رواية تحت ظل السعف الفصل التاسع 9 بقلم ميار

-شنووو؟ 

مهى: درنا اثنينه على دخول مرت عمي محمد بيدها ماعون وجهه احمر تلگيتها اخذت الماعون وهي بقت 

واكفه ادحك علينه عيونه غوركن بالدمع رحاب حجت

وياها حتى لا تحجي شي يم عمي وبقت تقنع بيها رحاب

رحاب:: عفية عمه والله ابوي يموتنا اذا طلعت السالفه

من يمنه ويجوز ما مفتهمه صح مهى لا تحجين فدوه

امنه: ولج شلون يريد يرد ريام لبيت حمدان واسكت

لا والله ما اسكت ابوج شيريد من هليتيمه يمه سوده

عليه والله لو يبقى بس ابن حمدان ما ننطي ريام ابنيتنا هاي تعالي ولج مهى تعالي شحجه ابوج شكال 

مهى:: عمه فدوه سدي الموضوع والله ابوي يموتني هي

هيج سالفه بس يمكن اني غلطانه عفية عمه لا تحجين 

امنه:: وخرن وخرن اني اعرف شلون اتصرف 

-عمه وين تعالي 

رحاب:: يبووو هسه شيفضها بعد شجاج وحجيتي

مهى:: شمدريني بس لا راح تحجي لعمي 

رحاب: لا ان شاء الله ما تحجي امشي امشي كملي شغلج

-عفتها ورحت انظف البيت غير لو بعد اكدر اشتغل بالي

كام يفتر بي شيطان كل شويه اكول هسه تگب العيطه

للظهر الولد محد يجي دزينه غداهم لبيت فرات واحنه

تغدينه وجديتي وامي وابوي راحو ينامون نومت الظهر

كعدنا اني و رحاب نراجع دروسنا حتى ما نعرف شاخذنه 

اليوم مشى اليوم بتوتر لليل دزو يردون تمتوعه وكفت

اسوي ورحاب يمي مطبخنا بابه مقابيل باب الحوش

انفتح الباب ودخل عماد دحكت وره حسين رفعت 

عيني اشوف رحاب الثوله ما اهتمت واكفه وتسولف

رحاب:: اي والله مهى غير لو تشوفين ريتاج تكول عمتي

عدها صور لحسين كومه بعمر علاوي جان ابد ما يحب

يلبس ملابس ولا يحب يسبح ولج غير متت قهر همزين

كبر وصار يسبح عزاا والله اني تعرفين اموت على السبح

والنظافه اتخيل نتزوج وتالي يطلع ما يسبح غير مره بالاسبوع يععع غير اموت بس كتلها والله اني احبه حتى اذا ما يسبح اهم شي هو يحبني وانه احبه بس الجلبه تصيحنه

بيت اهل الوصخ ابد فلا ينكدرلها هاي البنيه ولا احجيلها بعد... 

حسين: هاي عليمن ست الحسن منو الما يسبح وابو الوصخ 

مهى:: يمه جفلت خطيه جفله تسوه عمرها من درات 

وشافت حسين وعماد واكفين اباب المطبخ وهذا عماد

راح اختنك من الضحك بحيث عيونه دمعت واختي راحت

حتى سالفه ما تعرف تسولف وهو واكف وينتظر تجاوبه كتله

-لا خويا مو عليك هاي ريتاج هنه صديقات وهي تحب تنصف

على العالم بس ابد مو عليك مو بالله رحاب هاي اخو صديقتج جنتن. تحجن عليه مو اريد بس اسد السالفه وهي من الفشله ما تعرف حتى تحجي وانوب زودها عمر من دخل

وشاف حسين واكف وعماد سكران من الضحك وكف يمه

يستفسر 

عمر: وجع شبيك عليش تضحك 

عماد:: هههههه اوكف هههههه اخخ يابه ولك فاتتك 

هههههه يمه بطني ولك حسين ابو الوصخ هههههه 

طلع ما يسبح غير بالاسبوع مره ويحب يظل مصلخ

عمر:: شني السالفه يول حسين صدك ايا قذر يا وصخ

عماد:: هههههههه ولك اختك تكول هههههههه احبه

حتى لو وصخ هههههههه كرت عينج على هيج ازلمه

عمر:: انجبب شنو تحبه شو تمسلت 

حسين:: انجبو انتو الأثنين خوش وانتي هيي وين

اكو حرمه تحجي على زلمتها شو ساكته صدك جذب 

عمر: عليمن ولك منو ينجب

عماد:: هههههههه فوك ما رضت بيك ابو الوصخ

مهى:: خطيه الولد وجهه احمر من القهر وعماد غير لو

يسكت وعمر واكفه ما عاجبه وكفت حسين من الاساس

خرب حظج رحاب غير لو بطلو منه واكفين ونصبو علي

تالي عافهم وطلع زعلان وعمر يضحك عليه صاح وراه

عمر:: تعاللل ولكك حسين ابو الوصخخخ المصلخ

-طلعو وراه عود يرضونه وظلت رحاب تلوب وتكمز من

القهر واني عود اريد اهون عليها وكوه بالعه ضحكتي

رحاب:: انجبي مهى كل صوجج غير تكولين اتنبهيني

اصخام بوجهي اول مره يجي من انخطبنه لكاني احجي 

عليه بالله هسه شيكول عليه وهذول اخوتج سوو عمل بي

مهى:: هههههههه ولج غير انتي ثوله هههههههه والله 

ضحكتيني عود رومنسيه احبه حتى اذا وصخ عمت عينج

اي والله على هيج حب والله اليوم الولد للصبح ينصبون عليه عافتني وطبت للغرفه تلوب خطيه موقف ما ينسى

كملت اني الصينيه ورمشت على عمر شويه وجي عماد

يمشي ويضحك ويا روحه بس شافني طگها بضحكه ويسأل

على رحاب وين كتله راحت لغرفتنا عفية عماد كافي خطيه 

عماد:: وج يا خطيه والله سوينه ميزز مال ضحك غير سهرتنا صباحيه عود انوب عمر كال لجهاد واستلمه

مهى:: يبوو عزاا عماد عيب تره هم راح يصير رجل اختكم

عماد:: انجبي رجل اختنا هههههههه غير اختنا هي تحجي

على رجلها المصلخ ابو الوصخ روحي كوليلها خوش اختيار

مهى:: بالله هذا شنحجي ويا شيخلصها بعد منهم اخذ

الصينيه وهو حتى اكتوفه تهتز من الضحك واني ما كدرت

بعد كعدت بالكاع اضحك من اتذكر وجه حسين ورحاب

ريام:: جنه كاعدين نتعلل وما نحس غير دخل حسين اعصاب فزينه كلنا يدحك بالوجوه ويصيح على ريتاج عمتي تغلط عليه وهو ماكو فاصل تالي ضربته تريد تفهم شبي

حسين:: يمه دعوفيني لخاطر الله ويين هاي الجلبه ريتاج

امنه: ولك يمه شجاك شبيك شمسويه دحجي شكوو

حسين:: ترضين يمه ترضين بنتج تروح تحجي عليّه

يم رحاب لا وماكو سالفه جايفه ما حاجيتها ويننننهاا

ريتاااج وينننج اليوم اطيح حظج والله العظيم 

-طلعت ريتاج تفرك بعيونها ما مهتمه وكفت گباله وتحجي برهاوه 

ريتاج:: خيرررك خوياا ما تخلون واحد ينطمر ينام

-جرها من دشداشتها وهي قزمه وياخذها ويجيبها وهي

ما مفتهمه شكو وتريد بس يحلها تالي عاف ثوبها لزم اذنها

حسين:: ولجج اني ابو الوصخ اني ما اسبح غير مره بالاسبوع 

-ضربت على صدره وشهكت وتكول اني انيي اكول عليك

هيج ايااا جذابه يا رحاب اخخخ حسين اذني حسين فدوه

ريام: حلها وبقى يفتر واحنه كوه كامشين ضحكتنه وريتاج

لازمه اذنها وتفرك بيها وعمتي تهدي بي تالي بزعت منه كالتله

امنه:: يمه ايقابل جذب صدك يمه تره گبل من جنت اصغير ما تسبح الا تنكتل وعيشتك نازع الفانيله البسك وتنزع 

حسين:: يمممهه صدك تحجين وتحجينها جدامهن 

-هههههههه يمه غير اخياتك ما بيها شي جنت تحب أفلام كارتون هذا المصلخ ما اعرف اسمه وتقلده يلا ميخالف

حسين:: شنو ميخالف يمه جهاد الي ما يضحك مگابلني

وخربان ضحك عليه شيخلصني من السانهم صدك تحجين 

امنه:: يمه بعد روحي جهاد دخلي يضحك يول غير اخيك الجبير ويشاقيك ديلا هسه انت خايف لان رحاب درت لو لان جهاد يضحك عليك اذا على رحاب لا تخاف يمه تحبك انت وصخك شرايحلها والله تلكه احلا لو احسن منك بعدروحي 

حسين:: اي يمه مهند اني وانت ولج ريتاج اذا ما بطلتج

من هاي السوالف حيوانه فوك ما تمدحين بيه تذميني

ريتاج:: والله حمدتك بس هي جلبه تريد تخرب خوتنا

من هسه شوفي شوفي اكص ايدي اذا زعل عليها بس 

كادر عليه لان فقيره والله يلا الله خربت نومتي لان ست

رحاب حاجيه عليكك كون تخلفون اقروده اني شعليهه

حسين:: سدي حلكج سدديي هسه شلوون اطلع هذوله

متگابلين ويصنفون عليه طاح حظج اي والله اموتج هسه 

امنه:: يمه لا تزعل هسه كوللهم جنه جهال قابل شكو بيها

حسين:: يمه قربانج لا تحجون وياي اروح انطمر احسنلي

امنه:؛ ولك يمه وينن ياا ولك حسين 

-عافها وراح واحنه متنا ضحك عليه رباب وكعت بالكاع

ترفس من الضحك وعمتي ترزل بيها واني راح اختنك 

شكد ما حابسه الضحكه ريتاج تفرك بذانها وتغلط عليه

لل12كل وحده راحت لفراشها واني ورباب تغطينه لان

بس اندحك بوجه الثانيه نضحك غطيت راسي اضحك

على وجه حسين ورباب بس صوت شهكاتها تضحك خنك

ريتاج: وجع خوش كافي ما تنامن شصار و تمضحكن 

-هههههههههه

ريام:: ولج والله وجه ما يروح من بالي من يريد يروح يم الولد ويخاف يضحكون عليه هههههههه يمه خرب يومج 

ريتاج:: انجبي والله باجر اذا ما كتلتها هلحيوانه القرده

كتلها انلصمي لا تحجين يم احد جاي عود احجيلها على

ايام اخوي تالي المصخمه حتى لخوتها مسولفه عزااا 

رباب:: انتي ازمال اكو وحده تحجي على اخوها لخطيبته 

هيج غير تسولفين شلون مرتب وخوش ولد خما هيج 

ريتاج:: انجبي رباب تره اشتغل الضمير كافي كافي خلي انام

ريام:: هههههههه نامي نامي غطت راسها ونامت واني

ما جاني نوم بقى ابالي عمتي من جنت من بيت عمي 

وجهه مختنك واضح عليها ضايجه واخذت عمي وتسولفله

شبيهم خفت لان حتى عمي تغيرت ملامحه وعصب لازم

اكو شي كمت اخذت عبايتي وطلعت لازم اشوف جهاد وافتهم طلعت اتختل وصلت البستان واني عيني على البيت

اخاف احد يطلع بقيت انتظر بلجي يجي كام يكشف الجو وجهاد ما بين كمت اريد ارجع شفته جيه اشرتله ابتسم واني رجعت كعدت بين ما جيه وكف يمي فتح الثامه وكعد

جهاد :: هاا بويا سلامات كلت بعد ما تجين 

-لا يابه لا ليش ما اجي تره عادي اني بيه شغله من انقهر

اصخن وبس زينه الحمدلله بس تره انتظرتك من زمان

جهاد: ما ادري بيج على نيتي طلعت اروح للكاع وشفتج

ريام:: امم شوف جهاد اريد منك شي احس اكو شي عمي 

محمد ضامه علينه البارحه الصبح من عمتي رجعت من 

بيت عمي جاسم وهي مو. طبيعيه حجت هي وعمي بس

جهاد:: بس شنو شحجو ما سمعتي شي؟ 

ريام:: لا ما سمعت زين بس الي افتهمته الموضوع يخص

حمدان ويخصني عفية جهاد اخاف يردون يرجعوني لبيت

عمي حمدان والله يموتني طلعت بدون علمه والله ينتقم 

مني 

جهاد:: كل عقلج شنو يرجعونج اله لا يابه خالي محمد 

ما يسويها هو من طاريه يضوج بس اكو شي ثاني خاف 

علمود البيت لان ما رضى فرات يبيعه خلي اني اتأكد

-اي عفية حتى لو يبيعه ما اريد ارجع يأذيني والله 

-شنو انتي مدري شلون حجيج شنو بكيفهم انعل خيره

اذا فكر بعد يجي ولا تخافين راح اشوف فرات وافتهم منه

ريام:: تمام انتظرك اليوم بالليل اهناي خوش اني هسه

اروح لان هسه تكعد عمه علمود تخبز خاف تحس عليه

جهاد:: روحي يابه وديري بالج ريام لا تطلعين الا ادزلج رساله انتبهي وخما علاوي جاي ينطيها جدام احد

ريام:: هههه لا فد واحد هذا يتأكد يلا ينطيها الي

-ابتسم رفع ايده لشعر واني اخذتلي صفنه عليه رفع حاحبه

دنكت استحيت من نظرته سويت نفسي الف الثامي وكتله

-يلا باي 

جهاد: ههههه الله وياج يابه 

ريام:: مشيت مسافه عبرت نخلتين ودرت عليه بعده

واكف من شافني وكفت عكد حاجبه رجعت وكفت بسده

جهاد:: ها يابه كولي 

ريام:: جهاد عادي اصير اختك لو صديقتك

جهاد:: ما معوز خوات اني عندي ثلاثه

-عنكضت بوجهه ولا اني معوزه اخ عندي هم صارو ثلاثه

عجل نصير اصدقاء ما اضم عليك وما تضم عليه اتفقنا

جهاد:: لا بالله 

ريام: اي وداعت جدك عبدالله 

-هههههههه خوش هاي هي يلا روحي صديقتي 

ريام:: شبيك ما مقتنع تره عادي جثير اكو صداقه بين ولد

وبنت وبعدين احنه نعرف بعض من زمان صح مو حيل بس

مو غربه اني اشوف عادي حتى بغداد جانن صديقاتي عدهن

جهاد:: لا خوش تربيه تربية عمج حمدان شوفي اني اذا 

تصادقيني ما احب تصادقين غيري يعني اذا يوم اسمع 

كايله لواحد من الولد تريدين تصادقينه ادفنج جوه النخله

ريام:: هييي شقصدك تره نيتي صافيه بطلت حتى صداقتك

ما اريدها عفته ومشيت اريد اروح لزمني من عبايتي ورجعني

-شبيج ولج انتي افتهمتي غلط مره الثانيه اصفكج براشدي

انطي مجال واحد يسولف لا تفسرين من راسج اسمعي

ريام:: غير انت مدري شلون حجيك تره ما قصدي شي

جهاد:: خوش يلا روحي يا صديقتي وانتبهي زين اني عود

اذا افتهم سالفة حمدان ادزلج علاوي ونتشاوف اهناي

ريام:ابتسمت هزيت راسي واشرتله باي ورجعت

ركض ادحك بعد وكت توضيت وصليت ونمت مدري 

يمكن ساعه وكعدتني ريتاج على صوتها الجوهري 

ريتاج:: ستتت الحسسن ام الساددس راح نتأخررر

-مطيت جسمي بعدني نعسانه بس لازم انداوم كمت

كوه غسلت وبدلت وكعدت اتريك ادحك بالوجوه عمي

والولد ضايجين شسالفه ما ندري كملنا وطلعنا وصلنا

وسام وراح دخلت للصف شفت مهى كعدت يمها نسولف

ودخلت المدرسه بدت تشرح واني كوه اركز وياها ابالي

يم جهاد مدري عرف وضعهم ما مريحني خوفي يرجعوني

كمنا دوامنا وكفنا باب المدرسة ننتظر احد يجينه بين ما

البنات جاهن الحجي الجو بدا يحر صمطتنا الشمس والمدرسه بدت تفرغ ولا حامد ولا وسام وريتاج شبعتهم غلط 

رباب:: عفية راسي كام يوجعني امشن نرجع مو كتلهم خلي

انروح ويا البنات الحجي يودينه هسه شوف بشنو انشغلو

ريتاج:: اي والله ولج كتلني الجوع واريد انام امشن شو البيت وندله عليش واكفات والدنيا ظهر ما بقى احد غيرنه

ريام:: يلا امشن طلعنا نتمشى المدرسه مسافه على بيوت 

عمامي مشينه عبرنا الشارع ويا ما وصلنا الشارع الترابي

مالت القريه صارت سيارة حسين گبالنه وكفلنا وصعدنا

واستلمته ريتاج بس هو وين اعصاب عيونه حمر خوفني

رباب: حسين شكوو خما صاير شي وجهك ما يطمن

حسين:: ما دام عمج جاسم موجود ما تلكين غيرالمصايب

-يا ستار شكوو خوفتنا 

-نصل وتعرفن منو وصل للقريه.. 

♡♕

تبارك 

وصلنا الحجي نزلنا من السياره جان اكو زلم تارسه

الساحه الي گبال مضيف خالي جاسم بس لمحت اخوتي 

وياهم لفينه عبينه على وجوهنه ودخلنا للبيت وصياح 

الزلم عالي وصوت خالي محمد بس ما افتهمنا تلكتنه

فاطمه بالباب ذبيت العبايه وسألتها شكو وشصار كالت

فاطمه:: اوف كولي شنو الما صار غير خالج جاسم رجع

بيت خالي حمدان وراح يكعدهم بيت خالي خالد وخالي

محمد سووه العمل ما راضي برجعته بس جديتي راضيه

مروى:: عزاا بعد كل الي سواه رجعه ولا يكعد بيت خالي خالد والله خالي جاسم ما ينكدرله ادري جديتي شلون رضت

فاطمه:: هههه انطاها افلوس ورضت ولج لو تشوفين جهاد

وفرات يبوو احتركو حرك وهذا جاسم داز عليهم وجايبهم

تبارك:: يعني هسه هينه حمدان؟ 

-اي هينه هو وعائلته بيت خالي جاسم ما تشوفين ليش

خالي محمد شلون زعلان هو حطهم تحت الامر الواقع

تبارك:: فد واحد هذا جويسم ما خلو يبيعه للبيت جاب

اخوه وكعده بي هذا شو ولا يهمه مال يتيمه بكيفه يتصرف

فاطمه:: هو هذا القاهرني خطيه هسه ريام اذا درت حمدان رجع للقريه والله خايفه عليها منه بس ان شاء الله 

خالي محمد ما يخلي يأذيها يلا امشن هسه بدلن وتعالن

مروى: يلا والله اني ميته جوع بلجي تفض حتى نتغده 

تبارك:: الدنيا محتركه وهاي حايره بكرشها ام كرش

مروى:: انجبي شنسويلهم تعودنه خالي جاسم يوميه مشكله وتالي من تصير صدك يختل بمضيفه اروح ابدل

تبارك::رحنه بدلنه وكعدنه ننتظر للوحده ونص يلا فضت

وجو جهاد وحتى ابوي الوجوه تخوف من العصبيه حتى خفنه

نكوللهم على الغده الا ابوي كال صبو درنه وكعدنه ناكل بسكوت جهاد لكمتين وكام وابوي هم ما اكل وامي بقت

بيت اهلها ما جت شلنه المواعين واخذت صينيه الجاي

من فاطمه وكفت باب الاستقبال اتصنت على ابوي وجهاد

احمد: هذا جاسم يلعب بكيفه وعمتي واكفه وياه

جهاد:: يابه والله رجعته للقريه وراها شي من تالي

وكت حمدان يرجع والله جاي يحوكون لشي وكول جهاد

ما كال وخالي محمد جان يدري لان من البارحه ما عاجبني 

-خوفك على هليتيمه جاسم يفتر وره ورثها هو وحمدان ومحمد تره مو كدهم بس كون يحافظ عليها

جهاد: اشوفك مهتم الها انت 

احمد:: صح ما الي شغل بيها بس تبقى بت خالد

جهاد:: هو هذا الي اريده منكم لا تنسونه تبقى بنت

خالد اخوكم وصاحب عمرك الي جان مفضلكم على نفسه البنت ما الها ذنب بسالفة امها وهي حتى ما تعرفها كافي الي شافته من حمدان وخالي يستاهل 

انداري بنيته مثل ما دارنه اسنين كبرنه وهو مدللنه

-ولج شسوين

تبارك:: يمه خفت شبيج 

فاطمه: وجع اي والله برد الجاي يلا هسة يزعلون

- دخلت انطيتهم الجاي وطلعت وبس طبيت المطبخ

كفختني فاطمه وتغلط عليه لان اتصنت على ابوي كتلها

يابه اجيبلج اخبار تاززززه بالباكيت والله شبيج تكفخين

فاطمه: خفت هلوجه ولج لو طالعين وشايفينج تتصنتين

عليهم والله ابوي يشوي على اذانج بصل بدون كل شي 

همه صايرين نار بطلي عيب هذا الاسلوب اموتج اذا اشوفج 

واكفه 

تبارك: اي خوش بطلنه عمي والله لو تموتين ما احجيلج

شنو سمعتهم يسولفون عفتها ورحت بالغرفه شوي لحكني

هي ومروى وكعدنه يدورن احجيلهن واني قفلت ما احجي

فاطمه:: تبارك والله اكتلج ولج اختج الجبيره واتوسل بيج

-يا هي الكفختني لان شافتني اتصنت وتهدد بيه ما احجي 

فاطمه:: ديلا عاد ما قصدي سولفي شسمعتي 

تبارك: تربعت واعدل بنفسي وفاطمه تنافخ ساعه تضرب 

ايدها على رجله وتستغفر ينتظرني اسولف تحممت 

مروى:: نعللهه على بليسج سولفي عاد 

-احمم احمم راح اسولف سمعت ابوي وجهاد يكولون

-اي شيكولون

تبارك:: شوفي جهاد كال لابوي حمدان رجعته للديره

مو خاليه وجاي يحوكون لشي وهو وجاسم وابوي كاله 

اني خايف على ريام ومحمد مو كدهم هذوله غداره

مروى: شني يعني ما افتهمت 

-هو انتي عقلج ما يسوعب الامور فأكيد ما تفهمين

-انجبي بس يعني شنو يحوكون وشيسوون مثلاً

فاطمة: هي واضحه وفعلاً خوفنا لا يأذون ريام

تبارك:: مدري الله يكون بعونها وان شاء الله 

خالي محمد ما يعوفها وحتى ولده زينين وياها

فاطمه:: يلا اقرن دروسجن اني اكوم انظف المطبخ گبل لا تجي امي وترزلنا واذا قبلت

يجوز نروح نتعلل بيت خالي محمد شتكولن

تبارك:: اي والله اني اروح اريد اشوف ريام

مروى:: تريد تعرف شكو ماكو ولا مو حباً بريام

-ادرسي ادرسي لا اهفج بجسع يطير ملامحج

مروى:: هيييي انجبي اختج الجبيره اني حيوانه

فاطمه:: كافييي ناقصين احنه اصياح يلا ادرسن وانجبن

تبارك:: فتحنا كتبن وبدينا نقره للعصر طلعنا 

بالحوش على صوت الولد صياحهم رج القريه.. 

وسام::

واكفين العصريات اني والولد وجهاد

وفرات يتناقشون على رجعت عمي حمدان

فرات:: ميخالف جهاد رجوعه يفيدنه يظل

جوه عيونه احسن ما بين فتره وفتره نروح

لبغداد وانوب ابنه محامي لازم اله ايد بشغله

جهاد: اي اكيد خلي انشوف تاليتها وياهم

وسام:: ادحك عليهم مرتجين على السياره

ويحجون واحد يرفع والثاني يكبس دحكت

شفت فراس جاي بتجاهنه وجهه ملعب ابد

مو مريح جيه وكف گبالي واحنه جنه مقابيل

بيتنه واكفين يدحك علينه ما عاجبه وكفتنا

فراس: السلام عليكم 

_عليكم السلام 

فراس:: وسام من رخصتك صيحلي بنت عمي خالد الاهل دزو عليهم تعينهم بالشغل انتظرها اهناي 

وسام:: ضحكت على ثقته يحجي برهاوه رفعت

عيني على جهاد وفرات اثنينهم ينتظروني احجي دفعته من جتفه يلا حبيب يلا منا 

فراس:: لا تقلل ادب شبيك تدفع روح صيحها

وسام:: حبيبي عندك نقص بعقلك لو تحب اذكرك بكلام ابوي ولي من وجهي البنت

مالكم علاقه بيها خوش شحجه وياكم ابوي

فراس:: مو بكيفكم البنت ربت بيتنه جاي

اكولك اهلي يردونها وعود ارجعها بالليل

-جيه عليه فرات لزمه من ياخته ودفعه

فرات:: ولا چلمه زايده يلاااا والله والي اسمو 

الله اذا اشوفك انت او اخوك تحومون حوالي

اختي رجليكم اكسرهاا ريااام خط احمررر افتهمت يلااااا امشي منايي طايح الحظ

فراس:: سهله سهله اني الك فراتتت 

فرات: خوفتنيى جلبب مجلوب

-راح يمشي بعصبيه وفرات كام يفور بس جهاد

ادحك عليه الجكاره بيده وعينه على فراس لحد

ما طب بيتهم الي هو بيت عمي خالد الصدك ما

ارتاحيت لفراس وخوفي على ريام هاي الفتره

خلتني احسها اخت من صدك والله صارت بغلاة رباب وريتاج راح جهاد لبيتهم وفرات يفتر يددور على علاوي عفته ودخلت للبيت

ريتاج

وصلنا حسين ومن نزلنه جانو ابوي وعمامي 

والولد كلها واكفه جدام بيت عمي جاسم

ما شفت منو وياهم دفعنه حسين بالحوش

حسين : شكوو شكوو واكفات ادحكن 

-درت عليه اريد احجي دحكت على ريام وجهه

مخطوف وترجف خوفتني ركضت عليها شبييج

ريام:: هذا عمي حمدان؟ 

-دحكنه اثنينه على حسين الي ظل بس يبلع بريچه

مرتبك طلعت امي وركضت جرت ريام لحضنها 

امنه:: ما عليج بيهم يمه ريومه انتي يمنه لا تخافين تعالي يمه تعالي نفوت جوه يلا تعالن

ريام: عمه جيه ياخذني عفية عمه والله يأذيني

لا تخلونه ياخذني والله يذبحني طلعت بدون

رضاه 

ريتاج: ادحك عليها ترجف وخايفه جرتها امي وطببتها للبيت وحسين بقى واكف يدحك عليها

مقهور شمسويلها وهيج ترجف من طاريه شكد

حاول ابوي وامي يعرفون شلون جانت عايشه

وعلى تعامل حمدان واهله وياها ما رضت تحجي

رباب: حسين صدك راح ياخذها 

حسين:: لا يابه لا والله لو اطك نخله براسه ريام

ما تطلع من بيتنا هاي اخيتنا وعگب هل الرجفه

والله اذبحه وما اخلي يلمحه يرميها بمي ارمي بتيزاب شتحجن انتن يلا روحن يمها وفهمنها ما نخلي يلوحها

وربه الخلقه حالها حالج هاي اخيتنا 

ريتاج:: طلع حسين ورباب راحت وراهن وصوتهم

بعده عاليه ذبيت جنطتي على الصبه الخارجية وركضت اوايج من فتحت الباب جانو كلهم ملتمين جهاد عرفته من الثامه وفرات بسده 

سمعت ابوي يحجي وياهم بحركه رفعت نفسي

حتى اشوفه واسمع شنو يحجون بس سمعته يهدد

محمد:: والله يا حمدان اذا المح واحد من

عدكم يم ريام اشوفكم الويل ريام محد اله حكمه 

عليها ابيتي وبمسؤليتي مالك دخل بيها راح اسكت

لرجعتك للقريه لخاطر امي بس حط ابالك ريام

اذا اسمعك محاجيها اعدمك

حمدان:: مالي شغل بيها خليها يمك اني

رجعت لخاطر امي وبنياتي بقن بالدروب

ريتاج:: عافهم ابوي و واني شفته جيه بتجاه البست واخوتي وراه ركضت اخذته الجنطه وطبيت للبيت لكيت ريام بعدها بملابس المدرسه وامي بسدها سمعت صوت الباب انطيگ شويه ودخل ابوي واخوتي ثلاثتهم وراه شاف ريام جيه كعد بسدها جرها لحضنه وبيده الثانيه يمسح دموعها

محمد:: عليش يابه هل بچي والله لو ينطبگ

السما على الارض محد يلوحج لا حمدان ولا ولده انتي ابنيتي ادرسي وتونسي هاي اخوتج ثلاثتهم بيوم واحد يمسج ينهونه يلا يابه امسحي دموعج انتي ابنيت خالد ما اريد اشوف دموعج بعد واذا رجع حمدان ما اله دخل بيج

- مسحت دموعها وكامت للغرفه بدلت واني لحكتها بدلت وطلعنا نصب الغده ادحك ريام صافنه دقيتها بخصرها جفلت تخوصرت وحجيت عمي ما تشتغلين شكو صافن جنج عاشگه

ريام:: انجبي ريتاج وجعتيني طاح حظج

-اوي دادا وجعتها خاب ولي ويلا اروح اكعد 

جيبن الغده اخذت الدولكة المي ورحت كعدت

وهنه جابن الصياني وكعدنه نتغده وابوي وامي 

عينهم على ريام بس من شافوها تاكل ارتاحو.... 

.......... 

ريام:: من شفت حمدان والخوف تخلخل بداخلي

فكرة وجوده بنفس المكان يخوفني لليل واني ما 

ارتاحيت كلها نامت واني النوم طار من عيني كمت

طلعت شفت غرفة عمي بعد بيها ضوه وكفت بسد

الباب واسمع صوت عمي يعلى ورجع يختفي سمعته 

يحجي بموضوع عمي حمدان اريد افتهم شحجي 

تقربت واسمعه جاب طاريي اسمعه كال

-امنه الي مخوفني رجعته مو خاليه اخاف 

لا جاسم يحطني تحت الامر الواقع ويطلع

صدك يريد يزوج ريام لفراس اكو شي ما 

مريحني يس حجيت ويا فرات والولد هاي 

الفتره يظلون قريبين من تروح للمدرسه 

-خفت شنو يزوجوني لفراس غير اموت رجعت 

للغرفه واني مية فكرة براسي والخوف كتلني

فوك الساعه واني كاعده ودموعي تجري كمت

سحبت الشماغ وطلعت بدون ما الفه لبست عباتي و ركضت للبستان وابالي شغله وحده الي هي انهزم....... 

الفصل العاشر من هنا