رواية ليليان الفصل السادس 6 بقلم زينب نور

                                                    

يوم جديد، اكتئاب وملل ثاني ..

مر شهر وميان بلدوام ..

وراحت علمي اكيد ..

                                

كل الفتره واني يوم عن يوم ازيد كآبه وانعزل ..

قل كلامي اكثر وحته اكل مو هلكد اكل ..

                                

اكضيهه اكل جبس ونساتل وتصفح بلنت لو ويا جمانه ..

هيه كامت اداوم بلمعهد الطبي صارلهه اسبوع اكثر..

                                

كعدت نزلت ، شفت ماكو احد بس امي ..

كعدنه نتريك اني وياهه ..

                                

- اكلج ليلو !

- ها ماما ..

- بخصوص الكليه 

- وكفت اكل ،، اي شبيهه ؟

- شراح ترحين ؟

- ليش يفرق يعني هو حياتي منتهيه !

- لا تحجين هيج حبيبتي ان شاء الله خير 

- يا خير هذا !!

- ترحين كليه اهلية ؟! بنتي عادي اذا ترحين ماعدنه مشكله هو شعدنه غيركم انتي وميان ..

- لا ماما ماريد، اروح القبول الي طلعلي وهاهيه 

- بكيفج حبيبتي فكري انتي ..

- اي ..

                                

كمت غسلت الاماعين ومسحت البيت وامي تطبخ ..

كملت رحت سبحت ، طلعت اجتي ميان ..

                                

- اي همزين سبحتي حته نطلع العصر ..

- وين ؟!!

- نطلع نشتري ملابس الج والي 

                                

ماجاوبتهه ، اخذت ملابسي ورحت ابدل ..

راحت تبدل ملابسهه واني نزلت ..

صبيت اكل واكلنه كلنه ..

                                

- ليليان !!

- نعم بابا 

- امج كلتلج ع الكليه الاهليه ، شنو قرارج ؟

- ماريد ، هذا قدري اروح حكومي والقسم الي طلعلي 

- ماتردين تحليلات او اي شي ، اكدر حته اسويلج واسطه ترحين طب اسنان او صيدله بس أمري 

                                

- كمت وكتله .. تسلم بابا بس ماريد هو كم سنه ومالحك اتخرج حته ..

                                

عفتهم يحجون وراي ..

بس والله مالي خلك لأي شي ..

                                

مادري حايره شسوي..

صعدت اجت وراي ميان ..

                                

- يله امشي بدلي خلي نطلع 

- وخري من يمي 

- اووف الله يطولج يا روح ..

                                

طلعت ملابسنه وبدلت ..

اجتي عليه وبلكوه لبست ..

                                

خليت مكياج بسيط ولفينه الشال ونزلنه ..

امي مبدله وجود هم ..

                                

رحنه اشترينه شويه ملابس ورجعنه وجبنه عشه ويانه ..

جود كل الطريق خبصنه ، شوكت نرجع ..

ليش هيج يضوجون مادري ..

                                

رجعت اول مانزلت شفت سيارة بلباب ..

محد يجينه بهيج وكت ..

                                

دخلنه شفنه بيت خالي ..

خالي ومرته وبناتهم وميثم ومرته غسق ..

                                

طبت امي سلمت عليهم هيه وميان وجود بس اني لا ..

صحيح نسيته وصار فتره طويله بس الحاله الي بيهه اني ماتسمحلي ..

                                              

                                                    

ماكدر ، اعجز عن مواجهه الناس اكثر من قبل .. 

احس كل شخص هسه يباوع عليه يتشمت بيه ويستنقص مني ..

                                

شربت كومه مي، احس جسمي مابي مي جاف ..

او تعبير عن توتري ..

                                

جمعت كل قوتي وجرأتي حته ادخل ..

اول مره اشوفهم بعد سنين ، واشوف اشخاص اعرفهم اني ..

                                

دخلت سلمت وكعدت ، اتفادى اباوع عليه ..

الوضع عادي ومحد سأل عليه ، اعتقد محد يعرف ، بعد احسن ..

                                

كمنه اني وميان نحضر عشه ومراد جاب بعد اكل ..

ماشتهيت اكل وكمت احضر جاي الهم ..

حسبت حسابي اكيد راح يباتون ، شلون يرجعون بهليل ..

                                

بنات خالي نرمين وسوسن ثنين وحده بكد ميان والثانيه اكبر بسنه ..

نامن يمنه بلغرفه ، والباقي بغرف وحد ..

                                

اريد انام ماكدرت ونفسي كامت تلعب ..

رحت للحمام واستفرغت .. 

                                

لشوي هديت ونزلت اشرب مي او اكل فد شي جعت ..

دانزل شفت احد كاعد بنهايه الدرج ..

                                

ضلمه ماعرف منو ..

شفته تحرك ، فزيت وسميت بأسم الله ..

جمدت بمكاني ، شغل الضوه طلع ميثم ..

                                

- ابتسم وكال .. انتي بخير ؟

- خليت ايدي ع كلبي وكمت اتنفس بسرعه .. اي 

                                

نزلت ومدرتله بال ..

رحت للمطبخ وشربت مي ..

                                

- اسف ماعبالي احد كاعد بهذا الوقت !!

                                

خررب بي يعني اله يريد يجلطني ..

من انتحرت ميان من يومهه واني اخاف هواي ..

ماعرف شبيه صرت جبانه كلش ..

                                

- لا عادي 

- جنت اخابر صاحبي مسافر وفرق وقت بيناتنه ،، انتي ليش مانايمه ؟

- ماجاني نوم 

- اهاا ، ان شاء الله كلشي بخير 

- اكيد 

- غسق .. شكو حياتي !!

                                

انداريت عليهه ، واكفه حاضنته  ..

                                

- وخرهه وكال .. ماكو شي حبيبتي ، امشي انام 

                                

 انتظرتهم يدخلون الغرفه حته اصعد ..

صعدت بس احس شي بكلبي ماعرف شنو ..

                                

ازوج هو وعايش حياته ..

هو ماجان حب انسي ..

                                

لا امكن اغار لان عايش حياته وهيه هم ..

واني ماعرف مصيري ..

                                

نمت واني افكر شوكت راح اداوم ..

شلون راح اتأقلم واني حته ضايجه من نفسي ..

                                

اخر شي فكرت بي هو ليش ماعندي اعراض ..

حته الصوت الي بأذني ماكمت احس بي ولا اسمعه ..

                                

كعدت الصبح ونزلت .. 

ماكو اهلي بس امي وبيت خالي ..

                                

كاعدين يسولفون واني اغسل الاماعين ..

بس اريد اكمل وافتهم سبب زيارتهم ..

كملت ، ورحت اسمع ..

                                            

                                              

                                                    

- امي .. والله حاولنه وياهه شنسوي ماتقبل تعيد التحليل ومانريد نغصبهه ، نفسيتهه تعبانه 

- مرت خالي .. منين جتكم هلمشاكل ، خطيه بعدهه صغيره اشايفه من حياتهه 

- ميثم .. خاله عوفيهه اني هسه احاول احجي وياهه بلكت تسمع مني 

- اي فدوه والله الليل بلكوه انام اريد ارتاح واشوف علتهه 

                                

رجعت اسوي كهوه ..

خلي استمتع بوقتي ماطول راح اداوم ..

                                

صار اسبوع من داوموا ..

خلي اروح واشوف ، نغير جو هم ..

                                

- ليلو !!

- هاا ميثم 

- اريد احجي وياج 

- بخصوص شنو ؟

- امشي نطلع بلحديقه 

                                

ماجاوبته ، صبيت الكهوه وكعدت اشرب ..

اخذ كوبي وطلع ..

                                

- طلعت وراه ،، اي شنو احجي !

- انطاني الكوب وأشرلي اكعد ع المرجوحه ،، شبيج ، ليش صايره هيج ؟!

- كعدت ،، ماكو شي 

- ليليان ليش هيج كاعده اسوين بيهم !!

- شمسويه بله ؟

- ليش ماتقبلين تسوين تحليل 

- ميثم هذا شي يخصني وبس ،افهمت ما الك دخل ..

- لا تعلين صوتج خلي نحجي برواء ..

 - كمت وحجيت بصوت اعله .. تعبت وماريد اعيده وهو نفس النتيجه يطلع 

                                

لزمني من ايدي وطببني للمطبخ ..

                                

- ولك شبيك ، الكهوه وكعدت بلكاع ..

- شكلت اني ، شبيج ليش اصيحين ؟

- انت مالك دخل بحياتي 

- مو تدخل واني مو غريب ابن خالج وثاني شي هذا شنو العناد والعصبيه تره مراح اضرين بس نفسج 

- اي واني راضيه ، ارتاحيت !

                                

خليت الكوب ع الميز وصعدت ..

ماناقصني اجه هذا عليه ، روح لمرتك المايعه ..

                                

طلعت اغاني واختار بلملابس ..

حته باجر اداوم قابل اترك الدراسه ..

                                

خابرت جمانه وضليت احجي وياهه ..

ضليت اكلب بلنت واجتي ميان ..

                                

اتغدينه الظهر وهمه بعدهم ..

اريد اخلص منهم ، العصر يله راحوا ..

بليل رحت احجي ويا امي ..

                                

- ماما باجر اريد اداوم بس شلون اروح ؟ 

- صدك بنتي ؟!

- اي ماما 

- هسه اشوف جود لو مراد يوصلج 

- اوك 

                                

صعدت وكلت لميان طارت من الفرح ..

ضلينه نلعب ونخلي مكياج ..

ماضبط ويانه ،عفته ونمت..

                                

كعدت الصبح مقرره ابدي حياه جديده ..

بدلت وخليت مكياج كلش بسيط وطلعت ..

                                

- نزلت امي كالتلي .. جود راح يوصلج بس شلون راح ترجعين ؟!

- عادي اني ارجع بتكسي مو صعبه 

- انتي ؟!

- ماما تره صرت جبيره عاد اكدر اعتمد ع نفسي 

- اخاف عليج 

- ماما !!

                                

- اجه جود وكال ،، يله امشي ..

                                

صعدت بس توتر مو طبيعي ..

شوكت يخلص اليوم ..

                                

- وصلنه وكال ،، يله نزلي لو تردين اجي وياج ؟

                                

اخذت نفس عميق وكلت بداخلي لا خلي اعتمد ع نفسي..

                                

 - لا عادي روح انت واني هم ارجع 

- دار وجهه مستغرب ،، متأكده ؟!!

- اي 

                                

نزلت بس ماعرف وين اروح ..

                                

ضليت امشي ورحت للنادي امكن ههه ..

اشتريت ببسي ، عطشانه كلش ..

                                

داشرب واختنكت ..

شنو هلحظ هذا شجابه هنا ؟!!