رواية عشكت جنوبية كامله جميع الفصول بقلم نسرين الاسدي
بنية فقيرة وتعيش بعائلة جبيرة حالتهم ضعيفة وعمرهم ما حلموا بشيء اكبر منهم
بس يجي يوم ويشوفها واحد زنكين ومخلص نص عمره بالخارج تعجبه ويروح ياخذها غصب
بس هذا الشخص ورا قصة جبيرة محد اتوقعها ولا خطرت على بالهم
تابعوا القصة لتعرفوا الأحداث
#للكاتبة: نسرين الأسدي ...
القصة من تأليفي وافكاري الخاصة وليست مقتبسة او مأخوذة من اي عمل اخر
#عشكت جنوبية -
#البارت الأول
بمكان من ارياف البصرة والأهوار تعيش عائلة هنادي ابيت صغير بيه بس غرفتين ومساحة صغيرة ما تجاوز السبع مترات (اقصد الطارمة لأن شعلتوني بالتعليقات) والدنيا صيف والجو كلش حار
هنادي : جنت نايمة بالسطح ويه خواني الأكبر مني هيثم وفهد وخواتي الأصغر مني ليلى وحياة لأن الكهرباء طافية وماعدنا مولدة ولا امبير حالتنا كلش فقيرة وما عدنه ندفع افلوس الأمبير لأن ابوي قاسم يشتغل بالعمالة ويوم يحصل فلوس ويوم ماكو
هيثم وفهد هم مرات يرحون وياه ومرات يبيعون علاليگ او كلينكس بالشارع
لأن ما مكملين دراسة وما لاگين شغل زين وهمه مو كبار
هيثم عمره 20 وفهد 18
وانه توه دخلت بال17 وليلى وحياة توم عمرهن 15
اجت امي وكعدتني : هنادي يمة هنادي گعدي يلا
هنادي وهي نعسانة: ها يمة ..شنو
سمية: گعدي يمة ساعديني بشغل البيت ابوج على جية واحنه بعدنه ما سوينه الغدة
كامت هنادي وكالت: اي يمة صار ..گعدت
باوعت لفهد وهيثم بعدهم نايمين التفتت لأمي وگلت :يمة ليش فهد وهيثم مارايحين للشغل اليوم؟
سمية بحرگة: يمة اليوم حارة وامس اجوا ميتين گلت اليوم ماراح اگعدهم خل يرتاحون خطية الشمس طايحة بالگاع
هنادي: اي يمة صدگ ..يلا خل انزل اساعدج ونوب اگعد حياة وليلى حتى يدرسن احنه كل احنه ما درسنا ولا تعلمنا بس هنة خل يطلعن بينه على الأقل
سمية: اي يمة ان شاء الله الله يوفقهن وينجحن وما يضيع تعب ابوج وخوانج
هنادي : نزلت غسلت وجهي وتريگت جان ريوگنه عبارة عن خبز وجاي لأن اليوم ابوي ما عنده فلوس يشتري
اكلت وحمدت ربي وگمت
نضفت البيت ويه امي وكنسته وعدلته وامي التهت اتسوي الغدة
هنادي : من خلصت رحت للحمام غسلت وغيرت هدومي وبعدين صعدت لخواتي وخواني حتى اگعدهم لأن ابوي على جية
نزلوا همة كلهم وانا لميت الفراش وصفطته ومن خلصت لگيت ابوي توه راجع وملابسة كلها سمنت وصبغ
ابتسمتله وگلت: الله يساعدك بابا
گال: الله يساعدج بنيتي تعاي اخذي هاي طماطة جبتلكم للعشى
خذيتها منه وحياة وليلى ركضن اله وحدة انطته ماي والثانية گعدت تفرجلة رجليه
مسح هو على روسهن وگال: البنات صدگ نعمة بس مو كلها تقدرها... الله يخليجن يبنياتي
گال فهد: جا واحنه بابا ماالنه شوية من هذا الحب؟
ضحك هيثم وگال: هاي شبيك فهودي شنو انت صغير ..مو شكدك وشكبرك شبيك تغار
ضحك ابوهم وگال: كلكم اعزاز عندي بس البنات معزة خاصة
بعدها حطوا الغدة بصينية وگعدوا كلهم عليها ما جان بالصينية غير بس مركة فاصوليا وتمن وخبز وشوية خضرة من حديقتهم
بس جانوا فرحانين بلمة والمحبة الي بيناتهم وضلوا اخوانهن يحجون سوالف تضحك صايرة وياهم وكلهم فرحانين
###
بمكان بعيد عن هاي العائلة وابغداد تحديدآ ..بيت جبير نگدر نگول عليه قصر وبالباب حراس اثنين وسيارات اخر موديل واكفة يم البوابة يعيش رجل بعمر 28
مواصفاته كلش حلوة عيون قهوائيات وكبار وشعر اسود يلمع جسمه رياضي لأن يلعب رياضة ويشيل اثقال
وعنده بس امه وابوه واخته الي دخلت توها بالعشرين وهي حلوة جسمها تارس وشعرها صابغته اشقر عيونها مثل اخوها وهي دلوعة ومتكبرة
نزل وهو يلبس بساعته الفضية وسويج السيارة بجيب بنطلونه ولابس قميص اسود وستره نيليه
ليث: صباح الخير
الكل: صباح الخير
لبنى: أكول ليوثي اريد اطلب منك طلب
كالت امها اسراء: لبنى هاي شبيج يبنتي خلي اخوج يگعد لأول وبعدين ابدي بطلباتج
لبنى: ماما هو انتي عرفتي شنو رايده اني اصلآ
سامر : دعوفيها يا اسراء خلي البنية تحجي ..كملي حبيبتي شرايده
لبنى: شكرآ بابا ..ليوثي اني اريد سيارة
باوعلها ابرود ورجع عيونه على صحنه گال: وانتي شنو الي رايدته بالسيارة موعدنه وحدة والسايق موجود
لبنى: ليوثي حبيبي ..اني اريد السيارة الي خاصة بيه واني الي اسوقها مو السايق وبعدين اني مو صغيرة هسة كبرت
شرب كوبه مال الگهوة وگام: لا لبنى مو هسة بعدج صغيرة
باوعت لأبوها وگالت: بابا تقبل هيج؟ !
سامر: ليث ليش ما تخلي اختك تسوق هي كبرت
ليث: بابا لبنى عقلها بعده صغيرة واحتمال اتسوي حادث وتجيبلنا مشاكل احنه ابغنى عنها لهلسبب اني ما موافق ..وبقت يمكم
عدل سترته ولبس نضارته وطلع
باوعت لبنى لأبوها وامها وبرزت شفايفها بضوجة
وگالت: شفتوا ..بابا تقبل هيج
سامر: ولا يهمج بنيتي ..اني راح احاول اقنعه بس المهم لبونة الحلوة ما تزعل
گامت من مكانها وحضنته: بابا حبيبي شكرآ ..انت احلى اب بالدنيا كُلها
صفگت امها اديها سوة وگالت: والله محد خرب البنية غيرك يا سامر
سامر: ليش و اني شعندي غيرها ما تگليلي يا گلبي يا اسراء
دخل ليث للشركة وعيون الموضفات تلاحگه كل وحدة اتذب كلمة
لأن هو يدخل مثل الأسد بهيبته وشكله يرغمج تباوعين غصبآ عنج
بس هو ما جان ينطي وجه لأي وحدة مو لأن يكره البنات بس علاقاته خارج إيطار الشغل بالشركة هو كلش حاد وما يقبل التهاون والتخاذل بالواجب
دخل لمكتبه ولحگه صديق عمره مروان گال: شنو اخبارك سيد ليث
ابتسم ليث صفح وگال: شنو قصدك ولگ
ضحك مروان بقوة وگال: بعد انته تعرف قصدي ..شخبار الملهى وبنات الملهى
ليث: ولگ مروان لا تتجاوز حدودك ..انت تعرف اني ما اسولف بهاي الشغلات بالشغل
گعد مروان وگال :مو اني يا حبيبي سمعت اجتِ البارحة كاولية جديدة بس شنو الا بشدة تموت تگتل
حبيت أسألك عنها
ليث: اي شفتها جانت كلش عادية ..مابيها شيء مميز بس شوية بالجسم اي جسمها كلش حلو
مروان: اويلي ..لگ شوقتني لازم اروح واجرب بنفسي
ليث: اي روح ومنو لازمك
مروان: ههه بس خل نخلص الشغل اول وشوف منو يبقى
###
هنادي : جنت اكنس بالطارمة وانضفها حتى نگعد بيها بليل لمن تطفى الكهرباء
صاحت أمي : هنادي ..يمة هنودة
هنادي: ها يمة
سمية : يلا استعجلي يمة حتى تصعدين للسطح ترشرشينه ماي حتى يبرد لبعد شوي وانام بيه وهمين لازم تخلصين قبل لا يأذن المؤذن يمة
هنادي: اي يمة خلصت وهل صاعدة ..تحتاجين اساعدج بالعشه؟
سمية: لا يمة كافي عليج شغلج ..يلا حبيبتي ..الله يوفقج ان شاء الله وينطيج على گد نيتج
هنادي: امين يمة
هنادي : خلصت السطح وفرشت افراشاتنه وسمعت صوت ابوي واخواني دخلوا ويه صوت الأذان
باوعت للسمة وگلت: يارب ارزق ابوي واخواني ولا تضيع تعبهم ووفق خواتي بدراستهن
اجالي صوت ابوي : بابا هنادي تعاي صلي حبيبتي
هنادي: اي بابا جاية
نزلت لگيت ابوي واخواني يصلون بالطارمة وامي وخواتي بالغرفة رحت غسلت وتوضيت ودخلت حتى اصلي وياهن
