رواية ليليان الفصل الثاني عشر بقلم زينب نور
- ليليان ،، صدك شلوون عرفتي ؟!!
- اممم كوليلي اعراضج شنو جانت بوكتهه ؟
- ليش .. دقيقه حضره الدكتوره ولج بعدج انتي مامتخرجه واصلاً معهد مو كليه جايه براسي
- عووبه غير داسئلج حته اعرف
- ياا واني عبالي صدك عرفتي ..
- اي شبيج ايجوز عندج التهاب بالاذن ، راجعي دكتور
- اي او اراجع الدكتوره الاخصائيه جمانه موو ،، ههههه
- هههه اني الج اصطبريلي
- منتظرتج حبي
- يله ولي فوك ماحجي وياج وانصحج
- يسلموو كلبي انتي
- باي عمري
صارت الساعه ب ٩ ونص شو ماكو وحده من البنات ..
خير ان شاء الله ..
اتصلت ع اماني ،، ماكوو رد ..
وشهد كذلك ..
ماحب اروح للمحاضره بدونهم ..
رحت رجعت للنادي ..
شفته موجود سامي ..
امم وين اروح وماكو مكان ..
شافني واكفه ، كام من مكانه ..
مشيت وهو واكف بنفس بمكانه ينتظرني ..
وصلت يمه ..
- كالي ،، اتفضلي كعدي بمكاني !
شفته ضايج مثل المهموم ..
مايعرف وين يروح ..
سألته اذا يريد يكعد..
- خاف اتريد تكعد ؟؟!
- هههه وانتي وين ترحين؟
- ليش ضحكت ؟ عادي اروح اكعد بلحديقه !
- هيج ،، بوحدج ؟؟
- اي شكو بيهه
- مو يكولون عليج مخبله
- هههه لا مايكولون
- لا كعدي اريد احجي وياج
- خير ؟!
💎💎💎
- سامي .. كعدت الصبح ..
نزلت جوه ، شفتهم يتريكون ..
وامي وياهم ..
صحيح مثل الي انحلت المشكله ..
بس هم وجهم كلش ثكيل عليه ..
- بوستهه وكتلهه ،، صباح الخير ماما
- صباح النور
- اريد احجي وياج
- شكو سامي ..
- آسيل !
- شبيهه ؟؟
- ماريدهه
- شنو قصدك ؟!
- يمه يعني افسخ الخطوبه مداكدر اتقبلهه
- وولك شلون ، صارلكم شكد سوه شنو تفسخ يمه من وين اجتيني بهاي السالفه !!!
وكفت وكتلهه ..
-ماريدهه هي بلكوه ماحبهه ولا اطيقهه
- من شوكت هلحجي ؟
- يمه شكم مره كايلج هذا الحجي بس انتي ماسمعيني ولا تهتمين ، اجيتي خطبتيهه الي بدون ماتعرفين اني موافق او لا ..
- باوع عليه اذا تريدهه او لا اني معليه واذا فسخت بعد ماعرفك ولا تعرفني ولك فوك ماسويت مشاكل النه وسمعته لأبوك صارت مو زينه من وراك ،، هي الوحيده التكدر عليك ..
- هيج صارت يعني ؟!!
- ايي
راحت لغرفتهه ..
شفت ابويه يباوع عليه ..
رحت احجي وياه ..
- يابه شتريد اسويلك بس خلصني ماكدر ازوجهه
- روح احجي ويا امك اني معليه بهلسوالف
- بابا اني ابنك ساعدني
- ولك سنين اني اساعدك ، ماردت منك شي بس تبيض وجهي تالي هيج اسوي ، اربع سنين بلكليه اشجنت اسوي !!
- مرتضى ،، بابا اهدأ ، الي صار صار واذا ميريدهه لآسيل شكو بيهه يفسخ الخطوبه هسه احسن من بعدين
- لا مستحيل يصير هذا الشي
ماعرف شكله ، سكتت ..
عرفت بي مراح يسوي شي ..
عفته وطلعت ، لحكتني اختي أيه ..
- شكو ايه ؟
- اذا تريد اني اكدر احجي وياهه وهيه تفسخ الخطوبه وانت ماعليك شي
- اي حته امي تتبره منج
- لا يعني اني احجي وياهه بطريقه غير مباشره واشوف
- اهاا ؟
- ايي
- بس هيه تحبني ماعتقد تقبل
- اني احلهه
- خوش واذا صدك حليتهه مثل ماتكولين ، شتريدين يجرالج
- ماااشي سامي
بلكت هيج وتبطل اسيل ..
صعدت بلسياره ..
رحت لياسر ..
- ولك شلون بلوه ياسر !!!
- شكوو ؟؟
- اسيل ، حته اسمهه ماحب الفظه
- هههه عادي تتعود
- انجب شتعود .. ماكدر اعيش وياهه قررت افسخ الخطوبه
- صدك ؟!! بعد احسن
- موو ؟
- اي اكيد واهلك ؟
- ماقبلوا بس داشوف هسه ايه راح تحجي وياهه
- ان شاء الله خير
- ولك انت شبيك هيج بارد ورسميات ؟!!
- ههه مابيه شي
- لا بيك ، انت بالك مو يمي اصلاً
- لعد وين؟
- الله اليعلم وانت هم تعرف..
- اكو وحده جديده اجتي تشتغل ويايه بلصيدليه ،، اسمهه أريج شلون من بنيه حبابه ومحترمه ..
- شو باوع عليه ،، يرادلك راجي يصحيك
- هههه ولك صدك بنيه
- اممم you're in love
- ههههه ماعرف ،، ثاني شي انت تحجي انكلش ماعرفتك ساميش !!
- لا اعجبك اني
- يله اني حروح قابل مثلك اضرب الدوام
- ايي ولي ، امشي اوصلك ؟!!
- لا اني اروح بسيارتي ، محتاجهه
- موعد؟!
- لا ولك بس احتاجهه ونصيحه مني اسيل تحبك يعني شبيهه ..
- اشش لا تكمل ، اني طالع
- سامي !!
عفته وطلعت ، ضجت حيل ، اني ماريدهه ليش الناس يقررون ابدالي ..
ليش هيج بداخلي كلش مامرتاح ..
لا تكون حوبه ليليان بيه ..
واني فوكاهه ماكلتلهه ..
خلي اروح احجي وياهه بلكي ارتاح ..
خابرت ليوسف ، يوكفلي بلباب حته ادخل وياه ..
خطيه هذا تورط ويايه ..
وصلت ، سلمت عليه وطبيت ..
اتفاجئت بي سألني ..
- شعجب تجي هنا ،، صارلك كم مره تجي ؟؟
- ابتسمت وكتله ،، عندي معرفه بشخص هنا ومرات التقي بي
- اهاا ؟!!
- ايي
- اني استأذن عندي محاضره ..
- اكيد ، تعبتك ويايه خويه مشكور
- لا ولو بأي وقت ..
- تسلم !!
رحت ادور عليهه ، كلت اكيد بلنادي ..
دخلت شفتهه كاعده ..
رحتلهه وكعدت بدون ماكول شي ..
مداكدر احجي ، ليش هلضعف ..
عفتهه تروح واني رجعت كعدت ..
ماكدرت اكولهه ، شكد جبان ..
لا مو جبان بس ماريد اضوجهه بكلامي ..
ولو هو فعلي جان اقوى ..
ضليت كاعد ، ماعندي شي اسوي ..
واني شغلي ماكدرت بعد اشتغل بي ..
ابويه ماقبل اشتغل ، يظن مالي مكان هناك ..
وشلون اذا دمرت حياه اشخاص ثانيه ..
الله ماينسه احد ..
دمرت حياتهه واني هم ..
وره فتره رجعت ..
كلت هاهيه ،، مصيري احجيلهه ..
هي تالي راح تعرف ..
كعدت البنيه ،، حبابه مو مثل اسيل ..
من هاي البنيه عليه ، اسيل شجابج عليه اله انتي ..
- لا كعدي اريد احجي وياج بموضوع !!.
- ليليان .. خير !!
- احنه تقابلنه عده مرات خارج الجامعه..
- صدك ؟! ماذكر ، وين؟
- بلمستشفى !!
- سوري ،، مداذكر
- عادي ،، اني الي سويتلج التحاليل من جنتي مريضه ، هسه اذكرتي ؟
ليليان .. اي هذا نفسه الي صخم حياتي ..
بكل عين يحجيهه ..
شلون جيل للمستقبل ..
اذا اكو هيج نماذج ، شلون راح تكون حياتنه ؟؟
- اي اذكرتك
- اي وو ..
- شنو ؟!
- مراح تكولين شي ؟
- لا
- ليليان !!
- ابتسمت .. تذكر اسمي ..
- اي اكيد ،، حياتي تغيرت من عرفتج ..
- صدك ؟ شهلصدفه اني هم وللأسوء !
- اعرف ،، باعي اني كلش آسف ، متصورين اني شكد ..
- كمل ،، ولو مراح يغير شي
- والله ضميري ديأنبني ،، مامرتاح ، والله مو قصدي ، سامحيني
- اتريد اسامحك ؟
- ايي ، ادري دمرت حياتج واني كلشي مابيج
- انت شمعرفك اني عرفت مابيه شي .. ايجوز لسعني اظن اني مريضه؟
- المره الاولى الشفتج بيهه تختلف عن المره الثانيه
- ومن هاي تأكدت ؟!
- ماعرف شكلج
- سامحتك تكدر ترتاح هسه
- شكراً ،، شتريدين اني حاضر ، اي وقت اني موجود
- تسلم ماتقصر خويه
باوعت عليه مبتسم ..
- شبيك ؟
- ولا شي ، راح اجيب شي نشربه ، شتشربين؟
- بكيفك
سامي ،، ارتاحيت من كالتلي "مسامحتك" ..
فرحت ، كمت اجيب شيكولاتة حارة ، دنيا بارده ..
- تفضلي !!
- شكراً ..
- ولو خيتي
- ماريدك تفكر غير شي بس ماحب كلمه خيتي يعني كول اختي ابدالهه عادي !
- ماشي اختي ،، بس ليش؟
- هههه اتحسسني اني جبيره وعجوز
- ههههه لا انتي بعدج ابدايته حياتج
- ايي ،، دير بالك ، انتبه من اسوي تحليل مره ثانيه ، هواي مشاكل وطلايب من وراهه
- ايي اصلاً جنت عبالي راح تجون علينه ..
- ههه لا مو لهيج الدرجه ،، مانحب عشاير وهيج شغلات بس اكو بيهم يحبون هلشي
- اكيد ..
ليليان ،، بديت اشرب واباوع عليه ..
ماكدر اتحكم ،، بأبتسامتي ..
ياربي شنو هلجمال ، هسه اكيد مكبل ..
بسرعه راحت عيني ع ايده بيهه حلقه بليمنى ..
ياا خاطب .. لو هنا شهد واماني جان ماتحركن ابد ..
ايي صدك ، خلي اتصل مره ثانيه شو ماكو خبر عنهن ..
اخابر ماكو ،، دكيت ع ابو الخط مالهن هم ميجاوب ..
اووف شصاير ،، الساعه ب ١٠ ونص ..
ردت اخابر اهلن بس ماريد اقلقهم ..
سامي .. شفتهه محتاره وبس تخابر ..
- سألتهه ،، شبيج ؟ اكو شي ..
ليليان ،، نزلت الموبايل من اذني ..
وكتله ..
- اي صديقاتي ماكو، اخابر مايجاوبن ، مغلق ، وهنه كالن نداوم اليوم ..
- اي وهسه تاخر الوقت حتلو ازدحامات جان وصلوا ، بس لا صاير وياهن شي !!
خوفني ،، باوعت عليه ..
ابدال مايطمني ،، يخوفني ..
قلقت عليهن ، خاف صدك صاير وياهن شي ..
دكت الموبايل بيدي ..
فززني ،، شفت الرقم غريب ..
- الوو ، منوو؟؟
- انتي اسمج ليليان ؟
- اي
- شتقربين من اماني او شهد ، رقمج هواي بمكالمات الفائتة بموبايلهن اثنينهن ؟
- صديقتهن اني ،، فدوه شكو هنه وين ؟
- البقية بحياتج !!!
- شنوو...
