رواية سداد وبنت الفصل التاسع 9 بقلم الزهيريه

من يخونك مره سيخونك الف مره 

لا داعي ان تشرب البحر كله 

حتى تكتشف ان ماء البحر مالح 

ألق/ صعبه إنتي بنص اهلچ وتشعرين بالغربة وغربة الروح أصعب اني عمري كله ما حسيت نزار عمي أبد حتى گلبي ما يرف عليه وأكون صريحه من اخذوا ذوله الملثمين حتى ما نقهرت عليه لان ابد ما شفت منه حنيه من آني وصغيره الى ما كبرت وهو من اخذوا ورجع تحسه مشوش مو راكز وعبالك اكو شي خايف منه والمصيبة رجع يريد يبيع يطشرنه كلنه محضر كل واحد اله مكان وآني انقهرت من يريد يذب ابويه بمستشفى مال مخابيل وهو مو مخبل بس إرادة الله انه غير كامل مثلنه وحتى هو وأخويه هادئين يعني شنو ذنبهم هيچ يسوي بيهم ويريد يبيعني الي تحسه انسان جرد من الرحمه ومن وگفت بوجهه واول ما غلطت عليه حسيت بضربه على راسي احس بيها فقدت حاسة البصر لمدة ثواني وبعدها ما أعرف منين تجيني الضربة ما اعرف واني خليت أيدي على راسي وگعدت بالگاع واصرخ بعلو صوتي 

بعدها حسيت بوجع بعكس ايدي اليمنى بس الله اليعلم بي عمري كله ما حاسه بهيچ وجع وبعدها سمعت صوت 

كونه وهي تگول/ يمعود أنت عندك عقل البنيه راح تموت بيدك گول يا الله 

وگوه كونه خلصتني من عمي نزار ومن انتبهت على كونه تحچي ويايه بقيت اعيط يامن احد يعيط ويايه وكونه تگلي / ولچ بس گليلي شبيچ وانتبهت على ايدي 

ألق/ خاله أيدي والله راح أموت 

كونه / ولچ هاي ايدچ مورمه خاف رض او كسر ما نعرف 

الق / وبقت كونه صيح على عمه نضال الي اجتي تتمايل وتعوج بحلگها وگفت گدام كونه وهي تگول / نعم عفيه هذا المهجوم كل راحه ما بي كون الله يهجمه أكثر ما هو مهجوم 

كونه / عيني نضال خطيه هاي ألق أيدها مورمه خاف بيها شي 

نضال /اي واني شعليه هذا عمها سوه بيها هيچي قابل اني هو هسه طلع من يرجع خلي يوديها عيني بعد لا صيحون عليه أريد اروح على أبني 

الق / ومن راحت عمه نضال ظلت كونه تهز بيدها 

كونه / هسه هو طلع نزار تعالي نروح على هذا أبو وهاب يسوي فصوخ الأيد والارجل عسى فصخ ويسوي 

الق / وكونه اخذتني للغرفة وطلعت شال من الكنتور ولفته على راسي شلون ما چان وطلعنه للگراج جرت العباية مال نضال من على الحبل وهي تگلي لبسي عباية هاي الحيه المن تريد العبايه يخلوها على تابوتها 

وطلعنه تسحل بيه واخذتني على بيت يبعد عن بيتنه تقريبًا باربع أفرع وهي ما دگت الباب گبل دخلت  

وهي صيح عيني ابو وهاب نريدك بشغله طلع إلها ولد يمكن عمره يطلع بالثلاثينات 

وهو يگول لكونه / عيني غير دگين الباب وظلين واگفه لما نطلع الچ افترضي عدنه ولد يمشي بالبيت لا ملابس مو عيب شوفي 

كونه/ وليش بالبيت بلا ملابس شنو قابل عدكم داكوزي 

ألق/ والولد من سمع كونه تگول داكوزي مات من الضحك وهو يگللها هسه اصيحلچ ابو وهاب ودخل وبعد شويه طلع وگالنه تفضلوا دخلنه على غرفه أثاثها قديم وبيها واحد رجل عجوز كلش بحيث اني گعدتني كونه مقابيله وهو يگول وينها هاي البنيه 

كونه / عيني حجي يمك البنيه گاعده 

الق / اجتي كونه گعدت يمي وهي تردد حجي البنيه گاعده گدامك بصراحة خفت أكثر من الوجع يعني هو ما يشوف شلون راح يسوي ايدي آخر شي كونه سحبت أيده وخلتها على أيدي واني گبل عطت من الوجع موتني وهو يگلي مدي ايدچ وگوه مديت أيدي وظل يفرك بمعصم أيدي وكونه تگله حجي هي عكس ايدها مو مفصلها وهو يجاوبها الفصخ مو مثل الكسر الفصخ معناها أوتار المفصل متعرضه لضربه قويه لهذا الوجع تحسي بمكان والفصخ بمكان هي تشكي من عكس أيدها بس الفصخ بمعصم أيدها وظل يحرك بأصابعي ويفرك بالمعصم وبعدين غافلني وطگ المعصم واني عطت من الوجع وهو يفرك بالمعصم الى ما صدگ شويه خف الوجع ونصحني احرك ايدي بحركه دائريه والفه بانذج ومن دى نطلع سأل إنتوا منين 

كونه / اني كونه اخت رسمي الأعرج وهاي ألق بنت رياض المنغولي 

ألق / والحجي يگول رياض اني جبتله مره وطلعنه من يم الحجي ابو وهاب وكونه تدردم وتگول والله يا حجي لو ما جايب مره لرياض چان اقلها واحد يحير بواحد مو بثلاثة ورجعنه للبيت ودخلنه وعمي نزار موجود ومن شافني هجم عليه يريد يضربني بس كونه ما خلته وفهمته وضعي وعفته يجعر على كونه ودخلت لغرفتي لگيت ابويه وأخويه واحد حاضن الثاني من الخوف اجيت گعدت يمهم وظليت صافنه عليهم ماكو واحد كاسر ظهري بگدهم واحچي ويه نفسي واگول يا ربي وين اوديهم وين نروح ونخلص من نزار وشره وبعدني گاعده والله حتى شگد مر وقت ما اعرف ودخلت علينه كونه وبيدها صينيه بيها آكل وتگلي ولچ مگموعه بعدني ما مسويه آكل چنت اروكض بيچ يم ابو وهاب ومن جوارين كل بيت ماعون أكلوا والله كريم منا للعشه 

گعدنه اكلنه ومن طلع أخويه يغسل واني ويا اجى عمي نزار ضربه قوي على ظهره بحيث نضرب بالحايط واني سحبته ودخلته للغرفة وبعدين ذكرت هيثم شو هذا اختفى وين راح رجعت طلعت الموبايل اي شي ماكو منه لا مكالمة ولا رسالة أتصلت بي طلع مغلق وظليت أراقب بيتهم نهائيًا هيثم ماكو فص ملح وذاب بس اهله موجودين 

وبعدها صار حالنه والله حال الچلب أحسن من حالنه عمي نزار يضرب بينه أني وابويه وأخويه بحيث اذا موجود بس نعبر عتبة الباب يضربنه او اذا ابويه او أخويه يعله صوتهم يجي يضربنه سگمنه سگم بس اي حل ما عدنه وصاروا الناس هي جيب آكل النه لان عمه نضال سوي آكل بس إلها ولابنها وعمي نزار كله ياكل بره وبعدها ما يقارب شهر العصر نايمه وبين الصاحيه وبين النايمه سمعت صوت چان يتخايلي انه دى أحلم صوت أعرفه كلش زين وهذا الصوت اسمعه يگول وين حبيبتي ألق فتحت عيوني واني أدقق بالصوت لا اني ما غلطانه هذا صوت عمه بسمه بعدين اگول لنفسي لا شيجيب عمه بسمه علينه هاي الله يحبها اخذ عمي زهير حتى تخلص من نزار 

بس رجع الصوت مره ثانية حبيت أتأكد گمت فتحت الباب وصارت گدامي عمه بسمه ولا صدگت عيوني حضنت عمه بسمه وظليت أبوس بيها من عيونها ومن راسها وهي جرت ايدي وباستها 

بسمه/ ولچ الق صايره عروسة تخبلين شلونچ شنو اخبارچ 

الق / وهي دخلت يمي وسدت باب الغرفة وبوست أخويه وسلمت على أبويه وظلينه نسولف وكل شي حچيت إلها گامت تبچي على حالنه وسألتها شجابچ عمه علينه بعد هاي السنوات كلها صار 8 سنوات من رحتي وبعد ما شفتچ 

بسمه/ والله انتوا على بالي بس اني ازوجت بمندلي واهلي شالوا من المنطقه لهذا بعد ما اجيت وحتى أهلي اجيهم مره بالسنه لكون طريق بعيد والله رزقني بولد وبنيه بس قبل كم يوم نزار دزلي خبر يگول خلي بسمه تجي تاخذ حقها بورث زوجها وتوقع تنازل عن حصتها بالبيت 

سداد/ طبعًا اني من النوع الي يحب لازم يوفي يعني اني والله ما بعيني غير زوجتي وبيتي وأطفالي واني حتى مديري واصحابي يرحون ملاهي اني ابد ما أتقرب على بنيه أبد ومن چنت بدوامي دائمآ اخابر على آريا ونسولف وأحسها ما تبالي بيه وحتى مشاعرها بارده بس دائمآ لكوني أحبها وأعشقها اغالط نفسي ومن رجعت وشفت أختي جيهان والله فرحتي بيها لا توصف لكون بعيد عني أهلي ظل حسره بگلبي شوفتهم 

واريا قايمه بواجب أختي خير واجب بحيث أختي جيهان تمدح بيها وبس من سلمت على آريا وبناتي روجيدا بنتي الچبيره گالت صديقة ماما تجي وتدخل وياها للغرفة وماما ظل تعيط تعجبت شنو معنى كلامها 

آريا/ هااااا هاي آم بسام دلتني على بنيه تجي للبيت سوي تنظيف للجسم من الشعر ويوجع وظليت اعيط وذني البنات يخافن عليه 

سداد/ ومن ثقتي بيها ما دققت بكلام روجيدا وفرحت آنه آريا تعتني بنفسها قبل ما إنزل أجازه بس أختي جيهان ما اعرف مثل إلي ما أقتنعت بكلام آريا وبوقتها آني دخلت أسبح واريا بالمطبخ سوي بالغده ومن طلعت من الحمام سمعت جيهان تحقق ويه روجيدا 

جيهان/ حبيبتي يعني شوكت تجي هاي على ماما وتسمعين ماما تعيط 

سداد/ بعدها روجيدا ما مجاوبه واستلمتها آريا على عيب تستجوبين بنتي يعني شنو قصدچ أني كذابه 

جيهان/ لا حبيبتي أني عبالي اني هم تجيبيها الي 

اريا/ حبيبتي ترى أربيل مليانه لحگتني لهنا شوكت اخلص 

سداد/ بوقتها اني سكتت كل الأطراف بس صار تنافر بين آريا وجيهان وبعد الغده گالت جيهان آنه باچر ترجع لأربيل بحجة آنه زوجها يريدها ترجع وشگد حاولت اثني جيهان عن قرارها بس چانت مصمه وبالفعل بالليل حجزت على رحلة لأربيل من مطار بغداد وعلى ثاني يوم رحت وصلتها لمطار بغداد بوستني 

جيهان/ شوف سداد اخذ حذرك من آريا ترى كلام روجيدا مو خالي وأني أريد أنصحك لا تثق بأحد ثقه عمياء كلها تخون حتى صحتك بيوم تخونك 

سداد/ وبعدها صار موعد سفر جيهان وراحت واني جسمي صار بي رعشة من كلام جيهان بس سبحان الله النسوان وحده تفهم على الثانيه اما الرجل مستحيل يفهم على النساء ابد ومن رجعت للبيت الأيام الي بعد ما راحت جيهان صارت كئيبه وملل يعني صارت حياتنه كلها ساكنين يم العلوية أخير شي 

آريا/ سداد العلوية تگول تردون علاج نهائي لمشكلة زوجچ بحيث يرجع طبيعي مثل وبعد المرض ما يچي 

سداد/ اي الله وايدها 

اريا/ جلسه وحده وتكون علاج نهائي بعد لا نروح عليها ولا نجي من يمها واريد بهاي الجلسه 6 ملايين 

سداد/ والله هاي نصابه يعني بعد ما قطتنه بكومة فلوس هسه أخترعت العلاج وظلت تلح أريا وتگلي معليك اني ادفعهن حتى لو ابيع ذهبي وبعدها صعدت فوگ وگامت تعيط والله عبالي لزمتها الكهرباء بحيث سويت الدرج شبختين وصلت للغرفة ولگيت اريا تفتش بالكنتور وتبچي وتعيط وتگول ذهبي ماكو وتلطم على وجهه دورت وياها نبشنه الغرفة نبش ما لگينه شي الذهب ماكو 

آريا/ طبعًا ماكو احد باگ الذهب غير جيهان 

سداد/ ما اسمحلچ تحچين على أختي وهي مو حرامية حتى تبوگ احنه حمدلله خير من الله شايفين وعايفين 

آريا/ اي وشنو قصدك اني ما شايفه وانتوا آهل خير والله على هذا كلامك آلا تخابر جيهان وتگللها رجعي الذهب الي بگتي 

سداد/ مشكلة الذهب هاي ما إلها حل لان هي حلفت على طلبها وآني اصريت تسكت بس آريا ما سكتت أبد وصارت مجادلات بيني وبينها وهي إتصلت على جيهان وفتحت سبيكر وتگول لجيهان انتي حراميه وهسه ترجعين الذهب وجيهان ظلت تغلط على اريا بعدها سحبت الموبايل من آريا واعتذرت لجيهان وسديت الخط بعدها دخلت آريا بنوبه هستريا ومن ضمن كلامها 

آريا/ واني المن أريد الذهب غير آلك الي صفيت نص رجال عليه والمصيبة حاسبيك رجال عليه هي الناس متدري انت هسه تعتبر أخويه لان حتى حقوقي الزوجية ما تنطيها الي وأنوب اختك باگت الذهب مالتي 

سداد/ هذا چان اصعب موقف لآن بعد ما جاوبتها ويحز بگلبي كلامها بعدها تقوقعت آريا على نفسها شگد ردت حچيت وياها بس ما يفيد عزلت اكلها ما تاكل ويايه وتروح تنام يم الجهال صارت ما إلها دخل بيه نهائيًا وكملت الاجازة مالتي الي طلعت عليه اجازة الگشره ورجعت لدوامي 

آريا/ طبعًا دخول قفص الاسد مو مثل الخروج منه اني ويسر بعد ما ازوجنه صار يسر ما يعبر يوم اذا ما يگلي أريد فلوس آخرها نفجرت بوجهه وگتله ادري منين أجيب فلوس ترى صرت حتى مصرف أطفالي دى انطي الك 

يسر / اني گتلچ لازم نبني مستقبلنه قبل ما تطلگين من سداد وطالما راح للدوام مالته اليوم اجيچ للبيت اني مشتاقلچ موت 

اريا/ لا عيني ترى روجيدا گالت لابوها عليه وتدخل يمي وحده وبالگوه سديتها لسالفه 

يسر / معليچ آني اعرف أصرف واخليها بعد ما تحچي أبد وأنتي اليوم اريدچ عروسة فهمتي 

آريا/ وبالليل اجى يسر وهم چان لابس بوشيه وعباية على الراس ومن دخل وره الباب گلي روحي دخلي لغرفتچ وآني هسه اجي وراچ دخلت للبيت من باب المطبخ والجهال دى يلعبون بالصالة ويسر لبس العباية وعلى وجهه مخلي قناع من ذني المخيفات ولازم بيده ساطور ودخل من باب الصالة بحيث من دخل الأطفال گبل گاموا يعيطون وهو أتقرب عليهم ويسوي اشارة بمعنى أسكتوا ويأشر الهم بالساطور 

وعافهم واجى يمي للغرفة وهو بس نسدت بآب الغرفة اخذني لسرير وظل يمارس العلاقه الحميمه بقوه ويكون الوجع قوي اگوم اعيط ومن يخلص يطلع بنفس الطريقة إلي دخل بيها وأستمر هذا الوضع اسبوعين الى ما رجع سداد بأجازة 

سداد/ من رجعت من دوامي قررت اعتذر من اريا لان إي أمرآة ذهبها يروح منها هيچ يصير بيها ومن دخلت للبيت لگيت اريا بالمطبخ واجيت من وراها وخرت شعرها من على رگبتها وبقيت أبوس واگللها بس امريني شنو تردين اني انطيچ ذهبچ الراح اعوضچ عنه فلوس للعلويه اني انطيچ بس لا زعلين مني والله ما أتحمل زعلچ 

وهي هم اندارت عليه بكامل جسمها وصارت مقابيلي وحضنتني وظلت تبوس بيه وتگلي / اي اريد ذهب وفلوس 

سداد / بعيني والله شنو تردين اني حاضر ورحت لصالة دى أشوف اطفالي يبرق أيليا يلعبون بوستهم أما روجيدا تفاجأت بيها ضعفانه وجهه أصفر وما تردد غير كلمه وحده وهي الوحش الوحش