رواية قدر مخفي الفصل الاول
" انهاردة فرح حب عمري
مش عليا انا
لا
على حد غيري
بكتب الكلام دا ونا نغزات قلبي بتموتني
كسرة قلبي المرادي مش هينة
والله مش هينة
ربنا يعوضني خيراً منها
مع اني مظنش في أكثر منها خيرًا
بس لعله خير"
كان بوست ليا بكتبه ع الفيس ونا قاعد بليل ف اوضتي
بعد م عرفت خبر جوازها
انا بحبها من وحنا ف الحضانة
كانت دايما امي تقولي بكرا تكبرو وتنسو بعض
بس انا كل مكنت بكبر كان حبها ف قلبي بيكبر معايا
فردت جسمي ع الكنبة وبصيت لسقف الاوضة ونا شارد
مر ربع ساعة ونا ع الحال دا وسمعت صوت رسالة ع الفون بتاعي
فتحت ولقيت بعض التفاعلات ع المنشور وتعليقات بتقولي ربنا يعوضك وتعليقات صحابي بعضهم الي بيواسي وبعضهم السخيف
قفلت الفون ورجعت على نفس وضعي نايم وشارد ف سقف الاوضة
سمعت صوت رسالة تاني
فتحت موبايلي وكانت رسالة على صارحني
مضمونها
"انا عارفة كويس الي بتمر بيه
وتعلقك بنورهان دا هيختفي مع الوقت
انت بس قوم شوف حالك ومتفضلش شارد ف سقف الاوضة دي كتير"
برقت بعيني بعد م ركزت ف اخر جملة
"ومتفضلش شارد ف سقف الاوضة دي كتير"
بدأت ابص حواليا حتى طلعت البلكونة
بس مفيش اي بني أدم
بس ازاي
عرفت إزاي اني شارد ف سقف الاوضة وحزين
" انتي مين"
كانت جملتي الي بعتها ونا ف قمة استغرابي
جالي الرد منها علطول
"انا القدر المخفى"
وعملت بلوك
ملحقتش افهم منها اكتر
مين دي
وعرفت وضعي ازاي
الرسالة صابتني بالذهول
وتفسيري الوحيد للوضع دا اني متراقب
بس قعدت اهدي نفسي وانها توقعت وضعي دا بسبب حزني هتراقبني فين هي
هتراقبني ازاي اصلا
طب يعني اي القدر المخفي
طنشت الافكار من دماغي ودخلت مسحت البوست الي نزلته وقفلت موبايلي ونمت
قومت بدري عشان شغلي الي كنت مقرر مروحهوش
بس حسيت ان نفسيتي هتتحسن لما انزل الشغل
لبست ونزلت شغلي الي بشتغله عشان بس اوفر مصاريفي
عمري م حبيت اي حاجة بتحصل ف حياتي
الا هي
كنت بعافر ف حياتي وبحاول احب شغلي عشان أقدر اتقدملها
بس حتى الحاجة الوحيدة الي حبيتها ف حياتي ضاعت
قعدت ع مكتبي وبدأت ارد ع كل المكالمات
منا شغال ف خدمة العملاء
وما ادراك ما خدمة العملاء
شغلانة مش باخد منها غير منتهى التهزيق من البني ادمين الي بتتكلم
خلصت يومي بالعافية وروحت البيت
هو مش بيت
هو الحقيقة سجن
حابس فيه كل افكاري
وحابس فيه احلامي
احلامي الي المجتمع وئدها
دخلت مطبخي عملت حاجة أكلها وسمعت صوت رسالة
طنشت
بس للحظة افتكرت ان ممكن تكون البنت بتاع إمبارح
سيبت الاكل وجريت ع الموبايل بس مع الاسف
كانت رسالة من واحد صحبي ننزل نقعد ع القهوة
رديت عليه ب اني هاكل وننزل
حطيت الاكل قدام التليفزيون الصغير وبدأت آكل
نسيت اقولكو ان امي مش موجودة
سافرت لاخوها ف البلد وهترجع بعد أسبوع هي وأختي
خلصت الاكل الي مكانش بيتبلع وكلمت صاحبي ونزلنا نقعد ع القهوة
"مش خلاص يعم قيس
البت اتجوزت
هتفضل عايش ف بكاء الاطلال دا كتير"
أتنفست بعمق
"انت لو حبيت بجد يسمير
هتعرف معني احساسي دا كويس"
قال وهو بياخد نفس من السجارة
"يعم مفيش حاجة إسمها حب
دا كلام مراهقين"
بصتله بطرف عيني ورجعت بصيت قدامي تاني
"تعرف ياض ي آسر
لما اتجوزت مراتي
كان جواز صالونات
اهلى شافوها ف فرح ورشحوهالي
ونا عشان عايز أتجوز
ف وافقت
بعد الجواز ب سنة ولما خلفت آدم
حسيت ان المسئولية زادت
وبقا في طفل بينا
وطبعا بسبب التدخين
العادة الي انا ذات نفسي بكرها
هي حست ان اغلب فلوسي رايحة عليه
ومش مكفي احتياجاتها
ولا احتياجات آدم
وكل م تطلب مني ابطل تدخين
انزل اقعد ع القهوة"
" يعني انت نازل عشان مخانق فيها"
هز راسه وهو بيطلع دخان من بقه
"ولية زنانة
قلتلها مش هبطل
وافتكرت عزوبيتي
مكانش حد بيحاسبني جبت كام علبة سجارة ف اليوم
رميت باقي السجارة فين
بهدلت الفرش ول لا
كنت ملك يبني ملك والله"
بصيتله شوية
" سمير
طول السنتين الي عشت فيهم معاها
محستش ب اي حاجة ناحيتها؟"
بصلي شوية وبعدها طفى السجارة
"هحس ب اي يعني"
"حب
كره
غيره
اي حاجة ي اخي"
" قلتلك مفيش حاجة إسمها حب"
ابتسمت
" ولو قلتلك ان في"
"قولي"
"عايز أخد رقم مراتك أتكلم معاها عشان تحل ليا اي مشكلة تواجهني وتحتويني"
للحظة لقيت خبطة ع الترابيزة وهو قام شدني من قميصي
"انت بتقول اي ياه
سامع نفسك بتقول اي
هو انا عشان اشتكتلك همي
هتسوء فيها
فوق ل نفسك
ومراتي متجيش ولو للحظة ع بالك
سامع
والا اقسم بالله هطربق القهوة دي كلها على نفوخك"
ابتسمت وشيلت ايدو من عليا
" أقعد بس
منت حلو وبتغير اهو
مال في اي"
مسح راسه بعصبية
"انا غاير ماشي ومشوفش وشك تاني سامع"
مسكت أيديه
" خد بس خد"
" إوعى ي جدع
احمد ربنا ان مخليتش وشك شوارع وانك لسة بتشوف زي باقي الخلق"
"طب أقعد
أقعد بس"
"قلتلك اوعى"
قعدته بالعافية ونا بضحك
"اقسم بالله هقوم اكسرلك طقم سنانك الي فرحان بيه دا"
"خلاص يعم الحج انا بس كنت بثبتلك ان في حاجة إسمها حب"
"بتثبت ازاي يعني
ب إنك عايز مراتي ي واطـ.ـي"
"يعم ونا هعوزها لي
غيرتك دي ي عم الحج إسمها حب
لو مفيش حب زي مبتقول
عمرك م هتشيط كدا حتى لو هتغير عليها عشان هي مراتك مش اكتر
عم سمير
الي بيقول حاجة بيبق قدها
ونت طلما مش عارف مشاعرك او انت عارفها بس بتكابر
يبق متنفيش حاجة الخلق ده منها اساسا
الخلق اصله الحب يصحبي
انت بتحب مراتك ومتخفيش دا
ف قوم زي الشاطر روح صالحها واسمع كلامها وحاول تبطل الزفت الي بتشربه دا
وشوف حياتك هتبق عاملة ازاي"
لقيت فوني بيرن وكانت ماما
رديت قالتلي اروح أخدها من المحطة
قفلت معاها وطبطبت ع كتف سمير
" متضيعش عيلتك من أيديك"
سيبته عيد حساباته واتجهت للمحطة
" مش قولتي لسة أسبوع يست الكل"
" زهقت م القاعدة قولت اجي"
شلت الشنط وركبنا تاكسي وروحنا
طلعتلي اكل من الشنطة كانت جيباه من البلد ونا بحب أكل البلد اوي
بدأت أكل
"خلص
خلص أكل بالهنا والشفا عشان جيبالك حتة عروسة انما اي
شهد مكرر"
بصتلها بصدمة والاكل ف بقي
