رواية سداد وبنت الفصل الخامس 5 بقلم الزهيريه

أكتبوا على قبري 

مات كثيرًا قبل وفاته 

ألق/ سبحان الله يگولون اهل قبل الي همه أجدادنا الحوبه تبطي بس ما تخطي والحوبه تسحگ وتلحگ وتاخذ ثلثين من الحگ وهذا صار ويه عمه نضال شگد اذتنه آني وأبويه واخويه بس الله ما عافها وشگد چانت تعير وتعيب على اخويه وأبويه لكونهم منغوليين الله گاللها اوگفي راح ابليچ بواحد مثلهم وحيري بي ومن كونه اخذت عمه نضال للمستشفى وطبعًا چانت بالانفاس الاخيرة وگبل مدخليها لصالة العمليات ومسويلها عملية وأول شي خسرت رحمها ومن ولدت الطفل سبحان الله هم چان منغولي وهي حولوها للعناية المركزه لأن عمليتها خطرة والطفل مخلي بالخدج 

واجتي جوارينه كونه الراعي الرسمي مال نضال ودخلت علينه وهي صيح / وينكم يا آهل الدار عيني تنطونه لو نروح 

طلعت إلها وسألتها/ شكو خاله شنو ننطي 

كونه / عيني شتنطيني هو انتوا شعدكم حتى بطونكم ما شابعيها خبز عيني نضال شنو مو فرد عدكم بالبطاقة التموينية لو كسرتوا عودها وذبيتوا ورقتها من العشيرة شو لا أحد اجى عليها وهي جابت ولد واني شنو أبقى وياها قابل واخدمها كافي الممرضات الى ما عفتها اني نطيت فوگ ال 50 الف الهن اني شعليه 

ألق/ بعدني أريد اجاوبها ما أدري منين طلع عمي نزار 

وجاوبها / عيني كونه احنه ما عاتبين عليچ تروحين وياها عدها آهل وگواو…. وهمه يحيرون بيها انتي منو مصخم وجهچ وگلچ روحي وياها 

كونه/ هاي ما مرجيه منك نزار يعني عد اقلها شكروني وأنطوني الفلوس إلي دفعتهن 

نزار / عيني هسه أهلها يقدمولچ كتاب شكر من امانة بغداد يصدر واما الفلوس الدفعتيهن على مود ولي العهد اني فلس واحد ما انطي انتي وياها تحلوها بينكم 

وكونه فجرت القنبله بوجهه عمي نزار وهو عافها ومشى بس من گالت / عيني نزار خاف نضال من شوف الطفل منغولي ما تنطيني فلوسي 

وهاي جمله چانت كفيلة إنه تخلي عمي نزار يصيح بعلو صوته وهو يسأل كونه / شنو منغولي 

كونه/ اي عيني جابت ولد بس منغولي يا عيني يا نزار قابل شتريدها جيب غير منغولي هاي وراثه عدكم ظلمتها لنضال خطيه أصلًا الولد طبق الآصل من رياض وهو أخوك يعني عليمن طلع الطفل غير أهله 

هنا نگلبت كل حسابات عمي نزار لهذا طلع من البيت وكونه هم طلعت إلى ثاني يوم اجتي عمه نضال ووياها أختها وبيدها طفل بس شنو تحس عمه نضال مكسوره كسرت عمرها واني صار عندي فضول آنه أشوف الطفل ودخلت وراهن لغرفة عمه نضال وتقربت على الطفل صحيح چان منغولي ومن أنتبهت عليه عمه گامت صيح وتغلط عليه وطردتني من غرفتها وبعدها مرت الأيام وعبرت العطلة الصيفية أنتقلت مرحلة جديدة وهي مرحلة المتوسطة وطبعًا يحتاجلي ملابس وتجهيزات بس المن اگول وانتظرت عمي نزار وطبعًا هو مثل خفاش الليل يظهر لو بالليل لو يظهر بالاوقات الما مرغوب بيها وبالليل أجى من شفته دخل للگراج وشجعت نفسي وطلعت 

وهو انتبه عليه نزار/ خير شكو شو گاعده لهسه 

ألق/ عمو الدوام مال المدارس ما بقى شي عليه وآني كل شي ما عندي من التجهيزات لا ملابس ولا قرطاسية 

نزار/ أي ذكريني باچر وآني أخلي نضال تشتريلچ 

الق / تشكرت منه ودخلت جوه للغرفة يم ابويه وأخويه ولازم أغمض عين والعين الثانيه ابقيها مفتوحه لان عمي نزار خفاش ما ينشاف واخاف يطلع وما أشوفه 

ونومي چان متقطع والصبح اني گاعده بالصاله من طلع عمو نزار مبدل ومن رجعت ذكرته بحچي الليل من گتله على تجهيزات المدرسه طلع چان بالليل سكران وما يذكر اي شي ومن جادلته واصريت على أنه أريد فلوس لزمني موتني كتل عماني عمي بحيث الضربه منين تجيني ما اعرف وما عافني الا دگ الموبايل مالته وعافني وطلع 

وهو من يضرب بيه چان حاصرني بزاوية ومن رفعت راسي شفت عمه نضال گدامي 

نضال/ إنتي عندچ عقل من طلبتي فلوس من نزار بابا عندچ إمكانيات استغليها وانتي جيبين مصرف الچ عقل ماكو براسچ 

وعافتني وراحت يعني زرعت بذره وراحت واني بحكم عايشه بهيچ عائلة وهيچ بيئة فهمت شنو تقصد نضال وظليت ابچي لان ما اعرف المن احچي إني وحدي وما أعرف شگد مر وقت على گعدتي بالصاله وابچي ودخلت كونه وشافتني وجهي خريطة 

كونه/ يااااا هاي شنو وجهچ صاير محمد القاسم شبيچ يا مظلومه 

الق / من حچيت كل شي لكونه 

كونه / ياااا بس ذني اني اجيبلچ من بنت اختي ملابسها مال العام بعد ما تلبسهن وراح تشتري جدد يله اجيبهن الچ على روح البريعصي وبثوابه 

الق / خاله يا بريعصي 

كونه/ معليچ البريعصي زوجي المرحوم الطلگني 

وطبعًا كونه ماكو واحد يعرف حياته شنو بس رغم هذا كله گلبها طيب وبيها طبيعه يعني وياهم وياهم عليهم عليهم وهي چانت اكثر الأحيان اي واحد عنده شي زايد من آكل او ملابس تجيبهم النه وهي هواي لمت الي ملابس مدرسه وحتى المايصير عليه تروح تفزع الخياطة على خطيه هاي ابوها منغولي وماعدها قرميلها هاي الملابس والله عشنه عيشه ويه عمو نزار وزوجته بس اليعلم بيها شنو من مذله 

وبده دوام المدرسه واني حالي حال اي بنيه بهيچ مرحله عمري 13 سنه في بداية مراهقتي ومن دخلت للمتوسطة شفت بنات اشكال وألوان يعني اني مناك مدرسة كل شي أعرف بالمتوسطة صرت جامعه اعلم ما أتعلم يعني شفت البنات الزينه وشفت البنات المو زينه ويبقى كل واحد حسب تربيته المن ينجذب للزين او للمو زين واني حمدلله اكيد أروح للمو زين  

صرت كل شاب اشوفه اصادقه بس علاقة عابره يعني مو حب وحمد لله عبرت السنه واني سقطت لان ما معقوله انجح واني حايره بالسوالف المكسره وعلى ثاني سنه هم داومت واني اكو هواي اشياء تغيرت بجمسي وحتى نزلت عليه الدروه أما الدراسة حمدلله اذا الحايط يفتح كتاب أني أفتح كتاب وكلها تشكي من كسلي وبيوم راجعه من المدرسه البيت المقابيلنه باعوا بيتهم واجوي ناس بمكانهم وشفتهم من چانوا ينزلون اثاثهم المنزلي  

واني دخلت للبيت 

بعدي ما مبدله ملابسي ندگت الباب طلعت صار گدامي بوجهي ولد شاب حلو 

گال / مرحبًا احنه جيرانكم المقابيلكم بيت ابو ليث اليوم سكنه وكهرباء ما عدنه ونريد من يمكم صنونده وتفتحون الماطور من صدقه ونذر أروح لهذا الوجه 

ألق/ حمد لله صونده مالتنه مگصگصه قطع قطع وما بيها مترين متوصل لبيتكم اخذ من غيركم 

هيثم / عيني اصور انتي من يزيد ابن معاوية 

الق / حمد لله يزيد ما چان منغولي ماكو اي وجهه مقارنه 

وسديت الباب بوجهه ودخلت بس شنو نطبع بگلبي وبمخيلتي وللعصر اني واخويه بالحديقه وشفت الولد نفسه ألي اجه الظهر وطلب مي على سطحهم يطير طيور ومن شافني أجى من ناحية سياج السطح ويباع عليه 

سداد/ اصعب شي بالحياة من تكون تخلي الثقة في إنسان يخونك والخيانه مثل سقوط من جبل أحتمال السقوط ما يأذيك لكن إلي يأذي هي الايد آلي دفعك ودائماً الخيانه تجي من أقرب الناس الك وتكون توجع بحيث تذبحك من الوريد للوريد وأني من رجعت من دوامي چنت مقرر إذًا أريا طلبت الطلاگ اطلگها لان ما معقوله ابقى ويه إنسانه ما تريدني وكل ممكن يصير بالاكراه الا الحب والزواج بالاتفاق 

لكن من رجعت للبيت لگيت آريا متغيره بحيث معدله نفسها وسلمت عليه وبوستني وتضحك يعني رجعت آريا مال قبل وحتى ظليت الوم نفسي لكون ظلمتها وشعرت بالذنب لكون ما عذرتها وهي اكيد تتعب من البيت والأطفال واني ما موجود ودائمًا الي يحب ينطي إعذار لليحبه ويشوفه ملاك لهذا أني غالطت نفسي وبيومها تقربت منها وبوستها وردت أخذها لغرفة النوم بس ما قبلت 

آريا/ حبيبي مو هسه عدنه الليل بطوله شكو مستعجل اني حضرتلك كوب عصير برتقال آني عصرته بيدي وأريد تشربه كله 

سداد / انطيني العصير واذا تگدرين نيمي الأطفال حبيبتي حتى نبقى وحدنه ونجدد حبنه وليلة عرسنه 

واني اخذت الگلاص العصير وشربت منه گبل حسيت بي مرار 

سداد / حبيبتي آريا هذا طعمه مر يعني المرار اكثر الحلو بي 

آريا/ اعتيادي حبيبي غير طبيعي يعني عصرته بگشره واذا تحبني تشربه كله حق تعبي 

سداد/ الله لا يضيعلچ تعب حبيبي 

وبالفعل شربته كله ودخلت للحمام سبحت وعطرت نفسي وبعد الغده چانت اريا دى تغسل مواعين رحت سحبتها من أيدها وجبرتها واخذتها للغرفة لان حالي حال اي رجل چان بالدوام وبعيد عن زوجته أسبوعين يكون غريزته قويه ويريد بس يفرغ 

آريا/ شبيك سداد يمعود الأطفال بره وحدهم 

سداد/ دى يلعبون حبيبتي تفرغي الي 

آريا/ بس شويه خلي ابدل احظر نفسي انطيني 5 دقايق 

وبالفعل اخذت ملابس نوم وراحت للحمام شويه وطلعت لابسه ملابس نوم شيفون أسود وأحمر وهي بشرتها بيضه بياض ناصع طالعه تجنن واني گبل سحبتها عليه وأخذتها للسرير وظليت أبوس أريد ماكو ما عندي اي حركه أو غريزه أنوب بشكل تفشلت منها وخصوصًا وآني الي جبتها سحل للغرفة 

آريا/ شبيك حبيبي سداد 

سداد/ لا ما بيه شي بس تعبان من الدوام 

آريا/ براحتك حبيبي شكو مستعجل ارتاح من تعب الدوام وگدامنه اجازتك أسبوع 

سداد/ وهو كذلك اعذريني حبيبتي اني راح أسبح وأنام 

وهي راحت للحمام وسبحت وطلعت واني بعدها سبحت وطلعت بس شنو افور واغلي شبيه شنو الصار ويايه 

واريا راحت على الأطفال واني نمت على السرير وشگد حاولت انام بس ما گدرت الموقف الصار ويايه ياكل ويشرب هسه شنو تفكر بيه 

وللعصر نزلت لگيت آريا والأطفال دى ياكلون وگعدت آكل وياهم بس شنو احس روحي مرتبك وخجلان منها كأنه مسوي مكسوره وهي كاسره بيها عيني وفي حين آريا چانت طبيعيه وتصرفاتها بريئه 

ولليل وآني أطفالي متعودين ينامون متأخر كلش يعني ما يقارب الفجر يله ينامون وبس ناموا واريا ظلت تتمكيج وتبدل ملابس نوم وتتعطر وتقربت عليه وحاوطت رگبتي بيدها وهي تبوس بيه 

آريا/ شبيك سداد شو احسك ما الك رغبه بيه شنو بعد ما تحبني مثل قبل 

سداد / بعد كلام آريا لازم آخذ خطوه وما احسسها وبالفعل هم أخذتها لسرير بس نفس وضعي الظهر ما عندي كل رغبه جنسيه وهي تريدني اجامعها هنا صدگ تخبلت 

آريا/ شبيك سداد شنو مزوج وحده غيري واني ما ادري وبعد ما تريدني 

سداد/ لا حبيبتي تعبان وبصراحة خلي اگلچ اني عندي مشاكل بالشغل ويه مديري واحتمال يفصلوني لهذا شوفيني مشغول فكري بالمشكلة وما بالي اي شي 

واني گلت هذا العذر لاريا حتى لما اشوف شلون أراجع دكتور حتى أعرف شنو علتي 

وعلى ثاني يوم إتصلت على ولد اصدقائي وسألتهم على دكتور مال اعضاء تناسلية واحد من اصدقائي انطاني عنوان دكتور بمنطقة بالحارثيه وظل ساعه يحمد بالدكتور عبالك راح اناسبه وگلي ترى الا حجز ينطوك موعد وتروح على الموعد بس بنفس اليوم ماكو حجز وانطاني رقمه وبالفعل أتصلت وانطتني السكرتيره موعد بعد 3 أيام بس اني طلبت كشف مستعجل وانطيت ضعف الكشفية في سبيل ادخل للدكتور اليوم وآني العصر بدلت وطلعت ومن وصلت للعياده هواي اكو ناس وكل واحد قصته شكل 

الى ما صاحوا إسمي دخلت لگيت دكتور وسطت عمر سلمت عليه وگعدت وشرحتله حالتي 

الدكتور / گوم نام على ذيچ السديه 

واني هم نمت على السديه واخذلي سونار 

الدكتور / ما بيك شي من اخذتلك سونار ردت أشوف صاير عندك دوالي ادى الى ضعف انتصاب ما بيك شي  

سداد/ أنوب من گلي الدكتور من كل شي ما أشكو تخبلت لعد شبيه ورجع انطاني مجموعة تحاليل دم وإدرار وهم رحت سويتهن وانتظرتهن لما النتيجة تطلع وبس طلعت النتيجة اخذتها ورجعت للدكتور شافهن 

الدكتور/ من كل شي ما تشكو لهذا راح انطيك بس فيتامينات ومقويات ونشوف  

سداد/ وانطاني الدكتور الوصفه وأخذتها من الصيدلية ورجعت للبيت وبقت آريا تسأل شنو هاي الأدوية وإني اجاوبها فيتامينات 

وانوب شگد ما مستعجل أريد نتيجه أسرع كله اخذ حبيتين ويه كل وجبة وطبعًا آريا كله سويلي عصير برتقال طبيعي حتى العلاج ويه مفعول العصير البرتقال وفيتامين c يكون أسرع وهم يومين اني اخذ الأدوية وهم نفس وضعي كل غريزه ما عندي يعني الوضع الي اني بي قربت اليأس يملأ نفسي لان اي تغير وبيوم الثالث صار الي چان لا في البال ولا الحسبان وهو المحالب والخصيتين بيهن ورم مو طبيعي يعني احسهن راح ينفجرن والوجع مو طبيعي والله صرت اعيط لله ما اگدر اتحرك من مكاني ولكون اني في بغداد واهلي كلهم في أربيل اتصلت على أصدقائي اجوي أخذوني للمستشفى 

الفصل السادس من هنا