رواية حب في زمن اخر الفصل الاول
تبدأ حكايتنا بملك في كلية العلوم، كانت واقفة في المعمل، ولابسة البلطو الأبيض والنظارة حماية، ولابسة قفازات زرقاء، وممسكة أنبوبة فيها مادة كيميائية، وقدامها ميزان، بتحط براحة وتشوف لحد النسبة اللي عايزاها، وبتحط مواد على بعض، وحصل صوت انفجار خفيف.
صفقت بحماس: الحمدلله نجحت!
وفضلت تنط بفرحة وقالت: كده نجحت بامتياز. وبدون وعي زغرطت.
{دي ملك عيسى العدناني، 22 سنة، آخر سنة في كلية العلوم، شخصية متقلبة المزاج، نفسها تعيش قصة حب تاريخية}
بص الجميع لها وانفجروا ضحك.
ابتسم الدكتور: هنسي اللي حصل لأني عارف إنك متقصديش، بس ياريت متتكررش تاني عشان ما أنقصلكش درجات.
ملك هزت رأسها وقالت: معلش يا دكتور، بس التجربة كانت صعبة فعلًا، وأقل غلطة تدمر كل حاجة، وفرحت أوي لما نجحت.
الدكتور بحب مخفي: أنتِ شاطرة جدًا يا ملك، وعلى طول بتجيبي امتيازات. يلا، السكشن انتهى، أشوفك بكرة.
وبص لباقي الطلبة وقال: عن إذنكم يا شباب، أشوفكم بعدين.
ملك خلعت القفازات والبلطو وقالت: يلا يا ديما نخرج ونروح الكافتيريا.
ديما قربت منها بعد ما خرجوا وقالت: يلا يا ملوكة.
وكملت بخبث: دكتور فريد مهتم بيكي جدًا، الجامعة كلها عرفت إنه بيحبك، وإنتِ لسه.
ملك خبطتها في كتفها وقالت: تصوري إنك صاحبة رخمة! أنا مش شايفة غير إنه أخويا الكبير ودكتوري بس. أنا عايزة أعيش قصة حب مختلفة ومميزة.
ديما ابتسمت وقالت بحب: ربنا يحقق ليكي أحلامك. عارفة إنك حاولتي توضحي كتير إنك مش شايفة غير إنه دكتورك بطريق لطيفة عشان ما يتجرحش، بس هو مصمم وبيقول لنفسه يمكن تحبيه في يوم. المهم.
ملك بحماس: تعالي أحكيلك عن الرواية الفانتازيا اللي قريتها امبارح، فضلت عليها طول الليل.
ديما قالت: تعالي.
وراحوا الكافتيريا، وملك بدأت تحكي كل حاجة في الرواية وعيونها بتلمع.
بصت وقالت: تعرفي اللي زعلني؟ النهاية كانت فراق.
اليوم خلص.
ملك كانت مروّحة وبتتكلم في الفون، لقت شخص وقف في طريقها وقال بطريقة إجرامية:
طلعي كل اللي معاكي يا شاطرة بدل ما تزعلي.
ملك قالت في الفون: أكلمك بعدين.
وقفلت الفون وقالت: لا، أنا عايزة أزعل وأجيب ناس تزعل كمان.
الشاب أخرج آلة حادة وقربها من وشها وقال: سمعيني تاني بقى يا شاطرة.
ملك بلعت ريقها وقالت: يا عم إنت قفوش كده ليه؟ الكلام أخد وعطا، براحة شوية. عايز اللي معايا؟ حاضر يا سيدي، مش تقول كده من الأول. فاهمتك غلط يا راجل. بس إنت جيت لواحدة مفلسة. الشنطة مش فيها غير عشرين جنيه، أصل إحنا آخر الشهر ولسه الحج مدنيش المصروف، والباقي ورق وحاجات ملهاش لازمة. حتى بص.
وفتحت الشنطة، وهو دخل راسه فيها عشان يتأكد من كلامها.
ملك بحركة سريعة خرجت جهاز الصعق الكهربائي وضربته بيه، ولفت الشنطة حواليه وضربت واحد دبل كيك. كان مش مستوعب اللي حصل.
بعد ما وقع على الأرض، ملك بهدوء:
إنت أكيد عارف إن السرقة حرام، واللي بيسرق إيده لازم تتقطع. وغير كده ربنا بيزعل منه. عيب، إنت كبير وتقدر تفرق بين الصح والغلط. روح اشتغل أي حاجة، وما تقعدش تقول الحياة صعبة وكلام ملوش لازمة وإن المجتمع فاسد. صلح نفسك عشان تلاقي كل حاجة بتتصلح. حرقت دمي يا شيخ. يلا يا حرامي، أنا مش هبلغ البوليس، يمكن ضميرك يصحى وتفوق قبل ما تموت يا حرامي.
نفضت هدومها، وخرجت فونها ولبست الإيربودز، وشغلت رواية وكملت مشي.
