رواية ذاري النجوم الفصل السابع بقلم زهراء السراي
:
چان الخير وافر
والغثيث يضيع
بس من صفى الحاصل
شالك المرواح
بالزرع الچثير يشيه شوف العين
والنبتة الخبيثة تفوت عالفلاح
:
:
عذبة
✥━━━༺✦༻━━━✥
عن رسول الله عليه افضل سلام
واكمله
گال اعوذ بالله من قهر الرجال
القهر مو بس من تسلط الزلام بالظلم
شي على شي لا
القهر بمعنى ان الزلمة ينام مظلوم
ومقهور وهالشي عظيم
ويموت الزلمة بمچانه اذا انظام
وانظلم وانحط علي
نايمة على صدره وصدره ينهت بتعب
ونفسة ضايع وسألته
-شسووولك
-كل شي هين
واگدر انسى الا شي واااااحد
للموت ماانسى
-ماهان عليه ولا كسر خاطري
ولا هزم وكسر شخصيتي
الا دوسة أبن عمچ ببسطاله
على راسي
للمووووووووت ماانسى
وللموووووت ماافوتها اله
وثار السنة الانباگت من عمرررري
اطلعه من عيونه لو يبقى
يوم بعمرررررررري
فزيت گاعدة ردني لحضنه
-نامي على صدري تعبان عذبة
وبده يحچيلي الصار كلة
چنت بالولاية افتر اتسوگ
وراد للمدرسة اجيب جنطتي وارد
للبيت طبيت للمدرسة واسمع صوت
هوسة طلعت ووگفوني عسكر
وسألني واحد
-انت خزعل
بس رديت اي اجاني وويا ثلاثة جرجروني
وصعدوني سيارة حكومية
مشت بية لدرب السلف ودشو بيه للمركز
ساعة ساعتين انا مشمور بغرفة ظلمة
اجوني اثنين تولوني ضرب وانا مربط
اعترف مااعترف ماحچيت وما گلت شي
لأن ماعندي شي صدگ
مر اليوم بس تعذيب ثاني يوم نفس
الشي لحد ماملو مني بثالث يوم
بلا اكل بس ماي يطوني ويطلعون
سمعت صوت هوووسة وصياح
شويه وسمعت فتحة باب الزنزانة
وعيوني مربطة وصوت واضح قوي
عرفتة
-هاااااااه أستاذ خزعل منورنه اليووووم
مديت ايدي ادوره وينه
-هاجس لييييش معتقلني
-انچبببببببب جناب الضااااابط هاجس
سالم احچي عدل ياااعوج
-أنا مو أعووووج
-اعوج ونص كافر ملحد شيووووعي
-تعرف ذني كلهن موووووو بيه
سمعت صوت بسطاله يطگ بالگاع صار يمي
رفع العصبة من عيوني وصار گبالي
-لا بعدك انت ورررربعك تدور مناشير
وتجمعات وتظاهراااااااااات
-اتحداك تلگه شي عندي
واتحداك تجيب واحد يشهدلك بالتگوله
-اوووووه اذا عالشهود الدنيا مترووووسة شهود
-شهوووود باااااااطل غير
-ماغيرك انت الباطل معتدي غاصب لحق غيييييرك
بساعتها عرفت تهمتي هي انتِ وجاي يحاسبني
لأن صرتي الي مو اله سكتتت مارديت
وهو تسودن طلع وصوت صياحه ترس
المكان
-اروووووووح وارد باچر الگاه معتررررررف
لا اصلخكم بمكانه
شحچيلچ اسبوع تعذيب حتى
رووووحي راحت بس هيهات اطي بصحباني
ويتكتلون هم وعوايلهم
ثامن يوم ردلي بس شرد
مشتعل نار وشرار
اجاني گعد بصفي
-بعدك صامد تره ربعك كلهم وقعوا على بياض الانعدم انعدم والصار يشتغل ويانا صار أنت على شنو بايع يابطل وتورط الشباب
وياك بخلايا مقاومة
-أنت تعرف وأنا أعرف لا جنت بخلية ولا شلت سلاح أنا جنت ببيتي أقرأ كتاب وأگابل گاعي
ومريتي الجاي تگوله هي أوهام براسك بس
شاط بعد هالچلمتين ودفرني بكل قوتة
وطيحني للگاع
-عدو الثورة خاين شيوعي قاسموي سميها اليعجبك صار شهور على سحل زعيمكم بالإذاعة وماكو أحد يحميك مني بعدددد
عندك عشر دقايق لو توقع وتعيش
لو تنتهي هنا وما حد يعرفلك گبر
-اوقع على شي مامسوي
-وقع واخلص اعترف إنك جنت بخلية وإنك حرضت الناس على مقاومة السلطة بليلة ٨ شباط الموت جايك جايك بس التوقيع يخلصك من السلاسل
-الديرة گلها تشهد بهالليلة جنت ببيتي
حولت سواجي الماي لگاعي
-موووجود بالولاية تقووود المظاهرة
وحتى گبلها جنت ناشط لا تسوي روحك نبي الكل چانوا يمشون ورا أفكاركم المسمومة
أنت خنت البلد وتستحق السحل
-أنا ما خنت البلد بس أخذت اللي انت ما كدرت تاخذه
أنت ما جاي تحقق وياي كمتهم سياسي أنت جاي تنتقم من الشخص الغلبك وحط عليييك
جن جنونه شمر الهراوة على وجهي
-أنا ماانغلب انا هسه السلطة
انا الاقرر لو تعييييش لو تموت
-انت تدري شماسويت الببالك منتهي موووضوعه
ومهما سويت ومهما عذبتني اضل ثابت
مو انا اليهزني ريح عابر
-اسكت راح أدفنك هنا وما أخلي أثر لاسمك
اليوم تنتهي قصتك راح أكتب مقاومة سلطات وأنهي الموضوع بطلقة بين عيونك
-سووووويها ماعندي شي اخسرع
ومهرتي الاصيلة راح تعيش على اسمي
للموت خااااااااف عبالك تموتني
وتصير الك
ضحكت وهو تسودن
دفرني حيل طحت صفح وانا مربط تربط
وداس رااااااااسي ببسطااااله
گال حچايته حيل وفز من القهر
گمت ورا وهو يلوب بالحجرة
وگوة يمشي من التعب
-أناااااااا يهيني هااااااجس
-يرووووحلك فدوة
خززززعل فدوة لعيونك اهم شي رديتلي
بنيتك بعدني مامسميتها
عاينلي
-طلعت تشبهني هاي
-هنيالي بيها وبيك والله
سميها خزعل
-ريحانة على اسم امي
-انا هم چنت اگل لأخواتي خزعل يريد
يسميها ريحانة
باسهة وتململت بحضنه
-ريحانة گلبي يابوية كبرتي وانا مو يمچ
باسها وحضنها ورديتها للكاروك
-تعال نومني
ضحك ومشى حطني على صدره
غفيت ويا للظهر ماگعدنا
هو تعبان وانا مأمنة
خليته نايم وريحانة وياي
بالمطبخ ستوها تگعد تلعب
بلعابتها
-اااااخ ريحة الچاي المهيل مشتاگلها
-تعال سويتلك ريوگ
خليت الصينية وهو طب المطبخ
بس شافته ريحانة گامت تبچي
خافت
شالها يلاشيها يشمرهة فوگ ويلگفها
ضحكت وسكتت خلاها بحضنه
ياكل وعينه مني
-وجهچ ذبلان عذوبة
-خلصت روحي عليك ليل نهار اون
وابچي
-عمامي هم اجوچ
-لا والله بس مرة عمك الچبير أجت
وگال ليش الگاع يابسة انا ازرعها
گتله مادام راعي الحلال ماموجود
محد يلزم گاعه عاركني وراح
-شزرعتي
يعاينلي ويضحك
-زرعتها خضرة وحصدتها ووديتها
بيد رجل نعمة باعها للولاية
ورديت حرثتها
-انتِ
عاينلي متفاجئ
-لا وصيت حسين رجل نعمة جاب زلام حرثوها
الي
-وهسه
-هسة حاضرة شتسوي بيها سوي
جر راسي يبوسني وريحانة
فزت حضنتني
-ضايجة الدنيا بعيني عذبة
-خزعل
-بعد عيوني
-خل نشيل منا نروح للولاية
عاينلي ووگف عيونة ناطة
-أنا مو جبان
واهد مچاني لخاطر هاجس
-والله مو هيچ اگصد
-ماااطلع منا للموت خووووووش
ذب جگارته وداسها برجله ودش
للبيت رحتله متمدد عالقريولة
-خزعل
مارد علية گعدت بالگاع وگابلته
-ترد لدوامك بده
-رايح باچر واشوف شسوي
-ماتريدني شو داير وجهك وتحاچيني
لزم چفي وجرني بحضنه
-رادني الموووووت اذا مااريدچ
بس هذا عقلي يشتتتت اذا مااخذ حقي
من هاجس
-خزعل
-يابعد عيوني
-لا تذكر اسم احد ثاني بهذا البيت
ماكو غير اسمك ينذكر
انت زلمة هالبيت ورجاله
والغلط وياك هو الباطل
-تعاي ابوسچ على هذا اللسان المعسول
-اشاقيك اريدك تضحك
-نامي عذوبة نامي وارتاحي
-احلف بعد ماتهدني
-وروح اهلي مااهدچ
نمت وللعصر التمت الناس ماادري
شلون سمعت
بين چاي وماي ارتفع صوت عمامه
-شنهي بوووويه مخليلك حية رگطة هنا
-افااااااا ام ريحانة هاي
نط واحد منهم
-مسميها لأسم امك خيررر ان شاء الله
-بنيتي تستاهل اسم امي
-اسمع خزعل عيب من مرتك تلزم الگاع عنه
وودينه عليها طروش حتى سيد حبيب
اعتذرتله گالتله مااگدر اطيهم الگاع
وصاحبها غايب
-حقها ملكها وهي حرة بي
بس هي ادمية وماعاركتكم وردتكم
باللتي هي احسن
-گاعيش بووويه
-كلها الگاع والبيها ملكها هي
عله صوت عمامه وصاح
-بوية ام ريحانة تعاي
رديت من ورة الباب
-تامر ابو ريحانة
-ماكو غريب هنا بس اهلنا تعاي
دشيت بعباتي عتني من ايدي خلاني
حدر جناحه
-بويه عمامي ضايج خلگهم من حچايتچ
يگولون ماراضية يزرعون وانا مو موجود
-صدگ گلت هيچ
-يابه هاي گدامكم المرة اشترت مني
الگاع والبيها كلها هي والبيت وكل شي
وانا بعت بطيب خاطر
ماجت الربعة بحچيهم وهو اشرلي
-روحي بويه
طلعت وصياحهم گام صاح بيهم يسكتهم
- ١٠أشهر أنا غااااايب محد منكم طب
بيتي وبيدة گرصة خبز
ينشد على مرتي والبطنها بس من اجه
وكت المصلحة دگيتو بابها
وهي ردت الرد التستحقونا
-وتطيها گاع اجدادك
-رحمة لموتاك عمي الگاع چانت چولة
وابوي استصلح بيها لحد ماصارت
هيج واشتراها منكم واخذتو فلوسها
بعد طالبيني بطلابة
هاي صارلكم عمر بيها بيوتكم ومطيكم منها وصلة
تزرعون
-ماتستحي مالك ومحتالك بيد حرمة
-حرمة اصيلة صاينتني وتستاهل
-هاي تالية المدارس الزلم صارت حدر النسوان
راحت اصواتهم وخفت وهم يغلطون
طبيت علي الربعة گاعد مرتاح ومتربع
وبيده جگارة
-خزعل لو ماحاچيلهم
-طلعيلي هدوم لباچر انزل للولاية علمود الدوام
واخذچ وياي انتِ وريحانتي اشتريلها معاضد
-هههههههههه بعدها صغيرة عالمعاضد
-تتدلل وتلبس حتى حجول وخزامة
-ياااا خزعل صدگ تحچي
-چا اتشاقة امشي جيبيها يمي هنا
خل الاعبها
-لا هي تعلمت اخذها للگاع العصر تلعب
وتتونس ويه الطيور
-ياالله جيبيها
لبست ولبستها ومشينه للگاع مسويه
انا صريفة صغيرة
شعل خزعل الجمرية وگعدنا
وريحانة تفرفر تريد تلعب بالطيور
وهو گاعد وعينه منها
-اگلچ
-ها عيوني گول
-ماتخلينه نبني بيت چبير وحوش واسع
لجهالنا
ضحكت
-تريد بعد جهال
-اريد خمسة ولد وبس ريحانة
بيناتهم حتى تتدلل
-انا اريد بس ثلاثة كافي
-بعدچ صغيرة بس تكبر ريحانة
سويلنا جاهل بعد
-الله كريم اريدك انت هسه ترتاح
-مادام انتِ وبنيتي حواليه
ماعندي شي
والله ردينه للبيت وهالليلة
سهرناها للصبح انا وياه
يناغيني مثل جاهل وتغزل
بيع چنه حابني من سنين
صار الصبح وطلعنا مر بمدرسته
وگالوله تداوم باچر وطلع بينه للسوگ
اشترى لريحانة معاضد مثل ماگال
وتغدينه هناك وردينه
بليلتها اجو زلام اخواتي واخذو وياهم
مسوين گعدة عالشط وشاعلين جمرية
بالليل رد بس رد عيونه ينطن
شرار ماردت احاچي سكتت وهو
هم سكت خله ريحانة يلاعبها وبيدة كتاب
يقره بي ليغاد نامت ريحانة ورحت گعدت يمه
حطيت روحي بحضنه شال الكتاب حطة عالقريولة
-شبيك خزعل
-مابيه
-احچيلي ليش ضايج خلگك
-مااااااااااااااابيه
بعدني احچي واجاني
غطة متوني بعباته ولفني لف
-باردة عليچ
-گلبي مجمر
حط راسه على متني وباس رگبتي
-هاي انا شاعل جمرية بگلبچ هيچ
تعاي وياي للحجرة شو مشتهي اكل ورد
جوري
ضحك وضرب راسي براسه
-چا انتِ زعلتي مني
-لا مازعلانة بس انكسر خاطري من زمخت
بيه
-اروووح فدوة لخاطرچ
لفني وشالني ضحكت
طبينه للحجرة وگعد عالقريولة وانا بحضنه
يشاقيني
-هاي الممثلات بالسينما يشيلهن الممثل هيچ
-اتمنى اطب السينما
-افااااااا تتمنين وانا موجود
-يممممممه ننفضح بالولاية
شاورني
-شتگولين اخذچ لبغداد
-والله
-چا بغداد بعيدة هاي شمرة عصا
-يمتى تاخذنا
-هذا الخميس شتگولين واطببچ السينما التردينها
-ياااااااا وهاي انت طاگ الدرب چيف انا طلبت
اشوف السينما
-وانت شني گليلة عندي
-يعلي شانك
-وبعد
-ويخليك
-المن يخليني
-اليه ولبنيتك وتشوفها وتشوف خوانها وجهالهم
-ياااابة هيچ اصير شايب واشوفهم
لفني بحضنه ونساني الزعل
وسوالف الزعل
خزعل ماچان رجال جلف بحچاياته
چان كريم مايسوي الا الطيب
ومايحچي الا الطيب
مرن يومين واجه الخميس الظهر
مثل ماگالي حظرت هدومه وهدومي
وهدوم ريحانة وطلع بينه بالدرب
ماشيين وصلنه چفة الشارع حتى نطلع من الولاية
لدرب بغداد
مشينة مسافة وعله صوت چيلات
حييييل عالي
انا سمعت وصرخت ريحانة
چانت نايمة فزت
وتبچي التفتنه
فاتت منه سيارة الحكومة مال هاجس
يمشي وويا عسكر وجگارته بيدة ويضحك
وگف خزعل نزل راسه عالستيرن
وسكت ونفسه عااااالي ياساعة يطگ
ويموت من القهر
طاحت دموعي على حالة وگتله
-ردنة للبيت فدوة اروحلك
لا يصيرلك شي وانت تعبان هيچ
مسح وجهه وضحك وعاينلي
-افاااااا شني ماخذتلچ جاهل
امشششي اليوم اونسچ
طلع الدرب وهو يضحك ويسولف بس ادري
بي من وره گلبه
سرت السيارة بالدرب ريحانة تعاين وانا وياها
صار هواي مارايحة بدرب طويل
وگف من شافني روحي لعبت
-هاي لأن ماطالعة صار هواي
هاچ ماي بردي گلبچ
شربت ماي وارتاحيت شويه
وردينه طلعنا الدنيا غوربت والشمس صفرة
وحلوة والسيارة تمشي والهوا عذيبي
واول مرة أسمع صوت خزعل وهو يغني
أقول وقد ناحت بقربي حمامةٌ
أيا جارتا هـل تشعرين بحـــالي
معاذ الهوى ما ذقتِ طارقة النوى
ولا خطرتْ منــك الهمـــوم ببــــالِ
أتحمل محزون الفؤاد قوادم
على غصن نائي المسافة عالِ
أيا جارتا ما أنصف الدهر بيننا
تعالي أقاسمك الهمـــوم تعالـي
تعالي تري روحا لدي ضعيفة
تردد في جسـم يعــــذب بالـــي
أيضحك مأسور وتبكي طليقة
ويسكت محــــزون وينــدب ســالِ
لقد كنت أولى منك بالدمع مقلة
ولكن دمعـــي في الحـــوادث غــــالِ
جر الموال ويعانيلي
-خفت هالعيون
ضحكت ورد كمل
-ملثمة وسبني عيونچ ضامة
وجهچ ومطلعة ضيم الله علينه
-هاي انا
-چا أمي
-شو ماچنت اشوفك تعاينلي
-وانا هيچ ماافتهم واخليچ تدرين
-چا شلون تگول شفتچ توكلين البطات ونشدت
عليچ چنت مااعرفچ
-چذبت عليچ چا هو الچذب بفلوس
-يمممه العاشگ
-لا مو عاشگ بس اكو مرة تجي چانت
تحوش منچ خضرة وتردلي مرات اطيهة
المقسوم كل مرة تجيني انت مطيتها خضرة
ووردة رازقية چنت اسألها منيلچ تگول
من ام عيون الانجريزية
ضحكت وهو رد يسألني
-المرة وين راحت
-الله يذكرها بالخير ام رزاق
اخر مرة اجتني گالت راح
اشيل بوليدات ابني
للولاية واحد من الولاية مطيها
حجرة ببيتع تشتغل عدهم والويلادات
يرحون للمدارس
-سبعة ماعافتهم
-خطية ابنها وحيدها مرته من عرست عافتهم
-الله يبارك بيها ويعينها ويجازونها
ظلينه طول الدرب نسولف منا لمن
دشينة بغداد
ويه الليل شوارع حلوة وناس
اخذنا زرنا الكاظم وتعشينا وافترينه
من شافني تعبت شال ريحانة وطلعنا
-نعسنا ووين ننام
-بالفندق
صفنت علي هاي اول مرة راح اطب
فندق
ركبنا السيارة وهو يمشي الشوارع مضواية
والناس تتلامع
وگف يم فندق عالي قريت مكتوب
فندق بغداد
طب مدري شحچة وياهم
وشال الغراض وريحانة نامت
بيدي رضعتها بالسيارة
وصلنا الحجرة بيده مفتاح فتحه
دشيت شني هااااي الحلا
قريولة چبيرة وكنتور
وفرش حلو حطيت ريحانة
بالفراش وحللت هدومي
اكو حمام رحت غسلت وطلعت
ذبيت روحي بصف ريحانة ومادريت
بعد لتالي وكت ادين خزعل شالتني شيل
-عذوبة ماتگعدين تشوفين الجو الحلو
فتحت عيوني
-نعسانة
-دگعدي يفوتچ
گمت ويا يمشط شعري بيده ويعدل بي ردت احط
چفيتي على راسي
-شتسوين بيها
-يا خاف تشوفني العالم
-دمشي ياعالم
فتح الشباك وطاحت عيني على الماي
صليت عالنبي الهوا عذيبي
ولو بارد
-دجلة حلوة بكل حالاتها
بقينه نسولف شويه وطبينه
للحجرة وسوالف خزعل الماتخلص
وحچاياته الحلوة وغزله
الصبحية گعدنا وطلعنا ماخله مكان مافرنا
للظهر وطببنا للسينما
اول مرة بحياتي اتعجب بشي
بوكتها چان فيلم مصري اسمه حسن
ونعيمة
الممثلة سعاد حسني چنها وصلة من الگمر
وعيونها الوسيعة ورموشها التسحر
طلعنا وراها عالدرب للبيت بعد
ماحمل خزعل هدوم وغراض من اورزدي
باك النه انا وريحانة
وردينة للبيت تالي الليل
نمنا وشبعنا نوم
الصبح داوم خزعل وظليت انا
اعدل بالغراض لبست حلو من الثياب الجبتهن
الثوب من حلاته يتبارگ ويه الضوه
ازرگ فاتح وبي كلبدون فضة ودگم
ورهملي ويا قراصة بلونه
اندگ الباب عليه وفتحتة ودفعت الباب
مرت عم هاجس بيدها ماعون مرگ
بدون صلاة عالنبي
عاينتلي
-هذا منين ثوبچ
-عندي من زمان هلا بيچ
طبت للبيت تلتفت
-هاي ذكرتچ بماعون مرگ
-عاشت ايدچ
-دضوگي
-هسة متريگه مااگدر اكل شي
-چا تردين ايدي
-لا ليش اردچ بس روحي تلعب اذا اكل
هسه من يجي خزعل
اكل وياه
-يا ثوبچ اندمر مرگ
-مايخالف اغسله غسل
هي طلعت منا وانا ركضت فرغت الصحن
بالحديقة للدجاجات وانا منبهني خزعل مااكل من ايدهن شي
ساعة زمان وفارت بطني يمكن من الخوف
يمكن التفكير
علما اجه خزعل وانا لزمني
لعبان الروح استفرغت لمن مليت
وهو تسودن
-غير اعرف شبييييچ عذبة
شماااااااكله
-خزززززعل راح اموووووت فدوة
ما جذب خبر حطني بالسيارة وصل ريحانة لأخواتي وطلع بيه
يمشي بسرعة وانا كل شويه اوگفه استفرغ
وأرد
لمن مشاني خزعل ودشينا المستشفى
من واحد لواحد كاللهم احنه باالريف
گالو خاف ماكله اكل مكشوف گتلهم لا
وهو عينه مني بس يريدني احچي
اخر شي گتلهم
-ناس جابولنه اكلة واكلت
-خاف مرشوشة كيمياويات مكافحة
عاينلي خزعل وظل عينه من حلگي
يريد يعرف
مدري شسوو ووعلگو بديه وحطولي
صوندة من حلگي لبطني
خلوني اشتعل واطفى واستفرغ
لحد ماجروها وخلوني على قريولة ومعلگ
بيدي الدوة وريحانة بالي يمها خزعل خلاها
عد نعمة لليل يلا صرت زينة اطوني دوة ورد بيه
للبيت طول الدرب ساندني على متنه
وصلنا البيت وراح جاب ريحانة طاگة من البچي
ونعمة وسنية وياها
گعدن من شافني زينة راحن لبيوتهن
بس رضعت ريحانة ونامت
تمدد يمي وحط عينه بعيني
-من اخواتي
-سألتهن گالن ماموديات اكل
سكتت ماحچيت وهو يحوم حواليه
بس يريد مني نشد ثاني يوم بالليل هو
گايم بواجبنا انا وريحانة بس نومتها
گعد گبالي ولزم چفوف ايديه
-عذبة الاكل من بيوت عمامي
مووووووو
-فدووووة خزعل ماصار شي بس اسمعني
سورة روحه هادي وسمعني
-هديت وراح اسمعچ شصار
حچيتلة الصار وانا مچلبة بچفوف ايدي
بس كملت وگف روحة شاطت عاين للكنتور طلع سلاحه وركض وانا كوه ركضت ورا مالحگت بي
ركضت لعباتي لبستها واعاين الزلام طلعت تهدي
بي وهو يصيح
-تسمممون عاااااااايلتي
طلعو عمامه يتصايحون وياع
وصارت هووووسة لهناك وعله صوت
سيارات الحكومة وصوت الچيلات العالي
من شاف السيارة عت ايدي عت خلاني ورا ومشى
بيه وهو يصيح
-ماخلصت لحد ليجاي
رادلكم والله لو ميتة مرتي
لو بتي احرگكم عن بكرة أبيكم
مشينه خطوات وصوت هاجس رن بالمچان
-اوگف
-عايلتي انا گادر احميها
-مسممين بت عمي انت بطررررران حچيك
وحچيهم يصير وياي
-مالك كار بعايلتي انا احلها
دفعني خزعل للحوش ورد طلع
وهاجس يرعد
-شني ولاية تايهة مابيها حكومة
صاح واحد من ولد عم خزعل
-جنابك جذب وباطل محد واصل بابه
صاحله خزعل
-خضير انچب امك جايبه اكل والمرة طاحت
عليييييه
صاح هاجس
-اهلي انا اتصافى وياهم
-الشغلة مووووو يمك يم الحكومة لا تحط
رووووحك بالنص
صاح هاجس وصوت الصياح عالي من بيت عمام خزعل طب للحوش يحوووم ادري بي هم من هاجس
ومن الصار
عاينلي ارجف گوه واگفة
-تعااااااي لو ميتة ربحي بيمن
-فدوة ماااريدك تتخارب وياهم
-يردون يحرگون گلبي بيچ تسودنو لو ماكلة
ريحانة من هذا الاكل
-مو گتلك مرت عمك شربتني بيدها بالگوة
وحتى دمرت ثيابي انا من گتلي بليلة عرسنا
ليومك اببببد مايجيبن شي الا اذبه بالماي لو
للدجاجات
-الدجاجات
گال الحچاية وفز يركض صار يوم احنة ماواصليلهن
رحت ورا بس فتح باب الحديقة لگيناهن مجطلات
بالثيلة حط خزعل ايده على راسه
ودار وجهه علي
حضني ويحمد الله
-عايني الدجاج كله مااااات لو ماكلتها كلها
چان متي
-راحن كلهن
بچيت وهو يسكتني
-فدوة الچ ولريحانة
اجيبلچ مية غيرهن لا تبچين
مشيت عبالي راح يجي وراي طول طلعت ورا
الحديقة فارغة من الدجاج ركضت برة اعاين
سفطهن بباب بيت عمه وصاح
-سمكم كتل الحيوانات ياچلاب
طلعت مرت عمهم تغلط وتصيح
مارد عليها خله ورد للبيت
لثاني يوم راح للمركز تنازل عنهم
وصار كل شي رغم كرها لهاجس
صار كدام هاجس تعهدو مايسوون
شي ويشيلون من گاعه خلال ايام
رد للبيت ضايج خلگه چيف هاجس صار
طرف بالسالفة بس ارتاح باله
وبيومين لمو رواحهم وطلعو من البيوت
وفرغت ماچذب خبر اجر زلام
طيحو البيوت للگاع
وحرثها وگال يبدي يحط اساس للبيت الجديد
وشويه شويه يبني ويسوي بيت چبير
ومشت الأيام وگربت ريحانة من السنة
ومرتاحين ماعدنا شي خزعل مدللنا
وريحانة مدللة مثل الوحيد الاجه
على كبر من اگله شبيك هيچ مدللها
يگلي اعوضها فراگ ست اشهر من عمرها
وره العطلة وردة الدوام
اسبوعين مرن بس وبيوم خزعل
تأخر عليه باالردة طلعت برة اتاني
شهگت وانا اشوف سيارته مضروبة من الصفحة
بس شني وجهة مرتاح ويضحك ولا عبالك
مضروب وصل وعاينلي
-عليمن وجهچ مخطوف المهم العاااافية تعااااي
بعد رووووحي
-شصاااار
-ماصار شي واحد مسودن تناطح وياي بسيارته
ومااطيته فكة حصرته لأن مثل الچلب يعوي
طاح بالنهر هو وسيارته
-خزعل هذا مايسكت
سيارة عسكر هاي خاف يحاسبونك
-لا سيارتة الخاصة
يبووووو يبوووو تصخمت وتعزيت
لليل وانا گلبي لاسبني اجتني
نعمة تهف كالت من ضارب السيارة كاسر خشم
هاجس ومطيحه بالماي
بقيت يومين احوم علي من يطلع لدوامه
اكل بروحي اكل لحد مايرد
وهاجس ماچذب خبر مامر اسبوع
وخزعل مارد للبيت بس لگو سيارته مكسرة
على چفة الشارع ملخت رووووحي گلت كتله
راحو زلم اخواتي ينشدون علي گايللهم ماادري
وينه مو يمي
اليوم يمر والثاني والثالث وكملنا العشر
أيام ظهرية گاعدة بالحوش ايدي على خدي
واندگ الباب فتحته وطب خزعل
مابي شي بس هدومه وصخة وتعبان
ابددد ماحچة وياي ولا چلمة مشيت ورا
للبيت
-خزعل شصااااار ووووين چنت
ولا رد ولا حاچاني طلع هدوم لروحه
وراح يسبح تانيته بالباب طلع من الحمام
نشف راسه وجرله مندر من النضد وطلع
للربعة رحت وراه
-خززززززعل شمالك راح اتسودن
شني غاااايب ١٠ أيام وشني ماتحچي
وگف وگفة عتني حيل ودفعني انطگيت
بالحايط وصلي دفعني بره الربعة
وطبگ الباب على روحه
بساعتها هجست كلبي تفطر وتفسر وصلة
وصلة
لا اگدر ارد علي وانشده كرامتي انداست دوس
ولا اگدر ابلع السوا بيه ودفعني
رحت للحجرة تمددت بقريولتي بنيتي
نايمة
ظليت اجيب واودي وعقلي يقره
ويكتب
شصار وشجرة على خزعل وهيچ
تسودن عليه
ماخليت ببالي غير هاجس هو السجنه
وهانه مثل ذيچ المرة ماكو غيرها
للمغرب بعدة نايم
دفعت الباب حطيت ريحانة بصفه عالفراش
طگته على وجهه گعد خلاها بحضنه وانا ماحچيت
شي
طلعت وعفتهم سويت عشه
حطيت الاكل بالطبگ وخليته گدام خزعل
گعد گعدة ياكل خليت يمه ماي
ورديت للحجرة اصلي صليت وبنص صلاتي
روحي لعبت عفت صلاتي وركضت للحمام
أستفرغ ريحة الاكل گلبت بطني
اعاينله مد راسه من الربعة يشوف شكو
بس شافني رديت للحجرة طب للربعة
شويه وجاب ريحانة يمي ارضعها
رضعتها وظلت تلعب ويا
وهو بالگاع حاطلة مخاد وگاعد
وانا عالقريولة روحي طلعت من القهر
رديت لنفس الحالة لعبت روحي وطلعت
للحمام هم استفرغت
لگيتة واگف بباب الحمام عبالي
علمودي ماحاچاني عافني
ودش وراي شوية ورد طلعله كتاب
يقره بي
وهو ممدد بالگاع
-گوم نام عالقريولة اذا تريد انا انام بالگاع
ماحچة بس اشرلي بيده لا
ورد لكتابة
انا هم شانت عليه روحي طلعت
برة للحوش وياي الفانوس
گعدت اشيل واحط واعدل رديت
للمطبخ انظف لهناك رديت للحجرة
هو نايم وريحانة نايمة
الصبح فزيت على صوت الكنتور يفتحه
گمت
-تريگ وانا اطلعلك هدومك
مارد بس عت الهدوم مني وطلع لبس واخذ
جنطته وراح اعاين يتمشى سديت الباب
ورا
رديت انام ويه بتي ماگدرررت روحي
طالعة والقهر موتني شبيييي وشجا
للظهر رد وويا رجل نعمة
تغدو سوه ووراح
وانا افتر غسلت هدومه سويتله چاي
مارضى يشرب راح صب لروحه
بلعت الغصات وسكتت واليوم جر
اسبوع اليشوفنه يگول ذول غربة
يگوم ويگعد ابدددد حرف واحد
مايحاچيني من القهر
شلت فراش للربعة واخذت
كاروك ريحانة ونمت هناك هو
برة يرد تالي الليل شارد مايريد يواجهني
يمكن
سمعت صوت الباب اندگ فتحته
اله طب للحوش وانا رحت للربعة
عاين لفراشي
وريحانة نايمة ماگال شي بس شال الكاروك
هو وريحانة نايمة بي ورد للحجرة
عاد انا شبعت بچي
خانگة روحي خنگ ومااطلع صوت
من هجست روحي راحت مددت
بالفراش وغمضت مااريد اسوي شي
بس تمنيت الموت وكتها وين اهلي
هذا الوحيد الطلعت بي من هالدنيا
الزلمة العوضني وسندني وحبني
هيچ تغير عليه هسه لو يگلي شبي
اعذره
يسمعني مريضة استفرغ وارد للربعة
ولا يطلع
غفيت بتعب هجست تالي الليل ايدة
تدغ بية بمتني
-انا باچر رايحة لأخواتي مادام
نفسي ثگيل عليك بهالبيت
التفتلي وحط عينه بعيني
وبساعتها لو راميني بچيلة بنص گلبي
ولا حاچي هالچلمة
-عليمن رايحة ببيوت الغربة
روحي لبيت ابن عمج
دار وجهه حتى يطلع وصحتله
-العندك گولة خزعل أنا گلبي خلصان
وروحي لايبه عالموت على ساعة
تلگاني طاگة وميتة
-اييييه نسولف شورانة
ارضع بريحانة ونامت بحضني حطيتها عالفراش
وهو عتني عت
طلعت وياه للحجرة مالتنا دفعني سد الباب
وباوع لرگبتي
عندي بظهري نساوة مطشرة ناعمة وداگتها
دگ اسود مثل النجم
بس عاينها دفعني حيل عالقريولة
طلعلي ثوب وذبه على وجهي وضحك
-مگلبچ تگلب ذاك الچلب
گوة طلعت الچلمة من شفافي
وانا أبچي
-ياهوو انت شتگول
-هاااااااااااااااااااااااجس
گالها وهو يرجف وضربني حيل رديت
طحت بفراشي
لميت روحي لم گوه وانا ارجف وأعاينله
-شصار احچي وبعدها شتسوي سوي
أنا هم مستغنية مادام طگيتني بدون
ماادري شمسويه
-مارحتله مسيرة
رحت حتى اشوفك وينك
ظالة لوحيدي ادور
لا عمامك يدورن
ولا ولدهم ولا زلام السلف
-شسوووووالچ من رحتيله
-گول أنا شسويتله هزيت شواربه
هز انت ماماخذ فرخة جاهلة
انت ماخذ مرة بوجودك مرة وبغيبتك
زلمة
گعد ومغطي وجهه بيده
-خززززعل انا مااحمل جفا
انا تعبانة ووحيدة
احچيلي ليش تقهرني
بچلماتك
-بعده گلبچ هناك يم الضابط ابو نجماااات
الوااااعدچ يجيبلچ النجم وتالي
عافچ
-أنا شسووووويت بس فهمني
تنفس بحيل صدره ورد
-انتِ ماسويتي هسه
انتِ سويتي گبل
-أنا شمسويه گبل
-اطيتي روحچ لهاجس وعيرني بيچ
شهگت ولطمت على وجهي ضحك هو
-ها انكشفتي
-انكششششفت شلوووون رضيت
تگولها شلون هنت عليك
گرب مني وحط وجهه بوجهي
وحچه بصوت تعبان
-انا ماگلت شي هو الگال
وحچالي
گعد گبالي وحط عينه بعيني وگعد
يحچيلي الصار اول مااخذو لحد مارد
وانا دموعي تصب مدري علي مدري عليه
مدري من سوايه هاجس
-طالع عالشارع للدوام ووگفتني سيارة
عسكر عرفتهم جماعته حطو علي ربطوني
بعد ما حاوطوني خمسة عبالي ياخذوني
للمركز بس طلعو بيه للولاية ومن مكان لمكان
يفترون لحد ماوگفو يم بيت تعبان
نزلوني فتحو الباب دخلوني بغرفة
وذبوني وانا مربط وطلعو قفلو البيبان
نهار كامل ولليل وحدي ماكو احد
بنص الليل على ضوة فانوس
وصوته المكروه عله وهو يصيح
-انا مو گلت البيت يظل ظلام
المن مخلين فانوس هنا
نزل وگابلني عت الوصلة من حلگي
وعدل گعدتي
-شني معتقلني
-لا لا شوف جايك بلبس المدني
شمعتقل منك هاي ضياااااااافة
گال الكلمة وطيحني ببوكس على وجهي
ارتديت ليوره ورديت گعدت
-اذا انت زلمة فك ايديه وخل نتواجه
-الادري أنا زلمة وانشد عذبة
تدررررري
نار شبت بضلوعي اريد بس اوووگف ويفتحلي
ايديه
-لا تجيب طاااااااري مرتي على لسانك يااااااعار
-هههههههههههههههههه العار الماخذ مرة
جانت ملفوفة بحضن ثاني
-تخسسسسى والله تخسى تجيب طاريها ياسگط
-مااااااجيب طاريها بعاطل جاي احچي
الصدگ لا تنسى هي چانت مرتي
-گطعان مهر ونزعتك نزعة النعال
لأنك سگط ماتحوي هيچ وردة
-ايييييييه حوووويت ودااااعتك
انا الفلاااااح وانا الحاصود
گال حجايته وغمزلي گعد على قريولة مكسرة بالحجرة
وحاط جگارته بطرف شفته
-اييييي خزعل انت تشوف طيحتي انا وسيارتي
بالماي كافية حتى تاخذ ثار السنة سجن
-هاي عندي مثل شربة الماي
بس سولفلي عليك وانت مسجون
وانا متونس بعيون عذوبة وهي تجيني
للمركز
حركت روحي اريد اگومله واگطعه بسنوني
طلع بره ورد ذبلي سچين بالگاع
-افتح روحك يلا
حاولت ردت ماكو مربطيني ربطة
كافرة
عاينلي
-ضيعت فرصتك يالله أنا اترخص ورادلك باچر
طلع وانا التمتت علي من كل صوب
صورتچ تروح وترد ببالي وانت مگابلته
ومحلله ضفيرتچ
هذا الليل المر مانمت
غفلت عيني الفجر ونمت بس گعدت على
طشة الماي بوجهي وصوته
فك رجليه وايديه ووگفت گوه الدم ملتم بيهن لم
مشيت الباب مفتوح
اكو حمام طبيت وطلعت
هو واگف بباب الحجرة يدخن
عاينلي
-تعال تريگ سالفتنا مطولة انا وعذبة گضينه سون
الف ليلة وليلة
هو گال هيچ وانا رحتلة ركض
صارت طگة اله وطگة الي لحد ماطگني كلة
بين عيوني وطحت نام عليه نيوم
وكلبچ ايديه بالكلبچات
جاب الاكل ويدحس اللگمة بحلگي
وانا اتفلها
-مااسممك لا تخاف راح اسممك بغير شي
گام وشغل جگارة ثانية
وراها بدت عشر ايام عذاب لو ذابحني
ولا حاچيلي لو مگطعني وصل ولا مسوي بيه هيچ
بداهة بعذاب للمووت ماانسى
الليلة الاولى
گابلني حط عينه بعيني ويدخن ويتبوسم ويحچي
وعيونه غايصة بلذة
-شني خزعل شحجيلك
عنها ماااااوفي ولا اكفي ريحتها الطيبة التفوح
تظنها ريحتها الصدگ
لا يا مسكين هذا عطري انا
أنا الچنت أطش الرازقي
على مخدتها لحد ما تضيع ريحة الورد بريحة نحرها
جانت تغمض من احضنها
تگول بس ريحة نفسك تخليني أنام
هسة من تشمها تدري شجاي تشم
جاي تشم بقايا نفسي الطشيته عليها
شعباااااااالك ولك تاخذ حاجتي بسهولة واسكتلك
لا والله لا اجرعك المووووت غصة غصة
ذب گطف الجگارة يمي وراح
انا اغمض بعيوني حييييل بس اريد اطلع
صورة خيالچ وانت تحضنينه من راسه
بس مااگدر
لليل اجاني واحد من جماعته يحط الاكل بحلكي
ويشربني ماي ياخذني للحمام ويردني
للحجرة
الليل يمر بعذاب وحروفه تحفر بروحي حفر
الليلة الثانية
رد وبيده جگاير شعل وحدة خلاها
بحلگي وصار گبالي
-هاااااا شلونك اليوم
-اييييييه اييييه اسمع الجاي
يگولون الشامة زينة
بس شامات عذبة البظهرها
هاي مو زينة هاي ختمي انا
هنة شامات خفاف ودگيتهن الها بيدي
روووووح وانشدها وشووووفهن مدگوگات دگ اسوووود بس انشدك صدگ
هم تضحك من تلزمها
هم تگلك لاتلزم شاماتي اغار
تدرررري انا رسمت هالشامات بيدي
مثل بنات نعش حاوطتهن
اعرف ملمسهن اكثر من ملمس وجهي
وگف من شافني انطحرت من القهر صار گبالي
-بكييييفك تريد تصدگ تريد لا بس عذبة بأسمي
وراح تضل بأسمي لو تاخد عشر زلم
يلة في امان الله اكل لا تطيح علينه وراك
ردة لبنيتي ريحانة …… اگصد بنيتك ريحانة
اشتعلت نار لاحت ضلووووعي ومردت افادي مرد
استفرغت كل شي تمنيت لو مستفرغ گلبي
الحبچ وماحصل بس الغدرررر
الليلة الثالثة
طب علية وبيده چفية حرير موردة
لافها على رگبته ويتفاخر
-اييييه خزعل اليووووم جايك بسالفة
مشالي وصار وراي كض ايدي وضحك
-باوع لأيديك ناعمة يالمعلم ياالشيوعي
عذبة چانت تحب خشونة إيدي وهي تمشي على باطن چفها چنت أحسب خطوط إيدها خط بخط
وأگلها هذا الخط يوصل لگلبي
وهذا الخط يربطني بيچ للأبد تظنها هسه من تلزم إيدك الناعمة تأمن
هي جاي تدور على ذاك الچف الخشن اللي ضيعتة
بسسسسس ملحوگة رادها اليه رادها
راسي يدور بي مثل صوت مكينة السيارة
ينفح نفح الدنيا اظلمت بعيني وبلحظة
خشمي طگ دم دمر هدووووومي
وهو يعاينلي
-هيچ القهر يكتل يلا ضوگ الضگته انا من لگيتك
ماخذها
-اطلع عار عالزلم اذا ماكتلتك
-انت عارهم يلا خوووويييي اروح انا
رادلك باچر هاي اذا مالگيتك طاگ وميت
ظل الدم ينفح وراسي افتر وطحت
ساعة والعسكري اجاني اخذني اغسل
وردني لمكاني
فاتح عيوني اعاين للحايط حتى مااتخايل
اليحچي عنچ وعنه
الليلة الرابعة
-غير هدومه هذا ضيفي ورا ٦ ايام يلا تخلص
ضيافته ماااااريدة يگول هاجس ماضايفني
لبسني العسكري القميص وغسلي وجهي
وانا عيني منة ماااريد اسمع اليگوله بس هو
عار بس طلع العسكري گابلني
-هااااااه بشرني مستعد تسمع الباقي
-احچي والحساب يجمع احچي وشوف تاليتك على ايدي
-احچي لييييش مااحچي
خل اگلك شغلة ماتعرفها عن ضحكتها
سمعت ضحكتها وهي وياك
أكيد جانت ضحكة تضحكها بمستحى
بس أنا سمعت صهيل روحها
چانت من تذوب بين إيدي
تطلع منها ونة تخلي الحجر يلين
هذيچ الونة هذاك الصوت
هذني بس لهاجسسسس
ونة اللذة الي و أنت إلك بس السكتة والروح
الباردة
يلة انا اعووووووفك هسه عندي شغل
اليوم شفتها تتمشى لبيوت اخواتها اروح
الهم انا اريد اشوف بنيتي
اوووووه بنيتك بنيتك اشوفها وارد
راح وانا الادري بريحانة تشبهني وتشبه
امي صارت تتخايلي تشبهه هو تشبه عيونة
وملامحة زرع بذرة شيطانه براسي
صرت اضرب راسي بالحايط
حتى ارجع اتذكر ملامح بنيتي متخييييله
الشيطان شسوووووه بيه
الليلة الخامسة
طب وهو يسولف ويه العسكري
-اييييه مثل ماوصيتك توصل المسواگ
لبيت استاذ خزعل مثل ماگتلك
وذيچ الشغلة حطها بيد مرته
غمز للعسكري وانا وگفت
-اگلك اكتلني اذا تررررريد لو تخليني اروووووح
-لا لا سالفتنا ماخلصت شني تعبت
شوووو انا ماتعبان اگعد خل اسولفلك سالفة
مارديت ونشدته هو رد ويضحك
-تدري انت اكو مكان حدر خصرها بي أثر
جرح هذا اثر انا رسمتها الها بخنجر حتى يظل علامة
خصرها الچان ينطوي بين إيدي مثل العجين
قطعة طين حر ناعم
وأنا نحتتها انا الأعرف وين أضغط ووين أرخي لحد ما يطلع نفسها بونين مثل الطير المذبوح
-هاااااااااجس موووووتك على ايدي حل اييييييدي اگلك والله والله اكلك بسنووووووني والله
تقدم ضحك بوجهي وانا رفعت روحي رگعته
بحنچه انشك وسال الدم
مد ايده طلع چفية مطرزة نكتها بيها اسمچ
-بس اسمها يشفي العليل
تعبت اصابعها الناعمة وهي تطرزه
طلع ورديت للدم خشمي صار مثل النهر يتجاره
وراسي ينفخ من الوجع
العسكري يفتر يجيب اكل يغسلي
وانا ساكت مثل النازل علي سهم من السما مسكتة
بس روحي تحچي وتسأل وتجاوب
الليلة السادسة
اجاني بالليل بيده الفانوس نفخ علي وطفه ناره
مااسمع بس حسه
-تدري خزعل الظلام يردني لذيچ الايام من تنام العيون انا اروحلها اناغي نحرها الابيض
وأسمع دگات گلبها وهي تصهل مثل خيل جامح
تسابق الريح
چانت تحچي بذني هاجس لا تترك أثر
بس أنا چنت أتعمد أترك أثري عليها حتى الدنيا
كلها تعرف هي تابعتلي
چانت تنطرني حدر السدرة والليل وظلامه
مطرز بنجوم اول ماتشوفني تذب روحها
بحضني ياما وياما غشيتها بعباتي
ومردت ضلوعها مرد بحضني
تظن ايدك الراخية يالفاهي تكفيها
عذبة فرس جامح تريد خيال كلف
ضل الليل كله يمي الفجر طلع
وانا ساكت ضاع مني الحچي
ماظل شي الچ براسي حضنچ الاحبه
كرهته وكرهت وجهچ وملامحچ بسبب وصفه
-هذااااااا اطتنيا گبل لا تخطبها
بعدني لهسه ماانام اذا مااخلي على وجهي
-أنا أدري بحچيك چذب ولا حسبالك
هذا حچيك يغيرني على مريتي
بس وداعة ابووووي اندمك عالكلام
حرف حرررررف بس اوگف وشووووف
-چذب عاين بعيونها زين
تلمح ذيج النظررة تظنها حب لا
هذا خوف منك لا تشوفني بنص عيونها
أنا الشفت عيونها وهي تغيب بوسط اللذة
شفتها وهي تنكسر وتستسلم
عيون عذبة كتاب وأنا الوحيد القريت الصفحات الهسه تريد تشگگها علمودك
-دحل ايديه ونشوووووووف الفاااااااهي يااااااهووووو
- شوووووف عبالك خايف منك ورابطك لا والله
بس اريدك هيچ گاعد مثل الحباب وتسمعني
وانا احچيلك عني وعنها
طلع وانا عزمت امرررري اكتله بس خل يجي
الليلة الثامنة
اجاني بالنهار بيده تفاحة
يكصگص بيهة بالحربة العنده
خلة شيف بحلگي وگعد گبالي
-ترفة هالتفاحة وناعمة اشتهيتها الك تاكلها وياي
تدري گبل چنت اطعمها التفاحة من حلگي
ردت بطني وغمضت عيوني وصحت بحس عالي
-اسكتتتتتتتتت والله ورووووح اهلي لا اترس حلگك رصاااااااص انت بس حل ايديه
ضحك بصوت عالي وكمل
-يگولون جلد النسوان مخلوق من الحرير
بس أنا أگول جلدها مخلوق من نار
نار چانت تحرگني وأحرگها
چنت من أمشي چفي على طول ذراعها
اهجس جلدها يكزبر هسه من تلزمها انت تحس ببرد مووووو لأن الروح والحرارة بقت هنا يمي
اشر على صدره وطلع وقفل ورا الباب
والعسكري جاب الاكل دفرته وطيحته
علي اررررريد بس افرررر واجيچ انشدچ
ماااااادري ماااادري شريد
الليلة التاسعة
طب الحجرة وبيده چيس حرير ابيض يتلامع
حل الچيس وطلع خصل شعر
-خل اسولفلك سالفة هذا الشعر
شووووف شعرها هذا گصته
وخلتة عندي گبل لا تاخذك
تدري چم مرة التف على رگبتي
چم مرة غطى وجوهنا واحنا بغير دنيا
هسة من تمشط شعرها بكل خصلة تمر بيديها
اكو طيف لأيدي وهي تضفره
عايييين صغتله لشعرها المگصوص چيس حرير
وطرزته بكلبدون ذهب عذبة مايرهملها بس الدلال
وطلع والليل صار مثل ملح ينذب على جروحي
الليلة العاشرة
طب الصبح يعاين لوجهي
وچنة يگول حصلت الاريده وكسرتك
عاينلي وتبوسم وانا هم ضحكت وگتلة
-تعررررف بروحك شجاي تسوي
-لا مااعرف انت عرفني بالله
-جاي تعالج كرامتك الكسرتها بت عمك
حدر رجليها واخذتني وخلتك مثل چلب تعوي بدار شالو منها اهلها وخلووو
هذا انت چلبببببببب ذبتك بت عمك
ولك شعبالك انسسسسى مرحوم ابوك من اجاني
وگالي يگولون اخطب لبتك ولا تخطب لأبنك
انا عندي الك مهرة اصيلة ورضيتك الها خيال
ولك ياعار لو ابوك شايفك كفو چان عرسلك عليها
حتى لو عندك عشر نسوان
بس شافك مو كفو الها وشافني انا
قرينها شتسوي سوي حچيك هذا ادوسة
حدر نعالي انا ومرتي ونتعدى نحسبه وصخ
ودسنا ومشينه خووووووش
فز يرجف وعيونه طگت نار واجاني گابلني
-احچيلك شصااااار بالتفصييييل شترررريد گول
وانا حاضر
غمضت عيوني وعرفتة راح يكسرني بآخر
چلماتة حتى ياخذ حقه
-هههههههههههههههههه ليش مغمض عيونك خايف تسمع الصار ترى السويته وياها بليالي زمان
ما يسوي بس خيال الكحيلة
أنت تعرف خصرها شگد ترف أنا الچنت أحاوطة بأيديه الثنين لحد ما ينگطع نفسها
چنت اهجسها تذوب جوه أصابعي مثل الزبد
چنت انثر نفسي شبر شبر على جلدها وأشم ريحتها الچانت تطلع من كتارها مثل البخور
درت وجهي وانا أحاول أشغل راسي
بأي شي غير صورتج وانتِ حدر أدي
ويسوي بيج اليگوله لكنه شيطان رد
ردود يفصلج تفصال
-صدرها ذاك التظن روحك انت الحويت رمانة
الريان أنا الحصدته بشفافي
جنت أغرگ بياضها بسماري وأترك علي أثر مثل ليلة مطرزة بنجم
صرخت بعالي صووووتي واني احاول ابعد هالصورة من راسي
-چذااااااااب
چذاااااااااااااااااااب
ضحك بكل قوته وهو يدفرني ويعتلي صدري
وچلماته هزت أوصالي
-اذأ چذاب شلووون اعرف جلد بطنها أنعم من الحرير أنا شفت عيونها وهي تغمض بلذة وياي
شعرها چان يغطي وجهي وأنا أضيع بيها
أنا چنت ولازلت أسكن روووووحها
انت أجيت ولگيت المكان دافي بسببي
أنا العلمتها شلون تحب
وأنا الخليت بدنها يعرف معنى الدفو
كل لمسة تلمسها إلها هي تذكرها بييييية
أنت اخذت الجسد بس أنا اخذتهن اثنينهن
روووحها وجسدها
رفعت راسي تفلت بنص وجهه
مسح وجهه ونزل راسه عليه
-تعيش وتموت وأنت تتخايلنا سوه
تتخايل إيدي وهي تمشي على طول بدنها
وشفافي وهي تضيع بنحرها موت بحسرتك
مووووووووووت
وراح أطيك السطر الأخير من هالسالفة عذبة مو إلك جسدها يمكن يمك
بس رجفتها ملكي نفسها ملكي سرها ملكي
وكل مكان ببدنها حفظته شبر شبر هو الي
عيش وياها بس كلما تلزم مكان تذكر
هاجس چان لازمه گبلك
وطبع هاااااااجس مثل ختم ناااااار ما ينمحي للمووووووت
دفعني وگام يضحك
صاح بعلو صوته للعسكر
-اخذو لوين يريد
سحلوني العسكر وانا عتيت روحي منهم
-حسابنا ماخلص هاااااااااجس
ثار چلماتك راح اخذه من عيووووونك بس انطر
-اعلى مابخيلك اركبه
ردو عتوني وبسيارة العسكر ذبوني هنا
عاينلي وانا دموعي تجري
-صدگته خزززززعل صدگت حچيه الباطل عليه
دگ على گلبه حيل وصاح
-ولچ اناااااااااااا ميييييييت
مااااااگدر اگابلچ حتى لو حچية چذب
ولچ يووووصفچ مثل المحتلة وطن
وشايفة شبر شبررررررر
غطيت وجهي ابچي وهو لزم چفوفي
-احچيلي شسوالچ من رحتيله للمركز
-ووووووووروح اهلي چنت مثل صل الحية
الدغة لدغ بچلماتي
چنت بس اريد اعرف خبرك وروح عمي
كل شي گاله ماااااصار
-چفيتچ عنده
-چفيتي أنا
-ايييييييي يگلي من چنت مسجون اجتني
ونستها يمي
-جيب القرآن احلفلك علي وان شاء الله
ياخذ عمري انا وبتي اذا اچذب
ياهاجس مالي ويا غير السؤال عنك
بالمرات الشفته بييييها
- هاجس ما چان يحچي حچي
چان يذبحني بـوصفچ
چان يفصل جسمچ كدامي مثل الثوب
ويگلي هذا القماش أنا أول من لبسته
وأنا أول من فصلته
وگفت الزم چفوفه دفعني عنه
نحبت وگوة رديت
-وحگ ربنا هاجس چذاب
يريد يهد بيتك يريد يكسر هيبتك بيه
لا تطيعه والله وروح اهلي واهلك چذاب
غمض عيونه وطاحت دموعه وانا
طحت للگاع من شفته يبچي
-المصيبة مو بصدگه وچذبه
المصيبة بالصورة النزرعت هنا كلما أباوع لوجهچ أشوف ضحكته القذرة
كلما ألزم ايدچ أحس بآثار أصابعه محفورة على جلدج عذبة أنا رجال وچلماته وخيالاته عنچ
ذبحتني شلون أعيش وياج وكل شبر بيچ صار لهاجس بي ذكرى
حتى لو ذكريات من خيال وچذب بس
مووووتتني ولچچچچ كتلتني كتل
طحت يم رجلي لزمت طرف دشداشته ابچي
-تهدم بيتك علمود حچايات چذب يحچيها بغيرة
منك چيف عمي اختارك الي
وروح ابوي چذاب
-چنت اگول عذبة حلت ريج حياتي المرة
بس لااااااا انتِ عذبة يمه هوووو وصرتي علگم
مر بلهاتي
أنا خزعل الچان يهز الگاع بطوله
هسة واگف گدامج مهدوم مكسور ذليل
والسبب هوووووو
هاجس ما خلى بيه عقل عشر أيام
عشر أيام وهو يحچيلي السوا وياچ
ويدليني اماكن بدنچ مثل اليشرح
گاع بستان هو زارعه بيده
-خزعل وحگ الخلقني وخلقك
وحگ كل ليلة نمت بيها وأنت حزام ظهري
هو چذاب يريد يحفر گبري وگبرك بچلماته
لا تخلي ينوووووول مراده
-المصيبة مو بچذبه المصيبة بالوصف
شلون عرف مكان شاماتچ شلوووون دلاني
مكان الجرح بصفحتچ
مد ايده الترجف لزم طرف خدي
-هاجس زرع بيه شيطان هسه وأنا أباوعلچ
أتخايل إيده وهي تمشي على طولچ
عذبة الخيال كافر وأنا خيالي هدم رووووووحي
صرتي بعيني مو عذبة حبيبتي ومرتي وام بنيتي
لا صرتي خيال هاجس الچان يتباها بي كدامي
لطمت على وجهي وصرخت
-اكتلني خزعل اذبحني بيدك
ولا تگول هالحچي أنا ذمة برگبتك
انا مرتك وماحد مر على هالبدن غييييرك
انت
رجف صوته ووگف يم الباب
-الذمة محاللة منها يا بت الناس
العشگ اللي بيننا ذبحه هاجس
بچلماته وأنا چفنته بشكي
بعد ماااگدر
اعيش وياچ بعد كسرة نفسي
وطابت روحي من السمعته أنا
ما ارضى بسهم من صيد غيري
اليعيش طول عمره صياد
ما يرضى بفضالة غييييره وهاجس
انا چتاله لو يظل بعمري يووووووم
بعد لهنا وانتهت عذبة
-خزززززززعل …………
-لاتحچين ولا چلمة
البيت تبقين بي معززة مكرمة
وانا قايم بواجبچ للموت
بس نفسي طابت وروحي بعد جزعت
مااگدر اخليج بحضني وغيري چان متنعم
بيچ
سكت وطاحت دموعه وانا صافنة علي
ولشتي ترجف مثل سعفة بوسط
ريح وذب چلمته علية وصرخ بصوت
يگطع الروح
-اااااااااااااااااخ ربي اخذ عمري
وگفت بس اريد اهدي روحه ترجف رجف
عاين بنص عيوني
وحچاها وطلع بره
وغاب بظلمة الحوش
-روحي عذبة وانتِ طالگ
