رواية خفايا القدر الفصل السادس عشر بقلم انين الروح
البنات كاعدات يخبزا
وريحه الخبز اجنن اخذت كرصه حاره وهدرت جاي
صحت طه حتى يتريك لان ورانه طريق طويل
كعدنه بالحديقه ناكل اشويه كعدت رهف وجانت عيونها وارمه
اكيد من البجي لان الليل كله اسمعها تبجي والله مردت كلبي
هااا رفيف ماشين اليوم
اي والله اجازه طه خلصت وامه يوميه تتصل وتسئل اشوكت ترجعون وهاي اطفالي حيل تبهذلوا
ان شالله نجيلكم غير وكت واشوفج احسن حال
طه .خلصتي رفيف لازم نلحك ورانه طريق طويل
اي اني جاهزه
طلعنه غراصنه وصعدت الجهال
حضنت رهف والدموع صارن شلال
اني وهي
ماعرف شلون راح اتركها اهنا يمهم
الله يساعدها هي هسه بصعب ظرف
هم حامل وهم زوجها مات وهم اعيالها مينطاقون الله يكون بعونها
هو بس جراح وحده كافي اكبر نغصه بالبيت شلون متجرعه هالعيشه ما ادري
يله رهف حبي اخذي بالج ع نفسج وع الي ابطنج ولا تظلين تبجين تره الدموع متفيد بالعكس تضر صاحبها
اتحمدي ربج ودعي بالمغفره والرحمه الهم ولا تيأسي من رحمه ربج فرجه ع ساعه متعرفين
يله عمري خلي اودعج حتى نروح
رفيف .لتعوفيني فدوه
لا رهف لتعترضين طلعتنه
الله يخليج كوليلي روحي ومحروسين بعين الله ورانه طريق شطوله ومتعرفين شيطلعلج بالطريق
حضنتها وبستها وسلمت عالجميع صعدت السياره وبدت تطلع الكراج وباوع من المرايه والجام
اشوف رهف تمشي ورانه وتبجي 😭😭😭 الحد ما طلعت السياره لشارع وهي تمشي ورانه بعدها نطلقنه وعيوني عالجام ماريد اتركها اهنا وحدها
جنت امشي وره السياره وابجي وصيح عليهم ارجعوا اخذوني ارجعوا فدوه لا تتركوني
اموت بدونج رفيف
وصلت للباب مال الشارع ردت اطلع وراهم اركض حتى الحك بيهم وصعد وياهم بدون محد يشوفني
وسمعته عاط بصوته الحاد
كافي يله ردي دخلي جوه ولا تضلين تبجين
انت شرايد مني لا خليتني اروح وياهم ولا تريدني ابجي
شنو انت زوجي وحاكمني اريد افهم شلك علاقه بيه
ماريد اسمع لغوه زايده
فوتي جوه منا العالم
رهف ..انعل ابو العالم عوفني الحالي مالك دخل بيه انت
جرني من زندي .🤨🤨🤨🤨🤨🤨🤨سمعيني عدل صوتج ما اسمعه تردين تبجي هذيج غرفتج دخلي ويطبج الف مرض عود سبحي بدموعج لا تسمعيني حسج اهنا
هد يدي ولتلزمني مره ثانيه ما اسمحلك
واني اكلك مالك دخل بيه
عفته ودخلت جوه بس ابجي هاي اولها اشينتظرني بعد ليش عفتني ايوب ليش ماما عفتوني شنو ذنبي ابقه ويه ناس متحبني
رفيف ليش عفتيني الوحدي اهنا شكلج كلبج من عفتيني
للظهر واني بغرفتي مطلعت منها ابد لان ماريد اشوف احد ولا اسمع كلام من احد نفسيتي تعبانه ومخنوكه حيل
ندكت الباب
ودخلت فطم
يمه احبيبه ليش هيج عازله حالج مايصير يايمه لا عليج ولا ع الطفل هم خطيه هذا شنو ذنبه انتي غركانه بدموعج وهو جاي يتوجع وياج
خاله مو بيدي ما اكدر اسكت او ابطل بجي ياخاله اريد اموت
لا يمه لتكولين هيج استغفري ربج وكومي اسبحي وصلي وقريلج قران وانتي ترتاحين ميصير اظلين هيج
البجي والطم مايرجع ميت
اعرف والله خاله بس مو بيدي
لا يمه الانسان كلشي بيده
بس من قله حيلته يكول انه اسويت جوه ربي وهيج اتعذب واتعب
وهذا حرام يايمه
كومي... كومي احبيبه كومي سبحي وصلي حتى تتغدين الخاطر هذا الطفل المسكين
اي خاله كمت
فتت للحمام اسبحت كوه عفت الدوش يدير مي ع راسي ودموعي تنزل ويه نزلت المي
يايمه وينج سمعيني حسج
انه الميت ومخنوك بشوفه ظلج
يايمه لا تنسين حوطيني بحضنج
حد وكت المنيه صدكين ما ملج
اووووف يمه وينج تعاي اخذيني الج خل ارتاح
افتحت عيني وشفت حالي بعدني جوه الدوش
سميت ع جسمي وطلعت
رحت صليت وكعدت اقره قران ظليت اقره فتره طويله حيل ما حسيت بالوقت شكد مضه منه
وهمه ولا واحد منهم تذكرني واجه شافني
وسمعت صوت ازهار بالبيت يرعد
ما هميت
ظليت اقره القران
وشفت الباب انفتحت بقوه عليه
ارفعت عيني 😮😮😮😮 واني متفاجأءه من الفتحه
خير اكو هيج واحد يفوت
رهف روحي احجي وي جراح خلي ينطيني بنتي
واني شلي دخل بالموضوع
شلج دخل هسه صرتي
ليش هي العركه مو صارت من وراج
واني شكو وع شنو صارت من ورايه لو فشلج انتي تعكسي ع غيرج
متعرفين شلون ادارين زوجج وتحترمين كلامه وكل يوم متعاركين وكابه بالبيت مشاكلكم
وهسه تجين وتكولين مشكلتج ابسببي
روحي حبابه لعبي غيرها ولتجين اتلعبين ويايه
زين ياحبابه
يمه فدوه خوفتيني بينت بغداد شتسويلي عيوني اذا العبت وياج
شوفي وسمعي زين خاف طلعتي من البيت عبالج خلالج الجووو
لا وعيونج الف حارس حاطه بالبيت يوصلي اخبارج
واليكون بعلمج ماتبقين بالبيت وانه ماموجوده بي ليكون عسبالج يصير البيت لم طيره
حلم وتحلمين يارهف
ارهف .اكلج اشو انتي تلوصين هواي تعرفين شجاي تحجين
طلعي من غرفتي لا والله هسه اكلب البيت ع راسج افتهمتي لو اعيد الكلته
ودفعتها من كتفها
يله طلعي ماريد اشوف جهرتج
لدفعين لج اني اطلع بس ولعباس اله اندمج
رووووووحي وعله مابخيلج اركبي
مابقه عليه بس وصخ رجليه دفعتها وبساع سديت الباب وغلقتها
ظليت اسمع صوتها وعياطها بالبيت وتتوعد وتتحلف تاخذ بتها منهم
ارجعت الصلاتي والقراني واني اقره بس احس نظري بده يغوش كوه اشوف الكلمات
للمغرب ندكت بابي كمت بكسل وتعب الدوخه لزمتني وعيوني ثكلن حيل
احس اسحب روحي للباب كوه
اصيح منو بس حسي مايطلع من حنجرتي
وصلت للباب وفتحتها
باوعت بثكل اريد انطق كلمه ماكو بس حاولت امد يدي والزم الجاي دك بابي وحسسه
اني تعبانه حيل ومدا اشوف احد
لج هاي اشبيج رهف .
وينج رباب 😠😠 وينكم
كومي رهف حاولت اصحيها ماكو فاقده ونفسها سريع حيل
شلتها لجربايه
اضرب ابوجها رهف تسمعيني رهف
اباوع عليها عيونها تفتح وتغلق
اركضت جبت العطر شممتها بدت اتحس
هاج شربي مي ارفعت راسها اشويه
ها جراح شكو
لج انتي وينج ليش عايفين البنيه وحدها بالغرفه
هي غير متطلع كاعده بالغرفه وساكته
فطم .يمه جراح شكو
جراح ..وحدتكم ملتهيه ماعرف وين
رباب ويه الحجيه
والبقيه بالبيت
وانتي بله انتي يا ام محسن ماكلتي خل امر اشوف المره
مريت يمه والحسين الظهريه وكتلها تكوم تسبح وتصلي وتجي تتغده
اي وشفتيها طلعت اتغدت
لا والله ما شفتها
اي اكيد محد مهتم حتى اذا ماتت شي عادي عدكم لان هي بعد متكربلكم بشي ايوب وراح وهي صارت ما بحاجتها انتم زين هي خل تولي الطفل الي ابطنها مو حرام عليكم ما تجون تحجون وياها
شني تردوني انه اكعد وكابلها وخليها تاكل وتنام شني سالفتكم انتم بالبيت كله ماكو وحده اتفكر بغيرها
همها بس نفسها والله والخلق الزهره مايصيرلكم جاره
لا يمه ليش هيج تكول هي بنتنه
وين بنتكم وانتوا ما حاسين بيها
رهف .بديت احس ع اصواتهم افتحت عيني بس طلبت مي
جيبولها مي ابساع
انتي شجاج ما تفهميني كل ما اشوفج خربانه بويه شنو انتي مجاي تاكلين ما تاخذين علاجج شنو وضعج فهميني
تره انه مناقصني بعد تعب احجي انتي ماكله شي تغديتي
لا
او وجعا اليش ما تاكلين شني الاكل يموتج
اي اني اريد اموت
😡😡😡 جيبي الولد وموتي محد لازمج بس ابنه احنه رايدينه
رباب امشي جيبيلي لكمه الها خل تاكل وعصير خل تشربه اكيد هاي هبوط صار عدها
جراح ..يله اكعدي اكلي هذا كله
ما اكدر نفسيتي متتقبل
والله دنعل ابو نفسيتج اكلي لا ابتلي بيج هسه والعباس
اكلت كوه وباوع عليه اشوفه كاعد خال رجل ع رجل وعيونه بتلفونه ماعرف شيسوي بي وتشوفين ملامحه متعصب وعاكد حواجبه والجكاره ما وكعد من حلكه الدخان مله
غرفتي ملي
هسه هو ليش كاعد ابغرفتي تره والله
ميصير هيج اني مو طفله وياحسبني ع كعدتي وكومتي واكلي
طبعا اني صح ما اكلت من البارحه لا عشه ولا ريوك ولا غده بس جنت ما احس بالجوع
مو تبطر ولا اريد أأذي حالي بس والله نفسيتي متتقبل اكل شي
هاي اكلت
خلصتي كله
اي خلصته
شوفي يبنت الناس اسمعيني عدل لان هذا كلامي ماعيده بعد
..انتي مو ملك نفسج وحدج
اكو روح ثانيه ابطنج وهاي الروح هي ولدنه واحنه ما نستغنه عنه نريده
رهف ..واني ممقصره ويه الطفل ودا اخذ علاجي وحالته شبه اتحسنت بس هذا زرع الله اذا يريده ياخذه اني شنو الي بيدي
ونعم بالله ماكلنه شي بس انتي الله انطاج طفل وصحته الحمدلله فلا ادمري انتي بسوالفج
يا اسوالف اني مسويتله شي
رهف هاي مال ما تاكلين وظلين تبجين وحابسه روحج بالغرفه ماترهم وياي
انه مفاضي اظل مراقبج
وليش تراقبني شلك علاقه بيه
الف مره كتلج انتي ماتهميني انه رايد الطفل يجي بخير وسلامه وصحه ممتازه وبعدها انتي حره
ف اخذي بالج عالطفل الحد ما ينولد بعد ماكو كعده بالغرفه وحدج لا ساعه ولا ساعتين
ولا اكو ما اكل وما اشتهي ونفسيتي وماعرف شني
ما يصرفلي هالكلام تكعدين تاكلين حالج حال البيت فاهمه ...؟
مو دا احجي وياج 😠😠😠😠
اي اي افهمت
يله كومي طلعي يم البنات وبدربج شوفي يقين خاف محتاجه شي او غيريلها ملابسها
اي كايمه
طلع هو واني طلعت وراه
جراح .زينب رايدج بحجايه خويه تعاي للغرفه
اي خويه بس دقايق و جايتك
هله رهف زين شفناج ماتكليلي ليش حابسه روحج بالغرفه طلعي كعدي يم البنات احجي اكلي خوما اتموتين حالج
ان شالله بس والله نفسيتي تعبانه
كلنه رهف خوما بس انتي الماتولج
هو غير الراحلنه اخونه بس هاي قدر ربج بعد
اهتمي النفسج والي ابطنج وحاولي وي جراح هم تغيرين نفسيته تره هو حيل تعبان بس جاي يكابر
واني شلي دخل اغير من نفسيته الف واحد بالبيت موجود
اي صح كلامج بس تره جراح مايسولف هواي ويانه كلنه
بس اشوفه يحب يسولف وياج ف انتي حاولي مخسرانه شي هو هم فاقد سنده وظهره
ترانه واحدنه يموت ع اخوه لا تشوفينه ساكتين بس والله ميتين من القهر وجروحنه مجاي تشفه ظاله بس تنزف
يارهف بس احنه شايلين المنه بصدرنه وساكتين
حتى ما نأذي غيرنه تره واحدنه مليان اهموم وقهر ومن يشوف الحواليه كلها تشكي وتبجي هو يطيح
ف نحاول انغطي وجعنه حتى غيرنه يتحسن ويكوم ويشيل ويانه
لاتشوفين جراح يمشي ويطلع تره شايل هم ابكبر هالدنيا
منا زوجته العوجه ومنا بنته ومشاكل الشغل وهاي الطلايب الماجاي تنتهي والله
..الله يساعده وعينه
😔😔😔😔 اسفه زينب كلامج صح ان شالله احاول ارفع من معنوياته ومعنوياتكم
رحت للغرفه مال الجده لكيت يقين نايمه عفتها ما صحيتها خطيه
ورجعت طلعت رحت للمطبخ شفت البنات تحضر عشه سلمت وفتت
خطيه كلهن بوسني وخذن من خاطري لان اني من يومها ما شفتهن لو بالمستشفى لو بالغرفه ما اطلع
جتلي سحر بنت اخت ازهار
ماعرف ليش هي اهنا شو ازهار وماكو ليش هي اهنا معقوله ازهار رجعت واني ما ادري
بس هي صح العصر دخلت تعاركت ويايه اكيد لعد راجعه للبيت لا هله ولا مرحبه بهالرجعه
جتلي سحر
وهم اخذت من خاطري
اكلج
كولي
انتي راح تبقين اهنا لو ترجعين البغداد
ليش تسئلين
لا هيج حبيت اعرف
يعني تبقين
اي باقيه لان هذا هم بيتي وبيت ابني
رهف ...اني كلت هيج بس كلام
لان اصلا ماريد ابقه يمهم وهاي ازهار رجعت بعد ما اطيق ابقه بالبيت
هي قبل ايوب عايش ماخلصت النوب مات لا هاهيه محد راح يفكنه منها
بلكي من اجيب بعدها يخلوني اروح يم اختي ونعيش ابيتنه بغداد
نصبن العشه
رحت اني كلت خل اصيح جراح يطلع يتعشه ويانه لان زينب اترجتني احاول اغير من نفسيته
دكيت الباب ودخلت شفته كاعد ويه زينب يحجي تعذرت اني اسفه
ورجعت غلقت الباب سمعته صاحني تعاي وين ماشيه
اسفه ما ادري بيكم جاي تحجون
بس جيت اكلكم تفضلوا للعشه
اي جايين
طلعوا جتي زينب كعدت يمي وجرت الخبزه مني باوعتلها
زينب ..تره جراح وصاني عليج وع صحتج لتروحين تأذيها
باوعتلها وصفنت بوجها وفتحت عيني
😳😳😳 بس اني مابيه شي وصحتي زينه
ميخالف هو يحب يهتم بالكل
تحسي هو ابو الكل صغير وجبير
باوعتله هو جاي ياكل بس هيج مجرد ينكنك بالخيار الكدامه
اشويه وكام طلع
بعدها لمينه الماعين وسوينه جاي
زينب .هاج رهف اخذي الجاي الجراح تلكي كاعد بالحديقه
اني اخذه😟😟😟 ...؟
اي انتي اخذي شكو بيها ..
بس زينب اني ما اكدر هسه
ليش يعني متكدرين هسه ..مو ازهار اهنا
هاي منو كلج ازهار يمنه
مو جتلي العصر وكامت تتعارك ويايه
هاي اشوكت شو ما حسيت عليها وع شنو جايه تتعارك وياج
جتلي اتكلي لا تحلمين يصير البيت الج
خل تاكل نعل هالعوجه الماتعرف تسولف
البيت ما يصير الوحده
البيت هذا بيت ابونه واخوتنه والعائله مو بيت احد بينه
زين ..وسحر اهنا هاي عيني تراقب خطوات الكل ومرسال كبل الازهار
اي وشبيها سحر خوما هي متقبل تودين جاي الجراح
لا بس خاف تروح تحجي الازهار
وذا حجت قابل انتي شمسويه هي استكان جاي ماخذتله
ماعليج بيهن انتي يمنه ولا تظلين خايفه منهن
اني ماخاف بس من الخلقني زينب
اخذت الجاي وطلعت
العفوا بس هاي جايك
ااااي والله اجه ابوكته ..ابو يقين اكدر اكعد
اي تفضلي
وجانه صوت من بعد مسافه بسيطه
الله بالخير
كومي 🤨🤨🤨 هذا صوت فهد جاي علينه
كمت ورجعت للبيت
بس رهف دزي بيد محسن او واحد من الجهال استكان جاي الفهد
اي صار
ومشه الوكت باوعت لساعه ١٢ بليل التعب اكل جزء كبير مني
اترخصت منهم وفتت الغرفتي مددت ع فراشي وبدت الذكريات تحوط فكري اذكرت امي واحمد واخر شي ختمتها بأيوب وكلامه وتوصياته الي وخوفه عليه ادموعي غركت المخده وغفيت بتعب
الصبح كمت اتحمدت ربي ع حالي وع كل حال كلت اروح احجي ويه زينب تاخذني لدكتوره اشوف وضعي صارلي شهر ما رحت دكتوره
طلعت جانوا يتريكون بالمطبخ وريحه الاكل طيبه
شو اني اول ما فتت للمطبخ وعاطت بوجهي
ام جراح
هاي الحقيره المسمومه كولولها خل تطلع ماريد اشوف جهرتها
ولا تكعد وياي ع صينيه من اكعد اكل ماريد المح جهرتها هالصفيره كتلت ابني ورتاحت النكسه
اني شلي دخل ابموتت ابنج هذا قدره
زينب .فدوه رهف اسكتي ما صدكنه امي طلعت اليوم من غرفتها وكلت ويانه
لا تردين عليها نعرف انتي مالج دخل هو بعد انفجار صار وكوم سيارات راحت بيها خوما بس اهلنه الي انكتلوا
زينب احجي هالحجي الامج اني شلي دخل ابموتت ايوب
هو خوما بس ايوب مات
اني هم فقدت امي واخويه مو كل ما تشوفني تكلي انتي كتلتي ابني تره اني هم اتعبت ونفسيتي زفت صارت
محد يحس بيه اني اكثر منكم متأذايه افقدت اتلاثه مو واحد
طلعوها بره هالنكسه الصفره
اي يوووووم راح تطلع
تعاي رهف خل نطلع
لا شو ما اطلع
فدوه امشي لا تسوينه مشكله اكبر ويروح جراح يسمع تره الرجل بعده مطالع نايم ابغرفته
واني شسويلكم الكل شايل مشاعر غيره ولا واحد شايل مشاعري اني
تعاي فدوه تعااااااي
طلعنه للكراج سحبت الكرسي وكعدت
زينب .هسه اجيلج
اشويه وجابت صينيه ريوك
هاي اني وياج راح نكعد ناكل
بس اني ما اشتهي ازوهرت قبل اشويه
بسج عاد احنه اشكلنه وشحجينه البارحه
مو كلج جراح بطلي مال ما اشتهي علمود صحتج وصحه الطفل
دناكل وطلع جراح بس صبح علينه وطلع ابوجهه السيارته
باوعلي بنظره ما اعرف افسرها
نظره سعاده بسمه اشتياق لهفه ماعرف كانت غير كل النظرات
حسيت بيها شغف وحب وحنين
ظليت حايره معقوله اني فكرت بالنظره هيج لو هو فعلا جانت نظرته الي هيج
عفت السالفه معلكه ابفكري وكمت
كمت اشتغلت هالاكدر عليه وكتلها الزينب تاخذني للدكتوره
اي ميخالف ساعه ٤ العصر انطي خبر الفهد وياخذنه بس خلي اكول بالاول الجراح
خابرت وكالتله الرجل ما اعترض
اني كملت شغلي ورحت مددت بالهول
واسمع هاي الأمايه تحجي عليه وتدعي
ردت اكوم ازفه زفه معدله بس اتعوذت من الشيطان ورحت الغرفتي
رباب ..رهف نايمه لا صاحيه تعاي
اكلج حب محتاجتج بشغله بسيطه
فدوه بس امانه الله لا تحجين لاحد خلي بس بيني وبينج
اي يمعوده احجي وكعتي كلبي
اول حلفي ما تحجين الاحد
هاي اشبيج رباب شنو متعرفيني
اعرفج بس لتاكيد
يابه والله العظيم ما احجي لاحد
اكلج تذكرين جواد هذا الولد الي اجه ابفاتحه ايوب
وجان لابس اسود الي اخذ الصواني مني هي والخبز
لا والله ما اذكره لان ماشفته هو اني جان شلون حالي
المهم جواد يكون ابن صديق جراح
ابو مرتضى ويعرف الولد هو وياهم يشتغل بالعلوه
اي اشبي 😐😐
ههه ماعرف شكلج
كولي رباب لا تستحين ..يعجبج
اي رهف اموت عليه والله احسه قطعه من كلبي
زين هو يحبج .اي هو هم يموت عليه
اي شكو بيها الحب مو عيب ولا حرام من حقكم تحبون بعض
بس رهف منو يخليج الف واحد يذبحج من يسمع
لان احنه اهنا عشاير ومايصير
بس الحب مو عيب رباب ومن حقج تختارين الي تردي
حبي عدنه هذا الامر ميصير كبل تنذبح البنيه وما تزوج غير ابن عمها
زين اني هسه شنو المطلوب مني
اريد بس تلفونج حتى اكدر اتصل بي واحجي وياه عفيه
بس رباب هاي سالفه صعبه
والله مره وحده باليوم كله احجي وياه وما اطول ثواني وسده
رباب صدكي شي صعب هذا
فدوه انتي دبريها بعد من يمج اترجاج
اوك بس مره وحده تتصلين و مو يوميه من انحس البيت هدوء وجراح ورضا طالعين انطيج خبر تجين وتخابري
اي حبابه 😘😘😘😘
بعد ما بوستني خلت وطلعت فرحانه
صح اني خايفه من هالشغله لان مسؤليه بس هي هم خطيه حقها اتحب وتنحب وبالكي الله يجمعهم سوه
صارت بالارابعه كمت حضرت حالي البست عباتي ورحت الزينب
هااا زينب وين فهد صارت اربعه وربع
يمعوده عطلان وجاي يصلح السياره يكول انتظروني اشويه واجيكم
اي عادي ننتظره
للخمسه وفهد ما اجانه ولا سياره بالبيت حتى ياخذونه للدكتوره
بالخمسه وربع ..هااا زينب شنو السالفه
والله علمي علمج شو ادك عليه ميجاوب
دحاولي مره ثانيه بلكي يجاوب
هاي يدك وماكو اووووف والله تعب كلبي فهد من تصرفه هذا الاعوج من ندك عليه ما يجاوبنه الف واحد كله بطل هالطبيعه النكسه وماجاي يبطلها
هاي شكو ليش حسج للباب واصل
هله جراح
يمعود ماخذين موعد من الدكتوره وكالت احنه ثاني اسم وصارت الساعه خمسه وربع وفهد ما اجانه يكول عطلان وهالتأخرنه عليها
والبنيه تريد اسوي سونار لطفل
ليش هي حاسه بشي
لا بس الدكتوره كالتلها راجعيني قبل لا يتوفه ايوب بعد شهر واجه موعدها
يعني اليوم ضروري ترحون
زينب ..باوعت الرهف
رهف ..اي عفيه لازم اليوم بس اذا ماكو احد ياخذنه الغيها
يله امشن خل اخذجن انه
امري لله
لا ابو يقين انت ارتاح احنه ننتظر فهد
هو مو كال عطلان
اي
معناها ما يصلحها لليل ..امشي ولا تدوخيني
اخذنه جراح لدكتوره سوتلي سونار وشافت نبض الطفل الحمدلله زين وطلع جنس الطفل ذكر
تحمدت ربي ع تمام الخلقه رغم كل الصار بيه بس ربي عوضني بطفل كامل الخلقه وصحه زينه وان شالله من ينولد اسمي احمد ع اسم اخويه
بس الدكتوره خوفتني من شغله ارتفاع ضغط الدم
كالت هاي مال احباله
زينب هم سئلتها كم سؤال ع صحتي وصحه الطفل وكلشي بخير
د....بس من اتفوت بشهرها تجي حتى احددلها الولاده طبيعي او عمليه لان راح نعتمد ع صحه الام
كتبتلي كبسول فقر دم وكالتلي استمر عليها حد موعد الولاده
بعدها طلعنه وزينب حجت ويه جراح وطمنته ع وضع الطفل
صعدنه بالسياره وجانت حدود الساعه
٨ بالليل
زينب .جراح هذا مو طريق البيت
ادري ماريد ارجع للبيت خل نكعد نتعشه عالشط شتكولون
زينب .اي والله ياريت صارلنه فتره طويله ماطالعين شتكولين رهف
ابكيفكم
جراح .اشبيج حاسه بشي
لا عادي 😶😶 كاعده فقط
مو اشوف ردج بارد معاجبج نروح لشط
مو كتلكم ابكيفكم
لا اريد اسمع رأيج احجي نروح لو نرجع
زينب.. رهف احجي لا تظلين ساكته
😔😔اي نروح
وصلنه المكان مثل الكازينو عالشط حلو ناس بي كاعدين
اختارنه جراح طاوله وكعدنه اني صرت مقابيل الشط بالضبط ظليت صافه عالشط وكلبي يسولف الحاله
🌹هناك ذكريات لا تموت رغم موت اصحابها
لايمكن ان تنساها شي يصبح...
او من المستحيل لان بعض او اغلب...
هذه الذكريات التي تمر بها تكون من الاشياء التي...
اثرت في حياتك والتي تركت فيه بصمه او الم او جرح...
حبك لي كان اكثر من المعقول
لكن انا ذنبي حبي لك قليل
لا انسى كلامك وهمسك ودلعك لا انسى
انت كالنقش ع الحجر
لا يمكن ان انساك مهما حصل تبقى مخزونه في ذاكرتك.في عقلك وفكرك تكون محفوره
و قد نسيتها في لحظه او ثانيه يمر امامك...
موقف شبيه لموقف حصل لك
في هذا الحظه ترجع ذاكرتك. للخلف
وتتذكر كل مااردت ان تنساه وتحاول مره اخرى تنساه...
وفي لحظه
تتالم وتحزن وتكون في داخلك حصره يتمزق فيها...
كل مافي داخلك وتقول لما انا يحدث هذا معي لما انا...
وكنت معهم على اجمل مايكون هل هذا جزاء الذي...
استحقه هل هذا احسان الذي عملته من اجلهم هل...
استحق كل هذا العذاب والالم الذي تركوها الي لماذا...
انا اعيش بذكرياتي الذي لاتموت وهم يعيشون حياتهم...اي حياه لا ممات يا ايوب وايو ممات هذا لماذا رحلت لماذا نقشت بصمه الم في داخلي وهل نسيت ابنك ماذا اقول عندما يأتي ويقول اين بابا ماذا
وين صافنه متاكلين
هااا اسفه منتبهت عليكم
اي اكيد غير جنتي سرحانه وين سرحتي بخيالج سولفينه
لا شي بيني وبين نفسي
اوك يله اكلي
زينب.....رهف تره المكان حلو ياريت كل فتره والثانيه اجيبنه اهنا جراح
ان شالله تردون ادزلكم شي ثاني
لا هاي خير من الله
انتي رهف تردين شي ثاني
لا شكرا ..شو ما تاكلين
لا دا اكل
انه اشبعت تردون اوصيلكم ع جاي وياي
زينب اي والله يخوي كون يعدل الراس لان راسي دايخ
اكلنه وشربنه جاي وظلينه كاعدين بس
واني عيوني عالشط ومنظره كل اشويه ارفع عيني اشوف جراح صافن بيه والله حتى ضجت ليش يباوعلي هيج شنو متيه واحد بخلقتي
جراح ..اباوع عليها هي صافنه عالشط وبداخلها كلام ما مسموع تحجي وي حالها وتنتظر رد من الشط
صفناتي عكس الناس ماكو مثلهن
انت الوحيد البيك صفناتي كلهن..
يله انكوم لو بعدجن
اني من كال نكوم اول وحده كمت اريد ارجع
هاااا رهف مستعجله عالرجعه جنج
اي والله تعبت حيل
ياله امشونه
زينب ..خوما حاسه بشي
لا والله ماكو بس تعبت اريد امدد ع ظهري لان كام يوجعني
اوك حبي هسه نوصل ورتاحين ابغرفتج
وصلنه ومن دخلنه سمعنه امي مسويتها مناحه ونسوان اعمومتنه يمها كاعدات
جراح .السلام عليكم
ردت عليه السلام
يمه خيرج تره بعد عشر تيام للاربعين
اي وانت شرايد يعني ما ابجي ونوح ع اوليدي شني خايب شبساع نسيت اخوك
يمه ما نسيته بس بسج بعد كافي ترانه كاعدين وياج بالبيت نحيبح تعب انفسنه انه ورضا والبنات حتى جدتي وايوي
بسج كافي يايمه النحيب والتولول مايرد الراح
اسكت ما يخصك انه ابجي ولطم ع نظر عيني الكتلته ودزته البغداد
كون هاي الموته الها موش اله
هي عايشه تاكل ومتونسه وانه ابني لفته التربان
جنت واكفه يم الباب بالاول ما ادخلت لان مالي خلك اسمع نحيبها
بس من كالت كاتلته هي واهلها بعد فاض بيه الصبر والسكته
دخلت عليهم بالمجلس وهلهلت عليها كل هلهوله اله بردت نار كلبي بيها
كافي عمه تره تعبتيني من مات لليوم تكولين كتلته وما فكرتي ولو لحظه بأن المات وياه امي واخوي
لبعلمج تره امي واخوي اعز الي من ابنج
الام والاخ ما يتعوضون بالدنيا بس الزوج يتعوض
كافي يكلج عالميت بس اطلب الرحمه
وذكر محاسن موتاكم
وانتي من ماتوا اهلي لليوم
ما خليتي احجايه بنفسج ما حجيتيها عليه او ع امي
بس ماكلول غير حسبي الله ع كل ظالم
بيت الجلاب منو الضالم التقصدين
والله يعمه صاحب الجريمه يتحسس
كافي رهف اخذيها زينب وفوتي جوه لاتظلين ترعدين بالبيت اكو زلم احترمي المكان
هو انتوا خليتوا بيها احترام
😤😤😤😤 كتلج لا تظلين تراددين روحي الغرفتج وسدي بابج وكعدي
رحت واني طافره روحي ودمعتي بعيوني 😢😢😢😢
والي اشوفه اكبالي يمكن اله اشرب من دمه
لان فعلا بزعت ومليت كل احجايه وكالت الكتلته
عبالك اني دزيتله المفخخه هو لوما امي واخويه سوده عليه راحوا وياه
لوما هو متهور مجان راح بيها
ربي كافي بعد اتعبت كافي
مددت ع جربايتي وندك بابي
كلت ادخل وشفت رشا
كمت عليها وحضنتها ماعرف حسيتها من ريحه اهلي
حضنتها وبجيت بحركه 😭😭😭😭
اشبيج رهوف
رشا اريد ارجع البغداد تعبت رشا ماريد ابقه اهنا موتوني محد يكول الله يعينها بس تسمعين الكلام الجارح والدعاوي من عمتج ام جراح
ولا تستحي ولا تكول الراحولي هم اهلي وزوجي
عبالك عدوتها اني كل كلمه اسمعها منها تهد الحيل
رشا ساعديني خابري ابوج خلي يجي اهنا وياخذني وياه البغداد فدوه
والله يارهف شنو بيدي عليج
اني اتمنى اساعدج بشي اتمنى ترتاحين بس انتي لا تيأسين من رحمه الله ع ساعه الفرج
انتي اهنا عايشه تاكلين وتشربين وعندج اليصرف عليج
اهناك مو الج منو يصرف عليج لا فلس ولا عانه حتى ذهبج ميكفيج تعيشين مرتاحه فتره طويله
طبعا رشا تحجي وجان اتوعيني ع نقطه جانت تايه عني ومأجله طلعتي من البيت
اني ناسيه ايوب ضام فلوس بالكنتور وذهبي اني خير من الله
انتظرت رشا تطلع وقفل بابي واعرف شكد عندي حتى ادبر وضعي وسوي الشي الاريده
