رواية في ذمة الغريب كامله جميع الفصول بقلم كنوز
هلي نسمة هوه بريتي شملهم
يطيب الكيف لو ذعذع شملهم
عسى النمام لا طشر شملهم
ولا مكروه مس اهل الحمية
:: طلعي السجلات بساع اجه مسؤول الشؤون يفتر
دخلت سرى لـ صاله بخطوات سريعة تنهج بانفاسها عبالك جاية ركض اخذت أول سجل مستعجلة وهي تحجي ،،،
بيدي كوب چاي وكعكاية خليتهن ع ميز وگمت بساع وياها شلت باقي السجلات امشي وراها ادردم بضجر
:: شعنده جاي هذا شو سووه الدرب سچة خري مري كل شوية وماد راسه السلام عليكم
خلينا السجلات ع ميز بالغرفة الخارجية مال الرسبشن نفخت خدودها ضايجة
:: اهووو خليني ساكتة احسن هذا اسوء مسؤول مر علينا فد قنقينة و يدور الزلة ع موظفين عبالك يطلبنا ثار كلها ضايجة منه
أيدت كلامها لأن كل الموظفين يشاركوها نفس الرأي عنه ابد ماعنده أسلوب وفوگ هذا عبالك شبح ما نحس إلا وهو فوگ روسنه
:: نوب لا ينام ولا يهدأ المغرب يفتر ،،نص الليل يفتر وهسه الفجر هم اجانه لو عنده ولادة هم هسه ولد وخلصنا منه
ضحكت سرى ع كلامي وهي ادور بالسجلات مخبوصة
:: وين راح هذا النوب.. ولج ايدج وياي شوفيلي سجل مال اليوم وين صار
تقربت طلعته الها لان جنت اكتب بي من اجت
:: هياته گدام عيونج بس انتِ خبصتي نفسج بعد ما تشوفين
عدلت جذعها بعد ما كانت محدبة وهي تدور بين السجلات تنهدت براحة من رفعت السجل المطلوب گدام عيونها وگالت
:: د فتحي ع اخر ورقة وخلي ع ميز بلكي يشوفه و يجفينه شره ويروح
گلبت أوراقه ادقق بي
:: خل اشوفه بالأول لان كتبت ع سريع و تعبانة خاف بي أخطأ هذا ما يتحاجى ايده و التقرير
:: ياريت تقرير وبس نوب يوگف ساعة يلقي محاضرة عن الإخلاص و التفاني بالعمل ويترس وجهي تفال و...
دغيتها بعكس أيدي من دخل وهي ما شافته ظهرها ع الباب چان نخطف لونها وقطعت كلامها طب شايل خشمه حتى سلام ما سلم
:: منو يترس وجهج تفال ست سرى
تنهدت سرى صفنت بوجه عرفتها راح تجفص حجيت بساع
:: ع اخوها د....
قطعت كلامي من هي نطقت بنفس اللحظة
:: عليك شنو اخاف منك انت شايف نفسك گاعد ورا الكرسي ومرتاح كل ربع ساعة و زرگتنه وين السجل،، فلانة وين علانة ليش مو بمكانها حط رجلك ع گاع ترى ع ساعه الله يهبدك يخليك مخبل و تجدي بالإشارة
خرطت شكو محمل گلبها عليه ضليت فاتحة حلگي سرى تسكتت تسكتت وبعدين تنفجر كأن من يكون تنفجر عليه وهو هم سكت اخذله نظرة عليها من فوگ ليجوه
هز راسه بتوعد وسكت عن الموضوع يباوع ع الغرفة يدور ع زله مشى اصبعه ع ميز يشوفه نظيف لو لا حتى يحاسب عامل الخدمة ..
يمكن لو بنية حتى لصالة الولادة يدخل اخر شي جر السجل داره عليه وسحب نظارته من جيب الأبكوت
بدا يقرا و يگلب بالاوراق و سرى تغم بي من جوه الميز هز راسه يون وطلع
:: ونلها ابو راس المصفح جيف مالگه غلطة
گالتها سرى بصوت ناصي ويا ما دار وجهه يطلع هو التفتت الها باوع الها بطرف عينه عود سمعتج وراح گرصتها من ايدها
:: ولج بعده بالباب ماگدرتي تصبرين شويه
حركت ايدها بجزع وملل منه تفرگ ايدها مكان الگرصة
سرى :: دخل يطير يمعوده مللني بالدوام عبالك بس هو صار مسؤول لو يصير بالبرلمان شيسوي يمكن يخلينا خدم اله وانتِ الثانية بعد لاتگرصين تگول زنبور أسود
ضحكت عليها
:: ما تشوفين الله ما مگدره اليوم سمعت الممرضين بالطوارئ يحجون ويا الطبيب الأقدم راح يجمعون تواقيع ويرفعوها للمدير حتى يوخروا
:: و الله اول وحدة أوقع اني ومرتين أوقع هم وابصم بـ اصابع اديَّه و رجليَّه هم اذا يردون بس خل يخلصونه منه هالاغبن هذا
:: اي والله يمكن باجر يبدون ويجيبون ورقة لهنا هم الي ما يريده يوقع
:: كلها ماتريده ماعدا شكم واحد لوكي صايرين وصلة مسح اله علمود الاجازة
:: يله بلگي المدير يوافق يغيره ونخلص منه
:: والله اطخ براسي اهينه گدام المستشفى كلها واقدم استقالة وانعل ابو الشغل عبالك مو عدنا شهايد ومتعينين بيهن يشوفنه خدم عنده
نادت الدكتورة من داخل الصالة التفتت سرى تمشي عاقجة وجها وتدردم
: ها اهاا النوب هاي كل شوية وصايحة عبالك بس احنه ممرضات بالصالة
دخلت وراها حالتين ولادة صايرة هوسة لبست كفوف و وگفت يم الدكتورة اساعدها وانطي تعليمات للبنية حتى تسهل ولادتها شالت الدكتورة الطفل من رجليه رفعته ليفوگ دگدگت ع ظهره أكثر من مرة ماكو صوت كالت
:: تعبان رحمة للخدج بساع
أخذته منها ع سريع واني اخطف نظرة ع الام من شحب لونها من كلام الدكتورة واني اركض بالطفل واسمع صدى صوتها تسئل بقلق وخوف عن طفلها ما چان لازم الدكتورة تگول هذا الكلام گدامها دخلت للخدج المعقم
صالة الولادة والخدج المعقم متصلات ابعض اباب ثنينهن أخذوا مني الممرضين بدوا إسعافه خلوا اله اوكسجين وسحبوا السوائل
ضليت واگفة اراقب بوجل كأنه طفلي اني بين اديهم گلبي اسمع دگاته من گد القلق زفرت انفاسي متنهده براحة من صرخ الطفل رجعت بخطوات سريعة والابتسامة اخذت طريقها ع وجهي بدون أرادة مني
:: مابي شي والله.. عايش
نطقت كلماتي مبعثرة اريد بس اطمئن الام رد الدم بوجهه ونزلت دموعها
::صدك عليج الله لاتجذبين عليَّ ابني عايش زين مو؟
:: عايش والله وبس شويه ترتاحين اخذج تشوفي
هزت راسها وهي تردد متلهفة
:: ما بيَّه شي بس خل اشوفه عليج الله
طبطبت ع كتفها بدعم اطمئن گلبها
:: ما يصير ياعيني مو زين عليج بس ارتاحي شوية و اخذج
كملوا منها البنات جابت الها امها اكل انطيته الها تاكل ع كيف والقلق لسه بوجها اعرف ماحترتاح اله تشوفه بعيونها
صارت هدوء الصالة ورا ساعة من شفتها ارتاحت وهم خطية كل شوية وگالت وديني لابني ساعدتها تگعد ع كرسي متحرك اخذتها من نفس الباب
طلبت منهم يجيبوا الها تشوفه مايصير يدخلون للخدج المعقم فقط الممرضين بس چان بعده ع اوكسجين من شافت الممرضة وضع البنية وقلقها حچت وياي
_ بعده ع أكسجين رحمة ماگدر اطلعه بس قربيها ع باب راح ارفعه الها تشوفه
صدك دفعت الكرسي گدام باب الخدج رفعته الممرضة بقطعه طبيه زرگه ناعم كلش عيونها تلمع بفرح نزلت دموعها وهي تراقبه و اتمتم بكلمات شكر لرب العالمين رجعتها لردهة الاستراحة
ومشى الوقت صار هدوء گعدت ع كرسي عيوني احسهن انتفخن من السهر رجليَّه يوجعني يونن ع گد ما وگفت
حلگي انشگ ع كثر ما تثاوبت صوت قرآن بعيد صوته متذبذب يعلى و ينصى لان هوى عالي يجود بصوت يبث الطمأنينة بالنفس بطور عراقي عرفته من صوته عامر الكاظمي أمي الله يرحمها جانت تحب تسمع
القرآن بصوته الصبح و المغرب،، رجعت ظهري ع السكملي ركزت عكسي ع ميز و خليت راسي ع أيدي استمع اله
بسم الله الرحمن الرحيم
إِذَا ٱلشَّمۡسُ كُوِّرَتۡ (1) وَإِذَا ٱلنُّجُومُ ٱنكَدَرَتۡ (2) وَإِذَا ٱلۡجِبَالُ سُيِّرَتۡ (3) وَإِذَا ٱلۡعِشَارُ عُطِّلَتۡ (4) وَإِذَا ٱلۡوُحُوشُ حُشِرَتۡ (5) وَإِذَا ٱلۡبِحَارُ سُجِّرَتۡ (6) وَإِذَا ٱلنُّفُوسُ زُوِّجَتۡ (7) وَإِذَا ٱلۡمَوۡءُۥدَةُ سُئِلَتۡ (8) بِأَيِّ ذَنۢبٖ قُتِلَتۡ (9)......
استوقفتتي آية واذا الموءدة سُئلت بأي ذنب قُتلت ذكرتني يوم اجتنه بنية تريد تولد عينها مزورگة و جسمها بي آثار ضرب تعبانة نفسيتها أكثر من تعب جسدها،، حامل و بشهرها.. ضعيفة لاحول ولا قوة وحامل كل هذا ما منعه يمد ايده عليها
حجيت وياه عبالي ادمي وهو يرد بعنجهية يومها تكدر يومي كله ومن رجعت للبيت وابوية عرف گالي
لرجال إذا ما حكمه ضميره و خاف الله بالمرأه مستحيل شي يمنعه
وكلامه صح البعض يظن احنة كمجتمع تطورنا لان بعد محد يقتل البنت و البعض يستبشر بيها بس بعض البنات تتمنى لو قتلوها وهي رضيعة افضل مما تعيش وهي ميتة احنة مجتمع عايش بعادات مغلوطة كذب من گال يحكمنا الدين لا احنا يحكمنا كلام الناس من بتهم تسوي الخطأ
ما يخافون غضب الله.... لا..... خوفهم كله الناس شتگول عليهم و العالم تبقى تنظر بستصغار للعائلة كلها يحملون ذنبها لاخواتها و تبقى تلاحقهم وصمة العار...
خوات المخطئة محد ياخذهن اخوانها و ابوها يبقون مدنگين روسهم بسبب كلام الناس و لو نرجع لدين ان الله ما يحمل ذنب احد لاحد ثاني،، وغيرها من حالات اذا المرأه ما جابت ولد گالوا لزوجها تزوج
خل يجي ولد يشيل اسمك نسوا أن بدينهم النبي محمد صلى الله عليه وآل و سلم الي شالت اسمه بنت و نسوا العلم ان الأطفال من صلب الرجال مو من رحم المرأه،،
بوقت اذا الزوج ظلم المرأه گالوا الها تحملي علمود اطفالج واذا هي قصرت گالوا اله تزوج اكسر عينها.... و غيرها و غيرها جريت نفس
بضيق من مرت عليَّ هاي الذكرى انتبهت من شرودي ع صوت بنية وگفت يمي وهي لازمة بطنها و تبجي گمت الها اسئلها بقلق
:: شكو شبيج حدت عليج الطلوگة؟؟
لزمت أيدي حيل تترجاني بدموع عيونها
::لا راحت الطلوگة بردت و ابني بعد ما يتحرك ما دا احس بيه عفية شوفي خاف صار بي شي
بيدي كلينس مسحت دموعها واني أخذها من ايدها لجهة السدية
:: ع كيفج اهدأي مو زين عليج التوتر و الخوف تعالي هسه نشوفه و نطمن عليه
ساعدتها تصعد ع سدية خليت جهاز النبض اسمع نبضاته وهي تترقب بخوف يمكن حتى دگات گلبها صرت اسمعها من كثر خوفها،،
زفرت نفسها براحة و ارتخت اطرافها بعد ما چانت متشنجة من سمعت صوت نبضات جنينها التفتت الها براسي و ابتسمت الها
::ها سمعتي هذا طفلج بخير و گلبه يدك الحمد لله
مسحت دموعها مبتسمة و تردد الحمد لله بصوت خافت و سئلتني تستفهم
_ لعد ليش ماله حركة بعد متت خوف عبالي صارله شي لا سامح الله
سحبت جهاز السونار خليت المادة و بديت اشوف الجنين بالشاشة واني احجي وياها
:: هسه نشوف الباشا شبي
كملت السونار وهي عيونها تراقب الشاشة وياي ضحكت الها
_ هياتة الباشا خانس يمكن تعب و نام حقه من العصر اجيتي و هاي حيطلع الصبح
گامت من السدية ساعدتها حضنتني و باستني
:: الله يطمنج مثل ما طمنتيتي عفيه مو تخلصين دوامج و تعوفيني
جاوبتها اضحك وياها
:: شنو رأيج لعد بس لا تردين ابقى هنا لثاني يوم غير يشيلوني من صالة الولاده للانعاش والله
لزمت ايدي بثنين اديها لاويه رگبتها تتوسل
:: لا مو لثاني يوم بس اجيب و روحي حبابة والله اخاف
اني ضعفية گدام البنات اللي عدهم ولادة ما اتحمل اشوفهن وهنه يبجن وما اگدر اگول الهن لا
:: ان شاء الله تجيبني قبل لا تخلص الخفارة مالتي اني اخلص و انتِ تخلصين
:: ان شاء الله ادعيلي عفية
:: ان شاء الله گومي تمشي شويه بس لا تعبين نفسج هواي لان الولادة هم يراد الها حيل
هزت راسها بـ اي گامت لازمه ظهرها وتتمشى الله يسهل الها من يمي اختنكت باوعت الصالة هدوء عكس قبل ساعة چان الصريخ ماله
البنات البقن گاعدات يسولفن و يتعرفن ع بعض،، صاح الاذان صحت لسرى
:: إذن حروح اغسل وجهي حتى اصحصح وهم اتوضى لصلاة
هزت راسها اي و هي تاكل باللفة حجت والگمة بحلگها گوه فهمت عليها
:: يله روحي حتى من تجين اني اروح ما طول ماكو ولادة و الحبايب مسويات جلسة سمر
طلعت للحمامات سديت الباب فتحت حجابي راسي گام يحكني مديت اصابعي حگيته حيل حسيت براحه رغم اغسله يوميه بس لان البس الحجاب ساعات طويلة بالخفر غسلت وجهي من المرطب و نشفته نوب توضيت
كملت لفيت شالي و طلعت للحديقة لفحتني نسمات هوى باردة و وجهي رطب غمضت عيوني استمتع بالبرودة حتى لو بعز الشتاء هم احب البرد سحبت نفس عميق
حسيت بالهوى البارد دخل ريتي بقيت واگفة عيوني ع النجوم وهي تلالي ابحر السماء.. القمر يطلع و يختفي ورا الغيوم بقيت شوية تعدى الاذان و رجعت مديت مصلايتي صليت
كملت رجعت لمكاني و راحت سرى صارت الساعة بالسته اله عشرة گبت العيطة نفس البنيه الرادتني ابقى وياها
الحمد لله ولدت بخير و صحة هي و طفلها صارت ساعة ثمانيه ونص اجه الشفت الصباحي گامت سرى تلملم بغراضها بستعجال وتحجي
:: يله ولج بساع بساع راح اموت نعاس والله لو ما العيب امدد هنانة بالممر وانام
لميت غراضي اني هم سلمنا لصباحي
رحمة :: يله بس نبصم و نطلع هي هاي اخر خفارة الأحد نحول صباحي شهر كامل نرتاح
طلعنه لشارع ازدحام لأن وقت دوام مديت ايدي أريد أأشر للسيارة ما احس اله ولد ع دراجة خله شي بيدي وهو ماشي بقيت صافنة ورا باوعت ع أيدي جگليتة نسلتة طويلة عگدت جبيني مستغربه تصرفه اخذتها سرى تگلب بيها و رجعتها بيدي وگالت بضحك
:: لا تاكليها ولج خاف بيها سحر وتگومين تركضين ورا مثل المخبلة
:: گولي غيرها يمعودة اعرفه يعرفني حتى يسويلي سحر
اجت فورت اول ما صعدنا رجت سرى راسها ع كتفي غمضت عيونها وتمتمت بصوت ناعس خافت
:: من يوصل شارعنا گعديني عود
نوب اني گوه سيطرت ع روحي ابقى مفتحة كلساع اريد اغفي وصل شارع بيت سرى گعدتها نزلت واني شوية عنهم ما عولت اوصل شارعنا صحت نازل كلها التفت عليَّ فشلت من نفسي لان صحت بصوت عالي شلون الفازة
گمت اريد انزل الطم راسي اباب السيارة من قوة الضربة رجعت ليوراي گعدت ع أرضية السيارة وكلها تصيح الله الله اسم الله
گمت ع سريع نزلت من الفشلة وراسي يون الضربة كلش قويو رفعت أيدي اتحسس مكانها صارت عنجورة بگصتي وصلت فرعنا شفت مهدي اخويه الصغير من ابويه يلعب بالشارع گدام بيتنا من شافني اجه
يركض عليَّ حضني و يسئل بلهفة و فرح
:: شنو جبتيلي وياج
دنگت بسته ومديت أيدي بجنطتي وهو يمشي كدامي يرجع ليورا و وجه عليَّ،، طلعت اله مصاصة من هاي الچبيرة الدائرية أخذها مني فرحان و يأشرلي بثنين اديه بمعنى دنگي
:: تعاي خل ابوسج
دنگت اله باسني عفته يلعب و طبيت للبيت رانيا مرت ابويه واگفه بالمطبخ تسوي غدا من شافتني ضحكت عفتها مشيت لغرفتي ميتة تعب وهي اجت وراي بيدها الچفچير
::شلون سويتلج مرگة عدس ع لحم و عظم صارت تخبل تلوگ لهالحلگ هذا
صدك انتبهت ريحة مرك عدس ضيقت عيوني اباوع عليها
:: اي !!
هزت راسها و كررت كلامي
::اي !!
ضحكت لان اعرف طبعها
:: شنو المقابل رانيا كلما تسويها تريدين شغلة يا اغسل الزوالي يا حملة ع بيت وما يحلالج التنظيف اله ويا دوامي
ابتسمت عيونها ادور بالغرفة عبالك اول مره تشوفها فرگت اديها بطرف دشداتها بتوتر
:: د نامي هسه توج جاية تعبانة عود من تگعدين نتغدا و نسولف
:: خوش لعد
راحت واني بدلت ملابسي وطبيت للحمام اغسل دائما من اجي من الخفر اغسل حتى لو ميتة تعب لان مستشفى و جراثيم و أمراض كملت طلعت لگيت رانيا فراشه الي احس البطانية تصيحين من گد ما نعسانة
جففت شعري بدون ما امشط و لفيت راسي افكر شنو تريد رانيا لان من تريد شغلة تطبخ الي الاكلة الاحبها تمن عمبر و مرگة عدس،،
ابويه ما تزوج ع امي بحياتها بس من توفت ورا سنين يله تزوج و رانيا مو چبيرة
جابت مهدي و هسه حامل بثاني طفل سحبت جنطتي طلعت موبايلي غمضت عيوني تطوف امي گبالي
بلعت غصة وگفت ترس بلعومي راحت و تركت فراغ بروحي حياتي خلافها اختفت ألوانها وصارت مثل فليم قديم ابيض و اسود غفيت واني ابچي بلا صوت حالي حال كل يوم و ليلة من يوم فارگت ذيج الحنينة داري
توي غفيت ونيت بوجع من حسيت شي داس ابطني و طفر شال البطانية و دحس نفسه بيني وبين الحايط ضم نفسه عرفته مهدي سوه شي اجت رانيا تسحب بي و تهمس بصوت ناصي
::مهدي گوم لا تخليني اصيح اختك نايمة
::ما.. ما اطلع تگتليني
::لا ما اگتلك اطلع يله گوم گدامي بساع
حسيت باديه الصغار حضنني وحجه برفض و عناد
:: ما.. ما... ما
همست لرانيا بصوت مبحوح من النوم
:: عوفي رانيا
تراجعت عنه وهو طلع لسانه الها طلعت تتوعد اله ضحك باس خدي
:: مهدي مو عيب تسوي هيج لأمك
برطم شفايفه نزل عيونه عني يلعب بطرف شعري بين اصابعه
:: مو هي تريد تگتلني
:: حتى لو ما يصير تسوي هيج لازم تحترمها وتسمع كلامها
هز راسه بـ اي ضحك باس شعري وظل نايم يمي واني غفيت هم
گعدت ع صوت ابويه ينده باسمي فتحت عيوني التفت گاعد يمي من شافني نداريت حط ايده ع جبيني (گصتي)
:: شبيج معوشة بويه شنو مريضة
:: لا مابيَّ بس تعبانة من الدوام
:: لعد گومي اكليلج لگمة ما يصير تبقين بلا اكل
هزيت راسي اله رغم شغله ورغم ما متعود ينطي حنان لان چانت امي شايله كل المسؤولية بس من يوم وفاتها وهو يحاول يسد ولو جزء بسيط من فراغها
گمت بسته من راسه غسلت وجهي و طلعت صوت طگطگت المواعين وريحة الاكل طيبه فتت للمطبخ گاعدين كلهم اخواني عروة و أزاد وابويه بحضنه مهدي يسولف اله
رانيا واگفه تثرم زلاطه من شافتني حچت
:: هيِجي التمن من يمج وصبي وبس كملت كلشي
اخذت الچفچير هيجت التمن و صبيت أزاد فرش السفرة گعدنا ناكل ومهدي گام يخوط يحط فوگ التمن روبة و مرگه و يخبط وياكل صاحت بي رانيا
رانيا :- اني شگلت مهدي مو گتلك بعد لاتخويط بالأكل
رفع راسه الها ابويه ما قابل لان مهدي اكله قليل
ابراهيم :- شتردين منه رانيا شيريد يسوي خل يسوي المهم ياكل
رجع باوع ع أزاد
أبراهيم :- وانت انطوك أوراق الامتحان
أزاد :- لا كلشي ما نطونه ابو الرياضيات امه ماتت بعد سنة يمكن ياله يصححهن
باوع اله عروة و رد متأكد منه
عروه :- ماطول السالفة بيها موت يعني جذب هاي خامس مرة يموت امه لابو الرياضيات
باوع اله ابويه بعصبية وهدده
ابراهيم :- وحق ربك أزاد اذا جبت الشهادة محمرة العب الصوندة ع ظهرك خاف العام هاي وگفت بوجهي السنة متحلفلك وياهو يفزعلك اطبگه وياك
قصدني بكلامه لان ما اخلي يضربه طنگر أزاد ضرب الخاشوكة بطاسة المرگ خله المرگ يطفر علينه وعاط بـ عروة
أزاد :-انت حطيت گورك من گوري وأعوذ بالله من بشر يتبلى بشر
عروة :- هاا لان اريدك تنجح ويصير براسك خير صرت اتبلى عليك
قبل لا يحتد النقاش خزرهم ابويه وكال بحده ينهي النقاش
ابراهيم :- كافي جم مره گايل عركات ع اكل ما اريد
أزاد :حاجي ابنك طلع النه الغدا سم
ابراهيم :- گلت كافي
سكت أزاد واحد ينطي لثاني نظرات كملنا الاكل غسلت المواعين ورانيا صبت جاي طلع ابويه واخذ مهدي وياه و عروة راح لشغله بالمطعم و أزاد خله ابويه يطلع و طلع يلعب طوبة
اجت رانيا مددت وخلت راسها بحضني شالت أيدي خلتها ع راسها
:: لعبي بشعري انتِ حنينة اريد احس بحنان الأم صدك رحمة اذا جبت انتِ ربيها خل تطلع حنينة عليج
:: رانيا انتِ ما شايفة امج ابد ما تتذكرين ملامحها
::ماتت و اني صغيرة ما شبعت منها ولا من حنانها حتى وجهة نسيته
سكتت الدمعة بطرف عينها صارت عيني ع الخصلات البيض الي براسها شنو شافت من ضيم بحياتها حتى بعدها بالعشرين وشاب راسها حجيت ابدد السكون الصار
:: رانيا ترى انتِ مامقصرة هم والله گلبج ابيض وحنينة وكلش نحبج اني و عروة و أزاد
رفعت عيونها الي تلمع بفرح
:: يعني اني حنينة و زينة وياكم عليج الله احجي الصدك ما ازعل
:: والله من يوم طبيتي بيتنه لحد هذا اليوم ما شفت منج الشينة بالعكس احسج اختي الجبيرة
ضحكت فرحانة رفعت راسها تسئل ما مصدكة
:: صدك يعني ما ضايجة مني وتكرهيني لان اخذت أبوج
عگدت جبيني مستغربة اول مرة تفتح هيج موضوع بس جاوبتها الحقيقة ازيح عنها الشك
:: ليش اضوج منج واكرهج و ابويه ما اخذج ع امي وهي بالوجود و الزواج حقه مالي اي أحق امنعه منه
نرسمت ع وجهه ابتسامة راحة
:: أول يوم عرسي شفتج ضايجة و عيونج حمر مبينة باچية هواي عبالي ما قابلة ع زواجنه
::لا بيومها تذكرت امي الله يرحمها
حطيت اصابعي بين خصلات شعرها سئلتها السؤال الي يدور براسي من يوم زواجها من ابويه
:: صدك رانيا شلون قبلتي بـ ابويه وانتِ بعدج شابه و حلوه وهو بگد أبوج
تلاشت ابتسامتها لمعت عيونها بالدمع صفنت تستذكر
:: ما قبلت بي ابويه و اخويه جبروني عليه
_ لا عليج الله !!!
:: اي والله مو تدرين امي ماتت واني صغيرة واجت مرت الابوه لعبت لعب بيَّه غيرت ابويه عليّه بس ع اقل چان اخويه زين بس هو هم من تزوج تغير غيرته المرة أگعد وانام ع گتلة يحاسبوني ع الخبزة الاكلها
سكتت بخنگة وغصة بگلبها مسحت دموعها و بلعت ريگها تكمل
::خطبني بوقتها صديق اخويه يشرب و يدور بنات ما قبلت بي لزمني گطع الصوندة عليَّع اجت جيرانه ام محمد اختها هنا يمكم گاعدة بنفس المنطقة
:: قصدج اخت ام علي
:: اي عفيه اجت خطبتني طلعت صورته أبوج الي شفته جبير واني تخبلت ونوب عنده اولاد اني اموت من مرت الابوه نوب اصير مرت ابوه واني بنفسي شاب بعمري ويكون من اختياري
:: اي وشلون قبلتي بعدين
:: ابويه خيرني يا أبوج يا صديق اخويه و ام محمد گالت خاله انتِ ماخذه ماخذه اذا تردين ترتاحين اخذي ابراهيم صح بگد أبوج بس صايم مصلي ويخاف الله بيج
:: اي كملي
:: ما قبلت گتلها شلون اخذ رجال من مرته و اهجم بيتها وابني فرحتي ع خرابها گالت ولج مرته ميتة من سنين و اولاده كبار و فاهمين و موافقين ع زواجه شويه قنعت نوب بالشوفة شفت عيونه الخضر وذاك صديق اخويه هم يشرب وهم چنه شاذي استغفر الله وافقت ع أبوج
:: وهسه تحبي لـ ابويه ؟
كالت بضحك تخلي اديها ع وجهة خجلانة
:: اول ما أخذته جنت قانعة روحي ع عيونه الخضر بس لا والله بمعاملته الي بنه مكانه لگلبي من اخذته عرفت الزواج لا بالشكل ولا بالعمر.. المعاملة هي الي تحبب المرة بالرجال ومن يومها عشگته وبعد ما حلى بعيوني رجال غيره
الصدق و الحب بنبرة صوتها ولمعة عيونها وهي تحچي عنه تلاشت ابتسمتها وهي كملت كلامها
:: بس كسرتي بيوم عرسي ما انساها من ابويه گال لابوج يله أخذها منا و روح لا زفة لا فرح طلعت ويا بشداشتي ونعالي و الطريق كله ابچي مستهضمة اگول اهلي هيج كسروني گدامه وين بعد يحترمني وخطية أبوج يسكت بيّه و طلع صدك عوض ربي الي
فرحت ع كلامها ع ابويه حسيت بالفخر بي و فرحت الها لان خلصت من اهل فقط اسم بظهر الهوية تذكرت من رجعت من الخفارة رادت شي سئلتها
:: صدگ رانيا شنو ردتي مني
ضحكت مسحتية
::هاا لا هيج ماكو شي
:: رانيا ترى اني حاسبتج اختي مو مرت ابويه والله احجي
تردد تفرك اديها وحدة بالثانية وگالت
:: مو تدرين من تمرضت أبراهيم خطية ذب راتبه و الي انتِ تنطيهيا هم عليّه....
سكتت شوية وگالت بصوت خافت...
:: عود ردت اشترى كم شغلة اجهز الطفلة حتى ما انخبص بعدين
:: لعد ليش ما حجيتي صدك جذب واني هم نسيت تعب و دوام نشدهت اليوم ارتاح وان شاء الله باجر نطلع نشتري
:: ما نشتري هواي بس جم شغلة شفتهن بالسوك عجبني اريد اخذ قبل لا يخلصن
::نروح واخذي الي تردي
گمت واني اكل بروحي شلون نسيت ابويه رغم ابويه عنده راتب تقاعد بس عنده طفل و رانيا حامل وفوكها تمرضت وهو علاج السكر اني كل شهر انطي من راتبي رغم ما يقبل هو بس اخليهن اله بمحفظتة و عروه هم
ينطي من راتبه بس هالمرة اجه مرض رانيا بنص الشهر وراح من بالي ابويه خلص فلوسه ع دكاترة فتحت الكنتور طلعت الجزدان حسبت فلوس نصهن خليتهن بمحفظة ابويه والنص الثاني رحت لرانيا
:: ذني خليهن يمج خاف تعتازين شي
:: ما معتازه رحمة والله الحمد لله أبراهيم ما مقصر
:: اي ما يخالف خليهن يمج للعازة
أخذتهن بتردد و گعدنه نشرب جاي بالحدايقة باوعت الي وكالت فجأة
:: ما تگومين نروح الكاظم ما دام الجو حلو
:: هسه
:: اي هسه
:: يا ما محضرة روحي ولا حاسبة حسابي اروح
;: دگومي يا محلاة الزيارة التجي فجأه معناها الامام رايدج تزوري
ما انتظرتني جرتني من ايدي متحمسة وتحجي تقنعني
:: صدك عود هاي السالفة الامام يريدني أزور
:: اي والله لعد شعبالج همه هم يحبونه و يشتاقون النه مثل احنه نحبهم
ما جذبت خبر اني غاسلة ع سريع بدلت لبست عباية مخليتها لزيارة بس وهي هم لبست
رانيا :- شوفي لان وحدنه راح تصير خفيفة و حلوة
طلعنه صعدنه فورتات ذبنه يم الامام وصلنه قريب المغرب زرنه اذن الاذان صلينه و طلعنه و رانيا بطنها گدامها متر تمشي عبالك ترجع ليورا اشترينه حلويات وكم شغلة و رجعنه
اول ما دخلت تلكاني صوت ابويه يصيح... گاعد ويمه الصونده و أزاد مبتعد عنه دگ ابويه الصوندة بالگاع وصاح بعصبية
:: گتلك تعال لهنا ليش تخليني اگوملك بنفسي
رجع أزاد أكثر معاند
:: عاقل مخبل اجي يمك حتى تحمسني صوندتين وراهن مباشرة اسمع سؤال منو ربك شنو دينك
ضحكت رانيا خزرها ابويه رفعت خلت ايدها ع حلگها بمعنى سكتت
رانيا :- هاي هي سكتت والله ماعليّه
رجع ابويه انظاره ع أزاد وحجه بتهديد
ابراهيم :- احسب من واحد لتلاثة اذا ما اجيت اگوملك وتعرفني من اگوم شسوي بيك
باوع الي أزاد ياشرلي براسه ع ابويه معنى احجي وياه وابويه بدا يحسب واحد... ثنين
رحمة :- بويه ع عيكفك ويا نفسك لا يصعد ضغطك گوم ارتاح اني ادرسه
:: انتِ گعدي ع صفحة لا اطبگج وياه
گعدت ربعت يمه اخذت الكتاب من بين اديه أهدأ بيه
:: تضربني بويه
باوع بطرف عيني ذب الصوندة من ايده متنهد بتعب بس ابتسمت عيونه الي بحنان
:: هو اني اگدر ارفع صوتي عليج حتى ارفع أيدي
حاوطت كتفه وبست راسه و أزاد أمن اجه گعد يمي مغندب بزعل
:: بس ع أزاد صوتك وايدك ومرات حتى رجلك تصلخني دفرة الك الله يالتيم
مد ابويه ايده عليه وهو رجع ليورا بفزة عباله يريد يضربه جره ابويه ليمه باس راسه
;:ولك بويه قابل اكرهك اني غير اريد مصلحتك و اريد تنجح ويصير براسك خير باجر عگبة من تتوظف وتعيش مرتاح وتعيش أولادك عيشة كريمة تذكرني و تترحم عليَّ
عقج أزاد ملامحه بضيج
:: وليش اترحم عليك عمرك طويل بويه تعيشني و تعيش أولادي لان اني ماعرف اربي والله ولو يمشون وراي يطلعون سريرية
دفعه ابويه عنه
:: گومي عني گوم انت كل فايدة ما منك
ضحك أزاد گعدت اراجع اله مادة الامتحان خلصت و ابويه گاعد يتابع ويانه من كملت راد يتأكد بنفسه
:: شو انطيني الكتاب خل اني اسئلك بله
أخذه يكلب بي سئله سؤال صفن ازاد بوجهه و ابويه مد ايده ع صونده
رحمة :: هاي منين سئلته بويه هذا ما داخل
كمز ازاد بساع ما معول زلة ع ابوية
:: شفت شفت شلون تريد تظلمني انت تريد تضربني وبس
ضل يسئله جاوب ع كلهن
ابراهيم :: ما أوصيك باجر اصفن ع الورقة وجيبها مصخمة الي
:: لا بحيل الله و اذا مو مية ثمانية وتسعين گول أزاد ما گال
:: تجي الورقة و نشوف بس والله ويا ازاد وحق لا اله الا الله اذا رسبت اله اعلگگ بالبنگة لان وصلت حدها ياك
:: بويه انت مكانك بالمكافحة شوداك ع تربية
گامله ابوية وهو شرد لشارع طبيت صليت و من التعب رجعت نمت ومثل كل يوم تجيني امي بالحلم لابسة نفس دشداشتها گاعدة تمسح ع راسي بحنان همست بصوت متشحرج الغصة واگفه بلعومي
:: ليش عفتيني يمه والله لسه ما شبعانه منج
قبل لا تحجي امي حسيت احد يهز بيَّ فتحت عيوني ازاد گال
:: يله گومي صبينه العشة
تنهدت بقهر وعجز مسحت دموعي غسلت وجهي بمي بارد ابويه يقطع من الدجاج ويحط گدامي و نوب شال خله گدام أزاد و مهدي بحضنه گاعد يوكله رانيا خطية ما مرتاحة حتى بگعدتها انتبهت ع ابويه يسوي لفات صغار ويخلي بأيدها
كملنه غسلت المواعين وما ادري شبيه بس اريد انام من سهر وتعب البارحة
عفتهم رانيا اتابع مسلسل تركي مشكله الموبايل ع شاشة وابويه بالغرفة مشغل التلفزيون يسمع اخبار والصوت عالي طبيت غرفتي فتحت الكنتور اريد ارتبه صفنت عليه تعبانة خليت ونمت فزيت ع صوت تكبير الله أكبر.... الله أكبر.... نعسانه ومن التعب و السهر جفوني ثگال و مورمة گوه فتحت عيوني باوعت ع ساعة
بـ تلاثة الا ربع مو وقت أذان عيوني تحملق بيها انتبهت الساعة واگفة مديت ايدي جوه المخده ادور ع موبايل اريد اشوف الساعة عيوني تنفتح و تنسد بوجع عبالك بيها رمل يتدحرج باوعت الساعه بالهدعش وثلث لعد
هذا الكتبير شنو البيت هدوء صنته محد گاعد ولا حس ع صوت التكبير معقولة وحدي دا اسمع هذا الصوت بس لا نگلبت الدنيا وهاي القيامة
گلتها اتسائل بيني و بين نفسي ضحكت ع تفكيري نفضت البطانية عني و نهضت اريد اشوف التكبير ع شنو فتحت باب الهول بابه ع طرمة قشعر جسمي من برودة الهوى
صار صوت التكبير أعلى و واضح اذان كامل مو جامع واحد جوامع هواي دا تأذن و تكبر صوت أعلى من صوت،، صوت يسبق صوت و الهوى عالي كلش صارت عيني ع السماء انتبهت ع القمر من بين الشجر رايح كله
باقي خيط ضعيف و الباقي ماكو بس حلقه دائريه حمرة تضوي عرفته خسوف وهذا الاذان و التكبير عليه اذكر امي الله يرحمها چانت تگول الگمر من يخسف اذا الضوه مالته صار احمر يعني دم و قتل يصير حوادث و حروب
وفعلاً كلامها مو مجرد خرفات و اقاويل متناقلة لان الخسوف هو اصلا إجرام سماوي تحذير من الله تعالى للبشرية بس قلة من يتعض فرگت عيوني يوجعني
مشيت حافية ع كاشي احس ببرودة الكاشي تضرب رجليه بس حبيتها احب البرودة مالت الشته احب كلشي بالشته فتحت الولة مال حديقة غسلت وجهي اشيل مي بثنين اديَّ واكفخ ع وجهي حسيت روحي انتعشت
مسحت وجهي بطرف رداني اخذت نفس عميق رجعت طبيت للبيت اسمع صوت ابويه يصلي بالغرفة توضيت شلت السجادة و الجادر حتى اصلي باوعت من الشباك ع هوى و الحديقة فارغة شلت السجادة و طلعت فرشتها
بالحديقة ولبست الجادر احس من اصلي فوگ السطح لو بالحديقة وليل وحدي محد يمي هيج احس روحي تتصل بالله احس روحي اقرب لربي اريد بس ادعي و اسبح صليت صلاة الآيات قريت قرآن هم
اجت البزونة تتمطى تكورت ع نفسها ونامت يم السجادة ضليت اقرا قرآن لحد ما حسيت باب البيت انفتح صدقت التفتت شفته عروه اجه سد الباب و دخل يفرگ بأديه يدفيهن راد يدخل ليجوه من شافني ضحك واجاني
:: هاا شسوين هنا بس لا تگولين الجو حلو و طلعت اتعبد ع الهواء الطلق
ضحكت عليه لان يعرف طبعي ويعرف شنو احب
:: اي والله الهوى يجنن يفتح النفس و يشرح الصدر حتى الصلاه بيها طعم بي
:: ولج يا طعم صلاة لو دولمة هي اصابعي صارن گصب من البرد وانتِ تگولين هواء طلق
لزمت كفوف اديه جمعتهن بـ اديه ادفيهن صايرات ثلج عمت عيني وگتله اعاتبه
:: طبعا أصابعك يصيرن گصب وانت تسوق دراجة بهالبرد چم مره گتلك اشتري چفوف تسمع منا اطلع منا
:: هسه عوفي سالفة الچفوف گاتلني الجوع ترى من الغدا لسه ما ماكل
:: صدگ شو تأخرت اليوم شكو خو ما صار شي وياك
:: لا ماكو شي بس صاحبي خطية عطلت دراجته و بيتهم بعيد وصلته وعود اجيت
گمت عن السجادة وهو خلى اديه ع خدودي و يحضن بيَّ و يصيح
:: دفيني رحمة دفيني راح انجمد و انقرض وين تلگين بعد اخوه مثلي
:: ولك شو اني ما احس اصلا الجو حلو منعش يله امشي طب هسه أحميلك العشه
:: شنو العشه بس لا تمن عدس و روبه
رفعت حاجبي اخزرة شلون يحجي ع اكلتي المفضلة
:: و شبي تمن العدس ما عاجبك
ضحك وجرني باس راسي
:: عاجبني والله ع راسي هو راعيته بس ياذي معدتي بروح امج فد طماطتين لاجعات بالطاوة
:: مو جنك ع طماطة هسه اسوييها مثل ما تحبها
ركض غسل و توضى اجه دفعني بعدني عن السجادة وكال
:: همزين ذكرتيني تدرين لسه ما مصلي المغرب و العشه بين ما تكملين اني مخلص صلاة
ضحكت عليه اباوع اله ضعيف گتله
:: صدك اگول انت مو تشتغل بمطعم مفروض هسه كرشك بين ركبك شو كل يوم تجيني من الباب تصيح جوعان
:: وين والله ما الحك من استلم الشفت مالتي لحد ما اطلع شايل دفتري اخذ طلبات حتى رجليَّ وگعن راح يصير عندي سوفان بالركب
وگف يصلي واني طبيت للمطبخ نزعت الجادر طلعت طماطة سويتها درگ و گليتها و طلعت خيار ثرمت هو يحب الخيار و يا الطماطة
عفتها تلجع و شلتها بالصينة باوعت ع هول ماكو وگفت اباب الهول شفته مخلص صلاة و امدد ع سجادة و حاط ايده جوه راسه صحت عليه
:: يله تعال استوت الطماطة
رفع راسه وگعد ربع و أشر بيده بمعنى تعالي
:: جيبها لهنانة
:: مو بردان
:: لا اريد اگعد يمج مشتاقتلج
طلعت حطيت الصينى گدامه بدا ياكل طبيت جبت جودلية و بطانية و طلعت رمان هم و طلعت اله فرشت الجودلية
:: تعال اكعد ع جودلية السجادة خفيفة لا تتمرض الگاع باردة
رد بكلام گوة فهمته وهو يلوگ بالگمة
:: يعني تعرفيها باردة و گعدتينا هنا
:: يااا اني شعليه مو گتلك فوت جوه وانت ما رضيت
طلع مهدي يركض وايده لگدام عرفته يريد يروح لتواليت گمت اله اركض ساعدته اجت رانيا ورا گوه تمشي
:: دخلته اني روحي نامي
باوع مهدي ع عروه الي أشر اله تعال راح يركض اله گعد بحضنه وياكل عيون رانيا ورا من شافتهم حتى النعاس راح من وجهة و عيونها غورگت
:: الحمد لله جهالي عدهم اخوه حنان عليهم وما يشوفهم اولاده ابوهم بس
دگ گلبي بقلق من كلامها امي الله يرحمها قبل لا تموت بشهر بقت تحجي هيج و توصي ابوية علينا و توصينا واحد ع ثاني وجانت
تدخلني وياه للمطبخ تعملني شلون اطبخ فـ هيج كلام ينغز روحي
:: شبيج رانيا شو هالايام وضعج ما عاجبني
:: لا والله بس انتم نعمة الله الي
طلع ازاد فاتح عين ومغمض عين صاح متذمر
:: تاكلون من دوني من اگول يتيم محد يصدكني
راد يجي يمنه صاح عليه عروه
:: جيب خبز ياله تجي
جاب خبز طلع ابويه هم ضحكت رانيا
:: مو طماطه گعدت العائله كلها
:: شتسون هنا
::عروه دا يتعشى وطلعوا كلهم جواعه
كعد يم عروه يسئله ع احواله وكال
:: بويه رحمة ستكان جاي
:: خدرته هسه بس اصب واجي
صبيت الهم جاي و خليت كعك هم طلعت لكيت ابويه مخلي الرمان و يفرط مد ازاد يريد ياخذ ضربه ع ايده
:: ايدك لرحمة هذا
:: لعد اني البطة السودة
:: مو رجال وعندك أدين فرط واكل
:: وشنو الفرق يعني هي هم عدها أدين
:: لا هي بنيه اديها يصيرن سود
:: هنيالج عمي روحي اديج بالدهن مثلي مصخمات بصخام الجدر
اخذ عروه رمانة من السلة وجر أزاد ليمه كعدة
:: تعال خويه تعال صدك جذب اني افرط الك هو احنه مضطهدين هنا
كيف ازاد مدد وخلى راسه ع رجل عروه يفرط رمان ويخلي بحلگة بقينه نسولف شويه وكلمن راح نام بس الحمد لله دوامي تحول صباحي
گعدت الصبح باوعت ع ساعة سبعه ونص گمزت من مكاني طلعت ملابسي وركض ركض غسلت وبدلت وطلعت اركض صاحت رانيا وراي تعالي تريگي واني البصمة راح تروح عليَّه
وصلت المستشفى ونفس القوانة كل يوم ع بصمة وهوسة البصمة
بديت شغلي لظهر طلعت اشتري مي شربت البطل كله من عطشي من رجعت وگفتني مرة اباب الصالة
:: عفية بنيتي
:: اغاتي خالة تفضلي
:: بنتي جوه وبجر وتخاف عينج عليها
:: ان شاء الله سهله خالة من شوكت اجت
:: من غبشة ولسه ماكو خبر عنها ما تشوفليها
انطتني اسمها طبيت سئلت الدكتورة عليها كالت شغلة ساعهذة ساعة ونص وتجيب طلعت رديت الخبر للمرة خطية فرحت ورفعت اديها
:: يمه الله يسمع منج الله يبشرج بالخير يمه
جرتني ع صفحة و طلعت فلوس وهي تحجي
:: بس اوكفي يمها و جيبيها و شتريدين اني حاضرة
:: العفو خالة هذا شغلي واخذ راتب عليه ان شاء الله اساعدها بعيوني
ما قبلت اخذ منها مستحيل اخذ من احد هنا رجعت للصالة اجت سرى تاكل لفة وبيدها لفة ثانية
:: هاج اكلي اني ع الاشوفه هنا بعد لا تزوج ولا اخلف اتبنالي واحد من الميتيم اشرفلي هم اعيش الامومة وهم ثواب
كملت كلامها و صدت عليَّ براسها تسئل
:: شتگولين مو كلامي صح
:: عين العقل حتى اني لعبت نفسي من الزواج و الخلفة ياهي التجيب احس روحي دا اطلك وياها
:: شتگولين المسعد يوافق هو البارحة يگلي اني احب الجهال اريد فد خمسة ستة
::تردين الصدك مستحيل يوافق الرجال مو مثل المرة يريد طفل من صلبه وحتى المره انتِ هيج تحجين بس تحملين بعده دم بالرحم تگومين تحبي وتنتظري يوم يوم حتى تشوفي
أشرت براسها ع وحدة جايبه توها وجها تعبان واصفر ومبتسمة بفرح انطوها ابنها ترضعه الصمغ
:: اكلج عود صدك هاي السالفة الام بس تشوف طفلها تنسى كلشي
:: اي وتفكر تجيب ثاني هم امي الله يرحمها تسميها المنسية
خلص دوامي صح تعب بس اهون من الخفر رجعت للبيت بدلت ملابسي و صليت كملت لگيت أزاد صاب غدا وشايل الصينية حطها بالگاع
::يله ساعة ثنين تصلين مو خرطت معدتي من جوع
:: لعد ما تغديت ساعة بـ تلاثة ولك
_ انتظرتج تجين ناكل اني وياج احس الاكل ما بي طعم اذا ما اگابل وجهج
باوعتله مضيقه عيوني بشك
:: ما مرتاحتلك ولا مرتاحة لغزلك كول شصخمت هالمره رسبت بالأحياء مو
ذب الخاشوگة من ايده طلعت صوت بالصينية و برطم عود زعلان
:: شهل الكلام الي يسمم عود اني منتظرتج وميت جوع من الصبح لسه ع بتيته والبيض
:: وليش ما اشتريت مو انطيتك فلوس
:: ما جعت بالمدرسه وعفية رحمة عوفي هاي الأسئلة لا تتقمصين شخصية ابويه ما كافي عليَّ واحد تصيرون ثنين
يريد يغير الموضوع اعرفه ياكل بالمدرسة بس صارله فتره يضم فلوسه
:: أزاد محتاج شي كول ليش تقصر ع نفسك واني موجودة
ضحك يحجي بثقة
::ما جعت بالمدرسة والله وهي بس هالفترة اريد اشتري شغله وراها اگوم اتلفس براحتي
:: شنو الشغلة اني اشتريها الك واذا تريد انطيك فلوس تشتريها بنفسك
جكجك حلگه يطلع صوت رفض
;: اريد اشتريها بفلوسي ولو هي فلوسج بس اعتبرهن مالاتي لان مصروفي
ضحكت ع كلامه شلت الخاشوكة انطيتها الها
:: يله اكل لعد
اجه مهدي يريد يگعد يمي جره أزاد گعده يمه وانطاه خاشوكة ياكل و مهدي شال التمن خلى ع مرگ و الزلاطه ع تمن لعب لعب كملنا شلت المواعين وگفت ع سنك اغسلهن ورانيا يمي تعجن التمن تريد تسوي كبة كملت گعدت اساعدها
:: شبيج شو مبين عليج ضايجة و تعبانة
:: لا مابيه شي
تركت اللي بيدي وكعدت يمها اشوفها شبيها لان صدك مبين عليها الهم و حزن غريب مطفي لمعة عيونها
:: شبيج رانيا ابويه معاركج
:: لا والله الرجال ماكو منه
:: لعد شبيج احجي والله ما اعوفج اليوم الا تحجين شكو
تنهدت تجر نفس قوي
:: مابيه تعبانة شوية من الحمل عبالك بلوكة ابطني شايلتها وافتر بيها
:: مابقى شي ان شاء الله و تولدين وترتاحين
نزلت دموعها مسحتهن بساع وبعد ما سيطرت دموعها كامت تصب كأنها غيمة وجانت محملة أكثر من طاقتها
:: ادعيلي رحمة خايفة كلش الدكتورة خوفتني تكول الطفلة تعبانة
طبطبت ع كتفها بدعم اطمنها
:: مو انطتج علاج وحددتلج يوم تروحين بي ليش تخوفين نفسج هيج ترى مو زين التوتر يسوي عندج تقلصات
;: عليج هم يجن يمكم نفس حالتي ويجيبن مابي شي الطفل
:: أشكال يجن والله بس رحمة الله واسعه خاصة التولد بين أدين ربها
;: الله يبشرج بالخير
غيرت الموضوع نسولف حتى تنسى و سالفة منا سالفة منا خلصنا الكبة خليتها بالمجمدة وطبيت لغرفتي امدد شويه
صوت المنبه يدگ يم راسي شلت المخده خليتها فوگ راسي حتى يقل الصوت وارجع انام.. شوية وسكت تنهدت براحة ما حسيت الا جلب أسود يركض وراي واني اركض رجليّه وحدهذة تسابق الثانيه دكاته گلبي تهز بعظامي من الخوف ماعولت اوصل
باب بيتنا دخلت بساع وطبگت الباب وراي انرچت من القوه حطيت أيدي ع صدري اخذ نفسي ريتي گامت تأذيني من الركض والهوى البارد
نزيت من سمعت صوته ينبح ورا الباب طبيت اركض للهول وسديت الباب گمبصت و حيلي كله يرجف ضليت گاعدة بمكاني عيوني تدور بالبيت اريد احد ماكو
فتحت حلكي اريد اصيح ع واحد منهم صوت ما يطلع مني عبالك نعگد لساني و خرسة صارت حروفي كزبر جسمي من سمعت صوت خرمشة اظافر ع الباب شويه و اختفى الصوت گمت و رجليّة وحدة تطگ بالثانية فتحت الباب ع كيف ماكو شي فتحته أكثر توي طلعت ماعرف منين جفتني اريد
اصرخ صوت ماكو تلوعت روحي يبس الدم بعروگي واني اشوف وجه قريب ع وجهي انيابه قريبة يريد يعضني ماعرف منين اجتني القوة اتلاوه وياه بس قوتي ضعيفة
اريد امنعه بس ماگدر ابعده عني خرمشني من ايدي شاغت روحي بوجع من حسيت اللحم انزلغ ابظفره صوتي مايرضا يطلع عبالك واحد خانگني بس دموعي تصب ماكو احد هنا يساعدني اديَّ عرگت حيل وقوتي
بدأت تتلاشى ضعفت اديه وصارت ترتخي و وجه قرب عليَّ أكثر غمضت عيوني عاصرتهن حيل ..
