رواية الرجل الاخر الفصل العاشر بقلم جوهرة
ملاذ اول ما اجت تطلع دخل ماهر صديق نشوان سلم وكعد عالكرسي يم سرير نشوان ، فشغلت نفسها تريد تعرف اكثر عن نشوان ففضلت تبقى !!!!
ماهر بعدما تطمن على صديقه / الوالدة اتصلت تسأل جهازك مقفول فهمتها طالع بمهمه سريه
رد نشوان / عفية عليك ماريدها تقلق
ماهر / حرام عليك خطية گلبها نار واول تالي راح يعرفون
نشوان / همام يدري حجيت ويا واكدت عليه ميجي يفوت جم يوم يلا ، ادري بأمي من تشوفني راح تكلبها مناحه
ماهر / لعد فارس اتصل علية وحجيتله .
نشوان حجى بتعب واضح / ليش كلتله يمعود مصارله يومين من تزوج .
ماهر / هههه لك هذا يوميه طاكله مرة.
نشوان / هو هذا فارس مدري شلون راح يتغير
ملاذ مسويه روحها تشتغل بالطبله وتسجل بس تسمع حجيهم
سالت نفسها عن عائلته وين بيته تصرفاته ومعاملته حقيقة لو جاي بمثل .
ـــــــــــــــــ
ديمه /
واكفه عالغساله اجفف الملابس صارلي ساعة اغسل واشطف البيت كلبته كلاب صح مبين نظيف بس مو ذيج النظافه المريه متفق فارس وياها تجي مره بالاسبوع ومبين بيت واحد عزابي فنظفته ورتبته
على ذوقي احول بالاثاث واعدل بدون ما اخذ رأيه شغلة عناد لا اكثر
عبودي يفتر وراية وفارس طلع من الصبح مستعجل حتى ماتريك واني ما سألته صارلي
٣ ايام ما احجي ويا بس للضرورة ،، ماخذه راحتي كملت كولشي واخذت عبودي سبحته وبدلتله علكت الصوبة الجو بارد ما امنت اعوفه وحده وادخل اسبح خل اتغدى وارضعه حتى ينام ، الصوبه بالهول مخليتها الكهرباء طافية متشتغل التدفئه .
الغدا مسويه تشريب دجاج وتمن احمر صبيت بصينية صغيرة واخذتها كعدت جدام الصوبه وعبودي بصفي من شاف الاكل كام يدردم ويصيح همميه هممميه.
وكلته شوي ماانطي زايد اخاف عليه لان من يرضع ممه يكتفي بالحليب ، مردتله باصابيعي خبزه بالتشريب وكلته ..
عبودي / ماما ماما باي
ياشر بايديه ، ضحكتله / يمه فدوه لوليدي يدور طلعات هسة يجي..
بلعت غصه من تذكرت فارس وهو ماخذ دور الاب حتى عبودي ما ادري شبسرعه تعود عليه
صفنت عليه وهو ياكل ويضحك وخدوده تفاحه والشعر مكنفش / تروح باي ويه بابا
كمز من يمي عباله حيروح / اوح باي ..اوح بابا
(اروح باي)
ديمه / ولك اكعد وين رايح من يجي بابا يلا تعال نروح نغسل ادينه.
غسلت لعبودي وغسلت المواعين رجعت كعدت بالهول وجريته بحظني ضاج يريد ممه كمت سوبتله وشايلته بحظني اخاف يروح عالصوبه
مددته بحظني وحطيت كوشه التخم جوه راسه ملتهي يرضع كمل وذبها على صفحه ومد ايده بصدري متعلم من فطمته من صدري يسوي هذه الحركة / ميمي ماما
عكست وانتجيت على ايدي والعب بأيدي الثانية بشعره ، لابسه دشداشه كصتها دائريه والدلعه جبيره بدلت بيها حببتها خفيفة بالشغل ، غفيت وية عبودي ما ادري بروحي والهول دافي وسنطه البيت.
فارس /
ساعة ثنتين طبكت السيارة بالباب ونزلت توني واصل من بغداد رحت اتطمن على
نشوان لان خابرته ماحصلته بعدها اتصلت على ماهر لان اعرفه عن طريق نشوان وحجالي على اصابته لنشوان وحاليا
بالمستشفى .
كولش تعبان طالع بدون ريوك ومالي واهس من درىت بسالفه نشوان ..دخلت للبيت سنطة فتت للغرفة ماكو ديما هذه وين راحت باوعت البيت يلمع نظافه والريحه الطيبة وانوب مغيرة الاثاث هلوو ياب ، يلا خليها براحتها تغير
دخلت للهول الباب جان مفتوح نصه شفتها نايمه وعبودي بحظنها كعدت على الكرسي وبقيت صافن عليهم ركزت عيونب على ايد عبودي حاطها بصدر امه
ابتسمت ..والله عبودي يفتهم ههه ماخذ كل الحنان ماحبيت اكعدها اكيد تعبانه مبينه مشتغله بالبيت بس جوعان وتعبان ومالي خلك اصب لروحي غدا ، يلا خل اكعدها
بصوته النبرته الخشنه / ديماااا ديماااا
انتبهت على صوته فزت وخرت ايد ابنها وكعدت عدلت نفسها خدها اثر احمر لان ضاغطه عليه هي ونايمه ، خلت ايدها على صدرها ورفعت دلعه الدشداشه استحت منه .
صفن بوجها تك خد احمر اثر النومه وشعرها رافعته كبوبه فوك وخصله متناثره على وجها تنهد
فارس / شلونج ، ليش نايمين بدون غطا
ردت وهي تمسح وجهها / تعبت نظفت البيت وعبودي سبحته تغدى ونام واني ويا عالواهس .غفيت
فارس / خربان من الجوع شعندج اكل .
ديمه / سويت تشريب دجاج وياه تمن احمر .
فارس / اي والله احبه ، لعد صبيلي بينما ابدل واتوضى اصلي الظهر .
دنكت تريد تشيل عبودي ..
فارس / عوفي اني اخذه لفراشه هههه سرسري نايم ، والله مشتاقله.
راقبته شال ابنها بهدوء وحضنه باس خده وشمه ، تصرفه خلى گلبها يدك ، طلعت للمطبخ متريد تحس بضعف متريده يدخل گلبها !!!!!
حمت الاكل وجهزتله صينيه خلتله طرشي وخضره وطلعت اكتيفيا ( لبن ) ودتله الغدا بالهول يحب كعدة الكاع
لاكاها باب الهول جان مبدل لابس تراك اسود ورافع ردانه ل، محته بطرف عينها كعد يتغدى ..راحت حطت القوري عالنار ونصته .
استغلت كعدته يتغدى وفاتت للحمام تسبح ضاجت لان شافها مبهذله وشعرها مكفش تحس روحها متناقضه مرات تريد تلفت انتباهه الها بكشختها ونظافتها ومرات تريده يبعد عنها
طلعت عالسريع نشفت شعرهاواستغلت الكهرباء وجففته بالشسوار وخلته محلول لبست الروب فوك التراك وبخت عطر وطلعت للمطبخ طفت الطباخ وحظرتله الكوب لمحته طلع يغسل ، صبتله الجاي ودته خلته عالطبله وشالت الصينيه ومببن ماكله كله ممخلي بي بس العظام ابتسمت اكيد الاكل عجبه
دحك بعينها من دخل وساف ابتسامتها / عاشت ايدج طيب الاكل .
ردتله بهدوء وهي جاي تطلع من الهول ..عافيات.
كعد يشرب جاي وفتح البلازما وكعد يكلب بالقنوات.
كملت شغلها بالمطبخ وفاتت لغرفتها صاح عليها / تعاي وينج .
ديمه / يربي شيريد انوب
راحتله وكفت بنص الباب متخوصرة بتك ايد وعينها عليه. اول ما شافها بلع ريك وهو يفحصها بعيونه ..يربي شلون حلوة
اشرلها بيده اجت متردده كعدت بعيد شوي جان يجرها لزكها بحضنه اعترضت دفعته بس حضنها قوي / اشششش ماريد شي والله لاتخافين بس اريدج بحظني
بقت لابده بحضنه والريموت بيده منتبه عالشاشة بس احواله كلها مخربطة خل يصبر عليها ميريد يعيد الصار قبل يومين لابد گلبها يميله ، يعترف هو غلط بتصرفه من ضربها وعاملها بقسوة ،
بالاول جان مخطط يزوجها عقد سيد فترة ويطلكها بس الصار بعدين خلاه يعيد تفكيره وقرر يبقبها على ذمته خاصه من گلبه يفز احواله تتخربط وهي بحضنه يعرف شلون يخليها تلين مبينه ادور احترام وحنيه وهو كادر يوفرل هالاشياء ، وعبودي الي احتل مكان بگلبه صار ميفاركه من يشوفه كاعد يجي وينبطح بحضنه حب كلمه بابا التطلع من حلكه شكد حلوة ، مستحيل يتخلى عنهم مستحيل
ديما تتنفس عطره وگلبها يدك سريع حاضنها بقوة خلتها لابده بحضنه
ـــــــــــــــ
نشوان الكل زاره الاصدقاء وزملائه بالدوام واولهم جان العقيد احمد اطمن على صحته ومن سال الدكتور عليه خبره يبقى هالاسبوع .
ماهر خبره انو عصام انقتل فعلا وياه تلاثه والبقية مسجونين
نشوان فكر واجت ملاذ على باله متدري الصار لازم يحجي وياها ويفهمها بكلشي .
يعرفها تتصرف وياه بكل برود جاي يفكر بيها ورا مراح ماهر جان يشوفها دخلت مدت ايدها تريد تتاكد من الجرح .
تكلم بهدوء / ميحتاح قبل شوي الدكتور شافه ، اعتقد انتي ممسؤلة عن حالتي حتى تدخلين وتفحصين الجرح ؟!!!
ملاذ عبرت كلامه ما اهتمت
/ اوكي لعد انت صحتك تمام.. ميحتاح انت نام ارتاح
اجا تريد تطلع صاحها / حبيت اخبرج عصام انقتل ويه جم واحد بالعصابه
طككت عيونها مصدومه اي لان مجانت تتوقع
نهايه عصام هيج تكون بس جاوبته وجان عدم اهتمامها وبرودها يذبحه / المسيء ياخذ جزاءه دوم
دقق بوجهها اللي صار يحتاج يشوفه كل وقت / يجي اليوم الراح تعرفين
كولشي
ردتله بدون اهتمام / صدكني راح تبقى تنتظر لان بعد مااهتم لاي شي ولا اتمنى شي.
وهسه اخذ علاجك ، انطته حبايه لزم ايدها
نشوان / ملاااذ ماحب هذا البرود الانتي بي جاي احس تكرهيني.
انطته العلاج ، بلع الحباية مجبور .
نشوان / مليت منه يلاعب نفسي هذا العلاج .
ملاذ / تريد شي راح اطلع.
طلب تساعده يروح للحمام / تعاي ساعديني اريد حمام
ملاذ / تكدر تروح لاتبالغ
راد بنهض وحده بهدوء بس تاذى نتر بالم / حياتي كلها مشايف مثلج فرحانه لصوابي .
تقدمت تساعده وارتبكت بقوة / البس قميص اي شي ، جسمك أغلبه مكشوف !!!
حجتها وهي كولش قلقانه من قربه ، سند روحه عليها حاوطها بذراعه على كتفها يمشي بخطوات تعبانه سألته وهي تشم ريحه طيبه / سبحت ؟!
ردلها وهو مرتاح لان حاظنها وهي ميته خجل
نشوان / ماهر البارحه ساعدني ، اووو فدوه لمرتي الحلوة الكلها حنية تسال عن أحوالي وكاعدة تساعدني
ملاذ رفعت تك حاجب / تصنف مو ؟!!! صوجي سالت .
نشوان / الطبيب كال عادي اسبح بس لا تقربها على المي وماهر ماقصر لفها بلايلون ولاصق .
دخلته الحمام تريد تشرد لان احتكاك اجسامهم جاي يأثر عليها يخليها تعيش قلق وجاي يشعل بيها احساس تحاول تسيطر عليه ، راقبته يمشي بطيء
احساسها جاي يخونها منظر جسمه وعضلاته وسامته الشيطانية كل هذه الشغلات كاعده تسيطر عليها. ما خطات من شبهته مرة بالشيطان بي شي يخوفها منه يمكن لان حلو زيادة او يمكن لان تصرفاته الغريبة بوقتها ، وهسة يلا عرفت السبب
دفعت هالافكار من عقلها وطلعت من الحمام انتظرته فترة وطلع راقبته يمشي بطيء سد باب الحمام وتقرب عالسرير بحذر لان الجرح ينغزه..
ساعدته وخلت مخاد ورا ظهرا ليتكي عليها .
مد ذراعه وحضن خصرها وقربها اكثر عليه ..
اعترضت ملاذ انوب تخاف تدفعه تروح تأذيه
ملاذ / ميصير اللي تسوي
تنهد وهو يرجع يتكي عالمخاد / خلاص ..خلاص ، واضح اني ازوجت مره بارده متحس قالب ثلج
خزرته بنظره حاده وفضلت تبعد متتناقش وياه لان من الالم اليعاني يهذي بكلام متحبه
انفتح الباب ودخلت مره عمرها بالخمسينات وياها شاب ينطي شبه لنشوان جاها احساس هاي عائلته شكلها ولبسها مرتب وانيقه اول ما لمحتها بالباب سألتها بلهفه / دكتورة طمنيني شلونه ابني.
هداتها / اطمني هو بخير .
تقربت أمه عليه ودنكت حظنته تبوس وتبجي / يماما يگلبي الف الحمدلله على سلامتك ، شلون هيج يصير بيك عابت روحي ليش هيج اسوي بروحك.
طمنها وجر ايدها يبوسها / الحمدلله صرت زين لاتخافين علية
