رواية ذاري النجوم الفصل الخامس بقلم زهراء السراي
:
✥━━━༺ زهراء جودة السراي ༻━━━━✥
:
وتظل الليش بيه تعيل
وأتمناني دون أحساس
:
:
عذبة
✥━━━༺✦༻━━━✥
الدنيا للظالم دار الراحة
وللمظلوم دار الشقاء
نايمة على رجلي ودموعها بللت
ثوبي ولازمة لعابتها الگطن ملبستها
ثوب وليد بيدها
-خايبة مزنة تظلين هيج مثل الصندوگ
احججججي
-شحجي الصار صار ووليدي راح
مني
-أنا مو اختچ مو شيصيرلي اشگيلج
وأحچي
-سري يرووووح وياي للگبر حتى
هناك اوووگف يم رب كرررريم
واگله باوع عبادك شلون ظلموني
طاحت دموعها وشهگت بالبچي
بچيت وياها وهي عاينتلي
-احنة البنيات بهالدنيا مالنه
غير النفس كون نتنفس ونسكت
غصت بعبرتها وعاينتلي
-الراح احچي تاخذينه وياچ للگبر
-وعد وروح اهلي
-محمد أبني
-شبييييي
-مو ابن جبار رجلي الاخذوني اله
شهگت وفكيت عيوني
-چا ياااااهو ابووووووو
-حماي
ضربت على خدي وشهگت
-ستاااار ولچ شلوووون
-هذا اللون
-يمممممممه بالحررررام لو جبرچ
گعدت وهي تكفكف دموعها
-لا بالحلال عقدني
ضربت على صدري
-شلووووون شلووون وانتِ مرت اخوووو
-تسمعيني
-اسمعچ ولچ صار ٨ سنين مامرة
حجيتلي الصار كل الأعرفه
فصلوكم وأبوچ بين يوم وليلة
اطاچ أنتِ
ذبت حسرة وبدت تحچيلي الأعرفه
والما أعرفه من السالفة وردت
بالوكت لذيچ الأيام
-تذكرين كاظم اخوي يطلع للصيد
هو والولد صحبانه
وكل اسبوع يرحون لمچان
هالمرة بدل مايصيدون بالشبچ
طيور وخضيرية
اخذو سلاح هو ماخذ سلاح ابوي
وساچ للبر ويه غني ابن الملا
ورايحين كلهم حتى صادق ابن الشيخ وياهم
هناك يگنصون ارانب وطيور ليغاد
كاظم منيشن على طير يريد
يصده ماكو عباله مخلص چيلات منيشن بسلاح غني
وسلاحة مخلي بالگاع
الولد اخذ سلاحه وكاظم اخذ من
غني چيلات ساحب الزناد عباله فارغ
ثارت الچيلة بصدر غني موتته
بمچانه
اخوي بدل مايشيل صاحبه شرد
والشباب كلها اعترفت علي
وشفتي بعينچ گلبو دلالهم بيت الملا
ومارضو يسون فاتحة غير لمن ياخذون
روح كاظم
الملا يگول لونه واگف وشايل
ابني چان حتى الفصل طيحته لأن
هم رفجة بس مادامه شرد هو قاصد يكتله
وجيب وودي وشيوخ وعشاير
ابوووي كتل روحه شلون البچر
الچبير ينكتل
فضله عليه واتفق هو والشيخ ابو
جعفر والناس الحضرت يطون فصلية
وصارلچ الديوان هرج ومرج
وتاليتها تراضو بشرط اخوي مايبقى
هنا واتفقو وره اربعين ابنهم ياخذوني
وصار الصار تذكرين من شردت ولبدت
بحجرتچ وأجاني ابوي سحلني سحل
من الحجرة
-شصار
-بليلة الأجه أبوي ورجعني للبيت
طحت حدر رجلي اتوسله
بوووية اذا كاظم چبيرك
انا الچبيرة من بناتك انا سمية امك
مو تگول احبچ على محبتها
-لأجل عييين ابوووچ
-ولييييش ماتطي فصلللل
-ولچ مارضوووو لو مرة
لو روح كاظم
لطمت على وجهي
-فصليييية بووويه فصلية تطيني
-جبار فقير ومايأذي نملة
صفنت بوجه ابوووي
لجبار المسودن
-لجباااااار بووويه تصخى بيه للمسودن
اليلمونه اهله من الگيعان وهو يلعب ويه الجهاااااال
-هذا طلبهم لو ياخذون روح اخييييچ
-وروووووحي
دفعني وگام
-الموضوع تم مااريد اتفاشل ويه
الناس
حبسني ليلتين تتذكرين من تجين تحاجيني
من الرازونة وابچي ثلث أيام مرت واخذني
ابوي ملفلفة بثوب أسود وعباية
وماطلع هو والشيخ ابو جعفر منا لمن عقدني
الملا على ابنه المسودن
مرت الملا ماسوت شي
بس اشرت لبناتها
-اخذنها لحجرة اخوچن مااااريد
اشوفنها
دشيت حجرته بيها بوفية وفراش منضود
گعدت واخواته بدن بحجيهن
-خاف عبالچ نفووووت حالچ
لا والله وروح المات مظلوم نطلع ثاره
من عيووونچ
كفختني اخته الچبيرة وطلعت
ظليت نهار كامل بالحجرة لليل
اندفع الباب ودخل جبار
يرهول حلگه وكاتله الوصخ صاحت
امه
-خل مرته تغسله
اجت اخته
-گومي غسليله ولبسي
اعاينله شسمنه وشگده
وشطوله طلعت امشي للحمام
سطل ماي محطوط
هو حتى حچي مايحچي
بعدني اعاينله شال طاسة الماي
البارد طشها علية وجرني من ثوبي
حيل طحت بالگاع والگاع طينة
ركست وتدمرت وهو بس صوت العياط مالته
گلب البيت ولا واحد اچاني
گمت اريد اغسله ماكو يضرب بيه
بچيت وهو يدفع بيه تلفني
بره الحمام رديت علي
بسرعة وهو داير غسلت
وجهه عضني حيل هو عضني وانا
جريت اذنه حيييل لما طگت بيدي
خاف وسكت غسلتله
وجريته للحجرة لبس وانا دايره
وجهي
لبستلي ثوب أسود من ثيابي
لما صارت مسية وغوربت صاحتلي
وحدة منهن
-شني محناية ونايمة گوووومي
ولچ
اخذتني وره الحوش اخبز خبزت
وخلصت وهي مرة تغلط ومرة
تكفخ انا متعجبة ذني الچانن صاحباتي
هيييچ انگلبن عليه
طببت الخبز للحوش وجرتني جر
-توگفين هنا بالمطبخ
وگفت شيگولن أسوي
تعشو وانا حطتلي ويا جبار
-ولي عشي اخوي
اخذته ورحت هو گاعد يلعب بنواعير
مال طين اول ماطبيت شال وحدة
رشگني بيها بگصتي
سكتت خليت الاكل گدامه عبالي ياكل
عدل واكل ويا شو هذا مد ايديك
اثنينهن وامرد التمن مرد
ورد عالمرگ اشفطه
انمردت روحي وردت مديت راسي من الرازونة
لعبت روحي
ساعة زمان لاص الگاع لواص
لميتها ونظفت المكان بخرگة
وطلعت المواعين وبديت بالكراب
اغسل وارد ليوره وكل ساع صاحن
سوي چاي لما صارت نص ليل
رحت انام
جوووعانة واحس روحي تتبهت
رديت على طروف اصابعي
مغشيات الخبز بالجدر عن لا يعفن
اخذتلي خبزة وراس بصل اخضر
اكلت وشربت ماي بمچاني
هو نايم بالگاع استخطيته
حطيتله مخدة وغطيته
وانا جريتلي لحاف ومخدة
ونمت ماطولت من هجست وحدة
تندس بصفحتي
-گووومي ولچ شني نومة الظهاري
گمت وياها وهاي عود فطيم صاحبتي
عاينتلها وعاينتلي
-فطيم چا انا مو صاحبتچ
طاحت دموعها ومشت گدامي
-والراحت رووووحة اخووووي
عجنت والفجر بعده يلوح
ونظفت الحوش
گعدن اخواتها وشعدهن شغل
يكومن على راسي لحد ماخبزت
واخذت ريوگ لجبار گعد وجهه يغاغي علي الذبان
اخذتلي وصلة من البيضة والخبزة گبل
لا ياكل بس اكلتها صاحولي
وركض الناس التجي للمله
بين التاكل وبين التريد چاي
للمغرب صليت وحطيت وياهن العشة
ورديت للحجرة گاعد جبار وساكت
ماله حس اكلة لگمة وتمدد بيده
سبحة يلعب بخرزها
وهيچ تميت أسبوع زمان
الملة يطب ويطلع يخازرني
عود يخاف الله مايحاجيني
بهاليوم من الصبح ارتفع صوتهن
والملا يصيح مغتاض
-مالچن كار بالبت
-بوووويه تجي مثل المحناية
لا تطبخ لا تنظف گوه گوه
تگعد ويانه وتعجن بالحچي
عجن عوود شوفوووني حضرية
-لخاطر اخوووچن بويه سدن
السالفة
هزت ايدها فطيم وحچت بحس
ناصي
-هاي ماتخلف ووووهيچ راكبة
ستار ركوب لو مخلفة شتسوي
صاح الملا
-مااااااريد أسمع حسسسسس
سكتن كلهن ومرت الملا اشرتلي
-تعااااي
وگفت يمها
-ترحين تحوشين خضرة تازة للغدة
وكثري بصل اخضر يحبه ستار
ولزميلج ثلث دجاجات من الگن
واطيهن للفلاح بالگاع يذبحهن
وتعاي لا تسختين
ركضت من زمخت بيه ورحت للگن
طلعت دجاجات أخذتهن
امشي للگاع بيدي منجل اعاين
يمشي وراي جبار وبيده
عودة يسحل بيها بالگاع
رحت للفلاح بين ماذبحهن
أنا حشت الخضرة ورديت بيدي
الخضرة والدجاجات اجاني جبار يركض
عت مني الدجاجات وركض للحوش ركضت
وراه خايفة عاد والله لگيته حاطهن
بالمطبخ رحت بسرعة عرفت شغلي
بعد صلختهن بماي حار
واجتني فطيم گطعتهن وگعدت
تتأمر
سوي هاي سوي ذيج منا لمن خلصت
الطبخ
رحت اصلي وعلى حس المحابب
والسلام طلعت
صارت بوجهي مرت ستار اسمها
ناهدة من زمان نعرفها حضرية
من الولاية هو مو عنده دكان
مخضر هناك رادها واخذها عاينتلي
صفح ودشت جوه
حجرتها مقفولة صاحتلي
-تعاي ولچ
صفنت ياااااا هاي الولچ علييييه
ردت صاحت عليه
ام ستار صاحت
-روووووحي للبت لا تظلين واگفة
دشيت الحجرة عبالك جنة
شني من اخشاب شني من فراش
-لمي الفرااااش كله وخلي بالشمس
-اناااااا
-لعد امي
لعدددد هي مبيييينة مصخمة من اولها
تطلع وانا اشر عالحبال وره الحوووش
لحد ماخلصت رديت للمطبخ صاحت
-تعااااي شسممممج
مشيتلها
-مزنة
-تعاي اخذي هاي الملابس غسليها
عاينتلها
-انا شعليه بالهدوم انتِ مرة معرسة
انتِ غسلي هدومچ
خزرتني وطلعت راكضة
-عمة انتِ من اجيتي عليه
مو گلتي تعاي اكو اليخدم مكانچ
شو هااايه متقبل تسوي شي وترادد وتغلط
انا فكيت حلگي شلون تجذب صحت
-يااااا انا غلطت لا تچذبييين
عاينتلي ام ستار
-تعااااااي
رحتلها بأيدها حييييل ضربتني
على خدي رديت لوره وطاحت دمعتي
-تسمعين الحجاية انا رووووحي
خلصاااااانة ومو حمل طلايب
وانتِ ناهدة هم حركي رووووحچ
-مااااگدر عمة
-لييييش عمة شعندچ
-اني حامل
هي گالت هيچ وام ستار شهگت
-حبلة ولچ
ضحكت ولزمت ظهرها
-اييييييي عمة
ويه حچايتها عله صوت بالسلام
-ها الگوووووة
-هلااااااا يابعد امك ولك هيييچ گطعت
-هالاجيتچ يابعد روووحي
التفتت ستار صار سنين ماشايفته
طويل جثل اسمراني ومربوع
عاينلي مستغرب لمن حجت امه
-ولك يممممه ماتفرحني بحبالة مرتك
ليييش وانا مكسور ظهري بموتته اخيك
-شلووون
استغرب حجايات امه ومشى للحجرة
انا مااجذب عليج رحت اتسنط
عود اخذ الهدوم
سمعته ينهرها
-شصااااااير ناهدة يا حبالة
شو هاي تهطرت وبچت
-اني حاممممل ستار
-احلفيييييي
-وداعتك بس محد يعرف صار شهرين متشوفني
مارجعت سويتها بحجة الزعل
دگيت باب الحجرة وهي صاحت
-ادخلي
دخلت عاينلي
-وين الهدوم
-هاي يمچ عالچرباية
صفنت عليها مافاهمة
رد هو
-ذني عالقريووولة
شلتهن ارد اطلع ردت صاحت
-من تخلصين تعاي عدلي الكنتور
طلعت وهو يحجي وياها وطاير بالخبر
لليل على ردة الملا ارتفع الصوت بعد شهرين
حزينات على مرحوم غني وصاح المله
-راح اصيييير جد يابركة الدعاء
ولك بووويه مامصدگ صار ست سنين
-صدگ عمووو صدگ
صاحلها المله باس راسها وعاين علينه بالمطبخ
-البت تتركد ماتتحرك خووووش
رد يحاجيها
-يمچ هاااااي مرت جبار شتردين خادمتچ
تحت رجليچ
من سمعت الحچاية طلعت رووووحي
مشيت بسرعة طلعت من المطبخ
ابچي وتلاگيت ويه ستار وجه بوجه
عاينلي
-بيچ شي عمي
هزيت راسي ورحت للحجرة
جبار گاعد بيده نواعير الطين گابلته
وگعدت دموعي تتساگط
عاينلي وجهه غيم شالي ناعور حطه بيدي
اخذته وضحكت هو ضحكلي وفر ناعورة
وانا هم غلبته رد زعل ظليت العب وياه
لمن صاحوني سويت الچاي ورديت للحجرة
ساعة النوم بيدي استكان چاي وخبزة
جبار متوسد المخدة ونايم وعينه على عمدان
السگف صافن اعاينله
خطية مسيچين مدري شيسولف ويه روحه
گرصته من خدة ضحك وعاينلي ورد
لمچانه شربت الچاي والخبزة ونمت
من هاليوم صارت ناهدة
حتى الماي ماتشربة اذا مااجيبلها
وجبار خطيه مثل التابعة وياي
من اگله غسل يغسل ومن اگله
البس يلبس ووكت الأنام يمد ايده
يجر ضفيرتي يلزمها وينام
ومن يرد من بره شيلگه وردة
خضرة مصقولة يجيبلي بجيابة
شهرين أنا مثل الناعور اترس وافرغ
اشتغل وبالليل ابچي على حالي
الكل يطلب مني اخدمه بس ستار ماله غرض بيه ابد
وصادف عاشور ليلة العاشر
وبيت المله يسوون الحجة يمهم سوينه
كليجة وجاي وام ستار تقره للنسوان
وانا اجيب واودي واتنشك ريحة
امي وخواتي صح بينه وبينهم مسافة
بس ممنوع علي وتذكرين انتِ
شگد ظليت اشتاگلج ولگعداتنا
حدر السدرة ويم الساجية
بهالليلة افتريت وياهن وناهدة
چانت مثل التحوم على خراب
تفتر حواليه واني شايلة معجانة
عجين كبار لخبز العباس ارد اخبز
النسوان تتسحر وتروح طلعت من المطبخ
ومريت من يم حجرتها شو طلعت وتگابلنا
وجه لوجه ودحكي روحج دحك بالمعجانة
وصرخي وذبي روووحج بالگاع وجرت المعجانة
طاحت عليها وهي صرخة وهي غيبة رووووح
صار صراخهن ماله والي وهن يشيلنها
انا شفت ثوبها من وره مدمر دم وأنا تسودنت
ولطمت خدي صاحت فطيم
-يمممممممه تنزف
تطشرت النسوان والعجين ظل وراحت فطيم صاحت ستار وهي البت وعت وودنها للحمام يگولن
تذب دم لهناك وصرخت بالحمام
-عممممممممممة وگع الطفل
صرخت ام ستااار ودفعت الباب تلطم
طلعت البت اخذتها
والهوسة بحجرتهم وصوت ستار يصرخ
-يممممممه بس فهميني
-سووووووودة بووووجه امك
ولك يممممممممه طاح الجاهل
ويه حجايتها طلعت وصاحتلي
دشيت للحجرة اتراجف
وناهدة تبجي وتتراجف
-هيييي عمة دفعتني بنجانة العجين
وطاحت على بطنيييييي
ويه حجايتها ستار اجاني
وبچفة الغليظ طگني على وجهي
هجست خشمي يرعف دم وهو لزم
زياگي يكفخ بيه منا لمن تعب محد
وخرة عني لمن سمع صوتي اختنگت
وخارت روحي من طب الدم
من خشمي لحلگي ولبلعومي
سحلتني فطيم طلعتني
للحجرة امسح بخشمي
طب جبار شافني وگابلني يحس
وجهي بدشداشته
ثاني يوم صبح الصبح وريته ماصبح
طلع ستار بمرته للولاية ماخذها للطبيبة
بيومها اكلتلي چم ضربة من ام ستار
والملا اليعاينلي بعين الغضب
ووجهه ينگط شر
لثاني يوم ردو بس شردو
ستار بس طب المطبخ گباله دولكة
الماي الفافون شالها بمايها
وعطرني عطر بيها طاحت بگصتي
وورمت ويتهدد واني لبدت وره امه
-ولك يمممممه بس فهمنا
مرتة تبجي وتمسح بدموعها
-شحجي يمممممة تگلها الدكتورة
بعد ماتحبلين هاي يسمونها بيضة
عگررررررر وصارت بالقدرة
انتهتتتتتتتتتتت
هي مشت للحجرة تصرخ وتبجي
وهوووو فرني فر من وررره امه
يكفخ بيه
-وانا الادمي وياج واوصي بيج اكلهم
غررريبة رااااعو الله بيييييها طلعتي چلبة ماتستاهلييييييييين
وووولچ خاشة بحقد مثل اخووووج
الگو****اد
امه دفعته من ضميت راسي حدر
جنحها ودفعته
-كافي دخلت عندي اذكر الله
راح وانا الله ذب عليه بچي
وخرت روحي من ام ستار وعاينتلها
-خااالة بروح ابنچ رديني
لهلي شو انا مالي ذنب لا بموته المرحوم
والله وحتى بطروح مرت ستار
والعبااااس هي دفعت روحها عليه
وجرت المعجانة على روحها
عاينتلي محتارة
-ردة ماالج لهلج منا لمن تخلفين جاهل يعوض
مچان أبني وناهدة شمالها تسودنت تطرح روحها
مشيت وراسي ثايل گوه
اسحل برجليه الضربة أثرت بيه
واهجس روحي بهتت عديت باب حجرتهم
وصاح
-وييييين مولية سويلنا غدة
ماگدرت ارد توچيت عالحايط
وعتني من چتافي عت
ماگدرت بعد طحت للگاع عيوني سوربت
واحس النفس ضاع عن ريتي
وحلگي مثل الينفخ شي وصوت صايحهم
علة والوجع الحسيته وانا أعض لساني
غبت ومتت گلت هاي هي هذا الموووت
صحيت بعد سبة وكت فطيم يمي
وصوت ستار يحجي ويه امه
-يمكن انصرعت من الطگة
-شلون ماتنصرع وانت عطرت راسها عطر بالدولكة
فزيت ووگفت هم التفتولي
ركضت للحوش والمرة تصيح
-ولك البت تسودنت من الطگة
لحگني عتني من ثوبي
-وييين مووولية
-اروووح لأهلي فدوووة هدوووني
انا مالي كااار بالسوا كاظم ليييش انطگ
وهو يرتااااح انا شني ذنبي
هدني وصاح لأمه
-رديها للبيت مابيها شي
ردتني المرة بس تتراجف مالها خلگ
-گعدي خالة بمچانچ الگتلچ علي يصير
وذيچ الساعة عووود روحي لأهلچ
-منييييين اجيبلكم فرخ جاهل
فدووووة خالة
استغفرت وعافتني وردت لحجرتها
رديت للكراب والشغل بس شنهي
بعدها تمرمرت صار بالصاعدة
والنازلة ناهدة تهزني هز
رزايل وغلط وصياح وانا مثل
بلاعة الموس ابلع الحجي
والاهانة واسكت
جبار وياي وياي ابچي يگابلني
ويسوي روحه يبچي ويمسح
دموعي
گام يعاينلي مااكل تلعب روحي
ماياكل مايمد ايده
يجيبله صحن احطله نص والي
نص
من يطلع للگاع يروح يجيبلي وياه شلاگي
يخلي بيدي وانا خوفي من الله مخليني
مداريته هدومه ولبسه واغسله وانقهر
علي اهله يحبونه بس مامهتمين
بحاجته مثل البقية لحد ماتميت ست
اشهر وصاح الملا
-هذااااا الشهر اذا ماحبلت اردها الهم
وروووح ابنهم تنحصصصصد
-البت بعدها صغيرة
-شوووفيلج حلل البت تحببببل
انوكلت ووووجوهنا
لا من الفصل ولا من الثار
ولا من الفصلية
ام ستار تدري بأبنها مايهش ولا ينش
ولا يعرف شني المررررة بس ورطووووني
بي
بالليل جبار بعده ماراد للبيت
طبتلي ام ستار للحجرة عيونها
ناطة
-خررررراب بيتي على اييييدچ
انا مو گتلچ رغبي جبار بيچ
-شررررغبه خالة خطيه مثل الفرخ الجاهل
مايعرف الكوووع من البوع
طگتني حيل وگامت صاحت
-تعاااااااي فطييييم
-هااااا يمه
-طلعي الهدووووم والفررررش من الحجرررررة يلا
ماچنت ادري هالناس ظلت لا رحمة
ولا گلب فرغت الحجرة من كل شي
واجتني هامة هم عليه
تجرجر بثيابي تجرجر
-نززززززعي هدوووومچ
-لا خاااااالة فدوة ارووووحلچ حررررام
-ومووووو حرام اخوووچ يمووووت ابني
جرت ثيابي جر جردتني تجرد
الوذ وراها مستحية وهي تجر بشيلتي وتطلع ضفيرتي
-ساااااعة زمان يخلص كل شي
هو صدگ مريض ومو بعقله بس رجال
بس يشوفچ مجردة ياخذچ
خووووت روحي ماااعرف شگول وشسوي
دفعتني وسدت الحجرة
كل شي ماكو لا غطة اتغطى بي ولا هدمة البسها
كرفصت بالزاوية ونزلت شعري عليه بلكي يسترني
ساعة زمان وعلة الصوت وام ستار
تفتح الباب وتدفع جبار للحجرة وتسرگيها من وره علينه
ستار يون ويصرخ مايريد هسه يدش الحجرة
من أيس عاينلي واجاني گابلني
متعجب لأن حاله شعري
يلعب بخصلاته ويضحك
وانا اتراجف ماعاينلي ابددددد
ولا فهم ليش زنودي طالعة ورجليه
المخدة بالگاع هو تعبان حل
العليجة المعلگها بجتافه وذب العباة
الصوف وشخر
لميت روحي بعباة الصوف
وظليت جامدة لمن ماطر الفجر
فتحت ام ستار الباب وعاينتلي
-هاااااا
ماحچيت اجت نزعتني العباة تگلب بية
بدون مستحة من شافت ماكو شي كفختني وصاحت
-فطيييييم ردي الهدوم والغراض
بس طلعت وردن الهدوم لبست
وهي ردتلي
-اسوووودنچ وعلي اذا ماحبلتي
-منييييين شلوووون احبببببببل
عاينتلي ودارت وجها وطلعت للديوان
وعله صوتها هي والملا بس حچيهم ماينفهم
اسبوع زمان هي وستار والملا وناهدة
مايطلعون من الديوووان وصياحهم
گايم عشر أيام بالتمام والكمال
صاحلي الملا للديوان بالليل
وچان هادي
-اگعدي عمي
گعدت ساكتة واتنوعله
-انا مثل ابوچ گليلي جبار مايگدر
ياخذچ
حرت شرد علي گالي
-مو الا تحچين هزي راسچ
هزيت راسي وهو كمل
-چا بويه بهالحالة ماكو فايدة
اساس الفصل الخلفة تخلفيلنه ولد
لازم ولا بد بسسس ميخالف
مادام مااخذچ هاي هي
اعاينله متانية النتيجة
-حرام بعد نطلگچ منه
-والله
-والله
-وارد لأهلي
-اي
گمت حبيت راسه ورد صاحلي
-اليوم ناخذچ للولاية حتى
نفگ گطعان المهر
مافهمت ولا نشدت ليش
صدگ بس طر الفجر صاحتلي
ام ستار
-لمي هدومچ حتى من تفكون المهر
مناك نردچ لأهلچ
مثل الطير الطاير رحت اركض لميت
هدومي وتانيتهم بالحوش
انا وجبار وام ستار ليوره
والمله وستار ليگدام
دشينة الولاية ومشى بينه بعد وگف
يم حوش
دشينه بعد مافتح الباب
حوش صغير مقفل فتح البيبان
مفروش كله فرش عرب ونظيف
گعدنا والملا يحوم گالي
-انتِ طاهرة من العادة
نزلت راسي مستحية ورديت
-اي عمي
بده عمي يحجي ويسأل
مدري شلون فهم جبار وحچاله
چلمتين ماينفهمن وبعدين
انا وبصمني وبصم جبار
وضم الورقة بجيبه
انا عبالي خلصت وگفت بيدي صرة
هدومي
وگف عمي وستار واگف گوه على روحه
-ويييين عمي
-غير تاخذوني لأهلي
-لا بويه بعدددددد مو هسسسه
-لييييش عمي شني لازم اكض عدة
-لا ياعدة بس راح اعقدلچ
على ستار
فزيت ورديت ليوره
-شنيييييي عمي ردني لأهلي انت مو حلفتلي
-دسمعيني
-ماااااااريد
صاح ستار بصوت خلاني صكيت بمچاني
-اگعددددددي
گعدت والمله گابلني
-شتگولين تظلين فصلية لواحد لا يصد
ولا يرد لو اعرسلچ على ستار
بهذا البيت بمهر وتددللين هنا مرة
مرة مو فصلية شتگوليييين
عاينتله وهزيت راسي
-لا عمييييي لا مايييصير ردني
لأهلي
-دسمعيني ياعمي والله
عررس عرس وانا راح ابلغ ابوووچ
واملچچ بوجوده
فزيت اريد احچي ردني لمچاني
-ستار تجيب ابوها وتجي هسه
طلع ستار وانا لافة روحي بعباتي
وگاعدة ام ستار عاينتلي
-گومي افتري بالبيت هذا بيتچ
بعد شوفي حطلچ اخشاب ومطبخ
اخذتني افتر الحوش صغير هول وحجرة
نوم اخشابها مثل ناهدة
ومطبخ بي بريمز وغراض
رديت گعدت لهناك ودش ستار وويا ابوي
بس شفتة ركضت حضنته
وهو حضني الملا سلم على ابوي
وانا وام ستار رحنة للحجرة
نص ساعة صاحونا ابوي وجهه مغيم گعدني بصفه
-بوية هذا عرس ومهر وانا راضي
-مو مايصير حرام
-لا بويه يصير
مارديت اهجس روحي مثل البنص
الماي ومالاگية درب عقدولي ابوي
حبني وطلع
راح ستار مدري وين ساعة ورد بيده
محبس وتراچي وهدوم خلاهن بيدي
ابو طلع وامه بقو يحجون بالباب
ردت امه
-دشي للحمام تنظفي خوووش
راحت وهو وياهم قفل البيبان
وانا طبيت للحمام سويت الگالته
وعلمتني علي ورديت گعدت بالهول
عالگاع تعبت من المناطر وتمددت
متغطية بعباتي
فزيت ويه الغروب على صوت فتحة
البيبان دش وبدي علاليگ
-السلام عليكم هاچ اخذي
ذن عزليهن
اخذتهن للمطبخ مسفطة سلال حلوة
خليت المخضر بيهن اعاين شگد
حلو البيت مامصدگة صار الي
اجاني للمطبخ
-تاكلين شي انا جوعان حمسي طماطة وخضورات
سويت الگال علي وگعد ياكل صاحلي
گابلته گوة اللگمة تفوت بزردومي
عاينلي
-الشيلة شعندج لابسها نزعيها بعد
-ان شاء الله
گمت لميت المكان وغسلت المواعين بالحوض
بالحوش ورديت جوه
صاحلي
-ها رايد شي
-لبسيلج شي من الجبتهن وعدلي
روحچ
الهدوم الجابهن چنهن زبدددد ناعمات وحلوات
لبست منهن واحد حليت شعري
وخليت ريحة وكحل كلهن عالمراية مخليهن
دش الغرفة وصاحلي يمه
بلا كلام ولا شي عاينلي وجرني للفراش
جر وبسرعة بسرعة اخذني وگام
وأنا أبچي من الوجع
طلع للحمام ورد گمت انا عليت روحي
بالحمام ورديت لگيته حاطله فراش بالگاع والقريولة فارغة
-نام بمچانك أنا أنام بالگاع
-لا تلغين نامي
-مااعرف أنام عليها اطيح
گام نام عالقريولة وانا من البچي
والتفكير مانمت لحد صلاة الصبح گعدت
أصلي خلصت صلاتي وهو طلع صلى وعتني
من أيدي وصار الصار هم اخذني
لبس وحاچاني
-هنا اجيچ بالنهار الگاچ
مسويتلي غدة مجهزة هدومي
العصر اروح للقرية أبات اقفل عليچ
البيبان
-لا لا ردنييييي وياك هناك
تغيرت ملامحه ورد
-هذا بيتچ شعندچ هناك
بالكراب والشغل هنا ارتاحي
ماراددت بعد راح
وانا سبحت ورديت نمت وهاي
اول مرة أنام للظهر گعدت سويت
اكل وتانيته اجه تغده واشرلي
-ها
-من أنا هنا لا تظلين بثوب البيت
البسي من الجبتهن ملمعات وحلوات
وخلي حمرة وتريحي مااحب المرة
الدثرة شفتي ناهدة نفسها اريدچ
سكتت وسويت اليريده صرت كل يوم ألبس
واتعطر وهو مثل الصخرة بس ياخذ حاجته
من يجيني ويرد العصر
وانا من الملل وصيته جابلي خيوط
وابر وصرت اسوي لعابات گطن
اتونس بيهن وبالحوش وصلة گاع صغيرة
گتلة جيبلي بيها بلابل
جابلي قفص بي بلبل وزرعتها ورد
جوري
هو مايحجي بس مامأذيني
يجيب ويحط وبكل جية جايبلي شي الي
بس ابد ماينام يمي
هو عالقريولة وانا بالگاع
لحد ماتصير دنيا عصر ويروح
ياخذلة كل اسبوعين مرة يبات ليلتين يمي
بهاليلتين من انام بفراشي يعاينلي
وهو فوگ القريولة من يتعب يطيني ظهره وينام
شو صار شهرين ضبط وگطعتني
العادة وانا مثل اطرش بالزفة
هو كل مايجي يسألني عنها
اجاني بيومها شو تعبانة ومددة
حتى اكل ماسويت طب
لگاني عالقريولة
-شو ماكو غدة
-مريضة
مد ايده لراسي
-مامصخنة
-بطني توجعني
-اجتچ الشهرية
-لا گاطعتني يمكن الها هذا الوجع
-گاطعتج
-اي
-گووومي گوووومي
لبسي وامشينه
لبست وطلع بيه لبناية صغيرة وداني
لدكتورة وطب وياي هو يحجي
وهو يحجي
طلعوني منا ومنا وابر ومدري شني
وطلع بيده ورقة ويضحك والدكتورة توصيني
-بعدج ببداية الحمل الحرص واجب
تمام
حجة وياها ستار وردينه بالدرب
نزل ويسألني
-هم مشتهية اكلة شي
-لا بس نعسانة حيل ردنا للبيت
تسوگ وردلي اول ماوصلت هو
وجهة يضحك ردت انام بفراشي صاحلي
-تعاي هنا نامي يمي
مابيه حتى حيل احچي
خليت راسي بصفه عالمخدة
وغفيت لييغاد حسيت بنفسه
يلعب على زنودي
ماحچيت رديت للنوم ليغاد
گعدت ايده على بطني والدنيا غروب
-ستار ستااار
-ها
عصر روحه وعاينلي
-غروب صارت چا يمتى ترد
للقرية
ضحك
-چا انتِ ماتستقبلين ضيوف
فرحت لأن كل ليلة ظالة وحيدي
-البيت بيتك وأنا ضيفة هنا
-تعاي ردي يمي
رحت گعدت على حافة القريولة
جرني من ايدي وحضني
-سمعي لا تخلين بنفسچ شي
شتشتهين گولي وأنا منا وغاد
كل اسبوع اباتلي ليلتين ثلاثة يمچ
خوش
هزيت راسي مامصدگة هاي هيچ
فرحة الحبالة خلته مكيف
شوية وگام وياي رحنه للمطبخ
-شتشتهي اسويلك عشه
-شتگولين اليوم اجيبلچ كباب تغذين روحچ
-خاف تتعب
-لا مااتعب تجين وياي للولاية
-والله
-والله لبسي بس غطي روحچ
السوگ بي جماعتي البگاگيل
لبست ويا وطلعت مامصدگة انا
افتر بالولاية شگد حلوووة
وتنشعلها العين
شفت عربانة دوندرمة وعيني
مشت عليها وهو عاينلي
-لا تحكين وجهچ ولا اي مچان راح
اجيبلچ دوندرمة
نزل جابها وحطها بيدي اكل بيها
واحنة نمشي يممممه
روووحي تسرسحت للبرودة
تسرسح نزل جاب الاكل وردينه للبيت
خلة الاكل عاينت للكباب شكله
يفتح النفس اكلت لگمتين وماگدرت روحي ردت منه
-هاااا شو بطلتي
-ريحته طگت بخشمي
-مشتهية شي
-لا بس رگية وخبزة مااريد
گمت جبت رگي وخبز اكلنا وردينه
للحجرة ردت انام بفراشي زمخ بيه
-مو گتلج تعاي هنا نامي يمي منا وغاد
-اخاف اطيح
خلاني عالقريولة وحطلي مخدة يم صفحتي
-نامي هنا ماعليج شي يلا
جر راسي على زنده يعاينلي
-مامصدگ صارلي عمر اتاني وهيج
بشهرين حبلتي
-الحمد لله
اگلك
-گولي
-ناهدة تدري بيك معرس
-اي شلون ماتدري انا مااكسر بخاطرها گلتلها يلا عرست
-ها
-اييي اگلچ
-ها
-انتِ عمرچ شگد هسه
-١٧
-طويييرة
گال هيچ وگام يبوس بيه
وهاي اول مرة يسويها جان مايعاين بوجهي
من يريد مني حاجة
نومني على زنده الليل كله نسولف
وهاي اول مرة من شهووور من فصلوني
لبيت الملا يسولف احد وياي
-ناهدة شگد عمرها
-راح تصير ثلاثين
فكيت عيوني وهو ضحك
-مووو چبيرة ليش فكيتي عيونچ هيچ
-ما مبين عليها
-هي عدها روحها اهم شي كشاخة
لباسة اهلها هنا بالولاية
-هنا هنا
-لاااا وين بمكان بعيد الولاية چبيرة
-وهي تقره وتكتب
-اي انا شفتها تمشي للمدرسة
وچانت من تمر مرات امها موصيتها تتسوگ من يمي
-واهلها شلون رضو
-مارضو ظليت وراهم اربع سنين
لحد مارضو
-شلون رضو
-ضمنتهلم حاجة لبتهم يالا
-حاجتيش
-حاجة معلينه بيها بسسسس تدرين
طعم الطويييرة مختلف
عصرني بين ادي حيل
وانا استحيت
-انا من اخذت ناهدة عمرها ٢٤
بس ماضگت هيييج طعم
عضني حيل ورد على اذني يبوس
بيها ذابت روحي بيده
وهو يضحك
-چاليش ماعت روحچ
-شو تغيب روحي من تلزمني منا
-هيچ
رد سوه نفس السالفة بس هالمرة يبوس
بيه ويعايننلي كل مرة
هدومي عليه ظل يعاينلي متعجب
وكل ساعة حابني خليت ونمت
بين ايدي للصبح طلع للدكان يوصيني بروحي
-نامي وارتاحي اي شي ناكل لا تتعبين
بس انا گمت سويتله اكلة طيبة
وريحتلة الحجرة وكشخت ولبست
ذهباتي عبالك ردتلي الروح
من خلاني مرته صدگ للظهر رد ولگى كلشي جاهز تغده ونومني بحضنه
-اگلج شي
-گول
-من چنتي تنامين
انزل يمچ أنام ومرات احبچ
-يمممممه وماادري بيك
-تنامين عبالك موووواته
ضحكت ورد عليه
-تدرين سنين وصار حلم عندي يصيرلي جاهل وصار
وراح بأمر الله
گمت منه
لزمت راسي تذكرت مچان الضربة
-والله انا ماطرحتها هي ذبت روحها عليه ذب
-انا احب راسچ ها أهاااا
طگيتچ واتعذر
رديت يمه وأخذتنا السوالف
للعصر رد طلع وردلي للبيت
ثاني يوم گال هاليومين ماراح ابات يمچ
البيبان مقفلها لا تخافين مشتهية شي اجيبلچ گبل لااروح
-لا مااريد بس لا تبطي عليه
راح وانا رديت لحجرتي افتر بالحوش
بي سطح مااعرف مقفول لو لا
صعدت باية باية بهداي خاف اطيح
لگيته بس مسرگه تسرگي
صاير حايط على حايط ويه الجيران
شفت بسطحهم حبال گلت اخلي ستار من يجي يسويلي
رديت نزلت وسرگيت الباب الصدگ
الولاية ماتخوف لاصوت چلاب
ولا واحد يحوف ويطفر عالبيوت
بالليل اخيط واعدل بغراضي
وبالنهار انام مدري شبيه
ثالث يوم اجاني ماخلاني حتى
أحچي اخذني للحجرة
حطني بحضنه
-شلونچ
-الحمد لله شو بطيت للمغرب يلا اجيت
-حتى أبات يمچ
تهجسين الجاهل يتحرك
-لا ماكو بس اشتهيت مرگة
بانية تسويها امي
طاحت دموعي سكت هو وانا غطيت
عيوني وضليت ابچي حضني ويشاقيني
-راح اضوگج اكلي
ضحكت وهو مسح عيوني
-تعرف
-چا شاكل من اظل بشغلي
راح اسويلج بيض وطماطة
رحنه للمطبخ
گعد يگصگص ويسولف وياي
لحد ماخلص انا سويت چاي وگعدنا
ناكل خلصنا وظليت ويا جايب دومنه
يلعب وياي يعاينلي يسرح بوجهي
ويرد يلعب لمن تعبت شالني شيل للفراش
ماادري بروحي لفلفت نفسي
بحضنه ونمت
للفجر طلع وقفل وراه
وانا گعدت أصلي للظهر دش وبيده
جدرية صغيرة عاينلي
-سويلنه تمن وخضرة غسلي وهاي المرگة
خلالي الجدر يم البريمز عاينتله ضحك
-وديت البانية لأمچ وطبختها من الصبح وأجيـتچ
فتحت الجدر شميت الريحة وطاحت دموعي
-عليمن تبچين يلا جووووعان تمناتچ وخضوراتج خل ناكل
سويت التمن وحميت المرگ وگعدنا ناكل
-أمي شلونها مانشدتك عليه
-مثلچ تبچي
-ليش ماتخليها تجيني لو أنا أروحلها
-ماترهم ابوي بعده گلبه نار ومااچذب عليچ
أنا هم خاف اسمعلي حچاية من واحد من اهلچ وتكبر السالفة
سكتت وخلصنا تغده وطلع لشغلة الغروب ردلي
اطاني مسواگ وراح
گامت روحي تمل أگعد بالنهار اسمع
الجهال تلعب بالشارع
وصوت الرايح والراد لو اعاين عالناس
من سياج السطح
وبالليل أخيط لو حتى العب بالطين
لو العجين
وهيج تميت اربع أشهر وحسيت بحركة
الجاهل وانا نايمة يم ستار
نزيت
-ستااااار
فز يعاينلي
-بيچ شي
-تحرك الجاهل
ضحك وگعد گعدة
-حلفي
-والله هسه
بنفس الدقيقة رد تحرك بسرعة
جريت ايدة خليتها على بطني
عاينلي
-گوووومي وياي
لبست وانا ماادري وين ماخذني
مشينه وطب بيه لسوگ الصياغ
اعاين الذهب يرهش اشكال ألوان
راح لواحد واختارلي گلادة بيها شذرة زرگة وطلعنه
فرني السوگ وعلى شنهي تطيح عينه
يشتري وانا مازاغت عيني غير على جواريب
حياكة صوف حمر مال جاهل نفاس اخذتهن
طلعنا رادين للبيت وهو فرحان وأنا طايرة
ومرتاحة رغم شوگي لأهلي وألج
بس گلت خل أعيش مصير الحي يشوف الحي
ومن هاليوم صار ستار كل اسبوع يبات
ليلتين ثلاثة ويطلعني يونسني عن لا يضيگ خلگي
ويجيبلي يسموهن مجلات بيهن تصاوير نسوان
مفرعة بس حلوات اگلب بيهن
والچم حرف العلمتيني انتِ عليهن اگعد اتهجى
لحد مادشيت السابع
گتلة خل نجيب خام نخيط هدوم
للجاهل گال ميخالف
وطلعني اشترينه خام للحضاين
وململ للهدوم وبازة للبجايم
وجابله كاروك خشب وكل شي
اريده يگلي تم
امه مرتين زارتني تشوف حبالتي
وتاخذني للطبيبة وترد فرحانة
لحد ما دشيت التاسع وبليلة
هو يمي اجاني الطلوگ
اخذني للجدة وجبت لوحيدي ابجي
واتألم بس من سمعت چلمتها وهي فرحانة
-أجاچ وليييييييد
بس سمعت صوته روحي ردت
ومن التعب غفيت وهي تنظف بيه
وعتني وصوت ستار يحاجيها
-عااااشت ايدج وماقصرتي
اگدر اخذها
-اي هي وعت بس الفلفها الك من البرد
ولفلفتني وطلعت ويا ابني بحضني وهو مامصدگ ووجهه يضحك
وصلني للبيت وفات گبلي شغل
الچولة حتى يدفي الغرفة
ومددني بفراشي والوليد
گعد يگلب بي اشرلي علي
-يشبهچ
عاينتله
-اريده يشبهك كون مملوح ومعدل
كبر بأذانه وعاينلي
-تسمينه
-اييي
-بكيفچ شتسمينه انا راضي
-محمد
-كبر بأسمه وجابه الي
-رضعي
-بس اسندني
سندني وگعدني وخليته على صدري
يرضع مرتاح لحد مانام
انا تعبت راح سوالي حليب حار وحطلي
بي دهن حر
-قوي روحچ بهذا بين مااجيبلچ امي
الصبح
لحد ماطر الضوه عافني وراح ماكو ضحوية
وطب هو وامه وهلهلت وبچت
-صلاااااااوات عالخيييير يابعد امك
اجت الوليد بحضني حبتني وحبت الولد
شالتة بحضنها وظلت تناغي
وانا ماادري بروحي رديت نمت
شوين وگعدوني لبست ونضفت روحي
ريگوني وام ستار تولت الفرخ نضافة
وتسبيح وتطبخ لحد ماعبرت الأسبوع
وشلت روحي گالتله الملا يعتازني
بالبيت ردني
وداها وردلي وصار محمد سلوة
ستار يحطه بحضنه ويناغيله مناغى
ويحبب بي
التفتلي جر ايدي حبها
-حققتيلي حلم بعيد
بعد يومين راح لشغلة وردلي بيده
معاضد ستة
-هاي حلاوة الجاهل
-ليش تكلف روحك
-ياكلافة انتِ جبتيلي روحي
من الدنيا
وظل ستار يمي مدللني
گبل لا اطلع الأربعين بأسبوع
گال نزور اهلي خل ابوي يشوف
الولد انا كيفت
لبست ولبست الجاهل هو اخذ كاروكه
وغراضه خلاهن بالسيارة
ومشت بينه السيارة بس كلما
نگرب من السلف وجه ستار يغيم گالي
تلثمي گبل لا ندش السلف تلثمت
طبينه الحوش ولگينه الملا لازم
خروف وخلى حدر رجليه
ذبحة
الكل واگف يعاين وناهدة
العبالي گالبة وجهن اجت اخذت
الجاهل من ايدي
ظل الجاهل بين اديهم
وانا طبيت ويه فطيم لحجرتهن
بين غدة وهوسة
رضعت ابني ونومته بالكاروك
اخذتة مني ام ستار
وطلعت للمغرب يلا ردو
الي شو ارضعه مايرضى
گلت شبعان لليل ردت اخذته
ورجعته الي هم مايرضع
وجه الصبح جاع رضعته بس
يفر براسه گوه ياخذله شويه ويبچي
ثاني يوم نفس السالفة بس ياخذونه
يگضيها ونين ومايرضع
بس مااگدر اگلهم لا تاخذونه
گبل الأربعين بيوم گطع ليلة
كاملة مارضع مني گمت ابچي
اگللهن مايرضع تگلي الحجية
انا رضعته كنداغ مي وشكر وشبع
ستار يمرني شويه ويروح انا عاذرته
عن لا تزعل ناهدة وهم مشاكل هو وابو
وكل يوم للصبح بالديوان يتعاركون
مدري علويش
وگام محمد بس الفجر يرضى يرضع
من يكتله الجوع
طلعت الاربعين سبحت وام ستار
سبحت ابني لليل صاحلي الملا للديوان
رحت امشي لگيت ستار گاعد وعيونة ناطة
ويمه ناهدة گاعدة مرتاحة
ام ستار يمنا هم اشرلي
-تعاي يمي عمي
گعدت بصفه عاينلي
-تعرفين انتِ الفصلية ياخذونها
حتى تخلف لاهل المچتول وتوگف الدم مو
هزيت راسي اعاين لستار يفرك
بوجهه
-اي بوية والشرط هسه تم
انا كيفت
-بعد من خلفت يرجع كاظم للديرة مو عمي
بكل صلابة وقوة گلب گالي
-لا بعد خلفتيلنه الوليد الله وياچ
ومحمد وعلي
فزيت واگفة وهو عتني حيل گعدني
-اگعدي واسمعي
ستار ارمي عليها اليمين
عاينتله اهز براسي مايسويها هو
حلفلي ان گلبه حبني
-بووووويه
جاوب ستار ردت علي ناهدة
-والشررررررررررط
صاح عمي
-اخذنا رادتنا بعد هاي الاصول ترررررد البت لأهلها
عاينلي ستار وعيونه محتارة بس ماطول
بحيرته رمى عليه اليمين
راحت روحي وانا اشوف المله
المفروض يحكم بدين الله يسعى
لخراب رووووحي گعد يقره ويحچي
ويسأل ستار رد علي
بس انا مارضيت لزمني
حيل لوه چفي لوي
-ردددددي مثل مارد ستار لو ينكتل ابوووووچ
مارديت وعيني على ستار صرخت
-تررررضاها ولك ستاررررر
نزل راسه ماگدر يرد ابو
صاحلي
-ردي على ابوي مزنة خلص كل شي
-وابنيييييييييي
-أبنه أحنه
صاح الملا وردد الكلام من شفت ستار
بايع رديت ووگفت
-ماعندي شي وياكم
جريت وليدي من ايد فطيم اريد
اطلع وصرخت ناهدة
-هذااااا ابني أني
بلعت ريگي وانا اشوف ستار يجيني اخذه
من ايدي انا مامصدگة
جر محمد مني وخلا بيدها
ام ستار اخذتني من ايدي
للحجرة مال البنات وانا مامصدگة
عبالي مو هسه يردوني
لمت هدومي وانا الم واخلي بهدوم ابني وهي تردهن للبوفية
دفعتني ولمت بس هدومي وصاحت
-ستااااار تعال
مارد عليها طب الملا للحجرة
وگابلني وجه لوجه
رفع اصبعه بوجهي
-محمد ابن منو
-ابنييييييي ابني انااااااااا وستار
-لا جذاااااابة ابن جباااااار
-ستااااار ابوووو انت مو طلگتني من جبار
وزوجتني لستاررررررر
-وين ماصارت يمتى ولچ زنيتي ويه حمااااااچ
لطمت على خدي ورحت اررررركض
على حجرته دفرت الباب وهو واگف عاينتله
-ستااااااااار ابوووووك يگلي
الولد ابن جباااااااار شلووووون
تجذبوووووون گللهم شنيييي ابوووك
نسى
عاينلي وياريت حاط خنجر بگلبي ولا رد
نزل راسه ماعاينلي
-أبن جبااااار وانا اربي
لطمت على وجهي حيييل
ولگفته من الكاروووووك
-وروووووووح اخووووك
احلف بروووووووح اخوووووك هذا ابن
جبارررررر مو ابنك
-ابن جباررررررر
صاح الملا وخطف ابني من ايدي
-ستاااااااار ذبها على اهلها گلهم انتهت بينه
بعد بس ابنهم مايدش القرية دووووم
لطمتتتتتتتت على وجهي
ودگيت روحي يم القريولة چلبت بالعامود
مالتها
-مااااا اطلع منا ياظلاااااام مااطلع الا وليدي
وياااااااي
-ابني هذاااااا مو ابنچ
ناهدة ترادد وذاك يرادد وانا غمضت
عيوني وضليت مچلبة بالقريولة
طلعو من صاح ستار
-اناااااا احاااااجيها اطلع بوووويه
اخذ امي وياااااك
طلع الملا وهو راد يحاجيني غمضت عيوني
وماعاينتله بس فتح حلگه
تفلت علي حيل رد ضربني على وجهي
-ياااااااا نذل وووووولك تأمني وتاخذ
وليدي لمرتك العاگر ياظلام ولكم
يرررررررررضع بعده ماطالع الأربعيييييين
طلع راكض يمسح بوجهه وناهدة
نزلت يمي بالگاع
-خلصت شغلتچ بعد
-ابنيييييي ماااااااهدة
اخذة واررررد لبيتي هو جابلي
بييييت ارد بي للولاية واربي
ويه حچايتي رد هو وهي وگفت تضحك
-ههههههههههههه يابيت حبيبة هذا بيتي
اهلي مازوجوني لستار لا لمن خله
بيت بأسميييييي
عاينتله هو صاح بيها
-انچبي وطلعي منااااااااا
-لا لا خل اطلع حرگة گلبي مال سنة انت يمها
وتاركني سمعي لچ البيت بيتي
واني الگلت للملا عالسالفة وخليته يزوجچ
لستار وهم انا الگتله يطلگچ
عاينتله وطاحت دموعي
ووگفت
-باوووع ستار انا مو طماعة مااريد
البيت ولا الذهب ولا الهدووووم
ولا حتى انت انا بس ارررريد ابني
-ابنججججح بح صار ابنيييي
بس گالتلي ناهدة هيچ لطمت
-يررررررضع ولكم يررررضع يموت
لو مارضع
راحت من الكنتور طلعت قوطية زرگة وبطل گزاز
-هاااااااي اشوفه عاش صار
اسبوع بلا رضاعة وارضعه
حليب قووووواطي ويلهط الممة
لهط
ركضتلها جريت القوطية وطشرتها للگاع
مثل الطحييين
جرني ستار وصاح بيها
-كااااافي
طلعني ومشى بيه للحوش لازم ايديه
يريد يحاچيني صرخ بي الملا
-شلون تلزمها هيج تحرمت عليك بعدددددد
-بووووويه كااااافي
-ودها لأهلها لاتخليني اغضبببببب عليك
طلعت فطيم بيدها علاگة هدومي
خلت عباتي على راسي
ومشت تبچي
لبسني هو نعال برجلي وانا روحي
مفرفحة لمحمد بس لبست النعال ركضت
للحوش جوه يم ام ستار مخليته بحضنها
لگفته ووگفت گباله
-شووووفة شصغراته شلووون يحمل
بدووووني خليني هنا مو تردوووون
فصلية انا اظل فصليتكم بس يم ابني
جرني الملا من طب وشافني
وصاح
-اخذها لا اكتلها بمچانها
مامشيت جرو ابني من ايدي وصرخ
وانا صرخت وياه
ستار شالني شيل ومشى بيه مسرع
صار صوت بچيه محمد يروح ويرد ويه الهوه
لحد ماطلع بيه برررره للسيارة
ذبني بيها وصعد وانا فتحت الباب
رد قفلة وجرني لازم چفي حيل
ويمشي بسرعتة بالتراااابة والهوا البارد
وصل بيتنا وانا انحب واعاتب وأبچي
لما وگف فتح الباب وجرني من ايدي
اريد اتفرغص من ايده ماكو
دگ الباب وطلع ابوي بس شافني
طگ چف بچف عاينله ستار وگوه حچه
-أمانتك ردتلك والحچي البينه يظل
الولد ابن جباااااااار مانريد فضايح ويگولون
ملچها واحد وحبلت من الآخر
بچفي ضربته على صدره وانا ابچي
-تخسسسسى ياچلب
دفعني على ابوي
-عدادها وهدومها وذهبها يومين واجيبهن
ابنك مايطب الديييرة دووووم
دار وجهه ومشى وانا فرت رووووحي وصحت
-مخليييييييه الله ويااااكم
ولك ستاااااااار وليييييدي
راح امووووت
بس سمع حجايتي ركض للسيارة
ابوي يحضن بيه حتى اسكت وامي
طلعت تلطم على وجها بس طببوني عاينتلهم
-بوووويه چنت تدري بسالفتهم
مارد بس امي بچت
-هااااااا يمه تدررررررين
لطمت ولطمت لمن غابت روحي
بس شيفيد البچي والدمووووع
كل ليلة اعاين من الروازين ابوي
مقفل علي البيبان رحتله بليلة
فاض بيه الشوگ لأبني
وگفت گباله صدري دار حليب ومنگع هدومي
-بوووويه عاينلي ابني يبچي
عليه يريد يررررضع
دار وجهه واشر لامي
-سترررري البت تسودنت
بچيت وگعدت گباله
-أنا مااكسر خاطرك چانت النعجة
من توووولد تخلي فروخها بحضنك
ترضعهم وتداريها
بوية انا بتك الچبيرة احسبني
حيووووانة من العندك واريد ارضع
ولييييدي
بوووويه ردلياه
بچه وانا بچيت
-هذا حچي ديوووان بوووويه
حتى ما يموت اخوووچ
روح گبال روح
احترگ گلبي وظليت اصيح
-حااااطة گمر العشيرة وياك وويه
كاظم وويه الملا الشيطان
وويه النذل ستااااار ويااااكم كلكم
صاح بأمي طلعتني وانا صرت
مثل الطيرة الماخذين فروخها
ساكنة الروازين
لحد ما جاب ستار الذهب والهدوم
بيومها ابوي اجاني للحجرة
-بووويه هذا عدادج ونيشانچ
جابهن ستار
-مهنانيين بيهن بويه اطيهن
لكاظم شعندك غيره
ومن ساعتها وانا اناغي هاللعبة الگطن
وصرت انتطر الاخبار واسمعها من الناس
عنة الناس عبالهم ابني وابن جبار
وربتة مرت ستار محد يدري بالحگ
يگولن مدنفش ومداريته
وكبرت انا ويه الوكت وهو كبر
واسمع الحچي يصيحلها يمه
وسنة على سنة گام يلعب
ويه الجهال وانا رديت ايدي
خاوية لا حصلت روحي ولا ابني
تلبسه من اللبس احلى لبس
ومن يمر مايوچر على خشمه الطير
طالع على ابو
تدرين ستار صار اسبوع صادفني
وانا احوش جت للحلال
يصد بوجهه عني بس صار بعيد عن بيتنا صحتله
-ابوووو محمممممممد
اووووگف
التفت ووگف عاينتله مرتاح
ومبينة الراحة على وجهه
-مرتاااااح أشوفك ومرتك صارت ام
محمد شگلت لربك وانت تضحك عليه
وتحطني بحضنك كل يوم وتاليتك تهدمني وتحرمني ضناي
-مرررررة وببيتي وانا زلمة شني اظل أعاين
لطولچ انسي مززززنة صار ٨ سنين وطارت
الطيور بأرزاقها
طاحت دموعي هزيت راسي وگتلة الله موجود ومشيت رد ماشي بسرعة وراي
-اوووگفي مزنة
التفتت علي
-شتردين اوديلچ فلوس ذهب والله
التطلبينه بس حالليني لا تظلين
تدعين عليه
-واليوم ودوم ادعي عليكم انت وابوي
واخووووي وابوك الشيطان
منا لمن الله ياخذ حگي منكم
للمووووت ادعي منا لمن اروح
لربي مظلومة
بس شصار عذبة شو زادو خير
ستار صار ابو محمد
وناهدة ام محمد
وكاظم عرس بذهباتي
وصار ابو جواد وعنده اربعة غير جواد
وگاعد بالولاية
الظلام دنيتهم مشت وانا دنيتي
وگفت بذيچ الليلة الكشفت بيها الوجوه
:
نزلت راسي بست راسها ونزلت دموعي علمودها
-كل هذا شايلته بصدرچ وساكتة
-وراح أموت وانا ماخذته بصدري
تدرين شعرفت
-شعرفتي
-انه ابوي باعني مرتين
مرة فصلية لخاطر اخوي
ومرة بس بطن تحوي ابن لستار بالمرتين
انا الثمن وانا الضحية
وگفت وگفة وعاينتلي
-تدرين شفتهم
-يمتى
-ذاك اليوم ملبسته لبس مدرسة
وستار وياها يصيحلها ماما مثل
اهل الولاية
حتى هو الشلته ببطني
تسع شهور باعني
جريتها اگعدها عاينتلي
-چنت ظالة بأمل بيوم يعرفني امه ويجيني
بس ياخية أيست وانسدت روحي
من الدنيا والبيها زهدتها دوووم
ضحكت وعيونها سكنها ظلام وقهر
-تدرين شمشتهية عذبة
-گولي بعد روحي
گالتها بصوت بارد
ساكنة الموت ورجفت گلبي
وضلوعي لچلمتها
-مشتهييية أمووووت
حطت راسها بحضني
ونامت للفجر باستني وطلعت عبالي تصلي
غفيت ورديت نمت لهناك وصراخ
عله وترس الدنيا فززززت روحي
وانسلبت حسسسيت وصلة انثلمت
من گلبي
مزنة جانت مثل شمس الضحى
ضحكتها ترد الروح بس بلحظة غفلة
اخوها عثر عثرة سودة
وبدال ما ياخذون ثارهم منه
گالو مالها غير مزنة هي التشيل
دم أخوها وتطفي نار العشيرة
زفوها بليل أظلم
لا هلهولة لا حنة
ولا ثوب يلوگ لطولها الحلو
بذاك البيت مزنة ما جانت چنة
چانت يومية تموت ألف موته
تشرب الصبر وتجرع المر
لا أهل ينشدون عنها
ولا حظ گعد وياها
ومن شافت الأبواب انفتحتلها عبالها عاشت اخذو ضناها
انسدت بوجهها نفس الابواب
والدنيا صارت بعينها أضيگ
من خرم الإبرة وملت روحها
ومالگت بس الموت يرحم وجعها سوتها مزنة
لگوها الفجر جثة هامدة بنص النهر
راحت لربها وهي تشكي ضيم البشر
ماتت مزنة
وانطوت صفحتها ويظل السؤال اليحير
ليوين تظل نسوانا تدفع ثمن دم
ما إلها أيد بي
