رواية عشكت جنوبية الفصل الثامن بقلم نسرين الاسدي
شلونكم بنات انا اسفة ما نزلت البارحة بس راح يصير التنزيل بين يوم ويوم لأن عندي صفحة ثانية وثلث قصص فصحى جاي انشر بيهن بس ماراح اطول اكثر من يوم
وهذا البارت فوك الألفين كلمة تعويض للتأخير بس انتم شجعوني شوية وصوتوا وانطوني رئيكم
متابعة ممتعة 😘
*
*
*
*
قاسم: احنة موافقين ننطيه بتنه بس بشرط ..
يوسف: شنو هو؟ !
قاسم: لازم يجيب اهله ويجي يخطبها منا بطريقة صحيحة وطبيعية وهالشيء عالمود بتي بعيد عن قضية هيثم
أشرله يوسف براسه وگال: ان شاء الله توصل الرسالة ..اودعناكم
**
ليث: جنت جاي ادخن وافكر هسة اكيد يجيلي يوسف ويگوول موافقين والليلة راح اخذها وياي ورانا طريق بعيد
وشوية ودخل يوسف
باوعت عليه بمعنى احجي ..نزل عيونه وگال: استاذ ليث ..ابو هيثم يگول هو موافق ينطيك بنته
ابتسمت ورجعت بضهري ليورا جنت اعرف راح يوافق
گال: بس هو عنده شرط
ضيگت عيوني وگلت مستغرب: شرط؟ !!
يوسف: يريدك تروح لبيتهم وتخطبها منه واهلك وياك استاذ
ضحكت حيل ..:لا هو اكيد دا يشاقه وياي ..يعني فوگ ما اني اريد ارحمهم واطلعلهم ابنهم بدون ما يدفعون شيء يشرطون ..لا صدك تمادوا هذوله
كمت عالسريع وگلت ليوسف: روح دبرلي شيخ عالسريع والحگني لبيتهم
يوسف ضل يمتمت وگال: بس استاذ همة ما موافقين شلون ناخذ الشيخ ونروح هيج
باوعتله وعطت بيه: يوووسف نفذ بدون ما تناقش يلاااا
**
هنادي گعدنا كلنا بالطارمة ومنتضرين ليث ذاك يردلنه الخبر
گال فهد: بابا احسن شيء سويته من شرطت عليه هيج شرط راح نكسر غروره هذا الكـ.... استغفر الله
جاوبه بابا: اهدئ ابني...انا اختاريت هذا الشرط مثل اخر محاولة الي واخر شيء اگدر اسوي عسى يأثر عليه
گالت امي: وين الله وأهل البيت ويطلعون اهله خوش ناس مو مثله ويوگفونه عد حدة هذا الطاغية الظالم
ألتفتلها بابا وگال: ان شاء الله ..وياريت يجون لأن ماعندي بعد اي حل ثاني
شوية واندگ الباب
فتحه فهد وطلع هو دخل عالسريع بدون لا سلام ولاكلام وصاح: وين ابوك ..ابو هيثم وينك؟
راحله ابوي واحنة دخلنا للغرفة عالسريع وضلينا نسمع حجيهم
قاسم: تفضل يا استاذ خل نحجي
صاح ليث: لا يا ابو هيثم اني ما جاي حتى اگعد
اني جاي حتى انطيك اخر ربع ساعة تقبل نعقد هسة وبنتك تصير مرتي يا اما احسب ابنك راح يگضي حياته بالسجن ومن يطلع محد راح يقبل يشغله وياه لأن خريج سجون وحرامي
وانتبه ما عندك غير ربع ساعة وبس واني راح انتضر هنا على ما تخلص الربع ساعة هاي
صاح فهد: هي انته شنو معتبر نفسك احنة مانريد ننطيك بتنه هو غصب؟
ضحك وگال: بسيطة ما تقبلون گولو هيج من البداية واني هسة راح اخابر المركز حتى انطيهم الدليل الأخير الي يحول اخوك من متهم على ذمة التحقيق الى مجرم ينتضر صدور الحكم
رفع تلفونه وخله على ذانه
احنه شهگنا كلنا وامي ما تحملت عافتنا وطلعت صاحت لبابا: قاسم ..ابنا راح يضيع
وانتجت على الحايط مبين هبط ضغطها لأن هي ما ماكله من ايام
احنة صرخنا وطلعنا وراها
اجه فهد يم امي عالسريع ولزمها حتى ما تطيح
وصاح ابوي: موافق ...لا تخابر ..اسمعني شوية
گال والتلفون بعده على ذانه: اني اسمع
گال بابا: اني موافق بس ماريد بتي تطلع هيج طلعة انته مو عندك اهل ليش ما يجوون؟
گال: لا احنه راح نعقد وراح اخذها واطلع لبغداد الليلة وبالوقت الي اركب اني بي سيارتي وبنتك وياي راح يدخل هيثم عليكم واخلي اخر دليل عندي تحسبآ لأي تصرف منكم
ودار عيونه على فهد
ضغط تلفونه وگال: ادخل هسة يوسف
انفتح الباب ودخل هذا الي يجينه كل يوم ووياه شيخ معمم لازم اوراق وسجل جبير سلموا
وردوا بابا وفهد السلام ورحبوا بالشيخ وگعدوا
گعد هو والوياه من جهة
وابوي وفهد بالجهة الثانية والشيخ بنصهم
وامي جانت چنها مو ويانه لازمه راسها وبس تبجي وتردد كلمة وحدة: حسبي الله ونعم الوكيل
گعد الشيخ وبدئ سم بسم الله وصلى عالنبي وبعدين بدئ يقراء ايات
وابوي وفهد چانو ساكتين بس عيونهم ما طاحت منه
وگاعدين على اعصابهم
وهو يبتسم بكل حقارة ولا كأنه راح يزوجني غصب
اخر شيء سأل الشيخ وين العريس؟ !
هو جاوبه وگال :اني
ألتفت الشيخ لأبوي وگله: انته والد العروسة؟ !
جاوب بابا بصعوبة وبالگوة يطلع الكلمة: اي شيخنا
گال وانتم الشهود؟ !.....انطوني جناسيكم
ألتفت اله وگال: شكد الغايب والحاضر؟ ! والعروسة مستلمتهن لولا؟ !
جاوبة: الحاضر عشرين مليون ياشيخ ومقبوضات عدهم ..اما الغايب ثلاثين ...وابتسم
بابا وفهد ضلت اعيونهم تجدح من العصبية بس مابيدهم شيء مادام هيثم بعده مسجون
كمل الشيخ كل شيء وگال: يلا وين العروسة خل أخذ منها الوكالة
أشر بابا لفهد واجه يمي وگال: عدلي حجابج ولبسي عبايتج خوية وتعالي وياي
انا ما گلت اي شيء ضليت بس ابجي صح انا مغصوبة وهو بالذات كرهته كلش بس هيثم اعز من روحي وما جان راح يخليني احتاج شيء لو جان موجود وهسة هو محتاجني لازم اساعده
طلعت وكف الشيخ من ورا الباب وسألني وانا جاوبته بالجواب الي طلبه مني
وطلع كمل العقد وسجلنا مزوجين وتبارك لأهلي واله هو
وهيج صرت مرته مرت الشخص الي عذب اخوي وعائلتنه كلها
حضنتني امي وخواتي وضلن يبجن وانا ابجي وياهن
وبعد ما خلص كل شيء وطلع صاحبة حتى يوصل الشيخ گال هو: شنو يا عمو ابو هيثم ماراح اسمع هلاهل لا شوية عصاير وضحك
گال فهد : هسة صار الي ردته وخذيت اختي بدون مهر حتى لأن بعدك شاك بهيثم بس احنه اتفقنا لازم اطلعه هسة وتمسح كل دليل عليه لأن كل هالأدلة جذب
فتح سترته ورخى دكم القميص وگال: هيثم راح يجيكم من نكون اني ومرتي بالطريق لأن اني ما اگدر أئمن بيكم بصراحة
گال بابا :كافي لا تلعب علينا ..طلع هيثم يلا ..الليلة
بس لازم تتأكد من شيء يا استاذ ..انا راح ارجع بتي منك لو جان اخر يوم بعمري مستحيل اخليها وياك بس خل اجمعلك الفلوس وساعتها راح اضربها بوجهك واجيب بنتي
ضحك بكل قوته ..وبعدين گال: صار يا عمو اني راح انتضرك بس احتمال بتك ساعتها راح تحبني وتعوفكم عالمودي ..وغمز
تعصب فهد وصاح: بأحلامك بس لأن هنادي تكرهك مثل ما كلنا كارهينك ولا يجي يوم وراح تحس بشيء عليك لأن انته واحد نذل وحقير والله بالمرصاد يا استاذ ليث
گال هو: ماشي نشوف ..ألتفت شافنا احنة وامي واكفات اباب الغرفة
صاح: تعاي هنادي ..تعاي يازوجتي لازم نروح
لزمت انا هدوم امي حيل وضميت نفسي وراها
حضنتني هي وگالت: وين تجي؟ !
لا هي ماتروح وياك هسة ..خليها الليلة وباجر ..
سكتت وما گدرت تكمل
گال هو: لا اني اليوم ما اطلع قبل لا اخذ زوجتي وياي ما يصير المراة تخالف زوجها
ألتفت لأبوي وگال: مو صح كلامي ياعمو؟
سكت بابا وما گال شيء
وفهد جان لازم نفسه عنه بالگوة
بعدت انا عن امي شوية وصحت ودموعي ينزلن : انا مااريد اروح وياك عوفني هنا ..بس الليلة حتى اودعهم لأن بعد ما اشوفهم
أبتسم هو بس هالمرة ابتسامته مختلفة مو مال حقارة وگال: اخيرآ سمعت صوتج مرتي؟ !
مبروك عالخير بالزواج لا تهتمين للبدلة والصالون مو مهمات
شوية وگال ابوي بحزن وچنه حابس دموعه گوة: خليها الليلة وباجر الصبح تعال عليها راح تلگاها جاهزة
گال: اني مواعد اهلي راجع الليلة لهلسبب ماراح أكدر اخلف بوعدي بس راح انطيكم وقت للفجر وراح اجي حتى اخذها بعد الأذان مباشرتآ
هو طلع وانا ركضت لبابا وحظنته وضليت ابجي وأناشق وهو حظني ونزلن دموعة ما گدر يحبسهن اكثر
ما مصدگة راح افارگ اهلي وهاي اخر ساعات الي وياهم
اجه فهد ولحگنا ليلى وحياة وامي وگعدنه كلنا على بجيه وحدة
**
ليث: رجعت للفندق واني حاس براحة مو طبيعية اخيرإ سويت الي براسي وازوجتها وراح اخذها وياي دخلت للحمام سبحت وطلعت
اريد اطلع ملابسي ودگ التلفون ...طلع بابا
همزين اتصل لأن اني اصلآ كنت ناوي اتصل بيهم واخبره بزواجي
بابا: هلو بابا ليث شنو وين ماوين شخبارك؟ ! ليش هيج گاطع بينه لك؟ !
گلت: هلو بيك بابا اني تمام شخبارك انته؟ ! وماما ولبنى؟ !
گال: احنه الحمدلله بس مشتاقيلك شنو شوكت ترجع؟ !
: بابا حبيبي اني هم مشتاقلكم بس ماضل شيء ان شاء الله باجر الصبح يمكم
بابا بفرحة: صدوك ابني والله فرحتنا يلا راح اخلي امك تسويلك اكلاتك الي تحبها لا تتأخر علينا ابني
: لا بابا ماراح اتأخر ..يلا تصبح على خير وبوسلي ماما
ضحك وگال: اي ليش لا بس ترى انته تعرفني اني ماراح ابوسها بوسة وحدة
ضحكت وگلت: ماشي بكيفك بعد ..يلا انتضروني باجر
سديت التلفون وباوعت للساعة ب12ونص گلت يلا ماضل شيء
خل اجهز نفسي وحاول اناملي ساعة قبل الموعد
**
هنادي: رغم كلنا چنة تعبانين وضايجين بس امي ماحبت اطلع من البيت هيج واديه فارغة جهزتلي غراض بسيطة وحياة وليلى طلعلي اجدد هدوم عدهن انا ما قبلت بس هنة لحن عليه وگالن اعتبريهن هدية عرسج
وعجنتلي امي حنة وحنت ادية ودموعها ما جافة وبابا وفهد حاولوا يسوون نفسهم نايمين وصعدوا للسطح
كعدت امي تحني لي ادية وخواتي يمي عيونهن مدمعة
ألتفتت الهن وگالت: حياة، ليلى صعدن فوك يمه خل احجي ويه اختجن
گالن: لا يمة عوفينه يمها فدوة هي بس هالساعات ويانه
گالت :ادري يمة بس صعدن شوية على ما احجي وياها ورجعن لأن هي هسة صارت مزوجة وانتن بعدجن صغار على هالحجي
أشرن بروسهن وصعدن
گالت امي: حبيبتي هنودة انتي هسة صرتي وحدة مزوجة ورجل وبيت ومسؤولية لازم اديرين بالج وتصيرين وحدة حوك وقوية لا تخافين ان شاء الله احنة ما نتأخر عليج
ونرجعج بأقرب وقت بس انتي هسة صرتي مرته وهو أكيد راح يريد منج حقه الشرعي وانتي لازم تنطيه حتى ما يأذيج
لأن هالرجال انا ما أمأمنه بيه واخاف عليج منه هو ما يخاف الله واذا امتنعتي عنة الله يعلم شراح يطلع عنج من حجي واحتمال يسببلنا فضيحة انتي تفهميني حبيبتي؟
گلت: اي يمة فاهمتج ان شاء الله راح احاول اصبر عليه لحد ما تجولي واحاول ارضي اهله واتحمل كل شيء
خلت ايدها على جتفي وگالت :وهسة خل احجيلج عن الزواج واعلمج الشيء الي ماتعرفينه
وبدت امي تحجيلي عن علاقة المراة والرجل وشنو لازم يصير بأول ليلة
انا خفت واستحيت بنفس الوقت لأن عمري كله ما سامعه بهاي المواضيع ولا امي حاجيتلي شيء عنها ضليت اتخيل الموقف شكد راح يصير صعب عليه ودمعن عيوني
مااعرف ليش بس تمنيت يصير اي شيء وما يخلي الفجر يطلع ويجي هو ياخذني وياه تمنيت الليلة اتطول اكثر وما يجي الصبح
بس لا جان الليل اگصر من ما اتوقعت وأذن المؤذن وانا نايمة على رجلين امي وهي تلعب بشعري وتبوس راسي وتبجي
نزلوا بابا وفهد وحتى حياة وليلى وعيونهم حمر مبينين كلهم ما نايمين البارحة
صلينا سوة وانا قررت اسويلهم ريوگ واقنعهم يأكلون لأن اخر مرة راح أكل وياهم ومادري شكد راح ابقى يلا ارجع مرة ثانية
گعدتهم وقنعتهم بصعوبة نتريگ سوة ابوي وامي مانزلوا اعيونهم عني ومبينه العبرة بعدها مكسرة بگلوبهم
حبيت أغير الجو ..ضحكت وگلت: شوفو هسة انا راح اروح عنكم وبعد ما تضل عدكم وحدة تضحكون عليها وتصيحولها ام البول
ابتسموا همة كلهم وعيونهم متروسة حزن
وگال فهد: بس حتى لو صرتي مزوجة تضلين هنادي ام البول مو حسبالج ننسى
گالن حياة وليلى: اي وبعد محد يزعجنا الصبح ونضل نايمات براحتنه
ابتسمت امي وگالت: معناها انا راح يطيح حظي بالبيت ابحدي لأن هنودة النادرة راح تروح وتضلن انتن الفاهيات
گال ابوي: وبعد محد تسويلي أكلتي الي احبها وتهتم بحديقتي بغيابي..دمعن عيونه وكمل...وتتلگاني يومية بضحكتها الحلوة
هنا الكل دنگ وبجة وانا حظنت بابا عالسريع وبجيت
شوية واندگ الباب وعرفنه هو الجاي اكيد
فتحه فهد دخل هو مبتسم وكاشخ لابس قاط اسود وقميص ابيض وريحة العطر الي راشه ترست البيت
گال: صباح الخير ..ما تأخرت عليكم مو؟ !
يلا وين زوجتي هنودة راح نتأخر يلا تعاي عالسريع
شفت انا بهذا الوقت انتهت الليلة وهذا الوداع ويه اهلي حظنتهم واحد واحد وهمة كلهم يبجون وما گدرو يگولون غير: انتبهي لنفسج
وهو واكف على اعصابه وكل ساع يصيح يلا
ودعت اهلي كلهم وطلعت وياه امشي على كيف وگلبي ضل عدهم
وصلت للسيارة والتفتت عليهم كلهم طلعوا وراي حتى امي وخواتي
هو جان يباوعلي بس مبين ما تحمل التأخير لزمني من ايدي وفتح بابا السيارة
وگال: اني گلت يلا
ابتسم لهلي وگال: استعدوا هيثم جايكم بالطريق
فتح باب السيارة ودخل وساق عالسريع وانا ضليت اباوع ليورا لأهلي لحد ما بعدت السيارة واختفى البيت عن عيوني ودموعي غركن وجهي
ليث: اتأخرت شوية على ما جهزت نفسي وحتى تودع اهلها اكثر لأن ماراح اخليها تشوفهم بعد واجيت خذيتها وياي صح جانت بدون مكياج وملابسها عادية بس جانت حلوة والحنة الي بديها خلتها بعد احلى عيونها صايرة حمر من البجي بس خليها تبجي هي ما تدري هاي اخر مرة تشوفهم وبعد حتى بالحلم ماترجع
جانت ساكتة طول الطريق وتشهك بسكوت
ما عجبني هالشيء
عطت بيها: كافييي ..شنو وين ماخذج اني للأعدام قابل؟ !
دكافي مو صدعتي راسي ..صارلنه ساعتين بالطريق وانتي بس تبجين ..سمعيني زين ترى اني ما اتحمل والصوت يزعجني لهلسبب اسكتي
گالت بصوت مخنوگ وبالگوات يطلع : انته جبرتني وخذيتني من اهلي ..وراح تاخذني لغير محافظة ..
وتريدني ما ابجي؟
ضحكت وگلت: ويعني على الأقل راح تعيشين عيشة ثانية مختلفة عن عيشة اهلج وطلعتج من بيتكم القديم هذا
گالت: هذا البيت الي ما عاجبك عشت بيه احلى ايامي وماراح تنعاد بغير مكان وهذا البيت بيه اغلى ناس على گلبي
ابتسمت لحجيها وگلت: المهم انتي هسة مرتي ولازم تعرفيني زين صح؟
اني ليث وابوي سامر امي اسراء واختي لبنى وبس هاي هي عائلتنا وقرايبنه بغير محافظات مايزورونا هواي احنة معروفين كولش وطبعآ احنة وانتم مختلفين من السمة للگاع
وانتي لازم تتعلمين كل تقاليدنا وتنفذينهن بس مو هسة خل نوصل للبيت وراح احجيلج عنهن
نزلت راسها وگالت :مايهمني ولا اريد اعرف
وگفت السيارة وگلت بعصبية: لا راح تعرفين وغصبآ عنج
باوعت الي واخ من نضرتها هاي گالت: شنو انته كلشي غصب؟ !
لزمتها من فجها وگلت: اي انطيج فرصة تنفذين برضاتج ماكو راح اغصبج بكل شي حتى بالحجي والتصرفات ..مفهوم يا هنودة؟ !
ضلت تباوع بعيوني وماردت بشيء
واني ركزت عيوني على شفايفها اوف شكد اشتهيتهن وليش لا هي مرتي هسة والي اسوي بيها الي اريدة
سحبتها الي وبستها حيل شفايفها تخبل حسيت ماريد ابعد عنها
بس هي ضلت تضرب على صدري
بعدت وعطت بيها بعصبية : هاي شبيج؟ !
گالت هي وكأنها خافت من نبرتي: انا...انا...
تنفست بنفرزة وگلت: كافي اريد اسوق بدون صوت
**
هنادي: ماعرف شنو صارلي لمن تقربلي وباسني حسيت جسمي كله اتجمد وگلبي ضل يرجف بس جمعت كل قوتي وسيطرت على جسمي وضليت اضرب صدره بس حتى يبتعد عني
ولمن صاح بوجهي خفت كلش وردت ابجي بس اذكرت حجي امي وحاولت اسيطر على دموعي بعدها لا حجيت شيء ولاهو
لحد ما وصلنه لبيت كلش جبير عمري كله ما شايفه بكبره وگدامة زلم ثنين لابسين قوط ولازمين سلاح
انا خفت بس نزلت وخذيت جنطتي وياي
هو گال: عوفيها بالسيارة
بس انا نزلتها
وضليت امشي وراه خايفة من هذولا الي عدهم اسلحة
وصلنه للباب
ألتفتلي وگال: راح ندخل للبيت واهلي مايدرون اني ازوجت بس من ندخل انتي لا تحجين اي شيء مفهوم عوفيها عليه
وضغط على جهاز بالحايط
وانا گلبي يرجف وخايفة من اهله وشلون راح يتصرفون وياي
