رواية ليليان ( كاملة جميع الفصول ) بقلم زينب نور

                                                    

لا أحتاج الى شفقة من أحد لأي سببباً كان ..

لا اريد الحب والحنان المصطنع وأن كان طويل الأمد  ..

كل ما اتمناه هو العيش بحرّيّة بعيداً عن تفاهات الآخرين المزعجة ..

اعيش في عالم لا يوجد فيه النفاق ، الكذب و الاقنعة المتعددة الأوجه ..

                                

 هاجس مايفركني ابد من انام من اكعد من كلشي اسوي بحياتي ..

                                

شلون هيجي صار ماعرف ..

حياتي كدامكم وانتوا شوفوا واكتشفوا الحقيقة ..

من خلال احداث قصتي ..

                                

اني اسمي ليليان من بغداد ..

عايشه ويا ماما وبابا شوي كبار بلعمر  ..

الي ازوجوا عن طريق زواج تقليدي ..

                                

ماما ربة بيت عادي..

بابا محامي واغلب وقته بلشغل ..

                                

اخواني اثنين .. 

مراد الجبير عمره ٣٠ مهندس بشركة اهلية ..

جود اكبر مني ٢٦ متخرج قسم جغرافية وعنده مكتبة يشتغل بيهه ..

                                

اختي عندي بس وحده بلمدرسه..

اصغر مني ب٣ سنوات تقريباً ..

اسمهه ميان ..

                                

عائلته بأختصار كلهه اغلب الوقت بلشغل حته امي ..

ماعرف شسوي بس تشتغل بلبيت وماكو احد هدوء بوحدنه كاعدين..

                                

ماتهتم الي هواي وهذا الشي جان يزعجني كلش ..

وتهتم لميان اكثر مني فصارت شويه غيرة ..

                                

اريد اهتمام بلبيت ماكو ولا بلمدرسه ..

حته كمت اكره المدرسه ونزلت درجاتي لان ماقره ..

صارت عندي عقده من وره البنات بلمدرسه ..

                                

عندي صديقات اثنين جمانة و ندى ..

جمانة المقربة الي هيه نعمه من الله الي ..

ونحجي لبعض كلشي وماهتمت للشي الي غيرهه اهتم بي..

                                

اما ندى مو هلكد علاقتي بيهه وكطعت علاقتي بيهه بعدين ..

من عرفت تحجي عليه وتسمعني هم كلام ..

                                

البنات الي بلصف او اي بنات مايحبني هواي ..

لسبب بسيط انو اني شاطره واجيب درجات عاليه وهادئة ماحجي هواي بس ويا جوجو ..

                                

السبب الثاني صوتي ..

هواي خلاني افقد ثقتي بنفسي ..

                                

صوتي مبحوح  شوي بي خشونه مو ناعم مثل بقية الكلام ..

هذا السبب يخلي البنات مايحبني وحته مايخليني احجي وياهن او اشارك هواي بلصف ..

                                

انقهر كلش خصوصاً اني احب الاغاني والموسيقى ..

اتمنى اكعد فد يوم والكه صوتي حلو ناعم مثل بقيه البنات واغني الاغاني الي احبهن ..

                                

بس هيه بعد احلام وامنيات ..

وماطول اني من البدايه ماعندي حظ ابقه هيج ..

  

                                              

                                                    

امي تحب ميان اكثر مني لانهه طالعه تشبهه ..

واني لا طالعه ع بابا  ..

                                

اني حنطاوية وعيوني عسلي ..

وميان بيضه عيونهه ملونه ..

                                

واخواني هم طالعين ع ماما ..

بس اني حظي مو مثلهم ..

                                

حته مرات افكر ..

اكول صدك اني بنتهم ..

                                

جنت انقهر كلش من اشوف الاباء او الامهات يجون ويا بناتهم للمدرسه واني لا ..

                                

مرات احس بنفسي عندي اكتئاب صدك مرض مو ضوجه بسبب العائله ..

لا بنات اقارب يمنه  كلهم بعيدين بغير محافظات ولا علاقتنه ويا الجوارين زينه بس اكو كم وحده اتروح يمهم امي..

                                

بالنسبة للحب والعلاقات العاطفية فماعندي هيج سوالف ..

بس لما دخلت للاعداديه اجه ابن خالي يمنه يدرس فتره ...

جان داخل دورة مال حاسبات بمعهد ابغداد ..

                                

يوم الي اجه تغيرت حياتي وكياني ..

انتبهت لأسلوب كلامه وصوته ..

بغض النظر عن شكله يموت ..

                                

اول مره هيج انتبه ع ولد اني ..

وهو ماخذ من عائلة امي ..

                                

بشره بيضه و شعر اشكر وعيون ملونه ..

فديته شكد حبيته ..

                                

هو بقه اربعين يوم يمنه ..

بديت احبه من اول اسبوع وتعلقت بي ..

جنه نسولف هواي ..

                                

وجان يقريني هم بلحاسوب وبلانكلش الي هو اختصاصه ..

اسمه ميثم وعمره ٢٤ ساكن بخانقين ..

                                

الفتره الي عشتهه وياه فتره خياليه ..

جان يحسسني بلاهتمام الي اني فاقدته ..

                                

خلصت الاربعين يوم مثل الاربعين دقيقه واقل هم ..

الوقت الحلو مايساهل ويانه ويمشي بسرعه ..

                                

اهلي عادي عدهم من اكعد ويا ميثم واحجي وياه ..

واحنه نحجي عادي مثل الاخوه كدامهم ..

                                

وحته هو مايعرف اني احبه ..

لان اسمعه هواي يخابر ..

اكيد يحب وحده ..

                                

عادي مشيت حياتي مثل كل مره ..

بس بقيت احجي ويا كتابة بين فتره وفتره ..

اعرف حظي اذا ويا اهلي ماكو ويامن يكعد ..

                                

اذكر موقف امي من طبيت للبيت وجنت بوكتهه مستلمه الشهاده ..

جنت صف خامس علمي ..

وطلعت كمال بواحد بلرياضيات ..

                                

بوكتهه قبل الامتحان بيوم حجه ويايه ميثم ..

وكالي كلام من يومه ذاك لحد اليوم بسببه ع طول نفسيتي تعبانه ..

                                

- ميثم .. روحي ليليان بعد ماكدر احجي وياج 

- ليليان .. ليش ؟؟ انت صدك تحجي شصار ؟!!

- ماكدر احجي وياج بعد 

- اي ليش غير تفهمني !!

- ماكدر وثاني شي بعدج صغيره ع هاي السوالف

- ولك اني صف خامس شلون صغيره احجي يمعود شكووو ؟

- واذا ماكدر خلي امج تكولج وراح تعرفين كلشي ..

- شلون كلشي شنو قصدك !

- قصدي ع الاسئلة الي تسأليهن دائماً 

- يا هو منهن 

                                

عيط عليه وكال :

                                

- دروحي ليلو كافي كتلج وبعد لا تحجي ويايه 

- تقصد اني ع شكلي لو ع تعامل امي لو شنو ؟

- اي هذا يله باي 

                                

سده بوجهي وراح ..

خلاني بدوامه افكار تروح وتجي ..

شنو اني مو بنتهم مثل ما اني دائماً افكر ..

                                

بقيت ابجي لحد مانمت..

كعدت بلكوه ونفسيتي صفر ..

                                

ماعرف شلون رحت وشلون كتبت ..

همزين جان اخر امتحان هذا ..

                                

من رجعت للبيت وامي شافت النتيجه اتخبلت ..

عمرهه ماضاربتني بقوه ..

بس هلمره غير ..

                                

ماحسيت هيه امي او شخص قريب عليه ..

حسيتهه انسان ثاني ظالم ..

بحياتي ماشفتهه هيج ..

                                

عيونهه حمره تجدح من الغضب ..

ضلت اضرب بيه وكمت اعيط..

اجتي ميان ووخرتني منها ..

                                

رحت لغرفتي وضليت متمدده لحد مانمت ..

ضليت كله بلغرفه وميان تجيبلي الاكل ..

                                

لا بابا ولا اخواني اجوي سألوني ولا شافوني ..

ولا امي هم ..

                                

صدكت بوكتهه كلام ميثم ..

اني وين اروح اذا همه مو اهلي ..

ومنو همه اهلي الحقيقين وليش عافوني ..

                                

كملت العطله بكآبة وشغل والباقي اكضي بسوالف ويا جمانة ..

ميان ماجانت تشتغل هواي بحجه هيه السنه الجايه ثالث تتعب ولازم ترتاح رغم اني سادس واهم منهه ..

                                

محد كلي اذا تردين تاخذين خصوصي بلعطله ..

ولا سألوني حته واني هم اعتمدت ع نفسي ..

حتلو كالولي جان رفضت بس ع الاقل الواحد يحس بقيمته عند الغير ..

                                

بدت المدرسه واهتميت لدروسي واحاول انسه ميثم ..

احاول اكرهه من خلال اسلوبه اخر مره بلحجي ..

وهو عنده حبيبه واكيد راح يزوجهه ..

                                

ومثل ما تصورت هو راح خطب وره مابدت المدرسه بشهرين ..

كلش ضجت ورجعتلي الكآبه واعصابي تتعب وجسمي هم ..

                                

مالي واهس بكلشي والحياه طالعه من عيني ..

اكول شلون راح اكمل حياتي ..

                                

اسكت واحاول اقره حته اطلع معدل يفيدني ويخدمني بلمستقبل ..

اذا طلعوا صدك مو اهلي وين اروح اني شلون اعيش ..

وهيه العيشه صعبه وتختلف بره واني مامتعوده عليهه ..

                                

كملت المدرسه وكعدت من وكت اقره ..

ميان كامت تشتغل اكثر مني وتساعدني ..

واني اقره بلغرفه اغلب الوقت ..

                                

قبل الامتحانات بشهر كمت احس بأشياء غريبه ..

غريبه حته ماخلتني اقره واركز ..

                                

ماحاولت اكول لشي لأمي او حته ميان ..

اخاف تكولهه لأمي واني اريد اعدي الامتحانات ع خير ..

                                

وراهه بأسبوع بدا عندي هاجس النغمه السوده ..

صدك سوده لان عتمت حياتي وحطمتها لآخر أمل ..

                                

هو هذا الي جان ناقصني ..

هلوسات وخبالات سادية ..