رواية عشكت جنوبية الفصل السادس بقلم نسرين الاسدي
هنادي: چنه گاعدين ورا ما خلصنا العشى جاي نسولف سوة ...ليلى وحياة جاي يحلن الواجب وفهد نايم على رجل امي يگول مشتاگ انام بحضنج
وانا وهيثم ضحكنا عليه شكد ما يكبر يبقى يتصرف مثل الجهال
بابا بدى يحجي عن حياته قبل واحنة من جنه اطفال
انا وهيثم باوعنه لبعضنا واتفقنا
گال هيثم: بابا اريد اسألك سؤال بس تجاوبين الله عليك
بابا: وليش تحلفني هيثم اسأل واذا عندي جواب راح اگلك اياه
هيثم: زين بابا احنة نريد نعرف خوالي وعمامي ليش ما تقبلون تحجولنه عنهم انته وامي؟ !
بسرعة تغير لون بابا وحاول يتهرب من السؤال: هيثم عوف هذا الموضوع ..من يجي الوقت المناسب احجيلكم عنهم بس هسة سدوا السالفة
گلت انا: زين ليش بابا احنة صرنا كبار ولازم نعرفهم يعني احنه هسة حتى لو انشوفهم بالشارع ما راح نتعرف عليهم
گالت امي بعصبية: هيثم ، هنادي هاي شبيكم اليوم ليش من تشوفونه فرحانين تحبون تضوجونه مو گلكم ابوكم سدوا الموضوع سدوا يلا
شوية واندگ الباب حيل
احنه أگلوبنا انخطفت ياربي دخيلك منو هذا الي يجينه بهذا الوقت؟ !..وليش يدگ الباب هيج
گام هيثم ولحگه فهد عالسريع وبابا گام وراهم
احنه كل احنة التمينه يم امي ولبسنا حجاباتنا وعيونه عالباب
دخل واحد طويل بعمر مدير هيثم تقريبآ وجان مبين عليه ضايج
گال هيثم مباشرتآ: استاذ مروان ..اهلآ ..تفضل نورت
مروان: ان شاء الله غير مرة بس هسة اريدك تجي وياي الأستاذ ليث رايدك بموضوع
گال ابوي: خير ابني شمسوي هيثم؟ !..صاير شيء ؟!
مروان: لا عمو ما صاير شيء لا تخافون راح ناخذه بس الأستاذ يحجي وياه بموضوع ويرجع
خله هيثم وطلع وياه لحگه بابا
گله: ارجع بابا لا تخاف ترى انا كلشي مامسوي بس يمكن يحتاجني بشيء
**
ليث: دزيت مروان يجيبه واني ضليت بالمكتب مشتعل نار ماعرف هذا التصرف صح لو غلط بس كلام حازم صحيح هيثم الوحيد الي جان ويانه بالمكتب وشاف الرمز وهو صح دايمآ يدخل المكتب حتى ينضفه
خلصت اربع جكارات على ما وصلوا
دخل مروان وهيثم ورى وهو مستغرب
گال: تفضل أستاذ ..بشنو محتاجني
گعدت على الكرسي وگلت: هيثم ليش هاي لأن وثقت بيك وأمنتلك هيج تسوي؟ !
هيثم: ليش استاذ انا شسويت؟ !
گلت وعيوني صارن حمر من العصبية: ليش،تبوگني هيثم؟ !..هيج انته ترد الجميل لشخص يساعدك ويعطف عليك؟ !...جاوب
گال وهو ما مصدگ: استاذ فدوة اروحلك انته شجاي اتگول؟ !..انا ابوگك ..لا مستحيل اسويها استاذ احنه صدگ فقرة وماعدنا فلوس بس احنة مربايين زين ومتعلمين عالحرام والعيب ..والبوگ مو من شيمنه
ضربت الميز وعطت بيه: اني أگلك ضايعات مني 25 مليون والخزنة ومفتاح المكتب محد يعرفهن غيرك انته ..يعني شتتوقع مني.. هاا
گال: استاذ الله يخليك ترى لا تضلمني وتتهمني زور بيش ماتريدني احلفلك انا بريئ وما ماخذ اي شيء منك وعمري ما فكرت امد ايدي على شيء مو الي والله العضيم انا مو حرامي
مسحت وجهي بعصبية وصحت: هيثم اذا ماخذهن اعترف ووعد اني ماراح افضحك ولا اسجنك بس انته اعترف ولا تعبني وياك
هيثم وهو عيونة بالأرض: عفى عليك استاذ هيج انته متأكد انا الي ماخذهن؟ !..انا لو خذيتهن ارجعهن بدون ما تحجي لو تهدد بس،انا ما ماخذ منك شيء وروح لبيتنه واتأكد اذا لگيت بيه مية الف تعال عاتبني
مروان انكسر خاطرة عليه گال: ليث انا ما اعتقد هيثم هو الماخذهن
صحت عليه: انته لا تتدخل مروان ..اسمع هيثم انته تضل هنا ومروان يرجع لبيتكم ويفتشه تنبشونه نبش حتى الفراش والحديقة ما تخلون شيء لگيناهن خير على خير واذا لا باجر انته تنام بالسجن ..خلص الحجي
صاح: استاذ اسمعني الله يخليك ..استاذ وحق كلام الله انا ما ماخذ شيء ...استاذ
قفلت المكتب عليه وطلعنا اني ومروان وويانه اثنين حتى نفتش البيت
**
هنادي گعدنا متانين جية هيثم صارت الساعة فوك 12 وهو ماكو
ابوي وفهد ضلوا واكفين بالباب منتضرين هم ماكو دخلوا للبيت
سألت امي عالسريع: ها قاسم ما اجه الولد؟ !
جاوبها بابا وهو خايف: ماگو يا سمية ما اجه
شوية وندگ الباب ..
احنه فرحنه وگلنه بلگت هو رجع بس،طلع نفس الرجال الي خذاه رجع مرة ثانية احنه هنا زاد خوفنة
بابا: خير عمي شصاير ابني هيثم وين؟ !
مروان: عمو اني اعتذر بس ابنك هيثم ..ابنك ..ضل ساكت
شوية ودخل ورى هذا المدير الي اسمه ليث بدون لا سلام ولا كلام گال: ابنك حرامي يا ابو هيثم
احنه كل احنه انصدمنا وما صدگنه الي سمعنا شنو هيثم حرامي؟ ؟..شلون
بابا على گد الصدمة ضل ساكت مارد بشيء
طفر فهد وگال: انته شجاي تگول ..هاي ديربالك ترى مو شايف روحك سيارة وفلوس وحسبالك تگدر تحجي عن الناس بكيفك ..اخوي هذا يسواك اسمعني
هو مباشرتآ انگلبت عيونه حمر خله ايده بصدر فهد ودفعه حيل وصاح: اسمعني انته كلش زين مو اخوك يبوگني وانته تتجاوز عليه ترى والله والي اسمه الله اندمكم وخليكم تبجون دم
گال بابا: عمي رحمة للحسين فهمني السالفة شنو وابني هيثم وين؟ !
ليث بصياح: اكلك ابنك حرامي باگ خزنتي كلها واني جاي هنا حتى افتش بيتكم شبر شبر واذا اعترضتم راح اجيب الشرطة وخليها هي تفتش لهلسبب الأحسن الكم ترضون وتخلوني اشوف شغلي بدون دوخة وحجي زايد اني ما اريدلكم الفضايح
فهد راد يهجم عليه ويضربه وهو يصيح: گتلك اخوي مو حرامي
لزمه بابا وگال: اهدئ فهد ..اهدئ
اسمعني انته عمي ابني هيثم ما بايگ ولو اشوفه بعيوني هم ماراح اصدگ لأن انا مربية عدل واعرفه ما يسويها
بس اذا انته مقتنع هو البايگ گلي،شكد المبلغ وانا احاول ادبره الك
ليث: زين يلا سلمني ثلاثين مليون واني راح اعوف ابنك
احنة كل احنه شهگنه ما مصدكين ..منين يگدر بابا يجيب كل هاي الفلوس هو لو يشتغل ليل ونهار مستحيل يدبرهن وبسرعة هم منين اجتنا هاي المشكلة
ليث: ها عمو شو سكتت ..گتلك ماراح تگدر تجيبه
يلا دخلوا فتشوا البيت
صاح فهد: انته شنو حسبالك هي تايهة شنو تفتش البيت ..البيت بيه خواتي ومستحيل اخليكم تفتشونه
ليث: استغفرالله اني شكلت تردونها بدون فضايح خلونا نفتش والا اني راح اجيب الشرطة وعود انته أوگف بوجههم ساعتها
لزم بابا ايدين فهد وگال: انا گتلك ابني ما بايكك وماكو اي فلوس بالبيت بس اذا انته ما مصدك يلا فتش
دخل هذا صاحبة الي اسمه مروان ووياه اثنين وبقوا يفتشون بالبيت كله واحنة لبسنه عبينا ووكفنه يم امي الي جانت تبجي وتدعي ربي يعديها على خير ويرجعلنا هيثم
وانا بهذا الوقت شكد كرهت هذا المدير لأن شك بأخوي وقلل احترام بابا شكد واحد ما يستحي ولا يخاف الله
ليث: جانت العصبية عندي فول وما ضليت اشوف گدامي وابالي شيء واحد وبس اعرف هيثم صدگ هو الي ماخذ الفلوس لو لا
يمكن قسيت وياهم بس اذا صدگ هو مسويها يستاهلون اكثر
دخلت مروان والثنين الي وياه يفتشون البيت واني ضليت واگف بالباب واراقبهم
مروان ماگدر يكمل بس دخل للبيت شوية ورجع
گال: ليث الفلوس مو عدهم خلينا نطلع
گلت: لا لازم نتأكد اول
سكت ومبين عليه كلش ضاج من طريقتي بس اني ماعندي طريقة ثانية
جاي اباوع واجت عيوني عليها جانت لابسة حجاب وعباية ولافة نفسها بيها بس مبين بعيونها الخوف وبس ألتفتتلي وشفتني اباوع عليها عوجت حواجبها وباوعتلي بعيون كلها عصبية وكره واضح
اجو الشباب وگالوا : استاذ ما لگينه اي شيء
باوعولي ابوه واخوه وجنهم يگلولي مو كنالگ
بس اني ما گلت شيء وطلعت
گال ابوه: هسة اقتنعت ابني مو حرامي يلا رجعه
ابتسمت وگلت: اسف عمو بس ابنك مايطلع من السجن قبل لا يرجعن فلوسي
وخليتهم وطلعت
ثاني يوم الصبح قدمت بهيثم شكوى وانسجن وضلوا ابوه واخو يتوسلون حتى اطلعه واني بعدني مصر لازم اعرف فلوسي وين
مرت ثلث تيام واني ما اشوف مروان جان طول الوقت طالع وحتى كلامه قليل وياي واهل هيثم بعدهم يجون ويتواصلون وياي عالمودة
و اني راح اطلعه الهم بس بشرط
وية ما اني جاي افكر انفتح الباب ودخل مروان مرتاح وفرحان
گتله: ها مروان شنو خلص وقت الحزن؟ !
گعد مروان وگال: ليوثي اني اليوم كولش فرحان
تعجبت: فرحان وشنو المناسبة؟ !
مروان عرفت الحرامي الحقيقي وهيثم بريئ مثل ما گتلك
گلت: اها شلون ومنو هو بالله ؟!
مروان: حازم ..وعندي الدليل ..
ليث: احجيلي بالله
مروان: اذا انت ملاحظ اني صارلي ايام ما جاي اتواجد صح ..وانته اكيد اعتقدت اني كاضيها ويه البنات بس لا حبيبي اني جنت ادور دليل برائة هيثم والحرامي الحقيقي ..شكيت بتصرفات حازم وليش من ورا ما انت فتحت الخزنة گدامه انباگت ثاني يوم وهو مباشرتآ اتهم هيثم لأن جان موجود ويانه يعني لو هيثم ما جان موجود جان اتهمني اني منو يعرف
لهلسبب راقبته
ومرة من المرات جنت بالمكتب وهو دخل حتى يشوفني بس اني دخلت جوة الميز حتى اعرف شراح يسوي
واجاله اتصال عرفت من خلاله كلشي والدليل هذا التسجيل
"حازم: لك شتريد كل ساع مخابر ماتگلي؟ !
المتصل: شنو حازم اشدعوة عليك يابه اول مرة خليتني احلم بعيد وياك ولمن صارت الشغلة صدگ شو خذيت كلشي وفلتت
حازم: لك لا فلتت ولاشيء ..حصتك راح توصلك بس خل اسافر اول قبل لا يعرف ليث بالسالفة ويطلع هيثم منها وساعتها انروح اثنيناتنا بيها ..انا اليوم اجيت للمكتب حتى اتأكد ماكو شيء ضدنا وهسة خلصت شغلتي يلا انتضرني بس باجر وعگبه وتجيلك حصتك "
مروان: ها شفت؟ !
ضحكت بصوت عالي وصفگتله بيدي
هو استغرب وضل صافن
گال: خير ليث اني حاجيلك نكتة لو شنو؟ !
هديت شوية وگلت: لا حبيبي مروان كلامك صحيح مية بالمية
بس انا جنت اعرف هذا كله ورجعت الفلوس من حازم امس وهو بالمركز حاليآ
فتح مروان عيونه وهو مصدوم گال بصوت عالي: شنووو ؟!
ليث: اي حبيبي مثل ما سمعت اني عرفت حازم هو الحرامي وسجنته بعد ماخذة گتله غسل ولبس والفلوس عندي
گال: يعني هيثم طلع وهو ابيت اهله هسة؟ !
باوعتله صفح وگلت: لا ..بعدة بالسجن
صاح: زين ليييش؟ !
ضحكت وگتله: لأن راح اخذ مقابل طلعته شيء مهم وبية قيمة
مروان: ليث انته شبيك تعرف الناس حالتهم ضعيفة وما راح يگدرون ينطونك اي شيء لأن اصلآ ماعدهم شيء
گتله بهدوء: عدهم ...الحلوة هنادي ..هاي البنية دخلت لراسي ولازم احصل عليها عسى ما اضطريت ازوجها
