رواية خفايا القدر ( كاملة جميع الفصول ) بقلم انين الروح

اني يتيمه اب من عمري عشر اسنين بابا اتوفه اثر حادث سير عندي اخت اكبر مني واخ واحد اصغر مني عمره كان خمس سنوات من اتوفه ابونه

ماما معلمه هي وحدها شالت مسؤليتنا لان كان الوضع صعب والعيشه كوه دابره ظلت تكافح من اجلنه وكانت تخيط لجيران والمعلمات الي وياها 

بيتنا كان ايجار واحنه اصغار مدارس ومتطلبات هوايه تعرفون البنات كلشي تحتاج بالاخص من تكبر وتبلغ ف كانت امي اسوي المستحيل علمودنه علمود منحتاج الشي ابد ولا نمد يدنه الاحد ومشت بينه السنين

اختي تخرجت من الثالث ودخلت معهد معلمات مثل ماما واني انجحت للمتوسطه بس كانت عيشتنه كوه دابره يعني اني لحكت ع الحصار عشته وشفته شلون كان والرواتب قليله والسوك نار مشتعل 

ومرت الايام والسنين واحنه نكبر نجحت للثالث متوسط وتخرجت منه بتفوق كانت امنيتي اكمل دراسه واكون دكتوره مختبرات كان هذا حلمي

بس مو كلشي نتمنى نلكاه كدامنه لان سند وعامود البيت ماكو والمره مهما تكن قويه هي تبقى تحتاج الى رجل 

حتى يسندها ويقويها ع زمانها

اني من دخلت للمتوسطه تهت من صدك بالاقدار لان لعبت ادوار ويايه

كنت دائما اشوف امي وانقهر عليها هي فنت حياتها الخاطرنه وما رضت تزوج غير والدي

حتى تكدر تربينه وتهتم بينه وماكو احد يشغلها عنه

امي ماعدها لا اخت ولا اخ هي وحيده بيبيتي لان مجان يعيشلها ضنه وامي صارت الها بالمعجزه واني عندي بس عم واحد 

ظرفه تعبان ف امي عانت ماعانت في حياتها ابويه عافها وهي بعمر ٣٠ سنه جنت اشوف حياتها واخذها الي عبره حتى من اكبر اكون مثلها قويه وصامده في كل الظروف القاسيه

وبعد ما اتخرجت رفيف من المعهد خطبها ابن معلمه ويه ماما اداوم بالمدرسه في سنه ٢٠٠٢ ازوجت وعاشت في خانقين بسبب حكم عمل زوجها كانت موظف بالطاقه الكهربائيه ولازم كل سنه ينتقل في محافظه 

.وبعد مرور الاشهر رجعنه المقاعد الدراسه وبديت اسمع راح يشنون حرب علينه الامريكان الحد ما دخلنه بالسنه الجديده ٢٠٠٣ كانت سنه جدا صعبه وبيوم وبليله جنه كاعدين بالهول امي تسمع راديو وسمعنه اليوم حتكون ساعه الصفر لبغداد لشن الحرب اني خفت رحت ركضت يم امي كعدت يمها صار تفكير امي بينه وباختي رفيف لان مو يمنه بعيد عنه عايشه صار الخوف مسيطر علينه لان هاي حرب واكيد بيها موت 

والموته تكون شنيعه ومخيفه يعني بيت ينهدم ع روسنه او نفجار شي قريب احس الحرب فلم رعب

من سمعنه الخبر بالراديو كانت تقريبا الساعه ٨ بالليل والجو شبه بارد لان نهايه شهر الثالث ندكت الباب طلعت ماما ودخلت علينه للبيت هي وام علاء

.طبعا ام علاء هي اجوارينه وصديقه امي هي وبناتها يجون ونروح احنه عليهم كل فتره انحسهم همه اهلنه مو بس جوره 

وبهذا اليوم جتي ام علاء وكالت الامي تعاي ويانه راح نطلع لان الوضع موزين يكولون 

راح يصير  قصف ورمي مدافع وطيارات امريكيه 

.ماما رفضت لان ماعدها مكان تروحله غير بيتنه 

ماقبلت نطلع من البيت كالت انموت كلنه اهنا 

اغلب منطقتنه طلعت بقى بس كم بيت بالمنطقه متواجد 

.امي كانت حيل خايفه علينه لان بيتنه يكون خلف مصفه الدوره اي بيوت موظفين وميه بالميه راح ينقصف هذا المصفه

وبالليل وتحديدا ساعه ١٢ بالليل دكت غاره الانذار لاعلان الحرب كان صوت الغاره ياخذ الرووح 

تموت بدمك من تسمعها في وقتها اني متت بدمي من الخوف والتفكير بالحرب واختي البعيده عنه كان مسيطر عليه التوتر والقلق والخوف

جسمي كله يرجف ما اسيطر عليه رحت اركض الحضن امي واجه احمد يمنه امي غطتنه بحضنها وشاهدنه ونمنه

وتقريبا ساعه وحده بالليل بده القصف طيارات ورمي وصواريخ شي اكثر من رعب تمنيت ما اعيش هاي الايام كلبي راد يجمد في مكانه

  يوميين ع الحرب المنطقه بدت تطلع لان سمعوا مهددين المنطقه بالقصف واكيد قصف المصفه ويخافون لا يرحون بيها 

وبعد فتره سمعنه كثير من الكلام ع راح تسقط بغداد او تنمحي من الوجود الى اخره 

دخلنه شهر الرابع وتحديدا ايامه الاولى من الشهر كمنه منشوف السماء صافيه ابد كانوا الجنود يحركون انابيب النفط طبعا اوامر من السلطات العليا حتى تنعدم الرؤيه عند الطيار الامريكي او ميكدرون يترصدون حركات الجيش جنه نطلع نشوف السمه عباره عن دخانه سوده مغطيتها تغطي صار حتى نهارنه اسود مثل لليلنه

بيوم ٤/٤/٢٠٠٣ تحديدا جتي علينه جارتنه ام علاء وكالت الامي تمشين ويانه لان حيصير قصف مكثف ابو علاء كال وضع الجيش تعبان حيل ومتعرفين الامريكان شنو تفكيرهم او شنو ناوين يقصفون واحنه بيوتنه خلف المصفه 

و اذا لا سامح الله صار سقوط لدوله يمكن يدخلون الاراضي العراقيه شراح يصير بينه

ام احمد ..انتي تعرفين ابو علاء  ضابط بالجيش العراقي وكلشي يعرف وهو كال لازم نطلع من بغداد ونروح الاهلنه للبصره ف تعاي ويانه لان متعرفين شيصير بيج انتي وجهالج وحدكم اهنا ف امشي ويانه أأمن من بغداد 

وفعلا امي اقتنعت ابكلام ام علاء ومشينه وياهم احنه وهمه البيت اهل ابو علاء للبصره طلعنه الصبح لان الحرب تشن بالليل وكان النهار امان علينه وصلنه  بالليل 

 مكان زين حلو وراقي وصلنه المكان بي باب جبيره حيل ما ينشاف شنو وراها

دك ابو علاء هورن السياره ونفتح الباب ودخلنه جوه بس ما شالله شنو من مكان يجنن ولا تكلون جنه بيوت اجنن وبساتين وحدايق مكان يلعب

بيها الخيل وبيت جبير بالوسط وبصفه بيوت اصغار تقريبا خمس بيوت .

ابو علاء... تحضرو ياجماعه يله وصلنه البيت ابوي نزلوا

.رشا بنت ابو علاء هي صديقتي المقربه الي يله رهف هذا بيت جدي الجبير والحوله بيت عمامي

عندي خمس عمام والحمدلله كلهم مزوجين وعدهم بنات او ولد ومخلصين اغلبهم دراسه

راح حيل اتحبين المكان وترتاحين بي . لان جبير وبي مزارع وبساتين وحلال الطبيعه اهنا حيل حلوه 

نزلنه من السياره ونشوف كبال البيت كومه زلم رحبوا بأبو علاء او ولده حتى اخوي احمد رحبوا بي

نذبحت الذبايح جوه رجليهم والهلاهل علت اصواتها طبعا ابو علاء عنده ثلاث ولد علاء و حسن وحسين وبنات ثلاثه 

سلموا علينه واني ورشا ومها ويارا وامي وامهم دخلنه للبيت 

النسوان الموجودات بالبيت ماشالله كومه من عده الجهال وشفت مره يعني مو حيل جبيره يطلع عمرها بال٦٠ سنه الكل يحترمها والكل يبوس يدها ويدخل جوه امي سلمت عليها وام علاء عرفتها بينه الحجيه رحبت بينه احر ترحيب 

اني هم رحت سلمت بس ما بست يدها دا امشي وصاحتلي المره شنهي ماتعرفين تحبين يد جدتج اني استغربت ع كلامها ما فهمته

رشا... تكلج بيبي بوسي يدي 

.نزلت بست يدها ودخلت بس حيل فشلت من الموجودات كملت سلام ع النسوان

رشا.. هذني بس نسوان عمامي وبناتهم كل يوم الصبح يلتمون بالبيت الجبير حد الليل عاد يرحن لبيوتهم لان جدي ما يرضه يعوفن البيت الجبير هاي عوايدهم وطباعهم وجدي انسان صعب وابوي طالع عليه هم عصبي وصعب تره بعد شويه اشوفين البيت يروش والعوائل تزداد لان الكرايب مجاين بعدهم تعرفين جدي شيخ عشيره والكل تهابه وتحترمه وتحسبله الف احساب احنه هيج من زمان 

.رهف اني شفتهم وحدهم فيلق كامل هاي عود بس العمام لعد الكرايب كلها شكد اني لا خوال ولا عمام 

هو بس واحد وكوه نشوفه بالسنه حسنه وعمات اربعه وعمي طه جان عنده بس ولد واحد والكل كاتل نفسه عليه 

اني ورفيف هم جنه نتعارك عليه لان هو حلو وخريج يعني شاب كامل المواصفات شكله يجنن كنه نشبهه بهيثم يوسف

  نفس دزاينه وشكله تقريبا وهم جان اسمه هيثم هاي لو يجن بنات عماتي اهنا ويشوفن هالكم من الشباب اهنا اله كلهن يزوجن اول ما ينزلا من السياره

طبعا احجي مع حالي واضحك ع نفسي وع تفكيري 

صدك اني مخبله احنه في حاله حرب وراح نبقه في بيت غريب علينه هنه كلهن حجاب واني طالع شعري وبنطروني الصدك خجلت من حالي بس مو بيدي هذا لبسي 

واني بدل ما افكر شلون راح اعيش اهنا كمت افكر ابنات عماتي شلون ازوجهن من هالشباب الحلوه الكومه ههههههههه

وجان تجي ابنيه عليه كعدت بصفي مرحبه

رهف  .اهلا

.ليش تضحكين لاهيج اذكرت موقف وضحكت ليش الضحك عيب يمكم

.لابس شفتج تضحكين وحدج ف استغربت

.اعتذر منج 

.اعرفج اني زينب بنت جبار اخوهم الاكبر العايش ابيت جدي هذا اني دلوعه البيت الجبير 

راح اعرفج ع الموجودين كلهم وبدت تكلي هاي بيت افلان وهالكد عنده ولد وبنات ومنو خاطب منو الى ان خلصتهم طفرت روحي

.اخر شي راح اعرفج ع بيت اهلي الي همه صاحبين هذا البيت احنه اشيوخ من ظهر اشيوخ وعمام مايدخل غريب ابنصنه 

معروفين بالبصره والكل تحسبلنه الف احساب وبيت جدي هو بيت ابوي الجبير جبار ابو جراح عندي ثلاث اخوان

جراح وايوب ورضا والبنات هم ثلاثه زينب ورقيه و رباب ع اسم بيبيتي ام امي الله يرحمها

قبل لا تموت بيوم امي جابت سمتها فرح بس ثاني يوم بيبي ماتت امي غيرت اسمها وسمتها ع اسم امها رباب 

.وانتي كم اخت واخ 

.اني عندي بس رفيف اختي واحمد اخويه اختي مزوجه وعايشه في خانقين هي خريجه معهد معلمات وامي معلمه ابتدائي انتوا اهنا هم ادرسون 

.اي الولد يكملون دراسه بس البنات ماتكمل لان ماكو يمنه اعدادي او معهد قريب علينه وتعرفين احنه شيوخ وعشائر ما ترهم بناتهم تروح مكان بعيد عنهم 

.منو يدرس عدكم هسه

.اخوتي تلاثتهم واني نجحت من الثالث وكعدت خواتي الوسط اول متوسط والصغيره ابتدائي 

جراح خريج هندسه كهرباء 

ايوب يدرس حقوق اول سنه

رضا ثالث متوسط 

.انتي يامرحله 

رهف...اني رابع عام جاي ادرس هسه بس علمود الحرب اتوقفت الحياه ابغداد 

.اي صح ان شالله اتفض وترجعون لبيوتكم وترجعين الدراستج 

.اشكرج زنوبه 

.تعاي حبيبتي تعبتج بالسوالف ارتاحي اهنا هاي غرفتنه احنه البنات 

بس انتي مراح ترتاحين اهنا لان كل شويه وحده راح تدخل للغرفه تعاي نامي ابغرفه بيبي لان متفوت هسه هي للغرفه اله الظهريه وره الغده حتى ترتاح 

ف اخذي راحتج هسه انتي 

كنت صدك تعبانه ميته تعب بس اريد انوش الفراش وتمدد 

.رحت وتمددت عالفراش من التعب غطيت في نومه عميقه

لان صار اسبوع او اكثر منايمه نومه مريحه من الخوف والرعب العشته بالحرب 

ذبيت روحي مثل الميته محسيت بشي ابد .

ايوب وينج جده محتاج العوجيه مالتج شتريد منها محتاجه فدوه

تلكاها بغريفتي فوت اخذها بس لاتخربلي مجاني لا اطكك بيها خايب

.لا جده ما اخرب مجانج 

.رحت امشي للغرفه وانه ادردم وي حالي اله اخرب افراشج انه احب اداهر جدتي لان احب اسمعها من تغلط واسب عليه احب سوالف النسوان الكبار 

فتت للغرفه هي كالت تلكاها ابصف افراشي علكت الضوه ورحت للفراش اشوف وحده نايمه انه استغربت منو هاي النايمه مكان جدتي وصلت يمها شويه ارفعت الغطه عن وجها ماشالله شنو هالوجه النوراني اليجنن خرب هاي منو بت من معقوله بنت عمي علاء لالا شني قابل ما اعرف لو ما شايف بناته 

بس هاي غريبه ...هااااااا و اذكرت هاي بنت هاي المره الجوي وي بيت عمي بس سبحان الله هي نايمه وهيج حسن من تصحه شلون شكلها 

ظليت اشوي صافن ع شكلها وجان تتحرك رجعت الغطه عليها واخذو العوجيه وردت اكوم جان ترفع حالها عن الفراش

.رهف وبصوت يرجف انت منو وشرايد 

.لا تخافين انه ايوب ابن البيت جبار ابو جراح شني شمالج حتى انه اخترعت من ردج الي  جيت اخذ عوجيه جدتي وطالع لا تخافين