رواية حكاية ترف الفصل الثامن
شــهـــم
كنتُ اكبر منكِ في العمر٠٠
وكنتِ اكبر مني في الحب٠٠
فالنساء حين تحب 💖
يصبحن امهات
ونحن الرجال
نصغر ونصغر حتى نتلاشى
شهم
چانت أحلى أيامي من بدت قصة حبنا آني وترفه واعترفنا بهذا الحب الي چان مكتوم بگلوبنا
وچانت أحلى اوقاتي من تگعد يمي كل يوم واشتم عطرها ومرات احضن جسدها، وچانت كل يوم امتحان تبشرني بأجابتها الصحيحة والي اكيد تاخذ عليها ١٠٠ كامله
وهذا چان جزء من الوفاء بوعدي لجدي بأن اساعدها بتحقيق حلمها وحلم عمو حسام الله يرحمه بدخول أحد كليات المجموعة الطبيه
بس الي چان مضوجني هو إلحاح أمي المستمر بأن اتزوج وحده حلوه ومؤدبه وتساعدها بالبيت يعني تريدها ربة بيت مو موظفه..
وچنت عايش بحيره، زين هسه شلون إذا عرفت اختياري وقع على ترف الي هي صح بيها كل المواصفات السابقة بس هي طالبه وتريد تكمل جامعة وهم مجموعة طبية يعني حرامات تعوف كل هاي في سبيل الزواج
بس چنت مقرر من تخلص الامتحانات اروح لجدي واحچيله كل شي واطلب منه يساعدني حتى يقنع امي تخطبلي ترف وما تسمعها كلام مو بمكانة ولا تبسمر الها مستقبلا وتگول الها چنه رايدين وحده ربة بيت وتساعدني بالشغل ومن هالسوالف وراح نذبها براس جدي ونگول هو قرر أن شهم ياخذ بنت عمه ترف واكيد محد راح يعترض اذا جدو قرر
بس سفرتهم المفاجئة للشمال صارت عارض حتى ما احچي بالموضوع ويه جدي
وهم ضجت لان السفره راح تكون ويه الأصيفر أمجد الي يوميه امي تسمعني عود ام ترف تگول أمجد يريد يطلب ترف للزواج
ومن تعاركت ويه ترف بليلة سفرهم وچان حقي لأن اغار عليها بس بجيتها الي بغرفتي غيرت كلشي وخصوصاً من شفت دموعها والنوب من حضنتني وآني مادري شصار بيَّ ولوما أمي تصيحني على العشا چان تهورت وياها
وچانت بفترة سفرتهم يوميه تطيني تقرير مفصل عن طلعاتهم وزياراتهم للاهل وچنت أثق بصدق كل كلمة تگولها حبيبتي
وبيوم إلي رجعت ترفه ونورت بغداد بوجودها ، رحنا آني وأمي وابويه نسلم عليهم ونتحمد الهم بالسلامه لكن اتفاجات من شفت أيدها ملفوفة وحچولنا على حادث وگعتها بالحمام قبل يومين من رجوعهم
وبالليل أثناء اتصالنا اليومي چنت احس بحبها وشوگها الي ومو اقل من حبي الها
وبلغتها بقراري أن خطبتنا تتم خلال هاي الايام وبمساعدة جدو، وحسيت بيها كلش فرحت وطلبت منها اشوفها هسه لأن ماجاي اگدر احچي بس بالتليفون
والتقينا بالحديقة وگعدنا على مرجوحتنا وحضنتها قوي حتى يمكن أتأذت أيدها المرضوضه لأن صاحت بألم
ومن ردت ابوسها حطت اصابعها على حلگها وگالت لا شهم غلطنا مره لا تكرر الغلطة مره ثانيه... وانتبهت على نفسي..صح الي جاي أسوي غلط والي نبهني لهذا الغلط تربيتها واخلاقها العالية ولازم يبقى حبنا شريف وبدون اغلاط
بعد يومين تم إعلان نتائج الامتحانات النهائيه للسادس اعدادي وچانت ترفه مثل ما الكل متوقع الأولى على مدرستها وضمن العشره الاوائل على المحافظة
وچانت الفرحة چبيره النا والعائلتنا ، لان راح تدخل كلية الطب بدون منازع
وبهاي الأيام الي چنت مقرر افاتح جدي بخطبة ترفه چان يوميه تصير شغله وتعطلنا عن هذا الموضوع
أول شي ايد ترفه الملفوفه ولازم تبقى أسبوعين ياله يوخرون منها الضماد
ثاني شي بيبي تمرضت واحتمال عمو ليث وزوجته ياخذوها لتركيا للفحص والاطمئنان على صحتها
ثالث شي النگ مال امي وأريدك تاخذ لو فلانه لو علانه طبعاً من معارفها والي أهم شي تكون ربة بيت
وصدگ مثل ما گال المثل كثر الدگ يفك اللحيم
وبهذا اليوم الي غير كلشي بحياتنا آني وترف
بدت امي سوالفها وياي ويمكن چانت شامه خبر بالي بيني وبين ترف
[ گالت يمه شهم أخذها نصيحه من مره چبيره وشايفه اشكال ألوان من الناس ، يمه لا تاخذ وحده طالبه وبعدها تدرس (طبعاً هي أكيد تقصد ترف بس تسوي عود حديثها عام وما تقصد أحد معين ) يمه الطالبه بعدها زغيره وما شايفه شي من الدنيا واكيد من تروح الدوامها راح تشوف هواي شباب من طلاب وأساتذة وموظفين وتشوف بيهم ابو شكل الحلو وابو الشخصية الجذابة وابو اللسان الحلو المتملق بالكلام وابو الأناقة والجنتله والوسامه الي تتمناه كل بنيه، وبهاي الحالة راح تبقى تسوي مقارنات بينهم وبين زلمتها (تقصد رجلها) وراح تبدي بينهم المشاكل وأكيد لا سمح الله راح ينتهي زواجهم بالطلاگ]
وهنا آني بقيت افكر والحسبات بدت تملي راسي ورغم آني ما ناقصني شي والف الي تتمناني وعلى گولة امي عندي شخصيه ووسامه وجنتله ولسان حلو وهم رتبه عسكريه يحسدوني عليها هواي ناس وهم عندي ثقه بترف وبأخلاقها وبتربيتها بس مع ذلك أخذت الموضوع بجدية أكثر من اللازم وگلت لازم اتأكد من ترف ، اتأكد من حبها الي ، هل هو حب حقيقي وناضج لو هو حب مراهقه وممكن يهتز عند ابسط مشكله تصير بيناتنا
وقررت اختبرها...
خابرت عليها وأثناء المكالمة الي چانت كلها حب وأشواق وهم تحمدتلها بالسلامه لان فتحت اللفاف من ايدها وصار هذا الحديث بيناتنا :
- شهم : ترف ممكن اطلب منچ شي
- ترف: حبيبي عيوني وروحي وگلبي الك
- شهم: تسلمين حبي انتي روحي وگلبي 💖 بس الحقيقة اريد منچ تسويلي شغله مهمه أو اعتبريها خدمة الي حتى نبدي بالخطبه والزواج
- ترف : اعتبرها تم (چنت أتصور راح يطلب مني اتحجب أو اغير من لبسي ويكون محتشم)
- شهم: اريدچ اتأجلين التقديم للكليه هاي السنه وتقدمين على ألسنة الجايه
- ترف ........
- شهم : ترف... ترف ... الو... ترف..
- ترف:ها..وياك ..وياك ..جاي اسمعك
- شهم : تگدرين اتأجلين التقديم هاي السنه بين ما تتم الخطبه والزواج وعلى السنة الجاية اقدملچ للكليه الي ترديها
- ترف : شنو علاقة التقديم بالخطبه والزواج
- شهم : حتى تكون أول سنة بزواجنا مستقرة وبدون مشاكل اريدچ يمي بلا دوام وتأخير
واكيد انتي إذا يصير عندچ دوام ودراسة وتحضير راح يأثر على بيتچ وحياتچ الزوجية
- ترف : يعني انت بالمختصر تريد تخلي لو خطبه وزواج لو دوام وكلية ؟؟؟؟
- شهم : (بصوت شويه عالي وبعصبيه ) لا غلطانه ليش ما تگولين بالمختصر آني جاي اخلي لو تحبيني وتضحين في سبيل هذا الحب أو دوام وكلية
- ترف : على العموم افكر واردلك خبر.. يله باي
وسدت التليفون حتى قبل ما ارد عليها
كلش صرت عصبي من هذا تصرفها ، دگيت عليها مرتين وتلاثه ماترد النوب غلقت الموبايل وحتى اذا ادز مسج الها ما راح تشوفه...
ثاني يوم چنت مقرر بالليل من اخابرها اعتذر عن كلشي حچيته البارحه وأأكد الها أن دراستها ومستقبلها مهم جدا عندي واصلا راح اساعدها بتحقيق حلمها وتصير دكتوره
بعد الدوام رجعت للبيت ، تغديت وردت أصعد لغرفتي ارتاح شويه سألتني امي
- ها يمه شهم ما لگيت وحده تكمل وياها نص دينك ؟؟؟
- اي يمه لگيت
- منهي
- آني مادري شلون گلت وبدون تفكير لگيت الي راح ترضين عليها
- ماتگول منهي
- (ضليت افكر بيني وبين نفسي منو منو ياشهم ها اي ماكو غير منى اخت صديقي ثامر بنيه زغيره بذاك الوكت ويمكن هسه متزوجة)
- اي يوم آني رايد منى بنت ابو ثامر.. اخت صديقي ثامر تذكريها!!؟؟
- منى .. منى ..(بتفكر)..اي هاي البنيه الحليوه.. اي خوش ما ختاريت.. ناس طيبين وسمعتهم حلوه بالمنطقة.. ويمكن آخر مرة شفتها بالفاتحه مال امها الله يرحمها... بنيه مستوره وماتطلع
- يله يمه اروح انام
- روح يمه ربي يفرحك ويرضى عليك مثل مافرحت گلبي
وآني بصراحه بحچيي هذا چنت بس رايد تفك ياخه مني خصوصاً هاليومين وهم اختاريت اسم هاي البنيه لان اكيد هسه هي متزوجة ، همه ناس محافظين وبناتهم يزوجوهن وهن زغار... وهم اريد اعتذر من ترفه على مكالمتي البارحه وياها واروح الجدو واحچيله كلشي وهو يخطبها الي وهم يخلي امي أمام الأمر الواقع وترضى بترفه زوجه الي وچنه الها
