رواية جمعنا حرف الـ ش الفصل السادس 6 بقلم فاتن اسامة

فات أيام علي إللي حصل

باكل قليل بشرب قليل ومبخرجش من أوضتي

الوحيدة إللي حاولت تحسن من نفسيتي كانت نعمة الله، الست دي جِميلها عليا كبير عمري ما هنسي وقفتها جنبي

ومع كل دا كان راشد مستنييني أقعد معاه

وأول ما أخيرًا خرجت من قوقعتي 'أوضتي'

قررت أشوفه..

_ خير اللهم إجعله خير

يا فتاح يا عليم يا رزاق يا كريم 

'قولت الجملتين علي فترتين متباعدة

بين كل واحدة والتانية كام ثانية

وهو برضو ساكت!'

_ يا زفت الطين

'رفع عينه عليا بعد ما خلص الشاور بتاع الحصان'

_ دكتور بهايم جدا

'أخد نفس طويل وبعدين بدأ يتكلم'

= أولا دي مش بهيمة يا بهيمة

'رديت بـ خوف حاولت أداريه'

_ أومال إيه؟

= دي شوقية، الحصانة بتاعتي 

_ حصانة؟

= أيوا حصانة

_ دا أنت متعلم ودكتور أوي

'بدأت أضحك بعد ما كنت مرعوبة من زعيقه'

= إضحكي إضحكي

_ أومال أعيط مثلا 

= عشق

_ راشد

'قولت إسمه بنفس نبرة التهديد بتاعته 

وبعدين بصيت حواليا'

_ حلوة الشمس النهاردة، دافية وحنينة 

= وعينيها حلوة، وشعرها حلو

'رفعت حاجبي وبعدين قولت بـ إبتسامة'

_ دي معاكسة؟

= بتكلم علي الشمس

'بلعت ضيقي بسبب رخامته وبعدين قولت..'

_ كنت عايزني في حاجة، إتفضل قول 

= بجد كنت عايز؟

_ أنت هتستعبط

'نشف إيديه بالفوطة وقعدنا'

ـ إزيك يا عشق يابنتي

_ الله يكرمك ياعم جابر، أنت كويس؟

ـ فضل ونعمة

'كان لسه هيقعد علي الكرسي إللي جنبنا لكن راشد منعه 

إتحجج بحجة غريبة، إن الزرع في الناحية التانية من القصر محتاج يتسقي، وبالفعل راح يشوفه..'

_ بحب التفاهم إللي بينك وبين باباك

= بجد!

'حسيت بـ إرتباك من نظرة عينيه ليا

مش دا نفس الشخص إللي شوفته أول يوم وإتخانقت معاه..'

_ ندخل في المفيد 

= أعملك إللي إنتي عايزاه، وإنتي تعمليلي إللي أنا عايزه

'بصيتله بـ ترقب مستنياه يكمل'

= يعني أفتحلك المخبر عشان عمك سعيد إللي صِعب عليكي حاله، وإنتي تساعديني إننا نجمع العيلة من تاني

_ وأنت عرفت منين

= شوفته يوم ما وصلك

_ ومين قالك إني عايزة أفتح المخبز

= عشاني روحت زورته بعدها وعرفت إنه حكالك

وياستي لو مش عايزة خلاص، بسحب عرضي

'رديت بـ عدم فهم'

_ وإيه مصلحتك في الحكاية دي كلها

'رجع ضهره لـ ورا وهو بيقول'

= أنا وعيت علي الدنيا يا عشق لاقيتني في القصر

مع أبويا، حتي أمي معرفش شكلها غير في الصور 

ماتت وهي بتجيبني علي الدنيا

'هزيت راسي بـ آه بمعني: كمل'

= مش فاكر أوي الكواليس، بس علي كلام بابا إن الست وديدة أول مانا جيت البيت، أخدتني في حضنها 

وقالت دا حفيدي

_ حفيدها؟

= إعتبرتني حفيدة، ربتني زيي زي حسام وسارة ونغم، ويمكن كنت أغلي عندها كمان

'إستغربت الكلام فـ محبيتش أفضل ساكتة أكتر من كدا، وسألت..'

_ ودا إيه علاقته بمصلحتك!

= هي مش مصلحتي علي قد مانا عايز أرد نص جَمايل الست دي عليا وأدور علي حفيدها 

فـ إنتي تساعديني، وأنا أساعدك

'قولت بـ سخرية'

_ لسه فاكر عليك!

= مكنتش لاقي حد يحط إيده في إيدي ويساعدني

'رديت بعد تفكير'

_ سيبني شوية وهرد عليك

ـ تردي عليه في إيه يا هانم 

'وقفنا بـ خضة أنا وهو بعد ما لاقينا وديدة ظهرت قدامنا فجأة'

= إنتي إيه إللي خلاكي تقومي!! الدكتور منبهك علي الراحة ثم الراحة 

'مسك إيدها، سندها وخلاها تقعد معانا'

ـ شايفاكو بتتناقشو نقاش باينه مهم، قولت لما أجي أشوفكو

'بدأت ألمس شعري بـ أناملي

وللعلم دي حركة بعملها لما بكون بكدب أو بحاول أخبي حاجة'

_ كان بيحكيلي عن القصر

'ضحكت وبعدين قالت وهي بتوجه نظرها لـ راشد'

ـ وهي حكايات القصر بتخلص!

'ضحك هو كمان..'

= لو جينا للحق مبتخلصش

'سألته وهي بتطبطب علي كتفه'

ـ من زمان مقعدناش سوا، ولا حكيتلي عن كليتك

= إنتي شايفة إيه؟

'لمست وشه وهي بتتفحصه بعيونها'

ـ شايفة إن حبيبي خاسس وحالته بقت حالة 

= يعني مفيش واحدة هترضي بيا

ـ دا كل اللي هامك

'بدأو يضحكو ويهزرو بـصوت عالي وأنا قاعدة قصادهم بضحك علي ضحكهم، فـ بَصَّتلي وهي بتقول'

ـ فاكر عليا من سنين كتيرة، جابر جه، دخل علينا القصر بـ طفل صغير، وهو حزين

قال مراتي ماتت، وإخواتي مش سلكانين بيه 

وقتها إفتكرت حفيدي إللي ملحقتش حتي ألمسه وأخده في حضني، أشبع منه

فـ أخدت راشد، وقررت أربيه

'رديت بـ إندفاع'

_ وليه معتبرتيهوش حفيدك وخلاص بدل مانتي لحد دلوقتي مستنية رجوعه

'رد راشد بـ زهول'

= الحياة سهلة كدا يا عشق!

_ يا جماعة معادلة بسيطة، طفل مشي من البيت ومش لاقيينه، جه مكانه طفل تاني

ما نحط دا مكان دا ونعتبر الطفل التاني هو الأولاني ورجعلنا بالسلامة 

'بَص لـ وديدة وبعدين قال'

= قولتيلي بقا دي بنت بنتك صح؟

'ضحكت وبعدين قالت'

ـ أنا بقول يا عشق إنتي صاحية بدري ومحتاجة تنامي أكتر من كدا

'كملنا نقاشنا إللي محدش إقتنع بيه

وغيرنا السيرة (راشد إللي غيرها) عشان خلقه ضيق وبيكره الغباء، برغم إني مش غبية للدرجادي يعني'

'في وسط دا لمحت بطرف عيني عمي جابر واقف بعيد بيبصلنا بـ تركيز، وكأنه هيموت ويعرف بنتكلم علي إيه 

مرتحتش لنظراته، ولا لـ مراقبته لينا

بس عملت نفسي مأخدتش بالي وعديت الموقف'

-- صباح الخير يا سِتي

ـ صباح الخير يا سارة إيه الحلاوة دي كلها

'فضلت تلف بـ الجيبة بتاعتها عشان توريها وديدة

بس الحقيقة إنها مستنية راشد يقولها حلو'

-- إحم إحم

'راشد بَصّلها بـ طرف عينه فـ قالت'

-- شكلي حلو؟

= إيه الجديد، مانتي سارة بتاعت كل يوم

'قالت بـ ضيق'

-- مش كنت دايما تقول البناطيل حرام، وأنك أكيد مش هتاخد واحدة بتلبس بناطيل، ولازم تكون عارفة دينها كويس وبتلبس واسع

'رد عليها بـ ضمة حواجب'

= وإيه دخل دا في دا 

-- إني سمعت كلامك ولبست واسع 

'قال بـ ضحكة حاول يكتمها'

= لما تلبسي واسع تلبسيه عشان ربك، مش عشان ترضي عبد من عباده يا سارة

وبعدين إيه جاب سيرة مراتي المستقبلية!!

مراتي إللي هحبها، هحبها زي ما هي أيا كانت شكلها إيه، وبإذن الله تمشي معايا علي الصراط المستقيم 

وندخل الجنة سوا

'ردت بـ غيظ'

-- يعني أنت شايف كدا

_ ما تصلو علي النبي يا جماعة هتتخانقو ولا إيه 

'بَصَّتلي بـ رفعة حاجب وقالت'

-- معرفش إيه إللي دخلك بينا يا.. قولتيلي إسمك إيه 

'قومت وأنا بقول بـ كبرياء'

_ عشق الصاوي يا بيبي 

إيه؟؟ عندك نقص كالسيوم؟ مخليكي بتنسي كتير

'وقبل ما ترد قاطعتها بصوت عالي وأنا بنده علي الدادة بتاعت القصر'

_ والنبي هاتيلنا كوباية لبن هنا أصل الحلوة بتسنن وبقت تنسي كتير الأيام دي

'سبتها وسط عصبيتها وتلقيحها عليا بالكلام حتي بعد ما مشيت!!

مسمعتش كلام وديدة ولا راشد وهما بيحاولو يوقفوني

بس يا جماعة أنا بجد مشيت عشانها هي مش عشاني، لو وقفت ثانية زيادة كنت سويت وشها بالنجِيلة إللي واقفين عليها'

'دخلت جوا وأنا مقررة قرار مهم

أصحي العيلة دي بدري عشانهم بيتمرقعو 

مش معني إن النهاردة الجمعة يبقا منصحاش بدري'

_ حبيبي وأنا جنبك.. تعرف بحس بـ إيه..

'بدأت أدندن بشوية أغاني من أغاني تامر حسني

لحد ما وصلت أول أوضة، كانت لـ حسام 

ويادوب لسه هخبط.. الباب إتفتح'

_ أعوذ بالله من الشيطان الرجيم 

ـ إيه ياستي، إيه، خضتيني

'كان بيفرك في عيونه الإتنين وهو بيحاول يستوعب مين إللي واقف قدامه'

_ إيه مصحيك بدري

ـ إنتي إللي صاحية بدري ليه واقفة عند أوضتي ليه

_ جاية أصحيك

'بدأ يمشي ناحية الحمام وأنا برضو ماشية وراه عشان مخلصناش كلام'

ـ ودا ليه يعني

_ عشان نفطر فطار عائلي

ـ فطار عائلي وإنتي مقاطعة نص العيلة شاتماهم من كام يوم

_ علفكرة أنا غلبانة خالص إنتو إللي مش محترمين

ـ برضو بتغلطي!

'وقفنا قصاد باب الحمام'

_ أقصد يعني..

ـ طيب إيه؟ ناوية تدخلي معايا هنا كمان!

'خبيت وشي بـ كفوفي'

_ مش هبص

ـ لا دا إنتي مجنونة بقا

'دخل الحمام بسرعة وأنا بضحك علي خضته من كلامي

وفضلت واقفة مستنياه برا'

ـ إنتي لسه عندك

_ نص ساعة في الحمام!!

ـ ياستي إنتي مالك؟ عجيبة جدا بصراحة

'بدأ يمشي ناحية أوضته من تاني

أصل الحمام في أخر الدور، وأوضته في أوله'

_ مانا مش هسيبك غير لما تقولي صاحي بدري ليه وعمال تجهز في نفسك كدا

ـ يووووه 

'وقف فجأة وعلامات الغضب بانت علي ملامحه'

ـ متعودتش أحكي، متعودتش أعرف حد حاجة عني

ولو هتمشي القصر دا علي مزاجك، فـ أكيد أنا لا يا عشق، أرجوكي سيبيني في حالي

'فتح باب الأوضة ودخل

وقبل ما يقفل الباب وقفت قصاد الباب وأنا بيني وبينه كام سم'

_ إبن خالي إللي بيحب واحدة مش قادرة تشوفه ولا قادرة تحس بيه، طبيعي أحاول أساعده 

'لف وشه وهو بيبصلي بعيونه الواسعة المتفاجئين'

_ إبن خالي إللي صاحي بدري  عشان بس النهاردة عيد ميلادها

طبيعي أكون معاه وأحسسه إنه مش لوحده زي ما هو متعود

'رد بـ صوت مهزوز'

ـ عرفتي منين!

_ العصفورة قالتلي 

ـ بتكلم بجد، عرفتي إزاي 

_ نظرات عيونك لـ سارة طول الوقت، تخلي إللي مبيفهمش يفهم يا حسام

ـ هو أنا باين عليا للدرجادي؟

'سأل السؤال ومعرفتوش أرد عليه

عشان الحقيقة إن نغم هي إللي عرفتني

قد إيه هو بيحب سارة، وسارة مش شايفة غير راشد

وراشد في الأساس مش عايزها'

'قررت أمشي معاه الخط

لحد لما إطمنلي، وحط إيده في إيديا 

عشان يعرف يخليها تحبه'

'في قانون الحب جملة غدارة:

‹القلب مش عليه سلطان›

عشان فعلا الإنسان بيتغدر بيه

في ثانية يلاقي نفسه بيحب فلان أيا كان هو بيحبه أو لا

بيبدأ القلب يغدر والعقل يغدر 

ويسييوه بيغرق من كتر الشوق والتفكير

طيب إنقذوني.. يا قلبي متحبش فلان، ويا عقلي متفكرش فيه

وبرضو مفيش عليهم سلطان..'

ـ قالولي بطلي تحسسي إللي جابلك كوباية لبن إنه إشترالك جاموسة

ميعرفوش إن اللي كان بينوي بس إنه يجبلي كوباية اللبن كنت بجيبله الزريبه كلها 

لحد ما اتأكدت إن أنا الجاموسة

'كانت شربات بتحكي لـ سلفتها نعمة الله علي أحزانها 

وأنا واقفة عند باب المطبخ مبعملش حاجة غير إني بضحك'

-- تعالي يا عشق إحضرينا 

_ كنت بدور عليكي عشان أصحيكي

'ردت عليا شربات وقالت'

ـ كنتي هتصحيها ومش هتصحيني أكيد 

_ ليه يعني؟ أنا بهتم بيكو كلكو

ـ بمناسبة الجملة دي بقا إيدك معانا 

_ إستغلالية يا شربات 

ـ بتقولي حاجة؟

_ لا مفيش

'نعمة الله ضحكت علينا فـ قولت..'

_ كيكة علي الفطار! دا إيه النشاط دا

'ردت نعمة الله..'

-- دي تورتة عيد ميلاد سارة، بنجهزها عشان النهاردة الحفلة

'فكرت ثواني وبعدين قولت بـ تسرع'

_ يبقا أكيد إنتو إللي بعتوها في مشوار عشان تعرفو تجهزو براحتكو

ـ ناصحة ياختي

_ أكيد يا شربات

'كملت كلامها بـ إعتراض'

ـ شربات؟ ونعمة الله؟ ووديدة؟ حاف كدا

_ أومال أقولك إيه؟ يا عمة؟

ـ لا مش للدرجادي، قوليلي يا توتي

_ نعم ياختي!!

'فضلنا نضحك وإحنا بنجهز كل لوازم عيد الميلاد

وفي لمتنا دي حكولي حاجات كتير عن طفولة سارة 

قد إيه هي بتحب الحياة وعايزة تعيش حياة كلها باللون البينك من كتر ما هي دلوعة 

والوحيد إللي كان بيحققلها أمنياتها حتي لو معقدة 

كان حسام 

صديق طفولتها وبير أسرارها 

لدرجة نعمة الله بتقول: أنا معرفش حاجة عن بنتي قد حسام

لمست قد إيه علاقتهم كانت حلوة

بس سارة إللي معرفش مالها

حبت راشد بدل حسام إللي كان معاها في كل شبر من حياتها ومغامراتها ومشاكلها

عجيب الحب!!'

_ عندك فستان يا نغم يليق عليا؟

'بصتلي من فوق لتحت بعد ما وقفت قصادها وهي قاعدة علي مكتبها بتذاكر'

_ هو أنا بكلم نفسي

ـ عندي بس راشد هيدايق

_ راشد؟ مش فاهمة إيه دخله

ـ كل واحد أكيد بيغير علي الحاجة إللي بيحبها 

'رمت الجملة وقامت تجيبلي الفستان من الدولاب

فستان إسود، ضيق، مبين جسمي بس مش أوي 

عشانه منفوش سِنة من تحت

وفوق كل دا كان قصير حبة 

حبتين تلاتة بصراحة'

_ هو حلو وكل حاجة، بس مفيش غيره!

ـ خايفة منه

_ من مين

ـ راشد

'قعدت علي طرف السرير وأنا بقول بـ غيظ'

_ هو كل شوية راشد راشد، إنتي إيه حكايتك!

ـ إنتي مش شايفة إهتمامه بيكي عامل إزاي 

'ضحكت وهي بتكمل'

ـ مفيش حد فاهم الناس إللي هنا قدي

_ طيب وياست الفقيقة، طالما عارفة الظاهر والمتداري، إزاي متعرفيش إبن عمك محمد إختفي راح فيه، ولا إنتي فقيقة نص نص 

'سكتت شوية وبعدين قالت'

ـ مش كل الأسرار لازم تتعرف يا عشق

والسر دا بالذات لو إتعرف، فيها خلع رقاب

'ضميت حاجبي وأنا بقول بـ تأكيد'

_ يعني إنتي عارفة السر!

' بلعت ريقها وهي بتحاول تجمع كلمتين

فـ كررت جملتي بـ نبرة حادة أكتر'

_ يعني إنتي عارفة يا نغم ولا لا.. ردي عليا

ـ أنا...

الفصل السابع من هنا