رواية لست غجرية الفصل الحادي عشر بقلم روز الحيدر
:
اذا تعالى عليك شيء
أهنه بالتخلي
:
ليل
✥━━━༺✦༻━━━✥
صوت بيبي الحلوو يترقق لمسامعي
هدوء يجوب اطرافي وفترة اجازة
لمدة أسبوع بين انتهاء السنة الاولى
من الاقامة الدورية وتراكم رصيدي
من الاجازات قبل
لا يبدي روتيشن السنة الثانية
استغليت الفرصة بأجازة حلوووة مريحة
بأحضان بيبي وماما راحة تامة ودلال ودلع
صبحية دافية بالشمس الهدوء
چان يملي الحديقة
وماكو صوت غير زقزقة العصافير البعيدة
وحفيف الشجر وصوت بيبي وهي
تغنيلي اهازيجها الرقيقة
الشمس دافية تمسح على وجهي بحنية
مثل حنية كفوف بيبي وهي تمرر بيدها
الحنة المعجونة بمي الورد والقرنفل
بين خصلات شعري
وكأنها تطبطب على كل التعب اللي مر بيه
ذيچ السنة الطويييلة المتعبة
گاعدة بمكاني المفضل بالحديقة
جوه قمرية العنب
والراحة أخيراً لكت طريقها لگلبي
بعد تعب ذيچ الفترة گاعدة وعيني على
اشعة الشمس تتخلل القمرية بدفو نااااعم
ورايه گاعدة بيبي بلمساتها الحلوة
و ريحتها حنة وهيل تمشط شعري بهدوء
المشط جان ينزل بين خصلات شعري بكل سلاسة وكل جرة مشط جانت تاخذ وياها هموم الدنيا
بيبي تمسد على راسي بالحنة وتخلي لكل جزء
كمية وتضفرها وتقرأ تعاويذها بصوت ناصي
وماما تضحك
-منووو يحسدها يمه
-انتِ تحسدينها عوووذة الگريعة
-هههههههههههه يايمه صدگ تحچين
-چا مچذبة طلعتيلي مهلسة
على خالتچ سنية
تكسر صوتها وگالت
-سودة عليه ياخيه الله يرحمها
بس چانت هلسة مو مثلي انا ونعمة
1 تع
ضحكت على تناقض كلماتها
بدت تضفر شعري
وأصابعها تتحرك بخفة خلتني أغمض عيوني
وأستسلم للنسمة الباردة اللي تمر بين فترة وفترة بهذا الوقت
نسيت كل شي
العمليات
الطوارئ
الخدج
التعب
كل اللي چان يهمني هو هاي اللحظة
دفو الشمس وريحة الحديقة
وإيد بيبي عذبة اللي تحسسني إني طفلة مدلله ومحفوظة من كل شر بقرائتها للمعوذات حواليه
-گووومي سويلنه چاي وبسكتات نحلي
حلگنا وجيبي التلفون سليطين ماحاچاني
بس لا اخذله وحدة انگليزية منااك
-خل ياخذ شو شايب
-خايبة گلابچ ويييين تلگين مثل سلطان
-ابن صاحبتچ طبعا تحبينه
-أميرة مو صاحبتي
أميرة اخيتي من شردت من الدنيا
لمتني هي وبشير ااااااخ ماانساها من
ترستلي بيتي غراض
وكلما اروح اسدد اخوها الگاها مسددة
ببدالي يااااخيه نارچ بالگلب مابردت
اشرتلي ماما اغير الموضوع خاف يرتفع
ضغطها من القهر
-بيبي
-گولي بيبي
-شتگولين نروح نتونس بالگاع ناخذلنا
نهار بهالجو الحلوو
-بدون زلمة
-شنو السالفة بيبي
المنطقة هادئة ومليانة نااااس
-خوووش سولچن ترمز چاي واكل ونمشي
الصبح باچر
-تدللين عذوووبة
-خايبة مااحب اسم عذوووبة
سميني عذابي
-دگومي يابيبي لا تتمرضين طبي
جوه خلصت
-گومي وياي
-لا خليني حدر السوباط
-شنو السوباط
-القمرررية مال العنب يالدكتورة
دخلت لفيت شعري بكيس وبعدين
بالمنشفة وحدة من فقرات تدليلي
بالعطل والمناسبات هي الحنة
تجهزها بيبي وتعجنها بالقرنفل والهيل
ومي الورد والچاي الغامق
حسب كلامها حتى تنطي لون
لشعري گعدت بالغرفة اتصفح
بالتلفون طلعتلي صفحة هاجس
سويتلها ازالة وكملت تصفح
للعصر عتقتني بيبي وگالت اسبحي
-سودة بوجهي
عمي سالم وتنصبغ ايدي والزلام
يگلوله محنة يگلهم حنيت بنيتي
سكتت بيبي التفتت الها تمسح
بدموعها
-والله والله يا هاجس ماغفرتله
ذنب الا لعيون عمي
انا بهذا عمري المابيني وبين
الگبر وكت طويل ......
-اسم الله عليييييچ حبيبتي عمرررچ
طووووويل
-يابعد روحي ليلة بس انا لهذا عمري
ماانسى عمي صرت مرة شكبرني وهو
سودة عليه ضرير وبيده يگعد يفلسلي السمچة
ويحط اللگمة بيدي
ومن يليل الليل ويشوفني تعبانة
اسمع صوت المكناسة
الگا بهداي محنب ويكنس حجرته
ومااخلي انا عشت ويه عمي اكثر
مما عشت ويه مرحوم ابوي
احبه عبنه رحم يتمي وماكسر بيه
سحبت ايدها ابوسها
-تعيشييين وتضفريها
-عوووووذة مااريد انا اضفرها
عررررسي وخلي زلمتچ يضفرها
-مااااعرس
-هسسسسه يدگ گليبچ الصغير وتجيني
واذكرچ
-يمكن
-مو يمكن اكيد
خايبة لويله ماتخلينه ناخذلنا يوم نروح نزور
ابو الجوادين
-مو تكرهين بغداد
-بس احب الكاظم
-اببببد بيبي عليه اني اني اريد ازورج
-خايبة مايصير غير انا الچبيرة
-لخاطري
-يلا بس نبات
-هاي هي ونروح باچر للمزرعة يلا
-خوووش
صدگ ثاني يوم جهزت ماما غدة
واخذتهم وطلعت الجو يجنن وهدوء
القرية بيها بيوت بس مو بيوت قروية
لا بيوت عادية وعلى كلام بيبي
ذاك من ذاك البقى من اهلها
دخلنا الگاع مخلين بيها رجال چبير منطيته بيبي
وصلة من الگاع باني بيت صغير
لعائلته ومحافظ عليها وهي مو چبيرة
هوايه العنب مضلل المكان والهدوء
گعدنا بالشمس مستمتعين بالجو
ماما خلتلها مخدة ومددت
-گوميني ولچ
گومتها وطلعنه نتمشى على كيف
وهي تأشرلي
-هاي الگاع چانت بيوت خواتي
شوفيها المبني عليها هذا البيت الچبير
-خوالي ولد بيبي نعمة وسنية
كلهم صارو يمنه ليش
-ماظلو بالسلف كبرو ودرسو
وراحو للولاية باعو گيعانهم
ونصهم تدرين ببغداد
مشينا ليگدام باوعت وابتسمت شوفي ذاك
البيت المهدم ومصخم
-اي هذا باقي صار سنين چنه
صغار نخاف منه اطفال القرية يگولون بي جن واشباح
-لا يابيبي هذا نتيجة الظلم والحوبة مايدوم
هاي گاعنا وسامعة من امچ عمام ابوها
شلون باگو الگاع بيوتهم واحد
بصف الثاني وذني بيوتي
انا وامچ خلاهن مرحوم جدچ
اخذوهن ظلم وظلن لاولادهم واحترگو
بليلة ظلمة مابيها گمر خضير وولده
واهلة ماظل منهم غير اخوهم
طالع منهم خله الگاع وانهزم
بس باع الگاع للزراعة وظلت البيوت
الناس تخاف تسكنها
-ليش مارجعتي اخذتيها
-بيها نفسهم مااريدها الله كفاني
ووفاني وعشت بخير جدچ حتى
وهو ميت سودة بوجهي
مشينه راجعين واشرتلي گاع ورانه
-هاي گاع بيت خالتي
ورثها كويظم الچلب من
ماتو اهله
-يابيبي مو ميت ميصير
-يابيبي ضيع اخيته وتاليتها ورث
البيوت والگيعان
-بيبي صدگ ابوه بيبي مزنه مات من قهره
عليها
-لا يبيبي مات من الندددددم مو من القهر
گعدت اني سويتلها كوب چاي
وگعدنا ناكل وهي تسولف عالگاع
وبكل مكان الها ذكرى تحچيها
لحد مطلعنا بحدود الاربعة العصر
راجعين للبيت
بالليل تمددت على رجلها فتحت شعري
وهبت ريحة الحنة صاحت لماما
-تعاي يالهلسة وشوفي ريحة
الحنة اگلچ خلي ماترضين
-يمه ويه الشيب الحنة تصير برتقالية
استحي
-چا يمه هاي انا مو احط حنة شحلاتها
-عذووووبة تلوگلچ الحنة
نزلت راسها باست راسي
-لسانچ حلووو على حبوبتچ اميرة
امچ فاهية ام حلگ الفكاكة
-لا يمه عشگتي سلطان وماردتي تفارگينه
ضحكت ماما ووگفت
-اروح اخااابره
-ولچ گتلچ روحي وياه
-واعوفچ انت وليل وحدچن
وهو ويا الولد اثنينهم
تركتنا ماما وراحت تتصل بحبيب الگلب
وبيبي تسألني
-الوليدات شلون صارو
-بيبي وطن زين بس شويه يعرج بس يتعالج
وهاجس ......
-خفة هالأسم شفتي جده من شوفة الحال والكبارة
على خلگ الله سمى ابن ابنه على اسمه
-عماته الحياية هم اجن
-ايييييي وحتى سلامهن ينگط سم
-ماتعرفينهن ذني انا اعرفهن
حياية نسيت خايبة شصار علي الچبير
-بيبي گصو جزء من امعاءه
-يممممه من مصرانه
-ايييييي بس يتحسن
-الله يشافي لخاطر ابو
كمال خوش ولد
بقينة نسولف اني وياها الى أن صار
وقت النوم توجهت لفراشي حتى
ثاني يوم نطلع للزيارة
الصبحية تحضرنا وطلعنه
الطريق حلو وبيبي بسوالفها محليته
لهناك وگالت خابري على خالچ علي
-صادق شلونه
-منتهي السكر مأذي
-من الشرررب
-ههههههههههه يمه عاف الشرب صار
سنين
-وانت اولادك شلونهم شو گاطعين شمالهم
-ناس دوامات وناس كليات
-حلتلك گعدة بغداد بعد مارديت
-تعلمت هنا والاولاد كبرو هنا
-شيبت ولك وتقاعدت
-شظال بالعمر يمه
التفت لماما
راحتلهم امي تسولف وياهم
واني استمعلهم الى أن زرنا
الهدوء والسكينة بعد الزيارة يخلي
الروح مرتااااحة وناسية ضجيج العالم
وتعبه وراها
خلصنا الزيارة وحلف الا ياخذنا لبيته
بس بيبي اصرت نروح لبيت خالة سهامة
طاااارت من شافت ماما وبيبي
وبين سلام وكلام اولادها متزوجين
وهم كل واحد وعائلته بمنطقة شكل
وبس هي وبنتها غيد الصغيرة اللي جابتها عالكبر طالبة كلية
گعدنا بعد مانام الكل وگعدت
بيبي تسولف عالماضي وأيام قبل
وخالتي سهامة تضحك وترد عليها
ذكريات جمعتهم سويه لهناك وتذكرو
بيبي أميرة ونعت بيبي نعاوة عالاخوات
كسرت گلبي
مرة اجتها وحدة جيرانه وياها
بنية سمرة حليوة
شو هاي خشي بأميرة للبيت جوه
ساعة زمان وعله صوت اميرة وطلعت
المرة منها تركض واميرة وراها بيدها
مكناسة تريد تكتلها گوه لزمتها والبت الصغيرة
خطي طلعت وراها وذيچ ماولت لا وگفت
بالحوش تلعلع
-لچ صلفة مو طلبتي مني مرة
-اييييييي مرة لأخوي المطلگ مو لرجلي
-واني شگلت حبيبة گتلچ البنية يتيمة
وتخدمچ وهم تخلف بدل ماظال رجلچ بلا خلفة
-وهوووو عاتب عليييييچ امشي لچ اطلعي
لا املخچ
-خااااايبة اميرة انا شعليه
-الفااااهية ولچ فزعيلي
-وفزعتيلها بيبي
-لا ولچ طب بشير وفاككهن
وهاي الدلالة وگفت عدلت روحها وحاچته
عالبت طردها واميرة تبچي يومين
زعلانة وگوة رضاها بشير خطيه لايدري بالسالفة
ولا اله ايد بيها
چانت حنينة معدلة مااطت ببشير
ولا گالت گدام واحد بشير تمرض ومابي
خلفة ورة اعتقاله وعاشت وماتت على حس
بشير لحد ماتوسدت الگبر يمه
موتتها مثلها خفيفة راهية صلينا
الصبح انا وياهة ونامت نومة اهل الجنة
وراحت لرحمة الله
واستمرت السوالف لنص الليل
يلا نمنا ثاني يوم الصبح گعدنا
للصلاة صلينا واتصلنا بالولد بايت
بسيارته بالگراج ماخذ عبرية وراجعلنا
انتظرنا يجي
گاعدات خالة سهامة وماما وبيبي بره
بالهول واني الف بحجابي واتصل بيه
وطن
استغربت اتصالاته بهيچ وقت بس رديت
مثل كل مرة
-صباح الخيييير عرررراق
-صباح الثگل
بس گالها مستنكر عرفته
هاجس
-تفضل
-مو حضرتج اشرفتي على علاجي
نوح بدوامة وما يرد عالاتصال
وهذا الكيس لعب نفسي
ماجاي اعرفله
بما ان الموضوع طبي بحت جاوبته
بهدوء
-مجهز الاشياء اللي تحتاجها
-الكيس الجديد وقاعدة
ومعقم وكلينكس رطب
-اسلووووبك رجاءاً ولا لتستعمل قميصك
لو قطن لو شاش رش معقم
عقم المكان
-دقيقة لا تصلين صلي بالحچي
-تمام وياك خطوة بخطوة
اوگف گدام المرايا
-شنو اجر الكحل
-ترررريد تغير الكيس لو لا
-فضيني
-استغفر الله
-يلا المؤمنة العابدة هسه گدام المرايا
-بلل الشاش معقم عقم المكان حول الفتحة
بهدوء لتجرح الجلد
-ماااجرحه هي بطني مفتوحة تگلي برقة
عقم
-بسرعة عقم المكان حتى لو بكاغد سمبادة
اذا يعجبك بس المهم يتعقم
-عقمنا
-شوف لون الامعاء وردي لو بي تغيير
-لا ماروني مزرق
-مجاي نلعب
-اييييي فضيها
-نشف المكان بشاش نظيف
-تمام
-عندك بودرة
-اكو طحين يمشي الامور
-مجاي نسوي كباب عروگ اكو بودرة لو لا
-ماكو
-اعبر هالخطوة هسه
القاعدة خليها بين اديك وحرك
ايدك حتى يدفى الصمغ بالقاعدة
ويتحفز
-الدفووو مطلوب بهيج وقت
غلست على كلامه وسألته
-كملت
-سنحت القاعدة عالدفو
ماانطيت اي اهمية لكلامه الحقير حتى
ميگول فهمت
-هسه افتح العازل مال القاعدة
والصقها حول الفتحة بهدوء وبالمضبوط
تمام
-دقيقة
شوي وگال
-لصقتها
-تمام بالعافية
غلقت الخط بسرعة رجع دگ
رفعت الخط
-شهالاسلوب من الاصول تغلقين الخط
بعد متودعين الشخص
-اي مع السلامة
رجعت غلقته وطلعت من سمعت صوت
ماما تصيح
سلمنا على خالة سهامة وطلعنا
بس دخلنا السيارة اجتني رسالة
فتحتها من رقم غريب مكتوب
-يلا الجاااااايات هووواي
عرفته هو مارديت طلعنا للبيت
وگضيت الطريق نوم بحضن بيبي
لأن سهرنا بالليل وصلنا البيت وتوزعنا
لغرفنا ونمت والايام البعدها خلصت
بدلال ماما وبيبي اليه وطلعاتنا منا ومنا
الى أن استهليت السنة الثانية من الروتيشن
يوم الاحد صبحية اخذت سيارتي
توجهت للدوام وتسلمت المهمات من اول
وجديد بنفس الترتيب نكمل اللي فاتنة
بين الباطنية والاطفال النسائية والطوارئ
بس برتم اهدأ وايقاع متناسق لأن
السنة الثانية بالنسبة للطبيب المقيم
تختلف يصير مو ذاك الطبيب الجديد اللي
يسأل عن كل صغيرة وچبيرة
تصير عنده خبرة بقراءة التحاليل
التعامل ويه الحالات الطارئة وتجهيز المرضى للعمليات
واحيانا يوجه المقيمين الجدد خريجي السنة
الحالية
وتتوزع مهام جديدة
قضاء فترة أطول بأنعاش الطوارئ
ردهات الكسور والعظام
العيون و الأنف والأذن والحنجرة
التخدير والعناية المركزة
صح تزيد المسؤولية بس تكون متعود
التقيت بباب المستشفى بنوح وهو طالع
ضحك وهو يصبح عليه
-هااااا هم مختلفة الخفارات
-صبااااح الرااااحة راح تروووح تنام
-بس اليووووم راحة اسبوعين بعد
وارجع هاجس هنا
-صاير شي
-لا نعيد ربط الامعاء الدكتور كاله الاستشفاء تمام
-ياالله ووطن شنو وضعه
-تعبان وطن وضايج
-ابد ميحچيلك
- مگضيها ضحك ومن يگعد
وحده ياكل بنفسه
-اني احاچي انت روح ارتاح يلا
ودعني وراح وبلشت استلام مهام اني
وزملائي وبديناها بالباطنية
وجيب وودي وحالات اشكال والوان
بالليل يصير هدوء بالردهات دزيت رسالة
لوطن
-عرراق گاعد
-نعم يا ظلام
شوية واتصل بيه
-شلونچ ظلام
-شلونك انت
-الحمد لله
-الصدگ
-مو زييييين حتى شغل مااعرف اشتغل
تدرين انفتح خط من الخطوط مال اصدقائها
-الله علييييك
-والله وطلعتلي بنية وسألتها
گالت نزحنا للشمال بس مااعرف اخبارها
-لا حول الله
-تعبت من التفكييير
-وطن
-هااا
-وكل امرك لرب العالمين وادعيييي بكل وقت
-ونعم بالله
وعذريني على اتصال هاجس من عندي
خاف ضوجچ
-معذور لا عادي اني عاذرته لأن مريض
ونفسيته تعبانة
-متدمر على صديقه
-ابو صعبة
-لا ذاك الله يرحمه ثائر
هو وهاجس چانو گدامنا
بنفس المكان ساعة الأنفجار
هو استشهد وبقت بنته الوحيدة
-لا اله الا الله
-محاولة تنتحر ببيت عمتها
وهاجس صار حبل الانقاذ الها
باليوم يخلصله ساعة ساعتين
بس يقنع بيها تهدى
-طفلة خطيه
-لا سنة ثانية جامعة
-هم صغيرة امها وين
-امها منفصلة عن ابوها
وهي صار عمر عايشة ويه الاب
وعمتها منفصلة وماعدها اطفال
وهي يمها
-لا حول الله
-دوام متقبل تداوم الا راح هاجس
بنفسه قنعها
-متعلقة بي
-اييييي هي وحيدته
-اقصد هاجس
-لا مو قصة تعلق بس تقريبا كبرت
گدامه من هي صغيرة وحتى
لبيتنا چانت تجي وصديقاتها بنات عماتي
-مسكينة ربي يعينها
-دووووختيني ظلام رووووحي
خل ابچي عالاطلال
-ربي يريح بااالك
ودعني وراح وگعدت اكمل
الملفات اللي عندي
التأكد من علاجات المرضى
للراوند الصباحي تممت
كل شي وگعدت حفظت رقمه
بالتلفون كتبت جاثوم حتى من
يتصل اعرفه
ومرو الأسبوعين بسلاسة تامة
واجاني أتصال نوح
-جايين نجهزه للعملية
-تمام اني عالباطنية تلگاني
موجودة
-واحنة عالجناح الخاص راح نجي
انتظرت بالغرفة اتصل بيه نوح
-تجين جدي يسأل عنچ
بالرغم من تحفظي على جده وماضيه
ويه اهلي بس استحي
رحت لگيته گاعد بالغرفة ويرزل بهاجس
مافهمت على شنو
-اگلك مو جاهلة جدي شني
كل ساعة مخابرها تسكت بيها
امر الله نفذ واستشهد ابوها شني
تروح ترضعها عيب جددددي عيب
-ياااابه ماتفهموني هاي بنية
بقت وحيدة وتشوف بيه ابوها
ليش اكسرها زيادة
-السلام عليكم
القيت السلام وسكتو الاثنين
ونوح ينحبش بملف هاجس ردلي
السلام
والجد وگف واشرلي
سلمت علي سحب راسي باسه
-شلونكم جدي
-الحمد لله انت صحتك شلونها
-بس يگوم هذا البغل انا اصير زين
باوعت لهاجس يحك بجبينه
من كلام جده ميگدر يرد
-گعدي جدي احچي وياچ
كعدت عالكرسي وهو گعد گبالي
-شلونها حبوبتچ
-زينة الحمد لله
-ابوچ شلونه ريحانة
-بابا بتركيا راح يسوي عملية
وبعد اقل الشهر يرجع
وماما الحمد لله تمام
-عساكم بخير بس يرجع ابوچ
وديلي خبر بيد نوح نجي نزوره
-اهلا وسهلا
دگ تلفون الجد وطلع بالباب يسولف ويه
وحدة من بناته ونوح يناقشني
بشغلات طبية سمعت صوته يسأل نوح
-شو جدك مسنح للأعدااااء
باوعتلة صفح ونوح ضحك
-جدك ناسي العداوة واحنه نجتر بيها
صار سنين سد السالفة هاجس مو حچالك
-اذا ذيچ الصفحة ساحرات
شمرت الملف عالميز باوعتله
-شويه احترام شنو هالحچي
بيا عصر احنه وساحرات وغيرها
وخل يكون بعلمك انتم واهمين
وهالعداوة بسسسس بمخيلتكم والا
جدك وبيبي ماعدهم شي اقرباء
وصارلهم عمر يلتقون بكل مناسبة
واسااااااساً عيب ينفتح الموضوع
كل واحد صار عمره بالثمانين
وكل واحد عنده عائلة واحفاااااااد
وگف متضايق وباوعلي رافع حاجبه
-جييييد سحر وغباااااااء
درت وجهي وطلعت لأن هوووايه
تجاوز حدوده واستفزني
سمعت صوت نوح ورايه بس يضحك
-يعني عاجبك الكلام
-ترى قصده سحر الجمااال موو غير سحر
يعني لازم تخجلين وسوالف البنات
-وحتى لو قصده هالشي
المفروض ميفتح الموضوع
شنو هالعداوة الغير مبرره من هاجس
بالذات
استحيت من نوح واعتذرت
-ماصار شي اروح اكمل شغلي
-متدخلين جراحة
-لا الدكتور مطلبني
-بعد نص ساعة يدخل
من يستقر اني ارجع بجدي للبيت
اريدچ عينچ علي
-وطن وين
-طلع هو وابوي وعماتي وزوجة ابوي
للنجف فجأة گال اريد اروح لأمي
وابوي لأن يشوفه مقهور سواها عائلية
حتى يشغله عن تفكيره
هاجس گاللهم اجلت العملية علما تجون بس كذب
يخاف على وطن يدري بي قلق
انكسر گلبي لقطع من سمعت طلب
وطن الانسان بينه شگد
ميكبر يبقى محتاج أمه
ساعتين واتصل نوح
-ها نوح
-خلص الحمد لله بخير
طلعته من الافاقة للغرفة بس جدي
ضغطه مرتفع تكدرين تجين
-ثواني
رحتلة للغرفة جده گاعد
عالكرسي مبين ماله خلگ
-السلام عليكم
-هلا جدي
-الحمد لله على سلامته
رد عليه نوح واشرلي على جده
-جدو افحص ضغطك
-اي ياجدي
فحصت ضغطه عالي
-عندك علاج خاص للضغط
-اي للضغط والسكر
-جايبه وياك
-لا بالبيت
أباوع نوح يحجي ويه هاجس ومبين
جاي يصحى
-جدو لازم تاخذ العلاج
نوووح مدام اخوك صحى والعملية
تمام اني يمه بعد اخذ جدو للبيت
-لا ياجدي مااكدر اعوفه
-جدو هو اساساً راح ينام عالمسكن مايصحى
الا باچر باچر تعال مقوي نفسك
-ياالله
وگف راح باس هاجس من راسه ومدري
شهمسله الحقير ضحك وطلعو
وگفت يمه عدلت المحاليل فحصت حرارته
-تحس بألم
هز راسه
-اييي
-انطيك مسكن
-امممممم
خليتله المسكن اللي صارفي اله
وبلشت اسجل اللي شاهدته
كملت وسالته
-محتاج شي
-قللي الاضاءة
-تمام
قللت الاضاءة وطلعت على أمل
ان أرجعله بعد ساعتين حتى انطي
سوائل مي او عصير وامشي
رجعت بعد ساعتين المحاليل مخلصة
وهو شبه گاعد
-تگدر تمشي
-قابل مشلول
-تمام عود امشي
طلعت صاح
-وين تعاي شيلي المحاليل
رفعتهن اله وباوعلي
-يصير اشرب شي
طلعت علبة العصير من جيبي
-اشرب هذا ومي يمك
-اذا تحس بألم گلي حتى اتصرف
-اساساً جاي احس بألم
-مو الم العملية لا الم قوي بالمعدة بالامعاء
-لا ماكو
-يلة اذا تگدر تحرك
شرب العصير وشويه مي وگال
-ياالله
وگف ترنح راد يوگع
مديتله ايدي لزم كفي بكل قوته وگعد
-دايخ
-شويه
بقى منزل راسه هادئ سحبت كفي ماتركه
-انتظري گوميني
گومته استقام جزئيا لزم مكان العملية
ومشى خطوات ترك كفي مشيت ويا
حوالين الغرفة لحد متعب ورجع للفراش
تمدد
-علاجك ب٦ امرلك وراح اجيبلك عصير
دگ تلفونه واحنه نحچي مخلي يم راسه
مارد عليه بعد ردت اطلع وسمعته
-ها روان مابيه شي بابا ليش البچي
گولي ياالله
لتجين ٥ أيام واطلع ممنوع تطلعين
من دوامچ وتجين فهمتي
سديت الباب ورحت اكمل شغلي
للستة دگيت الباب ودخلت استغربت
بنية شابة لابسة اسود تمسح بدموعها
ويمها مرية چبيرة تسكت بيها
-لتفاولين عالولد عمه مابي
شي
-مااتحمل بعد خسارات عمو
-السلام عليكم
القيت السلام وهم ردو
باوعتلي البنية خجلانة مسحت دموعها
وعدلت گعدتها
-يلا تشرب شي حتى تمشي
وگفت المرة وگومت وياهة البنية
-يلا خوية الله يشافيك ويعافيك وتگوم
بالسلامة
هي تقربت من السرير مدري شهمست هو
ضحك
-خبلة وتبقين خبلة يلا تاخر الوقت
لا تظلم ولتتعبين عمتچ مابيه شي
بعد
رجع گال لعمتها
-خوية الموضوع گتلچ يمي لتفترون بالدوائر
وتتعبون اني اطلع الراتب واسلمكم حتى
الهوية
سلمو وطلعو بيدي كاسة مي وعصير
-يلا اشرب حتى تتحرك
لزمت الملف اكتب مشاهداتي
-حسيت بألم
-شي بسيط نفس الالم مال العملية مو قوي
-غازات بامعائك حسيت
-لا
فتحتلة الكاسة والعصير
-يلا اشربهم
شرب ولعبت نفسه اشرلي عالسطل
خليته يمه ماگدر يتقيأ
-غثيان عندي
-عادي واحد من الأعراض
نزل على كيف ومشى
-اطلع للممر امشي
طلع واني عيني منه ورجع دخلت وياه
تمدد بدون كلام رفعت ردنه وعقمت المكان
-شنو هاي
-ابرة تخثر
ضربته ووخرت
-ايدك اخلي المحلول
خليتله المحلول ردت اطلع صاحلي
-بعد ماعندي علاج
-ل١٢ يلا
تركته ورحت لباقي شغلي
ل١٢ لگيته شبه گاعد وسماعته باذنه
ويسولف
-الامور تنأخذ ببساطة ابوچ ماتعب هالتعب
حتى تجين بالاخير تخربين كل شي
مممممنوع شنو اترك السنة كملي
منريد تفوق مجرد نجاح
شبييييييچ دماغچ وااااااگف
بابا سمعي الكلمة شهالعناد
لا تبچين لمصلحتچ أحچي ميخالف
گتلج حاچيها تبقى امچ مهما سوت
اعررررف اعررررف تزوجت اعرف
ابووووچ ماتزوج ماراد يكسرچ
مسحي دموعچ رگية
ضحك وياها الظاهر ضحكت
باوعلي واستاذن
-يلا بابا روحي ارتاحي
سد الخط وسالني
-انتن البنات شتردن بالضبط
-من اي ناحية
بديت اجهز علاجة ويحچي
-من كل النواحي على كل حچاية دمعة
وكل كلمة الها رد ومتقبلن بأي شي غير رأيچن
-مو شرط يمكن الشخصية اللي تحچي
عنها ضعيفة لذلك تواجه هيج صعوبات
مارد عليه خليت العلاج وفحصت امعاءه
صوت حركة بسيط
-تحس قرقرة ببطنك
-اي احس بشي بسيط
-جييييد محتاج شي بعد
-اگدر ادخن
-اكيييييد ميصير
خليت الملف عالميز
-خليتلك المسكن حتى ترتاح وتنام
الراوند الاخير بالستة الصبح
تصبح على خير
بدون مااسمع رده طلعت واجتني
رسالة منه لتلفوني
-شگد خشمچ ياااااااابس
بسسسس خلي ببالچ اي شي يابس
يصير كسره سهل
-اوك
بس رديت هيچ ورحت ارتاح
للستة ضبطت علاجاته ورجعت
بعدها للبيت استلمه نوح
لثاني يوم بديت دوامي ب٨
رحتلة العلاج مضبوط محچينه شي
بس نظراته الحقيرة محاوطتني
دخل الممرض بقى يتناقش ويايه
وسألني
-دكتورة رحتي لأبو المخدرات
-رحتله تدري محاول يفتح شباك الحمام
حتى ينهزم تخيل من الطابق الرابع
-الشرطة بالباب هسه راح يطلعو
-خل نخلص الطابق فوضى بسببه
-تعرفين دكتورة مدخليله شرطي
متخفي بملابسنا ومسولف وياه
ومحاول يبيعل مخدرات
-هيچ نماذج مكانها الطبيعي السجن
اني اشتغل والممرض ويايه كملت وحاچيته
-محتاج شي
هزلي راسه لا بس رافعلي حاجبه مستهزء
تجاوزت نظراته وطلعت بحدود ال١٢ راوند
العلاج الثاني رحت طلعتله
الاكل اللي وصيتهم مجهزي
حتى يبلش بالاكل اللين
وصلت باب غرفته الامة محترگة
عسكر ورتب وشباب وكبار
شي گاعدة وشي تسولف يادوب فتت
بيدي العلاج والضماد واحد رافعلي
حاجبه والثاني يهمس للبصفه
وواحد يگله
-عمي حقك ماتقبل تروح لغير مستشفى
هنا العلاج طبييعي حيييييل طبيعي
ماعرت كلامهم اهمية وگفت يمه
-المحاليل راح تنرفع هسه وراح اغيرلك الضماد
هز راسه سند نفسه عالسرير
صرت قريبة منه سمعت صوت ضحكة
فلتت من
-سامعة شيگولون
باوعتله مستغربة همس وعيونه تتلاعب
بنذالة
-النسوووان الحلوة تموووت على
لمة الزلم حواليها مثل بيبيتچ
بلا شعور شلعت الضماد بكل قووووتي
وباوعت للحواليه كلامه ميوصللهم بسبب الهوسة
عليت صوووتي
-لوووو سمحتو اولا التدخين هنا ممنوع
ثانيا الغرفة مكتضة واساساً وقت الزييييارة
خلص من ساعة ونصصص
اضافة لهالشي المريض تعبااااان يرادله راحة
فلوووو سمحتو بس خل نشوووف شغلنا
نفسة الحيوان الحچه رد
-شبيييك عصبي هاجس
رفعت راسي وخليت عيني بعينه
-تگدر تتفضل بره
طلعو كلهم وهذا يضحك عباله گايله نكتة
التفتت خليت الضماد على بطنه وخليت عيني
بعينه اردله كلامه بحقي
-شووووف هاي الاشكال وماشابه الها
كلهمممممم اللي تگول فرحانة بلمتهم
حواليه هالنماذج كلهم مااشتريهم
بكعب حذائي
اما انت فالجهل شي بشششع جدا بشع
ورمي المحصنات بالكلام رايح جاي
حرااااام هاي اذا انت تعرف الحرام
باوعلي وعيونه جدحت
-صاااااارن عليچ ثلث نقاط
- ومستحييييل نتعادل
حضرة النقيب شغلي يمك خلص
وراح اتصل بدكتور نوح يتولى هالمهمة
طلعت وصوت كلمته رن باذني
-القرچ
الحيوووووان الحقييييير طلعت احس
جسمي بكامله يرجف من القهر اسلوب
سز وكلام مثل السم گالت بيبي تربية
عماتهم المسمومات اللي بكل مرة
اشوفهن يشيلني بنظراتهن شيل من الگاع
بسبب كلامه واسلوبه الفج
مرحتله بعد وممرضة تولت الشغل عني
للستة انطيت علاجه لغير دكتورة
وكملت شغلي اتصل بيه ب١٢
استغربت ومارديت اكيد يستفزني
بحقارة شويه ودخل الممرض
-دكتورة اخو دكتور نوح
مدري شبي
ركضت للغرفة لگيته بسريرة وجهه شاحب
متعرق فحصت حرارته نااااار عيونه جاحظة
بألم ويلوب
-شتحس عندك الم
يبلع بريگه ميگدر
يحچي
-هاااااجس بس جاوبني الم ببطنك
مكاااان العملية امعائك
-لاااا
گوة نطقها
گالها وغمض ميگدر يحچي
بسرعة فحصت رجلي وارمة
المنطقة تحت السرة قوية مثل كرة ياااابسة
ركضت للغرفة اتصلت بالاخصائي
نص ساعة وصار يمه بس سأله
-متدرر ادرارك طبيعي
-من البارحة مااگدر
-وقبلها
-بصعوبة بس گالو عارض للعملية
-جهزووو للفحص للسونار هسسه
خلينا بكرسي متحرك ومشى الممرض
بي للفحص طلع فحص السونار
وطلع يدفع بي الممرض والدكتور يحچي
ويه الممرض
-للعمليات خليله قسطرة بالبداية خل يتصرف الادرار اتصلت بدكتور ياسر ساعة وندخل عمليات
مشيت وياهم وهو حاني نفسه عالكرسي
بتعب
-اتصلي بنوح
-اتصلت هسه جاي بس مسافة الطريق
دخلة الممرض للغرفة يخليله القسطرة
سمعت صوته الچان ضعيف ارتفع بصراخ مؤلم
القسطرة تدخل بصعوبة احتمال بسبب الورم
اني بره اخذت ملفه وشفت النتيجة والتقرير واضح
اصابة الضفيرة العصبية الأعصاب الي تتحكم بالوظائف الحيوية بمنطقة الحوض
تمر قريبة من الأمعاء والمثانة
واثناء العملية متعرضة الاعصاب للضرر
اضطراب بتصريف الادرار بشكل طبيعي
تجمع السوائل بسبب ركود الدم وتسبب
تورم والم تتطلب تدخل جراحي
عاجل
نص ساعة ووصل نوح خايف
شوفته الملف غمض عيونه بقهر
دخلناله يتعرق بجنون ووجهه زايد شحوب وميگدر حتى يحرك ايييده
-هااااا يابطل
-نوووح مااگدر
-سهلة شغلة ربع ساعة وترتاح
واحنه نحچي اجة الممرض
نقلنا بالكرسي لحد مادخلو غرفة العمليات
ونوح يمي
-ماگلت لجدي تدرين طلعت بدون علمه
-ليش هسه يلا بينت الاعراض
-لا چانت بدايات والدكتور وضحلي
وضفتله علاج الادرار ويه علاجه
وبقينه ننتظر
ساعة ونص وطلعو
الدكتور بقى يحچي ويه
نوح وحفاظاً على خصوصيته ابتعدت
من وجه نوح واضح العملية جانت صعبة
اطمأنينه علي بعد ماصحصح ومد لسانه
شبه متخدر ويجيب بالكلام ويودي
-بعددد شيلولكم چلوة مني وحطولي بمكانها
نعااااااال شخلييييييتو بيه
انتتتتتتت مو دكتوووور متشوووف بطن اخوك
گالها وهو يباوع لبطنه باستصغار وكأنه ينتقم من ضعفه الفات رد علي نوح يضحك
-متفيد اخذنا گلبك وحطينه بمكانه طابوگة
بلكي تصير احن
-حطيتو طابوگة حتى مايحن للگو**د
خوووووش اطبااااء قناااادر
باوعلي وهز ايده بلايه روح
-اني شايلين رئاتي
وانت خنگتينه بعطرچ مننننين جاااايبته
من بسطية حاجة الف
باوعلي نوح باعتذار
واني انربط لساني للحظة بس سرعان ما استرديت قوتي وجاوبته
-عطري يخصني وإذا يخنكك فهذا دليل عدم ذوقك ودليل إنو رئاتك تعودت على ريحة البارود والدم
خله راسه عالمخدة وغمض بس گال
-الميدان للسباع والچن البيت ياقرررچ
باوعت لنوح وگتله
-مادام مد لسانه اخوووك ماعلي شي بعد
الحمد لله على سلامته
تركتهم وطلعت بما ان نوح موجود راح
يستلم علاجه اليوم خلصت شغلي
وطلعت للبيت بس كلمته لهسه قاهرتني
وتدگ براسي مااعرف ليش بحت بالموضوع
لبيبي بعد مانامت ماما حچيتلها كل شي
- مامقصرات الحياية
غييير طلعلهن علي سمعة عود انا
رايدة جعفر
-جعفر منو
-رجل اخت سهاد حبوبة هاجس المسودن
شبيييييج اخو صادق رجل خالتچ سهامة
-يااااااا
-والله هاي وعود هن صغار مايدرن
وماملحگات علي بشبابي بس امهن علمتهن
وردن ذبن سمهن على امچ عود رادت كمال
وردن عادنها رجل ميعاد من راح تعذر لأمج
بالدائرة حتى يسد السالفة وغييرها وغيرها
وهي امهن الله يرحمها اجت برجليها
لأميرة تگلها هسه تاخذ رجلچ منچ واميرة
طردتها من هاي هالگالج هيچ
-شلووووون بيبي شلووون يحكم بدون مايعرفني
-يابيبي اكو مثل يگول لا تحچي بگطع
والجهال گعود
الكبار ترحل والجهال تعود
وهن امهن رضعتهن الحقد من هن بالمهد
وانا لا حولهن ولا يمهن وهن ورثنا للوليدات
چيف ربو يمهن
-بس بيبي زلم هسه كبار مو صغار
حتى يصدگون كل شي
مو نوح اختلفت ويا مرة مرتين وبعدين اعتذر
-نوح مرتب وفاهم
-وهذا هم چبير
-وجده هم چبير ومسودن هو وارث
سوادين جده
-يرحولچ فدوووووة
-اي والله هو وجده المخابيل
ضحكت وحضنتني
-يابيبي خلي الحقد بعيد عن شغلچ
وداوي الوليد مريض
-لا ماعندي شي اكمل شغلي واطلع
ممنطيته مجال
-عفيه ببنيتي معدلة طالعتلي
ضحكت وهي گعدت تسولفلي سوالف قبل
مر أسبوع واني ادخل غرفته ببرود
ارتب العلاج واچيك على جرحه
واطلع بدون ما ارفع عيني علي
اجو عماته وجده وابو وزوجة ابو ووطن
واصدقاءه وحتى بنت صديقه
بكل هالفوضى افوت اسوي شغلي واطلع
وابد ماخليت نظراتي تلتقي بنظراته
مثانته بدت تستعيد عافيتها
وأمعاءه رجعت تشتغل بانتظام
وصار وقت الخروج
الوقت اللي المفروض تنتهي بي مهماتي الرسمية
ويا طلع بوقت خفارة نوح اني مموجودة
چنت بالبيت ادرس على تلفوني ودگ
شفت الرقم وسحبت نفس طويل كأني
استعد للمعركة
- نعم تفضل
گلتها بنبرة باردة جامدة
-اعتقد ان لازم اشكرچ
صوته جان هادئ وساكن
وكأنه متصل اسقاط واجب
- تعتقد
-امممم
سكت شويه كأنه يستمتع باللي يگوله
حسيت بالاستفزاز وجاوبته بحدة
-عالعموم هذا واااااجبي وحتى لو چنت دكتورة بيطرية هم راح اؤدي ذات الخدمات للحيوانات المصابة فماكو داعي للشكر
ساد صمت مرعب عالخط لدرجة عبالي انگطع
بس فجأة سمعت ضحكة خفيفة باردة ورد بتوعد
مبطن
-تمام تماااااااااام الأيااااااام هووواي دكتورة والحيوان المصاب من يطيب
أول شي يسويه يطلع مخالبه
لا تنسين هاي المعلومة
- اوك
گلتها وغلقت الخط بسرعة اني صح
غلقت الخط بس فتحت على
نفسي باب ماااعرف نهايته
خييييير
او
شر
:
طلعت من زنزانة ذاكرتي
واجاني صوت التلفون دگ ورقم
عرفتة مكتوب
جاثوم هيچ رجعت سجلته من صار جاثوم
يزلزل صحوي ونومي رفعت الخط بتعب
وباغتني صوته يدندن لأبو بكر سالم
-ماعلينا ياحبيبي ماعلينا
من كلام الناس ماكنا درينا
لو يقولوا عننا مهما يقولوا
انتهينا عاد نَحْنَا إلا بدينا
كل كِلمةْ حب نحييها معانا
كلمة العذال نرميها ورانا
ما يهزك ريح يا مركب هوانا
طول ما نحنا على بحرك مشينا
وكأنه يحاول استجداء عاطفتي بأغنية
چانت بوقت ماتجمعنا
غصت حنجرتي بمرارة
شلون يغني للحب الشخص نفسه
اللي زرع بدربه شوك والغام
قطع الغناء بآهة محملة بحسر وسألني بنبرة
مليانة اشتياق
-مرتاحة ليل
گلتها وبسبب كذبي الكلمة طلعت من بلعومي مثل
گزازة حوووافها جرحت اوتاري
-الحمد لله
-العملية تأذيچ
-لا الم طبيعي واخذت العلاج
-محتاجة شي ادزلچ فلوس اجيچ
-لاااا
هنا ماتحملت البس قناع الراحة
وگلتها بوجع هز اركان رووووحي
-ليش صوتچ هيچ تعبان اذا مو حاسة
بوجع
گلتها وأنفجرت باچية
بچيت وبچيت وصوته يحاول يفهمني
ويهدي عاصفة شعوري
-اجيچ اخذچ بس گليلي شتردين والله تلگيني
يمچ
شهگت بمحاولة اعدل انفاسي المضطربة
-اييييي نسيني الخذلان
لأن كل شي نسيته
الزعل والسكووووت والاهمال الا الخذلان
وصدمتي لأن چنت أعتقد
ان گلبي وياك محاوط بأسوار أمان
بس الصار عكس نسيت ابواب مشرعة
لريح زعزعت حتى ثقتي بنفسي
كل يوم اسأل نفسي شلون هنت عليك
أساساً شلون گدرت تسويها واني اللي
سنة حب وسنه زواج ماقدمتلك بس دفو
تجازيني بأذية
-لا ينكسر صوتچ
هيچ بسببي والله مو هينة عليه
-صوتي مو مكسووور صوتي
جف من گد أبتلاع العتب والكلمات اللي ماگلتها
-سنة مرت ليل اعتذرت بيها الاف الاعتذارات
ولازلت وراح أعتذر غلطت ماتصورت
الامور توصل بينه هيچ
-صححت كل غلط سووويته
رجعي ليل وانسيچ
دموع السنة الفاتت وتعبها
والله العظيم أعوووضچ كل شي
-دموعي هي الحل الوحيد حتى ما انفجر
الدموع هي محاولتي اليائسة حتى أغسل
أثر الخيبة التي تركتها بداخلي
-رجعي لحضني ليل
وخل ننهي الزعل
خل نبدي مو نكمل لاااا نبدي
من جديد
-والذكريات شلون امحيها
وصوررررتي واني منتظرتك
وكلمتك لازالت ترن بذاكرتي
واني أسألك وييينك هاجس منتظرتك قصص ماي هوبس
مو البارحة گلتلي انتظريني
چنت منتظرة منك كلمة تنهي مشاكلنا بس الصار سوووويتها انت وذبحتني بسچين عمية گطعت اوصالي بلا رحمة ردك وانت
تحرگني
-رووووحي ليل روووووووحي
-يعنييييي انت جاي تسد باب
الحياة بووووجهنا هاجس
- وأسد بداله عشرررر أبواب
إذا شفت بفتحهن ذلة لـنفسي
أبيع الدنيا واللي بيها
ولا أشوف كرامتي تنهان بلحظة
-حتى لو الثمن اني
-اعتبريني بااااايع
:
:
شهگت باچية وهمسلي بقهر
-ماراح تنسين
-النسيان نعمة للأخطاء العادية
أما أنت فصرت سبب أستعيذ منه كلما فكرت أثق بأحد هاجس أنت علمتني شلون ممكن تقدم
ثقة لشخص وترجعلك نار تحرگك
-ليل
-نعم
-الصار لهاجس وعذبة مايتكررر
واني مرجعچ مرجعچ حتى لو
غصب عنچ
غلقت الخط بعد كلمته اللي
گالها بتحدي
وتراكمت غيوم
الحزن بصدري تحثني
عالاختيار
اما البعد
او البقاء
