رواية ليليان الفصل الخامس 5 بقلم زينب نور

                                                    

بقيت ع المرجوحة ونمت ..

كعدت ع صوت ميان ..

                                

- هيي كومي عاد كافي نوم ، امشي نروح نبدل دنسوي التحليل !!

- عززه  ولج نسيت غير اتكعديني من وكت ، هسه شكد الساعة ؟؟

- ب ٩ 

- بت ..  

- هههه اي كملي 

- ولي غير تكعديني من وكت 

- دكومي ..

                                

دفعت المرجوحة ورادت اتوكعني ..

كمت وركضت وراهه ..

                                

- بسيطة اني اعلمج ميان ، كسرتيني من الصبح اني بيه حيل ..

                                

طبيت للمطبخ لكيت امي دسوي ريوك ..

                                

- صباح الورد حبيبتي

- صباح النور ، امشي بسرعه يله حته نروح 

- اي ماما 

                                

صعدت للغرفه غسلت وبدلت ..

نزلت تريكت ويا امي وميان ..

                                

صعدت ميان تبدل وامي هم ..

كعدت انتظرهم وافكر ..

                                

اريد بس اروح واشوف النتيجة ..

اريد افرح بنجاحي واروح جامعة واغير حياتي ..

                                

مثل كل بنيه اريد افرح بأنتقالي لمرحلة جديده ..

واعيش قصة حب اذا الله كاتبلي ..

                                

خابرت امي جود واجه ويانه ..

الكل يريد يعرف النتيجة بس مو مثلي ..

                                

رحنه للمستشفى وسويت تحليل دم كامل  واخذت تصوير بالرنين المغناطيسي وتصوير مقطعي ..

بقه جود واحنه رجعنه ..

                                

خافوا عليه من النتيجة ..

بقه جود وكال اني ابشركم ..

                                

رجعن بدلت وضليت يم الموبايل انتظر اتصال ..

اجه اخويه مراد وبابا وصبيتلهم غده بس اريد يمشي الوقت ..

                                

ياربي الوقت وكف ليش مديمشي ..

بس بهاي المواقف ..

                                

رحت كعدت يمهم وهمه يسولفون ويا امي وميان ..

جانوا يحجون بخطوبه مراد يريد يزوج ..

                                

دينتظرون نتيجتي حته يخطبون ..

اي شويه فرحه وتغير بلبيت بس عادين تكون زينه وحبابه ..

                                

فكرت دقيقه ..

شلون نسيت اني ..

اني مو جنت اتخربط وتعبانه اعصابي واتخربط كل اسبوع بلامتحانات ..

                                

ايجوز هاي اعراض مو بسبب السادس والامتحانات ..

والطنين برأسي ، شلون نسيت كل هذا شبيه اني ..

                                

بس شلون اكولهم مستحيل ..

مابيه حيل تحقيق ..

                                

دكت موبايلي بلمطبخ ..

رحت ركض عبالي جود ..

                                

اباوع طلع جمانة حبي مشتاقتلهه ..

فرحت صارلي فتره ماحاجيه وياهه ..

                                

- هلا والله شلونج ؟

- بخير ليلو وانتي ؟؟

- امم اني ع الله حالي حال 

- شبيج عوبه !!

- يكولون ليليان بيهه سرطان ، هذا الي سمعته

- ههههه لا تخبلتي اكيد ، ع كل حال حقيره ماسألتيني شكد معدلي ولا شي ، حرامات بيج الملح والزاد 

- هههه لا بدون شقه احجي ، وصحيح اني اسفه جوجو ماخابرت ولا سألت بس حالتي وموقفي هسه احجيلج 

- اممم اذا حجة قويه عادي امشيهه 

- اوك سمعيني زين ..

- قبل يومين اتخربطت وودوني للمستشفى ولما رجعت عرفت البارحه بيه سرطان مادري هيج كالولي !!

- صدك تحجي يمعوده شجابه عليج السرطان 

- شمدريني حظي هذا مقدرلي اموت 

- انجبي اسم الله عليك ..

 

                                              

                                                    

صاحت عليه ميان ..

- خابر جود تعالي !

                                

- كلتلهه .. بعدين اخابرج اروح اشوف النتيجة

- طمنيني عود

- ماشي ..

                                

ركضت للصاله واسمع امي تحجي ويا جود ..

                                

- شلون يعني ؟

                                

- يعني لازم غير تحليل حته يتأكدون !!

                                

- اهاا فهمت، الله كريم 

                                

سدته وكعدت وشاورت بابا ..

                                

- ماما شكو شكال ؟؟!

- مادري لازم نسوي تحليل ثاني 

- ليش ؟

- بلتصوير مال رنين ماكو شي بس بتحليل الدم اكو خلل 

- شلون يعني انضل انسوي تحاليل وكلشي ماكو نتيجه اني اليوم كله انتظر ع نار شنو هلكلام ليش مايعرفون وين التطور ؟ 

- شمدريني يا بنتي 

                                

ضجت كلش ، وين عايشين احنه حته مايعرفون ..

اووف ياربي هسه شسوي ..

                                

راح اتكول عليك واعوف السالفه ..

كمت وكلت لأمي ..

                                

- ماما عوفي الموضوع بعد لا تفتحينه ، مراح اعيد التحليل ولا اسوي اي شي  ، عوفيهه ع الله 

                                

- شلون يا ماما قابل نعوفج تموتين ..

- اي اذا الله يريد ياخذني خل ياخذني هو احنه كلنه بهلطريق قابل راح تمنعين القدر الي مكتوب اليه ..

- يمه مو هيج بس لازم نشوفج ، اضلين هيج 

- مليت ماريد عوفوني بحالي !!

                                

رحت وعفتهم يحجون ..

اجتني ميان تحجي ويايه ..

عفتهه وكتلهه .. اريد انام ..

                                

كعدت بليل ونزلت ..

اجه جود وكعد يمي ..

                                

- شبيهه ليلو ليش ضايجه ؟

- مابيه شي 

- دمشي سويلي كهوه لعد !!

                                

باوعت عليه صفح .. 

- ويايه تحجي ؟

- اكو غيرج يمي

- اي ميان 

- لا هاهيه لعد الكهوه صارت من ستاربوكس 

- هههه تدلل 

- يله حته نغرد سوه 

                                

فرحت بداخلي اول مره يحجي ويايه اخويه بهلشكل ..

                                

- اني وياك ؟!!

- اي حته بعدين نطلع 

- صدك !! وين تودينه ؟

- نفتر بلربيعي ونغير جو ونتعشه هم 

- ياالله شكو اليوم 

- دكومي 

- اي كمت 

                                

سويت كهوه النه بس اني وياه نشربهه محد يحبهه ..

كعدنه نحجي شوي ويحاول يطمني ع النتيجه ولا اديرين بال ..

                                

ويكلي افرحي واستمتعي بوقتج واشتري ملابس للكليه ..

ليلو حياة الجامعة حلوه وتختلف عيشي حياتج ولا تهتمين ..

                                

حجه هواي كلام وينصحني ع الصداقات والعلاقات العاطفية ..

اول مره يسولفلي يحجي ويايه بخيبة كأنو كلبه مكسور ..

                                

رحت بدلت اني وميان وماما وطلعنه نفتر بلربيعي ..

بعدين رحنه تعشينه ورجعنه ، غيرنه جو وارتاحيت ..

                                

ضلينه فترة ما حجينه بلموضوع ..

نزلت بيوم من الايام الصبح سمعت امي تحجي ويا ميان..

                                

- اي اليوم انروح !

- وين ترحون ؟

- اي تعاي اجيتي بوقتج 

- شكو ؟!

- اليوم راح نروح نخطب لمراد 

- اهاا اي خير ان شاء الله 

- اي بس تعرفين بعدين راح نلتهي خلي هسه نسوي تحليل ثاني ونخلص 

- ماما حجينه بهلموضوع ، هسه كوليلي شوكت نروح حته نتحضر !

- العصر 

- امشي ميان خلي نعدل ونرتب نفسنه ونشوف شنلبس 

- ميان ... ههههه ليش شبينه عيني !!

- دكومي ويايه ..

                                

بدلنه ورحنه شفنه البنيه ..

زينه حبابه ، بعدنه بلبدايه ..

                                

اسمهه همسة  ٢٥ سنه ، مكملة كليه قسم عربي ..

وادرس بمدرسة أهلية .. 

                                

رجعنه ومراد بس يحجي بهلسالفه ..

طلع يحبهه واحنه مندري ..

                                

وره اسبوع صارت الخطوبه  بيناتنه ..

رادوا فتره الخطوبه تكون طويله مايردون بسرعه يزوجون ..

                                

مشت فترة والاوضاع زينه ونحجي بين فتره وفتره اني وجمانة وهي تحاول تقنعني انو اعيد التحليل بس ماريد اعيش نفس عذاب الانتظار ونفس النتيجة والخيبة ..

                                

مرات نغير جو ونطلع ويا مراد وهمسة اني وميان ..

                                

لحد ماطلعت القبولات ..

طلع قبولي علوم حاسبات الجامعة التكنولوجيا ..

أما جمانة فراحت معهد طبي لان معدلهه اعلى مني ..

                                

خفت شلون راح اداوم واستمر ..

مالي واهس اقره او اداوم او حته اشتري ملابس ..

واني هم ماعرف احد هناك امشي وياه ..

                                

شسوي ابطل انتظر الموت ..

لو اداوم واحاول استمتع بآخر أيامي ..

                                

شوكت اموت واخلص ؟!!

🎵🎵🎵🎵