رواية لست غجرية الفصل السادس عشر بقلم روز الحيدر
انـا الشط الجبير الشايف وعايف
شجاني كبال بيرك چني ماشايف
التكملة....
وصلت قريب السيارة وشفته هو شهكت...
: نسر!
ماوكفت على نفس الركضة والوف وارجع ركض شافني بس مافهم ليش هيج سويت بس شخط السيارة بسرعة
وگطع الطريق علية ونزل يصيح
نسر : جوري... جوري شبيج!
شفته گطع الطريق وارجع اركض وهو يركض وراي فحطت من التعب لحد ما سحبني قيدني بحضنه
نسر : ولج جوري... شبيج؟
ماكدرت احجي،بس باوعتله بجيت بكل قوتي
شدني لحضنه، بس دفعته عني بسرعة
رجعت لورى وأنا أرتجف
وردة: لا تجيسني..
انصدم من ردة فعلي
نسر: جوري.. شبيج؟
رفعت إيدي الدم يغطيها والخنجر بعده بقبضتي
بصوت يرجف
وردة : شوف… شوف شسويت
نزلت عينه على الدم.. تجمد
نسر: دم منو هذا؟
هزيت راسي وبديت أبچي أكثر
وردة: ما جنت أريد… والله ما جنت أريد
بقلق
نسر : جوري دم منو؟!
وردة: مصعب.. ورند
نسر : تمام أهدي
تقرب بتعدت خطوة
نسر: جوري اسمعيني—
صرخت بكل قوتي
وردة: عوفنييي! لا تجيسني !
لزمت راسي بإيدي وانهارت كعدت بالكاع
وردة : أترجاك... نسر حباب لا توديني إلهم لا تخليهم ياخذوني
لزمني مرة ثانية
وردة: أنت ضابط! واجبك تسلمني أعرفك
نسر :لا تحجين هيج.. جوري بس اهدي وفهميني
صار؟
رفعت عيني واحس گلبي راح يوكف من البچي
وردة: شفهمك؟ واني كتلتهم
لمس وجهي مسح دموعي
نسر : بس أهدي ولج گلبج راح يوگف
بلكوه أخذت نفس
وردة: تكدر؟ تكدر توكف بوجه القانون الخاطر
وحدة صارت مجرمة؟
سكت… ونظراته ثبتت بعيني
وردة : تكدر تخسر منصبك، اسمك، حياتك، بسببي؟
رجعت لزمت قميصه بكل قوتي
وردة: جاوبني! لو بأيدك تسلمني ؟
شد فكه… عيونه امتلن نار ووجع
نسر: أنتِ مو مجرمة.
وردة: الدم على إيدي!
نسر: أنطيهم روحي ولافرط بيج
تجمدت بمكاني
قرب جبينه على جبيني وصوته صار أنصى وأخطر
نسر: إي… أوكف بوجه القانون إذا القانون ما عرف
يحميج.. أوكف بوجه الدنيا كلها إذا لازم.
انكسرت بالبچي أكثر
وردة: ليش؟
طبع بوسه بجبيني همس
نسر: لأنج أنتِ قضيتي ..ورد جوري.
سحب الخنجر من أيدي واخذني للسيارة
فتح باب
نسر: صعدي
بقيت أباعله ثواني أرتجف، صرخ
نسر: جوري.. ثقي بيه!
بصوت مكسور
وردة : لاتكسرني
نسر : أضحي بروحي بس أحميج
بدون تفكير… صعدت سد الباب ورجع صعد شغل
واخذ موبايله وأتصل
بتوتر
نسر : طمني صار؟
سكت يستمع بعدين كال
نسر : عايش؟
حجاها وباوعلي..خليت إدية على أذاني وأرجف
نسر : تمام والبنية؟... يله
سد الخط صرت أضرب على رجلية واصيح
وردة : مااااات... مااات اني كتلته... راح أصير
خريجة سجون
وكف السيارة والزم أيدي يهديني
نسر : اششش.. جوري بس اهدي مابيهم شي والله
مابيهم شي عايشين
وردة : كول والله؟
نسر : والله.. والله عايشين وهسه سعفوهم
شفت السيارت طلعت من القرية مسحت وجهي
وردة : شلون مو أني غرست الخنجر بطنه؟!
نسر : اي طعنتي بس بعده عايش
وردة :و.. و رند؟
نسر : مابيها شي بس مجروحة
وردة : أريد اشوفهم
نسر : ممكن اذا يشوفوج يرفعون دعوة عليج خليهم
حايرين بسواد افعالهم
سكتت شفت أيدي ترجف و الدم جمد بيها رجعت
أبجي... وكف السيارة
نسر : اهدي الحظة
نزل بسرعة.. لتفت فتح الجنطة ورجعلي فتح الباب
بايده دبت ماي وبطل زاهي
نسر : نزلي غسلي
بدون كلام نزلت وكف خله زاهي وصبلي ماي اغسل
الدم جامد خرمشت أيدي بقهر وعصبية، لزمني
نسر : جوري بس..
نحنى اخذ صم تراب وخله عليه زاهي واخذ جفوفي
فركهم بالطف زاح كل الدم وغسلهم بماي نظفو...
رجع اخذ ماي بجف ايده مرره على وجهي.وراح سحب
كلنكس نشفه ونشف أيدي
نسر : يله صعدي
رجعت كعدت، طلع الخنجر غسله هم بتراب وزاهي
حتى يزيح الدم الجامد ورجع صعد شغل السيارة
وحرك ثنينا ساكتين، ماعرف مصيري؟ وين اروح؟
احس جبل صار فوك صدري نفسي ثگل بلكوة اسحب
نفس من حلكي...نزلت الجامة ورجعت راسي على كشن
نسر : شلون صرتي؟
بدون مالتفت
وردة : تشوفني مجرمة؟
سكت ثواني رد
نسر : بالعكس دافعتي عن نفسج، وثقي محد يكدر
يحاسبج خاصة حكومة كردستان مع المرأة
وردة : شلون وصلتلي؟
نسر :جهاز التتبع... ولما عرفت مصعب يمج خبرت
القوات ودخت بمكانج تتنقلين بشكل سريع اخر شي
شفتج
وردة: شراح يصير؟
سكت وبعدين التفت صوبه
وردة: حباب لا تخليني أصير خريجة سجون
أشر بإيده على ركبته
نسر: على گص هاي
وردة: شلون شيصير بيه؟
نسر: بس أهدي وارتاحي.. وكلشي ينحل وأنتِ بأمان
ما أخلي شعرة من راسج تتأذى
سكتت ثواني… ورفعت عيني إله
وردة: وين رايحين؟
نسر: أخذج لمكان بعيد عنهم على الأقل
وردة: وين؟
نسر: كتلج… صديقي عنده مجمع ودور سكنية ياجرها
بأوقات السياحة، هسه شبه خالي…نبقى بيه كم يوم
لحد ما تهدين
هزيت راسي
وردة: زين… إذا رفعوا دعوة أنسجن؟
نسر: لا
أولاً دفاع عن النفس... وثانياً ما راح يثبتون شي
خليهم يحيرون بنفسهم... مصعب انتهى أمره
وردة: وباهر؟
ابتسم ابتسامة خفيفة
نسر: نصاد
فتحت عيوني
وردة: شلوون؟
نظرلي.. ورفع حاجبه
نسر: ليش مصدومة؟
وردة: مو كال يجي بالليل؟ يعني شلون عرفتو مكانه؟
رجع عينه للطريق وماراد يحجي اكثر بس كال
نسر: هاي بعد… انصاد
سكتت
نسر : أشوفج منزعجة على عزيز گلبج؟
وردة: لا
نسر: اممم… واضح
لتفت لي مرة ثانية
نسر: زين ليش بالبداية ركضتيلي ومن شفتيني
شردتي؟
نزلت راسي
وردة: خفت تسلمني للشرطة
نسر: وليش ركضتيلي اول شي؟
وردة: عبالي… باهر
هز راسه بدون مايرفع عينه علية.. تقريباً ساعة وهو
بعده ساكت واني يمه بس جسد، اما عقلي يسولف
وچن صايرة محكمة بين تانيب الضمير وبين اكول
يستاهلون موقليل الشفته منهم ماعرف شكد مشينا
بس بتعدنا هواي...
مونايمة بس فكري مشغول.. جفلت على لمسته
نسر : جووري.. جوري
لفيت
وردة: ها؟
نسر: أحچي وياج…ما تسمعين؟
نزلت راسي
وردة: اعذرني… عقلي مشوش
نسر: حقج
سكت لحظة
نسر: جوعانة؟ عطشانة؟
رفعت عيني إله
وردة: شكد بعد ونوصل؟
نسر: وصلنا بس أنزل أجيب أكل
شنو تريدين؟
هزيت راسي
وردة: تسلم ما أريد
نسر: تمام
نزل من السيارة
وبمجرد ما سد الباب انفجرت أبچي بصوت
مكتوم عضيت إيدي وصرخت
: أني السبب أني السبب بكل شي
بكد مابجيت وصحت بصوت مكتوم احس گلبي
فرفح وصرت بس أشهك صدري يصعد وينزل لحد
ماشفته اجه
مسحت دموعي وبس الشهكة سيطرت علية، قرب
فتح الباب شافني
فتح عيونه
نسر: جوري شبيج؟
رفعت وجهي، وعيوني مليانة دموع
وردة: تعبت.. أخذني بسرعـة
فتح بطل ماي
نسر: هاج اشربي… وصلنا بعد خمس دقايق
أخذته بإيدي ترجف وشربت
نسر: خليني أخذج للمستشفى
هزيت راسي
وردة: ما بيه شي
نسر: بس واضح ما تكدرين تاخذين نفسج طبيعي
وردة: لا… ما يحتاج
سكت.. وشغل السيارة وكملنا الطريق وصلنا لمجمع
دخل السيارة المكان هادئ… شبه فارغ
بيوت متفرقة داخل مجمع والجبال محيطة بيه من
كل جهة… كأنه معزول عن العالم
وردة: ليش المكان شبه مهجور؟
نسر: مو مهجور.. بس سياحي، وبالشتا يصير خالي
تقريباً المجمع صاير على حافة جبل صف السيارة
وفتح الباب راد ينزل
نسر : يله نزلي
نزلت وعيوني تتلفت حول المكان بحـذر وخــوف
راح فتح الجنطة
نسر : جوري
وردة : همم
نسر : تعاي هاج.. هاي أمانتج
رحت مدلي الجنطة لي امنته عليها وهو اخذ الاكل
يمش واني خلفه اتلفت طلع مفاتيح وصلنا يم دار
صغير
فتح الباب ودخل شغل الاضوية دخلت وكلت
وردة :بسم لله الرحمن الرحيم
عيوني تتنقل بكل ارجاء الدار.. حلو بسيط مرتب
اول دخول مطبخ مفتوح على صالة بي كاونتر
وطباخ وثلاجة...
الصالة بيها قنفات ثنين وطاولة وسطية وتلفزيون
واكو غرفتين
سد الباب الصوت اللي طلع من القفل خلاني أرتجف
سكتنا ثواني... نزع قمصلته وشمره على الكرسي
نسر: ارتاحي انت بأمان هسه
حط الأكل ؏ الكاونتر بالمطبخ، ما جاوبته بقيت
واكفه بنص الصالة والجنطة بايدي ماعرف وين
أروح عيوني تروح يم الغرف… ترجع للصالة…
ترجع عليه كل شي هادئ زيادة عن اللزوم
فتح ثلاجة شافها خالية
نسر: لازم باجر أجيب شغلات للبيت
سكت باوعلي
نسر: جوري… اگعدي لا تظلين واكفة
تحركت ببطء وگعدت على القنفة
المكان باردة… أو يمكن أني اللي باردة شغل التدفئة
ضميت إيدي على بعض راح للمطبخ وبلش يرتب الأكل
صوت علاليك وهو ينفتح… كان الوحيد اللي يكسر الصمت
رفعت عينيه عليه
وردة: نسر…
لف
نسر: ها
سكتت لحظة
وردة: هسه… إحنا وين؟
قرب شوي
نسر: مكان آمن… ما يوصلهم
نزلت عيني بسرعة
وردة: وشكد نبقى هنا؟
نسر: على حسب وضعج
سكتت
رجعت نظرت للغرف
وردة: أنت وين تبقى؟
نسر : اذا وجودي يضايقج عادي أطلع انام بالسيارة
وردة : لااا لااا.. يعني زين ابقى اني أخاف وحدي
نسر: اختاري أي غرفة تعجبج وستقري بيها
هزيت راسي بدون ما أحچي
نهضت ببطء ومشيت باتجاه الغرفة
بس قبل لا أوصل وكفت رجعت باوعتله
وردة: نسر…
رفع عينه
نسر: نعم
بلعت ريقي
وردة: لا تخليني وحدي أخاف
سكت ثواني عيونه ثبتت
نسر: إنتِ مو لوحدج
سكتت وكملت مشيي للغرفة
فتحت الباب شوي…
الغرفة بسيطة
سرير، كنتور،ميز مراية، وكفت على الباب ثواني
دخلت وسديت الباب وراي بهدوء
وما أدري ليش…أول شي سويته سندت ظهري
على الباب وبديت أبچي بدون صوت
دقايق دك الباب
نسر : ورد
نهضت بسرعة سيطرت على صوتي
وردة : ها؟
نسر : يله منتظرج نتعشا سوه
وردة : اجيت
خليت الجنطة على سرير وطلعت منها ملابس لان
ملابسي بيهن بقع دم
مااكدر ادخل اسبح ونسر وياي بالدار فشلة قفلت الباب
وغيرت ملابسي،لبست دشداشة سودة مخصرة وكلوش
من تحت وطلعت ارتب بشعري
بس رفع عينه بدهشة چن اول مرة يشوفني
نسر : اللهم صل على محمد وآل محمد
بتسمت مجاملة رديتها
وردة : للهم صل على محمد وآل محمد
نسر : تعاي أكلي لا تتخربطين عليه بهلليل وين اوديج
هزيت راسي
وردة : بس اريد اغسل
اشرلي على مغاسل دخلت غسل واشوف حالي بالضيم
عيوني ممرودات وإدية تتراعش..
غسلت وطلعت.. مرتب الاكل على طاولة
نسر: يله تعاي
كعدت بدون صوت.. مااشتهي اكل وبس اكول ماريد
يبقى يحجي واني روح مامتحملتها
قدم الاكل كدامي اخذت نص خبزة خليتها كدامي
صرت اكل شوي شوي..
رن مبايله، بسرعة رفعت عيني مرعوبة... رد وفتح
امايك
اجه صوت شاب
: ولك أمير مكانك خالي شلون كعده بالمزرعة تفوتك
ضحك
نسر : بالعافية
نظرتله مصدومة : منو أمير؟!
كال
: ولك أمي تكول حلاله الجو هناك كتلها أي كلش
نسر : هههههه شيشتها عليه!.... كرار
: هاا؟
نسر : انت ومنو بالمزرعة؟
كرار : أني والشباب كلنا عدا أيسر وميسر راحو ويا
عمي
نسر : وعلي وياكم؟
اجه صوت ثاني صاح
: لك ها گلب
نسر : اخوي الجبير مكادر اغلط عليط
علي : لا هم عوزها.. اكلك مو خلصت ماترجع؟
نسر : علي اسمعني اكو ملف بأسم باهر شوان
قضية الممنوعات
علي : أي شبي؟
نسر : تكدر تنقل ملفه البغداد؟
علي : أمير اسمعني زين حتى العمي حجيت كتله
هذا ماينقل عنده واسطه قوية
تنهد
نسر : اعرف بس عمي يكدر
علي : اي واحتمال واحنا نشتغل بجرائات
النقل يطلعوا وتعرف قصدي
نسر : فهمت
علي : ماتجي بعد شعندك ترا صارلك هواي غايب
وامي گلبها متحمل عليك
نسر : ان شاءلله راجع قريب بس عمي كلفني بشغلة
لازم اكملها يله
علي : ان شاءلله بالسلامة
نسر : سلملي على شباب
علي : يوصل
نسر : سد الخط من يمك دا اتعشا
علي : الف عافية خوية
سد الخط
الصمت رجع مرة ثانية… بس هالمرة مو نفس قبل
أباوعله مو مستوعبة
وردة: أمير؟
رفع عينه إلي وبعدين نزلها على الصحن
نسر: همم
وردة: يعني اسمك مو نسر؟
ابتسم ابتسامة خفيفة
نسر: لا… أمير
سكتت ثواني
وردة: وليش جذبت؟
تنهد… وسند ظهره
نسر: ماجذب… نسر لقب وكتلج مااكلج بأسمي
الحقيقي خاف تغلطين بي
وردة: ومنو سماك؟
رفع حاجبه
نسر: عمي
وردة: ليش؟
ابتسم هالمرة أكثر لدرجة خدة نزرف
نسر: يكول من چنت صغير ما تمشي.. تركض وما
أباوع وراي… مثل النسر إذا شاف فريسته مابعد
عينه عنها لحد ماتصير بين إدي
بدون ما أحس ابتسمت هو انتبه لابتسامتي وسكت
وردة: يعني… من هسه اصيحك أمير؟
ثبت عينه علية
نسر: اللي يريحج
نزلت عيني بسرعة
وردة: أمير أحلى
رفع حاجبه بخفة
نسر: وأسم نسر شبيه؟
ابتسمت لأول مرة من كل گلبي
وردة: نسر يخوف… تحسه يداهم بنص الليل
طلع منه ضحك حقيقي
نسر: زين وأمير؟
وردة: أمير… اسم واحد ينشرب وياه چاي العصر
قهقه ومد إيده على الصحن
نسر: لا والله؟ صرت هيچ ناعم؟
هزيت كتفي
وردة: أسم أمير لطيف أحسن من واحد أول ما ينذكر
اسمه أرتبك
مال بجسمه شوي للأمام، وعيونه تلمع
نسر: يعني أربكتج؟
نزلت راسي بسرعة
وردة: آني ما كلت هيچ
نسر: بس فهمتها.
حسيت وجهي حمى لزمت الخبزة وصرت أثرمها بيها بدون سبب
هو ظل يباوعلي ويبتسم
نسر: زين… دام أمير أحلى، من هسه رسميًا صرت أمير يمج؟
رفعت عيني بسرعة
وردة: لا تستغل الفرصة
ضحك
نسر: متأخرة… استغليتها من زمان
بتسمت.. مد إيده على اكل وقربه إلي
نسر: أكلي زين… باچر إذا غبت عنج لا تكولين أمير
ما يهتم
سكتت لحظة وبعدين باوعتله
وردة: وين تغيب؟
رفع حاجبه
نسر: هاا… هسه صار يهمج؟
ارتبكت
وردة: يعني خلصت شغلك
نسر : أطلع اجيب كم شغلة للبيت
سكت، مديت إيدي أريد آخذ الماي، بنفس اللحظة
هو مد إيده، خبطت أصابعنا ببعض سحبنا إيدينا
بنفس الثانية سكتنا
باوعت للصحن… وهو باوع للجهة الثانية قدم
الماي
نسر: الماي إلج
وردة: مشكور
نسر: بس خفت تعضيني إذا أخذته أول
ضحكت غصب عني
وردة: يمكن
نسر: إي بين عليج… شرانية اليوم
سكتت فجأة، ورجع كلشي براسي للحظة
انتبه لوجهي مباشرة
نسر: ورد.. والله اشاقة وياج
هزيت راسي
وردة: أدري....شراح يصير؟
نسر : ميصير غير الخير
وردة : ماراح انسجن؟
نسر : جؤ... بعدين مابيهم شي عايشين بس
يسعفوهم وياخذوهم البغداد
تنفست بأرتياح
وردة : يعني مايبقون هنا؟
نسر : جؤ.. بس عزيز گلبج وهم أحاول أنقله
تركت من أيدي
وردة : الحمدلله
نسر : اكلي شني معدة عصفور!
وردة : شبعت
نهضت غسلت.. هو بقى يكمل اكل.. رجعت كعدت
وردة : شلون لزمت باهر؟
رفع عينه خزرني
نسر : تردين تعرفين؟
وردة : بكيفك
نسر : جان رايح يتفق ويا مهرب التركيا.. وشافني
كدامة بالزي العسكري... لو تشوفين وجهه من الصدمة
جنت احلم بهاي الحظة
هزيت راسي ماخجيت... كمل اكل وعزل الطاولة غسل ورجع مبايله يرن... رد
نسر : نعم سيدي... أي.. سيدي خلي واحد من الولد
يدمج مع ملف مصعب قضية اعتداء ومحاولة قتل
سكت باوعلي
نسر : البنية الغجرية ألي ساعدتني وامنتني عليها
حاول يعتدي عليها... ويقتلوها هو واخته..... اعتذر
والله... سيدي ماقبلت وربي يشهد أصريت عليها ...
.......... لا هي سباعية كدرت تخلص نفسها وطعتنه
نظرتله بخوف من كالها
نسر : لا والله عد يمناك.... أي هسه هي وياي الحمدلله
زينة بس خايفة شيوي.... تمام لحظة
بعد المبايل عن اذنه
نسر : جوري.. الواء يريد يحجي وياج
بلعت ريكي بخوف واعصر بأيد
وردة : ليش؟ حباب لاتسجني والله هم
نسر : لا.. لاا بس يريد يطمأن عليج
هزيت راسي قدم المبايل اخذته وأيدي ترجف
والعبرة خانكتني
وردة : الو
اجه صوت رجال من نبرته مبين شكد شخصية
وقوي
: سلام عليكم باباتي
بصوت يرجف
وردة : وعليكم السلام.. عمو والله همَ
بجيت وصوتي يرجف
وردة : والله هم اني ماسويت شي كل لي سويته
دافعت عن نفسي حباب لاتسجني والله اكتل روحي
: اهدي بابا وعتبريني أبوج.. ألج الأمان محد يمسج
وزين سويتي دافعتي عن نفسج لاتخافين من شي
انت صاحبت حق
وردة : عمو حباب ماتسجني؟
ضحك يطمني
: لا ياعمو طمأني... بس أسمعي كلام أمير
وردة : اي أسمعه والله
: عفية عليج بابا
بصوت بعده يرجف
وردة : رحم الله والديك عمو
: دللي بابا وطمأني القانون نوجد حتى يوكف
ويا الحق وينصرة
وردة : الله ينصرك
رجعت الموبايل بإيدي وعيوني بعده مليانة خوف
اخذه يحجي ويا
نسر : صار بعيوني.... ان شاءلله... مع سلامة
سد الخط قرب شوي
نسر: شگلتلج؟
رفعت عيني إله
وردة: ما راح أسجن؟
هز راسه بهدوء
نسر: ما راح يصير شي
سكت لحظة وبصوت أهدأ
نسر: إنتِ وياي… وانتهى الموضوع
رغم يطمنوني وكلام هذا الرجال الخير هدا من نفسي
بس بعد صدري مخنوك لدرجة مااكدر اسحب النفس
له افتح حلگي...خليت أيدي على صدري ونهضت ارد
امشي للغرفة
نسر :بيج شي؟
وردة : تعبانة
نسر : تمام نامي ورتاحي وشنو تحتاحين أني موجود
وردة : تسلم
بلكوه حجيت الكلمتين وكملت للغرفة دخلت وسديت
الباب وقفلته بالقفل...
رحت فتحت الشباج.. الهوى عالي وبارد بس عكس الي
بداخلي نار وضيقه ماتنوصف..رجعت طلعت صور جدة
وبقيت اتفرج وعاتبها ودموعي تنزل
: يروحي.. حبيبتي وين عفتيني نوليت من بعدج، أني
الجنت مااحتاج غير الله بوجودج تالي صارت الغربة
تحميني
نكسرت وريدة بغيابج.. مشتاقتلج هوااي والله روحي
رايحه على شوفتج وحضنج.. هيج گلبيج ينطيج هاا
شلون تعوفين وريدة؟! ليش صرتي مثلهم وعفتيني
بيد الغرب؟
لمست صورتها وبس دموعي تنزل واحجي وياها
بهمس حتى مايسمعني
: زين لاتجين.. أني أجيج أدعي انت يم الله قريبة
خلي ياخذ عمري ولا هل عيشه هاي
اخذت ثوبها حضنته وخليت ردن على جتافي چن
هي حاضنتني
: ياربي حباب لا تعوفني لو تاخذني لحبوبتي لو لا
تخليني هيج
خليت راسي على جنطة ومددت بالكاع واني حاضنه
ثوبها بقيت أبجي.. حاسبه بضياع وخوف بعد لي صار
ماعرفت شلون غفت عيني وسلهمت للنوم
واشوف ظافر مابي شي ورجع نعاد الكابوس من حاول
يعتدي علية... أصيح.. أصيح ومحد يسمع
وفزيت واني أصيرح
: لاااااااااااااا لاااااا جدةةةةة الحگييييييي
اسمع صوت يصيح
: جووري... جوري فتحي الباب
باوعت المكان مو داري نرعبت أكثر... وماحس له الباب
نربد ربد ودخل نسر.... من شفته نصدمت نسيت اني
وين وصاير وياي
اجه يركض ملهوف
نسر :جوري..كابوس
نهضمت وضميت وجهي بكفوف إيدي أبجي
وردة :تعبت
نهض جابلي ماي
نسر : شربي.. خلاص كابوس ونتهى
أخذته بإيد ترجف… بس بللت ريگي بيه
ظل واكف كبالي، عيونه كلها قلق
نسر: هديتي شوي؟
هزيت راسي بالنفي… ودموعي بعدهن ينزلن
وردة: كل ما أغمض عيني… يرجع كلشي
قرب خطوة، بس بقى محافظ على مسافة
نسر: ما راح يجيج شي آني يمج
ضحكت بمرارة وأنا أبچي
وردة: كلكم تكولون آني يمج... وبالأخير تعوفوني
سكت… وانضربت ملامحه
عرفت جرحته، بس ماكدر أسيطر على وجعي
نزل كعد على ركبة حتى يصير بمستواي
نسر: آني مو كلهم
رفعت عيني إله.. أول مرة أشوفه هيچ مو ضابط
مو قوي… بس إنسان خايف
وردة: تعبت… والله تعبت
انكسر صوتي بآخر كلمة
مد إيده شوي… وتوقف، كأنه يستأذن
نسر: أگدر؟
ما فهمت مد إيده أكثر ومسح دموعي بإبهامه
نسر: لا تبجين بعد… تعبتيني وياج
شهكت غصب وضحكت بنفس الوقت
وردة: شلون يعني؟
ابتسم بخفة
نسر: لأن كل دمعة تنزل منج… تنزل هنانا
وحط إيده على صدره
ما عرفت أرد… بس شهكتي هدت شوي
التفت للسرير وبعدين إلي
نسر: تكدرين تنامين وحدج؟
باوعت للباب المخلوع، وللغرفة، ورجف جسمي
سكت بس فهم بدون لا أحچي
نسر: تمام
راح عدل السرير بسرعة، وأخذ المخدة وخلاها
بالكاع يم الباب
وردة: شتسوي؟
نسر: أنام هنانا
وردة: ليش؟
نسر: حتى إذا صار الكابوس مرة ثانية أوصلج قبل
لا يوصلك الخوف
جمدت مكاني ما متعودة أحد يسوي شي زين بلا
مقابل.. لو يريد يطمني وبعدين! معقولة؟
وردة: أمير…
رفع عينه
وردة: ليش زين وياي؟
سكت ثواني… وبعدين جاوب بصوت واطي
نسر: لأن الدنيا جانت قاسية وياج بما فيه الكفاية
لذلك مااريد أصير اني والدنيا والعالم عليج
انحبس نفسي مرة ثانية… بس هالمرة مو خوف،
أشر للسرير
نسر: يله نامي… باچر نحچي بكلشي
وردة : ماكدر انام على فراش مو فراشي
نسر : نضيف مابي شي
وردة : حتى لو ماعايزة هموم.. جدة تكول الوسادة
تخزن فكر راعيها
رفع حواجبه باعجاب
وردة : واعرف منو نايم عليها وشنو فكر؟!.. هموم
العندي كافيتني وزيادة. فوك الحمل تعلاوة!
ضحك
نسر : والحل؟
وردة : اتوسد الجنطة
نسر : زين تسوين
سحبت الجنطة وحطيتها على السرير، وعدلتها حتى
تصير مخدة..
ظل يباوعلي مبتسم
وردة: شكو؟
نسر: أول مرة أشوف وحدة تترك مخدة ناعمة وتنام
على جنطة سفر!
وردة: وأول مرة أشوف واحد يصر ينام بالكاع وهو
عنده غرفتين
رفع حاجبه
نسر: هاي طعنة لو ملاحظة؟
وردة: حسب نيتك
قهقه بصوت خفيف، وبعدين أخذ البطانية وفرشها
يم الباب
نسر: تمام… كل واحد مرتاح بطريقته
تمددت بحذر، وحاضنة ثوب حبوبتي، وراسي على
الجنطة رغم التعب… عيني ما جاي تاخذ نوم
انتبه من حركتي
نسر: بعدج صاحية؟
وردة: همم
نسر: شتفكرين؟
سكتت ثواني
وردة: أفكر… شلون يوم واحد يكدر يخرب عمر كامل
نسر: وأحيانًا… يوم واحد يكدر يصلحه
لفيت وجهي صوبه بعده كاعد، مسند ظهره عالباب
وردة: ليش ما تنام؟
نسر: لأن وعدت نفسي… الليلة أنوم الخوف حتى
ترتاحين
رفعت عيني إله، وبنص تعبـي طلع صوتي أهدأ من قبل
وردة: وبلكي طلعت إنتَ الخوف بذاتك؟
وباوعلي مباشرة ابتسم نص ابتسامة، بيها وجع أكثر
من الضحك
نسر: إذا آني الخوف.. ليش أول ما ضعتي ركضتيلي؟
انصدمت… وسكت لساني
عدل كعدته وسند راسه عالحايط
نسر: الخوف يهربون منه… مو يركضون له
نزلت عيني بسرعة
وردة: عبالي غيرك…
ضحك بخفة
نسر: أدري… عبالج باهر
عضيت شفايفي من الإحراج
وردة: لا تعايرني هسه.. خفت تسلمني وطبق القانون
براسي
اختفت ابتسامته شوي… وباوعلي بجدية
نسر: لهالدرجة شايفتني قاسي؟
سكتت وما عرفت شلون أجاوب
نسر: إذا أريد أسلمج جان من أول ما ركضتيلي
خليتج بيدهم
ثبت عينه بعيني
نسر: بس آني ركضت وراج… مو عليهم
انحبس نفسي، ونزلت عيني مرة ثانية
وردة: ما أعرف.. ما متعودة أحد يختارني
سكت ثواني وانكسرت ملامحه
نسر: تعودي
رفعت عيني بسرعة
نسر: لأن منا ورايح... آني أختارج دائماً
جمدت بمكاني.. ولا كلمة طلعت مني
هو التفت للجهة الثانية حتى يخفف ثقل كلامه
نسر: نامي هسه... باچر نتعارك إذا تريدين.
سكتت.. وفكري نشغل.. الله اعلم شنو نيته ماكو
دخان بدون نار وماكو عطاء بدون أخذ.. خلاص
باجر احجي ويا وافهمه..
بقيت صاحيه بدون لا حس ولا نفس.. لحد ما شفت
ضوه الفجر طر... ونسر عباله اني نايمة.. نهض من
مكانه وراح ماعرفت وين..بس نفسي طمأنت بخيط
الفجر.. غفيت رغم المقاومة
صحيت ماعرف شكد نمت نهضت طلعت من الغرفة
نسر ماكو صحت
وردة : أميررر.. أموووري
ماكو...
وردة : أي هم زين
رجعت اخذت ملابس وركضت للحمام اسبح قبل
لا يرجع.. سبحت بسرعة وغيرت ملابسي طلعت
هو ماكو..
غسلت الدشداشه الجنت لابستها وشريتها وطلعت
اريد مشط ماكو مشط شفت بالمجرات شسوار على
كهرباء يكون على شكل فرجت شعر شغلتها
وسويت شعري شلون ماجان وضفرته وخليت ملابس
لي بيهن اثر دمهم بجيس وطلعتهم يم الباب
سمعت صوت الباب ومفاتيح.. دخل نسر بإيده علاليك
تلكيته... مدلي الغراض
نسر : گعدتي
وردة : بعدني نايمة
ضحك اخذت من إيده
وردة : شني مطولين هنا؟
نسر: ماعرف
خليت الغراض على كاونتر، طلع شوي ورجع جايب
وسادة وفراش وغطى...
نسر : ألج
فرحت.. اخذتهن واني مبتسمة
قربت صوبه.. نزلت راسي
وردة : مشكور هواي زحمتك
نسر :ماكو كل زحمة دللي
وردة : حتى لو يبقى عظم بنادم ثكيل بس وعد
أردلك معروفك وياي ماانسى
تنهد. هز راسه
نسر : طبعاً تردي
نظرلي
نسر : بس بالطريقة ألي أريدها
صفنت بوجه حسيت گلبي نعصر من كلامه ودي اطك
من البجي واشرد منه نتبهلي ضحك كال
نسر : قصدي تسويلي الأكل الي يحبه گلبي
هزيت راسي بأيجابية فتح الغراض طلع المسواك
نسر :جبتلج كلشي تحتاجين أريدج طبخين لان
نفسي لعبت من اكل المطاعم .. اذا ماتصير زحمة
وردة : اي.. قصدي أي اطبخ
بتسم
نسر : أريد من إيدج طبخة تشبع گلبي قبل بطني.
عقدت حواجبي واردد بگلبي
: شني من اكله هاي؟!
ياربي معقولة اشرد من السيء و اوكع بالأسوء! اه
ياحظج ي وريدة
اخذت الفراش دخلته للغرفة وگلبي ممامرتاحله
بعدت ذاك الفراش والوسادة وفرشت الجديد، رحت
فتحت الشباج... واكو باب جانبي فتحته بي بلكون
صغيرة
واشوف ذاك المنظر الصدك ينسي الهم يالله شكد
يشرح النفس جبال على مدى العين... نزلت عيني
نصدمت تحتنا وادي عميق بشكل مخيف وعبارة
عن أشجار
لتفت على صوته
نسر : عجبج
وردة : شنو؟
اشر على فراش
وردة : اي رحم الله والديك.. تعبتك وياي
نسر : تعبج راحة
وردة : اا.. شتريد اطبخلك؟
نسر : بكيفج
وردة : مااعرف شنو تحب؟
نسر : أي شي من أيدج
هزيت راسي.. طلعت للمطبخ اشوفه جايب كل شي
احتاجه.. بديت اطبخ.... أجه
نسر : أساعدج؟
ضحكت
وردة : تعرف تطبخ؟
ضحك ورتب شعره
نسر : لا يمعودة بس اعرف اسوي بيض وطماطة
وردة : هههه صارت زحمة
نسر : خلي اشوف طبخج
وردة : امممم.. تعال نظف الخضرة
نسر : سهله هاي
اخذ الخضرة وكعد.. اني خليت الحم على نار ونكعت
التمن.. ورجعت انضفها ويا
وردة : أمير
رفع راسه چن اول مرة يسمع أسمه
نسر : ها
وردة : يمتى أكدر أستقر؟
نسر : حتى أطمأن عليج
وردة : شكو بعد؟
نسر : ماكو بس أحتياط أصبريلي هل أسبوع هذا
والله كريم ان شاءلله تخلص ماتبقى هيج
هزيت راسي
نسر : أكلتي شي؟
وردة : لا ماشتهي اول مااكعد من النوم
نسر : سكرج؟
وردة : مابيه شي بس احس بتعب اكل شي حلو
نسر : اي وجبتلج حلويات
وردة : عاشت ايدك.. والله كلفت نفسك
نسر : دللي شكم وريدة عندي
يتسمت مجاملة... لان وصلت مرحلة كل مايحجي
وياي بلطف احس عنده فكر سوء.. ماعرف اذا الخلل
بية بسبب اللي عشته! .. ثقتي صارت معدومة لو هو
فعلاً هيج؟!
نسر : ها شلوني؟
وردة : زوين
نسر : هاااا يمعودة كولي غيرها
وردة :شوف الاصفر توخرا لان اذا يبقى يدمرها.
نسر : خوش..
ضحكت وكمت اشوف الطبخة على نار.. بعد ماكمل
غسلها.. نتبهتله ضحكت
وردة : على كيفك يمعود مردتها ليش هل عنيف
وياها
نسر: لأن الخضرة إذا ما تنغسل زين تبقى بيها أشياء
تضرج
باوعتله بطرف عيني وضحكت
وردة: والله صرت خبير خضرة فجأة
نسر: لا بعدج ما شفتي شي.
ضحك وهو يرجع يقرب مني
نسر: شنو بعد تحتاجين؟
وردة: لا كافي… روحي انت ارتاح شوي
نسر: خاف تحتاجين شي؟
وردة: لا روح ماعرف اشتغل واحد يمي
سكت لحظة وباوع علية
نسر: زين… بس إذا احتجتي شي صيحي
وردة: خوش
رجع يطلع من المطبخ بس وكف على الباب
نسر: ورد
وردة: ها؟
نسر: لا تحركين الاكل لان مشتهي طبخ البيت
رفعت جفجير بوجهي
وردة: روح بس
ضحك وطلع، وأني كملت الطبخ وگلبي شوي شوي
يهدأ.. بس اذكر كلامة أرجع للقلق... واعرف ومتأكدة
امثاله شنو يفكرون
خاصه أني وحدي وماعندي غير بس الله لذلك من
يشوفوني ماعندي والي يصير يفكر بطريقة ذكورية
عباله ورد جوري .. تضعف لو يهما كلام حلو مايدري
كل همي أحمي نفسي من افكارهم ودي أخلص اليوم
قبل باجر
أني من طلعت من القرية حتى أعيش الحياة اللي
أستحقها مو حتى يحبسني ويتحكم بية الي من
تالي.. أجه
مستحيل انسى كلامة من کال: ألمثلي ماياخذ كاولية
لو من خلصها يعيرني بخيانة باهر ورند الله ياخذهم
مو لأن جرحني… لا
بس لأن هالجملة تذكرني كل شي ينفهم غلط إذا ما
انتبهت لنفسي زين.
تنفست بعمق وركزت بالطبخة أكثر، كأني أرجع
عقلي للحاضر، مو أخليه يضيع بين التفكير والقلق
كملت الطبخة بس جنت أصارع افكاري ماحسيت
شوكت كملت ورتبت المطبخ
هو جان بالغرفة يحجي اتصال رحت كعدت بالصالة
بعد ماكمل اتصال اجه
نسر : ها بشري؟
وردة : كملت بس يتهدر التمن..
سحب نفس
نسر : اووف ريحة التشريب تخبل.. الطعم شلون!
كعد
وردة : هم اكو اخبار عن رند ومصعب؟
نسر : امم لاتخافين مابيهم شي ومارفعو قضية
ووو
سكت ثواني رفع عينه
وردة : شنو؟
نسر : رند نحكت لان لكو عدها مخدرات
ضحكت
وردة : الله يبشرك بالخير
نسر : اي هي وامها وحده تسلي الثانية
سندت ظهري براحة
وردة : خلي الشرطة تلعب عليهن شناو
رفع عينه نظرلي من كد مافتح عيونه مصدون
مارمش غلست ونزلت عيني على أضافري...
بعد ما استوعب الكلمة خله أيده على جبينه
وضحك ضحك بلكوة سكت
نسر : البراءة بوجهج مظلومة
وردة : يخوي ماتكلي شمسوية!. بعدين كلنا نعرف
التدخل للسجون شني؟ اكو الصالح والطالح
نسر : شعرفج؟
وردة : اسمع سوالف الكبار يكولون تدخل بنت
بيت تطلع مشلفه
نزل راسه وضحك
نسر : ألي يشوف وجهج يكول طفلة بريئة
وردة :يخوي ماتكلي شمسوية كاتله؟
نسر :لاااااا أبدددددد
نظرتله
وردة :شني! احسك مامقتنع؟
نسر : لا مقتنع وحقج دافعتي عن شرفج
نزلت راسي
وردة : والله هم سووني وحش والمايدوسلي
على طرف ماتقربله
نظرلي
نسر : كدروا يصنعون من البراءة شيطان؟
وردة : البيئة الملوثة ماتصنع غير الشياطين
وگتلك عندي شياطين لاتندك وياي ديربالك
ضحك
نسر : شنو تهديد مبطن؟
وردة : لا والله
نسر : ياترى شنو رأيهم عني؟
وردة : منو؟
رفع حواجبه
نسر : شياطينج؟
وردة : بعد ماواضح الأمر يمكن شوفتهم خير وغضوا
النظر عن القديمات.. ونطوك فرصة واي خطأ يشطبوك
هز راسه ورفع حواجبه بدهشة
نسر : غضو النظر عن شنو؟
تفلتت
وردة : مدري.. مدري.. جعت ترا
نسر : اي والله أني هم
نهضت
وردة : خل اشوف
نهض وياي للمطبخ
نسر : ها بشري؟
وردة : هههههه هيج جوعان؟
نسر : وأكثر
ضحكت
وردة : يله بين مااحظر الماعين يكمل
نسر : شلون تعرفي؟
وردة : اذا فتحت الغطا ورتفع بخار قوي واذا حبت
التمن وكفت على حيلها يعني تكلك صرت جاهزة
للأكل
نسر : هههههه شاطرة والله
وردة : ولو عد يمناك
اخذت الماعين بديت اصب وهو ياخذه للطاولة
نسر : جوري الخضرة
وردة : جبتها
اخذتها ورجعت ارتب بيها
وردة : يخوي جاعصها جعص مطلع مصارينها
سكت لحظة… وبعدين رفع عينه إلي ببطء
نسر: لا تگولين.. يخوي
وگفت مصدومة
وردة: ها؟ ليش؟
تنهد، يحاول يبينها عادية بس نبرته بيها انزعاج
خفيف
نسر: ما أحبها… لا تگولينها.
بسرعة اجا ببالي كلامه القديم "لأن غجرية" حسيت ضيق بصدري، وفسرت الموقف بطريقتي كأني أفكر
: يمكن ما يريد يشوفني بهالمكان أو المقام
ابتسمت ابتسامة خفيفة حتى أغطي إحساسي
همست
وردة: محشومة أختك.
رفع عينه بسرعة
نسر: شنو؟
تلعثمت شوي، وبعدين غيرت الجملة بسرعة
وردة: قصدي… أصيحلك أمير.
هز راسه وكعدنا سمينا وبدينا ناكل..هو ملهوف
على الأكل، ياكل بسرعة لدرجة ضحكتني
وردة : احمم..احس الاكل شوي مالح مو؟
هز راسه
نسر : لا.. مضبوط عاشت ايدج
وردة : يمكن الحم مامستوي؟
نسر : ابد ولا غلطة
سكتت.. رفع عينه
نسر : عاشت ايدج يخبل والله چنه طبخ أمي بي
العافية
بتسمت برضا
وردة : الف عافية
رجع ياكل
وردة : أمير عادي تاخذني للسوك محتاجة غراض
نسر : كولي شنو أني اجيبلج
وردة : لا أني أريد اشتري شكم شغلة وأريد اخذ
مبايل
نسر : يله بعد الغدا نطلع؟
وردة : مشكور
نسر : كافي هواي تشكرتي
ضحكت وكملنا اكل.. هو لم الماعين واني غسلتهن
كملت واخذت الجداحة وملابسي ارد اطلع الباب
مقفول
صحت
وردة : أميررر
: هاا
وردة : الباب مقفول
اجه
نسر : شكو؟
وردة : أرد احركهن
عقد حاجبه
نسر : ليش؟
وردة : مو صارتلي شد بيهن مستحيل أرجع ألبسهن
هز راسه وفتح الباب.. طلعت الجو يجنن والجبال
والخضار يحيط المكان ومسوين داير المجمع سياج
من الشجر..
شمرتهن بالماع ونحنيت جدحتهن حتى النار مشت
بيهن ببطء ولعت
بقيت اتفرج على منظر... لتفت شفت أمير عايف الجمال وكاسر رگبته يباوعلي
وردة : شبيك؟
نسر : لاتلبسين أسوي عمي شنهاي طلابة
ضحكت
وردة : ليش؟
نسر : وبطل صفين يشع عليج گمر متلفلف بالليل
وردة : هههههه يله نروح؟
نسر : يله
رجعت للدار ماعندي ملابس زينة للطلعه طلعت
بلكلبية واخذت جنطة لبستها ونزلت ضفيرتي
صفح.. طلعت
وردة : جاهزة
باوعلي
نسر : هيج طلعين؟!
وردة : اي ترا عادي محد راح ينتبه
نسر : لا قصدي زين مستور
عقدت حواجبي
وردة : شني كل مرة عريانة؟!
نسر : لااا والله
تخطيته ومشيت لحكني
نسر : لاتضوجين مو قصدي
بدون مااباوعله
وردة : هواي تسولف سوالف مو بقصدك
وكف يباوعلي لتفت
وردة : نروح لو ألك راي ثاني
مشى بدون كلام.. طلعنا قفل الباب السيارة قريبة
صعدنا وطول الطريق ساكتين..
نزلنا يم المول… أمشي وهو وراي ساكت، چنه مو
وياي أصلًا.
تفرجت على شكم محل وبعدين قررت أشتري دخلت
محل، ختاريت شكم قطعة بنطرون وبديات وتنورة
اشو اجه يريد يدفع الحساب.. فتحت عيوني
وردة : شتسوي؟ رجع فلوسك الجيبك
نسر : اعتبريها هدية
وردة : مشكور.. سويت هواي الي وهل شي على
عيني وراسي بس مايحتاج تدفع اني عندي
نسر : ماكتلج ماعندج كتلج هدية
حجيتها بحدية
وردة : مشكور مااريد اكلفك اكثر
رجع محفظة
نسر : انتظرج بالباب
طلع وكف باب المحل بس وجهه يفض غضب
كملت مسواك على كيفي واخذ كلشي احتاح
حتى مشط وطلعت بلكوة شلت الكياس....
نسر : اساعدج؟
وردة : ياريت
اخذهم من أبدي
نسر : بعد؟
وردة : بس اخذ مبايل
رجعت اشتريت مبايل وخط وطلعنا وهو ساكت
او الصح مزعوج احس يمشي بصفي بركان
وردة : أمير
بدون مايلتفت
: هممم
وردة : شبيك احس ـ
قاطعتي
نسر : مهما يكون حساسج غلط
سكتت... وصلنا السيارة خله الغراض بالجنطة
وصعدنا شغل وعيونه تبتعد عني حجيت
وردة : شتكول لو ادورلي على دار او شقة؟
رمقني بنظرة صفح
نسر : مستعجلة؟ لو مليتي؟
تنهدت
وردة : اريد أستقر
نسر : صبري بس هل أسبوع اكمل شغلي وابدي
ادورلج وين تردين هنا؟
وردة : اي ياريت هواي عجبنتني
نسر : هم جايتها قبل؟
وردة : اي شكم مرة نطلع سفرات
عينه على شارع بدون مايلتف رد بقهر
نسر :سفرات لو حفلات!
عضيت شفتي وغمضت عيوني اردد بگلبي
: اهدي وريدة اهدي لاتسويهاا
سحبت نفس وزفرته بهدوء.. بتسمت وباوعتله
وردة : أي طلعت حفلة أني وعزيز گلبي... يتبع..
اذا ساعة غضب خلت السانك هيج
انـا ســاعة رزق لو رحت ماأرجـع
