رواية في ذمة الغريب الفصل الثاني عشر 12 بقلم كنوز

أمس بليل مدري منين 

مهرة مسودنة و تركض 

نست حافرها.. بـ صفاحي 

أمس مامش  عظم ظل بـ 

الروح صاحي 

:: قسيم موش احجي وياك شبي غفار شگالك.. جاين مو 

:: يگلي جيب مستمسكات سجدة و بطانية...مستمسكات و بطانية ..... وتعال للمستشفى 

بهت بمكانه يكرر اللي سمعه عبالك الكلمات أكبر من ان يستوعبها عقله ،،أكبر من ان يفهمها منتظر احد يشرح اله يفسر اله هذا الكلمات القليلة بس ثگلها ع گلبه طاح

حسّيت روحي تنسحب مني. بـ لحظة واحدة… 

نگطعت أنفاسي أسمعهم يحچون بس الكلام بعيد، مثل واحد يحجي بوسط الماي، ،،كلشي بيّه رجف وحتى گلبي حسّيت يدكَ دگة مو طبيعية  عبالك يريد يفلت من بين ضلوعي 

اعاين لقسيم مد ايده يرتجي ع حايط مهدود حيله و جدي جدامه يستفسر منه يريد يفتهم وهو يكرر نفس الكلام 

إصالة :: قسيم عمة عيانلي شمالها سجدة ما گالك شبيها 

أخذ منها الكلينس مسح خشمه بعصبية وصعد لحجرة سجدة يدور بالجرارت و الجنط ع هويتها وكلنه صعدنه ورا وكلما يدنگ راسه خشمه يجري دم 

قسيم :: الخرا جانت هنا حاطتها وين راحت 

صاح بعصبية كضته عمتي إصالة من ايده كعدته ع طرف الجرباية رفعت راسه بيدها 

إصالة :: براءة شوفيها بالجنطة السودة بساعج

براءة :: غير افتهم شبيها ليش يريد الهوية و... و بطانية يعني شني 

2 ت

قسيم بينه وبين الجنون شعره عبالك حاطين فوك صدرة صخرة جبيرة و يضغطون عليه بيها يخنگونه أكثر وأكثر و يكسرون ضلوعه ضلع ضلع وهو عدل... صاح بنفاذ صبر 

صفن تالي كلامه هز ايده بوجع سد الاتصال... العلاقة بين وبين سجدة … ما چانت واضحة للعيان 

دوم صوتهم عالي دوم يتعاركون على أتفه الأسباب. كلمة منها تجر كلمة منه

اللي يشوفهم شلون واحد بوده يذبح الاخر يگول هذول اعداء موش اخوه 

بس اللي بين السطور و يربط بين الگلوب شي ثاني 

أول ما يرجع يصيح اسمها

أول واحد ينتبه  لو غابت.

يضايقها و يضوجها توصل لطگ بس اذا احد غيره سمعها كلمة يگلب الدنيا ع راسه

صاحت رحمة بيدها الهوية 

:: هاي مو هاي 

تلگاهم علي بس عرف الموضوع بي سجدة ركض صعد وياهم هي السيارة ماشية...واني وراهم اركض  بلا عباية بطرك دشداشتي اركض حافية 

ماعرف شني اريد ما ادري بروحي شجاي اسوي عبالك نار واجه بگلبي من جوه لا بيه الوحها واطفيها ولا هي تطفى صرخت 

:: قسيم اوكفلي اروحن وياكم لا تعوفوني 

ما سمعني شغل السيارة و راح بس العجاج وراهم اجه جراح حجه وياهن ينشد شكو ما وكفوا اله 

من شافني اركض و اتعثر اجاني نزع قمصلته بساع ذبها ع راسي غطه شعري جي حجابي خرط من راسي واني وكعت ع كاع

جراح :: ولج شكو شصاير ليش طالعة بهل حال و قسيم شماله بنته بيها شي 

ريگي يبس كوه الفظ الكلمة عبالك واحد  صايم نهار بلا موعد إفطار.. لا اذان... لا لليل صيام مستمر ماله نهاية 

هي كلمة بس اااخ يا وزنها وثگلها ع ابن آدم ومن يگلولها ع عزيز اله چن حروفها سيف و تحز بوريده 

گال و العبرة خانگة صوته  

جراح :: اشش لا تحجينها مابيها شي ما بيها انا احسن لو صار الها شي 

رجعني للبيت و اخذ سيارته عمي ابو طالب ما خلى يسوق صعد هو بمجانه و جراح يمه كعد وجه نگطة دم مابيها تكول ذابحينه من الوريد للوريد 

عنبر :: فارشة الزولية ع صبه و اغسل بيها  رجليَّه جمدن من الماي البارد الغراب فوگ كيبل الكهرباء ينغط و الجلب مگابل بيوتنه و يعوي 

وكل شوي اطلع اهفه بحجارة و يرد الله يستر من الجاي بس 

فزيت ع صوت صريخ براءة تصرخ بصوت يخمش الگلب ذبيت الصوندة من ايدي جريت عباتي 

من الحبل حطيتها ع راسي و طلعت اركض ويا ما فتحت الباب شفتها گاعده بعتبة الباب تجيب تراب و تذب ع وجهه وتصيح 

:: راحت أخيتي ولج عنبر لحكيني گلبي يوجعني والله روحي أحسنها تريد تطلع 

تصرخ و تزلغ وجهة بثنين اديها و تملش بشعرها انقبض گلبي اخافن انشدها حتى 

::  ياهو مات ولج شو عاينلي 

شكت زيجها مفرفحة روحها تروح هيج وترد هيج مثل طيرة و الصياد صوبها ابنها ما تعرف شنهي تسوي 

:: ولج ما ادري غفار يكول بطانية يعني ماتت مو ماتت.. لاا أخيتي ما تعوفني لااا شلون تعوفني انا اخافن من دونها 

عبالك واحد و ضربني ع راسي افترت بيَّه الدنيا طنين صار بـ اذني چن گلبي طاح مني اباوع الوجوه ادور وجهه ماله أثر رجعت انشدها اجذب السمعته واتمنى جذب 

:: م م منو گالج امس جنت احجي وياهه كلشي مابيها و غبشة شبگتني گبل لا تطلع شلون تموت 

طلعت جدة عبايتها ع راسها بس و تتوجه ايدها ترجف كعدت يم براءة غطت وجه بشيلتها و تنحب وانا افتر عليهن وحدة وحدة انشدها و لو الف وحدة تكلي ما ماتت ما اصدكها 

:: جدة حاجيني منو گال الكم هل الخبر موش راحوا لنجف هي و غفار اكيد الگال الكم جذب عليكم حتى يحرگ گلوبنه هسه ما تشوفينهم الا رجعوا يضحكون 

محد ترد عليه بس صوت النحيب عالي وانا احوم عليهن مثل طير مذبوح اريد افتهم الخبر كلمن حايره بجرحها طلعت رحمة تركض بيدها كلاص ماي كعدت يم براءة تغسل وجهه 

رحمة :: براءة باوعيلي تره المستمسكات يحتاجوها لان بغير محافظة و يجوز تحتاج عملية الله يخليج اهدئي شوية لا تفاولين عليها 

براءة :: و بطانية گاله  جيب بطريقك بطانية شيسوي بيها 

:: شيسوي بيها يعني غير مريضة و يغطيها لو يعوفها مكشفة الطاب و الطالع يباوعلها 

كضت ايد رحمة بين جفوفها العبرة خانگتها كوه تحجي وكلام رحمة مثل شعاع امل طلع علينه من بين الغيوم السود 

:: انتِ هيج تگلين يعني عايشة مو أخيتي عايش بعدها عليج الله بردي گلبي 

:: اي هيج اكول و گلبي يگلي عايشة بدل النوح و اللطم كومي صلي واندعليلها تطلع منها بسلامة 

بجت براءة خدودها مزلغة تجري دم و شفايفها يابسة مفطرة 

:: كولي يالله براءة وادري مصيبتج جبيرة بس ما بيدنه شي الا ندعي الله يوكف الها بهل محنة هاي ويعديها 

تكوم تروح لشارع و ترجع روحها تلوب وبيدها النقال تتصل ومحد يرد عليها انا اخذت بكلام رحمة اقنع روحي بيه واحاول اصدكه 

رحمة :: استفقدت وجود ترفة مالها حس ولا حركة 

طبيت ادورها بالغرف ماكو بالحديقة مالها أثر اسمع صوت ونين خافت و نحيب من ورا البيت اتبعت الصوت شفتها امددة بالتركمتغطية البطانية وتبجي 

رحمة :: ترفة! 

كعدت يم راسها وهي شالت الغطه عنها وجهه احمر العيون صايرة دم من البجي 

ترفة :: ما احبن الموت انا...والله اموتن ولا عزيز عليَّه  يروح حدر التراب و ما اشوفنه بعد 

:: مو بيدي والله گلبي يوجعني كلش سجدة بعد امي صارتلي ام حتى بوجه ابوي وكفت لخاطري ما اريدن اتيتم مرتين 

:: لا ان شاء الله ما بيها إلا العافية و ترجع الج و گولي رحمة گالت 

رجفت شفتها تناشغ 

:: خل انا اموتن خل ابوي يبقى يطگ بيه و عمار يحبسني قابلة بكلشي بس لا واحد منهم يموت و يعوفني... اكره الموت 

:: ولج بعدج وردة توها مفتحة شسوين بسوالف الموت والعمر بعده كدامج 

لمت رجليها لصدرها تمسح دموعها بطرف ردانها هل البنية القهر ماكل تفاصيل روحها من الصغر 

ترفة :: الموت يوجع.. كلش يخنگ جربته بـ امي هيج فجأة و راحت مني تفرهدت عگب عينها والله ما اريدن اعيشنه نوبة الخ 

عجزت كدام وجعها ماكو كلمة ممكن تكون بلسم لجروحها تقربت شبگتها احاول شكد ما أكدر ابث بيها الامان اللي فقدته هم موت امها والي زاد الطين بله  الاب ماعنده لا شخصية ولا كلمة ورا حاب يمشي و ولا الاخو سند الله يعين گلبها شتحمل من وجع 

بقت تبجي ع كتفي لحد ما ارتاحت و هدأت رجعت لفراشها وغطت راسها 

ترفة :: اذا اجه خبر منهم عن سجدة كليلي 

هزيت راسي الها اي لاحظت هي من تنقهر تنام 

عنبر :: كاعدين كلنا اتصل ع جراح ما يرد لاهو ولا ابوي كاعدين و ننتظر ما اشوفن الا رحاب طلعت وبيدها طاسة مدري شبيها وكفت جدامنه وشالت منها عرفتها حنة وحنت وگامت تملج بـ اديها النوب زاحت الشيلة حنت مقدمة شعرها هم وگالت بنبرة يتخللها الحقد 

تتحنى وعليمن ع وجع بيت عمي و كسرة اخوي ركضت الها شعرها هلسته بيدي و الحنة درتها فوك راسها وشلت صم بيدي اضغط ع حلكها حتى ينفتح و ترسته حنة الها 

عنبر :: اكليها يله اكليها هلبت الله و تنطحلين وتموتين وتخلص هل الوادم من شرج 

ما عفتها الا صارت تشاهگ ثوبها الأسود صار رمادي من التراب كمت اعدل بنفسي وهي گامت تترنح بمشيتها وتصيح رجعت لبيت عمي حاكم براءة بيدها النقال وتحجي بلهفة 

براءة : يعني صدك عايشة عليج الله لا تجذبين عليه عمة 

كلامها مثل نسمة هوى باردة مرت عليه بشهر تموز ركضت استسفر

كامت براءة تركض توضت و سجدت لرب العالمين تتشكره وانا بعد رب العالمين ركضت لصورة الامام علي اتشكر منه وانحب 

دورت ع ترفة ماكو انخمش گلبي لا عمي كزار استغل الوضع و خذها طلعت اركض رحمة واكفة بالحديقة تنكع خبز لدجاج وهنه ملتمات عليها 

:: ماشفتي ترفة وين 

:: هياتها نايمة بالترك.. صدك ذكرتيني خطية گالت بس يجي خبر منهم كليلي 

:: خلج انتِ انا رايحة ابشرها 

ركضت ورا البيت لگيتها مدثرة ونايمة و الجلاب نايمة ليغاد عنها 

:: ولججج ترفة كعدي 

أول مرة اشوفن ترفة فرحانة من كل گلبها بحث لمعة الفرح نعكست ع عيونها 

براءة :: من جنت احجي وياه عمتي سمعت صوت غفار اجه واضح بأذني يصيح و صوته مليان غضب وحروف كلامه ترن بگلبي 

" هي ذبت روحها ع سيارات" 

عرفت ضغط أمي عليها ولد انفجار... جلت بنظري ادور أمي اللي ما سمعت الها صوت لا شفت قلقها ع سجدة 

بهل اليوم أيقنت انا موش كل وحدة تجيب طفل للدنيا تعرف شلون تحتضنه.

الأم مو بس دم ونسب… الأم أمان.. حضن... صوت يهدي الخوف.

بس شلون إذا نفس هذا الصوت صار مصدر الخوف؟

أكو أمهات ومنهم امي وجودهم مثل الغياب كلماتهم تجرح أكثر من  الغريب ونظرتهم تكسر شي جوه ما ينصلح بسهولة.

ومثل هذول الأمهات البت عدهن تكبر وهي تتعلم تخاف… موش من العالم، لا.. من بيتها. تنتبه لكل حركة، لكل كلمة، عبن حتى لو چان الغلط موش منها هي لازم تدفع الثمن 

الأمهات انواع 

منهن درس قاسي بالحياة…

يعلمك شلون تعيش بدون أمان،

وشلـون تبني نفسك… رغم كل اللي انكسر بيك.

فتحت حجرة حجرة ادور عليها لگيتها بحجرتها خانسة اسمع صوتها تخابر بهمس ابتسمت بسخرية اكيد جاي تبث الاخبار 

فضيلة :: اسمع اخافن حجت لغفار الصار انت لا تبقى أبيت اهلك لحد ما اتطمن واردلك خبر 

:: صدك تحجين يمه بنيتج بالمستشفى ما نعرف مصيرها شنهي عمتي إصالة ركضت الها وانتِ ما كلفتي نفسج ترفعين نقال و تطمنين عليها و لا حايرة شلون تأمنين حياة العار 

سدت الاتصال وكامت ترعد 

:: من شوكت تعرفين ولج 

:: هذا همج شوكت و شلون عرفت تردين تبقى سجدة جوه ايدج وايد مصطفى بين الخوف و التهديد تخلونها ترضخ الكم 

:: لا تصرين مثل اختج انتِ الآخرة الولد غلط و رايدها قابل صخمها وعافها و تحجن عليه 

:: بس گليلي من شنهي مخلوقة يمه من حديد... حجر.. انا شايفة امهات لو جاس بناتهن هوى يگلبن الدنيا شو انتِ

:: انتن لشوكت تبقن عوبات وما تفهمن هو بعد أخذها وصارت موش بنت اذا ما قبلت بيه ياهو يقبل بيها بعد عبالج جراح يرضه بيها لو عرف السالفة ياهو ياخذله بنت عايبة 

غلى الدم بعروگي اذا الام هيج تحجي عليها الغريبة شسوي 

:: شريفة واشرف من اهلج كلهم فكي ياخة عنها لا احجي لغفار و... 

قاطعت كلامي ثارت جي مسيت أهلها بالكلام كضتني من شعري لفت كصيبتي ع معصمها فرتني بالحجرة فر اجت عنبر تتلوى وياها تريد تفكني منها 

رحمة :: شفت الدجاجات خطية يصيحن ومحد الهن جانت براءة كل يوم تطلع الهن بواقي الاكل و تنكع خبز 

سويت مثلها الهن سمعت صوت براءة و عنبر طبت تركض الها 

اجيت ادخل وراها لمحت كزار و رحاب دخلوا لصريفة وين حابسين عمار المتخلف فكوا الحبل عنه و رحاب تنفض التراب و التبن الي من ملابسه وتحشم بيه ع اخته 

:: اركض جيبها اسحلها من شعرها سحل و جيبها كاعدة وياه العاشگها جوه سگف واحد الله يعلم شصار و شما صار بينهم 

كلما اكول اني غريبة لازم ابقى ع صفحة يجبروني اتدخل صحت بيها اردعها عن الطعن بشرف ترفة 

:: خافي الله انتِ مره جبيرة راسج متروس شيب وباجر وراج گبر و حساب شتگولين لربج هناك 

:: تردين تقنعي هي يمه وعايفها بحاله 

:: والله اني ما اعرفهم بس ع ثقة أخوية وثقت بيهم ما شفت الشينة منهم ولا رفعوا عينهم ع بنية مو الهم 

فرت ايدها مستهزءة ومن شافت عمار بدا يقتنع بكلامي ذبت نفط فوگ النار حطت ايدها بظهره تدفع بيه صارت ابليس ويوسوس لابن آدم حتى يتركب الخطيئة 

:: ولك تحرك جيبها شمالك تحددت بمجانك شناطر الا اگولن الك بهاي عيني شفتهم حلگ بحلگ هي وقسيم 

نلجم لساني و تعبثر الكلام بداخلي جرأتها ما تنوصف تطعن بشرف بنت كدام ابوها واخوها  وتحلف ع شي ما صاير كزار واكف ع جهة الحجر نطق وهو لا... خلص الجكارة داسها برجله واشر براسه 

مثل الحيوان و ساگوا مشه لبيت غفار واني سبقته ركضت كدامه سديت الباب و زقفلته رحاب كسرت الباب تكسر اصيح لبراءة ماكو اسمع صوت فضيلة تعد عليها دا يتعاركن جوه 

اجت ترفة من ورا البيت وكفت و جسمها وياه كل دكة باب ينتفض مدري شلون عمار شال الحديدة من جوه وفتح الباب كلها 

نمت ع باب كل قوتي دفعها الطمت بوجهي حسيت خدي كله كام و الوجع ضرب براسي جر ترفة واني معرته بيها كل قوتي واصرخ 

:: والله ما تاخذوها ع موتي ما تاخذوها جلاب الا اخلي غفار يشگ حلوكم الجايفة خاصة انتِ رحاب لا مستحه عندج لا مخافة الله عابت شكولج 

جرتني رحاب من شعري بعدتني وخلت عمار سحل ترفة من ايده البنية رجليها بعد ما شالتها وما رف اله حفن سحبها ع تراب يجر بيها 

ما هدتني الا أخذوا ترفة و راحوا طلعت فضيلة باوعتلي بطرف عينها اخذتها عبايتها و انطتني طرة دفعتني لهناك و طلعت... شو ذولة من راح غفار و جدو كلهم نجلبوا معقولة جانوا رابطيهم 

طلعن عنبر و براءة اللي شعرها مكفش وحدها حمر هي مبينة انكتلت هم واني عطت بيهن 

:: وين جنتن اليه ساعة اصيح تعالن ساعدني تالي هذا عمجن هو وابنه أخذوا ترفة و مشوا 

عنبر :: دخيلك ربي هسه موتوها للبت 

كالت عنبر و و براءة لمت شعرها بقهر تلبس بشالها وتبجي بقلة حيلة 

براءة :: علياء موجودة وهي قنعت كزار ما يطكها أمنتها عليها بين ما يرجع غفار ويروح يجيبها من عيونهم 

عنبر :: كعدنه بس انا و جدة و براءة أيدي ع خدي و حسبة تاخذني وحسبة تجيبني و رحمة سوت غدا خطية صبت لحبوبة جي سكرها نزل 

محد الها نفس تاكل بس وحدة كعدت لخاطر الثانية وهم حتى جدة تاكل لا تتخربط ومحد النه هنا اسمع الناس بره تصيح هوسة 

عنبر : : جاي تسمعن صوت صياح لو يتهيئلي 

براءة :: تلكين الفلح تعاركوا ع زرع و الوارد 

اعاين ع خوش شي اسود يتطاير شلون من نحرگ الگصب و يتطاير وياه الهوى 

والسعف كان يطيح مشتعل ع كاع واخذ الزرع الأخضر واليابس وياه... الفلح كاموا يتراكضون خطية 

اجه حيدر يركض صعد الجرار و عزل المشتعل عن البعده ما وصلته النار 

منين ما اديرن وجهي نار برد شته صار لهيب تموز النار بعيدة عن البيت بس لهبها يوصل مثل تنور الحطب وكعت وحدة من النخل وهي مشتغلة اشتعلت الكاع حدرها گريبة ع صهريج صرخت اريدن حيدر يلتفتلي 

:: النار راح توصل الصهريج حيدررررر 

كلها شردت لا ينفجر الصهريج وانا شلت أطراف عباتي تحزمت بيدي مسحاة و براءة... وحتى رحمة فزعت جان رمل شط ذابينه الولد بس بعدهم ما طاشينه

نشيل و نذب ع الحشيش المشتعل نحاول نطفي حتى لا تصل النار لصهريج... من شافونه اولاد الفلح فزعوا ويانه گوم التعاونت ما ذلت... كمزت رحمة تصرخ شايغة روحها 

عنبر :: شبيج ولج شو خل اشوفنج بس لا احتركتي 

تركض و تكمز بوجع كوه كضيتها ساحگة ع جمر وما تدري والنعال اسفنج بساع مايع و جاوي رجلها 

:: بساع ولج خلي رجلج بالساگية خل تبرد 

عفتها يم الساگية و رجعت اعاون براءة اديَّه صارن خيوط بس ما أكدر اذب المسحاة 

واحد من الفلاليح طلع حافظ رقم الإطفاء من اهد ما احترك بيت كزار اجت الإطفاء طفوها 

براءة :: سواد من ما اديرن الوجه... كلشي راح بغمضة عين.. النخل باقي بس الجذوع و الزرع غادي رماد... بعد ما چان الخضار مالي المكان... انتبهت ع من جبران اجه هو واحفاده يعاين بشماته عرفته سواها انتفضت عنبر بوجه الباطل صرخت صرخة حگ

عنبر :: لو بيكم زلمة حوك جا سواها من موجودين الولد موش جاين تطلعون مراجلكم ع بيت بس الحرم باقية بيه 

حجاية الحگ دومها تغث ومن حصرته وماعرف يرد طگاها ع عيونها  و جراها  دفعها جدام احفاده و يحجي وياه حفيده سليم  

جبران :: موش هاي الردتها ولك 

جبران :: أخذها لسيارة اليوم اعقدلك عليها واكسره لخشم ابوها العالي 

گبل لا يتكرب الها سليم جريتها خليتها ورا ظهري

براءة :: وحگ دم المظلوم اللي يترگب الها و يمس شعره من راسها اخلي دمه بطوله اليوم ولا تگولون بنت وما تگدر تگايش ويانه ابوي علمني شلون وكت الخطر اكشر نيابي 

هز جبران ايده مستهزء بيّه وأشر براسه لسيلم بمعنى اخذها وانا ضميت عنبر أكثر وقبضات اديَّه يشدن عليها و رحمة وكفت بوجه 

رحمة :: جان استحيت ع نفسك تعرض بشرف حفيدة اخوك عبالك سبية بيدك هاي عود انت ابن عرب و شيوخ انزعه للعگال احسن انت ما تستحق هذا الشرف ينحط ع راسك الفارغ 

جبران ::  ميلي من جدام وجهي لا اطكنج صواب اعمي عيونج هسه 

رحمة :: اي مو تايهة الك لو طالعة من الكاع ماكو وراي احد حتى تضربني جرب ترفع ايدك و شوفي شيصريلك والله اخلي غفار يحط طلقة براسك  

البت صدك صارت منه وبينه حتى نبرة صوتها الچانت مثل نغمة ناعمة صارت چن لبوة... تقدم الها جبران صدك يريد يطگها وهي واكفة ابد ما اهتزت ولا خافت رفع ايده بوجهه 

جبران :: تميلين من جدامي و تحفظين ماي وجهج لو هسه اخلي الويلاد يطيحون حظج 

بحركة ما توقعتها منها ابد رفعت اديها حطتهن بصدر جبران و دفعته ليغاد وهو جان غافل ما متوقع هيج رد فعل منها طاح ليورا وعگاله طاح من راسه 

رحمة :: شفتهم ما موجودين گلت نسوان ما يكدرون وخل استفرد بيهن بس كل بنية هنا تعادل الف واحد من نسلك الجبان 

گام مغتاظ ينفظ بدشداشته شال عگاله عدله ع راسه واشر  لسليم ومالك ثنينهم تحزموا عليَّه يردون يفكون  عنبر من ايدي ياخذونها 

طلعت جدة بيدها تفكة جدي جرت اقسام وبدون ما تعب نفسها و تحجي صوبت جبرن بيده 

:: الايد التنمد ع البنيات ومامش زلمه تردها انا ابترها جبران 

كض ايده وملامحة تعكرت بوجع نزع شماغة لف صوابه يهدد 

:: هينة علوية نتحاسب ع هاي سوايتج 

العلوية :: و حرك النخل اخلي الويلاد يحاسبونك عليه بس كونك تصير زلمة تواجهم من يجونك ما تشرد وهسه تاخذ جلابك و ترد منين ما اجيت لا اترس صدرك جيلات 

جرت عنبر ورا ظهرها ضمتها وهو عاين علينا بحقد اسود و راح هو و احفاده  نداريت ع عنبر خانسة وجهه اصفر ندهت بـ اسمها اطلعها من شرودها 

براءة :: عنبر 

حجت و رجف فكها و تعثرت حروفها مستهضمة 

عنبر ;: جراح شكد عصبي ما يوم كضاني هيج وطگني 

مسحت ع خدها وين طگها جبران و اعدل بشالها احجي وياها و رغم وجع روحي كابرت و رسمت ابستامة ع وجه حتى اهون عليها 

:: جا تجيبين الشاهين ع غراب البين.. تهدي يجون الولد و شوفي شراح يسوون بيه 

الدمع مثل شذر من الماس يلالي ابياض عيونها 

:: راح اسكت هسه لأجل سجدة بس خل ترجع بسلامة والله الا اخلي ابوي يجيب جبران بنفسه ويخلي يعتذر مني 

غسلنه الها وهي كاعدة تتحكرص كل شوية تكوم تغسل ايدها وين كضاها جبران اخر شي كلمت تطلع ثوب وكالت 

عنبر :: استنجس من ايد جبران راح افوتن اغسل كلي و اسمي بسم الله الرحمن الرحيم همين 

طبت تغسل خطية... وانا حايرة المن التفت ترفة.. عنبر.. رحمة خطية لو جدة تخربطت شادة راسها بالعلگ وكاعدة... دخيل ربي مثل الضباع شافوا الذيابة موش هنا و نداروا علينه كل واحد ينهش بينه من جهة 

إصالة :: بعد انتظار طويل من الصبح وهل جلجل الليل ياله استقر وضعها و بلغونه راح يخلونه ندخل الها... ابوي ضغطه صعد دخلوا الردهة 

و ابو طالب وعلي بقوا يمه ... و قسيم تعارك وياه غفار جي غفار تنزل ع صاحب السيارة اللي دعمها و طرده بره المستسفى 

گاعد ع كرسي الانتظار عبالك ساعة وانكسر الميل بيها هيج وكف بيه الزمن وهو ينتظر يشوفها بخير... غفار حنين ع خواته وع كل البنات كلش حاكم الله يرحمه من هو صغير رباه ع هل طبع 

من شاف جدي و جبران يعتبرون البنت عورة و عار حتى جدي گتل ثنين بنات من جابتهم جدة تحت مسمى اخلص منها گبل لا يكبرن ويجيبن الي العار 

گعدت يمه اعتابه ع تصرفه وياه قسيم 

إصالة :: انت هم ع كيفك وياه عمة انت ما شفته من سمع الخبر شلون تسودن دربه ما يندله بعد 

غفار :: عمة لخاطر الله موش وكت هل حجي يعني اكولن اله هي ذبت روحه جدام الزلمه يگلي اي وشكو تتنازل عنه شنهى اتبالى ع زلمه يريدني 

:: محروگ گلبه وما يعرف شيحجي جان عفته لوحده يسولف هو يمل ويسكت 

:: جا انا موش محروگ گلبي وجدام عيني نسحكت حتى عيوني ما ظل شوف بيهن ساعتها وهو جاي يگمز ع گلبي ويعلي صوته بوجهي 

:: هو الكل ع اعصابه ان شاء الله تعدي وتفرج كوم هسه شوفه وين راح صيحله خل يشوفها ويانه 

:: خله يولي من يتأدب عود يجي 

قفل عليه وانا هم ما ضغطت عليه گلت ورا ما يشوف سجدة يتطمن عليها و يبرد گلبه احجي وياه 

گام ينشد عليها الدكتور شوية و رجع شبح ابتسامة ع وجه 

:: يگول صحت و طلعوها من العناية 

مشه وانا ورا دخلنه عليها بلهفة ويا ما طاحت عيوني عليها هملت دموعي بلا ارادة الجروح تارسة وجهه.. ذاك الوجة الحلو چن فلعت گمر نكسر ضواه و ذبل لونه 

شعرها حالقينه كله جي جروح براسها فتحت عيونها تعاين النه جفونها ثگال گوه ترفعهن 

دنك ع راسها حباها و يمسح ع راسها بخفة ايده لا يأذيها 

دمعت عيونها وهو دار وجه عنها  يمسح وجه ما يخليها تشوف دموعه ايده ترتجف مسح دمعتها 

:: اشش لا تبجين لا يحرگج الجرح 

صد اللي وگال يطلع مستجعل 

:: ابقي يمها عمة خل اشوفن الدكتور شيكول شنطيها اكل واجيبن الها 

ندار يطلع ويا ما فتح الباب صار بوجه جراح دخل ملابسها كلها تراب جان كاعد بره... مدري شهمس اله غفار گبل لا يطلع وهو هز راسه اي 

دخل يعاين الها من راسها لـ اخمص قدمها يريد يتأكد هي بعدها موجود 

گعد يمها والسكوت ثالثهم ما عاتبها لا نشدها عاين لراسها مغطيته الضمادات تسلطت ابتسامة باهتة ع وجه 

:: شكثر طلعت غلطان انا تدرين من كصيتي كبرت غلاتج بروحي وهسه وانتِ بلا شعر احسنج مغمسة بماي روحي صرتي 

عيونه نترست بالدمع وبعده يرسم ابتسامة بوجهه 

:: طلعت انا عاشك الروح موش المظهر

حضن جفها بين جفوفه دنگ راسه و دموعه طاحن ع جف ايدها رادت تسجها ايدها ضغط عليها أكثر رفعت ايدها تتحرك بخمول مسحت عيونها وهمست لسانها ثگيل

:: انا أقوى بيك لا تبجي

:: أنانية انت سجدة

:: امم

ونت وجن الوجع موش بالجسد بالروح 

:: ليش هيج تسوين بيه سجدة تدرين من سمعت الخبر دربي بعد ما اندله منين وعلي چن گلبي انفرك بحجارة خشنة 

ما لگه غير السكوت منها كمل كلامه يحجي الها وجع ما ينشاف بس يحرگ بصاحبه 

:: بكرهج الي بعشكچ.. كلامج القاسي وهذني عيونج تعتذر وانتٍ بقمة هل تناقض انا اعشكنج و قابل بكلشي يجي منج بس لا تبعدين عنج سجدة 

انتظر منها كلام.. جواب يشفي غليلة ماكو هي من داخلها مبعثرة عبالك بكرة وخيوطها متشابكة وهذا الشي انعكس ع ملامحها... نشدها 

:: اكو احد ماذيج احجي سولفي وياي وعلي قربان حدر رجلج اذبحنه انتِ بس اشري عليه ماعليج 

من شاف سكوتها طال اغتاظ دنگ راسه عيونه بعيونها 

فتح الباب غفار بيده شوربة الها عگد جبينه بغضب من شاف دموعها وشاف عصبية جراح عرف هو سبب دموعها صاح بيه مغتاظ 

:: اطلع بره انت الاخر انا صوجي خليتك تدخل تشوفها 

صدك طلع جراح و غفار جر الكرسي گربه ع السرير وكعد يمها ما رفع عيونه الها عبالك يحمل نفسه ذنب الصار الها بلّل الشاش بالماي،

و مسح الدم اليابس ع اديها بحذر وكل حرص يخاف لا حركة خطأ منه تأذيها 

غفار :: إذا اوجعج … گولي.

كمل و مسح وجهه هم كعد صافن عليها وبنبرة متروسة حنان گال 

:: هسه أخ وأخته  سولفي وياي انتِ شكيلي وأنا أسمعنج .

:: ما بيه شي شبيكم كل ساعة واحد محقق وياي جنت تعبانة ودايخة ما شفت السيارة من عبرت 

:: إي… وهذا التعب اكيد إله سبب شغل فكرج و دوهنج هيج 

صدت وجهه عنه بخفة ايده رجع وجهه كبال وجه 

:: عاينلي من تحچين حطي عينچ بعيني واحجي انا اعرفنج من عيونج 

وهو يحچي، إيده ما كارقت راسها،يمسح عليه عبالك يهدّي گلبها 

:: لا موش هي انا تعبت جي بلا ريوك طلعت يمكن نزل ضغطي 

:: بس نرجع راح اكعد وياها كعدة احط النقط ع حروف تشيل ايدها منج نهائي وكلشي يخصج منا وغاد انا مسؤول عنه 

علياء :: غسلت مواعين العشه و كاعدة بحجرتي ادرس أزل و عيني ع ترفة اعاين الها من الشباج گاعدة بالحديقة ايدها ع خدها صافنة وبصوت يا دوب ينسمع تقرا 

زينب گصدت يم كافلها متگبعة بضيم الايام 

طلعت رحاب تتگالب بالمشي بيدها سطل خلته حدر الحنفية ينترس و مقلصة عيونها ع ترفة بتفكير ...گلبي نغزني منها نداريت ع ازل 

رحاب :: شعندج گاعده هنا ولج ناطره صاحبج مو 

ترفة :: ليش هيج فكرتي بيّه هيج اخافن كعدتي هاي ذكرتج بماضيج يكولون جنتي تواعدين ابوي بالزرع  

عاينت الها رحاب بحقد شمرت السطل من ايدها بنص الحوش تبده الماي طلعت بحذر كل ظني تريد اطكها شو هاي هي گعدت بالگاع خرطت شيلتها و شكت زيجها تگربت الها 

علياء :: شمالج ولج نگرصتي 

ما جاويتني صرخت بصوت هز البيت صامة قبضات اديها و تدك ع صدرها بيهن مثل وحدة وسمعت خبر موت ابنها 

رحاب :: يبووو الحگني يـ كزار يبووو بنتك راح تصخم وجوهنه يـ كزار 

طلع كزار من الحجرة يرمض و يلبس بدشداشته 

كزار :: شسوت ولج بس گليلي هسه احطن جيلة براسها والله 

ما ردت عليه ربعت ع تراب ادك بثنين اديها ع رجليها وترجع تزلغ بخدودها وانا فاتحة حلگي و عيوني عليها 

رحاب :: الحگ  بنتك راح تنزل راسك بين الوادم ما كفى السوته عمتها و جاية تكمل طريقها 

خطية ترفة تشتت تروح تريد تشرد جي تعرف تالي هل مسرحية هي اعدامها ع المسرح و ترجع توكف بمجانها تكربت ع رحاب 

ترفة :: شبيج ولج شسويت مو كاعدة هنا وساكته وهاي علياء شاهدة عليَّه 

علياء :: اي والله من اهد ما جبتوها البت ما طلع الها حس ولا نفس 

ما اهتم لكلامنه لو نقسم ع قرآن ما يصدك غير رحاب وبس تحجي اله شي بدون دليل... بلا قسيم و يمين.. يصدكها.. كرفص جدامها وكض اديها حتى لا تطك روحها 

:: ولج شنهي السوته احجي 

بلعت ريكها تون ونين عالي و مشرعة اديها بالهوى 

رحاب ;: راح تصخم وجوهنه بين الوادم راح تجيب العار الك ولـ اخوتها 

كزار :: هسه غير افتهم شسوت 

بلعت ريكها تشحرج من كثر الصريخ و كضت ايده كزار تبجي و تسولف اله تمثل جدام حبها لترفة و مصلحة ترفة 

گام ع حيله لترفة عيونه متروسة غضب بعد ما أخذ كلام رحاب مثل قانون ولازم يطبقه  طگاها ع خدها اصابع طبعت احمر و ما اكتفى يطگ بيها و يصيح 

كزار :: شمسوية ولج احجي انتِ طلعت عينج من گمتي تروحين لبيت حاكم يراد اربيج من جديد 

گامت هي عود كضته عنها هل مره راضعة سموم الحياية 

رحاب :: ع كيفك وياها كزار بعدها عقل جهل احجي وياها فهمها الجاي تسوي غلط 

دار وجه عليها ينشدها بصوت حاد بدون ما يتأكد ياخذ الكلام منها حگ باطل صح خطأ يمشي بگولها 

كزار :: شسوت فهميني اليوم اعلگها بالجنكال و اصلخ جلدها من لحمها 

لطمت ع خدها بعزاء و خفت صوتها تحجي بهمس جتى تبين اله حجم المصيبة اللي ألفتها 

رحاب :: طلعت  اريدن احط للهوايش ماي لجحتها واگفه ويا وليد بس تعرف عيوني ما اشوفن عدل ما عرفته ياهو آثاري بنتك تلعب ع حبلين يا كزار 

ترفة فاتحة عيونها و الصدمة لطخت ملامحها الحلوة 

ترفة :: ولج يا ولد هذا واكفة وياه موش طلعتي و شفتيني كاعدة لوحدي هنا منين اجه الولد 

جراها كزار من ياخة صوبها سحلها من الحوش للحجرة دفعها حيل طگ راسها بطرف الجرباية و اخذ عگاله من التعلاگة 

كزار :: تردين تجيبلي العار مثل بت عمج و تخلين راسي بالطين 

يطك وين ما تجي الطگة تجي اريدن اكضه عنها بس هو گوي كمت احامي بيها بجسمي شاغت روحي من اجت بوجهي و ع عيني احس عيني طفت و نار وجت بيها 

كزار :: اذبحنج ترفة وعلي  اذبحنج و ادفنج حدر الشجرة 

من الوجع حنت ظهرها تتقئ چن روحها تريد تطلع دنگ عليها رفعها من شعرها 

:: ما تبقين بعد ابيتي انا صرت اخافن منج هسه اخابر ع كرار صاحب عمار يجي يعقد عليج وياخذ بعباتج 

شكهت مرعوبة و الدم لطخ وجهة كله گبل لا يطلع ابوها زحفت كضته من رجله وتحب بيها تتوسله 

:: لا بوية عليك الله شما تريد سوي بس بس لا تنطيني اله عليك الله والله اخاف منه بوية 

دفرها ع وجهه برجله يبعدها عنه 

:: و قسيم ما تخافين منه 

هزت راسها بنفي و تشلبهته مرة تحب ايده مرة رجله وحتى دشداشته حبتها گطعت كلبي تكطع 

:: حتى قسيم ما اريدنه ما اريدن اي واحد ابقى هنا عايشة طول عمري بس ما تنطيني اله 

هي ما تسكت الهم ابد ولا ترضخ لتهديدهم جي تعرف جدها و غفار وراها يردون حگها مربع بس هالمرة ظلت لوحدها هل ضعفت 

اجه عمار توه عكد جبينه مستغرب دفعها كزار عنه و أشر اله 

كزار :: انا تعبت تعال انت اتصرف وياها خلها توافق ع كرار و خابر عليه خله يجي يعقد عليها گبل لا يرجعون خل انطيها واخلص منها وهم اكسر عين قسيم بيها 

ضحك سن عمار وجه موش وجه بشر حاشى لا والله حيوان ممسوخ و گتله ثواب.. ترفة تراجعت بخوف منه وهو ركض جراها سحلها 

للمطبخ فنج الغاز و شعل الطباخ يمي السجينة يخليها تجمر و يحطها ع اديها و رجليها وهي تصرخ رادت تشرد سحگ ع رجلها و استمر 

اعرف ما اگدر اله ركضت لحجرتي لملمت كتب أزل حطيتهن بالجنطة كومتها و البس بالجنطة بجتافها 

:: شبيج يمه وين ما خذاتني اريدن ابقى يم ترفة 

دفعتها استعجلها فتحت باب الحوش 

:: روحي يم بيت عمج بساع 

دفعتها و سديت الباب اركض و صريخ ترفة ياكل بگلبي احسن اعصابي كلها ترتجف طلعت ثوب نوم لبسته وفليت شعري و نكشته اعدله ع جتافي 

حطيت حمرة و مديت راسي من الشباج جان كاعد  بره يدخن نعمت صوتي اتغنج 

:: كزار... حبوبي 

التفت اللي وياه ما شافني شمر الجكارة من ايده و ابتسم 

:: هااا يبعد طوايف كزار 

:: شو بله تعال اريدنك شوية 

وياه ما حجيت اجه بساع و غفل الباب ورا تكريت عليه حاوطت ركبته بـ اديه و حبيت خده 

:: حبوبي و تاج راسي شيخ الزلم السبع انت من بين الزلم اختاريتك شريك الي 

وگبل لا يتگرب أكثر ابتعدت عنه موش تمثيل صدك گلبي يخفگ مثل جنح اليمامة ويا كل صوت وجع يطلع من ترفو 

:: لا أول روح طلع عمار خله يعوف ترفة صوتها يضوجني 

:: تدللين غالي و الطلب رخيص 

طلع بساع وانا لبست روب استر نفسي و شال و طلعت ورا جر عمار عنها دفعه ليغاد 

:: كافي عوفها روح جيب الشيخ و كرار استعجل 

شفته التهى وياه يسولف وانا جريتها بساع طببتها الحجرة و انطيتها المفتاح 

:: غفليها ع نفسج من جوه ولا تفتحينها لاي بشر خوش 

اديها ترتجف طاح المفتاح منها دنكت أخذته وخليته بيدها صدك سمعت طكت المفتاح تأكدت غفلته ياله رجعت 

اجه كزار وياي حاولت وياه يعوفها بحالها رفض رغم انا مانعته مني بس لأجلها تحملت گربه 

اخذ دشداشته غسل و طلع وكف جدام المراية ينهدم بروحه و يغني 

وانا طلعت لترفة اشوفنها ياهو يگول البت لسه بيها نفس بعد هل عذاب والخوف العاشته دكيت الباب ع كيف ماكو حس 

رجعت دكيتها سمعت حركة خفيفة بدون كلامها عرفتها خافت لا عمار رجع الها حجيت اطمن لوعة گلبها 

:: هاي انا علياء فتحي الباب ترفة 

:: كومي ترفة انا يمج والله ما اخلي يتكرب منج بعد كومي 

كومتها تمشي وراي و مجلبة بثوبي رعشة خفيفة لسه بيها من الرعب العاشته دخلتها الحمام و جبت الها ثوب 

تلگتني رحاب كاعدة ادخن جكاير 

رحاب :: اي خلها تسبح شوي بعد ويجي الشيخ يعقد الها 

علياء :: من عقدوا جنازتج كون شيسوي بيج الله بعد و توبين 

هزت ايدها 

:: اااخ انتظر باجر ع نار ويجي قويسم ويشوف العاشگها يزفونها ع غيره يبرد گلبي من اشوفن خشومهم العالية مكسورة 

:: والله ما اخليج تتهنين ولا اخليكم تزوجونها غصب لو اعرف اروحن للمركز بهل واشتكي عليكم 

عفتها تدردم و جبت ثوب لـ ترفة البت صارت بيها خوفة كلما ادكن الباب تخنس برعب اله اكولن الها هاي انا ياله تفتحه 

:: سبحي ولبسي ع راحتج انا راح انتظرج هنا 

:: لا تعوفيني علياء 

:: ما اعوفنج والله 

بقيت انتظرها يم الحمام سمعت صوت زلم مديت راسي اعاين لطمت ع خدي من شفت عمار وياه صاحبه كرار وياهم شيخ و كزار يرحب بيهم 

:: حبيبي عوفيها خطية وهم انا اتعب كلش بالشغل خلها بالبيت اتعاوني 

:: هاي ازل كبرت و تعاونج 

جراها من وراي هو وعمار خذوها اخذت عباتي طلعت اركض و عكدت النية ياهو اشوفنه بدربي لو سكير لو يبلع حبوب لو السلف كله يحلف عليه موش خوش ادمي هم اتنخه بيه يمكن يطلع براسه غيرة احسن منهم 

ليلة وحشة كلشي ساكن بس صوت الجلاب تنبح ومنين ما ندار يلاگي عيني الظلام 

رحت اركض صوب الشارع العام لحجت عون نزل من التكسي ونزل جنطته توه راد من السفر صحت احشم بيه وهو اصلا ما يحتاج احد يفزعه نشمي من ظهر نشمي 

:: ولك عون الحك 

فز خطية انطه حساب ابو التكسي واجاني بخطوات سريعة 

:: خير خو ما جدي بيه شي...  

أول واحد اجه براسه وقلق عليه هم جده اللي صار ابوه و رباه و 

:: لا مابي شي الحك ترفة راح يزوجونها لكرار ابو الوصخ 

:: جا غفار وين شلون ساكت الهم 

:: ولا واحد من الولد موجود اركض 

:: وين راحوا شكو صاير شي علياء احجي 

:: اكلك البت راح يزوجونها شمالك انت تنشد ع نغل ياهو ابوه 

عطت بيه بنفاذ صبر عبس بوجهي متضايق هم مدلل وهم دكتور مؤدب و مثقف ابد ما يحب الصوت العالي ولا يتعارك 

:: واذا زوجوها يعني قابل صعبة بنفس الدقيقة اخلي يطلگ و كزار و عمار كلمة مني اخلي جدي يكسرة قلمهم من العشيرة 

مشه وانا وياه امشي و استعجل بيه اجن عبي سود بتجاهنه ما اشوفن زين ظلمة بس سواد يركض صوبنه من تكربن أكثر عرفتهن براءة و عنبر 

براءة :: ولج علياء صدك عمي كزار انطه ترفة لكرار الوصخ 

علياء :: اي صدك و عفت الشيخ كاعد يريد يعقد الهم و طلعت ادورلي واحد يجي يفگها منهم 

:: جا غير تكولين تحجين لو ما ازل تحجي ولا ندري 

:: و شنهي بيدجن تسوونه قابل تكدرن توكفن بوجه كزار لنتن 

انتبهت عنبر شايلة حدر عبايتها شي زاحت طرف العباية و طلعت ايدها شايلة تفكة وكالت 

:: اذا انا ما أكدر هاي تكدر هسه استكهم لا من شاف ولا من درى ولحد يطالب بدمهم جدي گال اي واحد يكتله اتنازل عن دمه اله 

1 

نداروا كلهم عليها بصدمة و براءة زمخت بيها 

:: شنهي هاي ولج امشي رديها لا تسويلنه سالفة 

ضحك الها عون ومد ايده بمعنى تفضلي كدامي صيري 

:: تفضلي ست بس تعرفين ترمين لو تورطينه وياج 

:: جا شلون جراح ما قبل بس غفار علمني عليها 

أول ما دخلنه البيت صوت ترفة... الكلام قوي بس نبرة صوتها مكسورة 

ترفة :: ما اوفق والله ولا اقبل بيه  هسه تذبحني ع قبلة هم ما اگولن نعم و شتريد تسوي سوي.. طگ طكيتوني حبس حبستوني مدرسة ما خليتوني اروحن حرگ حرگتوني ما ظل وجع ما جربته عود تخوفني سجينة يله اذبح خل ارتاح 

:: انا ابن السلمته لحبل الإعدام بيدك خاف ناسي اذكرنك 

:: ديله اطلع راويني عرض اجتافك 

:: بشرط اخذ ترفة وياي هم خل تشوفك عرض جتافها 

صاح بيه ما دار اله بال صد ع شيخ يسولف وياه 

عون :: اكولن شيخنه من عبنك دارس حوزة وحاطلك اعمامة عشر أمتار فوك صماخك تعرف شنهي شروط العقد لو هيج ع حب الله تعقد 

الشيخ :: لا ابني شلون ما اعرف اهم شرط الرضا و القبول 

أشر بيده ع ترفة دموعها تصب وكال 

:: جاي تشوف اكو قبول بوجه البت 

:: لا 

:: و العقد بالاجبار شنهي 

#يتبع_تكملة

:: باطل 

:: يعني العلاقة تعتبر زنا 

توتر الشيخ و الارتباك بين بوجه بس ما گدر يجاوب الا بـ

:: اي  

:: جا شعندك لسه كاعد عمي هم كوم رواي عمي عرض جتافك 

رحمة :: طلعن البنات يشوفن موضوع ترفة واني كومة دعيت الها يخلصها من أهلها أزل اختها خطية عيونها نطن من البجي عليها كوه سكتتها 

اسمع صوت يدصح بوسط هذا السكون و الظلام فتحت الباب اباوع  آمين واكف گدام النخل المحترگ يقرا 

من فتحت البار صار ضوه من البيت عليه انتبه اللي ضحك وغمني راح يمشي لشارع... طبگت الباب و طبيت اشوف بيبي لازمة راسها و تون خطية گوه سكنت وغفت 

ندفع الباب دخلت فضيلة باوعت الي بشر 

:: وانت الآخرة شعندج ظالة هنا ما تروحين لبيتكم 

الغصة الصارت بصدري من كلماتها ما يوصفها بشر بساع كمت 

:: اي خالة رايحة هسه 

:: اي خالة استعجلي ياهي عدها طلابة اجت ابيتنه و يتمعشكن النوبة   قصص ماي  هوبس 

:: خالة احترمي نفسج لا تبقين تذبين حجي يسمم البدن كتيلي روحي وهاي ريحة 

شو هذة ما نطتني مجال كأنها محملة بگلبها عليَّه جرتني تدفع بيه للباب 

:: وخرني عني هاي شبيج خل اخذ صايتي 

دفعتني لشارع بطرگ دشداشتي والشال..وحافية هم و طبگت الباب بوجهي حيل