا ماارضى غير ايدي تشتغل بيها
كل اليگوم يگلي مادامك معلم اطلع من القرية
بس مااگدر هالگاع دفعنا اني وابوي ثمنها غالي
-شدفعتو
-رووح امي الراحت بسبب الاعمال
علمودها
ولاخر يوم من طلع دفان بأهلج
هو جان متعارك ويه عمامي علمودها
وانا مو دوم ازرعها بس ايدي بيها مااخليها
تصبخ وتنترس ملح دووم اخلي بيها
خضار حتى لو ورد
ومخليلج وره البيت دجاجات وحديقة مسيجة
متروسة ورد من كل نوع وشكل
البيت انا تدرين بنيته طابوگ جمهوري
وسويته مثل بيوت الولاية ملموم
ومعدل هالتشوفينه دافي
ومرتب بعد هذا بيتج انت صاحبته
الزايدة الناقصة تگليلي وانا تحت طوعج
مادامج راضيتني ومراعية حرمتي
لهناك حضني وغفه وانا غفيت بتعب
مااادري يمكن ربي مارادلي هاجس
انا شني حتى ازعل من أرادة ربي
سلمت امري لله وبديت ويه
خزعل حياة جديدة
لثاني يوم الصبح التمن النسوان
وانا اعرف نسوان عمامه
جابن غدة واخواتي هم
بس تطشرت الناس طب هو
-سويتي الگتلج علي
-اي والله طشيت الاكل للدجاجات
والبطوط وهذا الغدة جابنه اخواتي
-سبعة يلا نتغده
گعد بصفي وانا مثل الجاهل
سندت عكسي على رجله واكل
ضحك وضرب راسه براسي
-اذيتك
جريت روحي وردني لمكاني
-اكلي معليج بيه انسندت علي
وهو يسولف
-عذبة
-ها
-تعرفين تقرين
-چا شلون اقره واكتب
-يا سباعية بعد اخليچ تعاونيني
بدفاتر الطلاب
-خزعل
-بعد عيوني
-صدگ يصير هسه ادرس بهالعمر
-بكل عمر تگدرين طلب العلم ماله عمر
نكت ايده من خلص ردت اشيل الصينية ردني
-گومي غسلي وتعاي انا اشيلها بدربي
-لا مايصير انا اغسل المواعين
-ابدددد ماتجيسين شي وانا يمج
راح وداهن ورد مغسل وگف
عالمرايا رش كولونيا
-تعاي عايني
فتح صفحة من الكنتور كتب مخزنة
ومسفطة تسفط ومرتبة
-باوعي هنا كل شي تردينه
طلعي واقري وتعلمي واذا تردين
اردج للمدرسة بس تاخذين
محو امية وللسادس وراها
تطبين المدرسة الاعدادية
-والله يصير
-چاليش مايصير
-هسة البعمري بيا صف
-هسة بالعشرين لازم ثالث كلية
واذا معهد متخرجة وصايرة معلمة
ضحكت كرصني من خدي
-تلبسين نتمشى للگاع
-ايييييي
لبسنا وطلعني نمشي درت للحديقة كلها
ورد وشجر مرتب منها رحنا للگاع بنهاية القرية
بي سواجي ماي وزارعها توها مخضرة
-شزارعها
-بصل
ضحكت وجرني ويا يشوفني
-مو علمود المحصول بس حتى ماتخرب
گعدنا عالساجية دندلت رجليه بالماي
وهو لزم ايديه
-عذبة
-ها عيني
عاينلي جر وجهي وباسهن
-كلماتچ عذبة مثلچ
هاي الگاع كلها راجعة لأبوي وعمامي
الثلاثة باعوها اله من سنين من چان
شاب وظلو مناحر عليها مايرضون
يهدونها لحد ماسون نسوانهم عملتهن
بأمي حتى يحترگ گلب ابوي
-شسون
-سگنها عمل بشربة چاي
وتسودنت بين يوم وليلة
وماتت خنكت روحها خنگ بوصلة
مخليتها بحلگها
ذب حسرة وكمل
-ظل ابوي مناحر وياهم
لحد گبل لا يموت گالوله اطينه فلوس ونهدها
گاللهم ماانغلب هالمرة وكل شي يصير بورق رسمي
بس اوراقها مامكملة چانت من
مات أنا ثالث متوسط وشايف
كل شي ظليت ببيتي هنا وخالي
ومرته اجو يمي يعرف احنه ويه
عمامي مو صلح وهم من باعو الگاع لأبوي
عود يطلعون من السلف ويرحون للمشخاب
هناك يعيشون شو بس طلعت اربعين
ابوي حرثو الگاع ونثرو انا شترديني
شبيت وطفيت رحتلهم اتراكض
وبعد صد ورد حلفو عالقران هم مابايعين
لأبوي شلووون وانا شفته يطيهم فلوس بعيني
المهم ماخلولي بس هالوصلة الگدامج
والباقي رادو يلهفونه بس
ربچ سلط ربع ابوي الچانو شهود
وابوي هناك عبالك گلبه حاس مخليلي
الگاع بأسمي هم انضربو على روسهم
والشيخ ابو جعفر گاللهم ماله وهو حر
بي عاد انا گلتلهم زرعو واكلو بيها بس
الگاع گاعي وشوكت ما ردت اطلعكم
-ليييش مخليهم اذا هم هيچ
-لخاطر عمتي حسنة خطيه مامعرسة
-اي ادري چاشلون غير اعرفها
-عمتي حسنة مظلومة مااريدها تبعد
منا بعد مامرت سنة على موتة ابوي
طبيت المعهد وخالي رد لديرته ومحد
دار باله عليه غيرها
وهي تعرف زواغير نسوان عمامي
گالت لا تاكل شي منهن عسما گلاص
الماي ومن يومج بيتي هي تنظفه
بس اكلي اسوي بيدي ومااخذت
منهم رغم بناتهم مكومات بيهن عشرين وحدة
روحي هفت عالغريبة
رفعت راسي عاينتله
-شفتچ لازمتلچ بطة وتوكلين بيها غصب
وملثمة طاح لثامچ وانتي تدردمين عالبطة
وسألت جاهل مار من گاعكم
گال هاي عذبة بت ابو هاجس
استحيت منه ونزلت راسي
جر راسي سنده على چتافه
-خلصت العطلة وراح ارد للدوام
راح ياخذونه لبغداد يومين
اريدچ تظلين ببيتج هنا واجيبلج
عمتي
-لا خطية تتعب انا أشوف
اجيب عمي وبت خالتي
مزنة
هز راسه متأسف
-شلونها وضعها هسه
-منتهية هاي صار ٨ سنين وهي مثل
المضيع حاجة مگابلة الروازين
-الله يعينها
ظلينا للعصر بالگاع وردينه
وسبحان اللينزل سكينته ورحمته
عالبشر مثل اي عرسان اثنين
نسولف ويشاقيني مرن الخمس ايام
وراح بيده جاب عمي يرحب بي
خلا بالحجرة مالته رحتله حضنته
-بعد ابوووج عالخير
-اشتاگيتلگ عمي
-يابعد رووووحي هاالاجيت ولچ ماحلالي
جاي الا من ايدج سويلي استكان
سويتلهم چاي تونسنه وتعللنه يم
عمي وخلينا ينام ويرتاح
دشيت للحجرة وهو شالني
-بخفة الررررريشة
ردت اطيح لفني لف وخلاني
على متنه ومشى بيه
-يممممه لا تطيحني
-ماتطيحين الا بحضني
لفني بحضنه مايحچيلي الا اعذب
الچلمات ويشعرلي شعر غزل
ويحضني بين ادي يالله ينام
الفجر گعدني
-عذوبة گعدي
گعدت وهو يعدل بشعري ويرفع
تعلاگة الثوب نزل راسه باس متني
-يلا من ايدج الحلوة استكان چاي
وريوگ
بسرعة لبست ورحت احضرله ريوگ
اجاني للمطبخ بيده جنطة صغيرة
-شعدكم ببغداد
-اجتماع للحزب
صفنت بوجها
-ياحزب
-شيوووعي
فكيت حلگي مصدومة
-چا انا سامعة بيهم مايامنون بالله
-ههههههههههه استغفر الله ليش
لا مو هيج انا اتبع مبائدهم المساواة
بالحقوق والواجبات وهواي مسائل
يرادلنا گعدة اسولفلج بس لا انا رجال
صايم مصلي مؤمن
شرب الچاي طلع فلوس خلاها بيدي
-انا كل شي مخليلچ بالبيت بس خاف تحتاجين
-اريدك سالم
باس راسي وطلع رد عاينلي
اشرلي
-ها نسيت شي
-اييييييي
حضني بسرعة وباسني وهاي اول
مرة انسى روحي وذبلت روحي بيدة وهو ضحك
-چا نعوف السفرة ونگابل هالنفس المثل الهييييل
رد باسني وطلع وانا مثل المضروبة براسها
سبحان الخلق الحلال تتمتع بي بلا ذنب
راح وللظهر اجاني ابن نعمة بيده صحن
تمن وماش لعمي صحتله
-بعد خالتك روحلي لبيت خالتي
وگللها خالتي عذبة تگول خل مزنة تجي
تبات يمي گللها رجلها مو هنا
راح يهف ساعة زمان وطبت خالتي وياها
مزنة سلمن على عمي بس مزنة وجهه خلصان
گومتها للحديقة تشوفها واخذت خالتي على صفحة
-ها خااااالة شلووونها
-شوفت عينج گضيانه وهي وابوها
مثل الحية والبطنج من يسمعها تدعي يتسودن
ادور البارحة
شافته يركض ويه الفروووخ عالشط
وهي عينها طگت من البچي
يمر مايعرفها وهي تتكاتل
-لا تلومينها حقها
-هي ماترضى تبات تريد ترد چلبي بيها
خل تفضي خلگها
-خالة ابببببد شگد جريبة منها انا ماتحجي
ولا مرة حجتلي الصار
-انا امها ماتحجيلي مااعرف الصار
-ظلمتوها
-ابوووووها اااااخ منه
سكتنا من ردت من بره وبين ضحكة وسالفة
گامت خالتي وهي وياها
-هااااا وين رايحة مزنة
-رادة ويه امي
-چا انا ردتچ تباتين يمممممي
-مالي خلگ والله
-خايييبة شبيچ مزنة لخاطري أنا
عاينت لأمها
-راح ابات مو يجيني رجلچ يهف ياخذني
-ولجججچ ابوج انجبي
-انا ابوووي ميت
گعدت وخالتي هزت راسها وطلعت
گعدنة يم عمي يقص علينا
قصص وسوالف وهي تسمعله
لحد مانام رحنة لحجرتي طبت صلت عالنبي
-صلوووات تستاهلين عذوبة
-يووووم االالچ واشوفچ هيييچ عروس
تتلامعين بثوب العرس
گعدت عالقريولة
-كفت رووووحي من الزلم مااااريد بعد
گعدت بصفها مسحت على راسها
-خايبة مزنة تظلين هيچ
مثل الصندوگ المسدود احچي خايبة خية لا تموتين
-شحچي الصار صار ووليدي راح
مني
-أنا مو اختچ مو شيصيرلي اشگيلچ
وأحچي
-سري يرووووح وياي للگبر حتى
هناك اوووگف يم رب كرررريم
واگله باوع عبادك شلون ظلموني
طاحت دموعها وشهگت بالبچي
بچيت وياها وهي عاينتلي
-احنة البنيات بهالدنيا مالنه
غير النفس كون نتنفس ونسكت
غصت بعبرتها وعاينتلي
-الراح احچي تاخذينه وياچ للگبر
-وعد وروح اهلي
-محمد أبني
-شبييييي
-مو ابن جبار رجلي الاخذوني اله
شهگت وفكيت عيوني
-چا ياااااهو ابووووووو
-حماي
