رواية ذاري النجوم الفصل الثامن بقلم زهراء السراي
المنايا على السطح وعيونها تحوم
عليك ونزلتلك نسر كاسر
ستر الله نغط بديارنا البوم
اخذ عين الگلاده وراح طاير
بعنه البيت ريت البيت مهجوم
وريت اكثر بعد من هالخساير
:
:
:
:
:
:
:
:
عذبة
✥━━━༺✦༻━━━✥
طبيعة البشر من يعلى ويكبر يطغى
وهذا الصار ويه هاجس
طغى وتجبر وكبر عباله مافوگا رب اسمه
العدل خرب حياتي وسمم عيشتي
وخلاني وحيدة بلا ذنب مني
:
:
شهر زمان مر عالصار وانا مگابلة
الحيطان
شهر مر وانا بعدني ما مصدگة
الصارلي
صدگ هيچ بيوم وليلة بيتي يخرب
وافگد خزعل الرجال الآواني وحبني
من صدگ
شهر مر واحنه ما نتلاگه
هو ماخذ الربعة گاعد بيها حاط
هدومه وغراضه مايواجهني أبد
وريحانة گامت تتخطى تروحله هي
لا ياكل من طبخي يطبخ لروحه
ويغسل هدومه وشيحتاج يسوي لروحه
والبيت قايم بواجبه كله يتسوگ
يجيب ويحط بس انا نفاني من حياته
ماادري بيا ذنب
گبل شهر بليلة الصار من حاچاني چان مشتعل نار
ومايحسب حساب الچلمة من يذبها ويصوبني
بيها بعد كل شي گاله بچيت وگتله
-أنا ذمة برگبتك انا مرتك وماحد مر على هالبدن غييييرك انت
رجف صوته ووگف يم الباب
-الذمة محاللة منها يا بت الناس
العشگ اللي بيننا ذبحه هاجس
بچلماته وأنا چفنته بشكي
بعد ماااگدر اعيش وياچ بعد كسرة نفسي
وطابت روحي من السمعته أنا
ما ارضى بسهم من صيد غيري
اليعيش طول عمره صياد
ما يرضى بفضالة غييييره وهاجس
انا چتاله لو يظل بعمري يووووووم
بعد لهنا وانتهت عذبة
-خزززززززعل ............
-لاتحچين ولا چلمة
البيت تبقين بي معززة مكرمة
وانا قايم بواجبچ للموت
بس نفسي طابت وروحي بعد جزعت
مااگدر اخليج بحضني وغيري چان متنعم
بيچ
سكت وطاحت دموعه وانا صافنة علي
ولشتي ترجف مثل سعفة بوسط
ريح وذب چلمته عليه وصرخ بصوت
يگطع الروح
-اااااااااااااااااخ ربي اخذ عمري
عاينلي وطاحت دموعه
-روحي عذبة وانتِ طالگ
گال حچايته وطلع يركض تخورست
وروحي انترست نااااااار لو تلوح هاجس
تحرگه هو سبب بلوتي هوووو سبب خرابي
ظليت انوح لنص الليل سمعت صوت ريحانة
فتحت الباب هو ماكو بالربعة
خذتها ورديت للحجرة الوليلها وأبچي
دللول يالولد يا ابني دللول
يمه عدوك عليل و ساكن الچول
يمه انا من اگول يمه يموت گلبي والله يمه
نحبت ولطمت على وجهي فزت ريحانة ورديت
نومتها والولي
يمه يحقلي لاصيح دلي
ترى اطلگ الدنيا وأولي
يمه على ظليمتي من دون حلي
مر الليل عليه مر علگم ان چان نامت العيون
أنا نمت
بس گلت يهده خزعل وينسى وللصبح يدانش
فكرة ويردلي ندمان
بس الصار كسر گلبي من اجاني
ثاني يوم
-لبسي ولبسي ريحانة وتعاي
طاحت دموعي
-تردني لأخواتي تريد
-لا امشي فضيني
لبست ولبست ريحانة وطلعت بالباب
سيارته مصلحة صعدت وره عاينلي وسكت
واخذنه لدرب الولاية
مشى مشى لحد ماوگف يم جامع صغير
-انزلي
-شعدنا هنا وين جايبني
ياريته ماحچه ولا رد
-نتطلگ يم المومن
شهگت وگوه حچيت
-صدگ تطلگني خزعل بروح اهلك تظلمني علمود.........
-كافي عذبة امشششي
عافني ومشى
گدامي مشيت واتعثر رجليه يتطون طوي
مامصدگه هيچ يصير بيه ولا مصدگه اذية
هاجس توصل لخراب بيتي
ماودي اوصل صرت على صفحة وهو
طب للجامع وردلي
-تعاي ياله
ضليت واگفة وريگي نشف ردلي مرة ثانية
-الناس متانية امشي
طبيت ورا بروح مكسورة
اعاين حجرة صغيرة على صفحة
گاعد شيخ معمم
ويمه زلام اثنين
حچه الشيخ كلام عن بغضة الطلاگ
وسأل خزعل
-بويه مبين خوش زلمة انت والبت
ادمية وعندك هاي الجمبدة ليش تخربون
بيتكم
رد علي
-عندي أسبابي شيخنا اتعذر منك بس انا وهي
رايدين الطلاگ
ومن كمل بده يحچي ويه خزعل ويعلمه شيسوي
عاينلي خزعل وردد الكلام بلايه مايفكر
بيه و بدموعي الماوگفت
غشيت عيوني بس كرامتي فوگ كل
شي مادام هاني هيچ وجابني لوحدي
لا بلغ ازواج اخواتي ولا اخواتي
ومثل ماباع كل شي انا هم ابيع
عدلت روحي مسحت دموعي ورديت
علي من كملت بصموني أنا ويا على اوراق
وگام الشيخ يحچي وياه وانا ماافهم راسي
مفتر من القهر ريحانة ذبت روحها علي
خلاها بحضنه انا گمت طلعت بسرعة امشي
طلعت بره الجامع
وگلبي هذا تفسر وصار وصل لا ظل حب لخزعل
ولا عشرة ولا گرابة لهاجس
من هسه وللموت انا لوحدي عمري
كله ماراح اعتمد على بشررررر دوووووم
بيا ذنب اتحاسب على حچي مامسويته
ولو صار وحضني لو حبني گبل چنت مرته
على ذمته بسسس الگاله الخزعل كلام
حاقد خبيث راح يموتني وانا بالحياة
مشيت بلايا شعور رجلي اخذتني للشارع وره
الجامع
امشي وجيزداني بيدي فتحته بي
فلوس همزين ظليت اعاين بلكي سيارة
تمر اروح بيها للسلف الم غراضي واروح لأخواتي
واشتري الباقي من كرامتي
امشي واسمع صوته وراي
-اووووگفي
هميت رجليه ومشيت بساع
رد صاح
-اووووووگفي ام ريحانة
اااااااااخ يالوكت صرت ام ريحانة
مو عذوبة
مارديت مشيت وصوته وراي
-ووووووين رررررايحة تاني
وگف بسيارته
-اصعديييي
-شعندي صاعدة مرة غرررررريبة عنك
وحرام حتى تعاين لوجهي
طلع من السيارة فتح الباب وصعدني
دفعت الباب حيل ونزلت صعدت ليوره
وبتي اخذتها بحضني
مشى بينه وانا مايتردد ببالي بس كلمة
انتِ طالگ
وصل للسلف نزلنا للحوش وانا طبيت بسرعة
فتحتلي علاگة والم بيها هدومي
وهدوم بتي لمن ترستها ولبست عباتي اشيلها
طب الحجرة ويعت بالعلاگة من ايدي
-وييييين راااااااايحة
-اروح لأهلي شني ماعندي أهل ماخذني تايهة
-ماكو اهل بس انا گتلچ ماتطلعين من البيت
تظليييييين
-شعندي ظالة هاااااااا طلاگ وطلگتني
وسسسسسفة وسفة
وحررررامات چنت أعدك حزامي وذخري
تالي كسرة روحي اجت منك
شلون طاوعك گلبك تهدم سگفنا
بچلمة من لسان هاجس المسموم
يشهد الله أنا صنت بيتك بغيبتك
وصنت روحي بشبابي وووووسفة تطلگني
وتسويني حچاية بحلگ اليسوى والما يسوى
يا حيف على زلمة يطيح سگف بيته بشهادة زور
سكتت وطاحت دموعي ونشغت للسما ودعيت
-يا هاجس باابن عمي يا عسى لسانك الهدم بيتي
ينعگد وما تلوحك العافية
زرعت الشوك بدربي وأنت تعرفني صافية رازقية بيضة مابيها دغش
حوبتي ما تتعداك والظلم السويته راح يرجعلك لو بعد حين
رديت عاينتله
-وانت يازلمتي الطلگتني مبري الذمة
بس مادامك ظلمتني وانا وحيدة ظلمك راجعلك
انا راح ألملم هديماتي وأمشي لاخواتي
بوجه أبيض مابي عييييب مثل عين الشمس
اعمي عيون عدواني بضووووواي طلگتني
وانتهت بس خلني اگلك
الماي الصافي ما تنجسه روجة طين
راح أروح لاخواتي
ووراها أخلي السلف كله يشهد
منو الخان الملح ومنو الصان العهد
ويششششهد الله ورسوله ووصية انا الصنت
وماخنت ولا برمشة عين
گعد بتعب عالقريولة وذب حسرة
-بيتچ ماتطلعين منه والطلاگ
محد يعلم بي تنسترين هنا وتظلين
گدام الكل مرت خزعل ماتگعدين ببيوت الغرب
طاحت دموعي ومسحتها مو انا الأنكسر
وانا المظلومة مو انا الغلط هوو جرح كرامته هاجس
ورد عليه انا المظلومة كسر گلبي عاينتله
-تگلي ظلي بالبيت يا بيت هذا التگول عنه
البيت التنسد بيبانه بوجهي بچلمة من واحد
عار ما يتسمى بيت يتسمى سجن
خايف على سمعتي من الناس
يا حيف وين چان خوفك عليه من طحت بلسان العاذل وما رديته ورديت عليه انا بلاية شهود تطلگني شلون طاوعك گلبك
تطلكني باللسان وتريد تحبسني بين الحيييييطان
تخاف عليه من حچي الناس ومشاورهم وعارهم وماخفت عليه من كسرة الروح ووجع الگلب
والله والله لو حابني صدگ چان ذبحت الحچي
حدر جدامي مو تذبحني أنا وتگلي انستري
انا مستووووووووورة من يوم الانولدت
مابيوم چنت عايبة حتى انت تسترني ببيتك
والله لو اظل بالچول وتاكلني الچلاب ماظل ببيتك
ساعة
-گتلچ ماتطلعين مو خزعل الينجاب اسمه
بالعاطل ومو انا اليحط عليه هاجس
من يسمع مطلگچ ويظل يحوووووومي وراااااااااچ
-تخاف يسمع مطلگني
-منييييييين اخاااااااف ولچ أنا زلمة انطعنت بكرامتي
مااااااريده يگول صدگني
-بس انت صدگته ومشييييييت وره حچايته
تگول انطعنت بكرامتي وانا شنوووووووو انا هم انطعنت
انت الچنت حاسبتك حزام ظهري صرت خنجر بخاصرتي شلوووون اظل ببيتك وانت محرم عليه
شلوووون أظل وانت تشووووفني عااااايبة
-كاااااافي كافي گتلج ماتشوفيني ظلي هنا معززة مكرمة ......
ماخليته كمل حچايته
-أنا معززة مكرمة ويييين الكرامة وانت مصدگ
كلام الواشي عني عبالك اذا ظليت هنا انستر عبالك الستر بالحيطان الستر زلمة يوگف بوجه الريح لاجل اهله بس ياحيف انت صرتلي الريح وشلعتني
شلع من مچاني
-ان چان اذيتچ بكلمة انسيها انا النار ماكلتني
ومحد مطفيني لا تزيدين ناري حطب بعتابچ
-مامعذووووور دووووم
مامعذوووووووور لو هاجرني سنين بلاية طلاگ
هم اگول يجي يوم ويردلي ويسألني عالصدگ
بسسسسس بعد عملتك وطلاگي وانا لوحدي
ماخذني مثل العاملتلها عملة
والله لو تلم نجوم السما وتحطها بچفوفي
ما تروح حرورة الطالگ الطلعت من حلگك
ابددددددددد
-انا ماااااااگدر اظل وياااااچ بعد الصااااااار
احبچ اييييي احبچ
بس بعد السمعته مااااااااگدر اعاينلچ
بلايا مااتخايلچ وياااااااااا ولچ راسي رااااااح
يطگ وأمووووووووووت
-تحبني وتطلكني هاي شريعة يا مذهب تگلي ظلي
هنا خايف من كلام الناس وخايف ذاك الچلب يسمع
لو انتَ خايف من الناس وناسي رب الناس
الماي اليتطشر يا خزعل ماينلم
وانا تطشرت وتبديت وفضت
والله والله لو تحط جبل ذهب توزني بي
ماراح أرضى وماأغفرلك سوايتك ابدددددد
-ولچ ذبحنيييييييي بسچين عميييييية
هو يوصفچ وصف المگلب اكتارچ وشايفچ شبر شبرررررر شتررررديني
ولچ اصببببر عالگالة
گام بكل حيلة فلش المراية الصغيرة مالتنا
عاينتله هديت روحي ومااطلع منا اذا ماابين الحق من الباطل وگفت گباله
-انت مااطيتني حتى وكت احچيلك واردلك
على تهايم ذاك العادته ابن عمي ومن اهلي
چنه جهال صغار وتذكر كلنا نبلبط بالسواجي سوووووه مو انت عندك حرگ بچتافك من ابوك
يزين طايح عليك ماي الزياااااااان شلوووون عرفت انا كلنا چنه نلعب سوه وشي تحچي لشي وانااااا
غريبة عنك
حسن حمى اخواتي مو عندة نساوة باچة سودة بنص صدرة هم گلي شلون عرفتي عرفت لأن چنه جهاااااال
بت الملا فطيم مو عدها ست اصابع برجلها
وغيرها وغيرها هااااي الغربة وادري شحال ابن عمي الربيت ويا يعرف كل شي عني واحنه صغار واحد يلوذ بكتر الاخر يتدفى وروووووح انشد خواتي
اذا تررررريد وابينلك الوصلك مو حتى تبريني ولا تراضيني بس حتى انا ارتاح
صد عليه فاك حلگه وصافن وانا مااهتميت وكملت
-الجرح بخاصرتي نطحني الخروف لا خنجر
ولا جرح ولا غييييره والنساوة بظهري دگوها
بيت جاون الكاولية من انا بگد ريحانة امي
من شايفة النساوة مو حلوة دگتها مثل النجم
وروووح انشد چنة بيت جاون رسلية الداگوگة
هي الداگتلي
والجرح بحنچي جهال ونلعب ونتعارك واجتني صلبوخة طين فگت حنچي
وشعري المگصوص گطمه هاجس من گتله
اخذت زلمة معدل وراضية بي
وكل كلمة گالها چذب وحگ رووووح امك ذيچ الگلت
ماتت مظلومة هاي انا حچيت الاريده
وهسه الله وياك ومحمد وعلي رووووح لحالك
وانا اروح لحالي
رديت العباية على راسي شلت ريحانة بحضني
وعتيت علاگة هدومي ومشيت لباب الحجرة
دفعني وجر الباب بسرعة
وطلع واسمع قفله الباب مال الحجرة
وراه حبسني ادري بي
گعدت وعاينت لروحي افكر بعگل انا عذبة
اصير علچ بلسان هاجس ويظل رايح
راد عليه بحجة تطلگت ويتحقق الراده لا والله امداني
عاينت لبتي التعلمت عالدلال مثل بنات الولاية
الاكل الشرب واللبس واللعابات
حييييرة يربي وانت خير من يوجه المحتار
هاي هي اظل وهو ملزم ببته
ساعة زمان ودگ الباب
-تسمعيني
-اي شرايد بعددددددد
-تعاي طلعي احاچيچ
-ماااااا اطلع مابينه حچي انا ظالة هنا مااروح
لأحد ومو علمود حچيك الگلته ولا علمود الناس
الناااااااس هي ومداسي خووووووش
بس علمود بنيتي ماتتلطم بالبيوت وراح اظل
بس بشرررررررررط
فك الباب وطب للحجرة ووگف ببابها
وماراضي عن كلامي وعيونه بالحق
-بيها شروط بعد
-ايييييي هذا الموجود هنه چلمتين اسمعهن مني
تجيب اوراقك باچر وترد گاعك
وبيتك خووووووش انا صرت غريبة عنك ومحرمة عليك ومامحتاجة احسان
من احد الك منااااااااا
لعگب باچر اذا ماجبتهن اطلع من البيت انا
وبتي وماتلگالي درب دوووووم
دار وجهه ودفر الباب حيل وطلع
وصدگ صار جاب اوراق جديدة رديت
تنازلتله عن الگاع والبيت
وهاي مر شهر انا اشتغل بالبيت وانظف
واطبخ على گدي من شفته
ماياكل گام يقفل الربعة من يطلع
حتى ماانظفها يمكن گام يستنگس مني
گمت مااخلي احد يجيني انا اسبگ
اخواتي واروحلهن حتى مايحسن بالصار
بس رغم كل هذا گلبي ملوع ومكسوووور
وماغمضتلي عين براحة ابدددددد
كل ليلة اشكي همي لربي وانا على مصلايتي
وادعي من گلبي على هاجس لا يشوف
الراحة ولا يرتاح مادام لعب براس خزعل
وخلا لا هووو اليتهنى بعيشته ولا انا
ومرت ايامي بتعب وانا ويا مثل حية وبطنج
هو يطب لمكان انا اطلع
انا اطب لمكان هو يطلع
لحد مابيوم اجانه الخبر هاجس مضروبة
سيارته هو والعسكر الوياه مصوبين بس هو
لايحته چيلات أثنين وماينعرف ياهو الضاربه
شي تگول المقاومة ضد الحكومة وشي تگول
عداوة وانا الوحيدة
العرفته خزعل ماغيرة
من غاب ليلة كاملة عن البيت
العرفته من خواتي هاجس من الچيلات الصابته
ببطنه شايلين چلوة من چلاويه
وببغداد ظال والمركز لازمه واحد غيره
بأيامها خزعل ورد وجهه واسمعه يشعر
شعر لو يغني وياخذ ريحانة يونسها
لحد ماطبينه شهر ثاني عالطلاگ وهالشهر يلا
فهمت من كبرت بطني
وراح لعبان الروح ولبط الجاهل وتحرك ببطني
بسبب الطلايب والصار مافگدت الشهرية
بساعتها عرفت روحي حبلة وعن لا اطيح
بالغلط
وخزعل يحط عليه سبب ويشك طلعت
للجدة تأكدت من حبالتي
بليلتها طلعت لباب الربعة دگيته سمعت صوته
-جاي
فتح الباب وعاينلي ودرت وجهي عنه وحچيت
-اسمع ابو ريحانة عن لا تگول مسويه العيب
وتحطلك تهيمة براسي ارد اكلك انا حبلة
والجاهل لبط ببطني وتحرك تذكر ذيج الايام
روحي تلعب واستفرغ ثاري للحبالة
ويشهد الله ورسوله عليه الجاهل الك خاف هم
تشك وتحملني ذنب وتسويني زا.........
حط ايده على حلگي يسكتني
-انچبيييي انچبي لا تكملين
هيچ أنا عار بعينچ واتهمچ هيچ تهيمة
باطلة
طاحت دموعي على اصابعه
دفعت ايده ومشيت
-لا تلزمني بعد انا محرمة عليك
ضحك وانا گلبي اشتعل نار درت
-تضحك على ظليمتي الله ياخذ حقي
ان شاء الله مو بعيدة على الله
-طلاگنا باطل مادامچ حبلة يالمسودنة
درت وجهي علي مسحت عيوني برداني
-اذا الدين يگول باطل وانا بعدني على ذمتك
انا حرمت روحي عليك دوووووم
درت وجهي طبيت للحجرة والدموع الحابستها
من شهرين كلها مطرت من عيوني بساعة
وحدة
ثاني يوم الصبح يوم جمعة اشتغل
وهو غابله ساعتين ثلاثة ورد
واسمعه يطگطگ ساعة وصاح
-ماتنظفون الربعة
اخذت مكناستي ورحت لگيت الربعة فارغة
من الغراض ومابيها بس المخاد والفرش
مشيت للحجرة واگف يعدل بغراضة بالكنتور
خليته كمل صبيت غده اليه ولبتي واخذتها
للمطبخ اجه يصوفر ويتمخطر گعد بصفي
تدنيت ووخرت اخذ خاشوگتي وگام ياكل
خليت ريحانة بحضنه وگمت للحجرة
طلعت فراشي وچم غرض من غراضي ورحت
للربعة تمددت لأن تعبانة
شويه ومد راسه بالربعة
-هااااااااه تبدل الدور
مارديت غطيت راسي باللحاف ونمت
ليش گلبي ماجاي يبرد ليش النار بعدها
شاعلة بروحي
للعصر اسمعه يلاعب ريحانة ويناغيها يم
راسي ويسمعني الحچي
-ريحانة بويه ماترحين طارش للأحباب
تگليلهم الغلطان يتعذر ويبوس الچفوف حتى
يرضون وتگليلهم رحت للشيخ وتأكدت الطلاگ
باطل مادامني ما اادري بيها حبلة
وگفت مسحت وجهي واعدل بشعري
ثوبي لازگ على بطني ومبينة كبرانة صاح
-ريحانة هالمرة يجيچ اخووووو نسمي سالم
طلعت ماشية للباب من سمعته اندگ
فتحته طبت نعمة بس وجها مغيم عاينتلي
-تتعذرين من خزعل وتجين وياي
طبيت لبست عباتي وبالباب صحت
-نعمة تريدني بالباب رايحة وياها
طلعت وياها لزمت ايدي وعتنتني عت
-مالچ چبييييير ولچ
-شبييييچ
عصرت ايدي عصر وبچت
-طلگچ وردچ ومحد يدري شلووون
رضيتيها على روحچ
-نعمة امشينا للگاع لا تحچين گدام عيالچ
رحنة للگاع وگعدت احچيلها الصار كلة
عدت وصفت على هاجس لمن گالت بس
عاينتلها
-حچالچ خزعل
-اجاني البارحة وانا احوش جت للحلال
-شيريد
-گال انشد على چم حاجة
-نشدچ عالجرح البطني وعالدگات بظهري
-وهواي بعد
-خوش
-تجين يمي بعد ماتظلين يمه يجيچ ويتعذر گدامي يلا اردچ
-لا السالفة خلصت وربچ نصرني خل ارد
لخاطر بتي والجاهل ببطني
حضنتني
-لا عبالچ اهلنا وعمنا مات ماعندچ ظهر
انا وسنية وياچ للموت خوووووش
ردتني للبيت وراحت لگيته گاعد بريحانة
بالحديقة وره البيت
-هاااااه ردت المزيونة
غمزلي وانا مشيت للحجرة گلبي صار حجر
ومااهجس شي غير چلمته انتِ طالگ
لو من يگلي روحي لبيت أبن عمچ لا ترحين
للغريب
طب الحجرة خله ريحانة الغافية بحضنه
عالقريولة
-نحچي ونتفاهم عذبة
-لا مانحچي ولا نتفاهم مابينه شي
بعد
-انا غلطت ادري بس هم معذوووور
الصار مايرضى زلمة على عرضه
-والسويته بيه ماترضاه حرة على روحها
تاخذني مثل السبية تطلگني وترد
تگلي انستري بالبيت
انت اخذتني مستوووورة
وچنت مستورة وبعدني
وللمووووووت خووووش
-ماتشفعلي العشرة
-ماشفعتلي أنا حتى تشفعلك
انا ظالة هنا لحد مااولد وراها اتطلگ
وهالمرة صدگ
وگفت وعتني يوگفني
-الا مسودن واطلگج
عاينتله وضحك
-صدگ چنت مسودن وسويتها
-شعبالك فرحت بيك من رحت لأختي تنشدها
عالجرح والدگات وغيييرها
لا والله انت زودت ناري
نارين معناها ماصدگت بيه
ولا امنت لكلامي الا
من تأكدت من اختي
-ابببببد والله بس ......
-لا تحلف انت ما مأمن وراح تظل مامأمن بيه
للموت وانا مرة مالي صاحب اليبيعني ابيعه
حتى لو چان ضوة عيوني
شعبالك من تگلي طلاگنا باطل اركض بحضنك
لا والله هيهات حضنك صار شوك يجرح بأكتاري
-رميته لخاطر دموعچ بس عاااااار مامات
بس انگصت چلوة من چلاوية ولو بيدي
اكتلة واموتة بس حچايتچ ترن بأذني
من گلتي لا تفجعني بيك انت اهلي
لعيونچ اخذت القصاص
منة وخليت باقي القصاص على الله
وهو يحق الحق
-اخذت ثار روحك انا ربي ياخذ
ثاري
عفتة ورحت للمطبخ اجه وراي
-عذووووبة
مارديت علي دموعي تطيح وحدة
براس الأخرى وامسح بيهن
رد صاح
-خايبة عذابي
درت وجهي خزرته
-ماتوكلون مسكين جايكم على باب الله
-شعجب تطلب اكل وانت تتنگس
مني وحتى الچاي ماتشربه من ايدي
-افااااااا هذا اني
-چا امي اسمع خزعل لا تشوفني نويعمة
وحبيبة ترى گلبي أسود وحاقدة
اسمي عذبة بس اطباعي لا
مررررررة عاليظلمني والصار
للموت ماانسى لا تتعب روحك وياي اببببببد
عفته ورحت للطباخ احمي الاكل
واخليله ياكل خطيه ماشبع بالغدة
غم گلبي اي والله اهم بي
خليت الطبگ يمه بالحوش گاعد بالفي
وخليت يمه كوز الماي ورديت للربعة نمت
تعبانة حبالتي ذابتني عالنوم
بديت اغفى وهجست لحافي أنشال
وتمدد خزعل بسرعة حضني دفعته
بكل حيلي مايندفع
-اسكتي اشششش
-ميييييل عني خزززززعل خل اگوم
-شهرين مانايم مثل البشر
-نمت وشوخرت وشبعت نوم
شخيرررررك واصل للولاية
-كل ليلة افك الباب اعاينلچ وبحضنچ ريحانة
وشعرچ محلول عالمخدة
دفعته وگمت
- عمل عملته بيدك تلگه وعدك علي
خوووووش
-ماراح ترضين ولچ
-شرضى وانت تسحول بيه وتكتلني
لو من تعيرني بسوالف انا مامسويتها
لو من تطلگني وانا مظلومة ماااااا
أرضى
-ولا لأن رجلچ رقو وصار مدير مدرسة
-اي بالخير عليك الله يزيد ويبارك
ان شاء الله تصير وزييييير
-عذبة
-ام ريحانة أنا مو عذبة انت غربت روحك عني
وطمرت البينه بسد من طين بعملتك ذيچ
-خااااايبة الماعنده غيرة على عرضة مو زلمة
-زلمة وتعادل الف زلمة وعندك غيرة على عرضك بس
ظالم ظلمتني وقهرتني وكسرت گلبي
طلعت افتر بالحوش حتى مااحچي
ويا شو روحي طايحة الحظ بسبب النساوة
هافتني على كباب السوگ
لزمت روحي عن لا احك وجهي
ومديت راسي من الباب اصيح جاهل من بره
شفتلي وليد ووديته على بيت اختي
شويه واجاني ابن نعمة يهف
-ها خالة
-ابوك ينزل للولاية اليوم
-اي خالة هسه راح يروح
-خوش گله خالتي عذبة تريد كباب
سوگ .........
بعدني احچي وسبگني خزعل
-روح عمي معليك بخالتك
راح الولد وهو طبگ الباب وعاينلي
-شني رجلچ مات وتطلبين من رجل نعمة
يجيبلچ مشتهاتچ
-ماااااريد بطلت
عت ايديه وحبسني بين ايدي
-شو بالله گولي مااااااا مرة ثانية
-الاستاذ المدير مااريد شي
-بس انا اريد كل شي
درت وجهي عنه وهو من بره طلع بسيارته
چم ساعة ورد بيده كباب ملفوف بخبز بس بارد
حما عالنار وصلتني ريحته وانا اشتغل
نزل الطبگ بالگاع وگعدني غصب عني
-غذي روحچ واكلي مادامه حار
اكلت ويا احس ردت روحي
وراحت مشتهاتي وگف يخدر چاي
ويدندن
خدري الچاي خدري
خله استكان گدامي وهو وياي
وانا اكل مد أيده طلع من جيبه حجول تخشل
حركهن وعت رجلي خلاهن وضحك
-مثل ماتخايلتهن يلا الذهب للذهب هني وعافية
-ضمهن لريحانة انا ماالبسهن
-حتى الهدية تردينها
-اذا عبالك تجبر گلبي بذهب
اگلك غلطان مايفيد
-أسألچ بالله اكو زلمة يرضى بالصار هسه
لا تحسبيني انا حسبي غيري شوفي شيسوي
اذا سمع السمعته من واااااحد عااااار ناقص
گلبي وعقلي يدرن بيچ برية بس رجولتي
شلووون ترضاهة
وجهه چان يقراني بس يريدني أرضى
مااگدر أنكر لو زلمة غيرة وماعنده عقل وثقافة
يمكن دفني بمچاني وخصوصاً الحچي الحچا هاجس
يتصدگ ليش عبن چنه مالچين وگاطعين مهر
وخلة عقل خزعل يشت من يگله انت ليش تتراجف
هي چانت مرتي
نزلت راسي حايرة وگف شال راسي
-انا غلطان واعتذر
باس راسي وچفوف ايديه
-وانتِ كرررريمة وانا استاهل عذبة
ماگدرت اقسى علي بعد ذيچ الايام عاشها
مثل السمچة المزوهرة كل ساع خشمه
طاگ دم من القهر وروحه مكسورة عساها
بحظك وبختك ياهاجس
خليت راسي على صدره وهو عله نفسه من الفرحة
وضحك
-ها تصاحبنا
-غصباً عليه وعليك احنه اثنين مسودنين
واحد تورط بالثاني
حضني حيل ويضحك
-والله صدگ مسودنين
-احلفلي بعد ماتنعاد والله ياخزعل البشر
اله وياي نوبة وحدة بس تنعاد تلگاني هاجة
-كافي اسكتي بعد مانحچي بالسالفة
للمووووووت
-اسم الله من الموت گول طول عمرنا
-يالله يابه طووووول عمرنا
لازم وجهي ويعاين لعيوني
-لازم ادفع كفارة
-ليش
-حالف مااخلي دمعتچ تنزل بسببي
-يرادلك الف دينار كفارات
-فدوة يرحن حدر رجليچ
ومن هاليوم الحمد لله ردينه سوه
صدگ ماناسية وتجيني ساعة يلزمني
گلبي من القهر لأن سوه السوا بس
مااگدر الومه زلمة وانحط على عرضه
شيسوي
-شلووون خاف يصير مايصير ويدرونك انت السويتها
-هااااااه ولچ خايفة عليه
-والله حتى گلبي خلص من الخوووف
-دقويلي گلبچ باچر العمال يجون
ونبدي نحط اساس للبيت والله
لااخلي القرية تحلف ببيتچ
-سويليا مثل الفندق الگعدنه بي
-بس هااااي تاخذين عيوني
-يااااا اتشاقه والله
-وانا مااتشاقه اجيبلچ فرش واثاث
مثل ماتردين
-والله صدگ تحچي
-چا اجذب عليج
-يممممه ويصير بيتي مثل نسوان الولاية
-واحلى بقاطات
عاينتله وهو فرحان ويحچي
يريد يعوضني كل شي
-خزعل
-بعد عيني
-لا تتعب روحك وتتكلف بيتنا يكفي وزايد
خلي الفلوس حدر ايدك تفيدك بغير شي
-ماعليچ انا هم اريد بيت واسع
والفلوس خير من الله
ضربته على صدره ورد ليوره وضحك
-هاااااه طگ عرج السوادين
-وييين مخلي فلووووسك شو ماادري
بيهن وين
-وعبالچ ضامهن منچ
-لا ماتسويها مو طبعك
-الدنيا مو امان وعمامي وولدهم چلاب
مخليهن عد صاحبي أستاذ بشير
-اي اعرفه مو هذا العزمته من طلعت من السجن
اول نوبة
-اي هو هذا اخوي وصاحبي الصدگ
هسه اخذت منه شويه منهن
حتى اعلي الاساس جبت عمال من الولاية
اسطوات شغلهم مضبوط اريد باچر غدة
من ايدچ الحلوة الهم
-تتدلل من عيوني
باس عيوني وحطني حدر جناحه
-سالمات عيونچ
مد ايدة لبطني تلمسها
-شگد عليچ هسه
-الجدة تگول طبيت نص الخامس
-ياالله يامسهل
ثاني يوم بدو الشغل
ولمدة اسبوع حطو الاساس
وفرحانين بي ورفعو الحيطان
وصادفت امتحانات گال عطلة اسبوعين
عدنا شغل بالولاية
اسألة شني الشغل مايحچي يگلي
يخص المدرسة يومين من العطلة يروح
ويرد جنطته متروسة ورق
مايخليني افتح الجنطة ابد يبقى وراي وراي
لحد ماگلبي لسبني لأن سمعت هاجس
راد
گلت خاف يريد يرد يكتله بيومها حطيته
گدامي وسألته
-خزعل لا تقهرني ترى انا مالي غييييرك
السوووويته اخذت حقك بي فدوة اروحلك
مو رد فلان وترد تسوي شي
خليني انا وجهالك بين عيونك خووووش
گول ريحانة واخوها وعذبة يتيتمون وراي
-والله اخذت حقي هاي هي
مالي دعوة بفلان وغير فلان شبيچ خايفة
يرد من الولاية للبيت يساعد العمال
آخر يوم العطلة الظهر اجاني يركض
-عذاااااابي
-بعد عيوني
-سالمات شوفي راح اروح للولاية
اودي العمال محتاجة شي
-بس سلامتك
اجاني بسرعة يركض انا بباب المطبخ
واحچي ويا شو جر وجهي وباسني حيل
-يااااااا انفضحنا
-محد يشوووف السياج عالي
مد ايده تلمس اذني چنت لابسة
ترچية شباك
كشيت وكزبر جلدي
-يممممممه
-اااااااااخ هاي اليمه كلما تگولينها تشوطين روحي
استحيت وهو يضحك
-نزعي التراچي من اروح وضميهن
-يااااا ليش
-شفت تراچي وگلادة ومعضد عنگود عنب
كل ماامر من صاحبي الصايغ عيني تصدلهن
اليوم يزينن رگبتچ واذانچ
طلع ورد عليه ماشي بسرعة
حضني حيل ورد حبني
-يااااا خزعل شجاك
-شوووو ماينشبع منچ
رد باسني بسرعة وطلع درت وجهي للجدر
اكمل طبختي سمعت خطواته وراي
-خايبة ماتمشين للحجرة شو هافتني
روحي عليچ
-هههههههههه شجاك اليوم رووووح الناس متانيتك
بره
-خوووووش بس سويلي حلاوة تمر
واليوم يووووومي
دار وگال
-خايبة ولا تهنيت بيچ من عرسنا لليوم
كل ساع سالفة اليوم ارد عريس
ضحكته ترست المطبخ وانا اصيح وراه
-تتدلل
اجاني صوته گبل لا يطلع من الباب
-بوسيلي ريحانتي مابستها
طلع وانا گعدت افلس تمر سودة عليه
صدگ ماتهنى بعدنا بأول شهور عرسنا
وانسجن سجنه الچلب من الله لا يوفقه
وراها ست اشهر وصار الصار شهرين شبه
مطلگين وهسه يالله جرينه نفس
افلس التمر واحاچي رووووحي والله
لا ادللة مثل ماعزني ودللني
ترست الحلاوة هيل وسمسم
وضميتها اله گعدت ريحانة تصيح
ببا ببا تفتر تدور علي وتانيته لليل مثل
كل مرة يرد بس شو فات الوكت
ومارد خفت بس مارحت لأخواتي
لمن اذن الفجر لزمتني الرجافة معناها
صارلة شي
ركضت الفجرية رجل نعمة يطلع لشغله
للولاية بس شافني اتراجف
-هاااااا بعد اخوووچ شبيچ
-مااااارد خزعل راح وده العمال ومارد
-انااااا رايح للولاية واشوفه جيبي
بنيتج وتعاي يم نعمة
-لا لا رادة للبيت خاف يجي ومايلگاني
رديت للبيت وللصبح ماكو خبر للظهر
رد رجل نعمة دگ الباب ووجهه مايتفسر
-فدووووة وينه
-ماكو سيارته بباب المدرسة
-اي هو يحطها هناك وينزل للسوگ
عاينتله بحلگه حچي ومايريد يگلي
-شصااااير فدوة
-بالمدرسة هو وويا جماعة مجتمعين بغرفة
الحارس ماخذينهم والغرفة متروسة
مناشير ضد الحكومة
لطمت على وجهي وهو يهديني
-راح اروح انشد علي والله
راح والتمن اخواتي يمي والناس بالقرية
كلها سمعت وانا افتر مثل المشعول بنار ومحد
يطفي
مليت لليل ومارادين زلام اخواتي
گعدت ونعمة تهدي بيه
-راااااح تموتين ولچ بس اگعدي
-شلوووون اگعد ولچ ماتسمعيييين
الاعدامات بالشووووارع شلووون بيه
-راح تطرحين كاااافي بطنچ نزلت
ارتاحي
مددتني والنسوان طشت ظلن بس خواتي
لهناك وانفتح الباب وگامت نعمة لرجلها
-هاااااااا
مشيت وراهه وهو منزل راسه
-فدووووة خووويه بس گلي
-ماخذينهم ووياهم لمة شباب شكبرها من السوگ
كلها ضد الحكم وماينعرفلهم درب
لطمت ونعمة ركضتلي
-شني رااااح يعني اغسل ايدي منه
-لا لا گوووولي ياالله
گوة طلعت الحچاية من حلگي
-ماشفته بالمركز هنا
-رحت گالو احنه ماعلينا بالولاية
معتقل بالولاية معناها هناك مووووجود
-يمممممممه تصخمت وتعزيييييت
-ياخويه ليش تفاولين اطينه فكة يمكن نلگاه
ومر هاليوم والثاني والثالث
وعله صوت الباب يندگ حييييل ركضت
بلا شعور واخواتي وراي
عاينت حسين رجل نعمة وعباس رجل سنية
متربين وعيونهم تهمل صوت سيارة وراهم
گلت رد طلعت اعاين وشفت التابوت على
سيارة چبيرة واليسوقها هاجس
-ويييييييينه
بلعت ريگي گوه ورجل نعمة طاحت
دموعه
-بطل شهيد
ماگدرت اوگف طحت للگاع وبادت رجليه
واخواتي ارتفع صراخهن ونزل هاجس من سيارته
وجهة تعبان نزلو الزلام التابوت واخواتي يجرن
بيه للبيت اسمع صراخ بتي وصوت
سنية تصيح لبتها تشيل ريحانة
اعاين للناس تشيل التابوت وانا ما مصدگة
شنيييييي خززززعل مات شلووون وبيا ذنب وعيت على روحي وانا صرخت
-شلووووون خليتك طلعت وانت كل ساعة ترد
وتگلي خل اظل امدددددداني
ضربت على بطني ولزمني خواتي
نزلو بالربعة وانا ركضت وهاجس صاح
-طلعو خووووية خلو عايلته يمه
طلعت الزلام وبس هووو وزلام خواتي
يمي گمت بكل حيلي ادفع بالتابوت
صاحو مارضو صاح هاجس
-نعمة سنيييية لزمنها
عاينتله
-شبيييييييي شبي خل اشوفه شمسويله
نزل راسه ساكت رد عاينلي
-بس ترحميله لا تعاينين رحمة لروح اهلچ
ماگدرت صرخت وبكل حيلي شلعت التابوت وانفتح
وريتني ماشفته راسه مربوط بوصلة وچيس مليان
دم اشتعل الوجع بروحي مثل نار
بگصب يابس مايطفيها مطر لا فادت دموعي
ولا صراخي ونعيي
انخطف لوني وغابت شمس دنيتي سد هاجس
التابوت
بس بعديييييش بعد ماشفت طوله الهيبة
الچان مفرع مثل نخلة برحي ممدد بتابوت
بارد
يا كسرة گلبي وين ذيچ الغيرة
ولك خزعل تشوفني الطم ومشعت شعري
وملخت خدودي وانت ساكن بارد
وين طوووولك اليهز الگاع اگعد وشوفني
ولك شلوووون اهون عليك تعوفني مثل
ثوب تلعب بطرفة الريح
عيوني غوشت وصرت أشوفهم يتماوجون
طحت على اختي وهي تصرخ شالتني ذرعان خواتي
وهاجس يصيح
-محددددد تروح ويانه
خلنها بالبيت بس تروح تمووووت
ونييييت وگوه حچيت
-اخذيني نعمة بس اظل اكتل رووووحي
فارت روحي وصرخت وهن خذني يلبسني
وردت هوسة الزلام والنسوان ترست الحوش
وانشالت جنازته عالچتاف والچبير گبل الزغير
يبچي فر القرية بلا اله الا الله وردو للبيت
صاح رجل نعمة
-فرووو بهيكل بيته چان حلم عنده يخلص بناء
فرو عالهيكل ومثل خفة روحه الطيبة
تلفلف تلفلف وصعدت الزلام السيارة
رجل نعمة وسنية وهاجس يسوق ونعمة
وياي رابطين تابوته بالحبال
ردت أصيح وگفو السيارة وأفك ذيچ الحبال بسنوني بس الصوت انحبس ببلعومي وصار بمچانه غصة تذبح
طول الدرب ماغفلت عيني واون ونين المطبر
ماادري بروحي وبدون شعور احچي واختي تبچي
وياي
-يا هضيمتي والله خزعل صدگ متت
وهسه ممدود فوگ الحديد
وأنا الچنت أظنك جبل ما تهزه ريح
الحبال الشدو بيها تابوتك أهجسها
انشدت على رگبتي أنا
عاينولي رجل سنية ونعمة وعيونهم تهمل صرخت
-ماعنده خووووان يستاهل تبچون علي
وحيد مايوم ضر احد
لطمت حيل وصرخت
-هذا خزعل هذا الما يوم دنگ راسه لغير الله
الموت حق يا بعد حيلي بس هالموووووته مو الك
ياااااا يمه ياهلال العيد النذبح گبل وكته
لمت ايديه نعمة وهاجس يصيح بيها
-لمي اديها راح تطگ وتموت
عاينتلها وراح صوتي گوة طلعت الچلمة من لساني
-ولچ نعمة السيارة ماتمشي بجنازة خزعل
جاي تمشي على ضلوعي تطحنها طحن
ماگدرت احچي بعد طاح راسي على متن
نعمة وغابت روحي ومااميز أصواتهم
ادين نعمة تگلب بوجهي وصوت ازلام خواتي
وهاجس ينشدون خاف بيه شي ونيت ونعمة
بچت
-مابيها شي غابت روحها
ومشت بينه السيارة لأرض امير
المؤمنين وغسلو وزار الأمام
ووصلنا للنهاية انحط تابوته بالگاع
وانشال بين الادين يا بويه من نزلوا جسمه
بين اديهم
هجست روحي هي التهاوت للگاع
شفتهم وهم يحلون ذيچ الحبال عن تابوته
هالحبال خلن بگلبي اثر ماينمحي لو يمر دهر
وگفت واختي ساندتني
أعاينلهم وهم يعدلون بحفرته
چنهم يحفرون بوسط روحي
وصاح الدفان عاونوني يرحمكم الله
صحت
-ابو علييييي چان اخيك ويحبك شيله
ماااااردت هاجس الكسر گلبه بيوم يمد ايده
لجنازته شالو والجنازة چانت ثگيلة
مو ثگل لحم وعظم لا والله
چانت ثگيلة بهيبتها ثگيلة بالقهر الحمله من انسجن
بالهم الشافه وسوا بي هاجس ثگيلة
بالموت الغدر بي
من نزلو للحفرة ردت اصرخ سدت حلگي نعمة وبچت
-مايجوووز ولچ تظل عينة شابحة وراچ
اقررريله وادعي بكلبچ
من حطة بلحده هجست
الدنيا صغرت بعيني
وصارت گد هاي الحفرة
الوسدو بيها
يقرة الدفان وصحتله
- هالله هالله بي تراه عزيز
تراه ضوه عيوني نزله بهداي
لا تلچم جروحه بالتراب
مسح وجهه رجل نعمة وطلع من الحفرة
وهالو التراب علي
وتغطى الوجه الچان مثل الگمر
وغطى العيون اللي ما يوم عاينت للحرام
قره الدفان وخلص ومشى وگعدنه يم ترابة الرطب
وانا روحي تعدد
-الگبر ضيگ يابعد روحي
الگبر ضيگ وانت خلگك وروحك فضية
ماتحب الضيگ شلون يوسعك يا گبر
شلون رضت تضمك الگاع
حطيت راسي على ترابة الرشة الدفان بماي
الريحة فاحت كلها طيب بس مرت بريتي مثل الجمر
مارضيت اعوفه ساعة زمان اسولف وياه
صاح هاجس
-يالله خويه ابو علي امشونا ورانا
درب والدنيا صارت غروب
عاينتله من گومتني نعمة وگفت ضللت على
ترابة بعباتي
- تمنيت أصير نخلة اوگف على راس گبرك
اضلك بسعفي عن حر الشمس
واون عليك ويه هبوب الريح طول العمر
مشتني نعمة وانا اتلفت وهاجس واگف
يم الگبر ماادري شعنده شويه وصعد
ورديت ايديه فارغة لا من حبيب ولا من
گريب
هو چان كل شي ياعشرته الگصيرة
بس يامحلاها
ياايامه الماتنسي دوم
رديت لبيت فارغ وحيدة مااملك بالدنيا
بس ريحانة والجاهل البطني وابو
طول المعدل راح
اول ليلة غرغرني الموت من ردينه ماادري بروحي
اغيب واوعى وبتي ماقبلن خواتي ارضعها لأن حليبي محترگ خاف امرضها گالن نفطمها
ثاني يوم عله صوت الصراخ بالحوش
وبده العزة مال النسوان وطبن نسوان
عمامه وبناتهن اخواتي تلگنهن ماردت
اسوي هوسة بفاتحته
زلام القرية لزمو فاتحته والناس
من كل صوب اجت بچه علي
القاصي والداني
وثالث يوم فضت الفاتحة بالليل
صاحني رجل نعمة تلثمت الزم
عدة واخواتي يسندني
صاحلي بالباب
-خوية ام ريحانة هاي ابو كمال
يحاچيچ
سمعت صوته ورة الباب
-عظم الله اجرچ
مارديت حاجيت نعمة
-ارد احاچي وحدي
صاحت رجلها وخرو راحو لاخر الحوش
مد راسه وگابلني ماحطيت عيني بعينة
-سؤال واحد بروح عمي تجاوبني علي
-امريني
-انت كتال خزعل انت الرملتني ويتمت جهالي
-لا وروح ابوي مو انا نشدي بليلة الغاب
ستوني راد من بغداد تدرين
چلوتي انشالت وبعدني اداوي اشوفلي
طب حتى ارتاح من الوجع
-احلف بكلام الله
-والقرآن عليه وعلى عافيتي وولدي ماادري بي
معتقلينه ولا وين ولا ليش
-شلون چا جبت تابوته بيدك
-رجل نعمة من لگاه أجاني للمركز
علمود اجيب سيارة چبيرة ولخاطرچ اجيت
-عوووف خاطري كسرته چبيرة وما نسى سوايتك مات وگلبه محمل هم وقهر......
ماخلاني كملت مد ايدة لجيبه
طلع چفية صغيرة ملفوفة مدها الي
-هاي المغسل لگاها بجيبه
ظلت امانة يمي
وهاي ساعته واوراقه وقلمه
حطهن بيدي بچيت ومشيت اتوچى
عالحايط صاح وراي بهداي عن لا واحد
يسمع
-حالليني بداله عذبة
درتله وجهه ابتشر عباله اريحه
-ما محالل وما موهوب عني وعن
خزعل فرگتنا سنة واحد عن الآخر وخليت
بنيته تكبر بلياه شهور
السويته وياي بالدفنة سويته وياك ويه
عمي من داريته سدددددد بسد هاجس
مايركبني فضلك وللمممممموت ابقى
اذكر كسرة گلب خزعل بسبب عملتك
روح الله يجازيك
وجهة صوفر وطلع وانا دشيت حجرتي
بنيتي نايمة بالقريولة والعبرة
بصدرها تريد ابوها
فتحت الچفية وطاحت عيوني
عالگلادة والتراچي والمعضد عناگيد
العنب مشذرات بشذر احمر طاحت
دموعي عليهن حضنتهن وساعته احب
بيها وخليتها على گلبي ومرت حچايته براسي
-شفت تراچي وگلادة ومعضد عنگود عنب
كل ماامر من صاحبي الصايغ عيني تصدلهن
اليوم يزينن رگبتچ واذانچ
اجة الذهب وانت ماجيت خزعل
شعبالك يهنالي لبس
لو تهنالي عيشة وانت متت محروم
للموت باقية مرتك
وللموت ابقى بسمك
منا لمن ربي ياخذ امانتي
واجيك
غفيت وعبالي وگفت الأذية ليجاي
ماادري بالدنيا مثل حفرة
النار شماتذبيلها حطب تزيد
حرورة
