رواية ليلة كمرية الفصل الخامس بقلم ليلي الهاشمي
سمعت صوت الباب قوي صحت على فاطمة ما سمعتني
صحت على خالتي ما سمعتني نهضت نفسي من الفراش گوه لفيت شالي وكمت اتچى على الحايط وامشي شويه شويه لحد ما وصلت الباب
چان حيلي مهدود … صار بوجهي نور وأمه وبأبتسامة واضحة گالت امه ..، سودة عليه زهيرة يمه هاي شحالج
بادلتها الابتسامه وفتحت الباب اكثر وگالت الهم .. تفضلوا مو مال وگفه بالباب لان حيلي ما يحمل
دخلت وسندتني وسمعتها تهمس لنور بأن .. مو وقتها يمه
وهو يردد الها .. يمه هذا انسب وقت
اتجاهلت همساتهم الي صارت كلها بأذني ودخلنا للبيت
طبوا للصالة وانا صرت اتفحص البيت كله بعيني
الحمام .. المطبخ .. الغرفة الداخلية ماكو احد وقلقت
_ نور ما شفت لا خالتي ولا فاطمة
رد عليه وهو ينهض نفسه
_ ها ، لا والله ما شفت تريدين اروح أدورهم ؟
هزيت براسي وكعدت يم امه
_ اعذريني خالة والله حيل ما الي اگوم اسوي اي شي
ردت وهي تخلي أيدها على جتفي وتسحبني لحضنها
_ على بختج زهيرة شنو اول مرة مو احنى اهل وادري اصلاً مابيج حيل .. بس جايتج بموضوع حچت هيج وهي تبعدني عن حضنها وتعدل گعدتها وتصير گدامي
_ يمة زهراء اني اريدچ لنور بدون ما الف لا أدور خو هيج گبل كلتها احسن وحتى ارتاح هم لان صارله يومين من يوم الي تعارك ويا هل امجد الاگشر وهو يحوس يريد يجي يخطبج من خالتج وانا اصبر بي لحد ما تصيرين زينة
استغربت من كالت تعارك ويا امجد وبعدت تفكيري هذا وكلت الها بجمود .. خالة اهلاً وسهلاً بيكم بسس
قاطعتني بـ.. اش اش هسه اني ما جايه اخذ موافقة ولا رفض اني جايه احجيلج من ام لبنتها وانت بنتي ترا وهم اريد احجيلج شي ما دام راح
اعذريني گلت هيچ ورجعت ظهري على الحايط وباوعت عليها وهي گملت بـ معذورة يمه عادي حتى لو تريدين تمددين.. المهم نرجع لموضوعنا نور رايدج بس اني ما رايدتج قبل ما تحكمين سمعي
نور بعده شاب وحلو والف وحدة تتمنى واني احبج واعزج والله يشهد ورقيب غير اخليج بعيوني لو تريدين بس مو مال چنة يعني صعبه وانت محد يعرف عنج شي وتشتغلين بالبيوت يعني صعبة حيل صعبة .. ضحكت بوسط حچيها وگالت .. بنت خالته هم اسمها نور بس نور الهدى همه اجوي بنفس اليوم اني وأختي حبلنا سوه
هي سمتها نور الهدى واني سميته نور الدين
ومهندسة هيه .. اي مهندسة وشگبر اسمها الله يحفظها
وما تتخير عنچ .. بس لو تشوفين البارحة تبچي وخابرتني من سمعت بي يريد يخطب و گالت انتحر والله .. اي والله گالت انتحر وكسرت گلبي
أنا اشاهد واستمع وظهري چان مأذيني وهي تحچي ببرود ومرة تضحك ومرة تبچي وحيرتني
كملت كلامها وگالت بجدية وملامح مختلفة عن قبل شوي
_ الأريدة منچ هسه انت دخلتي الأربعين خو
قاطعتها وكلت الها
_ لا لا خالتي عمري 24
ضحكت وگالت … يا خية عزا والله عبالك بگدي يعني من التعب اقصد بادلتها الضحكة وكملت هي .. المهم هسه عمرج مو مهم اني ماريدج بس أعزج واريد نبقى حبايب
وردت احجي هل حجي وياج بعدين بس الكى وقت مناسب
وهسه صار
_ خالة عادي تختصرين ظهري يأذيني والله
_ اي اي اختصر ليش لا اختصر .. من يطلبج بشكل رسمي
ويجون عمامه ترفضي وعذرج يمج ماريد اتزوج وهايهيه
ملامحها چانت جدية وحقيرة بشكل بثواني تغيرت وصارت ملامح لوجهه مبتسم ولطيف .. ومو علمودي لا الله يشهد علمود هلمسكينه الي تريدة بنت اختي
بيني وبينج هم ماريدها لان تتنعوص بس شسوي بنت اختي
وغالية عليه يعني افتهمتي بعد شنو اريد مو
هزيت براسي بمعنى اي وهي ابتسمت وباستني
شويه ودخل نور وخالتي وفاطمة وبدخولة للصالة
گال.. چانوا بالسوگ وتلگيتهم من راس الشارع
_ خالة الله عليج غير تگولين ضل بالي عليكم
ردت خالتي وهي تسلم على ام نور
وفاطمة اجتي يمي كعدت .. ليش اكلج يمة انت مانمتي الصبح كله كاعدة وصخونتچ جان راح تموتج
نور كعد وباوعلي ابتسمت اله وهو ابتسم وصد وجهه على الشباك الي وره وأمه انتبهت وحچت
_ ها يمه نروح خطية البنية مريضة ترا
باوعلها بأستغراب وگال .. شنو هايهيه ؟
ردت وهو تنهض نفسها وتلبس عبايتها
_ لا مو هايهيه ماحجيت شي باجر باجر من يجون عمامك
خالتي باوعت عليها وكالت .. عمام منو شكو ؟
قبل لترد امه گال .. خير ان شاء الله خالة خير خير
بس عادي احجي ويا زهرة شويه برا بين ما امي تطلع ؟
خالتي كالت اله عادي روحوا وأمه كالت ، شتحچون ؟
ما رد الها وأنطاني معصم ايده حتى اگوم ويا
ما لزمته ونهضت نفسي گوه وكمت مشيت شويه وهو وره ظهري يمشي
_ شكو تمشي وراية ؟
_ حتى من توگعين تلگين احد يسندچ
_ شنو الرجولة والغيرة الي نازلة عليكم هالفترة شكو حجيتها بنفسي ووصلنا للحديقة وگفت وانطيت ظهري للحايط وهو وكف كبالي
_ عادي اليوم بليل إذا بيج حيل تصعدين بالسطح وره العشره بليل
جتفت ايدي وكتله .. ليش ؟
_ بس تگدرين لو لا اريدچ بموضوع … باوع على امه الي اجت تتمشى گوه لان چان وزنها زايد .. شوفي شلون تمشي يمكن لازم اسويلها عملية قص معدة شتگولين ؟
ضحكت ونزلت راسي وايدي على حلگي هو ضحك ورجع حچه بسرعة .. خلي هل ضحكة بليل انتظرج اصعد وره العشره واليوم الوطني موجود ضوه الشارع الرئيسي يضرب على السطح يعني لا تخافين مو ضلمة
اجت امه لزمها وباوعلي وابتسم واشرلي على السطح
هزيت براسي اله وانا مبتسمة .. طلعوا وانا بعدني واكفه على ومچتفة ايدي وعيني على النخل الي گبالي بابنا
ابتسمت لمنظرة لاني احبه ويذكرني بطفولتي
بعد الي صار كله بس روحي ما قست على اشيائي الاحبها
دخلت وكعدت يم فاطمة جانت ترسم مخطط للرياضيات او هيج شي وجانت مندمجة وخالتي يم الصوبه تحمي خبز وتصب الچاي على الحليب الموجود بالگلاصات
وباوعتلي وابتسمت
_ ترا نور يريدج
رفعت رأسها فاطمه وضحكت
_ شنو هسه دريتي من زمان يريدها ترا
اخذت الگلاص من خالتي شربت منه شويه وباوعت عليهن
_ تدرين من زمان واحجيلج على عطره وتشوفين بعينج الجلسات السطحية الي تصير بعد عليمن
ضحكت وبصوت ناصي گالت
_ إذا صدگ يريدج اقبلي
_ امه ماتريدني انت شعبالج جايه تخطبني لو تقنعني
غير جايه تهددني مدري تحذرني وذبت كلمتين وراحت
_ صدگ؟ يعني جيتها مو خالية
نهضت وهزيت براسي بمعنى لا
_ مو خالية لا ، هسه ما علينا أنا راح اروح اتمدد وذا نمت عوفوني وب 10 هيج كعدوني
گمت من يمهم وما حسيت بتأثير من كلام امه
بس للحظات رجعت وانا وكفت گبال عيونه .. حبيته من جديد بالفترة الي راحت جنت ما اركز على اي شي بي
ونسيت مراهقتي وشلون جنت انتظره وشكد اتلهف حتى التقي بي بشارع ومن ارد السلام الكى مختفي وارجع لخالتي احجيلها شكد اني فاهية
اشتاقيت لروحي ذيج ودقايق گبال وجهه رجعتني رجعتني
ورجعت ذيج الروح الي راحت بموت حيدر الي ماكدرت أتخطى او اتقبل هو ماموجود
تمددت على ظهري وخليت ايدي فوك راسي وأنظاري للسكف.. اقبل لو ما اقبل ؟
حچيتها ويا نفسي وسكتت لثواني وبعدها رجعت حچيت
.. بس يمكن تتأذين لو قبلتي ، بس يمكن ما تتأذين
صديت وجهي وصارت عيني گبال الكنتور
_ شنو اضل على اليمكن اريد شي حقيقي واضح تعبت من اليمكن وهم من اتزوجة خلي امجد يعرف محد يشفق عليه مثله سكتت لدقايق وانا صافنة وتذكرت كلام امه رجعت لنفس مكاني ووضعيتي ونظرتي للسكف وجهي تعابيره جان واضحة بالانزعاج الي هسه استوعبته
_ چا هسه أنا ردته شعليه ببنت خالته ، شسوي هسه وشنو راح يحجي وياي ؟
ضليت بهل دوامة لحد ما غمضت عيني ونمت
فزيت على صوت خالتي وهي تكول ساعة 10:30 گومي
نهضت نفسي بسرعة وباوعت عليها
_ أنا فوك فوك ترا يعني ماريد شي بس اريد اشم هوى
_ يمه دنيا ثلج وانت هسه طلعتي من مرضج وصرتي زينة
لفيت شالي عدل وانا امشي كتلها
_ لا مو باردة لابسه هواي وحتى الگمر طالع
قبل لا اطلع اخذت جاكيت لبسته وصعدت
وفعلاً جانت وطنية والضوه مال شارع متسلط على السطح
وباوعت على سطحهم لگيته كاعد وبأيدة صينية وصافن
مشيت بخطوات بطيئة وابتسامة مرسومة بعيوني مو بشفتي هي عيون تضحك من تشوفه وچنت فرحانة .. گدر يرجع روحي خضره بدون جهد واضح منه
_ مساء الخير
فز وصد عليه وبسرعة قدم الچاي الي بالصينية
_هاج هذا كلاص چاي الج اني سويته
ابتسمت واخذت الكلاص وكعدت على الحايط الي يفصل سطحنه عن سطحهم جان ناصي وبطفرة تكدر تعبره
صفن شويه وطفت الكهرباء .. فزيت وباوعت على الگمر الي چان منور سطحنا ملامحه جانت مبنية ابتسم وگال
_ ليلة حلوة بضوه الگمر ، خوما تخافين مني ؟
رديت بـ لا وبسرعة
_ بس عادي نگعد بسطحنا لان الحايط بارد
_ اني هم گلت هس اجيب فدشي نكعد عليه
راح اخذ من الحايط سجادة طويلة وعبر وفرشها بسطحنا
وكعدنا .. أنا خليت ظهري على الحايط لان هيج ارتاح وتربعت وهو هم والمسافة بيناتنا مو قريبة هو بطرف السجادة من بدايتها وانا بنهايتها
والگمر كدامنا
حچه وچان صوته واضح بس مو عالي حروفه الي تطلع من حلكه واضحة عبالك مقدم برامج
_ هالمشهد ذكرني بأغنية سعد الحلي مال عشگ أخضر
على فكرة اني اسمع بس أغاني قديمة وأحبهن معناهن حلو
وانتِ
_ احب كريم منصور بس ما اسمع ابد
بس ببيت نهى جانت تشغلة بمسجل جبير حيل واضل اسمع ومن سألتها كالت كريم اسمه وعرفت وميزت صوته
وبعد ماعرف احد غيره
_نزليهن بتلفونج هسه كلشي على التلفون
شربت شويه من الجاي وباوعت عليه .. ماعندي تلفون
سكت شويه وغنى لكريم وچان صوته حلو حلو حلو
يجنن عدلت كعدتي وانا استمع چانت أغنية .. سألت الناس
_ سألت الناس ماعدهم خبر هالناس .. أدورك وين بيا دمعة ندى على الياس.. وين الگاك وين الكاك وعيون طريقكك للصبح حراسس
سكت وباوعتله مبتسمة .. سمعتها مرة او فزيت على صوته
وحيل حبيتها
ما رد عليه وكمل يغني
_امشيلك شواطي الليل وانت نجوم تبرالي .. كل روجة بجرفها تنام وانت تضل گمر عالي
وانا بلياك حالي يخاف من حالي
وانا بلياك حالي يحن على حالي ..
سكت وبعدها حچه وبطريقة سريعة .. إذا قبلتي تتزوجيني يومية اغنيلچ
فتحت عيوني بوسعها وابتسمت ذبيت خليت الچاي بالگاع
وضليت صافنه وهو عدل كعدته وصار گبالي ، يعني موافقة
سكتت وانا صافنه بملامحه الواضحة رغم ماكو غير ضي گمر
رجع حجه وهو يعدل دشداشته .. بس گليلي موافقة شبيج ؟
_ بس انت ماتعرفني شلون تاخذ وحدة تشتغل بالبيوت وماتعرف اصلها من فصلها
_ مو صعبة بعد ماكو شغل واصلج اعرفه الي خليتي بين ايدي بهل سنين الي راحت والي شفته منج يبين انت بنت اصل وفصل وما يهمني اسم عشيرتج لو انت منين
يهمني تصيرين تحت جنحي ويمي وقريبة .. واعتذر طلبي جان بهيج وضع واخوج بس ماكدرت
— امك ما ترضى وكلامها وياي جان كله الغاز وكلام يخليني ابتعد ما أتقرب وهي ما تريدني اصلاً
_ امي خالاتي يلعبن برأسها معليج انت ماخذ رجال والي هو اني مو امي يعني لو يضطر الوضع واعزل هم راح اعزل واخذج
_ وفاطمة ؟
_ فاطمة شبيها ، وياج اكيد تريدين اخليها وين !
_ بس أنت ماتعرفني …
_ انت هم ماتعرفيني خليني اعرفج
باوعت بوجهه ورجعت وخرت عيوني على الگمر
_ احجيلك بس بشرط لاني ما حاجيه هلشي بس لخالتي
والشرط هو إذا سمعتني وماتقبلت .. تمشي تمشي تروح بعيد ماريد اشوفك ابد
_ هايهيه صار بس هسه شنو يعني انت موافقه بيه اني ؟
من گال هيج حسسني بشعور معايشته حسسني بأني شكد غاليه ويشوفني بعينه چبيرة …. وخلاني أشوف هو يحس نفسه مو هوايه عليه وهم حسسني بقيمتي ماعرف شلون بس من گال موافقه بيه اني ، بگلبي حجيتله إذا ما اوافق بيك انت بمنو اوافق
_زهرة ؟
قاطع شرودي صوته وحچيت والخجل غلبني.. شكد حسستني أنا أنثى يمك والله حسيت بروحي أنثى
_ انتِ منين ما تندارين أنثى
_ بس ما جنت احس بهلشي
_ لان ما شفتي نفسج بعيوني .. كليلي موافقة ؟
_ اي من زمان موافقة .. بس لازم تسمع
ضحك صوت ضحكته واضحة وگال .. للفجر ولبعد الفجر اني كاعدلج احجي احجي
_ أنا مو من بغداد وهاي اول شي لازم تعرفه أنا من الجنوب
جنوبية صح لهجتي تغيرت بحكم الـ 10 سنوات الي گضيتها ببغداد بس بعدني جنوبية وما اتنازل عن جنوبيتي ابد ، بعدها ألانه والچا بگلبي مو بلساني وبعده گلبي ماقسى رغم الي صار .. شلون تعرف الجنوبية جنوبية
رد عليه وهو متلهف يريد يسمع اكثر .. شلون ؟
_ شما يصير بيها تضل حنينه وما تقسي ولا تحقد
هي النسوان العراقيات كلهن هيج على فكرة كلهن .. والشي الي خلاني انهزم بس لاني جانت عندي فرصه اكتل وما كتلت
ملامح وجهه تغيرت وعدل كعدته وصفن
راح احجيلك كلشي ومن بعدها الك القرار انت مو أنا
هز براسه وانا حچيت ..
فتحت عيني والمطر چان صوته عالي عالي حيل فزيت بسرعة وگمت ووكفت يم الباب گلبي چان يرجف وجدمي ماكدر يوگف على الگاع چنت اسند نفسي وأنهض حتى
اصيح بصوت ماموجود گوه
_ يااابه يي.. يابه حيدر ياببه صغير لاتضربه
أتنهد واخذ نفس وارجع احچي وماكو فايدة .. سمعت صوت الباب ينفتح ابتعدت شويه شويه ورجلي لازمتها چنت اعرج وكوه واكفه
الغواش الي محاوط عيني تعبني افتح وأغمض بعيني وبعدها خليت ايدي على عيني واذني الي تسمع
_ حيدر كتلته بسببج انت السبب تدرين بابوج تعبان شلون تخلين حيدر يبجي بليل؟؟
بعدني مغمضة عيوني من وجعها وغواشها وحچيت وانا امسح على بلعومي بلكي اكدر اجمع جملة كاملة
_ تعالي ضربنيي أنا أنا اتحمل هو طفل شلون يتحمل
ابوسج رجلج دخيلج عوفيهم
_ جسمج تعب من الضرب خطية انت وبعدين أنا وين ضاربتهم هي كل واحد راشدي وهاي شوفيهم سكتوا
لزمت الحايط الي وراية ووخرت ايدي من على عيني
بهداي.. فتحت عيني وصارت گبالي مرت أبوية او عشيقته (شيماء)
_ خالة ميخالف جيبيهم يمي بالغرفة أنا أراعيهم ترا
_ وتريدين يكول عليه أبوج شيماء جايفة وماتعرف تربي
_ امي ماتت ، ما راح يحچي وياچ شي خليهم يمي والله ما اخليهم يطلعون صوت
صفنت وانا رجلي مووتني منّ الوجع وحابسه دمعتي ووجعي گوه عنها خوفًا لا ارجع انضرب مرة ثانية
_ سمعيني لچ أبوچ طلع هسه تطلعين تنظفين البيت وتكملين وتاخذين حيدر يمج لان صغير وما أتحمله وبس يبچي مادري هاي امج من خلفته وماتت ليش ما مات وراها ، المهم هسه تكملين وفاطمة تخليها يمي حتى اصخرها مابيه حيل لصخرت أبوچ وحماعته ومن يجي إذا سألج منو نظف تكليله امي شيماء … وهم تكليله حيدر راح اخذه لغرفتي وتتوسلين بيه گداااامه فأهمه
هزيت الها براسي … اي اي والله اي شتريدين اسوي بس عوفيهم ، بس عادي أنا ابقى واتصخر الج بدل فاطمة لان صغيرة وأصدقاء ابوي وصديقاتج هواي وهي ما تفهم كل عمرها 3 سنوات
تخوصرت _اي والله هي فاطمة مابيها حظ كلشي ماتعرف تسوي بس انت بيج حيل يعني ؟
رديت بـ اي .. اي والله عادي اتحمل اي وبيه حيل
عافتني وطلعت ودست على وجعي ورجلي وطلعت
نظفت البيت كله مو چبير بس وصخ وشفت فاطمة تلعب بالحديقة وحيدر مگمط ونايم
_ سودة عليج يمه وسوده عليه وسودة بوجهي لوضعكم هذا شلون راح تخلص مادري ..حچيتها ويا نفسي وانا اباوع عليهم من بعيد ونظراتي كلها ألم وتعب وقهر
صار الليل ودخل ابوي للبيت وصوت بطالة العرگ تتراگع
وضحكاته تتعالى ويا النسوان والزلم الي جايبهم ويا
وگفت يم الباب طفلة بعمر الـ 14 سنة واكفة حتى تقدم اكل وثلج لنسوان ملابسها عريانة وجسمها مكشوف.. وزلم تضحك وتتلمس وابوج بينهم
لفيت حجابي عدل ودخلت فاطمة للغرفه واخذت حيدر هم وخليته بحضن فاطمة وقفلت الباب ووكفت اخذ الطلبات .. صاحني ابوي وانا اجيب الثلج واخذني من ايدي
وكعدني بصفة وصارت بصفي مرة جبيرة مصلخة وابوي لابس شورت وفانيله بس
وشيماء كاعدة بحضن رجال غريب فتحت عيوني بصدمة
لاني ما انتبه على التفاصيل هاي وبهل قرب والبشاعة اجي اسوي الي يردوا ويروحون بدون ما شوف ولا اركز شي
حچيت ببراءة.. بابا شيماء شوف وين كاعدة
ضحك وكرص خدي _هذا شغلها بابا عوفينا نسترزززقققق
وضحكت المرة الي يمه وگالت بصوت مقرف وريحتها جانت اقرف .. خوش بنية هاي تفيد لصلاح ابو صماخ يحب الكتاكيت وها ينطك كوم فلوس عليها ويرجع ينطيك بكل مرة تروحله وترضي
رد الها ابوي بـ سكتي لچ كحبـــ ، هاي بنتي تريدين انطيها لصلاح شبيج تخبلتي
_ هسه شدعواك وذا راحت وبعدين تتعود وماتصير مثل أمها الشريفة العفيفة
رد عليها بـ اويلي لو قابله جان هسه هي مو جوه الگبور شبعت تراب ضحك وسكت وهي ضلت تحجي براسه على صلاح والفلوس وحتى لايندم
وانا بنصهم وگلبي جان راح يوكف
قاطعني نور بـ، هو أبوج هم من الجنوب ؟
_ لا ابوي رجل ماعنده اهل ولا اخوان ولا عمام
وأفتر العراق من شماله لجنوبه ، بس من استقر بالجنوب
اصدقائه كبار ومسويله جنسية هناك ومخلي بأسم المحافظة الي اجا عليها وسكن وصارت عنده فلوس وگيعان بالحرام ويضحك على الناس بقوة السلاح والفلوس
ومن أتقدم لامي.. اهل امي ناس فقرة وماعدهم بس هي وخالتي اسمها نوال وسافرت بعد زواجها وهي بقت
وابوي من اجا ياخذها فرحوا أهلها لان عنده فلوس وعلى اساس شخص محترم وسوه روحه شيخ .. وهمه فقرة بشكل ووافقوا بسرعة يعني بحكم شيخ وعنده فلوس ومحترم واجا باحترام
وبعد الزواج كلشي راح وعرفت ان ابوي بلا اصل وهويته مزورة وكل الفلوس جانت مو اله بس هو يشغلها بالحرام
هذا كله بعد ما جابتني وعشت وياها كل هاي الصراعات
والقدر شاء وصارت فاطمة اختي .. وحيدر من اجا هي ماتت
راحت لاهلها حتى تخلص منه واهلها ماعدهم حتى عمام ينشد بيهم الظهر وبس امها وأبوها وكبار
عافتهم واتجهت لشيوخ وناس بس محد ساعدها وبقت تحت رحمته
واتذكر هم .. جان يجيب الزلم والنسوان بشكل يومي
ويومية امي تنكتل وآخر كتله قبل ماتجيب حيدر ضربها على بطنها ورأسها ومن جابته توفت
خو أنا جنت شاهدة على كل هذا وعيوني تشوف وماكدر اسوي شي
_ زين شلون انت عفتيهم ؟
_ خليني اكمل بيومها من كتلك ضلوا يحجون عليه وعلى جسمي.. خو أنا ماعندي جسم مثل ماتشوفني هسه وجنت أضعف جني سعلوه ضحكت وسكتت وهو باوعلي وابتسم
رجعت كملت والضحكة بعدها … اي وتكله يحب الكتاكيت
وانا جنت الاكل كوه احصله ماكو اكل ومرات من حليب حيدر اخذ شويه واخبطه بمي واشرب أنا وفاطمة
لان جانت ما تنطينا ومن اشتغل هي تسوي الاكل وما تنطينا منه ابد ومرات أنا أبوگ
المهم بعدها بيوم من راحوا الناس اجا يمي وانا دانظف
جنت رافعة دشداشتي حتى امسح
وحسيت احد لمس.. اشرتله وهو افتهم
گمزت بسرعة وابتعدت چان يكلي
_ خوش… ليش ما اشغلج وتجيبين فلوس حتى تأكلين انت واخوتج؟
_ شبيك يابه شنو اشتغل وليش لزمتني
سمعت صوت شيماء وهي جايه من غرفتها ورافعه دشداشتها لزرها.. وليش تاخذ منها كلام وديها اليوم بليل لصلاح وهو يتصرف وذا تريد هسه اطببها للحمام أرجعها لوز اللوز
صد عليها وگال … تتوقعين يقبل بيها
ردت عليه بمكر.. اي هو يحب هيج نوعية وهيج جسم يموت على الصغيرات بس لازم تاخذ تكسي ترا إذا اخذتها
لان راح لبغداد من بلغوا عليه شرد
_ يبوووو شيوديني تأخذيها انتِ وهم تجيبين منه كم فلس
جنت واكفه واباوع عليهم شلون يحجون وواحد يذبني على الثاني ونطقت بخوف .. يابه ما اروح أخدمك هنا شلون اروح والجهال
جنت طفلة ولسه ما مستوعبه على شنو يحجون
ضربني راشدي ووگعت بالگاع من القوة وصرخت من الوجع مال رجلي مو الراشدي لان وكعت على حافة الباب والضربه صارت عليها
_ لا تصرخييين لا تصرخيييين
صاح ورفعني من شعري
_ تروحين يعني تروحين
_ اي اي اروح بس عوفني
سمعت صوتها وهي تگلى… عوفها ترا نحتاجها
عافني وما كدرت انهض نفسي من الوجع وعافوني وراحوا
سمعت بصوت حيدر يبچي وفاطمة تگلى… اسكت اسكت
گوه گمت ورحت يمهم زحف
ومن وصلت أخذته وخليت ظهري على الحايط ، متشوف هسه كل ماكعد لازم على الحايط المهم بيومها صارت شغلة ما توقعت اسويها .. جان جوعان وماكو حليب
وفاطمة كاعدة كبالي تاكل خبزة
وهو يصرخخ من الجوع گومت فاطمة تشوف اكو حليب
دورت وما لكت
ماعرف شلون خطرت ببالي بس سويتها
رضعته مني .. ماعندي حليب واعرف بس شفت امي شلون ترضع فاطمة .. رضعته وضل يبجي بس شويه عبالك شبع
والله يا نور عبالك شبع وجان يغفى بحضني
أنا ابجي من الوجع وهو يبجي من الجوع تالي بيومها نمنا
اثنينا وكعدت على ضربه قويه على رجليه
تدري من قوتها شمرت حيدر من حضني وكمزت ابچي
چانت شيماء تكعدني حتى انظف غرفتها
جنت امشي واعرج وابجي طلعت نظفت غرفتها
وطلعت وبطلعتي لكيت ابوي جايب ملابس الي هواية
وعطور واشياء نسائية
أخذتهم من عنده شيماء ودخلتني للحمام سبحتني
وهي تسبحني تباوع على الحروق الي هي وابوي سووها
_ شوف رجلها شلون متشوفها هاي لو ما عرامتج غير جان هسه جسمج يخبل وحلو لو ماتجبريني اكتلج
بس احسن شي سويته اضربج على رجلج وما جيت يم وجهج حتى ما يتشوهه
شتگولين
هي تحچي ومن قساوة الكلام چنت ابچي واشهك
وهي تليف مكان الجروح والحرق واصرخ من الألم وما جانت تهتم والتهبت رجليه بأيامها وبعدها لبستني
وطلعت سوتلي شعري وجانت اول مرة
وخلتلي عطر كومة .. ما جنت ادري شكو بس بطلعتي للاستقبال شفت زلم وابوي كاعدين يضحكون
ومن شافني اشر عليه وكال هاي هي زهراء بنتي
اتراجعت بخطوات بسيطة وخفت حيل
_ يلا بابا زهراء اجوي ياخذوج لصلاح
_ لا بابا الله عليك
كام يريد يضربني وشيماء اشرتله بلا
وتراجع وضحك … يلا بابا لا تشلعين كلبي
يلا وهناك كلشي يشتري الج ويطلعج وكلشي تسوين
باوعت على فاطمة تبجي وشايله حيدر گوه لان هي صغيره ومو حمل تشيل طفل وحيدر جان يبجي
باوعت عليه وكتله
_ بس فاطمة وحيدر ويايه
صفن وباوع ع شيماء ورجع باوع على الزلم
حجوا ويا بدون ما يحجي اصلاً
_ عادي الأطفال بهيج عمر نريدهم ونكدر ننطيك فلوس زيادة لو عندك بعد أطفال
هو فرح وعلامة الفرحة بينت بالابتسامة وشيماء هم
لبستني جنطة وانا لبست فاطمة زين واخذت حيدر بحضني
هم ما جنت افتهم شكو بس آمنت لان همه وياي
اجتي سيارة جبيرة حيل وسوده صعدنا بيها وفاطمة ختلت يمي والزلمة كعد بالصدر وواحد يسوق
وسلموا على أبويه وعلى شيماء … جانت عيوني مليانة دموع وحيدر يبجي وفاطمة لازمتني وترجف خايفة
مسحت دموعي الي نزلت ومشت السيارة وجانت آخر مرة أشوف بيها أبويه وشيماء … مشت السيارة هواي وهواي
وحيدر ما سكت من الجوع وفاطمه نامت
وواحد منهم گال
_ اكو سوبر ماركت هنا راح انزل اجيب ممة وحليب
تريدين شي بعد
باوعت على فاطمة ما جانت مأكله وانا هم ما مأكله
كتله بخجل
_ عمو جوعانة حيل واختي هم
باوع عليه الزلمة ورجع باوع ع السايق وجانت ملامحة حزينة حيل استغفر الله ونزل ونزل وره السايق
وضليت اسكت بحيدر لحد ما جابوا الحليب والممه
بسرعة سويت وكعدت فاطمة حتى تاكل وحيدر شرب الحليب يلا سكت سويتله مرتين ونام غفى وفاطمة اكلت ونامت وانا بقى شويه بسكت اكلت وشربت عصير
لحد ما اتكشف والمطر چان مرعب
وصلنا لبيت جبير وبمنطقة حلوة كلها حدايق وبيوت كبار
وكفنا يم البيت وبسرعة واحد شال فاطمة وواحد نزلني أنا وحيدر
ودخلنا جوه وجانوا اكو ناس هواية وزلم بالبيت هواية ونسوان نفس النسوان الي يم ابوي
دخّلنا وضعنا بينهم
وانا لازم فاطمة بأيد وحيدر بأيد وانا اريد احد يلزمني ويطمني
كعدونا بغرفه فارغة من الغراض وبيها بس كراسي ويمي جانت مرة ووياها بنية شابه
أنا خايفة وضليت لازمة اخواني بخوف
جان المرة تكلي
_ انت شجابج هنا يمعزاية بس لا مخلفة الطفل هذا
رديت عليها وانا ارجف من البرد
_ لا خالة هذول اخواني
ردت عليه بحقارة… وخللخالة الي تخللل عظامج شنو شايفتني ولج
انتبهت على البنية الي يمها خلت أصبعها على أيدها
وإشرتلي بمعنى سكتي
سكتت ووخرت وجهي عنها
مرت نص ساعة بين السكوت والأحاديث والاسئلة
ودخل علينا رجال جبير وسمين واصلع
ووره الزلم الي جابوني .. اول ما شافته المرة كامت وباسته وكالت الها جبتلك البنية الي ردتها مولاي
ما اهتم الها
اجا وكف يمي واتفحص وجهي ورفع الصاية الي لابستها ورفع دشداشتي وياها فزيت من مكاني وهو گال
_ من شوكت بيج سرطان بالجلد ويعدي هذا لو شنو
استغربت من كلامه وعيني صارت على الرجال الي وره
باوع عليه وافتهم إني لازم اكول اي
_ من … من زمان بيه سرطان مولاي
كتله هيج لان كلهم هيج يصيحون وجنت خايفة لا انضرب وصرت اريد انجو بأي طريقة
_ يعدي هذا ؟
رجعت اباوع على الرجال واشرلي اكول اي
وفعلاً كتله اي
وگام يصيح .. هذا العار دازلي 3 جهال بيهم سرطان واني انطيتيه فلوس يابو فلووووووس أنا اعلمك والله إلا اشرب من دمه
عافني وطلع وقبل لا يطلع كال للي ويا ياخذونا ويذبونا بالشارع
وفعلاً أخذوني وشالوا فاطمة وطلعنا
والأنظار جانت علينا
بس طلعت وياهم اريد اطلع من هل مكان جان عبالك مال شياطين
ركبنا السيارة وشغل الرجال بسرعة وگال
_ هزمتج منهم لان صلاح راد ياخذج لشهواته
واخوج يأخذون اعضائه واختج هم إذا ما كدروا يستفادون منها بالدعارة
جان يحجي وكلشي ما افتهم وكمل وگال .. راح اخذج على غرفة ومن بعدها الله كريم ويمكن ابوج يكتلوا اليوم لان اعتبروا خاين
_ عادي خل يموت
ضحك واحد منهم وگال .. حقج بس لو عرفوا احنى سوينا هيج وضحكنا عليهم بسالفة السرطان
جان هسه احنى كلنا موتى
_ شكرًا عمو
ما رد عليه ومشى لحد ما وصلنا مكان زراعي
وجان بعيد على المكان الي رحناله لان السيارة مشت هواية
وحيدر الله ذب عليه النوم الحمدلله ما عذبني
وفاطمة هي هادئة ضلت يمي وما فارگتني
وصلنا المكان وجانت غرفه بس غرفه مبنية ويمها نخل وزرع هواية
دخلوني بيها وأنطوني مي واكل
وكال واحد منهم
_ راح تبقين هنا وراح اقفل الباب من برا
اي شي يصير انت ماتعرفينا ولا نعرفج فهمتي؟
_ حليب حليب لحيدر وبعد كلشي ماريد
_ كلشي جبت الج بس اريدج سباعيه لحد ما ادورلج مكان تكعدين بي وضلي ادعيلي لو ذكرتيني
وراح وبعد ما شفته ابد مادري عايش مادري ميت
بس لو ما هو وسالفة السرطان وضحكوا على هذا صلاح جان هسه احنى ووووين المهم قفلوا الباب
وفاطمة لكت بطانية ومخدة ونامت وانا شربت حيدر حليب وهذا اكثر شي جنت فرحانه بي حتى يشبع وينام
وجايبين الي حفاظات وملابس
بيومها اكلت وغيرت ملابسي ونمت نومه عبالك ما نايمة الأمان الي شفته بيومها بعمري ما عشته .. الشارع جان أمان اكثر من بيت ابوي
مر يوم ونص واحنى بهل غرفه ولبست فاطمة بيومها حفاظة حتى تقضي حاجتها وما تحتاج حمام واغسل الهم من المي الي جايبي الي
وبهل يوم ونص جانت هادئة وحيل جنت مرتاحة
لحد ما بنص الليل والمطر ينزل اجا رجال فتح الباب
وأخذنا واحنى كلشي مانعرف
والمطر فوكانا وخلانا بالشارع ومشى
عافنا ومشى ولحد الآن مادري ليش هيج صار
وبيومها ضليت امشي بين البيوت وبنص المطر وبهل منطقة وشافتني خالة حفيظة عبالك احد دازها
اجتي اخذتنا ورحنا لبيتها
وعاد من ذيج الأيام المطر ماحبه .. ولا احب أشوف رجلي
بس حبيت لان وصلت اخواني لمكان أمان وما عفتهم
وفرحانه لان فاطمة كبرت بدون ماسوي شي غلط
صفن وهو يلعب بالسجادة وخيوطها
وگال .. تعرفين ابوج حي لو ميت
_ لا ماعرف وحتى لو اعرف ماريد أشوفه
_ حقج ، تتوقعين احد يدور عليج هسه
_ لا ماعتقد لان هو صلاح من يومها كال ذبوهم بالشارع ف وجودنا من عدمه جان واحد
_ ليش صار بيج هيج زهراء ؟
_ مادري يمكن حظي لو هي مقسومة بس راضية
وحق الله راضيه وگلبي بارد .. بس روحة حيدر كسرتني
_ يعني ما كسرج شي غير روحته !
_ اي الله يشهد والله لو اعيش بالشارع ووياهم
المهم يبقى موجود .. بس هايهيه الحمدلله الله اخذه لان هو ارحم من الدنيا هاي الي يمكن مراح يشوف بيها بس العذاب وبقت فاطمة خليني أراعيها واكبرها واشوفها شي ناجح
_ زين عدكم جناسي انطوهن الكم؟
_ اي اي هي الجنطة أنا ما ذببيتها وجانت بيها الجناسي وشويه ملابس وهيج
_ زين تعرفين شكل المكان تعرفين مكانج والدج القديم
تعرفين العنوان اي شي
_ اعرف المحافظة اي بس البيت لا
وبعدين صار عشر سنينن شيضل اما البيت الي أخذوني عليه اعرفه بالشكل وجان بعيد عن هاي المنطقة بهواي لان مشينا على سريع
_ تمام .. لسه موافقه عليه؟
_انا الي لازم اسألك .. لسه موافق؟
_ موافق دنيا وأخرى اني اريدج انت توافقين
باوعت عليه وجان يباوع بلهفة وابتسامه واضحة
_ اي اريدك .
ابتسم وجان فرحان حيل
وفز بسرعة على دگه الباب
_ هاي بابنا لو بابكم ؟
_ مادري شوف من السياج
رفع تلفونه واتمشى لحد سياج السطح وباوع بالتلفون
ورجع باوع على الباب
ورجع عليه وجان مبين متعصب
_ تدرين بيش ساعة ؟
_ لا
_ ساعة 3:30 !
_ اي منو بالباب ؟
_امجد …
