رواية ليلة كمرية الفصل الرابع 4 بقلم ليلي الهاشمي

_ لا.. بعدني ممكملة سحبني من ايدي 

وگلي صعدي ماكو مجال للرفض صعدت وهو لاف وصعد 

وصار هدوءءء 

وخرت شعري عن وجهي ولفيت الحجاب زين 

وباوعتله بأستغراب وهو صافن يباوعلي 

_ ماعرف شنو احچي بس لازم تسمعين للنهاية 

مشى بالسيارة والمطر من الشده مالته چان بصعوبه يتحرك وضل يمشي على كيفه وبهدوء وصافن ماحجه والجو بالسيارة هدوء مزعج مزعج حيل صوت المطر وهو ينزل كذلك يحسسني بشعور سيء 

نطقت وانا واضح عليه التوتر 

_ ممكن تحچي ترا متوترة وحق الله وين ماخذني لو ما أثق بيك والله ماصعد 

باوعلي واخذ نفس بصعوبه ووكف سيارته بمكان شبهه مابي احد كم بيت وبعيدات طبگ سيارته وخلى وجهه على الستيرن ورجله حركتها صارت واضحة ومسموعة جان يهز رجله بسرعة هو متوتر وانا زاد توتري 

فتحت باب السيارة  ردت انزل وسحبني من ايدي بسرعة وميل نفسه وسد الباب وخر ايده مني واعتذر ردت احچي وسبقني وگال 

_ حاولت بس ما گدرت يا بنت الناس وبكل صراحة وبدون لف ولا دوران ، تقبلين تتزوجيني

ايدي بعدها على الباب وايدي الثانية ضلت بمكان ما چان هو لازمها .. رجعتهم اثنينهم لحضني ولزمتهم بقوة الطريقة الوحيدة الي اگدر اكبت اي مشاعر تصيبني… شنو ؟ ما افتهمت الي گلته مستوعب لو المطر مأثر !! 

رد عليه بصعوبة … اني اريدچ مو حب ماگدر اجزم على انها حب بس اريدچ قريبة وجودج يمي راح يريحني راح يخليني مرتاح وما افكر بيچ من يوم الحادث والي صار والشهور عدت واني ما ابطل تفكير بيچ وبوضعچ ، ماريدچ تشتغلين بالبيوت ولا اريد فاطمة تتبهذل ولا مستعد اخسر إنسانه مثلچ  مو حب ماگدر احبچ .. بس اريدج 

كلامه مو موزون ووضعه مو طبيعي چان خايف حاير يحاول يكبت شي اكبر من عنده رجع يحچي وهو يرفع تلفونه من گدامي وبطريقة عشوائية وبكلام غير مرتب ولا موزون 

_شوفي هاي مرتي ممرضة شفتها مرة بالمستشفى 

وردتها واخذتها وهي تحبني تموت عليه واني احبها لهذا ماكدر احبچ بس ماريد تضلين بنفس الدائرة طول عمرج

ولا يهمني منو اهلج ومنين جيتي كلشي ما يهمني غير إني اصير قريب واگدر اساعدچ وبشكل رسمي وهو زوجج يعني مساعدتي الج ما راح تضر ولا ينحچي بيها بأسم الاستغلال

بين الناس 

عيني على صورة مرته ركزت بتفاصيل ما لازم اركز بيها بهيج وضع بس چانت جميلة جميلة .. بيضة وعيونها خضر ولابسه احمر وشعرها اصفر چان خليط ألوان بس هل ألوان متناسقة ماعرف ليش ركزت على لون عيونها الأخضر لو على لبسها وشعرها چان مركز الصورة ف لازم اركز او انتبه 

وبياضها وهو يمها واگف ومبتسم ابتسامة كلها حب وكأنه يگول .. هذا انتصاري بين يدي 

رفعت عيني على وجهه وهو بعد يحچي ويحاول يقنع إنسان ميت أنه يعيش مرة ثانية بس بدون جدوى 

ابتسمت وقاطعته 

_ الله يخلي الك هل حلوة ويحفظها ويسلمها من كل شر 

ويحفظك الها لان واضح الحب بعيونكم ويحفظني أنا هم ويبعد عني امثالك 

فتحت الباب ونزلت طين ومطر ودشداشتي تبللت ومن جدمي ضاع الدرب .. منين اطلع مادري 

صوته چان ورايه ما سمعته وردت ابچي وحدي 

ضل يصيح لحد ما صديت جان واكف والمطر فوكه ومشغل لايت صار گبالي يرجف ويحجي … صعدي دخيلج ع الأقل اوصلج 

_ وجهي كاتلته الشمس ومليان كلف وتشوفني صورة مرتك عليمن هلگد فرحان بيها إذا تحبها ومستعز عليمن جاي؟؟ 

بصوته چان واضح الاستغراب 

_ شنو كلف 

رفعت ايده وخليت الضوه بوجهي ورجعت حجيت 

_ هذا الكلف البوجهي من الشمس والتعب .. وحقك ما شايف شعري شكد يگع لو جسمي شكد تعبان وما مهتمة بشي بحياتي غير إني اركض وره الفلس حتى اعيش 

وانت بكل برود تگلي ازوجج وتشوفني مرتك 

وخر الضوه من وجهي وگال … غرتي ! 

_ اي يمكن غرت لان حلوة وما شايفه شمس 

وانا كاتلني القهر والعوز غرت لان ما عشت ما غرت لأنها عايشه وعدها واحد يحبها بس يريد يتزوج وحدة ثانية لان مستعطف وضعها .. انت راح تغير رأيك بمجرد ما تشوف جسمي والتشوهه الي بي .. راح تغير رأيك من تشوف فراغات شعري .. وتگول أنا عندي گمر شجابني على هاي 

هاي الي هي أنا هاي الگدامك 

_ كتلج اخذج حتى اساعدج ما اخذج حتى اصير رجلج بالفراش  

_ ادري ، وليش برأيك أنا استحقّ اخذ واحد بس حتى يصرف عليه وما اعيش ويا رجال يريدني الفلوس جبتها وأكدر أجيبها لو اشتغل ليل ونهار ، أنا اريد رجال ولا تظن هامني الفراش .. بس تعبت من النقص اريد شي كامل لمرة وحدة لروحي 

ويعينچ الله ياروحي شلون راح أنسى كلامك وكلامي هسه على روحي وشراح ينسيني انك مستعطفني وشراح ينسيني 

وشينسيني .. لا تلحگني ولا تخليني أشوف وجهك بأي مكان 

درت وجهي ومشيت 

_ راح تتمرضين ويمكن تزلگين خليني ع الأقل اوصلج مثل ما اخذتج 

رجعت وباوعت ع الضلام والمطر 

بصوت واضح .. بس ما تحچي اي كلمة وتخلي آخر لقاء بيناتنا هذا ؟ 

رد بـ .. اي 

ورجعت للسيارة بصعوبه ويا الطين والبرد الي دخل بالعظم وراسي الي احسه صار مفصول عن جسمي من إلاذية .. وصلنا البيت ونزلت ووسديت الباب بسرعة 

وضوه السيارة ضل مشتغل ضل مشغل لحد ما سديت باب المطبخ وضليت واكفه وره .. طول كلش وانا ماردت اباوع دخلت غيرت الدشداشة وذبيت حجابي الي لازم لزم على وجهي لبست وما نشفت نفسي لفيت روحي بالبطانية 

بجيت على روحي ونمت ..

وين الگاك وين الكاك وين الگاك .. وعيون طريقك للصبح حراس ..

صوت كريم منصور صار بمسمعي وكأنه يغني بأذني مباشرة 

رجعت ركزت ويا صوته وعفت افكاري وهو يكمل ويگول 

امشيلك شواطي الليل وانت نجوم تبرالي .. كل روجة بجرفـها تنام وانت تضل گمر عالي 

أنا بلياك حالي يخاف من حالي ، وانا بلياك حالي يحن على حالي … مسحت وجهي وگمت چان وجهي عرگان رغم البرد وجسمي ثلچ ثلچ اختفى الصوت وفزيت بخوف

الظلمة الي محاوطة جدران الغرفة ارعبتني وصوت كريم يروح ويرجع چان قريب قريب حيل .. رضينا بغيبة النجمات منو زعل گمرنا وغاب .. ما عندك يايوم يجونا احبابنا الغياب 

والصدمة إني انتظره يكمل لان اريد اسمع اغنيتي ومو مهم منين ووين المصدر … لكن ضلام الغرفه حاوطني ومنعني انهض 

رجعت مددت وحسيت بأيد تحاول تلزمني فزيت مرعوبة وشويه ردت اتخبل إلا اجا صوتها … لا تخافين أنا فاطمة خايفة خل انام يمچ وبيبي بس تشوخر 

رجعت لمكاني واتلمستها واخذتها بحضني بدون حچي لان هي اصلاً شبهه غافيه …. ضليت صافنه على السواد الي بالسگف ومنين اجا صوت كريم وليش بهل وضوح 

نزلت عيني ولاني حافظة الأماكن الضلام ما منعني من الرؤية الي بعقلي .. صارت الشباك گدامي وتذكرت أن الشباك قريب على غرفة من غرف بيت ام نور الدين 

وفكرت لا يكون همه مشغلين او غيرهم 

ردت اي شي يلهيني عن كلامي ويا امجد ولا ردت احزن حتى لان مابيه حيل 

حضنت فاطمة وحاولت انام ما كدرت ضلت فاطمة بحضني وصادف يوم جمعة أذن الفجر وخرت فاطمة وگمت اتلمس بالحائط وامشي لان الأماكن بعقلي محفوظة لهذا اكدر أتحرك توضيت من بوري الحديقة لان اقرب واكو ضوه شويه 

ضليت واكفه جوه السقيفة فتره والمطر بعده بس اخف

واكول بنفسي .. عود كل ليلة مطر أنا راح أتذكر بشاعتي وكلامي گدام شخص اگدر اكله بس لا ما موافقة بدون مااحجي هذا كله بعدين ارد لروحي بـ لا أنا جنت مقهورة وما احتاج احد يستعطف عليه وارجع ابرر والوم بنفسي وهذا كله وواكفه جوه السقيفة واباوع 

دخلت للبيت وصليت وضليت گاعده على السجادة .. لا گدرت ادعي ولا گدرت احچي بس ضليت ارددد يارب ودمعتي على خدي .. وجسمي التعبان جان يصارع بس حتى يرتاح ولو شوي 

نهضت نفسي واجت الوطنية ما چان عدنا غيرها بس هي بدون مولد ومن اشتغل الضوه صار گبالي القرأن .. چنت اتمنى اگدر اخذه واقرأ بي بس ماعرف الأحرف ولا جمعها 

ولا اكدر بس امشي إصبعي  ع الايات .. اريد اقرأ واتمعن 

شي اخر يا زهرة ماالچ نصيب بي حچيتها وتوجهت طفيت الضوه ورجعت يم فاطمة وگدرت اغمض وانام 

فتحت عيوني على حركة فاطمة وهي تكوم من الفراش 

رفعت عيني وحسيت بوجع رهييب لمجرد إني رفعت عيني ليفوگ حتى اباوع بشكل بديهي

عطت من الألم ردت انهض روحي الألم چان بجسمي أقوى 

وراسي گوه أشيله من مكانه 

خالتي صارت بالغرفة بسرعة وانا حچيت وياريت ما حچيت 

صوتي شبهه مختفي والبلعوم حسيته مجروح 

باوعتلي بأستغراب واجتي يمي داست راسي وعاطت.. يا معزاية وجهج مشتعل نار نزلت أيدها على جسمي وهم شهكت 

وانا ماگدر ارتب جملة على بعضها 

كامت وعافتني بعد ما خلت الشال على راسي وشويه ورجعت چان وياها احد بس ما گدرت أميز رفعني من الأرض ومشى بسرعة وانا بس اون من الوجع كلشي بيه چان يوجعني وذا احد يلمسني أعيط من الألم وصوت فاطمة تبجي ردت أقاوم واصيحها بس هم ماكدرت 

صعدت خالتي وخلتني بحضنها وفاطمه كاعد بالصدر ووجهه عليه ولازم ايدي بقوة وانا اون 

لحد ما صابتني رجفه قويه وما حسيت بأي شي من بعدها 

_ صديت وجهي بسرعة اباوع عليها چانت جثه هامدة 

بدون حركة وحلكها مفتوح ووجهه اصفرررر 

خالتي بس حاولي تگعديها بين اصل المستشفى 

_ خالة شگعد منها ما تشوفها منتهييه بس استعجل شويه 

_ فعلاً استعجلت ومر عليه شريط الي صار البارحة كله 

وتأكدت مرضها بسبب المطر 

وصلنا ونزلتها بسرعة وركضت لحد ما أخذوها مني وهي ماكو حركة 

انرفعت دشداشتها وعيني راحت على رجلها 

چانت تخوف .. فعلاً تخوف اول مرة انتبه لأنها دائمًا مستورة وحتى لو تلبس دشداشه تلبس وياها بجامة وجواريب بحيث ماكو شي يبين منها غير إيدها ووجهه  على طول مرات الاشوفها بيها .. چانت سوده من الحرگ والجروح العميقة الي چانت واضحة لإي شخص ممكن يشوفها وحتى لو من بعيد خالتها وراها صارت وغطتها واني ضليت بدهشة بدهشة خلتني أراجع كلامها كل ضني تحجي هيج حتى ما أتقرب منها مرة ثانية بس انصدمت من منظر رجلها المرعب حقيقة مرعب 

ضليت جوه ما دخلت حسيت بگلبي رچف عليها .. عبالك متعذبة چانت بسجن مستحيل تكون هل آثار طبيعية 

ما دخلت لحد ما صاحتني فاطمة 

چانت تختلف عنها ما عبالك اختها بعدت عني افكاري ورحتلها

_ ها عمو كولي ؟ 

ردت خايفة 

_ راح تموت مثل حيدر مو 

عدلت بعثرة شعرها وحاولت اهدء النار بس محاوطتها

لأنها لسه ما تفهم شلون ممكن النار تحاوطنا بدون ما نشوفها 

_ انت اي صف فاطمة ؟ 

_ صف اول متوسط 

_ ها ماشاء الله يعني چبيرة وتعرفين ف لازم اشرحلج 

واكلج اختج مابيها شي غير انها عدها فلاونزا قوية بسبب المطر 

_ هي شوداها بالمطر 

ابتسمت 

_واحد مابي حظ خلاها تروح بالمطر 

_ منو عمو نور ؟ 

استغربت واخذني فضولي لسؤالها 

_ ليش شبي نور 

_ ماحبه لان من اجا من السفر وهو يباوع على زهرة مادري شلون عباله أني  مافهم بس اني افهم… والبارحه جان مطلع أغاني بغرفته بصوت عالي وخلى زهرة تفز

ادري بي لان اني حافظة بيتهم واعرف شباك غرفته 

وبنص الليل رحتلها لان عرفتها خايفة وحدها 

چانت تحجي عبالك وحدة جبيرة معبالك هسه يلا 13 سنة

رجعت سألتها .. زين شلون نظراته يعني ؟ 

_ شايف من تشوف مسلسل تركي والبطل يباوع على البطلة هو يباوع هيج بس ينزل رأسه اول ما يشوفني 

وزهرة ما تنتبه ولو ضال مسافر احسله .. اكلك هو شنو يشتغل 

رديت عليها واني اباوع وبالي نشغل

_واحد عار حبيبتي .. 

_ يعني شنو عار ؟ 

_ يعني مابي حظ .. عود ضابط وهو ما ضابط نفسه 

اخذتها من إيدها ودخلنا للمستشفى 

ورحت سألت خالتي كالت يكولون التهاب حاد صاير عدها وفلاونزا بالعظم ومعدتها متأذية ووويا الإبر والمسكنات تصير زينه 

طمنت فاطمة وابتسمت وعافتني وراحت واني رحت جبت اكل وعصائر والعلاج ورجعت انطيتهم وانتظرتها يستعدل وضعها ورجعتهم للبيت 

صار نور گبالي بالسيارة طبگ ونزل واني هم نزلت وزهرة من التعب والمرض ما بيها حيل تمشي 

اخذتها بأيدي وخلت ثگلها عليه ومشينا .. اجا بسرعة يسأل بدون سلام ولا كلام 

__ شكو شصاير شبيها ؟ 

ردتله خالتها بالي صار ودخل ويانا للبيت قبل لا ادخل 

خليت خالتها ادخلها ووصيت فاطمه على العلاج وطلعت 

وطلع وراي 

_ هاي شكو شصاير وانت شجابك يمهم من الصبح ؟ 

_ وعليكم السلام ورحمة الله الحمدلله على سلامتك ومبروك عليك ما خلاني اكمل وحچه

_ گلي شجابك يمهم وليش انت مأخذها 

ارتجيت على سيارتي وباوعت عليه ومادري ليش نظرتي چانت بقرف 

_ چنت جايب مسواك لاهلنا وذبحت اليوم ووزعت هم 

وجبت الهم مسواك ومن الذبيحة وجبتلكم هم خليته على الباب 

_ هسه اني كتلك اشرحليييي ليش مآخذها 

_ بيك شي بابا خبل انت الأمر بديهي جنت يمهم ودخلت شربت جاي وخالتها كالتلي زهرة متخربطه يعني تريدني أكلها هاي خوش وأعوفهم وامشي؟ 

تقدم خطوات عليه وگز على سنونه وگال 

_ ترا أريدها ديربالك تحاول تتقرب منها لو بخطوة وحدة يا امجد الي صار ما يتكرر 

ابتسمت وايدي تشابكوا ببعض ورديت ببرود 

_ الي صار فقط بأوهامك وعقلك المريض الي صار كله بالنسبة الي ما صار ولا أفكر بي ابد .. انت شفتها وردتها واني چنت خاطبها ورايده قبلك بأشهر يعني مو من حقكك تفكر ان اخذت شي من البداية اصلاً مو الك  .. انت الي خربت صداقتنا بضنونك وأنانيتك وجشعك بأنك تريد تاخذ وتمتلك كلشي حتى لو على حسابك أمور حرام وعيب وما يقبل بيها لا دين ولا شرع ولبنى مرتي وحلالي .. هالمرة راح أعديها لان راح احسبك ما تقصد بس وحق الحق وحق إذا مرة ثانية جبت هالموضوع بالطاري 

ما أشوفك ولا أشوف رتبتك والنعال إلا أهلي دمك بطولك واخلي امك تنوح وتبچي عليك مادامها حية 

وزهرة المسكينه لا تخليها تتلوث بيك …اتركها هي ما عايزة

عفته وصعدت بسيارتي وهو ضل واكف والنار تطلع من عيونه واني حسيت بغضب بداخلي ما صاير نار وشبت بگلبي 

وصلت للبيت ولبنى صار بوجهي اخذتها من أيديها ودخلت الغرفة وسديت الباب هي چانت فاتحه عيونها بخوف

_ شكو شكو شبيك 

قربت عليها ولزمت شعرها بقوة 

_ چان عندج علاقة بنور قبل ما تاخذينييييي

جسمها چان بأيدي يرجف ووجهه صار اصفر وتصيح من ألم شعرها جريتها أقوى وعدت نفس السؤال 

إيدها على ايدي ولازمه شعرها بخوف

_ والله العظيم لا والقران لااااا والله لاااااااااا لاااا لا لا لااااااا

لا وحق الله لا مللتنيييي راح تخلينيي اكتل روحي واخلصصص

بعدت عنها وهي نهزمت مني بسرعة ودموعها عشره عشره 

_ الشك راح يخليك ما تندل دربك كلتلي بطلي من المستشفى وعوفي شغلج كعدت يمك وسكتت كلتلي لا طلعة لا طبه ولبسي نقاب ولبست وكلشي ردته اتنفذ حلفتلك بالقران ماعندي شي وياااااا وجهه ما شايفته عوفني بحالي واترك هالموضوع تعبتنيييي 

چانت منفعله وتحجي وتبجي واني واكف مادري شسوي

حسيت بقلة حيلة وعدم رجولة 

عفتها وطلعت وتخطيت امي الواكفه وره الباب 

عفت السيارة ومشيت لبيته خطواتي سريعة وصلت بدقائق معدودة 

جان واكف ويا جماعة ويضحك 

سحبته من نصهم خليته يباوع عليه وضربته گام رجعلي الضربه وهجمت عليه وطلعت كل غضبي مال سنين بي 

بكل مرة اشك بيها واضربها وبكل مرة يحجي وياي ويضن اني اخذت شي اله 

وبكل مرة يحاول ينتقص مني 

وهو يضربني ويطلع كل حركته وغضبه بكل مرة راد يضربني بيها وماگدر 

الفوازيع هواي وكثروا ولا هو يهدني ولا اني اهده وبدون ولا حرف طلع مني ولا منه .. دشداشتي انملت دم وهوه وجهه تشوهه من الضرب والدم 

النسوان طلعت والدنيا نگلبت 

اخر شي ابتعدت خطوات بسيطه وضليت صافن بوجهه وهو رافع المسدس بوجهي بغضب والناس وصوتهم والضجة الي بالشارع وصوت عياط النسوان ..  ماگدروا يخلوني اتنفض ولا ارجع أضربه مو خوفًا منه بس استغراب 

_ اخوك اني ترفع هذا بوجهي متسبع بي؟

_ انت مو اخوي انت واحد عار وسگط وماكدر اكول عليك ساقط لان انت مو ساقط 

_ مشكور قليل مما عندكم 

_ لا تحجيلي بسوالفك هاي واني شاييييط

الناس حاولوا يبعدوا وهو صافن وموجهه المسدس عليه 

امه تعيط وهو ثابت 

بأستهزاء واضح

_ اضرب شمنتظر بلكي ينتصررررر الحب بعد رحيلييي 

ما رد عليه رجع المسدس بخاصرته 

ومسح دم خشمه وعافني وطب للبيت وأمه طبت وره والناس جتي يمي يحاولون يفهمون شكو مارديت ولحگته الباب جان مفتوح وكفت بالباب وكتله 

_ لاتنهزم تعال حاچيني رجال لرجال 

امه عاطت .. روح منا كافي عاد 

بعدها ورجعلي.. شنو تريد أحط طلقة برأسك وأخلص من سوالفك 

_ انت الي بديت ترا مو اني 

_ امجد عوف زهرة 

_ انت الي لازم تعوفها مو اني 

_ولك شعليييييك شعليييييك بيها شعليييك 

عوفها اني رايدها 

_ اني أريدها وزواجي منها ع ورق بس أريدها ترتاح 

_شعليك انت ؟ وبعدين شنو ع ورق شو ما تستحي ولا تعرف تحجي 

_ استغفرلله راح أنزلهم هسه كلهم كتلك عوفني من يوم عرسي واني اكلك عوفنييييي

_ واني جايك حاجي وياك .. لو ما زهرة وشغلة المستشفى والله فلا اباوع بهل وجهه الاكشر 

_ هسه شنو شتريد

_ انت واكف ببابي وجاي ضاربني ترا محد متعدي عليك 

انت مخبل

ردت اعوفه وامشي بس ماكدرت ورجعت كتله 

_ انت جان عندك علاقة بـ لبنى قبل الزواج 

رد عليه وهو يمسح وجهه بالتيشيرت الي لابسه 

_لا ماعندي صخام ولو عندي وهي اختارتك فـ اني راضي وهايهيه الله يهنيكم 

_ يعني شنو لو عندك وهي اختارتني يعني جان اكو ؟! 

كعد بالگاع وضل يستغفر بصوت عالي وطلعت امه وصاح بيها أطب 

سديت باب الشارع وگابلته 

_ بس ريحني والله نوم ماكدر انام گلي چانت تريدك 

_ امجد ، اني شفتها بالمستشفى وانعجبت بيها واجيت حجيتلك ووراها انت سكتت وقاطعتني فترة الخطوبة كلها 

واني اتردد على المستشفى علمود أشوفها وما الكاها ومن اجي احجيلك وافضفض تسكت وماترد .. لا انت الي حجيتلي من البداية ولا انت الي خليتي أرسى ع بر 

وبيوم زواجك عزمتني وحجيتلي ووراها انگطعت علاقتنا واني ما نفتهم شي غير انك فضلت انك تسكت على انك تكلي البنية تخصك وانت مرتبط بيها … وماريد يتكرر الي صار ويا زهرة 

ومرتك هسه هي اختي لا اكثر واحترمها وعلى راسي 

بس اعتقني من هل شكوك وهل سوالف الي حتى الله ما يرضى بيها 

سكت ورجع حجه .. ليش ماتريدني اخذ زهرة راح اصير الها رجال مو مجرد على ورق حتى استر عليها اني معجب بيها من زمان ووضعها خلاني أتمسك بيها مو استعطفها 

_ حچيت وياها ورفضت 

باوع عليه ونهض نفسه رفعت عيني عليه 

_ انت مخبل وحق الي خلقككك انت مخبل ومدام رفضتك ينتهي دورك البطولي هنا وعوف الموضوع الي .. حسستني زهرة سلعة الله لا ينطيك 

عافني وطب للبيت واني ضليت كاعد بنفس بمكان 

شويه وگمت فتحت الباب وطلعت 

عيني صارت على بابهم اتمنيتها تطلع .. دكيت بابهم وطلعت فاطمة 

_ ها حبيبتي شلون صارت اختج 

_ اكلت ونامت بس بيبي كالت صخونتها احسن 

_ يلا خوش .. طلعت من جيبي فلوس وانطيتها

هاي الفلوس تخليها بأيد بيبيتج وكوليلها من امجد واي شي تحتاجو كتبي اني بليل امرلكم 

اخذتهن وحچت بفضول.. عمو هاي انت ومنو تعاركت قبل شويه ردت اطلع اشوف وبيبي ما خلتني 

_ زين شمدريج متعارك 

اشرت على الدم الي بوجهي ودشداشتي

_ اها فهمت .. اني وعمج نور عركة بسيطة لا تخلين ببالج 

يلا فوتي ولبسي زين لان باردة 

مشيت والطريق صار بطول دهر كامل

التفكير اكل راسي وماعندي اي حل لأي مشكلة 

وموضوع لبنى ونور الشك كتلني بي ع الرغم البنية تحبني

بس ليش لحد هسه يتذكرها 

وصلت البيت وامي صارت بوجهي كامت تصيح وتحجي 

_ هم تعاركتتت هم اجيتني كلكك دم شوكت شوكت ترضيني وتبطل سوالفككك 

_ يمه دخيل ربج عوفيني 

عفتها وطبيت للغرفه وچانت گاعده تبچي شافتني وگمزت وعيونها مليانه دموع واسئلة 

_شبيك ؟؟ ليش هشكل شنو صاير هذا دم منو 

_اريد اسبح واسوي شغلتين 

_شنو هنا ؟ 

_ اسبح وانام بحضنچ ..