رواية لست غجرية الفصل الرابع عشر بقلم روز الحيدر
نسر : بس لاتنصدمين ودافعين له.. تراوبطل صفين اضربج افر راسج فر
وردة : لااااا.... الغة التهديد ماتمشي وياي لان بعدك ماتعرف منو ورد جوري واتمنى ماخليك تعرفها
نسر : لا مو كل مااحجي وأبهر وأبهر خابصتني بي ودافعين عنه
وردة : أحجي؟ ماادافع
رفع عينه بعيني مباشر، كال
نسر : مخد**رات
فتحت حلكي بدهشة
وردة : اااا...
نسر : اي والله هاج شوفي
طلع موبايله تقربت طلع صور باهر، شفتهن ومعرف
صارلي.. بقيت مركزة عليه وساكته ثواني.. بخيبة
امل أكبر رديت
وردة : خوش لا حب صادق ولا شغل نضيف!
نسر : دائماً احذرج من باهر.. بس حضرتج تخافين
عليه..
رفعت عيني له
وردة : ليش ماكتلي من البداية؟ وسألتك بيومها؟
نسر : جنت خايف ترفضين واعرف تحبي... ماردت
تخربين شغلي
سكتت لحظة...
وبعدين ابتسمت ابتسامة خفيفة
وردة: لا عادي... شغلك أهم
باوعلي مستغرب، كأنه يدور على ردة فعل غيرها.
نسر: جوري... انتِ زينة؟
هزيت راسي، ورجعت اباوع للصور ورجعته المبايل
نسر: يعني خلص؟... هيچ ينتهي؟
رفعت حاجبي
وردة :شنو لي ينتهي؟
نسر : باهر...
سحبت نفس
وردة : هو من زمان منتهي... بس اني جنت مأجلة الاعتراف
نزلت عيني على إيدي...
إيدي بعده ترجف، بس حاولت أثبتها
وردة : زين برأيك منو حرك سيارته؟ معقوله عرفوا
بيها مخدرات...؟
لفيت نفسي له
وردة : زين اذا تعرف باهر يتاجر وتعرف سلطانة هم
ليش ماتسجنهم؟
سكتت اباوع رد فعله ابتسامة خفيفة تضهر حفرة
خده.. كملت
وردة :.لو... خاف انت هم وياهم وجاي تورطني؟
التفت مبتسم
نسر : اني أريد الراس الجبير مااريد ذوله
رجع طلع المبايل وطلع صور لابس عسكري وكاعد
بالمكتب ... باوعت للصورة ورجعت رفعت عيني له
وردة : مو شايفتهن... زين اشو هنا صغير.. بالصور
نسر : غير الحية كبرتني
وردة : اممم ... زين اسأل؟
نسر : سألي؟
وردة : معقول انت حركت السيارة؟
نسر : لا والله لو اني ماخاف اكول.. بس لي سواها
عاشت أيده ابوسه بحلكه خفف عني حمل
وردة : ييععع
لتفت
نسر : شبيج؟
وردة : مابيه.. بس هم شاك بأحد؟
سكت ثواني
نسر : اني؟... لا مهما كان عدو عدوي صديقي دام اذه
باهر وسلطانة هو قوي وذكي
وردة : زين هسه باهر شيسوي؟
ضحك وسند راسه على كشن وعينه على مطر ينزل
على جامه
نسر : باهر؟... دمر لان لي جان بالسيارة
سكت وباوعلي
نسر : من اخطر الممنوعات
بالعت ريكي حاولت اخفي خوفي
وردة : شـ..شلون؟ بيهن نوعيات؟
هس راسه صوته صار أخفض
نسر : اي.. يعني غرامات قليلة... تسوي مصايب
ولو وصلت للناس... تموتهم
وردة : يعني زين من حركوها؟
نسر : طبعاً... ضرب عصفورين بحجر.. باهر دمر هم
غالية وهم نادرة.. وهم سيارته راحت.. وهم راح يبلش
وياهم منين يدبرهن!
وردة : وهل شي يساعدك؟
نسر : اساساً ساعدني وكشفلي المخفي لي اريد اوصله
من البداية
وردة : شلون؟
نسر : لي صبرت أشهر حتى اوصله.. بجدحة وحركة
وحدة... ساعدني وهو مايعرف.. لذلك اتمنى اشوفه
وابوسه بحلكه...
سكتنا
نسر : الله سخره يحرك السيارة وانقذ هواي ناس
وردة : سبحان الله
نسر : اي والله... حصل أجر عليها... اخ لو بس اعرفه
سكتت وسندت راسي على جامه اشوف المطر ينزل
هو ماحجى شي بعد.. لفيت عليه
وردة : نسر
لتفت
نسر : ها عيني
وردة : اعرف زحمتك هواي... بس
نزلت راسي مكسورة
نسر : امري... ماكو بينا هل حجي لاتنسين انتِ امانة
تنهدت. وبدون ماارفع راسه
وردة : عادي.. انام اليوم يمك
رفعت عينه شفت وجهه مبتسم رافع حواجبه
ستدركت كلامي بسرعة
وردة : قصدي هنا بالسيارة.. لان اخاف انام وحدي
وأستحي من اهل سهام يومية رايحتلهم
رجعت نزلت راسي..صوتي صار اهدأ
وردة : جدة الله يرحمها ويوسع قبرها جان تكول
عظم ابنادم ثكيل لو مهما تكون معزته
نسر : وله يهمج السيارة وراعيها تحت أمرج
وين تردين؟ اخذج للبيت ترتاحين؟
هزيت راسي بنفي بدون مارفع عيني
نسر : وألج الامان أني اعوفج واطلع خاف تفكرين
استغلج لو تخافين من وجودي
رفعت عيني.. مهضومة بس سيطرة على نفسي
وردة : لا يخوي شسالفه.. اعرف تعبتك وصرت حمل
برگبتك_
قاطعني
نسر : لااا.. لاتكولين هيج.. ماكو شي اسمه حمل
اساساً من شفتج وحجيت وياج حبيت الشغل والله
جنت قبلج عايش بملل.. وبالكوه متحمل باهر.... بس
رفع عينه بعيني وصوت اهدأ
نسر : من يحجي عنج.. استغله حتى اعرف منو جوري
بتسمت
وردة : وعرفت
هز راسه وبتسم
نسر : وحدة عرمة وكحه..
نزلت راسي
وردة : ثق أني مو هيج بس مرات الضروف تجبر
شخص يغير أسلوبه وحتى تفكيره
تنهدت
وردة : لاتلومني.. أبد لان هم حولوني من ملاك الى
شيطان.. ولاتقارني وي غيري لان غيري ماعاش لي
عشته
نسر : لا مألومج حقج
وردة : اذا مااصير ذيبة تاكلني الضباع
بتسم
نسر : احلى ذببة شافتها عيني
ضحكت
نسر : نامي بالكشن الخلفي حتى تاخذين راحتج
وردة : لااا... هيج مرتاحة
نسر : خلي ارجعلج الكرسي
وردة : اني اسوي..
تلمست تحت الكشن ورجعته، نزعت البوت من رجلية
وصعدتهن، وغطيت نفسي بالوشاح
وردة : وأنت؟
باوعلي بحيرة
نسر : انزل؟
وردة : لااا.. شدعو!.. الدنيا تمطر نام وتحملني هل شكم يوم
بتسم
نسر :أتحملج العمر كله
وردة : لا شسالفة يخوي
ضحك
رجع الكشن... وهدوء ماكو غير صوت المطر الي بعده
ينزل...
نسر : جوري
وردة : هممم
نسر : خاف بردانه اكو غطا اذا تردين؟
وردة : لا الجو حلو والسيارة دافية واني متعودة على
يرد
هز راسه وسكتنا ثواني.. كال وعينه على مطر
نسر : اذا طلعتي منا مفكرة شنو تسوين؟
وردة : اممم.. تدري حلمي هو اطلع منا..
بتسمت
وردة : اول شي استأجر دار او شقة لمهم مكان يحتويني
بهذا المبلغ وبعدها ادور على شغلة محترمة
تنهدت
وردة : جنت مفكرة اخذ وارد المحلات اعيش بي او
افتح واحد منهن بس طلع ماكو
باوعلي، بتردد
نسر : زين...ماتدورين على أهلج.. او حتى تعرفين
أمج ممكن تساعدج
وردة : لاتجيب طاريها گلبي يوجعني من اذكرها والله
نسر : حتى لو تأمن ألج مكان
وردة : لا والله مادور عليها ولا اريد اشوفها مثل ماتخلت
عني اتخلى...ومااشتريها بتراب
تنهدت
وردة : وللصراحة مااضمن نفسي اذا اشوفها يمكن
انتف شعفاتها.. أم الزلم
سكت
وردة : تلكيها عايشة حياتها ومخلفتلها نغوله وماسألت
على بنية ذبتها بنص الكاولية... حتى الچلبة حشاك
تلم جهالها ودافع عنهم... بس أني أمي ذبتني... وياريت
انطتني الناس تخاف الله بية
نهضمت حتىنبرة صوتي تغيرت وعيوني دمعت سكتت
هو نزل راسه
نسر : الله يقويج
سكت ثانية، رفع عينه باوعلي
نسر : يكولون الاصل غلاب، وهسه شفت هل شي..
وردة : شلون؟
نسر : تدري أصلج غلاب، رغم عشتي وياهم وربيتي
وطبعتي بطبعهم بس، اصلج الحقيقي هو لي مسيطر يعني داخلج رافضهم ورافض تصرفاتهم
وردة : تدري من زمان كلش أكلها حبوبتي خلينا نطلع
منا... تكلي وين نولي حبوبه الشين التعرفة أحسن
من الزين الماتعرفة..
تنهدت وباوعتله
وردة : وكلامها صح وين نروح واحنا ماعدنا والي واني
جنت صغيرة
نسر : هسه اني وياج مااعوفج
بتسمت، سندت راسي على كشن ولفيت نفسي، هو هم
رجع سند راسه
وردة : قفل السيارة..
نسر : مقفولة... تردين المفاتيح؟
وردة : لا
باوعلي وهو ساند راسه
نسر : ثتثقين بيه؟
وردة : جؤؤ.. بس مضطرة
نسر : صعب تثقين؟
وردة : لا بس احمي نفسي.. لان لي يثق بسرعة ينكسر
واني مستحيل اخلي نفسي بيهج موقف مااريد احملها
هواي نكسرت ونخذلت
سكت
وردة : تصبح على خير
نسر : وانتِ من اهلة
بتسمت وغمضت عيوني...ذكرت خيانة باهر ورند
واسأل نفسي
: شلون أجه من گلبه يخوني؟ سويتله؟ جنت أكول
هو الوحيد يتحمل تعبي ومرضي وطبعي بس هذا
التحمل خلاني ادفع ثمنه
اخ ياحبوبه وين عفتيني؟ اني خلافج لاحول ولاقوة
صفيت ضايعة.. واحس نفسي هم على كلشي اسوي
ماحس له أيد مسحت عيني.. فتحت نسر يباوعلي.
نسر : لا تبجين
مسحت عيوني
وردة : مابجيت
نسر : وهاي الدموع شنو؟
وردة : ماي هذا
نسر : اممم... نوب من تبجين تصيرين حلوة
ضحكت
نسر : اي والله مو مجاملة.. عيونج تصير حلوة كلش
وجهج يحمر وحواجبج ينعقجن
ضحكت
وردة : نسرر
ابتسم وهو يباوعلي بهدوء
نسر : يلوكلج... بس ما أريدج تبجين
سكت لحظة، وصوته نزل
نسر : ما أريد أشوف دموعج... أضعف
سكتت، هاي الكلمة... غريبة
نزلت عيني وهمست
وردة : مو بيدي... مرات تجي غصب
نسر تنهد، وباوع للسما
نسر : إي أدري... بس مو كل شي يستاهل دموعج
لفّ راسه إلي
نسر : باهر ما يستاهل
وردة : مو لأنّه يستاهل...أبجي على حالتي وشوگي
الحبوبتي..مامتعلمة هيج افاركها خلصت كل عمري
أنام بحضنها
ما قاطعني، خلاني أكمل.
وردة :وجنت شايفته باهر ملجأ... مو شخص
نسر : الملجأ الحقيقي... ما يخليچ تخافين منه.
سكتت.. كمل بهدوء
نسر : تعرفين شنو الفرق بين واحد يحبچ... وواحد يحتاجچ
رفعت عيني له
وردة :شنو؟
ابتسم
نسر : اللي يحبچ... يخاف عليچ
واللي يحتاجچ... يخاف من فقدانج بس..
سكتت.. ومارديت لان مافهمت شنو الفرق!
هو يمكن فهم كال
نسر : نامي جوري... اليوم تعبتي هواي
غمضت عيوني شوي، بس بعدني أحس بيه
يباوعلي.
واني مغمضة همست
وردة : نسر
نسر : همم؟
وردة : إذا يوم من الأيام... اختفيت فجأة
سكتت، وبعدين كملت
وردة : لا تدوني
سكت، ثواني طويلة.اخرها رد
نسر : مااسمحلج تختفين
فتحت عيني شوي
وردة : ليش؟
نسر : لأن مو شي ينترك بسهولة
سكتت.
غمضت عيوني مرة ثانية...جنت تعبانة ونعسانة بس
داخلي خوف ماعرف شنو سببه... بس من كثر التعب
ستسلمت وبديت اغفي...
ماعرف شكد مر وقت...
فزيت على صوت المطر ينزل بقوة... خفت من البرق
فطر السما
باوعت نسر نايم صفح مخلي إيده تحت خده وإيده
الثانية على زنده.. كأن نام وهو يباوعلي بتسمت
همست
وردة : نسـر
مارد
وردة : أبو السوس
هم مارد، اخذت إيده ببطء ماحس لما شبكت اصابعي
بأصابعه ولزمت إيده بثنين ادية ونمت،.. اول مره بعد
موت حبوبتي احس بأمان ولو قليل وحتى اذا سوه اي
حركة اكيد يحرك إيده وهل شي مثل جرس انذار....
حسيت على صوت يهمس
نسر : جورية.... حورية
فتحت عيوني ببطء أشوفه يباوعلي ومبتسم، نسيت
أيدي بإيده
نسر : صباح الخير.. ورد جوري
بتسمت
وردة : صباح النور
حاولت افلت إيدي من إيده، بس هو لازمنها بهدوء مو ضغط.
وردة: نسر... إيدك
نزل عينه لإيدي، وبعدين إلي
نسر : لا خليها .. يمكن الزگت
وردة : جنت نايمة... ماعرف شلون هيج صار
ابتسم
نسر: وأني هم.. يمكن الجنية
فلتت أيدي، واشوف الجو الصبح يجنن خاصه بعد
الليلة ممطرة
لف راسه شوي للجام تنهد وكال
نسر: أول مرة أنام بهالراحة من فترة
نظرتله باستغراب خفيف
وردة: ليش؟
رجع باوعلي مباشرة
نسر : لأن تحت المطر... وياي احلى وردة
حاولت أغير الموضوع بسرعة
وردة : خل أرجع قبل لا أحد ينتبه
هز راسه ببطء
نسر: خمس دقايق بس
رفعت حاجبي
وردة: على شنو؟
نسر:على هدوء... نادر يصير بحياتي
سكتت. ما أدري شلون، خليت راسي يرجع للكشن مرة ثانية... يمكن اني محتاجة هل خمس دقايق... بعدها
ردت ألبس البوت
نسر : احمم.... تدرين شخرين
وردة : هههههههه لا بربك؟
ضحك
نسر : اجيت اكعدج.. بس گلت خطية تعبانة
وردة : هم زين ماكعدتني.. جان..
نسر : هههههه.. شتسوين؟
وردة : امطلك ودك بوكسات
قهقه من الضحك
نسر : انتِ تمطليني؟
وردة : شعبالك... كلشي ولا تكعدني من نومتي
العزيزة
نسر : بس حلوة هاي مال امطلك ودك بوكسات
حبيتها
وردة : هههههههه... يخوي اشاقة وين بية حيل
تنهدت
وردة : اساساً ودي انام وبعد مااكعد
تمتم وهو يعدل شعره
نسر : يله... يجي يوم ونتماطل
باوعلي وغمز
نسر : ونشوف منو يمطل الثاني
وردة : يخوي هي مال ماطل أني روحي رايحة..
سكتت وردت افتح الباب لفيت
وردة : مشكور زحمتك هواي واخذت من وقتك
نسر : ولو دللي... ولا كل شوية وتكولين شكراً ماحب
رسمية
بتسمت، فتحت الباب ردت انزل خليت رجلية بالكاع
نسر : جورية
لفيت
نسر : خو مانسيتي مهمتنا باجر
وردة : شلون انساها... اساساً بوجهي سيدا على
سلطونة
نسر : هههه نتبهي على نفسج ولاتأكلين شي يمها
بتسمت
وردة : دلل
نزلت وسديت الباب لميت شعري .. مشيت خطوات ولفيت شفته بعده يباوع بتسمت واشرتله باي هو هم
عدلت الوشاع على كتافي وكملت طريقي بعد وگت
والغيم بعده مغطي الشمس...
رحت السلطانة لكيتها تتريك هي وكوم بنات صبحت
وكعدت
وردة : شلونج عمه
سلطانة :من شفت وجهج شفت العافية
دنت القوري.. تصب چاي، ماكدرت ارفض
قدمته اخذته
بتسمت
وردة : يابعد روحي فدوتج اني عمه تريكت
وشربت چاي
سلطانة : اكلي ياعمه شوفي وجهج شلون أصفر
هل فترة هاي ذبلت وردتي
اخذت بس الچاي بأيدي ماشربته
سلطانة : مابقى شي باجر تصيرين الكل بالكل
وردة : وباهر.. شلون؟
سلطانة : معليج خلي علية..
وردة : شلون يعني اذا عرف؟
سلطانة : بس انتِ صيري على ذمت الزلمه وشوفي
منو يندك بيج لا باهر ولا غيره
هزيت راسي... اجت رند ماجت بس تخوزر بية تكول
كاتله ابوها.. ماهتميتلها اشوف البنات ماكدات ويضحكن
وردة : عمه شنو هذني البنات؟
سلطانة : للحفلة...
اشرت على وحدة
سلطانة : تشوفيها هاي
وردة : اي شبيها؟
سلطانة : ضحك عليها واحد وسلمته نفسها ومن عرفوا
اهلها رادو يكتلوها وتالي نهبت.. خطية الفيتها
تمتمت
وردة : خلي تموت بأيد اهلها ولاتموت يومية بحضن
واحد
باوعتلي
سلطانة : شنو؟
وردة : قصدي أهلها خطية شلون هيج تكسرهم هل
كسرة هاي!.. بسبب ذكر وتالي هل ذبها مثل الچلبة
سلطانة : هواي ينضحك عليهن بأسم الحب من كون
صخونه احنا وينه وين الحب.. ياخذ لي يريده ويشمرها
ويروح يدور بنيت بيت بعدها روبة مامخضوضه
وردة : حسبي لله عليه مايخاف الله كون يتلكاها بعرضه
دمرها وهي دمرت نفسها
تمتمت بيني وبين نفسي
وردة : من صارت بأيدج
صاحت
سلطانة : رنو.. ولج شبيج كعدتي مبوزة
رند : عوفيني مالي خاك
سلطانة : تعاي ولج ب*** من احجي وياج تجين هذني
بنات غربة ويحترمني مو مثلج
رند : شتردين؟ فهميني... أني اموت اذا بـ
قطعت كلامها باوعتلي واجت بتجاهي
رند : هم اتصل بيج؟
وردة : منو؟
رند : باهر منو غيره؟
وردة : لا أبد ليش؟
سحبتها
سلطانة : ولج الولد حاير بضيمه.. وانتِ حايرة بد***
عفت الچاي من أيدي .. رجعت أباوع على بنات بعمر
الورد… حسيت گلبي ينعصر…
يا ريت أگدر ألمهن وحدة وحدة… وأگلهن
لا تقربن للحب بسهولة… مو كل واحد يكول أحبج
يستاهل تاخذين عليه خطوة…وتسلمي نفسج
لا تسلمين نفسج حتى لو يومية يجي يبوس إيدج
ورجلج… لأن اللي ياخذج بسهولة… يتركج بسهولة
وتبقين إنتِ وحدج تدفعين الثمن…
اذا مايتمرمر بحبج ويبوس أيد أهلج لا تقبلين بالقليل
الحب مو كلمة… الحب أمان…
أهلج تعبوا وربوج… مو حتى تجين لحظة ضعف
وتكسرين خاطرهم وتكسرين نفسج وياهم
واللي يحبج صدك… يجيج من الباب مو ياخذ اللي
يريده ويختفي بعدما يطفي رغبته بيج
أكو حب يدمر أكثر مما يعمر
تنهدت… عيني دمعت بدون ما أحس
وردة :الله يخلصكم من أيد هل ظالمة ماترحم تاكلكم
لحم وتذبكم عظام
فزيت من صفنتي على مبايلي شفت المتصل باهر
رديت
وردة : حبيبي
باهر : تهون أهموم الدنيا وترد روحي من أسمعها
وردة : طمني شلون صرت؟
باهر : الحمدلله.. وين أنتِ؟
وردة : أجيت اشوف سلطانة
باهر : ااا... جوريتي
وردة : ها يروحي
باهر : نتهيت ولج... احس نبضي زاد راح أجيج
وردة : لا حبيبي خليك مااريد أشغلك
باهر : يبووو... أني گلبي رهيف مايتحمل خاصة
صوتج ونوب بغزل... اويلي شتعلو أهلككك باهر
ضحكت
باهر : أبوس ضحگتج
وردة : اممم شنو ردت تكول؟
باهر : والله نسيت... هو لي يسمع صوتج يبقى عقل
براسه
سكت ثواني كال
باهر : هااا... الحية المسمومة رند هم حجت وياج؟
وردة : لا أبد.. ليش؟
باهر : تعرفيها اذا ماتذب سم ماترتاح
وردة : أي خليها الچلبة تعوي المهم اني هل مره ثاقة
بعزيز گلبي
باهر : ولج أروح فدوة الحجل رجلج هاي جوريتي
ألي تحبني
وردة : ماراح تغدرني مره ثانية صح؟
سكت
وردة : لان لو سويتها أعوف القرية واشرد وزلمه
لي يشوف وجعي بعد
باهر : هو العنده الگمر شيسوي بالنجمة
وردة : هاا يعني رند نجمة!؟
باهر : بنعال رجلج تصير
حجيت بدلع
وردة : أبهري
باهر : يابعد شريان گلبي أحجي اليوم ماكو أسعد
مني
وردة : شوكت نروح البيتنا؟تعبت أريد استقر يم
نبضك
باهر : لا هيج اني اتمرغل
ضحكت.. وشفت نسر اتصل رفضته رجع اتصل وهم
رفضته
وردة : حبيبي.. سلطانة تصيحني بعدين نحجي
باهر : تمام
سديته، بسرعة اتصل..مارديت طلعت برا، بس فتحت
خط..اجه صوته
نسر : ولج أدب سزز.. تردين تستقرين يم نبضه!!
بدهشة
وردة : اااععع.. شلون سمعت؟
نسر : وجعاااا...شعليج شلون سمعت؟ صارلج ساعة
تتغزلين بي
وردة : لا والله وين ساعة ليش تجذب
نسر : نجبي مااجذب
وردة : ساااعةة؟ بعدين تعرف كلش زين أمثل
نسر : خـ*** بهيج تمثيل لزمي السانج لا أجي أكصه
وردة : شوف لاتتجاسر وتغلط اني محترمتك هواي
مااريد اخلاقي تسيء ونخرب واحنا مابقالنا بس
يوم واحد
نسر : ممنوع تحجين وياها هيج واذا تكولين لا خليها
تخرب طوووز بيها
وردة : ترا مالها داعي تسويها قصة واذ حجيت ويا
كلام حلو
نسر : مو لحيتي هواي لحيتي وتتنغوصين بصوتج
قلد صوتي
نسر : حبيبييي، يابعد روحي، أبهري.. يمتى نولي
للمهجوم حتى نسر يهجمه عالراسناااا
بالكوة لزمت نفسي ماأضحك
نسر : تعبت أريد أستقر يم نبضك
رجع صوته وصاح
نسر : على منو تضحكين ولج؟ أنتِ وياي عليه؟
وردة : هدي مايستوجب هل عصبية.
سكتت ثواني
وردة : نسر
مارد
رديت بصوت هادئ
وردة : لاتزعلني منك؟
تنهد صار يردد
نسر :ستغفر الله... لاحول ولاقوة الابالله
وردة : أترجاك لاتخيب ضني بيك... لاتشكك بية
اكره هل شي احسه يقلل من نفسي ومااسمح لمخلوق
يخليني اعيش هل شعور
نسر : ماشككت
وردة : بلى شككت.. من گلت انتِ وياي عليه
نسر : مو قصدي هيج.. بس كلامج هسه يفرق
عن قبل
وردة : طبعاً هسه اكو سبب ليش هيج سويت
نسر : اي.. بس لاطوخيها ويا سمعتي شنو كالج
راد يجيج!
وردة : أي ويجي شنو يعني... شمفكرني؟
نسر : مامفكر.... أني بالكوة متحمل باهر ماينجرع
وردة : واني شني ذنبي؟
نسر : مو ذنبج بوية موذنبج... ذنب الدنيا
سكتت
نسر : أعذريني لان رفعت صوتي عليج
وردة : معذور واتمنى ماتنعاد
نسر : ان شاءلله... ها اليوم بالليل اشوفج بنفس
المكان
وردة : ليش؟
نسر : لان باجر ماعدنا وكت نحجي..
وردة : صار
نسر : مع سلامة نتبهي على نفسج
وردة : وانت هم.. الله وياك
سديت الخط.. ورجعت
وردة : عمه.. راح اروح اجهز نفسي الباجر
سلطانة : روحي عمه
وردة : بيش الساعة؟
سلطانة : تعاي بالتسعة والله كريم
وردة : هاي هيَ قبل التسعة اني يمج
سلطانة : عفية بنياتي
بتسمت وطلعت.. شديت الوشاع على خصري صار
مثل التنورة.. رجعت للدار..
خفت سكري ينزل لسه مماكلة شي اخذت قوطية
العسل باقي بيها خاشوكتين اكلهن.. وبقيت صافنة
نسر شلون سمعني!!
بعدها اجت سمر أخذتني وياها... بقيت قريب الليل
وسحبت روحي منهم، رجعت للدار وبقيت انتظر
لحد ما رن
وردة : الو
نسر : يله طلعي… منتظرج
وردة : جيت
سديته… ومثل كل مرة طلعت من الباب الخلفي
لان ماكو ضوه…وسويتها ركضة ، والدنيا لليل
و هدوء
وصلت… شفته واكف، فتحت الباب وصعدت
بصوت لاهث
وردة : سلام عليكم
نسر : وعليكم السلام ورحمة الله
لتفت عليّ
نسر : شلونج؟
تنهدت بحسرة
وردة : برأيك… المثلي شلون تكون؟
عقد حاجبه
نسر : شكو؟
وردة : مدري منين أبدي...
نسر : احجي
سكتت ثواني..
وردة : سلطونة… جايبة بنات
لفيت وجهي عليه
وردة : شكم واحد راح يحضر؟
نسر : حسب اللي اعرفه… أربع شخصيات
وردة : صخام… ضخمها! شتسوي بيهن؟
نسر : منين جابتهن؟
وردة : تلمهن من الشارع… كل وحدة تايهة
ماعدها أهل، لو كاسرة عين أهلها سلطانة تكيف
عليها… حلمها تفتح ملها بيهن
سكتت لحظة… بصوت ناصي
وردة : مو حفلة… هذني أرواح رايحة للبيع
تنهد
نسر : مايحتاج… هسه هي هم مسويتها ملها
سكتت… وبعدين
وردة : باهر شخبارة؟
رفع عينه بعيني… نبرته تغيرت
نسر : عزيز گلبج؟
فهيت بوجهه… ماعرفت أرد سكتت
نسر : أي… من توصل الشغلة “عزيز گلبج” تسكتين؟
نزلت راسي
وردة : تعرف هذا تمثيل… ولو احبه ماشفتني
كاعدة يمك
نسر : لأن مضطرة… مو؟
رفعت عيني
وردة : شبيك؟ ليش هيج تحجي وياي؟
نسر : وشلون أحجي ست وردة… علميني؟
همست
وردة : شجابرك على المر غير الأمر منه…
نسر : لا بربج وين ضايگتني؟
درت وجهي… بنفاذ صبر
وردة : خـ*** بالضروف الوصلتني لهالحال
نسر : لا تتأففين… عدنا شغل لازم نخلصه
لفيت عليه بعصبية
وردة : عوووفي! وركز بالشغل… معليك بية
أحب باهر أكرها معليككك!
صفن بوجهي… كال ببرود
نسر : أعصابج عيني… يم باهر نعامة
ويمي نافشة ريشج
لفيت جسمي له
وردة : فهمني شنو مشكلتك وياي؟ ليش تتحكم؟
سكت ثواني، اخذ نفس عميق وهو يسند راسه على
كشن وبعدين باوعلي
نسر : لأن وصلتيني مرحلة… أغار من مجرم قذر
انصدمت
وردة : ليش تغار؟!
صفن بيه ثواني… فجأة
نسر : مصعدة الجام
لفيت بسرعة
وردة : أي
هز إيده
نسر : ط***
طگيتها ضحكة
نسر : هاي الفالحة بيها بالغلط تفتح حلكها
وردة : هههههه على أساس تخرخر أخلاق؟ شو
صرت تغلط!
رفع عينه بعيني
نسر : من عاشر القوم أربعين يوم صار منهم…
عاشرتج ساعة وتعلمت
ضحكت
وردة : لا… هذا بداخلك بس طلعته تستشرف براسي
تنهد
نسر : يمكن…
سكتنا… كم دقيقة
سندت راسي على الجامة… أفكاري متلخبطة وماعرف
مصيري
نسر : جوري
لفيت
وردة : ها؟
تردد…
نسر : احمم…
سكت… وبعدين
نسر : مثلاً… لو گتلج حبيتج
خزرته… وبعدت شوي مستغربة
وردة : أكيد تشاقة؟
ضحك بخفة
نسر : طبعاً… أشاقه
لف وجهه على جهه ثانية
نسر : المثلي ميحب كاولية
سكتت… بس ماانجرحت
بس حسيت من كلام ماكو ربط أني شكو؟! هو وين
واني كل همي اطلع واخص من هل سجن
ابتسمت بخفة
وردة : صح… لأن دور زلمة بزمن كثرت بيه الذكور
لتفت مصدوم
وردة : يخوي خما تاخذ ذكر… والذكور هواي
بس الزلمة نادر
سكت… ماعرف يرد
وردة : وإذا عليه؟ مو مهم أحد يحبني…طوز بيهم
كلهم
بنبرة أقوى
وردة : اللي يحبني…هو وحبه أشيله واشمره بالزبالة
لأن حب نفسي يكفيني
رفعت عيني بعينه
وردة : نفسي… ثم نفسي… ثم نفسي…
وبعدها يجي او لا هو ووصخ رجلية
سكت
نسر : زعجتج كلمة كاولية؟
وردة : أبد… حتى لو مو منهم بس ربيت بينهم هاي حقيقتي
تنهدت
وردة : خلينا نخلص شغلنا… وبس أطلع من القرية
تنتهي كلشي وساعتها الأمانة الحطتها حبوبتي بركبتك
تكون وفيت بيها
هز راسه
وردة : هسه شنو المطلوب؟
لفيت الوشاح على أصابعي… أخفي رجفة إيدي
بس انتبه
نسر : أكلتي شي اليوم؟
بدون مااباوع
وردة : الحمدلله
نسر : ليش أيدج ترجف؟
وردة : مدري
نسر : أني أدري… لأن مماكلة شي
سحب علاكة
نسر : لازم تاكلين
وردة : مشكور… گتلك ماكله
نسر : ادري… وجبة وحدة باليوم
رفعت صوتي
وردة : شعليك؟ لا تصير خبير تغذية! ويهمك أمري
باوعلي بهدوء
نسر : طبعاً يهمني أمرج
وردة : ماعندك شي خليني أولي
لفيت اريد انزل قفل الباب...رجعت لفيت له
وردة : عندك شي؟
نسر : إي… أول شي تاكلين
وردة : مااشتهي
نسر : حتى لو شوية
صحت
وردة : نسر! لا تتلف أعصابي
تنهد
نسر : تمام… اهدي
رجع الأكل… وبعدين فتح چگمچة
طلع علاكة سودة صغيرة
فتحها…توسعت عيوني
وردة : شنو هاي؟
نسر : تلبسيها
وردة : نجب!
نسر : لاتغلطين لا اخرب ملامح وجهج بضربة
وردة : دطير.. هو شنو تخرب ملامح وجهي؟
وتگلي ألبسي شكلك... سمعاً وطاعة؟
هز راسه بأسى
نسر : اسمعي… هذا بي جهاز تتبع وإذا صار شي
أكدر أوصلج فوراً
وردة : شلون؟
نسر : هاي شريحة… وهاي سماعة
تنحط بالأذن
وردة : وشلون أحجي؟
نسر : بيها مايك… تضغطين زر… وأسمعج
وردة : اااع… وإذا السماعة طاحت بأذني؟
نسر : ماتطيح
وردة : لا عيني لا… شوف غيرها
نسر : ماكو غيرها… ماعندي وكت
وردة : لا يعني لا
نسر : جوري مو وكت عناد
وردة : ياااع… نوب تنحط بالأذن!
باوعت للي بأيده
وردة : ونوب أسود.. ودبل!
ضحك وهز راسه
نسر : ليكون موعاجبج اللون؟
وردة : لا المديل
رفع حاجبه
نسر : هاا… يعني المشكلة مو باللون … بالمديل؟
وردة : اممم
عض شفته
نسر : هممم... ختاريته هيج حتى الجهاز مايبين
وردة : انت ختاريته؟
نسر : لا أبوي.. طبعاً أني
حكيت راسي بخجل
وردة : يله خوش ضمه وباجر من اريد اروح ألبسه
نسر : لا هسه تلبسي حتى أجربه
لفيت.. وصحت
وردة : اااااااعععع.. لاتزودها عاد زين مني وافقت
نسر : وجعاااااا.... غير اشوفه يشتغل لا
وردة : وليش ماجربته
نسر : شلون يعني ألبسه... بلوه هااي ياربي
وردة : انت بلوه
نسر : هاج يله
وردة : وعله من الله.. ولك شو ماتستحي؟ دريت
كاولية بس مو انزع كدامك
نسر : لاحول ولاقوة الابالله.. عمي كتلج.. هاااج
ماكتلج نزعي... هسه انزل وبدلي بالسيارة
وردة : بلكت بيها كامرات..! انت ابقى بالسيارة واني
انزل
اخذته من أيده..
وردة : وخليني اقفلها عليك خاف تنزل
فتح السويج
نسر : هاج
اخذته بنتر من أيده
وردة : لا هنّاك
نسر : رحم الله والديج
وردة : نعل روحهم
سكت
وردة : منين اقفلها؟
نسر : منا
وردة : خوش
نزلت وقفلتها عليه وهو داخل السيارة جربت افتحها
مانفتحت... اشرتله يفتحها من يمه.. فتحها هم ماكو
هيج طمنت ورحت اسمعه يصيح كملت طريقي بدون
مالتفت
تمتمت
وردة : وسم يسم عضاك
شفتلي مكان بين الشجر مخيم عليه وأظلم بدلت
ولبسته ومالتي خليته بالعلاكة وكمت خليت الوشاح
على صدري
رجعت فتحت السيارة وصعدت.. ساند عكسه على
تجوة
نسر : بشري قياسج؟
بخجل
وردة : اممم
باوعلي
نسر : نسيتي شي
فتحت عيوني
وردة : ليكون سيت؟!
خرب من الضحك وماسكت لحد ما عيونه دمعت
نسر : الشريحة نسيتيها!
وردة : وين تنحط؟
نسر : بـ***
وردة : وماتخليها اني شكو!
هزيت أيدي
وردة : يحجي علية وهو اضرب مني كل كلمة
والثاني وكال
نسر : صرت مثلج
نسر : ولج بوية بالـ
ضحك وأشر على صدري
وردة : وليش ماحطيتها من البداية!
نسر : غير حيرتني... وصحت وراج ماسمعتي
وردة : جيب اني احطها
نسر : لا خاف تخربها
وردة : لا گلي شلون؟
علمني هزيت راسي
وردة : لف وغمض عيونك لو تنزل
نسر : بس ادير وجهي عليمن اغمض
وردة : لا خاف يبين انعكاس بالجامة
هز راسه
نسر : راح انزل وأمري لله الواحد القهار
فتح الباب ونزل داير وجهه وضهره ألي .. اني لفيت
نفسي وحطيت الشريحة.. ورجعت الوشاح على
صدري.. صحت
وردة : تعال
لتفت واجه صعد
نسر : ها؟
وردة : حطيتها
نسر : صلوات
طلع جهاز كلش صغير ويا مثل الحبه ناعمة
نسر : تعاي خلي اجربها
وردة : وين بعد!
نسر : بأذنج
وردة : اني اخليها
نسر : لا هاي صعبه شوية.. مااريد أذيج
وردة : خوما تروح بأذني؟
نسر : لا
بعدت شعري خليته صفح وقربت بتوتر مديت راسي
أله.. شغل الضوه
نسر : لاتتحركين
وردة : اهممم
لزم أذني توترت ونفسي تخربط.. رجع رفع راسي شوية
واحس يبحوش بأذني.. خفت أحجي شي.. بعدها حسيت
نحنى اكثر وسحب نفس قوي من تحت أذني
بتعدت بسرعة
وردة : هااا كملت؟
نسر : اي
وردة : وماتحجي شني بحلگك عظم!
نسر : لا مو شفت شي يجذب الانتباه ويشتت التركيز
وردة : شنو؟
نسر : شامة برگبتج
نزل عينه على رگبتي كال
نسر :خفت الله بيها
بلعت ريكي بتوتر ونزلت شعري.. ختنكت بعبرتي
وماحجيت شي سكتت ثواني حتى ماتفضحني
نبرة صوتي.. بعدها
وردة : يله اتصل
نسر : انزل حتى اجرب الصوت
هزيت راسي، بأيجابية قبل ماينزل
طلع جهاز واتصل ضغطت الدكمة.. نزل مشي مسافة
اجه صوته بنص راسي
نسر : تسمعيني؟
وردة : اي
نسر : واضح؟
وردة : اي
اجه صعد
وردة : يله طلعها وخلي اولي
نسر : زين باجر شلون؟
وردة : تعال ورا الدار بس خليها وروح ماطول
ومحد يشوف
نسر : متأكدة؟
وردة : اي
نسر : تعاي
قربت راسي
وردة : بس لاتسوي شي
نسر : سويت؟
وردة : كلامك يحسسني برخض
نسر : غالية والله وماعاش لي يحسسج هيج
حساس
ماحجيت... قرب مدري شنو دخل بأذني وسحبها
نسر : هاي هيَ
وردة : خليها يمك خاف تضيع يمي
هز راسه
نسر : عرفتي باجر بيش الساعة؟
وردة :كالت تعاي بتسعة بالليل.. كتلها قبل التسعة
يمج
نسر : جوري
رفعت عيني له
نسر : نتبهي على نفسج لو تموتين ماتكلين ولا تشربين
شي فهمتي
هزيت راسي
نسر : واني وياج على خط أي شي يصير اسمعه
وردة : ان شاءلله
فتحت الباب ردت انزل
نسر : ورد
لفيت
نسر : ماتعشيتي!
بتسمت
وردة : مشكور يخوي... كافي تعبتك وياي
نسر : اني لي لازم اتشكر منج
وردة : ماسويت شي
نزلت سديت الباب.. مشيت خطوات ورفعت شعري
وگلبي صاير نار من كلامة تمتمت النفسي
وردة : يجي وكتك وفلا اتسمى جوري اذا ماخليتك
تندم على كل كلمة لاوالله على كل حرف
بعدت عنه خليت أيدي على صدر
وردة : حركت گلبي والله لحرك گلبك
سمعت صوته حسيت گلبي وكع بالكاع بسرعة باوعت
للجهاز
وردة : اني طفيته معقولة سمعني!
اجه يركض وصل يمي وكف
نسر : جوري
وردة : شكو؟
تقرب وضوع المبايل صار بوجهي
نسر : تبجين؟
نزلت عيني
وردة : لا ليش أبجي!
وقرب اكثر يتفحص وجهي
نسر : لا بجيتي
وردة : روح لا يشوفونا
سحبني من أيدي اكو شجرة جوز كلش جبيرة سند
ضهري عليها وصار كدامي
وردة : شبيك؟ شفت واحد؟
نسر : لا.. رس شفت جنيتي تبجي
وردة : عوفني
نسر : والله ماعوفج له أعرف سبب دمعج
وردة : وخر عني لااضربك
ضحك و داس على رجلية
نسر : ادب سز
وردة : اااخ رجلي
نسر : جذابة... انتِ ضرباتج قاضية ماتخطين الهدف
قناص
وردة : عوفني حتى مااقضي عليك
نحنى بخفه وخله جبينه على جبيني بتعدت لزم وجهي
نسر : شبيج؟
وردة : عوفني لااستفرغ
نسر : أطمأني قربي مو خطر ذيج الخطورة الي بعقلج
وردة : نسر عوفني
نسر : أحجي ليش بجيتي وأعوفج
خليت أيدي على صدره ودفعته.. بصوت مكسرور
نفجرت بي
وردة : تعبت من كلامك لي يسم البدن... بس مره
وحدة فكر بالكلمة قبل ماتطلع من اللسانك
رجعت دفعته هو مصدوم
وردة : الله خلالك قفلين.. اذا ماردتها سنونك تردها
شفتك
رفع يريد يلمس شعري
نسر : فهميني سويت؟
دفعت ايده بقهر
وردة : ها خطية تغشم روحك… وكل حجابة تذبها
اكبر من صماخك
نسر : ها كلمة كاولية زعجتج؟
وردة : لا أبد بس أسلوبك وتصرفاتك الرخيصة هي
تزعجني
نسر : ترا ماحجيت شي والله واذا زعلتج غلطان اني
واعتذر
وردة : اي ا*****وتعاي سامحيني لان عتذرت.. خاب
روح انت واعتذارك امسح بي بوتي عن الطين واشمره
قربلي بقوة لزمني من خصري ودفعني على شجرة
بنبرة قهر
نسر : شسوي؟ فهميني اذا تتغزلين بعزيز گلبج!
شسوي... اذا تكليلية تعبت أريد استقر يم نبضك!
سگت وضغط على خصري بقوة
وردة : نسر أيدك خاصرتي راحت
نسر : أنطيني حل.. صوتج ودلعج يرن براسي
وردة : تمثيل
قرب وجهه... يلهث
نسر : تمثيل؟
اخذ نفس كأن يركض
نسر : ولج ياتمثيل ونبرتج صادقة
خليت أيدي على حلكي حسيت معدتي نعصرت
نسر : أحجي.. اني تصيحين عوفني وعزيز گلبج
تكليلة استقر يم نبضك...
وردة : نسر حباب عوفني
غمض عيونه وكال
نسر : تعرفين شنو يعني تستقرين يم نبضه؟
سكت ثانية وكمل ونفسه صار سريع
نسر : يعني تنامين على صدره
دفعته
وردة : نجب لاتفسر من كيفك...وماعليك بية
مسوي نفسك شريف وعنك غيرة؟
ضحكت بأستهزاء
وردة : ومن شفتك لليوم.. تعايرني بكوني غجرية
وباهر خانج و سوه بيج... دائماً تحاول تقلل وتستفزني ومن ارد عليك اطلع ادب سز
قربت له اشرت بأصبعي على صدره
وردة : جؤ... ماحزرت ثق الي يرشني بمي أرشه
بدم.. بعدك متعرف منو الغجرية
لفيت... ما مشيت خطوتين إلا وإيده لزم رسغي فجأة
نسر : لحظة…
وكفت غصب عني، بس ما لفيت له وجهي.
نسر : لا تروحين وانتِ زعلانة.
حاولت افلت أيد منه
وردة : خليني بحالي!
سكت ثانيتين… حسيت إيده ارتخت بس ما تركني
فوراً، كأنه يحارب نفسه.
لفني صوبه شوي، صوته نزل أكثر
نسر : مو لأنج غجرية… ولا لأنج قوية…
سكت، ونفسه طلع ببطء
نسر : لأنج... تخليني أضعف كدامج بدون ماأحس
اخذ نفس قوي
نسر : أول وحدة تخرب توازني بهالشكل
رفعت عيني له بسرعة، مستغربة من جملته
نسر : مااريدج تروحي وانت زعلانة مني …هالشي
ما أتحمله.
سحبت إيدي أخيراً من يده بقوة
وردة : لا تتحمل ولا شي… مو مطلوب منك!
سكت… وبقى يباوع، بس مو نفس النظرة الحادة
قبل شوي
بتردد
نسر : أني … ما أريد أخسرج من أول موقف.
ضحكت بأستهزاء
وردة : تخسرني؟ ومنو گال إلك أني ملك إيدك حتى تخسرني؟
سكت.. قربت خطوة
وردة : خلي كلامي يرن براسك...
أموت ومااثق برجال
رجعت لفيت كملت طريقي بدون مألتفت... بتعدت
أكثر.... وصلت للدار اول شي سويته دورت الغرف
خاف واحد خاتلي بعدين قفلت البيبان زين...
وردة : خلاص وريدة لازم تتعلمين على غيابها
دمعت عيني
وردة : ولازم اتعلم ابقى وحدي... هو شيجي من البشر
غير الشر
فرشت فراش حبوبتي ولبست ثوبها للمخدة وخليت
راسي عليها وحضنتها احجي وياها ودموعي تنزل
وردة : جدة.. أنتِ يمي ماتعوفيني! اعرفج ماتكدين
تفاركيني... شفتي شكد ذلني غيابج؟
اناشغ واحجي وياها
وردة : وهذا عباله وريدة غشيمة ويضحك عليها بشكم
كلمة …مايعرفني ترباتج
حضنت المخدة بقوة وخليت راسي بيها وأبجي
بصياح
وردة : حبوبه لاتخليني.. مثل ماخلوني أني وريدتج
أنتِ وبس... مشتاقتلج ياضوه عيوني ميته على لمست
أيدج وصوتج... ليش حرمتيني من حضنج
ماعرف شكد بقيت احجي وي المخدة وثوبها ومدري
شلون تعبت من البجي ونمت
فزيت على صوت الباب اسمع صوت باهر يصيح
باهر : جوري..
كعدت خليت أيدي على گلبي احس بنغزة قوية
من اسحب نفس گلبي يوجعني والنغزة تكطع
النفس
بالكوة نهضت نفسي واني ادلك مكان النغزة وصلت
للباب صحت
وردة : اجيت
فتحت الباب اجه ملهوف ولا كأن ذاك باهر لخاين
باهر : شبيج؟
أيدي بعدها على صدري والنغزة كطعت نفسي
وردة : مابية شي
باهر : وجهج أصفر
وردة : لاتخاف ماكو شي
عفته ورجعت دخلت للغرفة لحكني شاف المخدة
شلون مسويتها.. باوعلي
باهر : جوري
ماتحملت كعدت بالكاع وأبجي بكل قوتي
وردة : عافتي ولك باهر... محد كدر يكسرني والله
بس غيابها هد حيلي
بسرعة حضني
باهر : اخ ياوجع گلبي شلون اداويج
وردة : أخذني ألها حباب... من اشم ترابها أرتاح
باهر : بعيوني... كومي
نهضني.. غسلت وجهي واحس الكاع دور بية عدلت
شعري وفتح الباب شفت نسر واكف وساند ضهره على سيارة
باهر لازم أيدي.. وأيدي الثانية على صدري
النعزة خنگتني بعد ماكدرت اخذت النفس.. النفس
الاخذه يوجع.. والكاع دور بية حتى توازني لزمت
أيد ابهر بقوة
صوته صار بعيد
باهر :جوري شبيج؟
وكعت فاقدة ماحست على شي.. له واني فتح عيوني
بالمستشفى... الدكتورة فوك راسي تحجي وي باهر
ونسر واكف يمه
الدكتورة : شلون هيج تعوفها؟ ضغطها مصفر
باوعت المغذي فوك راسي وكانيولا بأيدي نسر نتبهلي
صحيت قرب بخوف
نسر : سلامتج جوري
وردة : ريت الله لايسلمني بعدها
اجه باهر لزم أيدي باسها
باهر : نبضي ياروح ابهر وجع گلبه.
نسر بتعد خطوتين
باهر : ليش هيج تسوين؟ الدكتورة تكول ضغطها
نازل ماتتغذه زين
وردة : ماشتهي
نسر : هو بسبب الضعف ماتشتهين الاكل
باهر : هسه اروح أجيبلج أكل وغصب عنج
تاكلين تمام
غمضت عيوني بمعنى أي.. نهض
باهر : خليك يمها ماتأخر
نسر : صار..
باهر طلع... ونسر سحب الكرسي وكعد قبل
مايحجي شي دخلت الدكتورة كالت
: ضروري تاخذين هاي الابرة
وردة : مال شنو؟
: حاله نفسية.. صاير عندج انهيار عصبي
باوعت النسر
وردة : اطلع شكو!
هز راسه نهض طلع
الممرضة صربتني ابرة وطلعت..هو اجه شافني
اتوجع من رجلي احسها خدرت من الابرة جلست
نفسي ادلكها
نسر : توجعج؟
وردة : لا دغدغني
نسر : ادلكها ألج؟
وردة : نجب
نسر : لو عزيز گلبج.. تقبلين؟
سحبت الحديدة مالت المغذي
وردة : اذا ماتسكت اخلي دمك يفور
رجع كعد على كرسي
نسر : اهمممم... سكتنا
رفع عينه على مغذي
نسر : هووب لاتحركين ايدج
نهض لزم أيدي.. قبل مااحجي كال
نسر : لحظة بس..
ثبت أيدي وبطرف اصبعه دلك الوريد
نسر : لاتحركيها
وردة : أيدها ثكيله الممرضة رجلي نشلت
فتح حلكة راد يحجي صحت
وردة : صم حلكك
نسر : شبيج!
وردة : عوفني.. اطلع بالباب
طلع بدون اعتراض..بقيت وحدي لحد ما اجه باهر
بأيده الاكل دخل ويا نسر
فتح الاكل كال
باهر : بصعوبة دخلته ميقبلون... يله جوريتي اكعدي
كعدت عدل المخدة ورا ضهري وكعد كدامي يسوي
لفات يوكلني
صفنت بوجهه ودي اصيح واضربة واكول
: ليش... ليش هيج سويت؟ وصرت ملجأ كاذب!
عفت الدنيا واجيتك.. بس ضيعتني بساعة ضعف
مدتها دقايق!
احس عيوني نترس دموع.. ودي اعاتب واصيح
وأبجي
: ليش فوك كسري تكسرني؟ شكد ابقى اسامح بعد!
وكل مرا تكول اخر مرا وترجع تعيد الكره!
خليت القريب والغريب يتشمت بية! مااستاهل لسويته
مااستاهل تخوني والله مااستاهل
بأيده مسح الدمعة الزلت بسببه
باهر : ليش البجي ياوجع گلبي
وردة : أني وجع گلبك؟
باهر : واحلى وجع؟
وكلني الكمة وشربت ماي يله تنبلع
وردة : ليش؟ شني سويت شي وسببتلك بي وجع؟
حتى استحق هيج تسميني؟
نزل راسه وسكت
وردة : معقولة هذا الوجع يكون تأنيب ضمير فقط؟
رفع عينه بصدمة ماتوقع هل كلام
باهر : ممكن ....
سكت ونزل عينه
باهر : يكون ذنب عظيم اقترفته بحقج وانت
ماتستاهلين
وردة : شكم مرا؟
رجع نظرلي بصدمة..بتسمت وغيرت الموضوع
وردة : كافي حبيبي شبعت
باهر : أخر لكمة
اخذتها اكلها وكل لكمة اشرب وراها ماي.. لم الاكل
رجع لزم أيدي
باهر : هسه شلون صارت وردتي؟
وردة : احسن
باهر : تحبين نروح البيتنا؟
وردة : بيتنا؟
باهر : أي
قرب همس
باهر : متحمس تشوفين المفاجأة لي كتلج بيها
وردة : ماكتلي؟
باهر : اي بس كتلج اكو مفاجأة
وردة : شنو؟
باهر : اششش.. عيب اسرار متزوجين
وردة : نجب
باهر : بلبيت انجب وتلميني بحضنج
سكتت.. وصورتهم هو ورند ماتروح من بالي
وتصرف باهر او تمثيله يحبني وخايف علية
وتالي يخوني بعد ماتوسل حتى بس اسامحه!
تنهدت
وردة : يمتى اطلع؟
نسر : بس يخلص المغذي
وردة : شكد ويخلص؟
نسر : تقريباً عشر دقايق
خلصت اسوء عشر دقايق بين ثنين واحد اسوء من
الثاني...ثنينهم منافقين واستغلالين..بس دواهم عندي
بس اوكف على حيلي له لعبهم على حبل... خاصه هذا
له أعلمه منو الغجرية..
طلعت وماقبلو ياخذوني الحبوبتي.. خطية خايفين
علية... والله بيهم زيج بس مابيه حيل ريكي ناشف
وگلبي يوجعني
رجعوني للدار
وردة : خلاص خلوني ارتاح
باهر : كل ساعة اتصل اطمأن عنج
وردة : اذا نايمة ماارد لاتلح
باهر : صار.. ترظين اصيح وحدة من البنات تجي
يمج
وردة : لاااا.. كلش هواي زحمتهم واني هم مالي خلك
اريد انام
باهر : تمام
طلعوا سديت الباب.. رجعت خليت الشاحنه يم راسي
ولعبت شوي وبسبب الابرة لي ضربتها رجعت نمت
صحيت مفجوعة بسرعة اخذت المبايل شفت الساعة
ب4العصر
خليت ايظي على گلبي
وردة : اخخ ولج حبوبه حسبت النومة اخذتني
شفت كلها متصله سهام، باهر، نسر، سلطانة.. اول شي
تصلت باهر
باهر : شلونها وردتي؟
وردة : كلش زينه والله هستوني كعدت
باهر : اي عرفتج
وردة : لايضل بالك راح اروح يم البنات
باهر : تمام
سديت الخط ورجعت تصلت بنسر
نسر : الو جوري شلونج شلون صرتي؟
وردة : الحمدلله... بس ردت اكلك بعد المغرب تعال
حتى تسوي السماعة
نسر : تمام اني قبل مااجي اتصل بيج... صوتج بعده
تعبان
وردة : جنت نايمة
نسر : جوري بروح حبوبتج اكلي.. لاتسوين هيج
تعبين أكثر
وردة : ان شاءلله
نسر : وعد؟
وردة : وعد
نسر : تمام نتبهي على نفسج واي شي تحتاجين
اتصلي
وردة : ان شاءلله... مع سلامة
سديت الخط... ورجعت نمت بدون مااغفى.. بس
كل مايقرب الوقت احس بخوف.. هدأت نفسي
وكمت ماعندي شي ينوكل
سويت عجينه مقدار كوب طحين وخمرتها اقل نص
ساعة نفشت.. خليت قوي الچاي على نار ورجعت
سويت دواكه.. خبز بالدهن
رشيت علية شكر لان العسل هم خلص وشربت چاي
هاي الاكله أحبها حبوبتي دائماً تسويها... كل مرا اكلها
وياها.. بس هل مرة وحدي
الدنيا ضلمت بسرعة.. شتا وجبال بسرعة ينزل الليل
طلعت شفت صار هدوء ولا طير بالشارع
اتصلت بنسر.. بسرعة رد كأنه منتظرني
نسر : ها ورد
وردة : اذا تكدر تجي ماكو شي
نسر : يله دقايق اني اساساً بنفس المكان
وردة : بس نتبه لحد يشوفك
نسر : لاتوصيني
سديت الخط ورحت فتحت الباب الخلفي.. شفته
اجه من بعيد ملثم واديه بجيوب القمصلة..
بس وصل للباب دخل بسرعة ونزع الثامه وبحركه
سريعة لزم وجهي بثنين ادي وباس راسي وبتعد
ماتركلي مجال احجي او ابعده
نسر : شلونج؟
وردة : زينة
نسر : خو ماخايفة؟
وردة : متوترة شوي
نسر : ماكو شي ان شاءلله اني وياج
طلع السماعة وقرب صوبي.. بعد الشعر عن اذني
ودخل السماعة وبتعد طلع الجهاز واتصل
نسر : لابسته؟
وردة : اي
نسر : ضغطي زر
وردة : ضغطت
بتعد كال
نسر : تسمعيني!
وردة : اي
نسر : راح اروح خلي مفتوح..
وردة : بس لاتحجي بأذني له للضرورة
نسر : تأمرين سيادتج
راح.. وسديت الباب ورجعت طلعت السلطانة لكيتها
مخبوصة.. ترتب وتسوي من شافتني فتحت ايدها
سلطانة : هله وكل الهله.. كعدي هنا واروح اكمل
تجهبز
كعدتني وراحت تكمل... بقيت صافنه على بنات يلبسن
ويتمكيجن لحد ما صار الوقت سلطانة ختفت بقيت
احوم.. شفت سيارت كومة صفت..
بعدها اجت سلطانة صفكت
سلطانة : يله بنياتي للغرفة جهزن نفسجن
راحو البنات للغرفة واني بقيت سويت نفسي مو يمهم
العب بالمبايل... بعدها طلعت واكوم بسرعة الحكها
نصدمت من باهر نطاها جنطة.. ماسمعت شنو حجو
بس شفته يأشرلها باصبعة وهي تهز راسها
وردة : نسرر تسمعني؟
نسر : اي وياج.. صار.
وردة : باهر شنو؟
نسر : باهر طرف الوصل بين الاثنين
وردة : ليش ماحجيت؟
نسر : حجيت وداعت عيونج حجيت.. بس ماجنتي
تشوفين خلف هل حب.. شخص سام
سكتت
نسر : شنو صار؟
وردة : سلمها جنطة
نسر : هسه فتحلي عقلج وانسي باهر
وردة : يله اجت اجت
سكتنا.. سلطانة مشت بسرعة ودخلت الغرفة البنات
اقل الخمس دقايق طلعت تتلفت رحتلها
وردة : ها عمه؟
طبطبت على جتفي
سلطانة : شوي واصيحج هسه مشغول وي الزلم
هزيت راسي
سلطانة : كعظي هنا ولاتتحركين
وردة : صار
عافتني وراحت شفتها بتعدت... فتحت الباب دخلت
على بنات نصدمت من شفتهن يعبن اجه صوت نسر
نسر : ها؟
البنات نتبهولي وحدة منهن صاحت
: تعاي هاج عبي
نسر : شنو؟
همست
: اشش دوختني..
اخذت جيس منها مغلف كالت
: هاي اول مرا ألج
وردة : اهمم
اخذت الجيس فتحته وصارت تعبي
كالت
: انتِ بنية
وردة : شايفتني كدامج ولد!
ضحكت
: وتنكت هم
اجه صوت
نسر : موكتج ابد
كالت
: لا قصدي بنية بيت؟
وردة : لا والله بنيت شارع
البنات صارو يضحكون
تنهيدت نسر شكت اذني.. صار يردد غنية
حسام الرسام
نسر : احول حبيبي الروح.. اثول مطفي
بسرعة سديته الاتصال منه
كالت
: هاج وروحي خلي وداد تعلمج
هزيت راسي اجت وداد اخذتني... بس علمتني وعرفت
شلون احس جسمي كله صار يرجف من خوفي ردت اوكع
ونسر ثبرني ثبر يدك وماارد
وردة : اي اني اسويها
طلعت وعافتني ارجف من خوفي.. رديت على نسر
نسر : ليش تسدي ولج روحي راحت
بصوت يرجف
وردة : نسر الحكلي
نسر : كشفوج؟
وردة : لا بس عرفت شلون
نسر : تمام هدي نفسج ولاتخافين انت موحدي اني
قريب اذا تمدرين طلعين اني منتضرج
وردة : شلون اطلع خايفة؟
نسر : بس فكري زين وهدي نفسج وخلي هدفج كدام
عينج.. قوي نفسج جوري
وردة : تمام.. اسكت
سكت.. اخذت نفس وهدفي دمار سلطانة.. شكيت
الجيس
وردة : اتصل عليه بسرعة من تسمع صوتي احجي
وياهن
نسر : تم
طلعت
وردة : بنات نشك؟
اخذته خلته بجيس ثاني.. رن مبايلي.. رديت
وردة : هاعمه.. اي يله هسه؟ صار.. اجيت
باوعتلي
: ها؟
وردة : عمه سلطانة رادتني.. ماتاخر اشوفها طالبني
:: هي هاي الحلوة يصير طلب عليها
هزيت وركي
وردة : استاهل
ضحكن طلعت بهدوء من يمهن وصرت اتلفت شفت
سلطانة اجت شافتني..
وردة : ها عمه وين ادور عليج؟
سلطانة : يله روحي كدامي
اشرت على باب
سلطانة : اوكفي هناك هسه اجيج واخذج له
حضنتها بكل قوتي
وردة : ماانسى وكفتج وياي
سلطانة : اعرف بيج أصيلة
بتعدت ومشيت.. هي دخلت للبنات وارجع واسويها
ركضه
وردة : وين انت ؟
نسر : ورا البيت بمسافة قليلة.. ماكدر اقرب أكثر
وردة : يله طلعت
طلعت من الباب ركض اريد اوصل المكان نسر ورا الدار
لازم ادخل بالفرع يله
واول مادخلت الفرع نسحبت بقوة
من قوة السحبة شهكت.. وعيوني فقعت أكثر ونصدمت من شفت باهر لزمني من زندي وعيونه تجدح
