رواية في ذمة الغريب الفصل الثالث عشر 13 بقلم كنوز

يبن زفرة الدم وعفنة الليل 

دارت وانسمع لامثالكم راي 

انغدرنه ولبست الرجلين تيجان 

ويبس نهر الحياة المارضه بهاي

━━━━━━━━━ ⚖ ━━━━━━━━━

ارتبك الشيخ يعدل نظارته الطبية طبگ السجل و لملم أغراضه خلاها جوه ابطه يريد يطلع و كزار كاض ايده يبتسم بوجه الغريب أكثر من بنته او الاصح ما يوم ابتسم بوجه بنته 

كزار :: وين شيخنه انا ابوه البت وانا ولي أمرها شلك غرض بهذا خله يسولف لوحده وتعال اكعد كمل العقد 

ترفة شافت عون اجه تسبعت بوجوده و رجعت لنفس قوتها رغم الانكسار واضح بعيونها و برجفة صوتها مو هين أبد تتنخى الوادم تنقذك من أهلك 

ترفة :: موش ولي أمري ولا اريدنك ابوه اليه غير فطرس ماعندي اهل و بغيابه جدي هو ولي أمري وبس يرجع اخلي ياحاسبك انت وعمار ع كلشي سويتوا بيّه 

عض اصبعه حيل يكزكز عليها يدور بوجه منا ومنا مدري شيريد چانت مزهرية بيها ورد اصطناعي ع طبلة غفل وبحركة ما متوقعيها منه شالها و ركعها بيها

كزار : اااخ منج العرمة ربتيلي علة هلكدها و صخمتي وجهي جدام الولد شيكول هسه شيسولف بالسلف كزار ماله حجاية ع بنته 

عون :: يا ولد بس قصدك كرار ابو الكبسلة وما ياخذ بكلامه الا الشمام مثله 

كزار :: سبحان الما يشم سيد 

عون :: الله يسلم من جان يحطلي بالماي والاكل وخلاني اشم 

گالها وعينه ع رحاب تسولف وجع شما مضي عليه الدهر ما ينمحي... انتفضت رحاب شالت ايدها ع صورة الامام علي عليه السلام معلگة ع حايط 

رحاب :: وحگ هذا ابو الحسنين ع حيلي وعيني ان جان حطيت الك مخدرات وانت وين تاكل مني اصلا حتى احطن الك شي بيه 

براءة :: وياهو غيرج يكره هنا و رايد اذيته شو الغريب و الگريب كلها تحبه 

خزرتني بعيونها عبالها اخافن منها سكتت أسد السالفة جي عون ضاج حلگه ما يحب يتذكر الماضي 

كل هذا و الشيخ واگف يعاين انتبه عليه عون محى انكسار وضحك يغث كزار 

عون :: هاا شيخ شنهي نفرشلك تبات 

طلع الشيخ من البيت و الارتباك واضح ع خطواته يتعثر بصايته و كزار هد ع عون كضه من ياخته خانگه يحجي من بين اسنانه بغضب 

كزار :: منين طلعتلي ولك انت ما اخلص منكم انا 

حط عون ايده فوك ايد كزار بعدها عن نفسه وهو ضاغط ع اصابع كزار جاعصها بيده حيل مخلي اصابعه اطگطگ و ملامحه تعكرت بألم 

عون :: كابوسك الأسود انا كزار حتى من اموت روحي تظل تطوف عليك كل ليلة جمعة لحد ما تسودن و تطلع لسلف بلا هدوم 

تركه دافعه ليغاد عنه و وطلع بخاخ تعقيم من جيبه رش ع اديه بحركة استفزت عمي كزار أكثر 

عون المدلل الخط الأحمر اللي رسمة جدي گدام اسمه واللي يحاول بس يتگرب صوب هل الخط الأحمر جدي بنفسه ينهي انفاسه 

حتى عمار الجان نافخ عظلاته ع المسكينة ترفة فش وكعد ع جهة كاض راسه يسوي نفسه تعب من المشاكل اللي هو أساسها ... تكربت عنبر ع عون مدت اله تفكه تهمس 

عنبر :: كض طكه بين عيونه بروح ابوك يله السبع والله جدي يحبك اتراهن وياك عليه يتنازل الك عن دم ابنه ويجوز حتى يحبك من راسك 

بوز شفايفه بتفكير و كزار سمع همسها انتفض ابتعد ليورا واخذ حذره يحط رحاب جدامه درع بشري.. 

كزار :: شمالك عمي تاخذ حجي الزعطوطة هاي وانت الجبير الفاهم 

عون :: قبل شوية ما تعرفني شو هسه عمي و جبير 

عون عيونه تنتقل بين السلاح و كزار يرسم الرعب عليه مثل ما عيش البت برعب اخذ التفكة من عنبر و كزار أخذه العرگ وكام يتلعثم بالحجي 

:: شمالك عمي مو جاي نسولف گول يالله و تعوذ من الشيطان الشاطر لا يسويها 

:: هو انا اريدنه يوزني عليكم هسه واسوي بيكم مجزرة أجيال اجيالكم تحجي بيها 

:: وعليمن توسخ ايدك و تروح سنين عمرك بالحبس 

:: يعني تعترف دمك نجس و يلوث شكو واحد يطخه 

خزره كزار بس محافظ ع هدوءه يخاف لا عون يسويها و يگتله وبعد ما عون يعيشه برعب هد التفكة من ايده وگال 

:: لا انا دكتور ما اكض سلاح 

هزت عنبر ايدها بسخرية وانا ركضت ترفة لبستها عباتها وأخذتها طلعنه وگفت عنبر صافنة 

براءة :: ما تمشين شبيج وكفتي 

عنبر :: اتنني هنا هسه ارجع موش تروحن بدوني 

رجعت لبيت عمي كزار ركض شوية و طلعت بيدها صورة الامام علي عليه و رحاب وراها تصرخ رجعيها ولج 

عنبر :: بيت شيطاين هذا ما يصلح تبقى هل صورة بيه 

خلت رحاب تتكرض و تدردم عليها وياه ما فتحت باب الحوش تلكتنه أزل شبكت ترفة و تبجي مفرفحة وگالت 

أزل :: عمة فضيلة طردت رحمة لشارع

ركضت والبنات وياي حتى ترفة اللي ما باقي بيها عظم صاحي ركضت ويانه وعون فزع ويانه بدون مايعرف شكو يمشي و ينشد 

:: ياهي رحمة 

عنبر : : مالت غفار 

لجحتها من بعيد واكفة جامدة بمكانها تدور براسها منا ومنا و الحيرة مستهضمة و خايفة... عاجزة ما تعرف شني تسوي رغم هي موش ضعيفة شفتها شلون وكفت بوجه جدي جبران اللي الزلم تحسب اله الف حساب

بس تصرف امي وياها وهي وحيدة و غريبة بهل ديرة هضمها ضعف اعاين الها شلون انطفت فجأة 

تريد تتحرك تريد تسوي شي بس عگلها مشتت يفكر بحجاية امي كضيت ايدها أطراف اصابعها باردة ثلج لميتهن بين اديه ادفيهن 

:: رحمة 

بلعت غصتها ادور عيونها عني متفشلة عبالك هي المسوية الذنب موش امي 

:: اريد صايتي بقت جوه 

:: كتلج البرد جاي ترجفين امشي وياي لبيت عون 

جرت ايدها من ايدي تهز راسها لا و دموعها فاضت بعد الصبر 

:: اريد اروح لأهلي بس صايتي و جنطتي جوه 

مسحت دموعها وحبيت راسها 

:: حسبيها علي خيتي والله بس يجي غفار اخلي ياخذ حكج منهم كلهم بس امشي وياي هسه ما يصير تبقين واكفة هنا 

:: ما اريد شي بس اريد اروح لأهلي تعبت هنا اني 

:: حگج والله و عذريني صارت بوجهج كل هاي المشاكل بس لا تاخذين بكلام امي ما شفتيها چدامج لبنتها ما اهتمت هي هيج الله خالقها حتى احنه بزر بطنها ما تحن علينه 

عون بس سمع هل البنت مربوط اسمها وياه اسم غفار خلاها بخانة الاهل هو يعز غفار وكل عزاز غفار يصيرون اعزازه هم.. هم تدخل يقنعها 

:: تعاي خويه هذا بيتي مفتوح الج والله انا اطلع وانتن كعدن بيه 

فتح الباب ويأشر ادخلن بس رحمة مقهورة بقت كاعدة بره ما ترضه تدخل بس تبجي البت مدللة أهلها و أمنوها يمنه والله فشلة الجاي يصير الها 

:: روحن دخلن انتن خطية باردة عليجن اني ابقى هنا 

براءة :: جا باردة علينا وعليج لا.. وين ما تبقين ابقى يمج غفار وصاني عليج اذا صارلج شي شيخصلني منه 

لفت ترفة عبايتها ع جسدها من البرج و جرت طابوكه خبته بصف رحمة وكعجت 

ترفة :: انا هم حالي حالج لا الدنيا رحمتني و لا اهل وگفوا وياي اكعد يمج و نشوف شلون تصفى 

اعاين عنبر اختفت تلم عوداين يابسة و كرب مال نخل شالتهن بطرف عبايتها واجت فرحانة كومته جدام رحمة و ترفة 

عنبر :: انا من زمان بنفسي هيج اكعد بالبستان بليل واشعل نار شلون الولد من يكعدون 

:: اي وهسه ماطولهم موش هنا راح تاخذين راحتج سرحي ومرحي بكيفج 

:: اي والله بس الحطب طايح الندى عليه ما يشتعل اروحن اجيبن نفط واجي 

مشت وانا وكفت ضايعة هل الحمل ثگيل عليَّه كلش ساعة اكولن اخابر ع ولد يجي واحد منهم لهنا حتى يردع ع وحوش البشرية 

ساعة اكولن لا ما اريدن ازيد همهم احسن واگفة بنص طريقين وكل واحد يسحبني صوبه وما اعرف شني الصح 

عقلي يحچي شي، و گلبي يرد عليه بشي ثاني، الأفكار متشابكة براسك، تدور وتدور بدون ما توصل لحل 

صارت عيني ع عون احمد الله جي رجع شفته واگف يخابر غفار تكربت اله 

:: خو ما كلت الهم الصار خطية يظل بالهم يمنه فوك همهم نصير هم 

:: لا انا اجيت مالها داعي بعد يعرفون وهم گال باجر راح يطلعونها ويرجعون 

:: صدك عليك الله هو هيج گال 

:: اي والله حتى حجيت وياها هسه طالعة ع خشنة ع اخوها تلطعها و تگوم 

:: صلي ع نبيك عون البنت طالعة من حلگ الموت 

:: ما احسد انا لا تخافين ولج 

من بين كل هل مصايب خبر أخيتي طيبة و ردت الها عافيتها جن ماي بارد نزل ع حموم گلبي عنت ع بالي جدة 

:: ولك عون تذكرت حبوبة ظلت لوحدها بالبيت وياه امي وهي مريضة ما تروح تشوفها انا ما أكدر اعوفن البنات لوحدهن 

:: شعدها باقية يم امج هي تنجرع عمي حتى واحد يبقى يمها هسه اجيبنها واجي 

تلكته عنبر بالدرب ردت وياه لبيتنه شو هذولة تأخروا نخمش گلبي لا جدة صار الها شي من طلعنه نداريت ع رحمة 

براءة :: رحمة راح اروحن اشوف جدة اخافن صاير الها شي فدوة اغديلج لا تمشين 

هزت راسها اي وصلت لنص الدرب لجحت بابنه نفتح طلع عون ساند حبوبة يمشي ع ممشاها ع كيف و عنبر ورا تعدل بشالها وعباتها مشگوگة من الردن 

سرعت خطواتي بلهفة سندت جدة من جهة الثانية 

العلوية :: ولجن وين طلعتن كلجن اليه ساعة انشد فضيلة وين البنيات ما تحجي 

براءة :: هاي رحمة خطية احتصرت من البيت هل كعدنه بره نشتم هوى كلنه 

:: احجي براءة احجي حبوبة شسوت امج من مصيبة حتى هاي طگتها هسه 

جنت ناوية اخفي الأمر عنها لأنها مريضة موش حمل مصاب ثاني وهي وحدة ثنين واحجيهن الها و ازيد همها نداريت ع عنبر فاتحة عيوني 

:: المن طكيتي ولج 

:: المن يعني امج 

عافتني ومشت لرحمة كرفصت جدامها تبشرها و تحجي الها بحماس شلون اخذت بثارها 

:: طكيتها لاجلج والله بس انتِ لا تضوجين و تروحين من يمنه تره والله صرتي عزيزة عليَّه كلش 

ترفة :: شلون كدرتي الها يا معزاية وهي عبالك قاطرة و مقطورة بطنها سايدين روحه رده 

طلعت مدة لجدة تكعد خطية و عصرت الها ليمون فوك الماي حتى ينزل ضغطها و كعدت يمهم فصلن امي تفصال 

ترفة :: خو ما تضوجين جي نحجي ع امج ولج 

:: هي امي خلت النه وجه ندافعلها بيه ما خلت واحد ما لجمت گلبه بحجاية 

ترفة :: اي مو اكولن اذا تضوجين ديري وجهج انا ما اسكت لا هي ولا رحاب اسكت عنهن بعد 

:: هي موش امي واخافن الله يعابيني اذا حجيت عليها بس والله العيشة وياها تگصر العمر من الفجر لليل هي تاكل بگلوبنه

:: هسه هي موش صارت ارملة ما تاخذ جوالاتها وترد بيت أهلها و تفكم من لسانها

:: تگل للوادم انا ظالة هنا ع عيوني لو ما جهال من زمان امشي لأهلي 

هزت ترفة ايدها بسخرية من تصرفات امي جدام العالم مبينة نفسها الام اللي تحملت تعب الدنيا لأجل أولادها و بالبيت لاعبة لعب بينه... 

ترفة من شافتني ضاج خلگي نشدت عنبر عبنها تعرفها هي تلطف الأجواء دومه

ترفة :: اي ولج عنبر ما گلتي شلون گدرتي ع فضيلة 

ربعت عنبر ع تراب مبتسمة وتاشر باديها تنقل صوت وصورت تمثل الهن شلون گتلت امي 

عنبر :: اي وانا طبيت البيت جانت نيتي اشوفن جدة بس من شفتها نايمة رغد بعد ما ثبرتنه بهل مسية و جان اكمز ع گلبها و اعضها الجن من لوزتها كامت ترفس يله هديتها بس شني شگت عباتي

ترفة :: ذيبه وعلي ولا جنج بنيت عمي ابو الطالب الهادئ بس ما تكتلين رحاب بدرج 

عنبر :: طگيتها من الصبح هذيج ما شفتيها شلون خافت مني مساع 

ترفة : وين شو كلشي مابيها ذيج تكول عربيد اسود اريدن كتله زينه توسدها الگبر 

براءة : سطرة الله ع ساعة عبالج حوبتج وحوبة هل الوادم الاذتهم ما تطلع

جرت ترفة نفسها بحسرة كاضة عود يابس تاخذ الجمرة بيه هيج وتردها هيج وگالت بنبرة حزن 

ترفة :: تردن الصدك 

عنبر :: اي شنهي الصدك 

ترفة :: بس موش تگولن عليَّه كافرة ماعدها ايمان 

عنبر :: لا ما نكول احجي 

ترفة :: كد ما اشوفن الشر دومه منتصر و الاذوني ماكو شي صار الهم لا حوبة بينت لا طاحوا الهم بمرض صار شك بگلبي اكولن جا هو رب العالمين غير ع الحگ شلون يعوف هل الوادم مرتاحة وهي تاذي هيج 

براءة : يمهل ولا يُهل و عايفهم بحملهم ذنوب أكثر حتى يثگل ميزانهم و ع ساعة يكفخهم بعد ما يكدرون يشيلون رأسهم حتى 

ترفة :: الا اشوفن بعيوني رحاب مكسورة و طالعة حوبتي بيها ذيج الساعة يرجع الإيمان بگلبي 

طلعت جدة علگ أخضر من جيبها هذا العگ مزورته كل المراقد حبته و سوته شرايط ع عدد كل البنات جرت ايد رحمة و شدته ع معصمها رحمة رفعت ايدها تشمه و ابتسمت جن حبته و جدة سوت النه كلنه مثلها 

تنهدت بحزن نرسم مثل لوحة وياه تجاعيد وجهه وكالت تخاطب ترفة 

العلوية :: جا انا شيگول گلبي جدة عفاه شحمل ضيم هيج نداروا ع بنيتي مثل ضباع جوعانة ومن كل كتر حاوطوها وجدام عيني ذبحوها 

كلام جدة شد انتباه رحمة جانت ساكت قررت تسولف 

رحمة :: بس بيبي شفت جدو هاشم شلون يذكرها مبين يعزها و عمو ابو طالب هم خوش رجال حتى عمو حاكم الله يرحمه من كلام البنات عنه واضح جان زين ليش ما فزعوا الها و حموها  

العلوية :: شفتي هسه شلون استغلوا غياب الويلاد و هدوا علينا هذا الحرگ الزرع و ذاك اللي يغصبه بنية ع زواج و هذيج الي تطرد عبالك البيت بيتها.. هيج وياه بنيتي سووا اللي يشوفهم ذيج الساعة شلون فزعوا ما يكول جاين ع حرمة لا حول ولا قوة الها 

بجت جدة غشت وجهه بالشيلة تنعى بنتها الراحت غدر من أشباه الرجال تحت مسمى غسل العار وانا جاوبت حيرة رحمة 

براءة :: شوفي صيهود هذا الجد الجبير 

عنبر :: من اشتعلت روحه بهل مسية و لحد منجن تكلي حرام تره اسبنها وياه هسه 

محد منه اعترضت ويمكن بگلوبنه شتمناه وياها هو بنى ساس الظلم و الجور و جبران و كزار مشوا عليه كملت كلامي و البنات تگربن يسمعن 

براءة :: اي هذا صيهود ابو جدي من عرف مجان عمتي خميلة ما حجه لجدي هاشم حتى لا يحميها منهم گام و دز جدي و عمامي الفاتحة بغير محافظة و دز جبران و عمي كزار يجيبونها 

رحمة :: يمه گلبي وجعني قبل لا اسمع السالفة 

نصيت صوتي حتى لا تسمع جدة وينعاد براسها المقتل رغم انا متيقنة صورة بنتها ما فاركت مخيلتة و ذاكرة گلبها 

براءة :: سمعت يكولون جابوها هي و رجلها و جانت عدها بنت صغيرة وحامل خطية كالت الهم تزوجت بالحلال والله وهذا العقد عندي من دورا جنطتها مالگوه 

رحمة :: خاف ضاع منها خطية 

:: لا عمتي إصالة تكول رحاب و سليمة بنت جبران الجبيرة باكنه من بجنطتها حتى يطلعنها جذابة و وزنهم ع يذبحها 

:: ولا واحد بقى منهم يومها 

:: جانوا بس الويلاد موجودين صغار بس فزعوا الها احنه شيوخ من الصغر يعلمون أولادهم ع المعارك و التفك 

سكتت هل الموضوع مو سهل يتسولف ابد رغم ما شفت الصار بس دموع جدة اللي ما وكفن من اهد ذاك اليوم يحجن شكبره الوجع صاحت ترفة گاتلها الفضول 

ترفة : اي كملي موش شلعتي لكلبي 

:: انا جاي اسولف لرحمة انتِ شمالج شنهي ما تعرفين السالفة 

:: اعرف بس انتِ خوش تشرحين موش مثل فطرس سواها عليَّه لخة 

:: اي المهم فزعو الها جانوا يحبونها كلش سكتة و مشوا جراح و فطرس ورا جدي و عمامي ينطوهم خبر حتى يرجعون رحاب تتخشش وماعرف شلون سمعت وكالت الهم يستعجلون يومها غفار صوب ابن حبران گتله بالمجان و صوب رجل جبران هم وليومنا هذا يعرج منها 

:: شمالج كل شوية واكفة براءة نجرها منج بقطارة 

:: ما تشوفين جدة غدت تراب شنهي ما عندج احساس انتِ 

العلوية ::احجي حبوبة خل كلها تعرف هل جريمة الهزت عرش الرحمن

جرتني سون دائرة وتدغ بخاصرتي بعكسها حتى استعجل بالكلام 

ترفة :: يله احجي مو راح يطگ گلبي اموتن من بسر يجر ويعر بالسالفة 

:: اي وعون يكلج شبگها لعمتي خميلة خطية.. كوم يا كزار وشرح ايده بالسجين من الطول لطول وجراها لساگية ذبحها و ذبحوا زلمتها وحتى بنتها رادوا يذبحونها بتحريض من رحاب بس عمتي إصالة انطتها لخالها 

:: ولج انتِ منين تجيبين هل معلومات شو انا كلشي ما تعرف 

عنبر : كلنا اتعرف بس انت من طك كزار وعمار گمتي تنسين 

ترفة :: الجلبة توي نسيت ليش تذكريني 

وحدة طگ الثانية ع ظهرها و ردت ترفة تنشد الا تعرف كلشي ياله ترتاح 

ترفة :: براءة 

:: وجع شبيج 

:: البت وينها بنت خميلة ليش ما تجي لجدي شنهي زعلانه 

:: عمتي إصالة تكول أمنتها عند خالها گتله بس يرد ابوي أخذها منك هسه ما أكدر احميها لوحدي كوم هو هد ع بيت جبران واكتل كل اولاده و اخذ البنت واشرد لحد ما گبل شهرين عمتي إصالة عرفت مجانها و رجعت تتواصل وياها و تروح الها 

:: جا شعجب ما تجي 

:: جا غير عمتي إصالة ضمت السالفة تخاف عليها وجدي من عرف زعل منها و.. 

قطعت كلامي والبنات كلهن سكتن صوت صريخ قوي بس بعيد كانت عنبر صعدت ع جذع النخلة تعاين عبالك تسمع بعيونها وكالت 

عنبر :: ع ما اظن هل صوت من صوب بستان جبران 

اجانه عون بساع أشر بيده 

عون ;: فوتن للبيت بساع 

براءة : شني هذا الصوت شصاير 

:: ما ادري هسه ماشي اشوفن شكو وانتن لا تبقن بره حبوبة دخليهن للبيت 

راح بخطوات مستعجلة و حبوبة صاحت ورا تحذره ما يدخل بستان جبران.. ظلت تعاين لاثره بقلق وگالت لرحمة 

:: انطيني ايدج حبوبة عينيني انهض 

من ساعدتها جدة بعد ما تركت ايدها دخلتها وياها للبيت دخلنه كلنه بيت عون يفوح ريحة معقمات و ديتول و النظافة و الترتيب صدك راح نفسية 

ذبت ترفة عبايتها و رفعت ردانها تعاين لايدنها جروح و جويات من شافتنه انتبهنه الها غطتهن بساع و ابتسمت 

:: اريدن افوت اسبح بس ماعندي ثوب 

نطت عنبر بساع دكت صدرها 

:: هسه انا اروحن اجيب الج من بيتنه ثوب بعد شنهي تردن اجيبنه بدربي 

براءة :: جيبي وياج ثوب لرحمة اخافن اريد تسبح هم و وشنهي عدكم جيب اسوي الجن لگمة تاكلن 

ركضت لبيتهم صدك جابت من ثيابها للبنات واجت أزل وياها هم طبت ترفة تسبح وانا گليت طماطة و سويت وياها زلاطة خيار

و رحمة كامت تدور بالصيدلية اللي معلگة ع حايط مدري شتريد وياه ما طلعت ترفة من الحمام جرتها من ايدها كعدتها جدامها 

و بيدها عصارتين كامت تخبط منهن و تدهن أدين ترفة كملت حطيت العشه 

:: يله تعالن اكلن واللي تكول ما اريدن ما اشتهي اطگ راسها بالحايط اسوي فشگتين 

لفت ترفة شعرها بالشال و سرفنت رداناته كعدت اول وحدة ع صينية 

:: وعليمن تفشكين راسي هو انا عضاي كلها تصيح يبووو واصلا انا ميتة جوع من امس بليل بلا اكل 

عاينت لرحمة غسلت اديها من المرهم خانسة عقجت وجهي عود انا 

:: وانتِ ما اريدن اسمع منج نفس ولا صوت مثل الحبابة تگعدين 

رسمت ابتسامة ع ثغرها بس واضح بعيونها الهم و ترفة ما انطتها مجال جرتها من طرف ثوبها كعدتها يمها وتهمس الها 

:: كعدي يمعودة بعد شوية وراح تاكلنه 

كومت جدة هم وعنبر جانت واكفة اباب الحوش هي وعباتها الا تعرف شنهي الصوت ياله ترد اجتنه تركض فرحانة 

عنبر :: هاا موش گلت الجن الصوت من بستان جبران 

ترفة :: شبيهم فطس جبران حتى اكومن البس احمر 

عنبر :: لا هذا عون هسه اجه يگول لاگين سليم طايح بالزرع مدري ياهو مفگس عيونه 

براءة :: شنهي 

عنبر :: اي والله شبيج مكحوريهن بعودة مدري بسجينة وهسه ماخذينه للمستشفى 

بقيت بمجاني صافنة ترفة ضحكت وتدعي الله يكثر مصابهم و رحمة البت صوفر وجهه أشرت لعنبر تسكت و تسد السالفة 

:: يله ذبي عباتج وكعدي 

وديت لعون كاعدة بالديوانية انطيته العشه و رديت لگيتهن مسفطات وحدة صافنة بوجه الآخرة 

:: ما تاكلن اقدم الجن عريضة 

:: بيمن ناكل قابل نغمس گواغد وناكل 

عاينت خبز ماكو صديت ع عنبر خاتلة بظهر جدة خانسة 

:: انا موش گتلج وياج خبر جيبي 

:: اذا انتِ تشاورين نفسج وين اسمعنج 

:: لا حجيت بصوت عالي وهاي البنات شاهدات بس حكج حايرة اطكين هاي و تفشخين ذاك 

:: هاا هسه طلعت موش زينة بعد ما أخذت بثار كل مظلومة منج و مستضعفة بلا والي 

:: عنبر گومي مو برد الاكل صار جحيل 

كامت تدردم اخذت وياها أزل وكعدنه ننتظر سكون بس صوت ترفة تكرط خيار 

رحمة ::لخاطر رحمة و البنات اكلت شوية گمت اغسل شفت موبايل يدگ هذا عون مخلي ع مغسلة مبين ناسي و شفت اشعارات رسائل 

من بنت اسمها شذرة كاتبة اله " اتصل ع خالتي ما تجاوب صاير شي" 

اجه هو بساع أخذه و مبين عليه الارتباك واني وكفت اتذكر وين سامعة هذا الاسم 

براءة :: نومي صار فزيز كل شوية افز جي موش ابيتنه ما متعودة اباتن بغير بيت

عاينت لفراش رحمة فارغ طاح گلبي بس لا طلعت لوحدها و ردت بيتهم شگول لغفار لبست عباتي و طلعت اركض فتحت الباب اريدن اطلع و اشوفنها گاعدة بالحديقة 

فارشة سجادة و مصلية وتقرا قرآن جريت نفس براحة غسلت وجهي و سويت جاي لجدة

و رديت لبيتنه حضرت لسجدة فراش ترتاح عليه جاي اكنس بالحوش والربضة اجه عون جاب مسواگ و غراض للبيت جي الولد ما موجودين 

براءة :: هسه شلون لو اجوا وشافون البستان شلون لا تصير طلابة 

عون :: غفار يعرف هسه انطيته علم بالموضوع حتى لا يتفاحئ من يجي 

:: الله يستر بس 

سمعت صوت سيارات وهوسة طلعت بلهفة اعاين شفتهم جايين و غفار يساعد سجدة تنزل من السيارة و قسيم من جهة الثانية 

دموعي صبت لوحدها روحي سبگت الجسد و راحت الها ركضت الها حايرة شلون المها لصدري لو منين احبنها 

دخلتها للحجرة وين فرشت الها غفار مشه الها علاج و طلع.. قسيم و جراح حتى علي كلمن اخذ سلاح يريدن يهدون ع بيت جبران سد الباب بوجوهم 

غفار ;: كلمن يگعد بمجانه 

قسيم :: شبيك غفار شنهي بس لا تريدنه نسكت ع سوايتهم 

هز غفار راسه اي و قسيم انتفض يحجي وياها ياشر بالتفكة بيده بعصبية 

قسيم :: حتى ياخذون راحتهم أكثر اذا هالمرة واحنه موش موجودين هالنوبة بوجودنه يهدون 

غفار :: دوسة گاعنه واحنه موش هنا انا أردنها بس موش هسه 

جراح :: الثأر بس يبطي يبرد و بعد محد تهابنه غفار 

غفار :: گلت حجاية نفذوها وانتم ساكتين وبيت جبران دواهم عندي اذا خليتهم يشيلون روسهم بعد انا موش ابن ابوي 

بقوا يتعاركون بس كلمة غفار بعد كلمة جدي ما تنكسر طلعوا مغتاظين منه هو دار بعيونه ع أركان البيت ونشد 

:: جا.. شسمها وينها 

عرفته يقصد رحمة... ما ضميت عليه حجيت اله حتى يشوفله حل يطيب خاطر البت و بنفس الوقت يخلي جد لأمي راح حجرة امي يعاتبها 

غفار :: هي هاي الأمانة يمه مشيت يوم واحد ارجع الكاج طاردتها 

عوجت امي حلگها ما عاجبها كلامه 

فضيلة :: وهل أمانة ما فضت طلابتها لسه شنهي ناوي تخليها لدوم يمنه 

:: اي يمه ناوي اخليها لدوم عندج فد طلابة وياها 

:: جا وخالك موش كالك ع بنته شنهي ترد الهدية يا غفار 

:: خالي حجيت وياه و كفيت السالفة لا اخذ منهم ولا انطيهم 

هبت من گعدتها عبالك واحد حجه ع ضناها موش اولاد اخوها 

:: وشبيهم وما تاخذ منهم غفار هذول اهلي الجاي تحجي عليهم 

:: ما حاجي عليهم يمه بس ما اريدن انسابهم شنهي هي گوه و هاا سجدة بعد مالج غرض بيها واذا سمعت فاتحة موضوع ابن اخوج وياها نوبة لخ جتافاتي للعباس اوسده النجف الج 

ظلت تبلعم بخوف عيونها بيني وبينه بخوف ونشدته بقلق 

:: شكالت الك هي ؟

:: ما كالت يمه بس انا اعرفنج موش بنات عندج طابو وتحجزين بينهن لفلان وعلان و سجدة بت ع ذمة زلمة بعد عيب تحجن بيها 

من اطمنت ما نفضح سر مصطفى اللي تعزه أكثر من بزر بطنها ردت لطبيعتها 

:: اي خوش هاي هي افتهمنه 

:: و رحمة بعد لا تاذينها واذا تكولين لا أخذنها واخذ اخياتي و اطلع من البيت 

:: تهجر امك لأجل الغريبة 

:: اي اهجر عبنها ما مأذيتج مثل نسمة هوى مالها حس بالبيت لا تخلينها ابالج لا اخليكم كلكم أبالي وانتم تعرفون كلشي زين شسوي لو عزيز عليه أتاذى 

:: والله خوش يجي بالخلاف يصعد ع جتاف جا ياهي حبلت و ربت وكبرت وتعبت وسهرت انا لو هي 

:; لا تحطين روحج بـ مقارنة وياها يمه انتِ امي وهي البت الراح تصير حرمة الي 

:: هاا يعني تحجيها 

:: جا هي جريمة عيب حرام حتى ما احجيها 

:: انا ما راضية عليها حرمة الك 

:: لا ترضين يمه بس لا تأذينها اللي يأذيها يأذيني الي 

من شافته ما انطه بيها ابد زرعت خوف الرفض بگلبه من كلامها 

فضيلة :: وهسه ياهو يگول ترضى بيك هي بت متعودة ع دلال تجي تعيش وياك بهل بستان 

عافها و طلع وانا شردت ورا لا تستفرد بيه جي حجيت اله شسوت طب لبيت عون 

:: براءة فوتي صحيلها خل تجي وانا أطيب خاطرها 

طبيت ادورها قافلة الباب ما تؤضه 

:: كليله خل يتصل ع أخوية عورة يجي ياخذني ما ابقى هنا بعد 

طلعت اله و عون مبتسم ويتحرش بيه يريد يگله 

:: البت يمك و محسوبة عليك تنهان ابيتك شلون تراضاها لا اطلع يله ماكو الكم أمانة يمنه بعد 

:: شلون راح اكوم احفص بمصارينك هسه 

:: هاا وينها 

:: البت مستهضمة و مقهورة غافلة الباب عليها وتكول خل يخابر ع اخوي يجي ياخذني 

:: وشنهي هي بكيفها مالها رداد وتمشي 

مشه يريد يطلع و رجع مسح ع راسه بغضب صد بوجه اللي گبل لا يطلع وگال 

:: خلج يمها هسه اجي 

طلع يرعد و عون ضحك يعاين ع ظهره وهو يبتعد بخطوات مستعجلة 

عون :: هذا اخوج غاط للهامة بعشگ الغريبة 

ابتسمت ع كلامه عون من نظرة يعرف غفار شبي ما بيه ومن حجاية بس عرفه شكثر يحب رحمة... رجعت الها دكيت الباب وتحجي وياها هلبت تقتنع و تطلع

:: هاي انا رحمة فتحي الباب مشه غفار والله 

فتحت الباب عيونها حمر مبين باجية دقايق واجوا هو وأمي و جدي و عمي ابو طالب وياهم هم كعدوا كلهم وهو گال يوجهه كلامه الها بنبرة هادئة

غفار :: عاداتنا العزيز اليغتاظ علينه نجيب اله كبارنه وانتِ من اعزاز اخلي صرتي .. هل جبت الج شيوخنه و السادة وجدام الحاظرين حكج عليه ع سوته امي وياج 

نقهرت هي أكثر منزلة راسها و تبجي دموعها تجري گبل لا تعترض گال الها جدي 

هاشم :: جدي رحمة شو رفعي راسج عاينلي 

رفعت راسها عاينت اله أشر الها كعدت يمه طلع جفية مطرزتها اله جدة انطاها الها تسمح دموعها وكال الها بنبرة متروسة حنان چن يحجي ويا وحدة من بناته 

هاشم :: حكج ع راسي من فوك وهسه فضيلة تتعذر منج و تحب راسج هم وما يكون خاطرج الا طيب 

خزر امي گامت شبگتها و حبت راسها تضحك جذب بوجهه و بگلب تضمر الحقد 

فضيلة :: عذريني خالة جان محروگ گلبي ع سجدة هل طلعت حرگتي بيج 

گلت بگلبي محروگ گلبج ع مصطفى العار... هزت رحمة راسها اي لأمي ومبين مغتاظة منها وما رضت من گلبها بس استحت من جية جدي... وعمي ابو طالب تدخل هم 

ابو طالب : : وهاي انا اجيتلج بعمامتي هم بس حتى تعرفين كبر گدرج عدنه و غالتج من غلاة غفار صارت واللي يغثج كأنما غاثنه كلنا 

شوية بدأت تلين من شافت شلون آل هاشم من كبيرهم صغيرهم من شيخهم لسيدهم يعزونها و يحبونها و تصرف امي شخصي منها بس 

هاشم :: وهسه اذا اللي خاطر يمج تكومين تردين وياي 

رحمة :: جدو بس ا.. 

هاشم :: من دون بس موش لخاطر احد لخاطري انا شتكولين 

بلا حول ولا قوة گالت اي نهض واشر ع الكل 

هاشم :: هاي جدامكم كلكم وحاضركم يبلغ غايبكم رحمة صارت بنيتي و اللي يرشها بماي ارشه بدم 

كلها فرحت الا امي لمت عبايتها وطلعت تدردم ترفة واكفة مبتسمة عيونها مرة ع غفار مرة ع رحمة من وافقت رحمة ترجع لبيتنه عبست بزعل مصطنع 

ترفة :: جا وانا ما تراضوني تره لعبوا شبيلي بيه وراكم هذا الجراني من شعري و ذاك الطگني ع عيني 

ندار عليها غفار و بصوت حاد گال الها 

غفار :: وانتِ الآخرة انا موش حذرتج ما تطلعين من البيت 

ترفة :: والعباس ما طلعت غير همه اخذوني سحل من ياختي 

جراها جده وحباها من راسها و رفع ايدها المضمدة حباها 

هاشم :: تعاي جدي انا اراضيج حتى لون انتِ مزعلتني هم انا اتعن الج و احبن راسج شـ جم ترفة عندي 

قسيم ابتسم ع ابتسامتها و من عرف شمسوين الها طلع يدور ع عمار 

وهي ضحكت فرحانة وجدي شال طرف خاجيته غطاها صاروا ثنينهم حدرها و مشوا يطلعون من البيت 

عنبر عاينت لعمي ابو طالب ضحك الها لاف ايده ع چتفها تمشي وياه و تسولف اله شسوى عمي كزار و جدي جبران 

رحمة جابت جنطتها واجت خذاها منها غفار واشر بيده الها قدمها جدامه تمشي.. جدي جيران وكزار و نسلهم النجس يحسبون البت عورة ومالها كل قيمة يخلونها تمشي وراهم وهم سابگينها مترين... 

غفار قدمها جدامه يثور ع عاداتهم المغلوطة 

جن يكول للعالم كله هاي البت تخصني وبحمايتي 

من دخلنه البيت عنبر تمشي ورا رحمة وتهوس الها جبناها واجت ويانه من شيل الزلف تعبانة الا طكتها عمتي إصالة ياله سكتت 

اجت عمتي انعام هم تتحمد لسجدة بسلامة و الولد كلهم بره غسل غفار وبدل دشداشته گبل لا يطلع سبگت ترفة كدامه عارضة بدربه ما تخلي يفوت 

ترفة :: گبل جم يوم خابر فطرس وگالك تعالي شو غسلت ما رحت اله 

:: ياهو گالج ما رحت 

:: انا اعرفنك تبغضه وحتى كرت نقالك كسرته جي يخابر عليك هواي 

:: جا خوش ميلي عن دربي 

ابتعدت جم خطوة عنه جتافها متهدلة بحزن و خيبة طفت لمعة عيونها الحلوة وهو رفع اصبعه بتحذير الها 

غفار :: وعلي اذا تزعلين ع هاي اجي اطكنج 

:: يعني رحت لو لا حتى إذا لا اشكيك لجدي 

وگف يعدل شعره جدام مراية المغسلة ويعاين الها منها وگال 

:: بالاحد يطلع 

صفنت فاتحة حلگها تصد بوجه الي وترجع تعاين اله انقشع شكو حزن بوجهه صفكت ايد بالاخرة وصاحت 

:: جذذذذاب احلف عليك االله احلف شو شيل ايدك لنجف 

:: والله شبيج الأحد يطلع انتِ بس استجني هنا منا لوگتها 

البت صارت مثل الطيرة و تفتر بالحوش ما تعرف شسوي من الفرح ما خلت وحدة من البنات ما شبگتها و حبتها و رجعت يم غفار 

:: جانت غلاتك عندي هل كبرها و هسه صارت هل كدها 

فاتحة اديها و وسعتهن أكثر تبين اله حجم الحب الي بگلبها اله وكملت 

:: انت موش ابن عمي والله اخوي و ابوي و تاج راسي و ابوي و عمار يررحون فدوة لتراب الحدر رجلك 

ابتسم لفرحها راد يطلع وكفته و ركضت جابت سجادة و جادر الصلاة فرشتهن بنص الحوش و ركضت توضت واجت 

:: انا يتيمة والي يم الله دعوة مستجابة راح اندعيلك تنول اللي بگلبك 

ابتسم وعيونه راحت وين گاعدة رحمة مد ايده بجيبة دوم يخلي تربة وياه خلاها جدام ترفة 

:: خوش بس ادعي من كل گلبج موش خاش ماش 

:: من نص گلبي ادعيلك وعلي واظلن اتوسل بربي لحد ما تصير حرمتك و ع اسمك و اجي افرح واهوسلك  

الفرح بگلبي صار ثنين فرحة لترفة و سعادتها وأخيرًا شي فرح هل البنية و فرحة لغفار وهو مبتسم يتأمل كلام ترفة يصبح واقع وحقيقة وهو يتأمل رحمة

سويت تشريب لحم لسجدة و عمتي إصالة تخبز الها خبز حار سمعت صوت جدي جبران نخمش گلبي صوته صار مثل نعيق البوم نذير شؤم 

فتحت الباب شوية اعاين الها واكف و الولد كلهم يمه زمخ بيه قسيم بغضب 

قسيم :: والله والك عين تجي بعد حرگة الكيعان 

جبران :: هسه هاي اتركها ع گتر انا جاي ع غير سالفة 

فزيت من حجه عمي ابو طالب من وراي ابتسم وگالي اسم الله 

براءة :: هذا جدي جبران اجه 

عگد جبينه وگبل لا يطلع حذرني 

ابو طالب :: لا تگولين لأبوي ع جيته ضغطه صاعد لا يروح يصيرله شي 

هزيت راسي اله اي وهو طلع وجبران وياه ما شافه احتل الغضب ملامحه و الغل و الحقد ترس صوته 

جبران :: تعاي عمي عند حجي وياك 

ابو طالب :: اي گول عمي 

جبران :: نحجي هيج ع واگف مامش تفضل 

ابو طالب :: جيتك مال طلابة موش اعتذر ع سويته بغيابنه مالها داعي تفضل بعد گول شعندك 

اغتاظ أكثر يتنفس من خشمة شفط هوى السلف كله وگال 

جبران :: امس سليم راد هاي بنتك 

اجت عنبر بيدها الخبز الحار و جبران أشر عليها الكل التفت صوبها و عمي ابو طالب رده 

ابو طالب :: الها اسم هاي موش بلا اصل و نسب حتى تاشر عليه بطارف اصبعك جن وحدة مجهولة هوية ما معروف ياهو ابوها 

:: اي المهم سليم من جان رايدها ع سنة الله و رسوله 

صاح بيه جراح صوته على ع كل الأصوات 

جراح :: لو عندي جلبة سودة ما انطيها لسيلم موش النوبة اختي احركها والله وما اخليكم تلوحون طرف من خيط عبايتها 

جبران :: هاي تربيتك ابو طالب 

ابو طالب :: اي هاي تربيتي جا تريده يكف و يخلي القاصي والداني يسولف باخته جدامه 

جبران :: جا من هيج انشدها ياهو هذا رفيجها العمه عيون سليم لاجهلها 

عباله بهذا كلامه يحرض عمي ع بنته ما يدري عمي ابو طالب عنده عنبر تصعد وتنزل ويا الهوى 

ابو طالب :: من گد ما مكثر كعدات بين الحرم عذرني عمي بس صايرة سوالفك سوالف نسوان 

:: ابو طالب احترم نفسك انا عمك 

:: خل عمي يحترم عرضي اول وبعدين انا احترمه 

:: جا ياهو سواها الا وحيد عاشگها و هل اغتاظ عليها واجه للوليد و فگس عيونه 

انتبهت ع حركة من جهة ورشة غفار فجيت السعف اعاين شفت آمين ايده ترتجف من الغضب و عيونه ما ترمش عن جبران عاين منا ومنا كض حديدة و راد يمشي اله

ما اشوفنه الا غفار جراه من ايده شمر الحديدة و دفعه لداخل الورشة و آمين يتلوى وياه يريد يطلع بس غفار دفعه حيل دخله 

بقيت صافنة مستغربة تصرف آمين ليش غضب ع جبران هيج انتبهت ع كلام عمي ابو طالب من ردع جدي جبران ما مخلي يتطاول أكثر 

ابو طالب :: وهسه شتريد اندار ع بنتي و اطكنها و اجيبن سلسلة وقفل واربطها بالحجرة موش ما اعرف شمربي انا.... ولك عنبرة هاي تسوى اولادك الماتوا و العدلين و لو كضت التفكة بيدها ادخن وهل مرة وكفت جدامي وحجيت عليها مرة الآخرة انسى انت عمي واحط الجيلة براسك 

صك جبران ع اسنانه ترتجف العوجية بيده راد يمشي صاح ورا عمي ابو طالب 

:: اوكف عمي وين ماشي 

تگرب يمه مدري شگال اله يحجي وياه بهمس بس مبين جبران شوية و ينفجر من الغضب تگرب ع عنبر 

جبران :: عذريني جدي ع صار امس 

راد يكضها يحبها وهي ابتعدت عنه بساع طلع جدي كضيت گلبي بين اديَّه لايروح يحجي كلام يعصب جدي وهو مريض 

تگرب جدي دكدك ع زند جبران بعوجيته وگاله 

هاشم :: كف عباتك وامشي جبران وهاي الكاع بعد لا تدوسها رجلك لا اخلي الويلاد يرحون للمستشفى يطلعون سليم الك امدد بالخشبات 

راح يجر برجله يدردم عمي دخل وياه جدي الديوانية رادت تمشي عنبر صاح بيها جراح 

جراح :: تعاااي 

البنت جن عود يابس صارت نگطة دم ما ظلت بوحهةة تكربت تقدم رجل وتأخر الآخرة اجه غفار بساع كضه من ايده ودفعه عنها زمخ بيه بصوت خافت 

غفار :: حظك اطيحه لو حجيت حرف وياها لاتبقى حجاية توديك حجاية ترجعك 

رص جراح ع اسنانة بغضب أشر الها براسه 

جراح :: روحي يم البنات 

طبت تركض بالخبز وعباتها وراها طايرة البت كلنه نعرفها ماعدها هل سوالف بالها يم ثنين.. الدراسة.. ونگل علوم 

قسيم شاف عمار شغل السيارة و راح ورا الولد بدوا شغل بالبستان كصوا النخل اللي احترگ و زرعوا تالات صغار و شالوا الزرع الاحترك هم و گبلوا الأرض حرثوها 

صبيت الهم تغدوا بره بالگاع وصبيت لسجدة وكعدت يمها اساعدها جي ايدها بيها كانولا ما حجيت وياها كلش زعلانة منها 

سجدة :: كافي بعد ما اريد 

براءة :: من امس بلا اكل وراج علاج اكلي 

:: من اجيت وانتِ ما عاينتي بوجهي بس سلمتي عليَّه وبعد ما شفتج ولا حجيتي وياي 

:: يعني اگلج خل نشوف حل تروحين تزتين روحج للموت هاي عود انتِ الگوية وجدي يسميج سرحانة هيج تسوين 

عاتبتها وهي تنهدت بوجع كضيت ايدها امسح عليها بحنان و اتوسل بيها 

:: خل نحجي لغفار والله يوگف وياج و يجيب حگج من مصطفى مربع 

:: ديربالج تسوين شي من وراي و تروحين تحجين اله براءة 

:: ليش شنهي خايفة منه لا

:: گبل لا احجي اله انا اعرف جوابه و اعرفنه بس يدري ما يخلي صبح يطلع ع مصطفى

:: جا ليش ما تقبلين نحجي اله 

:: من العار 

سكتت انطيها مجال تحجي جرت نفس بحسرة 

سجدة :: من اختفت بينة و غفار و قسيم رسوهم بالگاع لو طلعت سالفتي شيصير بيهم 

:: انتِ الضحية سجدة لا تخلين كلام امي يأثر عليج 

:: موش كلام امي هذا واقعنه الف حجاية و حجاية راح تطلع محد راح يگول وحش بشري مايعرف لرحمة ولا للفطرة معنى ونفسه دنت ع طفلة.... لا.... كلها راح تكول السالفة صارت من هي جبيرة واكيد الصوج منها غرت.. انطته مجال و اولهم امي حتى تحمي وتحافظ ع دمه راح تجذبني وتگلهم هي جبيرة 

:: ماعليج بالناس وامي محد يصدگها اصلا 

مددت بوجع دارت وجهه للحايط تخفي وجعها عني اللي أحسنه وجعي و يروحي 

سجدة :: تعبانة براءة وبعدين نحجي 

غطيتها عدل و شلت الصينية و طلعت من يمها 

الشغل كومة صار واكفة يم الغسالة اعزل الملابس البيض ع گتر اغسلهن وحدهن حتى لا باقي الملابس تذب عليهن صبغ و اشوفن قسيم دفع الباب و فات ما يشوف جدامه اخذ سلاح و صم جيلات بيده يعبي بالشاجور

:: شكو قسيم وين رايح 

ما رد عليه نفضت اديَّه من الماي و جريت شال خليته ع راسي و طلعت ورا مديت راسي من الباب شفته رايح صوب بيت عون 

ركضت الديوانية الولد جانوا گاعدين يرتاحون رجليَّه وحدة تسبگ الثانية طبيت عليهم من دون ما ادكن الباب حتى 

براءة :: الحك غفار قسيم اخذ سلاحه و مشه لـ عون 

ركض غفار جدامي و عمي ابو طالب ورا اعاين لجدي يريد ينهض من مجانه حيله مات لطمت ع خدودي شلون حجيت جدامه ركضت اله اهدي عليه 

:: لاتخاف جدي ماكو شي راحله غفار 

:: عينيني خل اوكف ع طولي جدي 

كومته ساندته اجت عمتي إصالة هم توها فتحت حلكها تريد تنشد شكو سكتت من شافت حال جدي اجت بساع ساندته وياي 

إصالة :: شكو بوية شبيك 

هاشم :: راح يكتله راح يگتل عزيز گلبي راح يكتل اصغر أولادي 

جدي روحه من الدنيا عون جي هو رباه ع ايده حاسبه ابنه موش حفيده سمعت صوت الجيلات من ثارن نخمش گلبي و جدي وكع من طوله صحت لعلي 

براءة :: ولك اركض ماي و علاج جدي تلگاه بحجرة جدة 

ركض علي و رحمة اجتنه بساع هم تمرغ بـ أدين جدي و فتحت زرار دشداشته و عمتي شربته ماي و علاجه  

:: كوميني جدي اريدن اشوفنه 

:: يگولون غفار كضاه والله ما صار شي اكعد 

رفض يكعد ما يرضه يصدك كل و ظنه نضم عليه لأجل صحته الا يشوفه بعينه ياله يقتنع لبست عباتي و سندته طلعنا

صوت صياح من بيت عون و باب الحوش مفتوح ع عرضه طبينه غفار ماخذ سلاح قسيم و واكف بينهم حاجوز 

قسيم :: هاي ثاني مرة تمشي لتركيا تقنعني هاي روحاتك كلها تدور امك 

عون :: وياهو انت حتى اقنعك صدكت و الما صدكت يطبك مرض 

قسيم ندار ع غفار يلومه جي ما يخلي يمد ع عون 

قسيم :: شفت بعينك جسارته اليوم اكص لهذا لسانه بيدي 

عون :: حتى اكسرها لايدك گبل لا تنمد عليَّه بيك خير روح رجع بنتك مو جاي تنعثل براسي 

قسيم :: وانت بيك خير روح رجع امك 

تعاركوا واحد يعير الثاني و جدي بيده العوجية ذاب ثگله عليها من شاف عون بخير جر نفس براحة و بقى ساكت يعاين الهم 

قسيم :: وحگ الحسين اذا طلعت تتواصل وياه ارسلان و تعرف مجانه و اطمطم اله ع قبله اذبحنك عووون 

هز ايده عون مستهزء بيه و قسيم هجم عليه صاح بيهم جدي 

هاشم ::: بعدددد بعد واحد يعاير الاخر بعرضه كضولكم سيوف واحد يگتل الاخر وخل الوادم تشمت بيكم يله سباع 

قسيم :: جدي 

:: اطلع بره انت ولا ترويني وجهك بعد اطلللع 

طلع قسيم مغتاظ و ركع الباب ورا خلا طلاكة منها وكعت من الجرجوبة صاح عون ورا 

عون :: تعال زمال ذب فلوس الباب و اتكسح 

خزره غفار وهو رفع حاجبه 

عون :: و شمالك انت الاخر تعاين صفح بس لا هم شاك اعرف مجان ارسلان و بينة و ضام عليكم 

سكتوا كلهم و جدي نشده نبرة خشنة 

:هاشم :: شجنت تسوي بتركيا 

عون :: كالوا امي هناك ع اساس بـ طرابزون و طلع جذب مثل كل مرة يضحكون عليَّه و گلبي الاغم يصدك بيهم 

هاشم :: عون اخر مرة انشدنك تعرف مجان ارسلان ؟

ضحك عون موش ضحك فرح لا ضحك الكمد والحزن 

:: صدك تحجون انتوا ولكم دكيت القرآن الكم و كضيت شباج العباس ما اعرف مجانه شتردون بعد ياله تصدكون احلف الكم باليهود بالاصنام تره اخوي الرايح الي حزام ظهري و عضيدي ما اعرفنه عايش لو ميت 

سكت جدي و كام راح وياه عمتي إصالة ساندته و عمي ابو طالب دكدك ع جتف عون بمواساة 

ابو طالب :: لا تشيل بخاطرك عمي مصيبتهم موش هينة و الولد موش مثل البت 

غفار يعاين اله بهدوء زفر عون أنفاس بوجه متگدر صارت عينه ع دراجة ارسلان دمعت عيونه دار وجه بساع يبلع ريكه بوضوح الغصة تصعد و تنزل بلعومه 

من يوم اختفى ارسلان وهو مثل الجسد بلا روح يمشي بلا وعي هو اخوه الوحيد عايشين وحدهم بالبيت السكوت مغلفة لا اخوه ميت و يگدر يبچي براحة  

ولا يگدر يعيش چن ما صاير شي 

واگف بين نارين نار اخوه و نار اهلي وكلهم يكولون ارسلان هو اخذ بينه بين رجاء ينهش بيه، ويأس يخجل يطلعه

عاينت لـ غفار اشرت اله بعيوني لا يصير وياهم عليه 

صفن عون و الجكارة جمرت بيده وهو ما حاس بيها. چن يراجع ملامح اخوه وحدة وحدة،

صوته، ضحكته، آخر كلمة گالها اله.. وهو رايح بلا موداع 

الفگد أصعب من الموت لا عزيزك ميت و تروح يم گبره تبجي و ترتاح ولا هو راجع الك.. بس انتظار طويل،، ثگيل، 

چنك جاي تنتظر شخص ضايع بدرب سكته وحدة روحة بلا عودة وانت الوحيد الباقي واگف تدور تنتظرة اله رجعة 

نفض الرماد من الجكارة دائما من يضيج خلگه يشعل جكارة بس ما يدخن جي عنده ربو سحب نفس قوي وغفاى مح بدل ما يطفي ناره ذب فوكاها نفط 

غفار :: جنت يمه مو؟ 

ضحك عون تك خد بسخرية بس الوجع مرسوم ع عيونه رسم 

عون :: اي بعد روحي فد مشتاقله كلش و ابشرك راح تصير خال 

كلامه استهزاء جان عبالك روجة هوى ونفخها ع الرماد خلى يشتعل أكثر كام اله بساع جره من ياخة قميصة و دفعه دك ظهره بالحايط خانگة 

غفار :: راسي ما أكدر افعه بين الناس وانت تضحك عون 

:: جا شتريد اكلك احلف ما تصدكون قررت اجاريكم واصدك الجذبة 

:: تدري اذا عرفت بيك تعرف مجانه و ساكت اندمك عون ادمرنك وعلي اخليك تتمنى الموت و ما تشوفه 

دفعه عون عنه يعدل ياخة قميصة شال ايده أشر ع عمي 

:: هاي جدام عمي ابو طالب اذا طلع ارسلان مسويها صدك اجيبنه مجتوف و اشمرنه حدر رجليك و بيدي احد السجينة الك تذبحه 

غفار مغتاظ منه كلش عافه و مشه بدون رد جراني وياه و ردينه لبيتنا بقى بس عمي ابو طالب وياه

شاف قسيم واكف بره و يصيح و جراح كاعد يمه يدخن باله موش يمه اصلا 

قسيم :: مستعد احلف عليه يعرف مجانه وساكت 

غفار :: گالك ما يعرف شنهي طلابة هي 

قسيم :: انت لو مخليني عليه اخلي يغرد وعلي 

:: د مد ايدك عليه وشوف شسوي بحالك 

:: هاا هيج صار الحجي 

:: من زمان هيج عون ما تتگرب اله واي واحد يمسه اخلي دمه بطوله وقد اعذر من انذر 

رحمة :: امه اكلت گلبه كلما تشوفه و سمعته كلام ان ما أخذ ثأر حرگ الأراضي من جده جبران حتى بعد ما يدخل للبيت الا قليل يجي تالي الليل و يطلع من وكت من غبشة گاعدة عنبر تاكل شامية 

غفار :: هسه عوفنه من فضيلة... غفار دومه شراي الطلايب شلون يعيلون بيه ويسكت هيج 

براءة گاعدة بيدها سبحة خرزاتها من طين و بيدها ابرة تنقش ع كل خرزة اسم من اسماء الله الحسنى 

براءة :: والله انا اتمنى لا يروح ولا يدور ثأر وياهم عبنهم ناس ما تعرف الله من اهد ما گتلوا عمتي خميلة و رجلها انا اشوفن وجوهم ممسوخة تكول خنازير 

ترفة گاعدة تخطط دفتر أزل و تدرسها 

تنهدت بتعب لملمت كتب اختها و الدفاتر وكالت توجه كلامها الها 

:: خطية سجدة تعبانة كومينا نطلع بره اعلمج 

سجدة :: مابيه شي ابقى خطية خاف باردة عليها بره 

:: لا الجو حلو و همين كتبتها باقي بس احفظها نگعد بالحديقة 

اخذتها و طلعن بقينه اني وسجدة بس خلص المغذي كمت سديته و رجعت غلاف الكانولا وهي گالت 

سجدة :: تدرين ليش غفار سكت عن حگه من بيت جبران رغم هو يسمونه بزر العيالة گبل لا يتغدون بيه يتعشى بيهم 

باوعت الها اكو احساس ينده بداخلي ان السبب ورا سكوته راح يكون اسمي تجاهلته و سئلتها 

:: لا ليش 

:: عبنهم يردونه يندك بيهم حتى يذبونه بالسجن وما يتنازلون عنه بعد 

:: و يجون عليجن شلون البارحة من استغلوا الوضع واجوا حرگوا الأرض 

:: لا ما خايف علينه عينه مأمن جدي وعمي ابو طالب.. قسيم.. جراح كلهم موجودين... وحتى عون موش گليل شر 

:: لعد ليش ما ياخذه 

:: خوفه كله عليج لا ينسجن و ينفضح سرج و تضعين اختار السكوت لأجل تبقين بـ امان 

بقيت ابلع بريگي التوتر اخذني احاول اضيع الموضوع 

:: سر شنو ا

:: اعرف بسالفتج انا رحمة.. جنت شاكة و غفار حجالي و سلمني قضيتج ومن يرتب الوضع هو انا راح ادافعلج واجيبن البراءة الج هم 

شبگتها حيل وابجي بس هل مرة ابجي فرح احس من احجي الحقيقة لو احد يعرفها حمل ينزاح عني من شخص يعرف و يهون عليه و يكلي اني وياج كأن نصف مشكلتي تنحل 

:: اشش لا يسمعج عباله انا بجيتج النوبة يجي يطگني وانا بهل حالة 

:: لا ما يضربج يحبج كلش اشوفه دائما بصفج واگف و كلجن يحبجن شلون أمانة من ابوه ولازم يصونها 

اسولف الها اللي شفته بهل كم يوم وهي مبتسمة تستمع وگال 

:: انت تحجين وياه غفار 

:: لا قليل تنعد ع اصابع 

:: جا شلون تفهمينه هيج عبالك كتاب و مفتوح بس الج 

سكتت حسيتها تريد تلمح لشي... نفسه اللي حجت عنه فضيلة وكفت اتذكر كلامه.... من اعزاز اهلي... 

 

نفضت راسي انفض وياه شكو فكرة ثانية  

براءة :: كضيت كل شغلي بليل حتى الصبح يخف عليَّه توي غفيت واسمع صوت رحمة تصرخ صريخ لو تصرخة يم جثمان ميت يهتز 

طلعت اركض الها و غفار جدامي ركض الها حافي باب الحوش مفتوح وهي طايحة ع رگبها بالگاع 

تصرخ وعيونها شابحة صوب 

رحاب طايحة ع گاع مذبوحة من الوريد للوريد و ثوبها متروس دم....