رواية سداد وبنت الفصل الرابع بقلم الزهيريه
شكرًا لآنك احببتني
فهجرتني فآلمتني
فقتلت قلبي لا والله
بل قتلتني
ألق/ سبحان الله هاي الدنيا الانسان شگد يمشي بيها اعوج ويريد رب العالمين يدبر امور حياته على مزاجه ورب العالمين يمهل ولا يهمل بيوم ألي اجتي عمه نضال تهوس وتهلهل وتگول اني حامل النسوان بين اليباركن وبين المستغربات وطبعًا هي مو بعيده على رب العالمين بس في وضعها تصير 1000 علامة أستفهام خصوصًا عمه نضال شارفت على سن اليأس وسبحان الله صدگ المثل الي يگول دافني سوه عمي نزار من سمع نضال حامل لزمها موتها كتل بحيث من عياطها هواي ناس دخلت تحاجز عمه نضال من عمو نزار لان شبعها كتل بصراحة اني حسيت الله اخذ ثارنه منها اني وأبويه وأخويه وحتى أخذت أخويه وأبويه ودخلنه للغرفة بس متت ضحك عليها وبگلبي اگول حيل وابو زايد ان شاء الله
وبيومها واني وبالغرفة اسمع عمي نزار يصيح ويگول/ لو تموت ما تبقى بالبيت خلي تروح على أهلها الگوا... خلي يحيرون بالنغل مالتها
واني مديت راسي من باب الغرفة واشوف عمه نضال منظرها لا يسر عدو ولا حبيب الشعر مكفش ووجهه صاير خريطة الوطن العربي وهو يتهدد عليها گدام الناس وحمد لله من ضمن الموجودين مختار المنطقة كونه وهاي صار كل شي گدامها وسمعت كل شي يعني تعال اسمع التاليف الي راح يصير بالمنطقة
وعمه نضال تبچي وتگله / اصورت راح تفرح لان على كبرتنه الله انطانه طفل يعني مو بعيده على رب العالمين وهو رزق نبي الله إبراهيم بطفل على كبرته
وعمي نزار يجاوبها / اي مو انتي ساره زوجة إبراهيم واني ما ادري هذا حچي يفيدچ هسه تولين على اهلچ
وطبعًا بعد مشادات بين عمو نزار وزوجته عمو نزار جبر نضال تطلع من البيت وتروح على أهلها وهاي الحادثه صارت الظهر وبعد ما طلعت عمه نضال طلع عمو نزار وبقينه بس احنه بالبيت انوب كل شي ماكو أكل وبعدني حايصه ولايصه أريد اعرف شنو اسوي حتى ناكل سمعت صوت يگول / يا آهل البيت وين صرتوا
طلعت للگراج لگيت كونه وبيدها جدر وماعون وعلاگه سوده
الق / خاله شلون دخلتي وعمو نزار قفل الباب
كونه / حبيبتي دخلت على الاستعلامات مال الفندق واخذولي سونار ومن عرفوا ما عندي متفجرات عبروني الباب حبيبتي انت عقلچ بي شي شعندچ هيچ دققين شلون دخلت هو البيت شكو بي شو بس المنغولين وانتي ونضيله ام النغوله راحت لأهلها والله يا الله فوگ زينيتي جايبه اكل چان عدنه بايت گلت خطيه خلي ياكلون
الق / شكرًا خاله
كونه / اي راحت نضيله وبقى البيت بس الچ صفى البيت لام طيره وطارت بي خوش طيره
وبعد اخذ ورد كلام ويه كونه ما بي كل فايدة دخلت حميت الآكل الجابته كونه وچان تمن ومرگه وخبز ومن خليته في الصينيه واخذته للغرفه لأبويه واخويه والله هجموا على الأكل كأنه ما شايفين آكل أبد عرفت عمه نضال كل شي ما منطتهم ياكلون وإني اغمس الخبز واخلي بحلگ ابويه وأخويه والله منظرهم يقهر بشكل وبيني وبين نفسي اسال واگول شنو حكمة رب العالمين من خلقهم بس الله اليعلم وابويه يسوي مثلي يغمس الخبز ويوكلني والله ويه كل لگمه يخليها بحلگي أبوس أيده وبس بهذا الموقف حمدت الله وشكرته انه اني بنت رياض المنغولي وهاي خلقة الله أحسن ما أكون بنت نزار ونضال الشياطين
كملنه اكل ذليت الصينيه بالمطبخ وهمه غسلوا واحنه فرشنه ونمنه وما حسينه غير المغرب على صوت الصياح والخبصه وأسمع أبواب تترگع على شنو ما فهمت بصراحة اني خفت ومن خوفي جريت أخويه وگعدنه يم أبويه واني حاضنه ابويه وأخويه الى ما انفتح باب الغرفة إلي احنه بيها ودخل واحد وبعلو صوته صاح / تعالوا هنا ذوله المنغوليين
شويه واجوا 2 شباب وهذا الدخل اول واحد
گال / أخذوا اخو المنغولي خلي يعرف الله حق
وذله الشباب الإثنين دخلوا جروا أبويه من نصنه وگوموه على حيله وهو ما يقبل يروح وياهم ويجرون بي وكل ضربه يضربوها اله ولا الثانيه وهو يعيط واني أخاف اگوم وحاضنه أخويه وقبل ما يطلعون
گلي هذا الدخل علينه اول واحد / گولي لعمچ نزار خلي يجي يعتذر ويصير ادمي هاي نضال تاج راسه العار
وطلعوا واني طلعت وراهم واشوفهم شلون يضربون أبويه وطلعوا يريدون يصعدوا السياره وهو يعيط بحيث جمع الناس عليهم
وجيرانه رجال يطلع وسطة عمر گاللهم / بويه وين ماخذي وهو معاق حتى الله بسما ما يرضاها
واحد منهم طلع سلاحه وگال / لا أحد يتقرب واليدخل افرغ الشاجور براسه احنه ماخذي لما يجي نزار ونعوفه
وبالفعل الناس كلها ابتعدت عنه وصعدوا ابويه لسياره بعد مصارعه طويله بينهم وبينه ودخلت يمي كونه
وهي تگلي / والله يا عمي نضيله يتحزملها جيش شلون خطيه أخذوا رياض المنغولي على مود نضيله
وظلت گاعده يمنه الى ما أجى عمو نزار وظلت كونه تثرد حچي ويا وعمي نزار جوابه واحد وهو / نضال بعد ما تدخل للبيت واذا على رياض خلي عدهم او يخلون براسه طلقة
ورجع عمي نزار طلع وبقينه آني وأخويه وأستمر الوضع ما يقارب ال 10 ايام واحنه حال الضيم حالنه اكلنه كله على الناس الخيره وطبعًا الإشاعات حدث ولا حرج بحيث بين ما أروح للمدرسه وأرجع إشكال حچي أسمع
وبعدها بعد مرور أسبوعين من طلعت نضال رجعت من المدرسه لگيت نضال موجوده بالبيت وحتى أبويه هم موجود فرحت برجوع ابويه فرحه بس الله اليعلم بيها وألي عرفته فيما بعد انه اخوة نضال ولد عمها متفقين ويا انه ترجع لبيتها ومن تولد ياخذ الطفل ويسوي تحليل ويشوف إذا كأن الطفل ابنه لو لا وعلى هذا الاتفاق رجعت نضال ولگيت يمها كونه بالمطبخ تصفگ وتگول / نضيله رجعت لعيالها وطير السعد يبرالها
ناس منافقه هي هاي نفسها كونه الچانت تحچي على نضال صدگ لو گالوا بالوجه مرايه وبالگفه سلايه هذا ينطبق على كونه وما همهم أبويه خطيه ألي نضرب ونهان بموضوع هو ما اله دخل بي لا من بعيد ولا من قريب وبعدها نضال سوتني خدامه بحجة إني حامل واجتي امتحانات أخير ألسنه واحنه بكلوريا وطبعًا نجحت بالغش يا دوب درجاتي ب 50 ونجحت الى المتوسطه وچانت عمه نضال بأخر شهر إلها وبقالها شي على الولاده ولكون رب العالمين عادل وياخذ حوبة البشر بالدنيا قبل الاخره گامت صير عدها أوجاع بحيث تصيح لله وتستريح وصار عدها نزيف اخذوها القابله طبعًا الي اخذتها كونه لان عمي نزار ما يقبل يروح وياها
والقابله بعد ما فاحصتها گايله لكونه/ عيني عدها ولاده بس ما عدها توسع اني ما اگدر اولدها اخذوها للمستشفى وبالفعل ماخذتها كونه وهي بالانفاس الآخيرة وماخذها النزيف وگبل مدخليها صالة العمليات ومتلحگيها على الاخير خسرت رحمها والمفاجاه انه الطفل
سداد/ ملاحظتي لتصرفات آريا صارت غريبه بشكل يعني صارت أدور حجه على أتفه الأسباب حتى أطفالها صارت ما تهتم الهم من اسألها
شبيچ اكو شي گليلي آريا ضامه عليه شي شو احس ما تحبيني مثل قبل مليتي مني آريا
آريا/ ما بيه شي بس أني أريد اطلگ منك
سداد / ليش آريا بدر مني شي گليلي اذا أخطأت وياچ بشي عادي اذا عندچ ملاحظه عليه اسمعچ گليلي حتى اصلح خطائي وياچ آريا اني احبچ واموت عليچ وانتي صار فتره حتى مانعه نفسچ مني ليش شنو السبب
آريا/ لا سداد اني صرت ما احس بحبك صرت اشوفك حابسني بالبيت خدامه على مود الأطفال الى ما كرهتك أنت والأطفال صدگ
سداد/ اخذچ لأربيل ترتاحين هناك يم اهلچ واهلي وابقي هناك انتي والأطفال وتونسي وشوكت ما يعجبچ ترجعين ارجعي بس مو مال نطلگ بعد ذاك الحب واحنه بينه أطفال واهم من هذا كله اني اعشقچ
آريا/ الظاهر انه القلب وما يهوى واني كل ما يمر وقت أندم لكون اتسرعت وحبيت سداد وزوجت لان يسر صرت احبه أكثر من روحي هذا بالبداية وچنت متلهفه حتى اگول ليسر على طلبي من سداد
ويسر تخبل
يسر / أنتي شلون طلبين الطلاگ من زوجچ انتي فكرتي اذا طلگتي شلون نزوج
آريا/ شنو شلون نزوج عادي أخلص العده وتعال اطلبني من أهلي ونزوج شنو المشكلة بعد
يسر / أكو مشكلة لان اني يا دوب اطلع كم فلس من بيع الدجاج ما فكرتي من تطلگين من أريد أتقدم الچ شلون افتحلچ بيت ومنين تعيشين وآني أكو شي بعدني ما گلته الچ اني مزوج وعندي 3 بنات وهو اني بيت واحد ما مدبرها أنوب بيتين
آريا/ يعني شنو ابقى ويه سداد واني ما اگدر بدونك گلي شنو الحل
يسر/ شوفي حبيبتي احنه لازم نأمن مستقبلنه يعني أنتي اذا طلگتي من زوجچ وخصوصًا اذا إنتي طلبتي طلاگ منه وما قبل يطلگچ تدرين لازم تتنازلين عن كل حقوقچ وساعتها راح تفلسين يا بنت الناس حاولي بكل جهدچ تجمعين منه فلوس ضمان النه
آريا/ سداد حتى اذا يريد ينطيني ما ينطي مبالغ ضخمه لان هو مسؤول على البيت وكل شي هو يجيبه واذا احتاج شي الي هو ياخذني للمول وأشتري لهذا مبالغ ضخمه ما ينطي
يسر / عوفيني كم يوم نشوف شنسوي ويا واني اليوم اجي بالليل أريد مبلغ من عندچ أريد أشتري الها علاج وذني اعتبريهن دين وعن قريب اوفيهن الچ
آريا/ تعال أنتظرك
وبالفعل لليل اجى يسر وكنت منتظرته بحيث حبست أطفالي بغرفة وقفلت عليهم الباب واكثر الاضوية مال البيت طفيتها وطلعت للگراج وهم كان أظلم بس يعكس عليه من ضوه بيت الجيران وفتحت الباب اله ودخل يسر وره باب الگراج وظل ساكت بعدها خله أيده على خدودي وهو يباوع بعيوني
يسر / انتي شنو من جمال تخبلين الله دزچ إلي هدية
آريا/ بعدها قرب وجهه من وجهي وصار يبوس بيه واني گد ما أحبه صرت ما اشوف آحد غيره بهاي الدنيا
وابتعدت عنه واستأذنت منه أنه أدخل أجيب اله الفلوس
واني دخلت للبيت احس گلبي صار طبل دخلت للبيت واخذت الفلوس وطلعت انطيتهن إله وهو آخذ الفلوس وهو يشكر مني ويگلي / نقذتي بنتي وان شاء الله اردلچ الفلوس بأسرع وقت وراح واني خلاني عايشه بأحلامي الورديه وعلى ثاني يوم اجى سداد وحاول هواي يريد يتقرب مني كزوجه بس اني خلاص لعبت نفسي منه وكل يحاول يتقرب اني ابتعد بس يسكت ويتحمل
وصار وضعي ويه سداد أنه أسحب منه فلوس وهو سؤاله المتكرر شسوين بالفلوس وين تصرفيهن وأنتي ما طلعين بس آني دائمآ انهي سؤاله بعركه حتى ينسى وما يحاسبني وبعدها تقريبًا بشهرين صار سداد اي فلوس ما ينطيني وصرت أتذمر منه
آريا/ سداد أنت بخيل ليش صرت ما تنطيني
سداد/شوفي اريا اني يتغير عليه 180 درجة إني اتغير عليه 360 درجه آني الى هذا وقتچ ما اعرف شنو علتچ يعني شنو انتي تردين بس فلوس وترجعين مثل قبل
آريا/ لا طبعًا الفلوس مصرفي أنت تغيرت عليه مو إني لهذا واجب عليك تنطيني مصرفي
وما قبل ينطيني إي مبلغ وگظت يومين الاجازة مال سداد واتصلت على يسر بلغته وعدني يجيني بالليل
ومن صارت الساعه 12 بالليل اجى يسر ومن دخلته وبعد البوس وحضن اللهفه
يسر / حبيبتي آريا هذا العلاج من يجي زوجچ خليله من هاي القطرات بشربت وانطي اله
آريا/ شنو يسر تريدني اسمم سداد وأفترض مات اكيد راح تنذب براسي
يسر / إنتي مخبله شنو تسممي غير راح توگع براسج وثانيًا اني ما مستغني عن حبيبتي اذا سممتي راح دخلين السجن واني شنو أستفاد
آريا / لعد هذا شنو البيدك حتى أفهم
يسر / إنتي انطي منه ومعليچ اني ابلغچ بالباقي
سداد/ آني أنسان عملي ومو معنى انه ما عندي أحساس بالعكس أحس بالشي قبل ما يصير ولكون حياتي چانت هادئه ويا آريا لهذا ما عندي مشكله احچي بيها واشوف اصدقائي أكثرهم يشكون من نسائهم واني چنت احمد الله واشكره الف مره انه ما عندي مشكله بحياتي الزوجية بس من صارت المشاكل ويه آريا صرت مثل المخنوگ أريد شخص أفرغ همومي لهذا ما عندي غير المدير مالتي وحچيتله كل المشكله
المدير/ شوف سداد أكو حقيقه لازم تفهمها وأني اعتذر منك راح اواجهك بي بس لازم أنبهك وهو المرآه من تتحجج على أتفه الأشياء انه عدها بديل لانه اذا وجد البديل ماتت مشاعرك إتجاه الخليل وهاي اني ما دى اعمم على النساء لا الرجال كذلك بما انه انت متقصر وياها وتحبها وموفرلها كل شي يعني انت ما عدت مهم عدها طالما ما تهمهما لازم تفكر تجمع فلوس منك يعني مفكره تنهي ارتباطها وياك
سداد/ بوقتها المدير فر راسي فر وقررت من إنزل من اجازة اشوف آريا نفس تصرفاتها وإذا شفتها تتحجج عليه وتريد تطلگ خلاص اطلگها واخليها تروح
ومن نزلت للبيت ودخلت بيتي شفت آريا مبدله وكاشخه طالعه تجنن ومن شافتني اجتي باستني وسلمت عليه متغيره تتغير كامل وتضحك ويايه ولبسها اقرب ما يكون إغراء لان كله خفيف شيفون
تقربت عليها وسحبتها عليه بهدوء وظليت أبوس برگبتها وسطرني عطرها
سداد/ حبيبتي تعالي ويايه للغرفة
أريا/ لا مو هسه خليها بعد الغده
سداد/ شگد حاولت وياها بس ما قبلت تجي للغرفة الا بعد الغده وجابتلي عصير برتقال طبيعي اخذته منها شربت منه گبل حسيت
