رواية لأني عاقر كامله جميع الفصول بقلم مريم خفاجة
سمعت صوت صاح:أشررررردي ولج اشرددددي اجههههه
رجلية وگلبي ركضن سوة عبرت الدرج سويته
شبختين وطرت لغرفتنه قفلت الباب وأدية ترجف بهستيرية دخلت للكنتور وحبست حتى النفس
گلبي يدك حيل ونفسي يتسارع لحضات
واتكسر الباب تكسر بالدك
وأسمعه يصيح:-اطلعي بت الكـلب أني أعلمج تكسررررررين كلمتتيييي اليووووم ماخليج عايشة اليوم اسگطج افتحيييي الباااااب
جسمي گام يختض حرت منين أشرد تمنيت لو أكو شباك وأشمر روحي منه ماهتم اذا أعيش لو أموت
ولا أموت ؏ ادين أبوية
حسيت بصوت قوي ، وهالصوت مثل الأعلان ؏ كسر الباب ودخل الوحش المفترس الي بنفسه يلتهم بنته الطالعة من ضهرة
صارت دموعي تتسابق ضليت أدك والطم
واني بالكنتور
أنفتح الباب وأعلنت موتي خلص
أنتهيت من شفت بيدة الصوندة السودة
صحت بشهگات:-لا يابه لا حباب والله ماسويها بعد والله العظيم لاتضربني حباب
ماسمع ولا أهتم ولا حس جلدني جلدة
انوخذت روحي بيها عضيت على شفتي وصحت بصوت عالي صارت گبالي أمي تبعدة
وهي وگعت بيها ضل يضرب بينه وهي مثل الصنم واگفة گبالي وحابسة نفسها من الألم في سبيل يعوفني ومتلوحني ضربة
صاح بصوت عالي:-ولججج تاليييي وكتتت بنتييي تفتر بالبيوت
دفر أمي وطاحلي دك بالصوندة وطبعاً
مايكتفي هو بس بشي واحد يستعمل كل انواع الضرب
مل من الصوندة ولزم شعري ودك راسي حيل بالگاع
فقد وكأنما بعد ميشوف أحد گباله
كأنما ديضرب بحايط او يضرب بصنم!!
ضربني ضرب ماتمنيته لعدوي
حتى الحيوانات ماتنضرب هيج
أجت مرته تصيح وتهوبع:-ولك عوفهن عوفهن لايدخلنك سجون منو يفيدك بعد ذني الـ.......
علاء:-أني أعلمجن إذا ما أربيجن من جده وجديد فـلا أتسمه بأسمي
طلعو ثنينهم وأمي طاحت من طولها لا بيه أعينها ولابيها وتعيني، طلعن خواتي من جوة الجرباية وضلن گاعدات يم أمي ويهزن بيها ويبجن
حجيت بألم:-ريم جيبي ماي من جوة
ركضت ريم جابت ماي وأجت سحبتني ملك وگومتني من الگاع سحلت نفسي بالگوة ورشيت عليها ماي وحطيت بحلگها واني اطبطب ؏ خدها فزت لازمه ضهرها
و ونت بألم:-الحگني ولجن يمه ضهري راح أموت
بجيت:-لا يمة أموت وراج محد يضل النه ، ملك جيبي المرهم جيبييي من كنتور أمي والعلاجات همم
تراكضن ثنينهن ونزلن جوة بللت شفتي وأون من الضربة الصارت بفخذي
دموعي ماعرف عليمن يبجي عليه لو على أمي
اجن خواتي لازمات بديهن علاليك الأدوية
أخذتهن وطلعت المراهم كلها ودرت أمي وأحطلها
جبت العلاجات سطرتهن گبالها:-يمه ياهو منهن للآلام فتحي عيونج يمه فدوة فتحيهن شوفي
أشرتلي ؏ علاج فتحت الحباية وأنطيتهيا
ورجعت حطت راسها ؏ رجلية وتردد:-حسبي الله ونعم الوكيل
بقيت اني اون وهي تون ومحد يداوينه
شلناها بصعوبة وخليناها ؏ جربايتي ونمت اني ؏ جرباية ملك دثرت نفسي بالملحف وبقيت أبجي بحرگة گلب ، بحرگة طفلة مظلومة
بكل ضرب روحي تروح وأتحمل علمود أمي متنضرب هي وهاي مو أول مرة
ولا آخر مرة
السبب جان تافهه وهو روحتي لبيت صديقتي الي بيتها بصف بيتنه وابوها وابوية
عداوة من سنين
؏ أتفهه الأسباب ننكتل
أذا مسوينه الي يريدة معناها أحنه بعداد الموتى نتجهز للضرب اني وخواتي وأمي
عدى مرته وبناته وأبنة الجان ميمسهم بكلمة مفضلهم علينه
وهمه يشوفو هيج ويزودون عدى جاسر الي هو أبنة الوحيد ماجان معادينة من يشوفنه ننضرب يگعد يبجي مياكل لأن أحنه مناكل ، يبوگلنه الأكل بوك
حتى الماي جان ممنوع..
جنه نحارب في سبيل نعيش
جنه نتألم في سبيل أمي
بكل لحظة عشناها جانت لسبب معين
ما عشناها لأنفسنا...
غفت عيوني ودموعي يابسة بيهن
فتحت عيوني الصبح أمي وخواتي نايمات والبرد يكتل غطيتهن بأكثر من بطانية ولبستهن جواريب
علمود ميبردن
تحركت أمي مشيت لازمة رجلية متألمة
وگعدت ؏ طرف الجرباية أباوعلها من بعيد
فتحت عيونها ورفعت نفسها وطگت ضهرها
همست بصوت ناصي:-آآه يمة
دارت وجهه وباوعتلي عدلت نفسها ؏ اساس انو هيه مابيها شي:-ها يمة ليش گاعدة؟
ملاك:-تعبت من النوم
أيمان:-يخلصج من الواقع
ملاك:-مو دائماً يخلصني
هزت راسها ودموعها بعينها:-شلون صرتي يمه؟
أيمان:-صرت زينة لايضل بالج
ردت باوعتلي وفتحت أيدها
گمت ؏ كيفي وعبرت جرباية اخواتي ونمت بصفها حضنتني حيل وباست راسي:-يمة شلتي حمل مو حملج
ملاك:-يمه شوكت نخلص؟
أيمان:-الله بيدة كلشي
ملاك:-بس ألى متى أحنه تعبنه
أيمان:-المؤمن مبتلي يـَ يمه خلينه راضين بعيشتنه ونحمد الله بلكت يگعد نصيبجن وألجن حظ بالأخير
ملاك:-وأنتي؟
أيمان:-حضي يگعد بالآخرة ، ويا أبوج ماگدر اعيش حياة سعيدة ولا اتهنى
ملاك:-شوكت نكبر!
أيمان:-لاحگة ؏ شلعان الگلب
ملاك:-شنو الفرق هسه هم مشلوع گلبي؟
أيمان:-تعيشين وتشوفين تتمنين ترجعين لهاي الحياة دور
ملاك:-أسوء حياة منو يتمناها لو أموت ماتندم على حياتي هاي
هزت راسها وذبت حسرة وحضنتني وشمت شعري بعمق بعدتني شوية عنها وضحكت:-ترة أشم بيج علمود ريحة الحنه مو علمودج
ملاك:-لا بالله؟ شبيها لعد ريحتي يومية أسبح
ضحكت وسنونها بينت ورجعت حضنتني حيييل وباستني بخدي
نمت ؏ ريحة حنيتها وحُبها
رجعت گعدت ؏ صوت خواتي يلعبن ويمهن جاسر
ماشفت أمي ، كالعادة تنزل تنضف وتطبخلهم رغم العذاب
أستغفرت وگمت اخذت ملابس ودخلت للحمام بلكي يرتاح جسمي شوية
ترست الطشت وگعدت أسبح وببالي مليون شغلة وشغلة
كملت وطلعت من الحمام شفت أمي گاعدة تباوع لأخواتي:-ها أمي سويتي الغدة؟ وكلتيهم؟ نضفتيلهم؟
هزت راسها ودنگت:-صبيتي الغدة وصعدتي مو؟ وتنتضريهم يخلصون وناكل وراهم؟
ملك:-يمة ترة أحنه هم بشر مثلهم عليمن محسستهم هم كل شي بسببج وصلنه لهالحال
أيمان:-كافي كااافي شتررردني اسووي
وهو سحلني من نوومي علمود انضف واسوي الأكل؟؟
مو تعبتتت وخلص عمرررري من الضرب والاهانة
ملاك:-حطيلهم سم وموتيهم وخلصينه
كافي ملينة وانتي الي خليتيهم هيج يسون بينه
لا شخصية ضلت عدنه ولا كرامة صرنه
مهانة گبال نجلاء وبناتها وابوية ينزل ويصعد
يضربنة وهنه يضحكن والسبب انتي يمة
ماخليتي شخصية لنفسج وگدرتي توكفي عد حدة
باوعتلي وعيونها مليانة دموع حتى
علية مترد اذا اصيح عليها لو احجي واعلي صوتي
تبقة ساكتة!
باوعت لملك هزت أيدها
وشمرت المنشفة عن شعري وگعدت أمشط بحرگة كلب شعري كلة وگع بأدية من كد ما شلعته بالمشط
شوية ونزلت أمي وصاحتلنه من جوة حتى نجي ناكل:-گومن يلا خنشوف أمي لوين
تودينة بعد لحد وين توصل كرامتنه
نزلنه ثلاثتنه سوة ودخلنه للمطبخ فرشنه سفرة بالگاع وگعدنه ناكل اجه جاسر وگعد بحضن أمي رغم متغدي ويا أهله بس يجي ياكل ويانه من حبه ألنه
خلصت الأكل وماتهنيت وبالي كل يم الحياة
شلون راح تكمل؟ غسلت الأماعين وامي
تفتر وتعزل وتمسح....
تعودنه بمرور الأيام نفس المعاناة تنعاد
ونفس الآلام والتعذيب
أيمان:-ملاك نزلي غسلي الصبة
نزلت واني الم بشعري لاگتني مرت أبوية"نجلاء"
نجلاء:-ولاتنسين الحديقة نضفيها وشيلي الورك الواكع
ملاك:-ممحتاجة نصايحج وتعليماتج اعرف شغلي
نجلاء:-عليمن تطلعين قابل
ملاك:-على عرامتج
رادت تضربني شردت منها
ورحت للصبة غسلتها ونضفت الحديقة دا أسگيها واجت أمي حطت كرسيها وگعدت:-باجر تجي مرت خالج من الأمارات
ملاك:-صددك؟
هزت راسها بأي كتلها:-نروح احنة مو؟
أيمان:-نشوف أبوج
ملاك:-معناها أيس يـ عبيس
ضحكت ودمغتني جريت كرسي وگعدت بصفها:-هي مرت خالي شگد عدها جهال؟
ايمان:-يا جهال يمه ، عدها بنية جبيرة مخطوبة و ولد كُلية داخل يمكن وأصغر وحده أصغر منج بسنتين ماشاءالله كلهم كبار
ملاك:-ها زين ، لعد همه ليش عاشو بالأمارات؟
أيمان:-خالج يمه جان بالأحزاب يشتغل وسوالف الدولة بزمن السقوط تدرين بالناس كلها هجت وهو بالتهديدات والسجون دور جدج شردة للأمارات وهناك مات هم ماتهنه ٣ سنين ومات سودة عليه وهمة ظلو هناك
ملاك:-زين يرجعون بعد؟
أيمان:-والله ما أدري
هزيت راسي وبقينه نسولف للمغرب ودخلنه للبيت صلينه وكملنه وتعشينه وكل من راح لغرفته ، صعدت لخواتي وجاسر يلعبون بس ولا مبين لعب واحد يعيط بالثاني
عفتهم ونمت لثاني يوم گعدتني أمي:-گومي يمه نروح لبيت جدج
ملاك:-أبوي قبل
أيمان:-اي يلا جدج أجانه
هزيت راسي وبدلت واخذت بيدي
عبايتي ونزلت جوة بست راسة وأيده
وگعدت بصفة شوية وترخص وگمنه وياه
سمعت صوت صراخ جاسر يبجي يريد يجي ويانه وأمه الخبيثة متقبل عفناه وطلعنا لأن مستحيل يقبلون
صعدنه بالسيارة بقيت أباوع للشباك
واشوف المناطق والمناضر المكان الوحيد اللي نروحله هو بيت جدي عداه منطلع ابدد من تجي المدارس نكيف لأن نطلع شوية ونغير جو
وصلنه للبيت الكُل أستقبلنه بالأحضان بأعتبار صارلنه ٦ أشهر ما جايين
ما مرت غير ساعة وگالو وصلو وگفنه مستعدين
نشوف اشكالهم اني مشايفتهم أبدد وأمي
تگول قبل ٦ سنين شايفتهم أكيد متغيرين دخلت مرت خالي و وياها بنتها الجبيرة و وراها أبنها
_السلام عليكم
راحت لجدي أول واحد وباست أيدة:-شلونك حجي
الجد:-هله هله بيج ام كمال نورتي العراق
ام كمال:-بنورك حجي
سلمت علينه وگعدوا گبالنه فتحوا نقاشات ومواضيع واحنه گاعدين مُستمعين فقط....
أجت بنية الي هي البنية الأخيرة
"وردة":-هلو
ابتسمناله وردينه السلام گعدت بصف ملك وسولفت ويانة اندمجنه وياها بسوالف
گمنه سوة وگعدنه بغرفة وحدنه وضلينه نسولف صفنت شوية وگالت:-اني شو ماعرفت أسمائكم؟
ابتسمت وگتلها:-اني ملاك وهاي ملك وهاي ريم أحنه تلاثتنه خوات
وذني جوهرة ونور وسارة بنات خالي عصام
وزهراء وهبة بنات خالي عثمان وبعد ثنين ولد
وذني الأربعة زهراء وحوراء وروان ونهروان خوات بنات خالتي أزهار
وردة:-صدُك ملاك عيونج حلوات حيل ولونهن يجنن
ابتسمت بخجل:-شُكراً
وردة:-احب اللي عيونهم ملونة يصيرون مُميزين دائماً
ضلينه بايتين يمهم لليل وتعشينة سوة
البنية وردة جانت حييل لطيفة وتحب تحجي أجتماعية كُلش حبيتها
العرفته رندة الي هي أختهم الجبيرة مخطوبة وعرسها قريب ويكون أستقرارهم ببغداد
وكمال هو طالب مرحلة أولى بكُلية الشرطة....
بليل كلش صعدنه فوك بغرفة البنات
شوية ونفتح الباب وچانت اُمي:-ها يمه تنامن هنا؟
ملاك:-اي يم البنات
أيمان:-ديرن بالجن كهرباء شي وتغطن زين ولاتسهرن
وردة:-حاضر عمة
أيمان:-يلا نامن تصبحن ؏ خير
خذت ريم ونزلت التفتتلي وردة وگالت:-امج كل
ساعة واجت تشوفجن ليش عود؟
ملاك:-تخاف علينة
وردة:-ليش تخاف غير بيت جدجن يعني ماك شي يخوف
ملاك:-حتى ببيتنه كل ساعة تصعدلنة وحتى بليل مرات
اشوفها تضل تصعد وتنزل لحد ما
يصبح الصبح
وردة:-اني أمي عسى ما أضل فوك دهر ماتفقدني
ضحكت:-ليش؟
وردة:-هيه هيج
حجتها بفشلة وغيرت الموضوع
اخذنه نص ساعة ونمنه
باليل
حسيت احد يصيحني بصوت هامس يم أذني
فزيت مخترعة شفتها
وردة لزمت گلبي بخوف:-لج نززتيني
وردة:-شسويتلج والله كلشي ماسويت
مطيت جسمي وگلتلها:-شعندج گاعدة؟
وردة:-شنو ماعدكم حمامات؟ مثانتي راح تطگ من أجيتكم لسه مادخلت للحمام
ضحكت وكتلها:-لا أكو بس ماكو فوك بس جوة
وردة:-گومي وياي أخاف وحدي
اخذت حجابي وعدلت لبسي ونزلنه ؏ كيف دليتها ؏ حمام واني گعدت بالمطبخ ؏ ميز
حطيت راسي ؏ ميز وغفيت
ماعرف شكد مر الوقت
وحسيت واحد يهزني
فتحت عيني وماشفت منو بس
سمعت صوت رجال:-ليش نايمة هنا؟
