رواية بديلة اختي الفصل الخامس عشر بقلم خاتون الكعبي
تذكير
شاهين برود : وهسة المطلوب مني شنو
رهام بدموع: تخلصني من ابن عمي محمود
شاهين بسخرية : وشون بلة
رهام : تتقدملي
شاهين : ههه حلوة هاي اتقدملج
رهام بعصبية ودموع : اي تتقدملي شكو بيهة اني احبك واكيد حخليك تحبني وتبادلني نفس المشاعر وبت عمك وطلكتهة بعد شنو
شاهين بحدة : خلصتي
رهام : هزيت راسي بدموع ولزمت ايده اباوعلة نتر ايدي ودخل للديوان مسحت ادموعي واني اتوعد الة وللكلبة مرسلين ودرت ظهري حتة ارجع ادخل قبل لا جدي يكعد لأن هذة وكت كعدتة الصلاة الفجر
مرسلين : اول مشفتهة دارت ظهرة ورادت ترجع سديت الشباك بسرعة وركض فوك دخلت للغرفة وملامح الصدمة بعدهي مرسومة ع وجهي من الكلام السمعتة مدري ليش بس انقهرت عليهة وهوة الحقير يتعامل وياهة بأسلوب ينرفز اموت وعرف شحببهة بي اشو كول المعاصي والسيأت بي كلت هيج واني احس راسي حينفجر من كثر التفكير واول مردت ارجع انام سمعت صوت رسالة وصلتني جريت تليفوني من ع الميز بستغراب واول مفتحت التليفون شفت شاهين دازلي رسالة كاتب بيهة
💬 انتي الكلتي الرهام ع موضوع الطلاك
مرسلين : اقرة الرسالة واحس الصدمة والتوتر متملكاتني ظليت اكل ابأضافري من التوتر اذا ارد علي او لا الحد ما كلت احسن شي اغلس شكلك نايمة كلت هيج وما احس غير برسالة ثاني اجتني كاتب بيهة
💬 اعرفج كاعدة ردي
مرسلين : خررب بس لا شافني اسمع عليهم كمت اعض بشفتي من الخوف الحد مشجعت روحي ودزيتلة
💬: اي اني الكلتلهة
مرسلين : كتبت هيج وما احس غير التليفون كام يهتز بيدي من كثر التوتر رديت علي بسرعة وكلت
مرسلين : الوو
شاهين برود : ليش كلتيلهة
مرسلين بتوتر : شنو ليش كلتلهة قابل ابقة ضامة عليهة واني اشوف البنية خطية تحبك وتباوعلي بحقد عبالك بايكتك منهة
شاهين : زين واذا اكلج غيرت رئيي وما اريد اطلك
مرسلين بسخرية : ههه اي مو هوة بكيفك حتة متريد اطلك
شاهين بستفزاز : لعد بكيفمن ولا تنسين الكلام الكلتيلي يا قبل فترة الشاهين مستحيل احد يكدر يجبرة ع شي هوة ميريدة
مرسلين بنرفزة : شاااهين لا تلعب بعصابي انتة انطيت كلمة وكلت اطلكج بعد شهل حجي المالة داعي وترة اني منتظرة نرجع البغداد ع احر من الجمر حتة اكول الجدو يستعجل ويخليك اطلكني واتحرر منك
شاهين : تتحررين مني
مرسلين : اي اتحرر منك انته صرت مثل السجان بنسبة الي واريد اتخلص منة بأي شكل من الأشكال
شاهين برود : وهل سجان ايكلج مستحيل تتحررين منة وراح تبقين طول عمرج محبوسة بقفصة مثل الطير
مرسلين بعصبية : اكرررهك تعرف شنو يعني اكررهك وما كرهت ولا راح اكره واحد بكد كرهي الك
شاهين بسخرية واستفزاز : ليش اتحسسيني كاتل نفسي عليج ترة انتي مجرد أداة الأنتقامي من اختج المصون لا اكثر ولا اقل
مرسلين : اسلوبة وكلامة مستفز ويحرك الكلب ابدك تروح وتدفنة ع هل كلام ومكدريت اتحملة اكثر من هيجي فسديت المبايل بوجهة ورجعت التليفون المكانة واول محطيت راسي ع المخدة بداً ادموعي اينزلاً واني اذكر كلامة وشون يكول أداة لحتة ينتقم بيهة الحقير مسحت ادموعي بعنف وظليت اتكلب وافكر ابكلامة الحد ما غفيت و......
____________
تقى
بيبية مسلم : سالمة اعيونج احبيبة اليوم اجيت اني وام مسلم حتة نطلب ايد بنيتج ضحاوي لأبني مهدي ع سنة الله ورسوله
تقى : ظليت صافنة عليهة وبس اعيوني الترمش من الصدمة شنو يعني هاي البنية مو حبيبتة وجاين يخطبوهة الخالة مو الة لا اردين البتسامة ارسمت ع وجهي باوعت ع زينب ورجعت عيني ع البنية كاعدة ومستحية اشكد كرهتهة اول مدخلت وهسة لو ما عيب جان كمت حظنتهة للحظة تخيلت فعلاً
اجيت اخسرة وحيصير الوحدة غيري بس التفكير بهذة الشي ايضيك خلكي لعد اشون لو حقيقة نفيت كل هاي الافكار من راسي وباوعت ع ام البنية الكالت ناخذ رئي ابوهة وخوانهة وردلكم خبر كلتلهة بيبية مسلم خير ان شألله وأشرت العمة ادك ع مسلم دكت علي ورة فترة يلة اجة وكمنة سلمنة ع ام البنية والبنية وطلعنة ركبت السيارة وباوعت علي بالمراية وضحكت ابلاهة باوعلي وعقد حاجبة بستغراب وسئل بييبتة ع الصار كلتلة كالو فترة وايردونة خبر هز راسة بتفهم وسكت وبدة ايسوق وعينة علية معرف ليش بس حسيت بخجل قوي منة دنكت راسي بأحراج وصل اول شي بيبيتة انوب رجعنة للبيت واول مدخلنة صعدت زينب الغرفتة وعمة دخلت للمطبخ باوعلي وكال بستغراب واضح ع ملامح وجهة
مسلم : بيج شي اليوم
تقى : لا ليش
مسلم : اشو لمن رحنة وجهج ما يكصة الطبر وهسة الضحكة شاكة حلكج
تقى بأحراج : لا عادي بس اشوية جنت تعبانة قبل لا اروح وهسة يلة صرت احسن
مسلم : اها سلامتج ماكلتيلي اشرئيج بالعروس
تقى : زينة ومبين عليهة حبابة هية وامهة
مسلم بمكر : واختهة
تقى بستفهام : شنو ليش اشدخل اختهة بالموضوع
مسلم : مدخلهة بس امي تريد تخطبهة الي وبيني وبينج اني عاجبتني حبابة وحلوة و..قاطعتة تقى بعصبية
تقى : مو عيب هيج تحجي وبعدين انتة وين شايف اختهة حتة هيج تحجي عليهة
مسلم : شفتهة اكثر من مرة وعجبتني وليش عيب لا حاجي وياهة ولا ماخذ رقمهة حتة عيب
تقى : باوعتلة بعيون مدمعة وعفتة وصعدت فوك الكلب الحقير اشون ايريد يحرك كبلي و............
______________
مرسلين
كعدتني امي اني واوتار من الستة اصبح وكالت كومن بسرعة تحضرن حنرجع البغداد فزيت من مكاني بسرعة لمن سمعتهة كالت حنرجع صبحت عليهة وع اوتار ودخلت سبحت وصليت ولبست بنطرون اسود وتشيرت طويل سمائي ولبست شال اسود ويا وحذاء باتة بيضة واخذت جنطتي ونزلت بسرعة صبحت ع النسوان وكعدت يم مامة اتريك سئلتني عمة ع اوتار وكوتلهة هسة تجي دتلف بشالهة وفعلاً ورة دقايق نزلت وصبحت ع النسوان وكعدت بصفي كملنة ريوكنة وراهة اجة ابن عمو كرار وكال اتحضرن راح اروح كمنة ودعنة النسوان الموجودات وطلعنة بعد مصاحونة واول مدنكت حتة اشيل نونة
شفت رهام واكفة بالمطبخ اتباوع من الشباك وصافنة راحت عيني ع الشي الصافنة علي وشفت شاهين تباوعلة وتبتسم وهذة ولا يمة واكف وية ازلم ويسولف واول مشافني مدنكة خزرني شلت بت اختي وكمت بسرعة الحقير وفوكاهة يخزر الحد الأن يتردد كلامة
ابالي ومستحيل انسى وراهة صاحنة اخوية محسن حتة نطلع والحمد لله اتصالح هوة ومرتة وحترجع ويانة كتلة حنركب وية بابة اني وهدى حتة يبقون الوحدهم واخذت ويانة علوشي وركبنة ورة ومامة كدام ورة اشوية اجة بابة ركب وبدة ايسوق درت عيني ع الجامة وصفنت ع الشط وبساتينهم الحد مطلعنة للشارع العام يلة درت عين من الجامة ورجعت راسي ع الكشن بنعاس نمت وكعدت واحنة بعدنة ما واصلين فعلاً جان الطريق طويل ومتعب ومنا اسواقت بابة بطيئة يعني طاح حظنة الحد مدخلنة بغداد
واول موصلنة البيتنة فتحت باب السيارة بتعب وشلت نونة ونزلت دكيت الباب وطلعلي اخوية حسين ابتسمت لمن شفتة وحظنتة ودخلت جوة سلمت ع مرت اخوية حسين وسن وشفت اخوية محسن ومرتة واصلين قبلنة ابتسمتلهم وخليت نونة عدهم وصعدت فوك غسلت وبدلت ملابسي وكبل ع النوم من التعب احس جسمي متكسر من الطريق ما كعدت الحد ما صارت بالخمسة العصر يلة فزيت وكمت غسلت وصليت قضاء ونزلت جوة ادغديت وكعدت يم البنات ومامة وباوعت ع وسن وكلت
مرسلين : وسن حسين راح اخذلي اجازة مو
وسن : اي حبيبتي راح
مرسلين : زين مامة لازم اروح التقى اخذ منهة الواجبات الفاتتني وهم اسلم عليهة وشوفهة مشتاقتلهة اهواي فددوة
ام مرسلين : اني ملي علاقة هذاك ابوج وروحي كليلة
مرسلين ؛ باوعتلهة بضوجة وكمت واني اتأفف دخلت للستقبال وشفت بابة كاعد ايباوع علة التلفزيون كعدت كدامة وظليت اباوعلة بتوتر اخاف اكولة ويرفض الحد منتبه علية هوة وكال
ابو مرسلين : كولي بوية اشرايدة اكيد عندج شي
مرسلين : ههه ها لا بس شسمة اريد اروح البيت تقى فدوة حتة اخذ منهة الدروس الفاتتني وهم اسلم عليهة والله مشتاقتلهة
ابو مرسلين : ومنو ياخذج
مرسلين بفرح : محسن موجود بغرفتة اكولة هوة يأخذني
ابو مرسلين : زين كلتي ارجلج
مرسلين بسخرية: هههه شنو رجلي بابة غير طلكني وبعد مألة اي حق علية الرئي الأول والأخير الكم انتو وبس
ابو مرسلين بهدوء : حتة لو باباتي بعدج ع ذمتة ولازم تكليلة قبل لا اطلعين ترة حرام والله ايحاسب المره التطلع من دون علم زوجهة
مرسلين بعصبية مكتومة : اوكي هسة حتصل بي واكلة بس ما كلتلي انت موافق
ابو مرسلين : اي ابنيتي بس مو تتأخرين
مرسلين : ابتسمتلة وكلت لا متأخر وعفتة ورجعت للصالة شافني البنات واشرلي بمعنة اصار كعدت يم مامة وكلت بنرفزة
مرسلين : وافق بس ايريدني اخذ اذن شاهين اول شي
هدى : وليش حتة تأخذين اذنة مو طلكج
زهراء: بس لا تنسين هوة بعدة مطلكهة رسمي يعني بعدهي مرتة وعلة ذمتة وميصير تطلع من دون اذنة
مرسلين : اباوع علة اختي هدى لوت حلكهة وكامت ادردم عفتهن وصعدت الغرفتي دخلت وزفرت انفاسي بعصبية واخذت تليفوني ودكيت علي مرتين ومجاوب دكيت علي مرة ثالثة وظل ايدك بس ماكو رد الحد ممليت واجيت اسدة يلة اجاني صوتة المستفز وهوة يكول
شاهين: خير
مرسلين بنرفزة : الخير ايصيبك بس اريد اروح البيت صديقتي وردت اخلي عندك علم
شاهين برود ؛ ماكو روحة
مرسلين بعصبية : وليش بلة شاهين ب. قاطعني وهوة ايسد التليفون بوجهي غمضت اعيوني بعصبية وشمرت التليفون ع الجرباية الحقير المستفز اني ايسد التليفون بوجهي بسيطة كلت هيج واني اروح اغسل وجهي ابمي بارد حتة اهدة ورجعت اخذت تليفوني وديكت ع تقى لحظات وفتحت خط سلمت عليهة واعتذرت منهة وكتلهة ما اكدر اجيج واخذت كول الدروس منهة وسديتة وطلعت جنطتي وكعدت ادرس صاحوني ع العشة ونزلت اتعشيت وسويت جاي ورجعت صعدت كملت ادروسي وحضرت جدولي وطلعت ملابس المدرسة غسلتهن وظليت اكلب ابتليفوني الحد ما نعست ونمت و......
_____________
اوتار
كاعدة بالسنتر واحس راسي صدع من ورة فجر من دخلنة واليجاي معافت واحد يعتب عليهة مأخذت غيبتة ومسكتت الحد ما عطت بيهة وكلت
اوتار : لجج كافي مو راسي صار طبل من وراج من دخلنة واليجاي وانتي كركركر ادري متعبتي ممليتي
فجر : اوجع اشبيج غير مشتاقتلج صارلج فوك اتلث تيام غايبة والله صرت جني يتيمة اخلافج مكلتيلي اشونة جو البصرة ولدهم شلونهم ايكولن صاكين
اوتار : هههه هذة الهامج اشرئيج افتن عليج الفادي
فجر : حقيرة مو بيدج
اوتار : طالعة عليج كلت هيج واجو اصدقائنة كروب شباب وبنات سلمو علينة وكعدو يمنة ظلينة انسولف ونشاقة الحد مرفعت عيني وشفت محمد دخل للسنتر والدكتورة سهى بصفة اباوعلة يضحك ويسولف وياهة واني امبوز بوجهي الحقير باوعلي وخنزر وراح طلبلهم كهوة وطلعو مرت دقايق قليلة واجة زميلنة بالقسم يركض شافني وكال
: اوتار الدكتور محمد ايريدج بسرعة
اوتار بستغراب : ليش
: معرف بس كال صيحلي ياهة المكتبي
اوتار : هزيت راسي وترخصت منهم ورحت المكتبة دكيت الباب بتوتر ودخلت شفتة كاعد ع مكتبة ويكتب رفع عينة وباوعلي بخزرة بلعت ريكي بخوف وكلت
اوتار : تفضل دكتور كالو طالبني
محمد بحدة : اشكم مرة منبهج وكايلج ما اريدج تكعدين وية اكروب بي ولد هاا
اوتار بتوتر : همة اجو سلمو علينة وكعدو قابل اطردهم بعدين الكروب كولة من قسمنة تعرفهم انتة شباب حبا..
محمد بحدة : نعلل عليهم وكتلج ورجع واكول ما اريد اشوفج كاعدة وية اي اكروب مفهووم
اوتار : عفواً بس داتحجي هيج وتأمرني بصفتك شنو
محمد : بصفتي دكتورج وابن خالج الي حطتج امج امانة عندة ويلة هسة رجعي المحاضرتج قبل لا تتأخرين
اوتار : باوعتلة بغيض وعفتة وطلعت و..............
______________
مرسلين
كعدت من وكت ع صوت المنبه طفيتة وكمت سبحت وصليت ولبست ملابس المدرسة واخذت جنطتي ونزلت صبحت ع الكل وكعدت اتريك كملت ريوكي وكمت اخذت مصرفي ومريت ع بيت تقى سلمت عليهة وحظنتهة بس معرف ليش حسيتهة مو ع بعضهة سئلتهة اذا واحد مضوجج كلتلي لا هزيت راسي بتفهم وعفتهة براحتهة ورحنة للمدرسة دخلنة وكل عادة اول شي اصطفاف ورزالة وراهة دخلنة للصفوف وتوالت علينة الدروس بشكل روتيني وملل كملنة دوامنة واول مدك الجرس طلعنة للبيت شفت سيارة اخوية محسن اكبال باب المدرسة ابتسمت وجريت تقى ورحنة سلمنة علي وركبنة وصلنة تقى اول شي البيتهة وراهة رجعنة للبيت اباوع ع اخوي صارت نفسيتة احسن من بعد ما اصالح هوة وزهراء الله يحفظهم كلت هيج ونزلت من السيارة اول مصفهة اكبال البيت ديكت الباب وطلعلي ابوية سلمت علي ودخلت شفت مامة والبنات ديصبن غدة ولولد راحو ايصلون صعدت كبل فوك غسلت وبدلت ملابسي ونزلت صبيت وياهن غدة وكملنة غدانة ورحت سويت جاي وصبيتة الهم وكعدت بصف بابة وبحظني علوش همة ايسولفون واني لاهية وية علوش العب ويا الحد مكال بابة
ابو مرسلين : هدى اليوم خابرني ابو عماد وكال راح ايخرجون رجلج باجر من السجن فالعصر خلي محسن ياخذج البيت اعيالج عيب منهم ومن رجلج لازم تستقبلي اول ما يجي
هدى : باوعت ع امي بصدمة والتفتت ع بابة وكلت
هدى بتوتر : بس بابة اني كلتلك قبل فترة ما...
ابو مرسلين بعصبية : وكتلج هذة الحجي ايفيدج وما عندي ابنية تطلك وانتي اختاريتي فتتحملين نتيجت اختيارج مفهووم
مرسلين : اباوع علة هدى كامت تبجي وعافتنة وصعدت فوك وللعصر بابة كام ايعيط عليهة لأن مرضت ترجع الحد ما امي صعدتلهة وقنعتهة يلة رضت ترجع بس معرف ليش حسيت نظراتهة وهية اتودعنة مثل الحاقدة او محتقرتني ما اهتميتلهة او بالحرة اجاهلتهة وظليت اودع بالجهال واخذاهة اخوية وراح وظلو مامة وبابة بالستقبال يحجون واني صعدت فوك طلعت كتبي وبديت ادرس للمغرب يلة خلصت كولشي ونزلت سويت عشة وية مرت اخوي ورحت للستقبال صحت بابة واخواني ع العشة اتعشينة وصبيتلهم جاي والتمينة كولنة بصالة اشوية ومامة كالت
ام مرسلين : فعلاً صار البيت وحشة بعد مراحو الجهال
مرسلين : اي وخصوصن نونة من هسة اشتاقيتلهة
ابو مرسلين : هههه كولن يا الله قابل راحت بغير محافظة هاي هية فرق عنة اشكم بيت
مرسلين بزعل : بس حتة لو صار البيت وحشة بدونهم بابة فدوة اشرئيك اروح البيت جدو
ابو مرسلين : شسوون تروحلهم هسة عود باجر اوديكم
مرسلين : لا بابة فددوة خل اروحلهم هسة والله ضوجة
ابو مرسلين : ماشي
مرسلين : ابتسمت بفرح وصعدت ركض فوك لبست جبتي فوك التراك ولفيت شالي بسرعة ونزلت جوة شافني بابة وابتسم ورة اشوية نزلت امي وهية تعدل بعباتهة باوعتلهة وكلت
مرسلين : لعد وسن وزهراء ميجن ويانة
ام مرسلين : وسن تعبت من الحمل وراحت نامت وزهراء جاي اتنوم بعلوش
مرسلين : هزيت راسي بتفهم ورحنة البيت جدو دخلنة وراح بابة للستقبال واني ومامة دخلنة بصالة ابتسمت واني اشوف بيبي وعمة كاعدات اكبال الباب ورحت سلمت عليهن وكعدت اشوية ودخلت اوتار سلمت علينة وكعدت بصفي وكالت بهمس
اوتار : حقيرة اتصل عليج متردين ليش
مرسلين بنفس الهمس: اسفة والله بس جنت ملتهية بالدروس الفاتتني والأمتحانات
اوتار : الله ايساعدج حتة اني طاح حظي واني انقل المحاضرات الفاتتني
مرسلين : ضحكت وظلينة اني وياهة نسولف وبيبي وامي ايسولفن سوة ورة فترة يلة دخل جدو وبابة وعمو ابو محمد وراهم شاهين ومحمد مدري ليش اتوترت واني اشوف شاهين داخل بكول برود وكمت سلمت ع جدو وعمو ومحمد ورجعت كعدت ابمكاني وبدوة ايسولفون همة وبيبيتي ويشاقون اشوية وكال وبابة عن موضوع طلوع حيدر من السجن ورجعت هدى معرف ليش دفعني الفضول حتة اشوف شنو رد فعل شاهين بخبر رجوع هدى البيت اعيالهة واول مرفعت راسي علي شفتة صافن ويباوعلي برود وكأنما يعرفني حشوف رد فعلة دنكت راسي بفشلة وترخصت منهم وطلعت بالحديقة اني واوتار وظلينة كاعدين انسولف اني وياهة الحد مدك تليفونهة واترخصت مني وراحت اجاوب علي ظليت كاعدة ابمكاني وصافنة ع الزرع الحد مأجة محمد وكال
محمد : عادي اكعد يمج
مرسلين ببتسامة : اي اكيد تفضل
محمد : ابتسمت ع ابتسامتهة وكمية البرائة البوجهة وكعدت مقابيلهة وكلت
محمد : صارلنة اهواي مكاعدين هيج كعدة ومسولفين
مرسلين : ههه اي من وكت الطلعنة بي ابيت واليجاي مملتمين سوة ومسولفين اصدك اشتاقيت الماتنة الجنة نلتمهة قبل اهنا ونكعد انسولف ونشاقة
محمد بتوتر : اي يلة ان شألله انعوضهن
مرسلين : ان شألله بس بيك شي احسك متوتر
محمد : ههه لا بس ردت اكلج شغلة
مرسلين : كول اباوعلة صفن بوجهي وكال
محمد : احبج
مرسلين : شنو
محمد : شنو الشنو احبج واعشكج من وكت الي اجيتي بي علة هل دنية والهل لحظة هاي
مرسلين : ههه دتشاقة صح شهل كلام محمد انت واعي ع الكلام الدتكولة مو عيب وبعدين واوتار ان.. قاطعهة محمد بعصبية وهوة يكول
محمد : لا مو شقة وفاهم واعي كلش زين ع كلامي واجاب اوتار بنص جاي اكلج احبج اتعرفين شنو يعني احبج واعشكج من وكت الي اجيتي بي ع هل دنية
مرسلين : اباوعلة يحجي بحركت كلب وعصبية خفت وتوترت من كلامة وكمت وكفت وكلت
مرسلين : واني ما احبك ومستحيل بيوم احبك وراجع كلامك زين ترة اني وياك نعرف اوتار اشكد اتحبك وتعشقك لا تخسرهة بسبب غبائك
محمد بعصبية : ماااا اح.. قاطعة صوت شاهين الحاد وهوة يكول
شاهين بحدة : محمدد عميي ايريدك
مرسلين : اباوع ع محمد قبض ع ايدة بعصبية ودخل رفعت راسي ع شاهين بتوتر وبلعت ريكي بخوف واني اشوف اعروك ايدة وكصتة الناطات من كثر العصبية بس لا سمعنة نفيت هاي الفكار من راسي واني ادعي ايكون مسامعنة اباوعلة اتقرب علية بكول برود وكال
شاهين برود : عاجبج
مرسلين : شنو
شاهين بسخرية : محمد عاجبج مو
مرسلين بعصبية : شهل حجي شنو عاجبني صدوك انتة واحد مو محترم وقلي.. ما كملت كلامي واني احس بفكي ينعصر بيدة بقوة وانفاسة الحارة صارت تضرب بخدي وهوة مدنك راسة ويهمس بحدة
شاهين :................
______________
اوتار
واكفة بالمطبخ اخابر بفجر والبتسامة شاكة حلكي من بعد ما كالتلي قررو ايسوون خطوبتهم بنهاية الأسبوع وبدت من هسة اتخطط وتفكر بدلتهة والمكياج كتلهة اشوفج باجر بالكلية ونقرر اني وياج وترخصت منهة وسديت التليفون واول مردت ارجع للحديقة شفت محمد دخل للمطبخ وعروك ايدي وركبتة ناطت من كثر العصبية لا اردين رجعت بخطوات بطيئة ليورة واني اشوفة يتقرب مني واعيونة صايرة نار احس جسمي كلة كام يرجف من الخوف ومن هيئتة بلعت ريكي بخوف واني اكول بصوت متقطع وناصي
اوتار بتوتر : محمد ..شب..شبيك دتخوفني وا...فتحت اعيوني بصدمة واني اشوفة يهجم علية ويعصر ركبتي بكل قوة احس اعيوني حتطلع من كثر الخنكة حطيت ايدي علة ادي التخنك بية احاول اوخرهة بس ماكو فايدة وزاد اكثر وهوة يهمس بكل غل وحقد يم اذني
محمد : اانتي السبب لوو ماا انتي مجاانت رااح ترررفضني انتييي السببب انتي الكلللتيلهة موو لججج وحقق عللي اذاا مااا اخذذهة واكسرر راسجج ماا اطلع ابنن ابووية
اوتار : يحجي ويخنك بية اكثر واكثر الحد ما حسيت بروحي راح تطلع من مكانهة واني اسمعة يتهمني ويهدد بية بكل حقد وكره بكلام معرف عنة شي كلت بصوت كوات كدرت اطلعة من الخنكة واني احاول اجر ابيدي عني ووخررهة
اوتار بصوت مختنك : ء.وخرر..مح.مد فدوة... حموت.. اشد.تحجي ..وءالله مكايلة ..الوحدة ...عن .اي ..شي
محمد بصوت جهوري :..........
