رواية الرجل الاخر الفصل الثاني عشر بقلم جوهرة
فارس انطى خبر لديمه ، بيت خاله راح يزورونهم يباركوله عالزواج رغم خاله اخذ على خاطره لان ما خبره بزواجه
قبل يوم جانت عمتها وبناتها زاروها وباركولها اجو عصرية خطيه البنات جايبات هدايا وعمتها انطتها فلوس على اساس صايرة خيرة كدام فارس وهي لافطه اربع ملايين منه والله هالفارس مدري شلون يتصرف فلس احمر ما انطيها ابد متشبع طماعه
ديمه / مو المفروض يعزموك على اساس متزوج اشو بالعكس صارت !!!
فارس جر نفس من النركيله وذبه وهو يراقبها كاعده كباله حاطه رجل على رجل والشعر رافعته وخصل نازله على خدودها من كثر النعومه / اني عزمتهم ، خالي يريدنا نروحله لبيته ، هسه شتردين مسواك لو اجيب من المطعم
ديمه حست جاي يختبرها / كل الهلا بيهم بعدين عليش جايب من المطعم اني اسوي الغدا
ضيك عينه / اي بيها الخير وعددهم ٨
ديمه / هلا بيهم راح اسوي دولمه وكبه لازم ابلش من هسه يلا اكدر ادبرها
كمت للمطبخ اشوف المجمده همزين لافة كبه قبل يومين بس اسوي الدولمه عدنا لحم مثروم طلعته يفك بس ناقص مواد الدولمه خل اوصي يجيبهن من السوك فتت للهول سمعته يخابر ويضحك
بقيت واكفه اسمع مو لان فضوليه لا لان شميت ريحة نسوان بالسالفه !!!!!
فارس / هسه الا باجر خرب ببليسك وين تسوون الكعده ، اهااا لا يابه وين البستان مالتي محد يدخله منكم
ههههههه عاد حلوات يسون لو جكمات ....
لعد غير مره اجي اذا بيها صاكات
ديما لطمت على خدها بحرقة / عزا العزاج ديما الرجال راح يروح مني ، اووف من ابو النسوان
دخلت بسرعه شايطه / هااا فارس ابو النسوان طبعا وين تكدر اذا ما تتحرش وتكمكش بيهن ما صارلك اسبوعين متزوج وادور نسوان وصاكات
كمت ارجف رجيف ومقهوره احس فارس راح يطير مني من ورى هالسوالف
فارس فاتح حلكه مصدوم بيها بعدين نتر / شبيج تخبلتي
عاطت بقهر / اي تخبلت ابو النسوان تخرب عليهن.
الدمعه بعيني وبداخلي احجي يربي ليش ماعندي حظ كلت رجال ادمي اكضي العمر ويا يطلعلي يدور ونسات ونسوان ، حاجيته /فارس احلفك بالله لاتقهرني
تقدم علية وحظني من شاف دمعت عيوني والقهر واضح علية
لاول مرة ما ابعده لأن اريده يطمني ويحظني
ويفهمني اللي سمعته جذب
حاوطها بدون اي ردة فعل منها ، ممعقوله هاي ديما ؟!!! والله وعرفت طينتج عبالها مسوي علاقه خل شوي اقهرها..مسد على ضهرها / ليش تقهرين روحج وانتي السبب بعدج عني خلاني ادور راحتي برا بيتي
شهكت وحاولت تدفعه رفعت راسها / وتعترف بعد !!!! عوفني ليش لعد ازوجتني إذا بعدك تركض ورى هالسوالف !!!؟
عافها وراحت كعدت عالقنفه دنكت راسها حيل انقهرت وحست بندم المفروض هو زوجها اداري وتلبي رغبته بيها ذبح روحه عليها وهي تتمنع عنه
بعد شيفيد طار الرجال هواي تسمع النسوان بالصالون يسولفن على بلاوي ارجالهن وبهالاربع اشهر الشتغلتها هناك راسها داخ من التسمعه بقت تاكل بروحها محست
الا فارس يجرها ويحطها بحظنه باسها حيل برقبتها ، حجى وهو يكزكز عليها / ولج اني اريدج انتي شسوي بالنسوان
باوعت بعيونه متفاجئه واريد افهم كلامه هذا صحيح لو يضحك علية / فارس لا تلعب عليه والله مااتحمل
صوتها ونبرة التوسل والحزن البي خلا يحظنها ويشاورها بهدوء / اريدج ديما ميت على حظنج
استحت منه وهي تشوف الشوك والرغبه واضحه بعيونه المسبلهن .
جانت ايده تصعد وتنزل على وركها ممصدك كاعده بحظنه مستسلمه والله غيرة النسوان فضيعه ومسويه روحها تكابر وداكتلي عناد هاي سمعت كلمتين هيج انكلب حالها لعد لو تشوف حفلات الونسه شيصير بحالها.. جابت فايده مخابرة عزام.
فارس / اي ديما شتكولين نسوي اتفاق ماريدج تعاندين ترى ماينولج الا وجع الكلب وحرك الاعصاب واني علية ادللج بالتريدينه ،
لزم حنجها ورفع راسها ، حيل قريب عليها وعينه بعينها المدمعه .
همستله بصوت ناصي / لعد لاتقهرني يوم .
فارس بهمس / بطلتي عناد ؟!
ابتسمت خلته يلثم شفايفها بقوة بس مكدرت تتجاوب ويا استحت منه فارس حيل جريء وهي متكدر لسوالفه .ما عدها الا حسها اختنكت وجها صار احمر خزرها /ليش متبادليني
ماجاوبته بقت عينها عليه يتنفس قوي كام وسحبها ويا / كومي للغرفه .
ديمه باعتراض / فارس ترى مو وكتها روح جيب مسواك العزيمه وبالليل ادلل
لزمها من زندها بقوة / ولج اني جدي اشتعل وهي تكلي بالليل
سحبها ورا للغرفه وهي تسحب بروحها / فااارس عليك الله مو وكتها يبوو
فارس مجان بحاله يسمعلها طفى ناره الهايجه حس بتجاوبها ويا وكدر يخليها تخضعله متفاجىء بيها طاوعته ، سيطر عليها وهذا الشي خلا يرتاح اخيرا
ورى فترة ديما لافه روحها بالغطا وفارس حاضنها / كومي نسبح واطلعكم للسوك
ديما باعتراض / تعبانه مالي واهس
ضحك واهتز جسمه اللي حاظنها / ههههههههه ترى بعدني حباب وطيب ممشوفج
الوحش البداخلي ضمي حيلج للجايات.
لفت جسمها عليه وصارت بحظنه قريبه حيل عليه فاتحه عيونها الحلوة / ياااا تحجي الصدك فارس لاتبالغ عبالك السويته قبل شوي قليل
كور شفايفه وتنهد / خبلتيني انتي غير شكل من جنت اشوفج بالشارع انجن عليج ...مد ايده ولمس شفتها المنفوخه لمسها بحنيه / ديما جنت مقرر ازوجج فترة كلت هاي رغبه ازوجها فترة اطفي ناري واطلكها ،،،،،اشششش خل اكمل لاتحجين ...
بس من صرتي بحظني اول مرة لمستج بيها كياني كله تخربط وانصدمت من طلعتي ارمله اخويه وعبودي دمي يجري بعروكه
هذا الشي اعتبرته اشارة من رب العالمين انو استمر بزواجي منج وهذا الشي حقيقة بحياتي مراح اتخلى عنكم ، ديما لاتبعدين عني اريدج اطيعيني اني وياج
واحد اعرفج عنوديه بس زواجنا لمصلحتنا كلنا
رجع باسها بخدها وهي مفهيه عليه / اااخ ولج لاتفهين هيج تخبليني
ديما بداخلها تحس براحه لان لمست حنيته عليها بس الحب ممتاكده من حبها ولا حبه الها واكيد الايام تثبت مشاعرهم .
العصر طلعوا للسوك مقبلت تروح ويا بس قنعها لان يريد ياخذ عبودي وميريد يعوفها يريدها وياه
صلوا العصر ديما بدلت العبودي الجان كاعد من النوم ومن شاف فارس مبدل يفتر بالبيت خبص روحه / بابا باي
فارس بحنية / تعال حبيبي ..شاله وباسه من خده وعضه خفيف خلاه يعقج وجهه ..اواا بابااا
فارس / هههههه اووف فدوه لعبد شلون حلو راح اسويك همية ...
يكزكز عليه ومخلي راسه بطن عبود الفغر ضحك.
ديمه دخلت / يلا هاي هي نطلع
التفت عليها حجابها مرتب ومضبوط مكياج حيل خفيف ولابسه جبه كابوي سمائي هو اشتراها طالعه اجنن بيها تدري
ميقبل الا جبه لو فستان واشترالها كل الملابس على ذوقه رغم اعتراضها متكدرله اللي براسه يسوي
حجى ويه عبودي / ها بابا شوف الماما شلون طالعه نخليها بالبيت خاف يحسدوها خطيه
عبودي عبالك يحس يحجي على امه جر لحيه فارس ويصيح ماما ماما
فارس / لك هااا ،، لحية بابا ، كلاوجي شفت امك وكلبت علية هههههه.
صعدو السيارة بعد ماقفلت باب البيت .
ديمه / فارس جيبه بحظني يضوجك بالسياقه.
فارس / متشوفي شلون حاضني وخاتل عندي
طلعوا للسوك كاللها راح اشتري مخضر وفواكه بعدين يرحون مول يريد عبودي يتونس بالالعاب.
ديمه /
ما اعترضت احب تصرفاته ويه ابني عبالك ابنه الحقيقي ، فارس واضح باسلوبه الايام العاشرته بيها خلتني اتعرف عليه اكثر ، ميحب يلف ويدور بالسالفه من النوع يحجي اليحس ويشعر بي واذا شي معجبه ينتقده واهم شي معاملته لعبدالله يتفكده ويشتريله ملابس والعاب ، يكفيني يحبه ومتعلق بي بعد شاريد أكثر من هيج اب ، الحمدلله الله رزقني رب العالمين رجال مثله لان ابني محتاج هالاب بحياته وبعد الصار اليوم بيناتنا خلاني
ارتب افكاري حتى تنجح العلاقه بيناتنا ، التفتت عليه اراقبه
لابس نظارات ماركه طالع ايجنن شكله وسيم ورجولي حيل ، طول بضخامه بس مرتب واللحيه السودا يخالطها شيب قليل مرتبها ومحددها ، فارس عمره نص الثلاثين عنده حيويه بكل شي وروحه مرحه
اشترينا الاشياء المحتاجينها وبعدين دخلنا مول وبقينا نفتر بي طلبت يأخذنا لغير مول كال ميخالف خل نفتر هنا شوية وبعدها نطلع
بقى مركز بوجهي واكد علية / اخذي اليعجبج وشوفي شمحتاجه
اخذت اللي اريده انطتهن للبنيه كصتلها وصل بيهم عاد فارس دفع الفلوس
سالني / ليش ماشتريتي بعد
ديمه / صراحه مو هلكد ملابس
قليلة ااا يعني اذا بيها مجال نروح جرمانه لو البرنسيسة عدهم شغلات حلوة
فارس /
ابتسمتلها لان احبها تطلب اي شي ماريدها بعيده ومخليه حاجز بينا اريدها معتمده علية لأن صرت احب وارتاح احققلها هي وعبودي اللي يريدونه / صار هسه نطلع هياته مو بعيد المحلات خمس دقايق بالسيارة
فعلا أخذنا واشتريت شغلات حلوة احتاجها خاصة بعد ما صارت علاقه بينا حبيت ادلل روحي ،، جمعتهن كم علاكه رفع تك حاجب ومبتسم ياشر عالعلاليك / ها خوش قطه
هاي هههه
تقربت عليه وشاورته / غير حتى ادللك
فارس /
من تقربت علية وهمستلي بصوت يادوب سمعته ، صفنت بوجها وگلبي زادت ضرباته فعلا احس بشعور كولش حلو لان تريد ترضيني واليرضي فارس ويسعده
احطه بنص گلبي واشبعه دلال وديما مبينه تريد رضاتي وجاي تتقربلي
دفعت الحساب وطلعنا بالسياره سالتها واني تلتفت اريد تطلع عالشارع / بعد وكت للعشا تردين مطعم لو ناخذ سفري للبيت .
ديمه بود / كيفك انت
التفت ابتسملها ورجع ركز بسياقته / امشي للمطعم اعرفه خوش مطعم وحتى احجز على غدا لباجر
ديمه مستغربة / مو على أساس اسوي الغدا عليش حاجز من المطعم
مد ايده وسحب ايدي جنت حاضنه عبودي الكاعد هادىء ، ضغط عليها / اريدج تتفرغيلي لاتعبين روحج كولشي يجيج جاهز يعني نرجع تلتهين بالدولمه وتعوفيني ؟!! بالله هذا حجي !!
ديمه / ياااا والمسواك البسيارة .
فارس بضحكة / هههه شكو عليه بالثلاجه حطي
تدري بي جاي يتقربلها ويبينلها اهتمامه وهي مو غبيه حتى تدفر النعمه لا ذكيه وعلى هالذكاء تتصرف تكسبه الها ومن هاللحظه قررت تكسبه ، ردت بصدق واضح / صار شتريد اني راح اسوي ادلل
التفتلها انطته ابتسامه حلوة
رد عليها بضحكه / هههههه تعجبيني ديومه .
،،،
كعدت الصبح من وكت وقتت الموبايل بالسته الصبح ، سبحت وصليت الصبح لأن فاتني وقت الصلاة ، فارس نايم مرتاح التفتت عليه
واني تمشط شعري ابتسمت ويه روحي واني تتذكر ليله البارحه فقد علية ، تنهدت براحة وعيوني تحاوطه
عفت شعري محلول وطلعت على كيفي ماريد اكعدهم ، البيت اصلا مرتب ونظيف بس هم خليت ايدي بي ، الطبلات والفازات وعلكت المبخرة الكهربائيه ذبيت بيها جم كسرت عود بخور حبيت ريحته لكيته بالمجر ، فتت للمطبخ اسوي ريوك اليوم فارس ميروح للمعارض فعلى راحته يكعد
باوعت الساعه ٨ سمعت صوت عبودي اخذته اغسله واغير حفاضته وملابسه بوسته بخدوده وهو يضحكلي الفطير
كاعده عالقنفه ترضعه وايده بصدرها هاي حركته ميبطلها .
فارس / صباح الخير
ابتسمت بوجهه / صباح النور
بقى يباوع عليها وغمزلها استحت منه
حك راسه وكال / اروح اسبح واصلي متجين شوي بالغرفه.
ديمه فكت عيونها / فااارس الله عليك وكتها هسة.
تقربلها وطخ جسمه بركبتها جانت متربعه وعبودي بحظنها وتنهد وهو يكول / والله وكتها بس يلا شنسوي عاد بوسه
تصبيرة .
ديمه مبتسمه بخجل / يوووو ابنك كاعد وعينه عليك
سحب ايد عبود وباسها ورجع باس ديما بخدها ورد بكل صدق / احبج من تكولين ابنك
باوعت بعيونه / ممبالغه اني فعلا احسه ابنك
فارس / راح افوت اسبح واصلي ريوكج حاضر .
ديمه / حاضر بس روح اسبح .
فارس / اااخ فايت يابه على كيفج ..عضلها شفته وطلع .
،،،،
العزيمه تبيض وجه ممخلي شي قاصر صياني الكباب
وصينيتين كبار تمن ولحم والمقبلت والعصائر والحلويات بيت خاله كولش حبابين خاصة مرة خاله
ام رافد راسا اخذت عليها سوالف وضحك عدهم اربع
بنات وولدين البنيه والولد كليات والبقية اعداديه ومتوسطه عدهم بس بنوته صغيرة عمرها ست سنوات ماتت على عبودي تلاعب بي وهو مكيف عليها .
طلعوا يتشكرون وخاله رجع عزمهم .
ام رافد وصتها على فارس تهتم بي لان وحداني كضاها بعيد عن اهله وخوانه المايرتاحلهم .
ـــــــــــــــــــ
من دخلت ملاذ للشقه شافتها صغيره بس مأثثه بذوق مبين ذوق رجالي واللون الغالب بني وكريمي
حتى السجاد الوانه مقاربه لالوان الشقه صاله مفتوحه على تلث غرف وحده منهن شافتها مطبخ
واكيد البقيه غرفتين النوم هاي والصحيات بممر على جهه
سالته / وين الغرفه الانام بيها
مرت بجانبه التفتتله / لازم ترتاح اكيد كعدتك بالسيارة اذت ظهرك
باوع بعيونها / خايفه عليه ملاذ لو جاي اتخيل
ملاذ / اتصرف كطبيبة واكيد تهمني صحتك
رفع تك حاجب / خسارة عبالي مهتمه.
ملاذ /
عفته ودخلت الغرفه كضيت وكت ارتب ملابسي بالكنتور كملت وبديت افتح الباب الثاني فتحت الباب وانصدمت بملابس رجاليه وبدلات عسكريه سديته بقوة وطلعت لنشوان
لكيته بالمطبخ مرتجي عالثلاجه يشرب مي
تغافل ميريد يشوف نظرة الغضب بعيونها حجى بكل برود / الجو مبين حار اليوم اكيد الصيف راح يجي فجأة احنا ربيعنا
كصير
ملاذ /
تقربت محتارة واي اشوفه ينزع حذائه كوة لان صعبه يدنك ضهره ، بعده اصابته خضره جان مبين التعب عليه او يتظاهر حتى انقهر عليه لااااا هاي مو عيشه ، رحت للكنتور وجريت ملابسي بعصبيه / راح اخذ الغرفه الثانيه المفروض تحجي مو تعوفني ارتب الملابس تالي تطلع غرفتك هذه !!!!!
عقلي طار من كال / والله خاف اصدمج الشقه بيها غرفه نوم وحده لان الغرفه الثانيه فارغه بس الحياطين وتلكيها متربه .
ملاذ من سمعته هيج حجى كبت خبالاتي الجنت كوة مسيطرة عليهن وعطت واني اشمر بالملابس بالكاع / تنت اكبر خبيث شفته بحياتي خطتك كاشفتها تريد تجبرني ابقى وياك لااااا والله متوهم ماخليك تلمس
شعرايه مني افتهمت .
غمض عينه يحاول ينام ميريد يرد عليها سمعها تحجي وركعت الباب حيل ، مزاجه ميسمحله يحاجيها مرهق مرهق لدرجه يريد بس يحس براحه .
ملاذ /
كعدت مكرفصه عالقنفه دماغها مشوش يربي شلون اكضي ايامي ويا بهذه الشقه عضت شفتها بقهر متريد تتخيل الراح يصير وحدهم وهدوء وغرفه نوم وحده لاااااااااا ابداااا مراح يلمسني انام عالقنفه ، بعدين هو بعده مريض ميصير هيج افكر
يصير خير يا نشوان.
