رواية الرجل الاخر الفصل الحادي عشر بقلم جوهرة
همام اول ما دخل سلم وتقرب من اخوه باسه وتحمدله بالسلامه وكعد مقابيله ،
نشوان بغيض / مو وصيتك لاتخبر امي يا همااام
ام نشوان واكفه فوك راسه والدمعه بعينها / ليش ماما شلون انطاك گلبك تضم علية
والله هالاسبوع گلبي ينغز بية ، وهذا انت صدوك متصاوب ، اوف عابت روحي .
همام يبرر من شاف اخوه ضاج لأن ميريد امهم تنقهر / والله شافتني ضايج ولحت علية ومن كلتلها طول الليل تصلي وتدعي ومابطلت بجي
مدت ايدها ومسحت على راسه بحنيه وبقت تسأل على جرحه واكله وخاف مياكل زين .
بعد گلب والده وهي من النوع ادقق بكولشي .
باوعت على همام سألته / ماما وين العلاكه .
همام / هااا والله نسيتها بالسياره يلا اروح اجيبها
ام نشوان باوعت بتركيز بوجه نشوان / شوف وجهك مصوفر سويتلك
تشريب لحم وشويتلك معلاك ادري بيك تحبه عاد قوي جسمك وعوض الدم
خطيه يدري بيها خايفه عليه / يمه والله جاي اكل ، هو ماهر عايفني لازك بالمستشفى طفرها لروحي هههه
ام نشوان / الله يحفظه نعم الاخ والصاحب.
امه معافته بقت وياه هي وهمام ، بس نشوان مقبل يبقون يخاف عليهم لان يشكون احتمال العصابه القبضو عليها اكو من يدعمهم وراح ينتقم ، اصلا متواجد بالممر يم غرفته حرس بالزي المدني
ام نشوان بعد اعتراض ابنها / اي ليش يعيوني زين اكعد بشقتك والصبح اجي لهنا
نشوان / يمه يرحم ابوج ماريدج تبقين يعني الا اكلج دواعي امنيه ، يلا حبيبتي تسهلو ، الساعه بيش هسه ؟
ردله همام / ثمانيه..
نشوان / تمام تلحكون ترجعون من وقت
همام / لاتهتم اول ما نوصل اخابرك
بوسته امه وعي تعاتبه / ااخ من عنادك اخ ،،
وين الدكتورة الجانت هنا من اجينا اشو بس الممرضه تدخل لو هي نفسها ممرضة واني عبالي دكتورة ؟!! خل اسألها اريد اتطمن عليك
تنهد نشوان / شلج بيها هذا اني كدامج وتطمنتي علية
ام نشوان / يااا غير اوصيها عليك ، المفروض اخوك يبقى مرافق وياك بس انت مدري شبيك متقبل ؟!!
شوي ودخلت ملاذ تفاجئت بعدهم مرايحين .
، وام نشوان وصوتها / حبيبتي الله عليج ديري بالج عليه ادري بي يكابر ، انتي دكتورة صح
ام نشوان دققت باسمها المكتوب عاللابكوت وابتسمت
ملاذ گلبها دك سريع هذا كل عقله حاجيلهم
بقت صافنه عليها بس ردت بهدوء انو هي دكتورة
نشوان رد من شاف ملاذ مرتبكة / يمه حضرتها متقصر هي دكتورة وتعرف شغلها.
ام نشوان / اي عيني اهتمي بعلاجه الله يحفظج لاهلج
ابتسمت ملاذ بهدوء / ادللي هذا واجبنا .
،،،
طلعت ونشوان شاغل دماغها صادفت د. علا بالممر سالتها / اشوفج ضايعه شبيج بس لا وكعتي بحب نشوان ههههه .
ملاذ باعتراض / يوووو علا مالي خلك شقاج
علا تعرف صديقتها صارلها فوك الاسبوع من وكت عرفت حقيقة نشوان وعقلها مو يمها ودومها صافنه ونظراتها بيها حزن .
دخلن لغرفه الاستراحه ..
ملاذ / عصام انقتل
علا فكت حلكها وشهكت وهي تسال / شمدريج انتي.
ملاذ / قبل اكثر من اسبوع الجرحى الوصلو للمستشفى ، نشوان وجماعته جانو بمهمه خاصه قبضوا على تجار متفجرات واسلحه وعصام انقتل لان جان وياهم يتاجر بالاسلحه مشترك ويه العصابه
علا استوعبت كلامها وكعدت بصفها عالقنفه / عزززا طلع مجرم وعصابجي ولا توقعته
ملاذ بصوت كله تعب / لعد اني شأكول والله تاهت عليه ماعرف شسوي مصدومه.
علا / راح تبقين وياه ؟!!!
هزت راسها / ماريد ابقى ويا علا أحسه خطر علية ، والله كمت اخاف منه صيري انت بمكاني شراح تسوين.
ابتسمتلها علا وغمزت بتك عين / ابقى ويا ولج انتي ماعندج نظر ولا ذوق شوفي شلون وسامه شلون هيبه وفخامه اويلي والضباط اليجون يزورونه راح يخبلوني
خزرتها ملاذ / والله انتي بطرانه تلكيهم لو متزوجين لو مكبلين ويه نص البنات عوفي طاريهم وخليج بمصطفى ذابح روحه عليج
علا بكل صدق / شبيج جاي اصنف اريد اطلعج من ضوجتج بس صدوك ملاذ فكري زين لاتنسين هسه هو زوجج.
ملاذ وبفكر سارح / منو منهم منير لو نشوان .
علا بطفش من أفكار صديقتها / ملااااذ لاتخسرينه كافي الصارلج من ورا عصام
شتردين هااا ؟!! اشو بي كل المواصفات الحلوة نقيب بالامن وشلونه صاك يخبل ههه ، يلااا ملاذ شبيج والله رجال حليو و ينحب
ردت ملاذ بدون خلك / متنازله عنه اخذي بالعافيه عليج
علا / هههههه تعال اسمعها ستحجي عليك تكول اخذوووه ، والله لوماااا اااه خل اسكت بس تدرين بية گلبي مشغول والله جان لكفته منج واخليج تفرين براسج المتروس عناد.
ملاذ / والله بطرانه بعدين ليش بايعه بوزه على مصطفى.
علا / خلي يستوي مخبل هذا يكلي ليش تضحكين بالممر .
ملاذ / خطية يغار عليج دفضيها واقبلي .
علا / ان شاء الله والله مصطفى ورده بس شوي عصبي ههههه.
ملاذ / الله يهنيكم ، مصطفى سبع شوفي شلون عنده طموح يشتغل بالمستشفى ويداوم كليه عفيه عليه والله ،، وبعدله سنه ويصير دكتور
ابتسمتلها علا / اي اي بس لاتنسين مو لزكتي بسالفتي اهتمي بروحج وفكري بنشوان .
سكتت مردت عليها مابيها حيلها.
وكتها خلصته تفتر عالمرضى المسؤلة عنهم ماحبت ترجع لغرفه نشوان صادفها مصطفى سالها عن علا ابتسمتله وخبرته / علا طلعت لاهلها ااا..مصطفى مريت عالنقيب
حك راسه يفكر بكلامها لان يشوفها تسال بس عليه رغم اكو جرحى وصلو ويا وما مهتم كثر اهتمامها بهذا الجريح / قبل ساعه رحت انطيته الابره ، صحته شوي احسن بس يابه شلون عصبي اليوم ، يجوز ضايج من وضعه
شكرته وبقت تفكر والله الافكار راح تذبحها
تفكيرها بنشوان يتعبها رجال يختلف عن شخصيته العرفته بيها متعرف عنه شي وتريده يطلكها بس هو رافض الطلاك يربي شلون اتعامل وياه هذا مبين غير شكل شخصيته ومكانته يخلونه يفرض رأيه علية !!!!
عاقبته امتنعت عن شوفته يومين ممرتله متريد تتصادم وياه ، مو منير العامل البسيط هذا غير متعود عالاوامر مبين كلمته التمشي ينطي امر ويريد تنفيذ وطاعة !!! لازم تتجنبه ، من هذا يكول مصطفى عصبي اكيد لأن ما امر عليه !
شالت جنطتها وطلعت سمعت وحدة من البنات تصيحها / عيني د.ملاذ همزين شفتج هذا النقيب خبصنا يريد يشوفج قبل ميطلع ، باجر خروجه منا .
بكل برود ردت / شوفي اي طبيب يمعوده كولش تعبانه بس اريد اوصل للبيت والمستشفى مليانه أطباء
/ والله وصاني يكول شغلة مهمه
تنهدت وعضت شفتها بقهر / تسلمين هسه اروح اشوفه
رجعت ودماغها مشغول شبي هذا شنو المهم يريد يحاجيني اكيد يبالغ ماكو شي مهم الا اذا ... يربي وصدك يسويها واطلك ، لعد ليش عصبي ، انعصر گلبها متدري
ليش المفروض تستعد لهذا اليوم بس شلون بنغزه گلبها ، تعودت كلما گلبها يخفگ تكتم خفگته !!!
دخلت عليه شافته واكف كبال الشباك يباوع للخارج ، لابس تراك شتوي من حس احد دخل التفت شافها واكفه يم الباب زمجر بغضب / مرتاحه حضرتج شارده صارلج يومين متردين تشوفيني !!! محاوله فاشله
جاي تتهربين ترى اني رجلج غصبا عليج ترضين بهذا الشي
ملاذ سدت الباب ، ضغطت شفتها متريد تحجي مبين العصبيه عليه شافته تقرب عليها يمشي بهدوء
ملاذ تنهدت وردت / عندي شغل مافارغه لاحد .
ردلها باستهزاء وعيونه تحاوطها / والله !!! اي مو تساعديهم بالتنظيف ، المستشفى جبير يرادله عمال
حست ولمست انفعاله / عندك روح النكته سيادة النقيب
صار قريب عليها وبقى مركز بعيونها / باجر ارجع لشقتي مكانها قريب عالمستشفى تبعد شارعين منا تجين وياي افتهمتي ، هذا الجنت اريده منج اريد اخبرج بهالشي
لان البيت مأجره لفترة بعد ماا احتاجه
تريد تحجي سكتها رفع ايده / جاي احجي وياج بجديه ملاذ لاتفكرين لحظه اتخلى عنج
بقى عينه بعينها ويشوف وجهها الحلو وخدودها شلون احمرن ، بقت خازرته وهو يباوع بعيونها يريد يلمس قبولها على كلامه صار يعرفها العناد مالي راسها وحب يطول خلك وياها يريد يعرف شتسوي
ملاذ / راح اجمع ملابسي وارجع لاهلي طلال لحد الان مصدوم بوفاه عصام ومصدوم اكثر من عرف بحقيقتك
نتر بيها / شنو حقيقتي ؟!!! اني مو المجرم اليهرب ويبيع عبوات واسلحه وادمر بلدي اني النقيب نشوان عادل سليمان والج الفخر انتي واخوج اني مناسبكم افتهمتي لو لاااا
.... تنفست متوترة يااا شنو هذا شكد عصبي.
بس متريده يسيطر عليها كافي خضوع الشافته من عصام قساها لان فعلا جان مستغل طيبتها ، وانحمى وولى ذاك الوقت ، ردت عليه / اليسمعك يكول رجلي من صدك لاتحلم بابا ترى انت مجرد ... شيكولون عليه..وطكطكت باصابيعها
انوب خبلته بالزايد ..اهااا انت مجرد محلل على هذا الاساس كان الزواج واتفقنا بعدها بس انت مجنت كد الاتفاق وخنتني .
نشوان عيونه بكصته لزمها من فكها وعصره حيل وعيونه بعيونها زمخ بيها / ولج بالقران والنزله لا اخليج تندمين على هالصلافه هاي شلون عين صلفه واكفه بوجهي واطكين اصابعج تستهزئين جنااابج !!!؟
حاولت تدفع ايده فكها كام يوجعها /اييييه وخرررر شبيك
قرب عليها وانفاسه تضرب وجهها / ترحين وياي باجر وتصيريلي الزوجة لمطيعه لزوجها افتهمتي ، وكل واجباتي تقومين بيها .
بعدته وهي تدفعه بصدره مشمئزة من كلامه / ابعد عني شلون تسمح لنفسك هيج تتصرف وياية
ضليت مدنگه ما رفعت ࢪأسي وجان يباوع بكل حذر على كل تفاصيل بيه .
نشوان بغضب / زوجج وغصبا عليج اكو عقد بيناتنا
ردتله بعصبيه / عقددد مزور حتى الاسم يختلف
، بقلمي Jawhara
اخذ نفس يهدي روحه شوية وابتسملها تك خد متوهمه حبي ، صدقته بالمحكمه وباسمي الحقيقي
سنونها ضغطت شفتها قهر وهي تسمعه يكمل بهدوء قضى عليها كليا / اني زوجج وعليج تحترميني لا اتصرف وياج تصرف ما راح يرضيج
ملاذ بزعت روحها وهو يردد عليها الكلام زوجج زوجج / ترى طفرتها لروحي بس تهدد شنو ما تمل والله دريت بيك ضابط بس مو اوامرك تمشيها علية افهم اخي افهم
انت مو بمكان عملك حتى تنطي اوامر شنو هالغرور والاستبداد كاعده اكلك ماريدك طلكني وفضها !!!!
ابتسملها بتكشيره بينت صف سنونه الحلوه
وگلبها دك سريع رادت تنهزم متريد هالاحساس ولا تصادم المشاعر اللي تحاول تفرض سيطرة على گلبها ، تريد تنهزم بس رجليها خانتها أو ربما گلبها
نشوان / ملاذ صيري حبابه واقبلي لان راح اطلبج لبيت الطاعه
فكت عينها مصدومه حجى بجديه رغم ابتسامته اللي درت بيها مزيفه زين يا نشوان اصبرلي راح تكرهني وغصبا عليك اطلكني .
ملاذ / خلاص اجي وياك.
نشوان بداخله فرح لان قبلت تجي ويا بس مستغرب ليش بهالسهوله جان قبولها !!!!
ــــــــــــــــــ
ديمه /
موبايلها يرن ويسكت وهي ملتهيه تلف دولمه ، عبودي خبلها كلب الكاونترات يفتح بالابواب والمجرات صاحت بي / لك ماما شلون بيك متوكح
عبودي يلعب بالخواشيك طشرها. / ماما اله ماما اووو
التفتت بدون خلك / اي حبيبي ، ياااا ليش هيج عبوووود
عبودي يضحك ويضرب بالخاشوكه ،،
كملت وشالت الجدر ذبته عالنار ولمت الهوسه ونظفت الميز جانت تشتغل عليه رجعت غراض الكاونتر مصافي ونجاين بلاستك وستيل والخواشيك شالت ابنها وطلعت / يلا حبيبي تعال خل ابدل ملابسي .
دخلت للغرفه سمعت رنة الموبايل جان عالشحن رجع سكت ذبت عبودي عالجربايه وكعدت يمه سحبته من الشاحن فكت عينها ٢٠ مكالمه من فارس معقوله مسمعتها اتصلت هي ، راسا فتح خط عقجت وجها
من سمعته يصرخ عليها /؛ثووول اي والله وين مولية صار ساعه اتصل وماكو جنابج وين عن الموبايل ؟!!!
جرت نفس وذبته والله خبل صارلها اكثر من اسبوع وياه مرات شلونه هادىء ومرات يطكن خبالاته عليها وبعصب ويصيح تدري بي لان مانعه روحها منه هيج يسوي وكوة لازم نفسة منها / جنت اسوي الغدا بالمطبخ اكو شي.
على نفس العصبية نتر / اي مو طابختلي ثور وجنابج ملتهيه
بررتله وهي متعجبه من روحها هيج حجت / ابنك خبلني سوا مداهمات عالكاونتر والتهيت ارتب والله والجهاز جان عالشحن .
فارس شكد جان عصبي لان يدك عليها ومتفتح خط عباله متعمده لان صار يعرفلها من تعانده ، بس من كالتله ابنك خبلني گلبه فز وضرب بضلوعه جر نفس حار وذبه حسسته بكلمتها الكالتها بكل عفويه باهميتهم بحياته وانهم فعلا عائلته هالكلمه ..ابنك..خدرت اعصابه هو يعتبره ابنه ويعامله على هالاساس بس من نطقتها ديما حسها غير شكل اااخ ديما
فارس / عندج صور معامله .
عكدت حاجبها / اي شتسوي بيهن .
فارس / حضريهن وهويتج انتي وعبودي .
ديمه / صار راح احضرهن بس مكتلي شسوي ببهن.
فارس / شكد تلحين كلتلح حضريهن .
سد بوجهها عقجت خشمها / اووي شنو هالاعصاب
فارس يريد يصدق عقد الزواج بالمحكمه ولازم يبدل هويتها لان تزوجت ويريد يطلعها جواز سفر هي وعبودي لان وراه سفره لعمان بعد كم يوم ميريد يعوفهم وحدهم وحتى يغيرون جو لان حسب ميدري جانت متطلع هواي بس للشغل فيريدها تتونس
......
جانت الساعه ب٣ من فات للغرفه ، ديما مدده
عالجربايه وتكلب بالموبايل من شافته دخل شمرت جهازها تدري بي يبقى يحجي عليها لان من جابلها الموبايل رتبلهيا وخلالها انظمام بكروب بنات و بس ، ميكدر اذا ميكعد يفتش بجهازها هالشي يضوجها عصبت من شافته اخذه وبقى يكلب بي دفرت الغطا ونطت من الجربايه وكفت بصفه رفعتله
راسها / انت ابو نسوان متعلم عالسوالف وجاي اطبق براسي شنو اشك بية مووو
فارس نتر / وجع صوتج خبلة
ديما فورت من تصرفاته / تدري الاحسن اخذ الموبايل ماريده ذبحتني يوميه تفتشه هالصخام ماريده بزعتني
شمرا على ميز التواليت ورجع خزرها / شكوووو لسان دلاله اعوء بالله
ضاجت من كلامه وردت / ممعليه صوتي بس انت تحب تحجي علية بس والله الموبايل بعد ماريده خل راسي بارد شلي بهالدوخه .
نتر بيها / بكيفي مو انتي التعلميني ..ولج بعدين منو ابو النسوان انتبهي للسانج لاتخليني اتعصب ترى مارحمج ، امشي صبيلي غدا بين ما اتوضى واصلي
يلااا لاتبقين تتصفنين
طلعت من الغرفه وكوة حابسه الدمعه يربي شكد تصرفاته تجلط ، حضرت السفرة كالعاده بالكاع فرشتها وخلت الخضرة والطرشي والاكتيفيا كلبت جدر الدولمه
بصينيه مسويه بجدر صغير حطتها بالسفرة وراحت جابت الخبز رجعت حطت القوري عالنار ونصته
شافته فات للهول مراحت تتغدى رغم شكد جانت مشتهيه الدولمه بس من ورى تصرفاته نفسها انسدت
...كعد يريد ياكل السفرة ترتيبها يفتح النفس والدولمه ريحتها اجنن مد ايده سمه بالله يريد ياكل جان يصيح / ديمااا
ديما ماده البوز راحت راسا تدري يخبصها يبقى يصيح تعاي وتعاي .
فارس رفع عينه بيها / تعاي اتغدي شنو مجوعانه لو تغديتي
شافها بعدها ضايجه تنهد / تعاي يابه لاتبقين ماده بوزج شبر
تدري بي مياكل اذا متكعد يمه بداخلها استغفرت ربها وتقربت كعدت ..اشرلها بصفه وما ارتاح الا صارت يمه كاعده كعدوا ياكلون وحمد بطبخها / عاشت ايدج شنو هالاكل الطيب
ارتاحت وبداخلها فرحه من حمد طبخها /عافيات
سمعت صوت عبودي كعد كمزت عليه حجى عليها / شبيج طرتي على كيفج
ديمه / خطيه يبقى يبجي اذا مشافني
فارس / دروحي جيبي مشتاقله
شوي واجت شايلته خدوده حمر اثر النوم من شاف فارس يريد يشمر روحه عليه /ببااا ببااا
اشرله فارس / تعال بابا تعال حبيبي
خلا بحظنه وكام يسويله لكم صغيره يوكله
ديما تراقبهم وگلبها مرتاح ، عدها شعور الندم على زواجها من فارس يختفي يوم عن يوم وبدت تميله بس تصرفاته وتحكمه يضوجها
كملوا الغدا وراها صبتله چاي كعد عالقنفة وعبودي يفتر يمه / حضري روحج الجمعه الجايه نسافر لعمان
..فكت حلكها متفاجئه ، صفن عليها يحبها من تصفن وتفهي بوجهه / شبيج حضري ملابس شتويه عمان برد مو مثل هنا.
ديمه / ماعندي جواز شلون اسافر.
حجى وهو يشيل عبودي خلاه بحظنه يبوس بخدوده وعبودي يلعب بالموبايل اللي أخذه من ايد فارس / اليوم من اخذت المستمسكات رحت رتبت الوضع صدقت العقد بالمحكمه وعندي صاحبي ضابط بالجوازات كم يوم ويطلعليا بس اوديج تبصمين ويصير جاهز.
