رواية زوج اختي والماضي الفصل الخامس عشر بقلم مجهول
طلبت مني أن أقابلك غدا ً لنطوي الماضي.. آه وكأنك
تطلب مني أن أتقدم بثبات نحو المشنقة.
بعد مارجعنا على البيت راسن نمت من التعب والقهر كعدت الصبح متأخرة لكيت البيت نظيف استغربت رحت
على ريتاج قبل لا اغسل وجي
دكيت الباب صاحت "
تفضل ؟
فتحت الباب دخلت "
صباح الخير
جانت كاعدة على طرف الجرباية بايدها الموبايل
صباح النور ..صح النوم يحلو
_صح بدنج ولج منو منظف البيت ؟
_هههه أني
_ ليش تشتغلين مو كلتلج البارحة عود
ماتشيلين يمعودة ستري علينا
_ هو شكو قابل ومنو يكول حامل
_ شنو شكو ريتاج اليوم نحلل وان شاءالله تطلعي حامل
_اللهم آمين
_ ان شاءالله يلااروح اغسل وتريك
_هههه مامغسلة اجيتي علية ركض
_هههه اي والله
_خبله روحي غسلي بدلي تريكي وتعالي نسولف شوي ضوجه
_ماشي
طلعت سديت الباب لكيت بيبي ممطولة كبال التلفزيون كبالها صحن فواكه بي تفاح وبرتقال أبتسمت كملت طريقي
للمطبخ غسلت مالكيت أمي بالبيت
سويت ريوك لنفسي اكلت وطلعت انفتح الباب الاستقبال دخلت أمي شايلة علاليك المسواك ركضت عليها
اخذتهن من ايدها
_انطيني اني اشيل عنج
_الله يرضى عليج بنيتي
التفتت بيبي هي وممطولة
_جبتي الرته ؟
أمي _ ايي عمه جبت
بيبي _ايي عفيه زهراء سويلي عصير من أمج الجابته
زهراء _ بعيوني الاثنين بيبي
خليت المسواك بالمطبخ اجت امي تخلي بالثلاجة فتحت
العلاكة جايبة بطل عصير برتقال اللي ينحل بالمي بيبي
ترغبلة هواي بفصل الصيف سويت لها كلاص
وديته لها اليوم الجو صاير حار بدأ الحر يشتغل عندة بالنجف الله يستر من هل الحار ٢٠١٩ حار ٢٠١٨ جان يمووت
وهذا مبين هم حار من هسه
ندعي الله ونسكت تعدي هاي السنة على خير مثل
ماعدت سنة ٢٠١٨ على خير علية
والله العصر امي اخذت ريتاج للعيادة وداهم حسين علمود تسوي تحليل حمل كاعدة يم بيبي بالاستقبال على
فراش واحد هي مرتجيه على
مختين تباع على التلفزيون مسلسل ايراني مترجم بالعربية جان حلو واني لأزمة الموبايل بايدي انتظره يرن
من امي لو ريتاج تبشرنة
بيبي _ هاا بشري ماخابروا ؟
زهراء _ لاوالله بعد
بيبي _كومي جيبي مي بارد اشو ستحريت
زهراء كمت _ اي والله حارة اليوم
رحت جبت صلاحية كزاز وكلاص بيها مي بارد صبيت لها شربت شربت وراها أنتظر ...سمعت صوت هورن بالباب
فزعت بيبي وكالت
_صوت سيارة
_ايي يمكن اجوي
_كومي شوفي اجوي
_كايمة بيبي
كمت اخذت الشال لفيت راسي بي وطلعت وكفت بعتبة باب الاستقبال اباع على الباب البره نفتح الباب دخلت أمي
وجهها عادي رحت عليها
_بشري
أبتسمت دخلت وراها ريتاج وحسين إبتسامة
على شفايفة الكل فرحان
أمي _ كل الخير يمه
زهراء_يعني حامل
حسين _راح تصيرين عمه
طرت من الفرحة رأسن حضنت امي من الفرحة وأخيرا راح يصير عدنا طفل نلعب عليه
أمي _ هههه هيج فرحانه لاخوج
زهراء بعدت عنها _وأكثر والله
حسين _بعد روحي زهورة تعالي بوسي اخوج
رحت على حسين باللهفة حضنته بوسته بوسني
_ألف مبروك يتربه بعزكم ان شاءالله
حسين _ مشكورة زهورة وان شاءالله تتربه بعز عمتها
بعدت اضحك امي صاحت
أمي _ ولك تدور بنات
حسين _ ايي والله أحب البنات على حب أخواتي
أمي _حتلوه أني اريد ولد يشيل اسمك
حسين _والبنية هم تشيل اسمي يمة ماكو فرق بين البنت ولولد
امي _ايي ماكو فرق بس اريد ولد
زهراء _ الرزق بيد الله سبحانه وتعالى شيجي نعمه من الله
ريتاج _ونعم بالله
رحت باركتلها وراها دخلنا على البيت وي دخلته بيبي صاحت
بيبي _ بشر حسوني
حسين _حامل بيبي راح يجيج حفيد مني هههههه
بيبي كعدت بالفراش راسن ابتسامة زينت
وجهها الشاحب ذوا تجاعيب
_ ألف مبروك بيبي ولك تعال خل ابوسك تعال
حسين _ ههههه على كيفج لا تطيرين بيبي
بيبي _طرت وخلص والله فرحتوني بهالخبر
الحلو من زمان ما سامعة اخبار حلوة
حسين حضنها بقوة "
ايي من زمان ما سامعين
اخبار حلوة
واني واكفه بصف . امي مخليه راسي على جتفها واباوع لبيبي تبوس بحسين وريتاج طايرة من الفرحة خطيه
واخيرا الفرح الباب مالتنا
كعدوا يمها وأمي راحت تبدل كعدت بصف حسين بيبي كالت
بيبي _اني ناذرة نذر بس ريتاج تحبل على
السريع راح اسويلها قلادة ذهب
زهراء _ وهاي حبلت القلادة تجي مو بيبي
حسين _ شعندج أنتِ ...بيبي علمود تنذرين
ذهب دنذري جيس جكليت كافي
بيبي _ انجب حسين أنت ماعليك هاي بيبني وبين حفيتي ريتاج باجر تودينه لسوك اسويلها القلادة
ريتاج _ بيبي مااريد والله
بيبي _ من اكول نذر ناذرة لوجه الله اسوي لج قطعة
ذهب يعني اوفي بالنذر وانتو كافي تكولون
مانريد وماعندج
طلعت امي من الغرفة واكفة بعتبة الباب
أمي _عوفوها براحتها خطيه فرحانة لا تخربون عليها الفرحة
زهراء _ وأنتِ يمة شناذرة ؟
أمي _خروف
حسين _ وأنتِ زهراء شناذرة ؟
زهراء _ جيس جكليت
حسين _كومي يلا دزي جيس جكليت نريد نحلي حلكنا ههههه
بيبي _ ههههه
كلها كامت تضحك كمت وكلت
_ هسه ادز جيسين مو واحد والله
أمي _ وعندج فلوس
زهراء _ ايي بيبي حبيبتي انطيني الفين دينار
بيبي _ روحي اخذي شكد متردين
حسين _مو عدل ولج مو انطيتج البارحة ٢٥ ألف
صرفيها ودزي عليش من بيبي
بيبي _اهوووو ولك انجب حسين ماعليك انت
روحي اخذي بيبي شكد ماتردين
أمي _ خبله زهراء اروح اسوي العشة هههه
حسين _لتسوين راح اجيب من المطعم وأنتِ جيبي
الفلوس خل اجيبلج جيس جكليت
زهراء _ ثواني
رحت طلعت فلوس من جزدان بيبي انطيتهم الحسين خربان ضحك علي وأمي كذالك بيبي مكعدة ريتاج بصفها وتحجي وياها راح تدلل ريتاج هههههه
والله رجع حسين جايب العشة نفرات كباب وبيبي هم اكلت كالت مايهمني المرض المهم أكل وا ونس حياتي
هو أني شباقي بعمري
خل اعيش بعد يوم يومين لو شهر على اكثر خربنه ضحك هههه كالمرة تكول هيج وهي الله كاتبلها العمر الطويل إن شاء الله والله زينه البيت المرة الجبيرة
تحسها ونس وهيبة وخيمه بنفس الوقت أحنا هواي هواي متعلقين بيبي ونحبها كلش نحسها ابونا وامنا هي
كذالك تحبنا أحنا اكثر من كول احفادها
لان عايشة ويانه ومدارينها كلمة وحدة ما نسمعها ولا نكسر بخاطرها أدري أقارب يتخبلون علمود بيبي تحبنه لو يدرون بيبي هي انطت فلوس الحسين
وتزوج بيهن إلا يتخبلون وياخذون زعله طويلة حتى بناتها وهاي ناذرة نذر بس ريتاج تحبل وتجيب طفل وراح تسويلها قطعة ذهب لااا هنا راح يتخبلون خبال
ثاني يوم الصبح اخذنا حسين أني وريتاج وبيبي نسوي قلادة الريتاج .....دخلنا المحل طلع سيوت قلايد
ولاوحده تعجب بيبي
ختارت ريتاج وحدة نازكة وكالت
ريتاج_ هاي حلوة ونازكة
بيبي _نزليها ماتفيد باعي بس انفخ عليها تطير
زهراء _ رديها ريتاج
ردتها البنيه أعرف ....ريتاج ماتريد تكلف بيبي
بيبي اختارت وحدة حلوة حيل
_شوفلي هاي شكد وزنها
اخذها ابو المحل خلاها على الميزان الذهب وكال
أبو المحل _ حجيه وزنها ثلاث مثاقيل سعرها ٨٧٠ ألف
بيبي _ جهزها
حسين بهمس _ بيبي غالية حيل
بيبي _ ماعليك مادافع من جيبك
زهراء بقيت مبتسمة اعرف بيبي اذا خلت شي براسها تسوي ومحد يكدر يوكف كبالها اخذنه القلادة انطته
الفلوس وطلعنا ريتاج فرحانه حيل
حصلت خوش هدية والله هنيالها على محبه بيبي وامي لها وهنيالنه احنا بيها ذرة مالت ذهب الله رزقنا
بيها ورزق حسين
رجعنا على البيت لبست القلادة ريتاج اجت شوفتها لنه حلوة حيل على ارقبتها طالعة حنى....... لحد الآن ماكايلين الكائن مايكون ريتاج حامل
بالليل اجت فاطمة وزوجها كنالهم خطيه طاروا من الفرحة شافت القلادة فاطمة ....وكنالها هدية من بيبي كالت تستاهل ريتاج كل الخير راح تجيب حفيد العائلة
مرت ثلاث أيام .. اجتي عمتي وبناتها التلاثة يشوفون بيبي كاعدين كنالهم ريتاج حامل باركوا بناتها أبد مايحبونه وحدة منهن جانت مخليه عينها على حسين
من قبل بس هو مراد من أقارب برغم عمتي انطتها له بعظمة لسانها هو رفض وفشلها لذالك هسه يكرهون
ريتاج هواي ولا يطيقونها
بيبي _ ريتاج كومي بيبي جيبي القلادة اللي سويتها
لج شوفيها لعمتج وبناتها
كامت ريتاج _ صار بيبي
زهراء حسيت بيهن انضربن طلقه
عمتي _ قلادة شنو يمه ؟
بيبي _ قلادة سويت الريتاج بمناسبة الحمل
عمتي _ اهاا وشعجب ريتاج سويتيلها من
بين أولاد اولادج وبناتج ؟
بيبي _ هاي الحبيبه هاي مرت الغالية حسين
لماعندي غيره سند بهالدنيا
عمتي _ صدك تحجين ماعندج سند غير حسين
لعد احنا شنو مو سند
بيبي _ وينكم يمه اشو بسنة حسنة تمرون بي كلكم بنات ولد مصلحجيه وقت عدكم مصلحه تمرون بي
عمتي _ ياا مصلحة يمه هاي
بيبي _ اكص ايدي منا ومنا اذا هاي جيتج علمود تشوفين أمج والله جيتي بشغلة وهم كولي جذب
عمتي بلعت ريج ردت بتها أسماء الجبيرة
اسماء _ والله بيبي تردين الصدك اجينه على بيت
وحده من صديقاتي ومرينه بيج
بيبي _ هاا شكلت
عمتي _هن رادن يشوفن البنية وأني كلت اجي
اشوفج يعني جيتي علمودج
بيبي _ الصمي أنتِ يايوم ذاكرة أمج
سكتت عمتي كلمة وحدة مطلعت صدك حجي بيبي حقيرات أبد مايذكرون المره لخلفتهم والكبرتهم بس وقت المصلحة
امداهم اي والله هواي الله
يجازيهم بهاي الدنيا وبهذيج الدنيا اجت ريتاج كعدت يم بيبي اخذت بيبي العلبة وطلعت القلادة رفعتها وكالت
بيبي _ هاي سويتها ٨٧٠ ألف يعني ثلاث مثاقيل للحبيبه
عمتي _ بخت والله
بيبي _ شبيج يمه احسج ماعاجبج الوضع
عمتي _ ايي والله ماعاجبني ليش تفرقي خووب بني هم مرته حامل وبشهر الخامس أشو جيس جكليت ماجبتي
وهاي علمود غريبة تشتريلها ذهب
نزلت القلادة بيبي انطتها الريتاج وكالت بضحكة
بيبي _ كومي ودي القلادة بيبي وتعالي اكعدي يمي
كامت ريتاج حسيت بيها نغثت من كلام
عمتي صدك عمتي مكروها
بيبي _ وابنج تافل بنص وجي فديوم من الأيام فد يوم كال خل اخابر هاي العجوز واشوف ماتت لو لا كولي بيش
ذاكريني ولدج وبناتج بيش
عمتي _ وأنتِ ذاكرتنه
بيبي _ بالعكس صارت ولج
عمتي _ والله أنتِ كطعية ولدي طالعين عليج
بيبي _ ولدج وبناتج يطربون على الغريب يرحون خارج المحافظة لغير محافظات علمود أصدقائهم وما فديوم مروا علية علمود أذكر هالجيه واجي عليهم
عمتي ماكو جواب منها ردت أسماء
_ والله حجيج صدك بيبي حقج علينا احنا هواي
مقصرين وياج ولافديوم ذاكرينج
بيبي _ الحمدالله عرفتي أنتِ مو مثل امج
العوبه انوب تلاسن ام الوسخ
عمتي _ يمه شنو هاي
بيبي _ وجع أني مو امج هسه صرت أمج
عمتي اخذت نفس وكامت "
أسفة يمه نفعلت حقج علية وعلى
كل واحد من عدنا
راحت عليها باست راسها بيبي كالت
_ ليصير زين وياي اصير زينه ويا ولما يصير زين
وياي ما اصير زينه وهاي سمعتي
عمتي _ سمعت وكلامج صدك ... يلا كومن يمة
هم يلا نرجع على البيت
بيبي _ ابقوا على العشة
عمتي _ غير مرة ان شاء الله يمة ... في أمان الله
راحت عمتي وبناتها وصلتهم امي للباب طلعت ريتاج من الغرفة مقهورة وأني أعرف ليش بيبي هيج سوت رادت
تغث عماتي وبناتهم علمود مايذكرونها
ريتاج _ بيبي ليش هيج سويتي هاج بنتج زعلت منج بسببي
بيبي _ هاي جانت مقصودة بنيتي تعالي اكعدي
زهراء _ والله عرفت
بيبي _ هههه شفتوا شلون زعلت وشردت هي وبناتها
زهراء _ ايي هههههه
ريتاج _ ترى مفهمت شي
زهراء _ احسلج ههههه
بيبي _ بالعمدة زعلتها والله لا تدك ولا تخابر هي ولدها الساقطين ولد الشوارع مايكولون عدنا جدة خل
نذكرها والحلو بيها تكول ليش تفرقين
زهراء _ عمتي بطرانه
بيبي _ اكبر بطرانه على كرة الارضية ههههه
ريتاج_ فهموني
بيبي _ شوفت القلادة العمتج ام رياض علمود تنغث وتزعل وتوصل هاي الأخبار البناتي ولدي الساقطين اني
مسويه ذهب لج
ريتاج _وهيج راح يزعلون منج
بيبي _ وهذا المطلوب
ريتاج _ والله معرف ليوين تريدين توصلين بيبي
بيبي _وماراح تعرفي غير هالحلوة تعرف بي
وين أريد اوصل بهاي الدكة
ريتاج _ فهميني زهراء شنو القصة
زهراء _ بيبي سوت هيج علمود تعرف ولدها
وبناتها يحبونها على طمع لو لا
ريتاج _ وهاي جابها على هاي ؟
زهراء _ اذا اجوي باجر وعكب باجر عليها معناها يريدونها على طمع وراح يكولون بيبي عدها كومة فلوس
فهمتي هسه لو افهمج بعد
ريتاج_ هااا فهمت والله بيبي عقلج يفكر بفكار شيطانية
هاي براس الشيطان ماتجي
بيبي _ أعوذ بالله ياشيطان بيبي كومي زهراء جيبيلي
السبحة خل وأستغفر الله كومي
زهراء _ كايمة بيبي كايمة
كمت جبت السبحة واجيت لكيت أمي كاعدة وتعاتب بيبي وبيبي تكوللها أنتِ ماعليج انتِ وحدة فقيرة لا تهشي
ولا تنشي واني سويت هاي الحركة
علمود أختبر أولادي بس القلادة جانت نذر والله مو مالت اغث اولادي وبناتي والله اجه الليل نامت بيبي نامت أمي رحت كعدت بفراشي احجي وي
هند صار ثلاث أيام محاجيه وياها صايرين مو مثل قبل نحجي هواي واني تعودت على فراقها حجيت وياها.
ربع ساعة وراها كطعت أني
لأن هسه رجلها يمها عيب كعدت تصفح فيس بوك طلعلي بالقترحات حساب حمزة اكلني الفضول ادخل عليه
واشوف منزل صور المصطفى
دخلت حسابه جان منزل صورة جديدة شايل مصطفى بحضنه وصاعد بسيارة ابوه استغربت سيارة ابوه غير
نوع وهاي نوع ثاني
كاتب فوق الصورة _ حلال جديد
ابتسمت _ مشتري سيارة الحيوان يمه فدوة حبيب
روح خالته صاير يخبل بس مال بوس
بقيت اباوع بالصور المنزلهن كلها قرفت روحي منه بس كبال مصطفى ترد روحي كمت اطك عليه والله صار بين
عيوني من اشوفه أتذكر أختي وكلامها
نزلت دمعتي .قربت الشاشة على شفايفي بست الصورة مرتين سمعت رنه رأسن باوعت على الشاشة سجلت
لايك وكع قلبي بين رجلي
سحبت لايك بسرعة يارب مافاتح نت يارب ماوصل الإشعار هسه يكول مفعلة علية برج مراقبة وهاي تحبني
أعرف بي ابو تفكير قذر
حمزة "جبت مصطفى يمي بالغرفة خليته على الجرباية ولعب وياوبايدي الموبايل اصفح فيس بوك على أفلام اجنبيه
بوليسية اجاني إشعار شخص سجل
إعجاب على منشور
فتحت الأشعار خربت .ضحك هاي زهراء وانوب اختفى عرفت بيها دا تراقب حسابي وصار لايك بالغلط أكيد
الله فضحها ههههههه
_ مصطفى هاي امك مفعلة برج مراقبة على
ابوك شرايك لو نحجي وياها
كتبت لها _ ليش تراقبين حسابي ؟
زهراء وكع قلبي من اجاني الرد على الخاص
منه فتحت الرسالة كاتب
_ليش تراقبين حسابي ؟
بلعت ريجي ....يالله هذا جان كاعد وشاف لايك بس أريد انت إنسان لو شيطان كلشي مايفوتك رديت
_ بالغلط صار لايك أسفة على الإزعاج أخ حمزة
حمزة جنت واقف على المحادثة جاني الرد قريت (بالغلط صار لايك أسفة على الإزعاج اخ حمزة )
هنا وكفت على كلمة أخ حمزة واني شوكت اخوها
تعصبت كلت ال مصطفى
_ هاي امك راح تجيب اخرتها على ايدها بعد ابوك
رديت _ هي مالت غلط اي غلط بس الله فضحج والله دا تراقبين حساب رجل أختج المتوفيه ما تستحين
على نفسج شتريدين مني ولج ؟
بقيت أضحك انطيتها كلام قاسي .....اليوم الليل كله اخليها تبجي وحق الخالق أني تكولي اخ حمزة
زهراء اجاني الرد من قريت حسيت طلقه صارت بنص قلبي كلام قاسي حيل والله العظيم كلشي مااريد منه
هذا فهمني غلط يالله
راسن انطيته ......بلوك سديت الموبايل خليته وجوه راسي احس جسمي كله صار يرجف برغم الجو حار المبردة مشغلة والبنكة دموع كامت تنزل عشرة على عشرة
على المخدة .... الليل كله اتقلب بفراشي واحجي عليه بقلبي الله ينتقم منه ان شاء الله كسر قلبي بهذا الكلام هذا مبين
عليه يكرهني ومايحب اسلط عليه
وعلى مصطفى يمكم ماراح يخليني اشوفه بعد بحياتي كلها اعرف بي نذل بس الكلام جان قاسي عبالك أني لاحكته من طريقة كلامه وأريد احجي ويا .
حمزة خربت ضحك من انطتني بلوك هو هذا اللي ايده أني تنزعج مني وتكرهني اكثر واكثر علمود من اوصللها بسهولة تنصدم وتبقى تبجي وتلعن حظهاا
كمت شلت مصطفى بحضني نزلت بي انطيته لا خلاص لكيتها بالصالة كاعدة اخذته وراحت الغرفتها هواي تحبه ومتعلقة بي عبالك ابنها كعدت يم سيف جان ضايج
_ سلامين شبيك مخلي ايدك على خدك
تنهد وكام _ روحي طاكة من هالبيت
_وشبي البيت
_ كلها ضدي هنا
_ شلك بهل كلام منو ضدك اشو صاير متعرف تحجي
_ أمي أبوي اخلاص كلها ضدي وضد مرتي وأنت
كل يوم تشوف بعينك اللي يصير
_ مرتك مو ادميه
_ حمزة
_ اكول الصدك مرتك مو ادميه وصايرة تدور مشاكل على أقل زلة تسويها عركة يا أخي شوي شد الحبل عليها
مو توكف وياها ضد أهلك
_ واهلي هم صايرين مو خوش اوادم وياي
_ عفيه تكول على اهلك مو خوش اوادم منورة مره
بارك الله بيك والله يكثر من أمثالك
_ هسه صاروا اهلك نسيت لو أذكرك شكد جنت تتعارك
_اي جنت اتعارك بس بعمري ما رفعت صوتي على أبوي لو امي فقط بحالة أعصاب ولا أكسر بخاطرهم واهلي جانوا
يتعاركون وياي علمود مصلحتي
باوعلي ما عاجبه كلامي كمت
_ اسمع سيف كلامي زين اهلك يريدون مصلحتك ومرتك صايرة مو خوش ادميه قبل وردة مالت الله هسه متغيرة فدمرة وصايرة تدور مشاكل علمود العزال اذا تريد تعزل اعزل بوجه الحلو مو تعزل بوجه المصخم وتزاعل وي
اهلك منوراها
_ قصدك أني أريد اطلع بوجه المصخم ؟
_ايي والله مبين من وجك وجه مرتك
_غلطان
_حمزة مايغلط أبد تريد تطلع كول أريد اطلع بكل
حترام وأهلي مراح يمنعونك #ڪــڔٰا̍ڕ
_ امك تقبل نطلع
_واذا متقبل أني اقنعها تطلع بس لا تسوي مشاكل ومرتك
ازبرها وشوف شلون اخليك تطلع
مرد.علي بقى ساكت
_ ديلا روح نام هسه والصباح رباح ان شاءالله أني احجي وي أمي وابوي وردلك الجواب
_ان شاء الله جواب الخير
_ الله كريم
حمزة راح للغرفة مالته وأني دا أفكر شلون اخلي اهلي يقبلون يخلونه يطلع بدون مشاكل ثاني يوم الصبح راح على الشغل ومرته كذالك راحت عالدوام ويه أبنها
اخلاص ......اخذت رامي وسارة وراحت على المدرسة اني مرحت أبوي جان مجاز كاعد بالصالة هو وأمي كعدت كبال أمي وابوي على الكرسي هم كاعدين على الكرويته
عينهم على التلفزيون اخذت نفس وراها زفرت
معرف شلون افاتحهم بالموضوع
أمي _ هاا حمزة شعندك ؟
حمزة _ شلون عرفتي عندي شي
امي _ اعرفك كول شعندك
حمزة _ والله أريد احجي وياكم بموضوع
باوع ابوي وكال
_كول شنو هذا الموضوع ؟
حمزة _ بخصوص سيف ومرته
أمي _خير ان شاءالله شبيهم
أبوي _ خير
حمزة _ سيف يريد يعزل بيت لواحدة بس يخاف
يكول لكم اخاف متقبلون
أمي _ يعزل وهسه ؟
أبوي_ شفطنه على العزال
حمزة _ والله مرته دا تسوي مشاكل علمود تعزل بوجه المصخم وتريد تفرق بينه وبين ابنه وانتوا تعرفون بعد أكثر
مني سوالف النسوان المكسرة
أمي _ لو تمووت ماراح اخليها تعزل
أبوي _ ختولي وين تولي وهسه الدنيا مو دنيا
أمي _ هاي كلها سوالف أهلها
حمزة _ مو اليوم باجر تعزل ليش ما تخلوهم يعزلون
أبوي _سالفة العزال خل تطلعها من اذانها عزال ماكو هي
بعدها صغيرة وينها وين العزال
أمي _ مفكرت رجلها يطلع لشغل منو يبقى
عدها وهي حمرة زركة
حمزة _ حالها حال النسوان مو كومه عازلات
والشريفة تبقى شريفة
أمي _ ماكو عزال وأنت اسكت لا تدخل
أبوي_ بس تجيب طاري العزال رشا مرة لخ والله
اهيفها البيت أهلها واخذ الولد منها
أمي _ زين العقل تسوي والله مره تتحكم بينه
وتمشينه على كيفها تريد
حمزة " ماكو فايدة وياهم هذولة مايردون واحد منه يعزل ويترك البيت ورشا هسه بخطر حياتها صارت بس
تسوي مشكلة راح تروح لاهلها
أمي _ من ترجع كوللها بس تسوي أي مشكلة منا منا
راح نوديها البيت أهلها مفهوم
أبوي _ واذا مجرت عدل راح نطلكها ونزوجة مره
غيرها وطبها ستين مرض
كلمة وحدة ما طقت بيها مبي حيل أكل رزالة منوراهم وابوي وأمي يشدون علي بعد ما صاروا يحبوني وكلشي يجيبولي بس اطلب طبهم ألف مرض شيريدون مو انطوهم
القاط الثاني هم مقبلوا بي
مم عدة الغرفة مالتي ما انطيها والله لو يموتون ماراح يعزلون هسه أمي وابوي قافلين وأكثر شي متأثرين
بسالفة هاي المرة لصارت
عدنا بالمنطقة قبل أيام جانت تخون رجلها من يطلع لشغل وبلأخر نفضحت وطلكها رجلها
رجع سيف من الشغل وكلها رجعت أمي صبت الغدة تغدينا وكمت كعدت بالصالة اخلاص شايلة مصطفى وتلعب
بي بالصالة صحت عليها
_ اخلاص فدوة جيبي
_ شلك بي
_اريد لعب ويا مشتاقله
_من الصبح عندك ما شبعت منه هسه اجه دوري أني
_هههه شنو دورج
_ أني مو أمه واسهر الليالي ويا لو أنت تسهر
_ أنتِ بس اريده شوي وارجعة لج
_امممم
_هااا
_خل أفكر شوي
طلع أبوي من المطبخ ابتسم وكال
أبوي _ انطينياه يابه انطينياه
اخلاص ضحكت وكالت _وهاي ابوي ربح بصوفي ههههه
اخذه ابوي باسه من كصته وكال _ ليش من يريده
اخلاص _ حمزة
أبوي_ وحمزة ماشبع منه
حمزة _ هو ينشبع منه يابه
ايوي _ لا والله يابه ماينشبع منه وهسه راح اخذه
للغرفة وره ساعة تعالي اخذي
اخذه ابوي .وراح للغرفة راحت وراه أمي اخلاص راحت
لغرفتها تستراح وأني بقيت اقلب باليوتيوب
مقاطع فيديو مقالب مضحكة
زهراء مر اليوم عادي بس الحلو جان بي عماتي أثنين اجني الصبح على بيبي خربنه ضحك عليهم حجي بيبي طلع
صدك تكول من يسمعون عندي فلوس
اصير حبيبه .. عندهم ومن يسمعون بي ماعندي فلوس اصير كخيه ومحد يريدني حلفت درهم أحمر مراح تشوف
واحد منهم بعد موتها كالت لعندي
اتبرع ....بي للفقراء والأيتام ولا أشوف هذولة الحقراء دينار واحد ياحيف بيهم التربية وهز الكاروك وشكد لوليت
وشكد سهرت كله راح بالحظة وحدة
يا حسافة على تربيتي يحسافة بقت تجبد بقلبها جبد راحت تنام بالغرفة رحت وراها فركت .... رجليها واجا نام
وياها حسين وريتاج كذالك
خلوها بالنص وأني خربانه ضحك عليهم مخلين بيبي بنص جنها طفل صغير حسين نايم بحضنها ويحجي وياها يكوللها اني امج واني ابوج واني اختج واخوج وابنج
وهاي ريتاج بنتج ولا يهمج شي خليولون ولا تخلين بالج يم أحد لمايريدج لا تريدينه ماشي حبيبه قلبي بيبي
كلها نامت واني هم نمت كعدت قبلهم على الساعة بالربعة ونص كعدتهم سويت عصرية واني وريتاج قلينه بتيته ريتاج نشفت البتيته من الدهن البيبي لأن نخاف
عليها تتمرض طلعت كاسة روبة خاثر كعدنا اكلنا أمي مرادت كمل حسين قبلنا وكالت معتازين شي
بيبي _ ايي جيبلنا وياك كرزات وعصير الأناناس
اشو مشتهيته اليوم
حسين _من عيوني الاثنين وبعد
بيبي _ وبعد سلامتك بيبي دير بالك على نفسك
حسين _ ماشي
طلع واحنى بقينا نأكل كملنا اخذت .... الصينيه غسلتها وامي كامت تسوي العشة على الساعة بالخمسة ونص كعدت يم ريتاج وبيبي بره بالطرمة هم كاعدين على الكراسي.واني كاعدة على الطرمة وبايدي وردة قطفتها من الحديقة
بيبي _ يحتاجلنت سيارة
زهراء _ اي والله بس الفلوس كاسرة ايدنا
ريتاج _الله رزاق ان شاءالله يرزق حسين
ويشتريلنا وحدة نص عمر
زهراء _ ان شاء الله يرزقه
_ ونعم بالله
بيبي _ سمعت حسين كال لاحمد ابن عمجن اريد
اشتري سيارة بس معوز ٣ مليون
ريتاج _ والله مسامعة بس عندة هو ٣ مليون
وكال اريد اجمع علمود اشتري سيارة
بيبي _ اي سمعت مكال خطيه معتاز
ريتاج _ شيكول قابل يا بيبي
بيبي _ عندي فلوس خير من الله وراح انطي
٣ مليون علمود يجيبلنا سيارة
ريتاج _ لا فدوة بيبي مايريد ماعوزنة
مشاكل وي اولادج وبناتج
بيبي _ منيلي بنات ولد أني هاي أبني هوينه بس الحايط بيناتنه وبسنه حسنه يجي عليه مافديوم شمر علية ألف دينار كولو شفتوا بعيونكم بنت لو ولد انطوني مصروف
لو جابولي هدية
زهراء _ من يوم وعيت لدنيا ماشفت احد منهم
انطاج مصروف أو جابلج هدية
ريتاج _ هاي صارلي شهرين من تزوجت ماشفت واحد منهم
بيبي _ خلص لعد اسكتوا هاي حسين يدري بي عندي راتب مال جدة بس مايخليني اصرف ربع دينار منه علاج ملابس طبات طلعات كلها هو متكفل بيها
برغم ماعندة خطيه كوة جان يدبر الدينار ولا خلاني
فديوم اعتاز كولوا هذا لولد لو لا
زهراء _ هذا حفيد الصالح الله رزقة لج بيبي
ريتاج _ ربي لا يحرمج منه ولا يحرمنه من عندج بيبي
بيبي _ بس حسين وزهراء وهند يشفون القلب
بقيه مايفيدون بشي
زهراء _ فاطمة احمد ... وا..
بيبي _ مو مثلكم انتو التلاثة جنتوا مداريني هاي هند تزوجت وكل يوم تخابر علية وتسئل
زهراء _ ايي
بيبي _ اريد اعزم هند ورجلها ماعزمناهم خطيه
زهراء _ هي طلعت موتت انفال بوجهنا بعد شفنه
بيبي _ خل يجي حسين واكوله نعزمهم على العشة
زهراء _ ان شاءالله
حمزة جنت كاعد بره اجاني أتصال من سيف رديت علي كال تعال فوك كولي شكالوا أمي وابوي ؟
سديت الخط كمت دخلت جوه جانت أمي كاعدة بالصالة بحضنها مصطفى كبالها سارة ورامي يلعبون بي
بالكاع كاعدين على اركبهم
صعدت على الدرج وصلت كبال باب الاستقبال مالتهم جان الباب مفتوح دكيته ...
سيف _ تفضل حمزة
دخلت اخذت نفس ...زفرت رشا كاعدة وبصفها سيف
ابنهم حمودي ماكو كعدت وسئلت
حمزة_ حمودي وين ؟
رشا _ يم اخلاص طلعوا بره يفترون
حمزة _ هاا ماشفتهم
رشا _ قبل نص ساعة طلعوا وي صديقاتها
حمزة _ اي مبيها شي عمته وتفرفرة
سيف _ بشر شكالوا ؟
حمزة _كالعادة رفضوا
سيف _وهسه شلون
رشا _ حرام عليهم هيج يسوون والله
حمزة _ لا ليش حرام أهل يخافون عليكم من ولد الحرام
رشا _ شنو قصدك
حمزة _ أهلي يخافون تطلعين بيت لواحدج هسه أنتِ بعدج صغيرة حمرة زركة وهنا بغداد هواي عمليات سرقة دا تصير وانتِ اذا طلع سيف للشغل منو يبقى عندج انتِ
وابنج مافكرتوا بيها هاي
سيف _على كيفك حمزة ليش احنا غير هاي الناس اللي
دا تطلع وتكون روحها وأني واثق من مرتي
رشا _ هاي خوش اعذار والله
حمزة _ مو مالت ثقة لو أعذار سالفة العزال شيلوها من بالكم لأن ماكو تعزلون من يصير عمر ابنكم ١٠ سنوات
تحملوا بعد ٣ سنوات
رشا _ لاا والله مو بكيفهم
سيف _احنا مو جهال علمود كلشي يقررون عنه
حمزة_ وهاا أمي وابوي يكولون اذا سويتي مشاكل واذا جبتي طاري العزال مرة ثانية على لسانج تلمين هدومج وتروحين لبيت اهلج بدون ابنج ورجلج وهذا اخر كلام عدهم
رشا _ شنوووو
سيف _ شهل كلام شنو اني طرطور أهلي يقررون عني
حمزة _ اهلك ويريدون مصلحتك وثاني شي انطوك ٣ غرف وكالولك سوي مطبخ فوك يعني مشتمل كامل عندك هنا وانت صارلك اشهر من عازل منعدنا بعد شلك بالعزال خارج البيت فهمني لو تريد تصرف فلوس
رشا _ نريد نكون حياتنا
حمزة _وماتكونون شبيكم هسه جمعوا فلوس براحتكم لا تصرفون فلوس على الكهرباء ولمي حتى المسواك من البيت دا تاخذون بعد شلكم بكل هاي السوالف
سيف _ أروح انزل واتفاهم وياهم
حمزة _ انصحك ماتروح
رشا _ليش
حمزة _متحملين عليكم أكثر من ولازم وبالأخص عليج رشا
رشا _ واني شكو يتحملون علية
حمزة _ مو جنتي وردة مالت الله ويامحلاج وي أمي واخواتي هسه شجاج وتغيرتي منو ضحك عليج وعبه
براسج بسالفة العزال
رشا _ ليش اني زعطوطة علمود يضحكون علية عمي أريد اطلع خارج هذا البيت اريد اتنفس شبيكم ياالله
حمزة_ هه وليسمع حابسينكم بهذا البيت
سيف _ اريد اعزل يابه افهموا
حمزة كمت خطرت بالي فكرة راح اسكتهم للأبد اكيد بيها
حمزة _ قبل لا أنسى ابوي وامي يكولون اذا طلع وكسر كلامنا ماله خط رجعا لهنا وبعد لا نعرفه ولا يعرفنه وحتى نتبره منه اليوم الدين وينحرم من الميراث وخل مرته وسالفة
العزال تفيدة
كام سيف بصدمة _ صدك تحجي
حمزة _ أني ماكذب دا اكول لكالوا لي واذا
ماتصدك انزل واسمع كلشي
رشا _ قابل راح نسوي مكسورة علمود يتبرون من ابنهم
حمزة_ عند أهلي اي مكسورة وجريمة تكسرون بكلامهم والله العظيم يخافون على مرتك مو غير قصة وانتو تدرون جنت اريد اعزل قبل ماقبلوا
وحتى .... أبوي ضربني كبال مرتي الله يرحمها أبوي هواي يخاف لأن هواي دا يشوف حالات موحلوة دا تصير
بالمنطقة مالتنه وبغير مناطق بغداد ...
وانتو شيلوا سالفة العزال من راسكم هسه ورجعوا مثل قبل عائلة وحدة وحلوة .. ترى مو اليوم تعزلون باجر فا لتبقون بوجه المصخم وبالليل انزلوا راضوهم
سيف نزل راسه رشا كذالك ...... مردوا ولا كلمة كلشي ولا الميراث هم ميلهم فلوس اذا طلعوا من بيت اهلي
والمحل مالت أبوي وابوي اكيد
راح يطرد سيف اذا طلع وكسر كلامة وراتب
رشا مايكفي لليجار حتى
حمزة _ تصالحوا واسكتوا يابه وصيروا خوش اوادم ترى والله تصفون على الحصيرة وهاا حتى ابنكم ماينطونه لكم والله حمودي الجبير ويحبونه كلش ..
سيف _ والله كلامك خطير كلش حمزة
رشا _ واذا عمي طرد سيف من المحل وراتبي
مايكفي شلون نعيش وبيت ايجار
حمزة _ تعيشون بالشوارع غير ابو اليجار راح يطردكم واهلي بعد من سابع المستحيلات يقبلون ترجعون
سيف _ والله جنت غبي من خليت سالفة العزال براسي اشو عدنا مشتمل كامل هنا بعد شنريد
رشا _ وياك أني والله حتى لعدنا مايكفون نطلع
حمزة _ اسمعوا الكلام واسكتوا والله أمي وابوي كلوبهم طيبة وبيضة صيروا خوش اوادم مثلي مو صرت خوش
ادمي وتركت درب محمد
صار شهر وهسه .... ابوي ينطيني فلوس خير من الله برغم عندي راتب واشترالي سيارة ويديني فوك الايدين واسمع الكلام وانتو هم صيروا مثلي وشفوا شلون راح
يدللونكم والله العظيم
سيف _ الله كريم ان شاءالله أسوي مثل ماسويت
وارجع أبن المطيع لأهله
حمزة _ زين العقل سويت والله
طلعت بره الاستقبال خربان ضحك الفكرة نجحت والله وراح يكعدون راحة ويجرون عدل كلشي ولا ينحرمون من الفلوس والميراث رحت دخلت بغرفتي
بقيت واكف طلعت رقم محمد صارلي شهر كامل ماملتقي بي تذكرت الباب مفتوح قفلته بالمفتاح مشتاقلة حيل هو
يكد واني ارفض مبي حيل ويه أبوي
كعدت على الجرباية انتظره يرد ثلاث رنات ورد يصيح
_ هاا جلب ابن الجلب شعدك ذكرت الحيوان ابن الكلب اليوم
_ كلب ابن الكلب مو تعرف ابوي ميقبل امشي بدربك
_ هسه صار دربي كخيه موو
_ من زمان دربك كخيه بنظر أهلي هسه ماعلينا ماباركتلي
_ على شنو
_باركلي
_ألف مبروك
_ أبوي جابلي سيارة سنتافي اوت البارحة
_ صدك تحجي ولك
_ ايي والله تعال وشوفها طابكة بالباب
_ هنيالك والله مثل حضي نعال لاستيك مايشترولي
نايمين على فلوس حمرة
_ جر عدل يجيبولك
_شنو اني زمال علمود اجر عدل
_ هههه أنت انكس من الزمال ههههههه
_مثلك غير
_ اسمع اريد اشوفك اليوم بس اكون بمكان محد من أقارب بي علمود مايوصلون حجي لاهلي اني طالع وياك
_ اسمع جلب اسمع تعال للملهى ليلي هذا مكان محد يجي بي وأنت منا مفطوم صارلك أشهر خوش بنات جايبين
هم نشاوف وهم نتونس شكلت
_ انعل ابوهن يابو الخلفوهن لو أموت ماقترب لوحدة كحبة مليون واحد ينام وياها بالأسبوع
_ لعد تبقى هيج هههههه
_ لا ماابقى وراح اعيش بالجنة هههههه
_ راح تزوج ولك
_ ان شاء الله عن قريب
_ منو تعيسة الحظ اللي راح تزوج الكاروطة
_ منو كاروطة ولك
_انت بوما كرطت مرتك تعرف أنت مثل
زهراء هي هم كرطت خطيبها ههههههه
_ ولك صدك هاي عود هي مات خطيبها وأني ماتت مرتي
_ دا اكول لعد يجوز الله ظاملكم شي
_ اكيد ظاملنا شي حلو
_صدك ماكلتلي منو هاي ؟
_ اممم زهراء ليش اكو غيرها افكر بيها صار سنوات
_ حيوان متغير أبد عبالي لاكي وحدة غير
_ مستحيل اخلي أي وحدة بالي غيرها هي هي
يعني هي راح تصير مرتي وام صوفي
_ يروحي ابو الصوف شوكت اشوفك عريس
_ عن قريب ان شاءالله
_ ان شاء الله.. ولك تعال للبيت مالتنه اشوفك
بحجه تشوف امي مريضة
_ وعاد امك مريضة صدك
_ اي والله مريضة نايمة بالفراش
_ الله يشافيها خوش فكرة هاي اروح أكول
لاهلي واجي وياهم عود
_ واذا سألت أمك عني عند أمي خل تكوللها محمد
بالشغل علمود يخلونك تجي
_ خوش فكرة يلا باي اروح اسبح
_ ابو الوسخ يروح يسبح
_ قابل مثلك محمض
_ماكو غيرك أنت المحمض
_ ديلا ولي
سديت الخط صدك مشتاقله هذا الحيوان نزلت جوه كلت
لامي رأسن انطت مصطفى السارة وراحت اخابر اسمعها تكول
مابيج غير العافية ان شاء الله ان شاءالله اليوم بالليل نجيكم خيه هاا اكلج خيه محمد موجود هاا لأزم صاير
خوش ادمي وصاير يشتغل
حمزة كمت رحت على الثلاجة طلعت تفاحة طلعت
اكل بيها امي سدت الخط وكالت
أمي _ حمزة راح نروح بالليل البيت خالك تجي ويانه
حمزة _ ايي اجي من زمان مطالع من البيت
أمي _ ايي
حمزة _ من هسة اكلج إذا محمد موجود مراح اروح
أمي _ ماموجود بالشغل
حمزة _خوش لعد
