رواية لست غجرية الفصل الثالث عشر بقلم روز الحيدر
بلع ريكه بصعوبه
باهر : طلبت مني**** لو تجي تحجيلج الحقيقة
لزمت راسي
وردة : لااااا.... مولهدرجة القرف... لااا
باهر : ماصدكتها...كالت اسأل جدتها.. و.. ومن سألتها
كالت صح.. ورد جوري مو غجرية وأمنتني ماحجي
شي حتى ماتزعلين …خلتج تفكريهم ميتين افضل مما تعرفين الحقيقة... وشلون أمج تخلت عنج وسلمتج بأيد ما ترحم
نهضمت قربتله وبجيت
وردة : وهيج خذلتني مثلهم.. مثل ماتخلو عني انت
هم تخليت عني..
دفعته من بصدره
وردة : ليش؟
لزم وجهي
باهر : جوري والله خفت تعرفين الحقيقة
وردة : وتخلي ثمن خيانتك ألي؟ خايف؟
لو جنت مرتاح تلعب على حبلين؟
باهر : لا وداعتج... لا
سكت
وردة :شنو ذنبي... ليش هيج يصير وياي!
باهر : خلاص.. ماعوفج بعد.. جوري.. جوري بس
باعي
رفعت عيني له مغوشه من الدمع، بتسم وكأنه يتمسك
بأمل أخير
باهر :أمشي نروح منا.... نعيش حياتنا مثل مارسمناها
هزيت راسي ببطء
وردة : أكرهك...باااهر.. أكرهك
ضمني الصدره بقوة، يخاف وردة تضيع منه
باهر : أحبج... ياوجع گلبي... والله أحبج
هل مره حضنه يحاول يلم شتات افعالة.. بقيت واكفه
وجامدة، بدون رد فعل لا حضنته... ولادفعته ضعت
من يوم العافتني حبوبتي مشاعري تبلدت.
ثواني بس ورفعت أيدي بهدوء دفعته
وردة : عوفنيي.. لاتجيسني
باهر : جوري
وردة : كلكم كسرتوني.. الدنيا مانطتني واحد شهم
وبي خير.. تفووو
باهر : فهميني شنو لي تردي؟
وردة : تعبت... مااريد شي بس عوفني.
باهر : خلاص عرفتي الحقيقة.. جهزي نفسج حتى
نروح
ضربته بصدره
وردة : وين أروح؟... ولك فهمني وين اروح؟
لزم وجهي
باهر : بيتنا ينتظرج... مااخليج تحتاجين شي والله
ضحكت بأستهزاء
وردة : اي... وخيانتك؟
باهر :كلش زين تعرفين أحبج وماأبدلج بالدنيا كلها
سكت.. رفع وجهي
باهر : جوريتي... يله حبيبتي
نزلت عيني
وردة : ماعرف... خليني شكم يوم أفكر
شد على إيدي بسرعة
باهر : لا… ماكو وقت
رفعت عيني له، ملامحي تعبت
وردة : ليش مستعجل؟
باهر : لأن أخاف أخسرج…
ضحكت، ضحكة مكسورة
وردة : أصلاً انت خاسرني من زمان
سكت.. تنهدت صدري يوجعني
وردة : بس…
سكتت، بلعت ريگي
وردة : ماعندي غيرك
رفع عيونه بسرعة
باهر : جوري—
قاطعتـه
وردة : لا تفرح… مو لأنك تستاهل
إشرت على نفسي
وردة : لأن الدنيا كلها فارغة بوجهي… وانت آخر
واحد بقى أستغل هاي فرصتك تثبت نفسك
قرب خطوة، صوته واطي
باهر : يعني… تجين وياي؟
مسحت عيوني وجهي من الدمع
وردة : الغركان… يلزم بسباح
رفعت عيوني وباوعتله
وردة : وانت وجع…بس يمكن أعيش بيه
تنفس بارتياح واضح، قرب يريد يلمسني
رجعت نص خطوة
وردة : لا تفهم غلط…
نظرتله ببرود
وردة : أني ما سامحتك
هز راسه بسرعة
باهر : ما أريد سماح… أريدج يمي وبس
لفيت وجهي
وردة : لا… راح تحتاج أكثر من هيج
لأن إذا جرحتني مرة ثانية… ما راح أبقى
سكت… فهمها مد إيده بهدوء
باهر : صار... يمتى نروح؟
وردة : ماعرف... خليني أكمل شكم شغلة وبعدها
أكلك
هز راسه
باهر : دائماً منتظرج
وردة : ممكن تخليني؟
هز راسه
باهر : تمام. اروح وشتحتاجين اتصلي
وردة : خوش
باهر : وسلطانة حسابها يمي
ضحكت بأستهزاء
وردة : وشتسوي؟
باهر : هي وعدتني ماتأذيج
وردة : مايهم.. شتسوي بس عوفني أرتاح
باهر : نتبهي على نفسج
هزيت راسي، طلع، رحت سديت الباب رجعت الدنيا
ضاكت بعيني.. وماتركتلي باب غير هل خاين.
وكفت كبال المراية معلكة بالحايط وتحتها كومدي
نزعت التنور اريد اغير ملابسي.... طلعت المبايل من
الجيب.. ونسر بعده والخط مفتوح..
بدون كلام سديته شمرته المبايل على ميز رجع اتصل
مارديت خليت مبايلي صامت... بعد ماسبحت قفلت
البيبان زين لفيت راسي ونمت
فزيت على صوت الباب يندك بقوة... نهضت بسرعة
الدنيا بدت تضلم ماعرف شكد نمت.. فتحت الباب
سمر وسهام.
سهام : صدك جذب ولج عبالنه صاير بيج شي
وردة : جدة الله يحمها، تكول اذا كثرت اهمومك
نام عنها واني من كثر الهموم العلية ماعرف شلون
نمت
سمر : شبيج؟
وردة : شني نحجي بالباب فوتو
دخلنا سهام بايدها صينية مغطيتها كشفت وخلتها
كدامي
سهام : أمي سوتها كالت اكيد وريدة ماتاكل وحدها
وردة : فدوة العمرها تعبتها وياي
سهام : شسالفه غير اختنا
كعدنا ناكل سوه
وردة : دريتو....اني مو غجرية..يعني اصلي مو غجر
سهام :أي البارحة سلطانة حجت كلشي
وردة :يعني ماجنتو تعرفون؟
سهام :لا والله بس اهلي يعرفون وأمي كالت الأم لي
تربي مو لي تولد
وردة : صح.. ولدليل جدة الله يحمها نطتني حب واهتمام لو جانت امي نفسها ماتنطي ألي
سهام : شفتي
وردة : اممم.. وشكالت سلطانة؟
سهام : كالت امها جانت تخصصلي راتب حتى اربيها
وبعدين عرفت عد جدتها.. راحتلها ونكطع عني.. و
سكتت
وردة : وشنو؟
سهام : كالت جنت اخذ نص الفلوس مقابل اسكت
ومااحجي شي الجوري
بلعت ريكي بتوتر
وردة : كالت ليش ذبتني بين اديها؟
سهام : لا ماكالت، بس كالت تنطي الفلوس لو مرات
دزهن حتى ماينقصها شي
هزيت راسي
وردة : لا حتى مايأنبها ضميرها
سكتنا كملت اكل بعدها بقينا نسولف
وردة : يبنات قررت قرار
سهام : شنو ولج ام القرارات؟!
وردة : راح اطلع نهائياً من الغجر
سهام : وين ولج؟
وردة : كلت الباهر ياخذني خلاص نبلش منين ماوكفنا
نتزوج وهاي هيَ
سمر : وسلطانة تعوفج تاخذين باهر؟!
رفعت حواجبي
وردة : طبعاً لا هذا صهرها العزيز
سهام : عزااا جوري اشم ريحة مصيبة براسج.. عوفي افكارج
وردة : هههههه
فاهمتني بس لا هل مره مو اني لي اسويها
بلعمت
سهام : منو؟
وردة : انتِ وسمر..
سمر : اني جاهزة بس دفعيني ادربه
سهام : شنو احجي
وردة : كلشي ماتسون غير تكولون باهر وجوري
راح يتزوجون وياخذها ويطلع من القرية
بأستغراب
سهام : ليش؟ شنو غايتج؟
وردة : أني وانتو نعرف رند تموت باهر ولو سمعت
راح تسوي المستحيل حتى تخرب
سمر : وترديها تخرب؟
وردة : لا بس اذا صار الي بالي ساعتها يامغرب خرب
سهام : صح مافهمت اخر جملة بس تدللين من باجر
تلكيها بحلك الصغير والجبير
وردة : لااا مو باجر يومين وسصيتي
سهام : هاي هيَ
بقينا نسولف ورحت اخذت موبايلي شبه يريد يطفي
من الشحن بكد مااكو مكالمات فائتة من باهر ونسر
خليته على شحن وكعدنا اني والبنات نلعب رجع باهر تصل رديت
وردة : الو
باهر : شلونها جوريتي؟
وردة : بخير.. وين انتَ؟
باهر : سهران اني ونسر
وردة : امممم
باهر : مشتاقلج نبضي
وردة : امم
باهر : منو يمج
وردة : سهام وسمر
باهر : هم زين لاتبقين وحدج
وردة : ان شاءلله.. مع سلامة
باهر : أحبج ياوجع گلبي
سديت الخط، سهام باوعتلي
سهام : ترا باهر يحبج
ضحكت
وردة : مو كلمن حجى وياج كلمة حلوة معناها
يحبج
سهام : بس باهر..
قاطعتها
وردة : اعرف يحبني بس يستغفلني.. وهاي فرصة
اما يستغلها ويرجع... عزيز گلبي.. او يثبت قذارته
سمر : ترا رند هسه تسوي المستحيل حتى تسحب
باهر
وردة : لو قوي ماينجر... بس اذا تيس ويتبع شهوته
جرته تصير سهله..
سهام : صح والله
رجعت العب
وردة : انتِ صار وياج؟
تنهدت
سهام : خليت امي تحاجي ابوي.. وقبل نطلع بس
كال لازم اروح أأجر دار لي يكفينا وابقى شكم يوم
حتى ادور على شغل
وردة : اييي الحمدلله عاد خلي وحدة بينا ترتاح
سهام : ان شاءلله كلنا... وبعد يضبط وضعه ياخذنه
ومن نستقر يجي يخطب
وردة : يارب درب السعادة
سهام : جوري ليش ماتجين ويانه؟
وردة : لا انتم مطولين..
سمر :وشعندج؟
وردة : مدري خنشوف أبيهر والله كريم
رن مبايل.. شفته نسر
وردة : شلون اطلابه هاي ياربي
سهام : عزيز گلبج؟
وردة : اهمم.. بس مارد يولي
بس خلصت رنه خليته وضع طيران ورجعنا نسولف
ونلعب وكل ساعة نزل لعبة وماحبها وارجع احذفها
ثاني يوم طلعو البنات واجه باهر اخذني ازور جدة
مثل كل مرا اكعد أبجي وبعدها اسكي الورد وارجع
ام سهام اصرت اروح يمهم انام وافقت وكلت بعد
المغرب اروح.. صدك طلعت اتمشى على كيفي صف
نسر بسيارته صاح
نسر : تعاي صعدي
وردة : شكو؟
نسر : أصعدي وتعرفين
وردة : لا خاف يشوفوني
بحدية
نسر : أصـعدي
كسرت الشر وصعدت.. ماحجى شي بس شخطها وطلع
على شارع
وردة : وين؟
مارد.. وصلنا للدار الي اخذني له قريب على قرية نزل
بقيت بالسيارة.. اجه فتح الباب..
نسر : تفضلي
نزلت
وردة : فهمني اشصاير؟
هز راسه
نسر : اي عيني افهمج ليش لا..
أولاً.. ليش اتصل وماتردين؟
وردة : يعني مرات مااشوفه او احد يمي مااكدر
رفع حواحبه مو مقتنع
نسر : اي طبعاً بس عندج وقت تخابرين وتتغازلين
حقكم تعيشون ايام الخطوبة.
وردة : اي..
فتح عيونه
نسر : اي... وجعي وتحجيها وبكل صلافة؟ ولو الصلافة منج وتتوزع
بملل، هزيت أيدي
وردة : هسه هو هذا كلامك؟
بنبرة هادئة
نسر : لا..قصدي جاوبي ليش من ذاك اليوم لليوم ماتردين؟ زعلتج بشي؟
ضحكت بأستهزاء
وردة : زعلتني؟ كول شنو لي ماسويته.. كل كلمة
تذبها سم صرت تستشرف براسي اذا حجيت شي
غلط ودافعت عن نفسي اطلع تربية شوارع.. اي اني
تربية شارع بس عمري ماسويت غلط وعمري ماهنت
له ليستحق.. وعمري ماتشمتت وستغليت شخص محتاحني
رفع عينه
نسر : اني هيج سويت؟
وردة : تريد أذكرك؟ بس تعرف شي كلكم هيج من
تشوفون بنية ضعيفه ماعدها والي تستگون عليها
بس تخسى انت وغيرك لي يفكر مجرد تفكير بس
يستغلني ثق،أ*****
فتح عيونه
وردة : لاتستشرف براسي فهمت.. وها خلي اكلك
فتحت أيدي
وردة : هاي اني اغلط واسب واعفط واسوي كلشي مايعجبك
قبلت تكمل مهمتك اهلاً وسهلا ماقبلت طووز بيك
نسر : بس هسه ماحجيت شي اكلتيني.. خاصل فاصل
وردة : لان گلبي مورم عليك.. اساساً ماحجيت شي
هاي الحقيقة
نسر : حقج عليّ واعتذر.. وهذا راسج ابوسه
قرب راد يبوس راسي، رجعت خطوة للخلف
وردة : لاتبوس
وكف بمكانه، بس ملامحه تغيرت، للجدية
نسر : تمام…
ثواني سكت، بعدين رفع عيونه عليّ
نسر : بس خلي أگولج شغلة…
وردة : شنو؟
نسر : لما الخط جان مفتوح سمعت كل حچيچ ويا باهر.
وردة : زين؟
قرب خطوة، صوته واطي
نسر : وما أسمح لج تروحين وياه
ضحكت بأستهزاء
وردة : عفواً؟
نسر : مثل ما سمعتي
وردة : ومنو انت حتى تسمح أو تمنع؟
نسر : واحد شايف الخطر قبل لا يوصلج
وردة : لا تضحكني… هذا مو شغلك
نسر : صار شغلي
رفعت صوتي
وردة : لااا ما صار!
قرب أكثر، بس بدون ما يلمسني
نسر : بعدنا بداية الطريق.. وماتعرفين باهر
وغير هذا الخطر.. ببيتچ… أمنتني عليچ
سكتت لحظة… انصدمت من كلامه
وردة : شتقصد ماعرف باهر؟
نسر : مو مهم… المهم اني مسؤول
وردة : مسؤول؟ لو متدخل؟
نسر : سميها اللي تسميها… بس انت ما تطلعين
وياه.. تردين كتلج امشي وياي
ضحكت بمرارة
وردة : واذا طلعت؟
باوعلي بنظرة ثابتة
نسر : راح أرجعچ غصب عنچ
رفعت حاجبي بتحدي
وردة : تجرب؟
ابتسم نص ابتسامة
نسر : لا تجبريني
وردة : لا تحسب نفسك حامي… يمكن انت أخطر
منهم
نسر : يمكن…
نزل صوته
نسر : بس على الأقل… ما أبيعچ
انضربت الكلمة بگلبي، بس ما بينت
وردة : يله… رجعني
نسر : راح أرجعچ…
فتح الباب
نسر : بس تذكري حچيي زين... روحه ويا باهر
ماكو
صعدت بدون رد، وهو لف من الجهة الثانية
شغل السيارة، سكتنا لحد ما كسر الصمت
نسر : له اذا جنتي تحبين احجزلكم غرفة انت
ويا
برود
وردة : حتى لو رحت وي باهر... مااطلع منا له
واني مساعدتك و مدمرة سلطانة
هز راسه
نسر : حلو... عندج وقت تفكرين او تشوفين
الصورة بوضوح
وردة : يمكن شايفتها بس استغبي
لتفت مبتسم
نسر : أعرف بيج ذكية
وردة : مو دائماً
نسر : لا…
باوع للطريق
نسر : بس من تتغابين… تعرفين ليش
سكتت، ما رديت
نسر : لأنچ تريدين تصدگين الشي اللي يريحچ
حتى لو غلط
لفيت عليه
وردة : كلشي تعرف؟
نسر : لا…
ابتسم بخفة
نسر : بس أشوف
وردة : شتشوف؟
نزل صوته
نسر : أشوف وحدة دا تضيع…وتتمسك بأول شي
كدامها
سكتت، حسيت الكلمة ضربة
وردة : واذا تمسكت…شبيها؟
نسر : إذا الشي يغركها… تبقى غلطة
سكتت
نسر : بس اسمعيها مني... باهر مو ملجأ
وردة : واني هم مو طفلة حتى أحتاج حارس
نسر : أدري.. بس بعض القرارات… تكسر حتى الكبار
سكتنا لحد ما وصلت أريد أنزل فتحت الباب
نسر : نهاية الاسبوع الحفلة
لفيت عليه
وردة : وليش ماحجيت؟
رفع اكتافة
نسر : هسه حجيت
وردة : بعد وكت
نسر : تفرق؟
وردة : طبعاً... فهمني شنو أسوي؟
نسر : مثل اتفاقنا ترحين ويا سلطانة تقربي منها
شكد ماتكدرين
وردة : زين... باهر له أيد؟
نسر : ماعرف بوقتها شوفي بعينج
هزيت راسي نزلت، وهو راح محد شافني مشيت
الدار اهل سهام، واول شي سويته
وردة : سوسو... باجر سويها
سهام : متأكدة؟
هزيت راسي
وردة : أي
نمت يم البنات وثاني يوم سوت مثل ممخططه اول
ما سمعت سلطانة اجت.. عرفت خطتي ماشية صح
سلطانة : ها جوري شلونج
وردة : شلوني بغيابها
بجيت وذبيت نفسي بحضنها
وردة : تعبت عمه
طبطبت على ضهري
سلطانة : خليج قوية
بتعدت امسح دموعي
وردة : مابقالي احد هي كل أهلي، بعدمـا..
رفعت عيني انظر رد فعلها
وردة : أمي ذبتني.. الله اعلم شمسوية؟
فتحت عيونها لزمت كتفي
سلطانة : عرفتي؟
هزيت راسي
وردة : حبوبه حجت كل شي
بتوتر
سلطانة : شحجت؟
وردة : كلشي
سكتت
وردة : عمه فدوة احجيلي شلون نطاها گلبها تذب
بزرها؟ اني شنو ذنبي؟
لمست وجهي
سلطانة : ماعندج ذنب...أجيتي طفلة تخبلين ماتفهم
شي من الدنيا.
وردة : ليش ذبتني؟
سلطانة : ماعدها رحمة... الله نزع من گلبها الرحمة
سكتت. لزمت وجهي
سلطانة : همزين خلت بأيدي ملاك بريء كل همج
تشبعين بطونج وانت صغيرة... اول مااجيتي جنتي
جوعانة بشكل
تنهدت
سلطانة : حبوبتج الله يرحمها خلتج تتغذين على
ابهام أيدج بعدها اخذتج وشربتج حليب صخول
كلت هسه تموت
ضحكت
سلطانة : بس قوية وتحملتي كلشي وانت بعمر اربعين
يوم... وكتلهم هاي هسه يصير راسها يابس وتعاند لان
شربت حليب صخول بعد محد يكدرلها
مسحت عيوني
وردة : هم زين الله خلاني بأيدها نطت اهتمام وحب
صعب ام تقدمة الضناها
سلطانة : واني؟
وردة : أنتِ؟... علمتيني شلون اكون قوية
بتسمت
سلطانة : عفية بنياتي... تعاي شنو سمعت راح تعوفين
القرية وترحين ويا أبهير!
هزيت راسي
وردة : الوحده گتلتني وتعرفين باهر شكد... يحبني
گلت أوافق
سلطانة : ياعمه وهذا الرجال ميت عليج ليش خليتي
عنده أمل
وردة : شسوي؟
سلطانة : مو كتلج مشتريج.. وبس اطلبي يكول لبيك
وردة : وأبهر شلون؟
سلطانة : لايحل ولا يربط ومايكدر يفتح حلكة ابهير
نطي شكو سالفة تعبانة وصدكي ماترتاحين ويا لان
ذيل الچلب ماينعدل
وردة : زين يمتى يجي؟
سلطانة : نهاية الاسبوع واذا تردين اخذج بعد الحفلة
وتعقدون
وردة : و.. وباهر
سلطانة : شبيج كتلج ميكدر يحجي
سكتت
سلطانة : يمتى كلتيله اروح وياك؟
وردة : كتله خليني افكر شكم يوم
سلطانة : عفية عليج خليها صدمة أله
هزيت راسي، سكتت.. طلعت سديت الباب وبتسمت
بفرح.. ثواني وأجت سمر فتحت الباب
وردة : ها بشري
سمر : ولج من عرفت كلتلها اذا سواها باهر واخذ
جوري اكتل روحي
وردة : وبعد؟
سمر : سلطانة.. كلتلها رجع اسحبي
ضحكت
وردة : هسه حلوت العبة... اما باهر يثبت نفسه رجال
او ينجر مثل التيس خلف شهوته
فتحت عيونها
سمر : قصدج يرجع يخونج ياها؟
وردة : اكيد... بعد ماعرفت انتظرها تثبت خيانته
سمر : برأيج يسويها؟
تنهدت
وردة : اتمنى لا..
مر يوم… ورا يوم…
كلشي صار مراقبة، سمر وسهام صاروا عيوني وآذاني…
كل حركة، كل كلمة… كل نفس عند رند وسلطانة ينقلي.
وأني؟ عايشة بين احتمالين…يا أما يطلع رجال يا أما ينكسر كلشي بيه.
بذاك اليوم… تعبانة، كعدت يم البنات بالغرفة....ألعب بالموبايل، اخفف التوتر لي اعيشه وصارت الساعة وحدة…
البنات ناموا… وأنا بعدني سهرانة گلت بس اخلص هل
مرحلة وانام
فجأة…
اتصال فيديو – رند
تجمدت... گلبي… كأن وأحد وعصرة بيده.
همست
"لا… لا باهر… أترجاك… بس هالمرة لا تكسرني"
قبل ماافتح خليت اصبعي على كامرا وفتحت.
الصورة مهزوزة… مو واضحة بالبداية.…بس
رند تضحك…
ضحكة مستفزة صاحت
رند :تعال حبيبي
انقبض صدري أكثر.
لما عافت الكامرا مفتوحه وماواضح منها غير جرباية
نصيت الصوت
دخل هو.... باهر.
غمضت عيوني لحظة…
: مو هو… مو هو…
بس من فتحتهم.. هو رند قربت منه…
وكفت كباله… تحچي وياه كأن ماكو أحد يشوفهم.
رند :هيج تنسى الي بينا؟
باهر : كافي… لا تعيشين بوهم تعرفين الي بينا
مو حُب ولا ممكن يكون
كلمة "وهم" طمنتني لحظة…
بس…هي ما ابتعدت. بالعكس…قربت أكثر لزمت
وجهه وصارت تطبع بوسات وحده ملهوفة ماخلته
ينطق حرف بس تردد
: أخر مره..
أنتظر… بس حركة وحدة منه.. يبعدها.. يمنعها
يسوي أي شي…
بس…مامنعها.. دنيتي بدت تدور
رند ضحكت… وبعينها ذاك القصد باوعت مباشرة للكاميرا…عرفت بعدها مفتوحه بس اني مامبينه
وزادت تقرب أكثر…
تلزمه أكثر…كانت جريئة.. وجسرة الدرجة مقرفة
ومقززة
سديت الخط وركضت للحمام فرغت معدتي وكل
جسمي يرجف وصرت اتعرق والدنيا دور بية، لزمت
الحايط وامشي
وكفت ضايعة بطرك دمعتي.. ماعرف شسوي؟ وين
اروح؟
عيني وكعت على دبة بانزين بصف المولد قربت لها
ولي يصير يصير
رحت بهدوء للمطبخ اخذت باكيت شخاط ورجعت
اخذت البانزين، قبلها تاكدت فتحت الدبة شميتها
ورجعت سديتها
ولفيت نفسي بالوشاح ومابين غير عيوني.. ركضت
للمكان لي متواجدين بي شفت سيارة باهر.. وتلفت
يمين ويسار تاكدت ماكو احد يشوف
لزمت الدبة وسبحت السيارة وركزت على مكينة
ورجعت نحنيت وشمرت على تانكي البانزين...
وبسرعة شخطت أيدي ترجف،
رجعت شخط من
اول مره ولعت.... ذبيت عود على المكينة لدرجه
صوت لهب ترس مسمعي رجعت شخطت عود ثاني وخليته بقبق البانزين.. حتى تنفجر...
ورجعت ركضت وقبل مااختفي عنها لفيت، شفتها
السيارة تشتعل لهب عالي… يضوي الليل…
كملت ركض دخلت من باب المراح وبجهتى صايره الصحيات قربت بهدوء وشفت سرحان طلع يريد
يدخل من شافني
: جوري!
وردة : ها جنت بالتـ...
بعدي ماكملت وسمعنا صياح، عافني وركض يشوف
الصار.. طلعوا اهله والبنات... يركضون
: شكو؟
وردة : مدري سمعت صياح وكعدت
طلعو.. وطلعت وياهم أركض.. وصلنا الناس كلها لتمت
وهنا السيارة .. وصلت مرحلة صعب واحد يطفيها
مثل حالي بالضبط
واول مره اشوف باهر منهار عليها... خطية مالحك يلبس
حتى ملابسه بس بالبنطرون
قربت منه مسافة بس والقرف والاشمأزاز وصــل اعلى مرحلة عندي، قذر لدرجة ودي استفرغ عليه
رند جانت واكفه يم امها
رديت بأستغراب
وردة : بـ.. بـ.اهر
جانت عيونه على سيارة شلون تتحول رمااد لتفت
وعيونه دم، قهر، وحزن، نهيار ماتوقعت هيج يصير
كال بصوت مكسور
باهر : نتهيت جوري.. نتهيت
وردة : لا تهتم.. فدوتك أهم شي انت سالم ومابيك
غير العافية
مارد بس سلطانة صاحت
سلطانة : منو الي عنده الجرأة يسوي هيج؟!
جان كاعد على دجه منهار قربت خطوة نحنيت شبهه
كعدت، كتله بدهشة
وردة : أبهر.. شجابگ مو گتلي اليوم عندك شغل ماتكدر
تجي؟
نزل راسه، رجعت باوعت للدار
وردة : شجابك هنا؟
ضرب راسه
باهر : لان غبي، غبي..
وردة : حبـ..بـيبي
رفع عيونه بصدمة بتسم رغم القهر
باهر : جوريتي
وردة : لاتهتم اهم شي سلامتك... والسيارة انت
تجيبها
باهر : مو على سيارة جوري.. ألي بيها..
عقدت حاجبي بأستغراب
وردة : شبيها؟
سكت نزل راسه، لفيت على سيارة محد كدر يقرب ويطفيها لكل بتعد عنها خافو تنفجر او يصير شي
ومنهم لي رجعو ... بس سلطانة تلوب تريد تعرف
منو كدر يسويها
رحت قربتلها بصوت يتمسكن
وردة : عمه... لاتقهرين نفسج.
لزمت أيدها وإيدي ترجف ، برطمت شفتي ودمعت
عيوني
وردة : مابقالي غيركم
حضنتني طبطب على ضهري... بتعدت على صوت نسر
شفته نزل من سيارته ركض لباهر مصدوم
نسر : شكوو صاير؟
باهر : نتهيت.. نتهيت... منين أجيبهن !
لزمت باهر
سلطانة : شششش صوتك تريد تفضح نفسك؟
نسر : فهموني شلون صار هيج؟
باهر : مااعرف طلعت على صوت الناس وشفت النار
ماكلتها
نسر : شجابك لهنا؟!!
باهر : لان أني حيوان وغبي، غبي
رند جابت القميص مالته نتره من ايدها لبسه قبل ما
يسد الدكم قربت بس عيني مافاركته ولمحت أثر ها
القذرة بجسمه
بعدت عيني صارت بعين نسر، خزرني.. اشرتله بعيوني
شكو، بعد عينه يحجي ويا باهر
اجت رند قربتلي وهمست
رند : ليكون أنتِ لي سويتيها؟
عقدت حاجبي
وردة : شنو؟
رند :ماشفتي من اتصلت بيج فيديو!
هزيت راسي بنفي
وردة : يمتى تصلتي؟
شفت وجها، لعبت نفسي منها بتعدت خطوة
رند : لاتخبليني ترا رديتي
وردة : شبيج؟ ترامبايلي جان عد بت حميد تلعب
لعبة الطوبات تعرفوها شلون تحبها وكل مااروح
تاخذ
سكتت ثواني كملت
وردة : واني والبنات كاعدين نسولف..بعدين واذا
تصلتي شني اول مرا تتصلين!
فتحت عيونها
رند : يعنييي ماشفتي؟
وردة : ولج غير تفهميني شفت؟ اكلها تء تكلي بء
بصوت يرجف
رند : هـ..اا مو..
اجه باهر سحبها
باهر : ليكون أنتِ سويتيها حتى تنتقمين ولج سـ**
فتحت عيونها تباوع الباهر شلون سحبها وبعدها عني
كأن تكول نسيت الي صار! ونوب وجهه الاتهام ألها
رند : لااااا والله.. باهر مستحيل اسويها
دفعها
باهر : رخيصه كلشي يطلع منج
مستغربة واني الاعرف
وردة : لحظة ليش رند هيج تسوي؟
قرب
باهر :حتى تنتقم لان راح اخذج
من قرب لعبت نفسي رغم بينا مسافة خليت أريد على حلگي اريد استفرغ، رجعت بتعدت عنه
السيارة صارو يطفونها بماي ورمل بدت تهدء ولما طفت
بقت بس حديدة مصخمه
نسر : هسه ستسوي؟
بحيرة
باهر : ماعرف.. ماعرف
بتعدت عنهم رجعت يم البنات، بعدها ابوهن اشر علينا
: يله بوية ردو شنهي وكفتجن هنا؟
البنات سحبني ورجعنا للدار. واول مارجعنا رحت على
اساس للحمام، بس رحت رجعت الدبة وفتحت قبقها
نص فتحه وكالبتها على اساس البانزين متبدي
رجعت شلت سطل ماي وبديت يمها حتى ماتبين الكاع يابسه وماكو بانزين... ورجعت غسلت أيدي وجهي ورجعت كملت اللعبة أخيراً طلعت من هل مرحلة يله
نمت
ثاني يوم كعدت الصبح وطلعت بدون ريوك رجعت للدار
خالي وهدوء كل روح مابي خلافها ... بقيت ابجي بعدها غيرت ملابسي وطلعت رجعت
وردة : خالة عادي وحده من البنات تروح وياي للمقبرة
ازور حبوبتي
تنهدت
: ولج يمة رحمي بحالج.. شوفي نفسج لا اكل لاشرب
حرام هيج تسوين يومية رايحة
نهضمت عيوني نترست دموع
وردة : شسوي مشتاقتلها ماتعلمت افاركها
هزت راسها، صاحت
: سهام... سمر تعالو منو تروج وي جورية
اجو البنات
سهام : اني اروح وسمر تطلع بالغنم
: يله
سهام : دقايق
هزيت راسي.. صدك ماتأخرت راحت ورجعت بسرعة
طلعنا نمشي
سهام : منو يوصلنا؟
وردة : مدري هسه نشوف
قبل ماكمل كلامي لتفت على صوت هورن شفت نسر
صار بصفنا صاح
نسر : ووين تردون؟
وردة : أريد ازور حبوبتي
اشر براسه
نسر : يله صعدو أني اوصلكم
وردة : لا مااريد ازحمك
ندستني
سهام : مخلينا على ضهره خلي يوصلنا شيمشينا
نسر : يله
سهام : اي اي.. يله
فتحت الباب وصعدنا
وردة : سلام عليكم
عدل المراية باوعلي مبتسم
نسر : وعليكم السلام ورحمة الله وبركاتة
سهام : خومانزحمك
نسر : لا خوية شسالفة
سهام : رحم الله والديك
نسر : دللو
حرك السيارة، كمل طريق اني سندت راسي على جام
اباوع، بس سهام سألت
سهام : صار ويا باهر؟ هم عرف منو هيج سوه؟
نسر : مع الاسف لا.. والمشكلة ماكو كامرات
سهام : اكيد غريب وله هنا كلها تحب باهر وتخاف
من سلطانة
نسر : عليم الله...
سهام : هسه باهر وين؟
نسر : عنده شغل طلع من القرية
سهام : هاا خطية سيارته صارت رماد بطرك الحديده
نسر : الله يعوضه
سهام : ان شاءلله
سكتو لحد ما وصلنا، نزلت وكعدت يم قبرها دموعي
تنزل
وردة : عوفوني وحدي وياها
نسر رجع يم سيارته وسهام وكفت بعيد عني، قربت
ابوس ترابها
وردة : شسولفلج صار بية بغيباج... منين أبدي؟
تعاي اخذيني وياج الدنيا ماترحم والله
وخليت راسي چن مخليته بحضنها وأبجي وسولفتلها
كلشي صار وياي والي راح اسوي وصرت اودعها
وردة : حبوبتي يروحي.. خاف اتأخر عليج فترا لايضل
بالج علية، اعوف الدنيا كلها ومااعوفج والله ارجعلج
بس استقر
قبلت ترابها
: وريدة ماتعوفج.. راح أرجع
نهضت منها بس روحي ضلت يمها... مسحت دموعي
ومشيت تلكتني
سهام : أنتِ زينة؟
هزيت راسي ومشينا نسر ساند نفسه على سيارة ومبايله
بأيده من شافنه
نسر : الله يقوي
هزيت راسي وصعدنا بس شغل السيارة كلت
وردة : نسر
رفع عينه بالمرية
نسر : أمريني
سهام بسرعة خزرتني، مابينتلها
وردة : مايأمرك عدو.. عادي تاخذني اجيب ثواب
الحبوبتي؟
نسر : صار
طلعنا اخذنا ثواب ورجعنا وزعنا بعد ماكملنا رحت
السلطانة كعدت يمها..
اما رند تعضعض بنفسها من القهر رادت تجي تحجي
وياي امها لزمتها وسحبتها للغرفة... بسرعة لحكتهم
خليت اذني على باب يادوب اسمع سلطانة تحجي
بصوت مخنوج
سلطانة : ولج غبرة خربتي كل شغلي
رند : ماخربت شي اجيت اخليها تشوف حقيقة باهر
بس لي صار اتهمني وغلط علية بسببها
سلطانة : مو بسببها بسبب غبائج.. كتلج سحبي ألج
ماكتلج كشفي
رند : شسوي فهميني اموت ولا اخلي باهر يتزوجها
اني لي نطيته كلشي هي شنو نطته
سلطانة: هذا الفرق بينج وبينها هي حرمته منها وانت
خليتي
رند : أموت نفسي اذا راحت وي باهر مو اني الي انترك
سلطانة : متأكدة ماشافت اتصالج؟
رند : كالت لا.. لان اني من تصلت نصيت صوت من يمي
خاف هي تحجي وطلعت شاشة سودة بس لما دخل
باهر رفعت عيني جان الاتصال بعده مفتوح بس ماواضح
شي
سلطانة : اي احمدي ربج لان لو صدك شايفتها جان
ماشفتيها هنا
رند : شنو يعني هيج اني خسرت باهر!
سلطانة : لا.. لان رحت وحجيت وياها بخصوص هذا
لي مخيل عليها خليها تتزوجة وتنكلع وهيج باهر بسهوله
يرجع الحضنج
سكتت ثواني كملت
سلطانة : بس هل مره لازم اغليج وماانطيج له بزواج
رند : عجّلي وخليها تطلع من القرية وساعتها اني اتصرف
سلطانة : بس لاتسوين شي من راسج الفارغ
بسرعة رجعت اركض على طراف اصابيعي، كعدت
وخليت ايدي على خدي وايد لازمه المبايل العب
بالعبة.. رجعت سلطانة مبتسمة
سلطانة : جوري
رفعت راسي وبصوت ناعم
وردة : هاا عمه
سلطانة : احلى وحدة تكول عمه
بتسمت نزل راسي
سلطانة : اريد احجي وياج بخصوص الدار لكاعدة
بي
وردة : شبي؟
سلطانة : عماتي الحلوات انت ان شاءلله هل اسبوع
طلعين من القرية وربي يجعل دربج اخضر
وردة : بفضلج
لزمت راسي وسحبتني صبعت بوسه بخدي
سلطانة : افيششش صدك ورد جوري
بتسمت وروحي متقرفه منها
سلطانة : كلت بعد أذنج اذا ماتحتاجي لو تنطي لمصعب
ارد ازوجة
سكتت تنتظر ردي
سلطانة : لا عبالج بلاش انطيج حكه
وردة : لا فدوتج اخذي هدية تعبج ورباتج
رجعت سحبتني وباست خدي، بعدت عنها
وردة : تستاهلين هذا وقليل بحقج
سلطانة : زين الحلال بعتي؟
هزيت راسي
وردة : اي حبوبتي وصتني يكون ثوابات الها
سلطانة : هااا.. زين أمج.. هم اتصلت؟
وردة : لا
سلطانة : زين
وردة : عمه اني اروح يم البنات
سلطانة : اي.. اي ابقي يمهن بين مايجي موعد الحفلة
مابقى شي
هزيت راسي
وردة : ان شاءلله
طلعت بوجهي للبيت، عندي جنطة سودة صغيرة قماش
قوي... طلعتها واول شي سويته
بلشت احط اغراضي وحدة وحدة
ودموعي تنزل، اخذت اشياء مهمه مثل صوري وصور
حبوبتي، وخلاخيلي وبعدها اخذت الفلوس والذهب
خليتهن بجيس حبوبتي واخذت عصابتها وثوبها بيهن
ريحتها..
وسديت الجنطة وكعدت... صرت اودع حيطان الدار
وابجي لحد ما صار الليل...
طلعت مبايلي تصلت بنسر ثاني رنة رد
نسر : الو
وردة : وين انت بالقرية؟
نسر : لا بالله كملت كم شغلة وراجع للبيت
سكتت
نسر : كولي محتاجة شي؟
وردة : اي
نسر : امريني
وردة : ا.. عادي تجي اشوفك
نسر : صوتج وطريقة كلامج موعاجبتني صاير وياج
شي؟
وردة : من تجي تعرف
نسر : بس طمنيني انت زينة؟
وردة : أي مابية شي
نسر : تمام ساعة واني يمج
وردة : بنفس المكان
نسر : تمام
سديت الخط والدنيا بدت تنث مطر غيرت ملابسي
لبست بنطرون وبلوز كلهم اسود ولفيت شعري كباية
ولبست البوت
وبقيت انتظر مرت ساعة وهو وماكو واني اروح وارجع وكل ساعة واباوع من الباب الخلفي
ماكو بقيت بحيرة اتصل خاف عيب هو مايريد يجي
اخرها شفت مبايلي رن ركضت رديت
وردة : الو
نسر : ورد جوري وين صرتي منتضر
وردة : يله.. اجيت
سديت الخط وخليت مبايلي بجيب البنطرون اخذت
الوشاح لبسته على راسي ولفيت نفسي بي.. اخذت
الجنطة وطلعت اتلفت ماكو ولا بشر حتى الطيور نايمة
والدنيا مستمرة تمطر
واسويها ركضه
لحد ما قربت يم السيارة وكفت بالكوة اجر النفس،اشر
تعاي...
فتحت الباب صعدت والخليت الجنطة بحضني
وردة : شلونك
نسر : هسه الحمدلله
وردة : ومساع؟
نسر : هم الحمدلله.. شبيج؟
باوع للجنطة مستغرب
نسر : شنو هاي؟
وردة : ااااا.. شبيك خليني اجر نفس
نسر : جري عيني
قدملي بطل ماي فتحت وشربت
نسر : شعجب ماعصرتي خاف مخلي بي مخدر
وردة : ميصير اسوء من لي صار بعد
نسر : هسه تحجين؟
ضربت على جنطة
وردة : تخليها امانة يمك
نسر : شبيها
وردة : ملابسي وفلوس وذهب
نسر : ليش اخليها؟ شكو؟
وردة : ماكو بس طلعت الحرب بادية واني مادري
بس الحمدلله اني عندي سلاح
نسر : مافهمت
وردة : افهمك
نسر : افتحيها
وردة : حقك صار
فتحت الجنطة
وردة : هذول ملابسي،. وهذول خلاخيلي وسلسال
رفع حواجبه
نسر : اهم شي ذني
وردة : وهذول ذهبات وفلوس، وهذول 15مليون..
بأستغراب
نسر : تسمحيلي بسؤال؟
هزيت راسي
وردة : اذا على 15هاي الي تسمى أمي سوتهن ولمن
توفت حبوبتي عبالي يحتاجون فلوس هواي رحت
سحبتهن وحتاريت بيهن
نسر : زين
وردة : خليهم يمك.. حتى بعد ماتكمل مهمتك اطفر
نسر : تمام خليهن
رجعتهن نتبه على صور
نسر : هاي شنو؟
وردة : صوري من جنت صغير
نسر : اشوف؟
سحبتهن
وردة : بعدين، بعدين
رجعتهن للجنطة مثل ماجانن واخذها خلاها بالكشن
الخلفي، نزعت الوشاح... لتفت علية مبتسم
نسر : مغيرة ستايلج
اني فكري راح بعيد لفيت عليه
وردة : شنووووو؟
نسر : قصدي مغيرة طريقة لبسج
وردة : هاااا عبالي..
نسر : ليش شفكرتي؟
وردة : اي هو الكلت علية
نسر : حلو حتى شعرج لافته
وردة : اي نزعت التنورة لان مطر وتتسحول بالطيانة
همس
نسر : حلوة بالحالتين ...
رفع صوته
نسر : احجيلي
تنهدت
وردة : مدري منين ابدي بس دامها قربت كلت اجهز
نفسي للشردة
نسر : و.. وباهر؟ يعني تعوفي؟
ضحكت بأستهزاء
وردة : اكو مثل حبوبتي جانت تكوله ينطبق على
وضعي ويا أبهر
نسر : شنو؟
وردة : رافج رفيج مرتك لما ينگضي وكتك
همس
نسر : وعليه هم بس احس عندي كرون
وردة : يااااع انت ليش؟
نسر : لا قصدي عليه تقصديني اني صديق باهر
وتسايريني
وردة : لااا يخووي صدك جذب فهمت السالفة من
ذيلها
نسر : بس فهميني يعني باهر شنو وضعة
التفت له
وردة : ألي مايجاوب بالامتحان شيصير بي؟
نسر : يرسب
وردة : وباهر رسب
عقد حاحبه
نسر : شنو من امتحان؟
وردة : الوفاء، الحُب، الثقة.. كلهن رسب بيهن
نسر : هاي شنو هستوج شفتي؟!
وردة : لا كتلك أستغبي
نسر : شنو سوه الغبي؟
وردة : هيج سوالفه لي مااحبهن عوفك منه واحجيلي
باهر شنو جان بسيارته يوم الحادث؟
نسر : بما انو قررتي واختاريتي تتخلين عن ابهرج
اسمعي حقيقته.. بس قبلها رحت جبت اكل مامتعشي
وكلت اكيد انت هم جوعانة
وردة : اي والله وجبه وحدة أكلت اليوم كله
لف نفسه وسحب علاليك فتحهم
نسر : اعذريني ماكو بيتزا اليوم لان ماعدهم
قدم لفة دبل اخذتها
وردة : نعمة الله شبيها واني مااحب اكل الاكلة دائماً
اتركها فترة حتى اشتاقلها
انطاني ببسي .. ضحك
نسر : حتى بالاكل!
وردة : مافهمت؟
نسر : تتعاملين ويا بقساوى وماتكثرين منه
وردة : ههههه والله اذا يومية اكلها خاف امل
منها فخليها كل مااشتهيها اكلها
نسر : خوش تفكر
فتحت الفة، اريد افتح الببسي أيدي ترجف هو نتبه
اخذها فتحها ونطانياها.. سميت واكلت
وردة : اممم عاشت أيدج
نسر : الف عافية
وردة : يعافيك.. والله تعبتك وياي.. بس تدري احس
العبة لعبتي اكثر منك
نسر : شلون؟
وردة : مدري يمكن لان ماعرف انت شنو تسوي
نسر : يمكن... بس ثقي صار يومين ماشايف النوم
وردة : الله يساعدك.. ردت ترتاح واجيتك اني هم
نسر : لا عاد اني متعود
سكتنا…وبس صوت المطر ينزل على الجام.والسيارة
دافية رفعت عيني أرد أحچي وياه…لكيته كأنه يتأملني ومبتسم.
غمزتله… ضحك.
نسر :شبيج؟
وردة : شبيك إنت؟
سحب نفس
نسر : أخاف أحچي وتفهميني غلط
وردة: احچي… لا تخليها تبربر بگلبك
ضحك.
نسر: اليوم طالعة أحلى بهواي… شعرج، لبسج…
ما أدري أحس متغيرة
وردة: ههههه والله عبالي عندك شي خطير
سند راسه على الكشن، وباوعلي بهدوء
نسر: والأسود… يشع عليج
وجهج مثل الگمر بالليل… دامس، بس يلفت النظر
بالكوة بالعت الكمة ابتسمت…ونزلت عيني بخجل
وردة: لا تبالغ
نسر : ما أبالغ… بس يمكن إنتِ مو منتبهة شكد
تغيرتي هالفترة
وردة: تغيرت؟ لو انكسرت؟
سكت شوي… نظرتي إلّه رفعت راسه شوي.
نسر : يمكن الاثنين… بس الفرق إنج بعدج واگفة
سكتنا مرة ثانية... وسويت نفسي اباوع للمطر
نسر : تدرين كل مره اريد أكلج الاسود يلوگلج
بس ماتصير فرصة
وردة : واني ماحبه
نسر : هم كايلج؟
وردة: منو؟ أبهر؟
نسر : امممم... ابهر
وردة : هههههه لو ألبس كونية يصيح حلوة وتخبلين
سكت
وردة : بس اعرف من خلال رند دائماً تكول مو حلو
عليج..
نسر : اتغار
وردة : اممم
سكتنا.. بين ماكملنا اكل وفتحت الباب غسلت ايدي
رجع قدم كاكو ضحكت
وردة : صدك عاشت أيدك
نسر : خفت السكر ينزل واليوم نتبهت عليج تعبانة
اخذتها ولفيت نفسي علية
وردة : هسه تكدر تحجي وتكول باهر شنو جان بسيارته؟
هز راسه
نسر : بس لاتنصدمين ودافعين له وبطل صفين اضربج
افر راسج فر
وردة : لااااا.... الغة التهديد ماتمشي وياي لان بعدك ماتعرف منو ورد جوري واتمنى ماخليك تعرفها
نسر : لا مو كل مااحجي وأبهر وأبهر خابصتني بي ودافعين عنه
وردة : أحجي؟ ماادافع
رفع عينه بعيني مباشر، كال
نسر : مخد**رات
