رواية تحت ظل السعف الفصل السابع عشر بقلم ميار
:انا الماشوف غيرك وسط هاي الناس؟
جنك منخلق بس انت بلكوكب
ايامي البدونك كلهن استنساخ
اتعب وانقهر لو انقهر واتعب
كتاب الدنيا اذا موحبك الموضوع؟
يحرم ينفتح يتطبك وينذب
___♕_____
♚رباب♚
- مددنه نريد انام وما نسمع غير صوت صياح طفرنا كلنه
طلعنه للحوش الكونه بديوانه طلعت ريام ورانه شمرت علينه شالاتنه وكفنا كلنه يم الباب الداخلي ونسمع جهاد
صوته وهو وفرات عالي دحكت حتى امي وكفت تتصنت
ما افتهمنا شنو العركه الي بينهم الا ريتاج فتحت الباب
شويه وادحك عليهم بتك عين وهذا جهاد غادي نار يغلط على فرات ووسام بس ما تحمل كلامه فرات وصاح بي
فرات:: كااافي احترم نفسك جهاد لا تنسى اني اكبر
منك وانت تدري بيه اني شنو لا تظل تلوص بحجيك
جهاد:: ولكك بعيني شفتك صافن بعيون اختي مو
فرات الي اعرفه شايفني مگرن موو انت الي گلت
شلتها من بالي ويين حجيك عبالك تغفل عني سالفه
من ذاك اليوم بالمستشفى واني اشوفك عينك ما
تشيلها منها شوف فرات حلم تحلم انطيها الك انت
الي تنازلت عنها وجيت طلگتها واني گتلك لا تتخلى
وياك للموت فاطمه ما تصير لغيرك بس شسويت
هاااا شسوويت جيت وطلكتها وانجبرت تقبل بهلچلب
فرات:: خلصت
جهاد:: لا تستفزني فررات لا تستفزنيي
رباب:: بعده فرات ما حاجي دفعنا ابوي وطب وفرات
ضحك بقهر وتالي سحب جهاد من ياخته بقوه وحجه
فرات:: هه عجل اسمع وركز زين يا ابن عمتي يا رفيج
دربي امك هي الي دزت فاطمه حتى اطلگها عبالكك اني
الي ردت اطلگها ولللكك انزرف گلبي اني الي تأذيتتت والله
لوو ما هيي جايتنيي وتوسللتتت بيه حتى اطلگها ورااس ذاك الغاليي فلااا اطلكك ولكك عشتت بضيممم گلبي
شتحجيي انتت تريدني اجي واگلك امك هي الي شالت
خطيتي ولككك والله العظيم نفسي بيهاا رايدهاا حرمتني
منها شحجيلك والله شگت گلبي يوم شفتها انزفت لغيري
امك جهاد اممكك جدامي وتكوللها اذا اخذتي فرات اتبرى
منج جايني تحاسبني على نظره روح حاسب اهلك حرمتوني
سعادتي شليتو حالي لكك ظلمت بسببكم شحجيلك جهاد
-كلنه واكفين ومصدومين بفرات يكسر بالگلب كل هلـ عصبيه ويحاول يكتم الحجي بس وازاه جهاد كعد بالگاع
وحط ايده راسه وتفاجئنا لا والله انصدمنه من صار يشهك
ويبجي و وسام ركض سد الباب بوجهنه وظلينه بس نسمع
حجيهم وكفت يم ريتاج ادحك من الشباك گوه نشوف جهاد
كعد گبال فرات ويحاجي وسحبه شبكه وفرات كن جان محتاج من يشيل الحمل منه شي مكتوم بصدره وطلع
♔مهى♔
وره خطوبة ريام بعد ما خلتني امي اطلع حتى من تمرضت
شكد ردت اروح ما خلتني وشدت وياي لان فرات رفض ابن
اختها جنت واكفه اسوي حلويه ضايجه وگلت اغير جو فزيت
من دفر علي الباب ودخل امبين زعلان سحبته اريد احاجي
-دكف شبيك منو وياك
كعد بالگاع ويأشرلي ما افتهمت غير يدور ابوه كعدت وسحبته لحضني امسح دموعه واحاجي.. ابوك يروحي يم
عمو وسام تروح يمهم لو تظل يمي لا تبجي سبع انت كوم
كومته غسلت وجهه ودخلت رحاب هو شافها حاطه حمره
غمها وطلع وهي تكول جاهل تزعل اذا علاوي غمها عافتني
وطلعت هاي هم مطنكره لان تأجل عرسها رجعت اكملت
كيكه بارده احبه حيل اكسر الكعك ابو الجاي واحط فوگاه
الكريم واخبطه واحطه بالفريزر بين ما يبرد اخذها واروح
يم اخوتي العب وياها ابلي لو اكعد على واهسهم اقره قران
لل11ونص وماكو منهم جيه لبست العبايه واخذت كيكتي
وطلعت لبيت فرات دخلت دحكت بس شحاطه وحده عرفتهم بعدهم ما جايين دخلت للبيت لگيت بس فرات
مدد علـ قنفه عفت الكيكه على الميز وهو فز كام من شافني
فرات:: هلا ببنية گلبي هلا بالحنينه
-هلاوو هاي شبيك ليش وحدك وين الولد وعلاوي جان يدور عليك جاكم صددك سويت كيكه بارده ناكل سوه
فرات:: بعد روحي والله ما مشتهي وعلاوي نام توه
مهى:: ماكو ما مشتهي غير انتظرتكم تاكلون وياي
كعدت گباله شبيك فرات شنو القاهرك صاير شي
فرات:: ماكو شي بس تعبان لا يظل بالج
مهى:: عجل اروح اني وانت نام ارتاح حتى انگعدك علسحور
فرات:: لا تضوجين مني بويا بس تعبان والله
-لا والله ازعل منك
فرات:: ابنتي الغاليه
مهى:: كمت اخذت الكيكه وحطيتها بثلاجته وطلعت
حتى اني ما ظل الي نفس اكل رجعت للبيت صارت امي
بوجهي ما تحجي وياي بس شافتني طبت لغرفتهم واني
رجعت تمددت بغرفتنا ما جاني نوم وبالي ظل بم فرات
كمت توضيت وكعدت قران بالهول وتوه صدقت دخل
عمر وجهه ما يتفسر من العصبيه خفت وهو ومن شافني
كاعده نتر بيه
عمر:: انتي ليش ما نايمه
مهى:: احمم ما ماجايني نوم جنت اقره قران وهسه بس
اسوي سحور واصلي واناام صار شي شبيك زعلان عمر
عمر:: شووفي والله والي اسمو الله اذا اشوفج
وحدج بالمطبخ حتى انتي اكتلج ادري خدامه خما
خدامه وحظرت جناب اختج مصفطه وكاعده وانتي
تفترين وحدج بطليي بطليي چبن من منو خايفه
مهى:: صدك من گبل رمضان واني وحدي اشتغل هم عقاب
من امي لان رفضت ابن اختها وهم لان رحاب وره رمضان
ياخذوها من هسه مكعدتها امي حرت شريد اكوله گتله
-غير وره رمضان عرسها وتريد ترتاح
عمر:: وليش منطينها خارح القطر خايبه والله اذا
اهفج راشدي وهي المن منطينها مو لحسين شو
حتى شغل ما عدهم شنو راح يكرب على ظهرها لا
تظلين فاهيه بس لا هاي سوالف امج بسيطه هسه
عوفينه اسألج فرات شبي شو من جيه من بيت عمي
محمد وهو ما عاحبني وضعه شفتي حجيتي وياه
-ما اعرف والله رحت اكون نكعد سوه لكيته ضايج
ومن سألته كال لان تعبان ويريد يرتاح واني عفته وجيت
عمر:: اكص ايدي اذا السالفه ما بيها جهاد لو فاطمه
-انت تروح وترجع على فاطمة خطيه
عمر: عمي يحبها ورايدها بس اخخخ من امج وعمتج
شيالات الخطى وحده جنها طاووس والثانيه استغفرالله
مهى:: ظليت ادحك عليه كتله يعني شنو؟
عمر:: يلا يلا ادورين سوالف روحي سوي سحور وكعدي اختج بين ما اصيح اخوتج العشاق طاح حظهم وحظ حبهم
مهى:: ضحكت عليه عمر ابدد يقتنع بالحب وسوالفه خاصه
وره ما شاف شصار بفرات يكول لو اموت ما احب ولا اقتنع
رحت سويت سحور وكعدت ابوي وامي ورحاب هم كعدو
وجو الولد فرات ياكل بدون نفس ومن شافه ابوي گاله
جاسم:: شبيك ما تاكل
فرات:: مالي نفس ما جوعان مهى صبيلي چاي
-بس صبيتله الچاي اخذه وطلع وابوي من شافه هيج
ذب الخبزه ودار على اخوتي الظلو واحد يدحك علـ ثاني
جاسم:: شبي اخوكم يا هو وياه
عماد: ما ادري والله يابه وره الصلاه رحنه للكاع
وبعدين هو رجع لبيت عمي محمد بعد ما شفته
جاسم:: خاف ولد عمك غاثينه والله اطيح حظهم
مو محمد ما يرضى احد يحاجي ضناه انه هم ضناي غالي
-عمر ضحك وگاله
عمر:: هههههههه من شوكت يابه غاليين
جاسم:: ليش ولك يا يوم صرت ضدكم لو رفضت الكم
طلب غير مرات انتو ما تمشون عدل ومن حگي انبهكم
عماد: اني رفضتلي
-شوكت ولك
عماد:: من گتلك اريد بنت عمي محمد ما وكفت وياي
جاسم:: شسويلك هاا شسويلك بنت عمك هي رفضت
ومن حاجيته علمود مره بمره ما قبل تريدني اخرب
قسمة اختك حتى ترضى انت تسد حلكك هسه بين ما
ياخذون اختك وارد احاجي عمك ولكم شعندي غيركم
عماد:: بعد گلبي يا يابه
مهى:: ادحك عمر ما اهتم رغم ادري ابوي عزيز عليه بس
عمر من يشوف ابوي وطمعه بالمال ينقهر منه وشك جهاد
خلاه هو هم ما مرتاح ولهذا السبب اخوتي يساعدون جهاد
حتى بلچي يعرف منو وره گتل اخوه حارث ويبرون ابوي
وره ما كملنه السحور رحاب الله هداها ونظفت المطبخ
توه كملت صلاة الفجر دخل عمر دحك رحاب جاي تقره
قران عاد عافها وجيه يمي وگال...
عمر:: خويا ولو تعبتي اليوم بس شفت فرات محظر
ملابسه مالت الدوام يريد يكويهن ما ترحين تكوينهن
مهى:: ياا سوده علي شلون هو يكوي ليش ما گالي
يلا بس البس عبايتي واجي رحت ركض اخذت العبايه
وطلعت ويا عمر دخلنه وهو بس وصلني راح للبيت
ذبيت العبايه وكفت اكوي السكراب وكويت الاب كوت
كملته وحطيت بروشه مكتوب عليه (الممرض فرات جاسم سلمان) كملت ادحك على ملابسه حبيت هاي
المهنه من وره فرات وجهاد ان شاء الله معدلي يقبل
كلية تمريض واذا اهلي وافقو ادخل هذا المجال..
خلصت الكوي جاي ارجع الأوتي دخل فرات..
فرات:: هاا بويا شسوين
-كويت ملابسك عيوني
فرات:: ليش كويتيهن يابه اني اكويهن
مهى:: فرات لا تزعلني منك شمسويه غير اختك اني واحظر
ملابسك دتعال ناملك ساعتين ارتاح گبل لاتروح للدوام
فرات:: اي والله قفلت ولو والله مالي خلك اداوم
-اخذ اجازه اذا تعبان
-لا يابه ما اريد اخذ هسه مخليها للضروره يلا اخذ
مهى::مدد يريد ينام واندك الباب كام سوده علي ما خلو
ينام هسه وكتها وكفت يم الشباك شفت جهاد واكف گال
جهاد:: شنو تريد تنام؟
فرات: صدك جذب جهاد عجل شنسوي يابه ورانه
دوام شنو حظرت جنابك ما اداوم والله اطيح حظك
جهاد: اريد احجي وياك مو وكت نوم اني هم ما نايم
-تعال خرب بجهرتك
جهاد:: ساكتلك لان اكبر مني ب9اشهر شوف شلون احترمك يا كلب عود شايل خشمك علي والله اخذ علاوي منك واخليك اتظل تتوسل بيه وما انطيه الك
فرات:: هههههههه دفوت هسه واني اعلمك شلون تاخذه تعال تفضل عريس جيس حب خفت وجهك اي والله
مهى:: دخل جهاد يضحك ادحك فرات بس حاجه جهاد تغيرت نفسيته وكام يضحك وكف جهاد باب الهول وسأله
جهاد:: شنو اكو احد من اهلك
فرات:: ادخل بالاستقبال نكعد نحجي قابل اكعدك ويا اهلي
جهاد:: انجب لا عجل نكعد اهناي كلمتين وانولي انام
-كعدو على عتبة الباب طلعت صرت قريبه من الباب
اريد اسمعهم شيحجون ظلو ساكتين لحد ما حجه جهاد
جهاد:: خالي محمد حجالي كل شي ليش ضميت عليه فرات جان ما صار الي صار ما جاي افتهم امي
تعبتني شنو الي غير امي فرات امي ما جانت هيج
تفاجئت بتصرفها ويا ريام تالي طلعت هي الي وره
زواج فاطمه من هلـ جلب بسام امي دمرت بنتها
بيدها واني هاي السنين الومك اذا شفت اختي تعبانه
بس...
فرات:: جهاد لا بس ولا شي لا تلوم نفسك ولا تحجي
سالفه انتهت بعد واختك الله خلصها من هيج عائله
لا تشوفني تأذيت عبالك ازعل منك لا بس انت تدري
بيه انسان صعب انسى المهم يا خوي هسه ركز بروحك وكمل تجهيز بيتك جهاد لا تأخر زواجك كل شي توقع يصير ويجوز اكو من راح يخبث حمدان ما مرتاحله ولا امك يجوز تسكت بس من تجيبها بيتك
محد بعد اله حق ولا احد يكدر يسوي شي وكلنه وياك
جهاد:: بعد روحي اخوي الغالي يول يا جلب وجعت
گلبي من شفتك هيج تعبان وتضم عليه انت والجلب وسام
فرات:: اخخ ولكك حيوان ايدك
-رفعت راسي من سمعت صوت الضربه شفت فرات
لازم زنده ويغلط على جهاد عرفته ضربه على ايده
عفتهم ودخلت لغرفة فرات علاوي نايم هي حاره بس
خفت عليه غطيته نايم گبال المبرده تمدد يمه وما ادري
بروحي من نايمه وما كعدت الا ايد علاوي يضرب بيه
يريدني اكعد كمت وياه عرفته جوعان ورحاب ما تسويله
اخذتله ورجعت لبيتنا ماكو احد وكفت اسوي اكل لعلاوي..
ونسيت اليوم النتائج تطلع حطيت اكله جدامه ورحت اصلي...
❀ريام❀
من كعدت من النوم واني شكد ما متوتره علمود النتائج
بطني تمغصني والخبيثه ريتاج كل شويه وكفت يمي وگالت
ريتاج:: طلعت النتيجه الحكي ريام
ريام:: كافي جذب تره وكعتي گلبي ولج صايمه لا تجذبين
ريتاج:: اخخ يمه هم زين نجحت گبل رمضان
ريام:: عفتها وكعدت يم عمتي ننتظر حسين لو حامد حتى
يشوفولي نتيجتي وهذوله لهسه محد بين منهم ولل2يلا
جو وكفت استعداد وحامد خطيه من شافني بس غسل
اديه ورجليه جاب حاسبته وكعد يمنه واني وكفت فوك
راسه خانگتني العبره وعيني عليه حتى هو وتوترته جيه
عمي والولد وتگابلو حسين ورتاج يصنفون عليه
حسين:: عليش خايفه عمي حتى لو تصيرين معلمه
هم نعمه مو زين درستي الله يرحمك جدي لو عايش
تحلمين تشوفين باب الحوش وعود دارسه بغداد
ريتاج:: اي والله هو وين اكو وحده بعشيرتنه بعمرهن
درسن خطيه جانن حايرات بالغنم وهسه ريام ومهى
اول اثنين بلمتنه يدخل كليات تهي بهي الله يرحمك ياجدي
حسين:: اي بويا الناس ما ظلت مثل گبل البنات ما يندلن باب الحوش هاي عمتي سهام جانت ما شايفه
شارع وهسه بنت اخوها راح تروح كليه الله يرحمك يا جدي تاهت الناس وراك الله يرحمه جان زلمه حووك
ريتاج:: اي والله الله يرحمك يا جدي
وسام:: اني اكول ليش ما اخليكم تلحكون جدكم
البنيه نفسيتها هي تعبانه انجبو واللصمو ولا نفس
حسين:: غير نتذكر محاسن جدنه
حامد:: كافي عاد تره شوشتوني اريد اركز
ريام:: غير لو يطلع اسمي احس حتى صخنت من التوتر
وحسين واكف فوك راسي وكل شويه وگال..
-الله يرحمك يا جدي
ريام: غير فور دمي درت عليه گتله كافيي حسين دخل جدك الجنه اليوم من وراك ادري ما تذكرت تترحمله الا هسه تره تعبتني وانت حامد ديلا عاد شوف اسمي غير
تلفت اعصابي وعمي جرني لحضنه وكتوفه تهتز يضحك
علينه وهذول ولا عبالك صحت بيها حتى وسام كام يترحمله
✿رباب✿
خطيه ريام ما ظل حيل بيها رغم شاطره وحتى البنات هي
درستهن بس ما الومها كلنه تلفت اعصابنه وحامد لهسه
ما طلع اسمها واكفين فوك راسه ننتظر ودگ تلفون وسام
وسام:: هلا ابو الجود
-ما نسمع شيحجي وكلنه ندحك عليه ننتظر يحجي
وسام:: لا والله ما شفنه
-سكت يسمع جهاد وعاط بي ابوي حتى يفتح السماعه
جهاد:: يابه شلون ما طلع هسه زياد طلع اسم اختنا
انتظر هسه اخابر زياد انت دز رقم بطاقتها لزياد
وسام:: انت رجعت لو بعدكم بالدوام
جهاد:: لا هسه بس نبصم ونطلع
وسام:: خوش يابه عجل هسه خلي اخابر زياد واشوف
جهاد:: اي تمام يلا مع السلامه
-الله وياك
رباب:: دگ وسام على زياد وكاله بس دزلي رقم بطاقتها
وصدك دزهن وظلينه ننتظر حتى ما سألنه على مهى ومروى نص ساعة كعدنه على نار ريام تكعد وتكوم فزينا
كلنه على اتصال زياد ووسام فتح الاتصال والسماعه وگاله
وسام:؛ هاا زياد بشر
زياد:: ولك شأبشر شخلي هاي هم درجات
وسام:: شسالفه ياخوي هسه عوف الدرجات المعدل شكد
زياد:؛ يابه استحي اكوله همزين البنت حصلت رجل
حتى على الاقل اذا ما تفلح بهاي تلفح بهاي معدل صدمه كارثيه ورايتهم ما توقعت هذا المعدل بس قدر
رباب خطيه ريام من سمعت حجيه ماعت روحه كعدت بالكاع وزياد مستمر لا هو كايل المعدل ولا هو ساكت
اخذ ابوي الموبايل من وسام واستلم زياد بالرزايل
محمد:؛ انت تلعب بعصابنه زياد والله اجي اطيح حظك البنيه صايمه شليتو حالها تحجي شكد معدلها
زياد:: ابشررر خالي الغالي والله يخالي بنت اخوك
الي هي جنتنا المستقبليه معدلها يرفع الراس
حامد:: دحجي عاد نعلل... اللهم اني صائم
زياد:: اعصابك حمودات معدلها 69
رباب:: يابه خطيه شصار بحالها خطيه حطت ايدها على
وجهه وتشهك يا معدل يرفع الراس خطيه شيجيبلها
احنه عبالنه صدك معدلها هيج كلنه انقهرنه وهو من
سمع صوت بجيها كام يصيح اخذ وسام الموبايل من الكاع
وگال...
وسام:: شكوو شبيك ولك
زياد:: ولك وسام هاي كل عقلها تبچي تسمعني ريام
وسام:: انجب اي تسمعك شكو
زياد:: خويه رياام صدك جذب ورايتهم اني جذاب
اني ابجيج من عمت عين العدو كومي خويا وهلهلي
معدلج 96 غير معدل يرفع الراس وعلي ورايته
-من قهرها كامت اخذت الموبايل وگالتله
ريام:: عفية زياد هسه شكد معدل عليك بروح اهلك
زياد:: يابه والله معدلج 96 الف مبروك خويا وعذريني بچيتج
ريام:: هههههههه الحمدلله يارب الحمدلله الله يفرحك
مثل ما فرحتني ذبيت الموبايل وحضنت عمتي وعمي
فرحتني ما انطيها لاحد باركولي الولد وجن البنات حضني
ادحك عليهم فرحتهم من فرحتي واكثر احمد الله رزقني
وعوضني باهل مثل بيت عمي محمد كمنا كلنه على فطور
عمتي هي الي سوت التشريب وانترس البيت فرح وبهجه
كملنا الفطور واني حتى ناسيه جهاد جابلي موبايل عايفته
الا رباب جابته الي شفت اتصال من جهاد اخذته منها وهي
وريتاج اثنينهن فوك راسي رديت مدري ليش خجلانه
-الووو
جهاد:: هلا هلا بالناسينه
-احمم لا والله بس جنت بالمطبخ وما دريت بعدني ما متعوده على الموبايل وانت تعرف اليوم النتائج وحرك اعصاب
جهاد:: اي الحمدلله والف مبروك يابه دراجات ومعدل يخليك تصعد للسما من الفخر شطوره
- الله يبارك بيك
اريد اركز وياه ما تخليني ريتاج اتشرلي اسأله على مروى .. جهاد عجل ومروى شكد معدلها ما لحكت
اسألها
جهاد:: شنو اكو احد يمج شو اسمع صوت نفس
- دحكت عليهن يأشرن حتى اكوله لا بسواني صعدت
عندي الخباثه كتله اي والله البنات واكفات ويسمعن
جهاد:: يلا يابه اخذي راحتج بس حبيت اباركلج
ريام:: هلاوو ..
-سديته وهنه سون هجوم عليه ركضت للبيت صار بوجهي
عمي اختليت بظهره وهو حط ايده عليه عود يحميني ويضحك علينه فتح النه ايده ولمنه ثلاثتنه بحضنه الحنون
محمد:: اووف عشره واكولن گليلات يمه البنات
ريتاج:: هم راح نرجع اثنين بابا
محمد:: لا تمردين گلبي يولي والله لو ما خطيتجن
فلا ازوج وحده شيسوه البيت بدون البنيات حبيباتي
امنه:: هااا محمد صارن حبيباتك عحل واحنه وين
-ضحكنا من دخلت عمتي وتخصرتله اداهر بي وهو يگوللها
محمد:: انت الگلب ودكاته ام سام الغاليه شعندي غيرج حال مال اضحك عليهن محد ياخذ مكانج
امنه:: اي عبالي يلا ولجن وخرن و روحن ديرن الفطور
ريام:: ضحكنا على رد فعلها اول مره اشوفها تغار على عمي
حظرنا الفطور ودخلو الولد خطيه وجوهم شاحبه تعبانين
كعدنا ننتظر الاذان ريتاج عينعا ما تشيلها من الماعون
حتى التمره گبالها وطاست المي فد جوعيه ما تتحمل الصيام اذن وبدينا نفطر ادحك عليهم واصلي على النبي
عايله حلوه متكاتفه وگلب على گلب الله يفرق بينهم
فطرت وكمت صليت وطلعت بالحوش بدا الظلام يغطي
السما ادحك على السما فرحتي ناقصه محتاجتك بابا
ليش عفتني وحدي صح عمي ما مقصر وياي بس اظل
احتاج ابوي ويا تره امي وين عايشه ميته واذا عايشه
تذكرني ما سألت عليه ما معقوله ما درت بابوي توفى
حسرة بگلبي تهد جبال جنت متأمله اذا تزوجت راح
ارتاح بس بعدين ما مزوجه وعمتي ما تريدني خايفه
احس حياتي مجهوله وشنو راح اشوف بعد دخيلك
يا رب ساعدني سهل امري ما اريد جهاد يبقى بيني
وبين امه فزيت على ايد رباب مسحت دموعي وكفت
رباب:: شكو ريام ليش تبجين
-ماكو شي عيوني بس هيج اشتاكيت لابوي
رباب:: ليش ما ترحين تزورينه وترتاحين
ريام: ازوره بس مو هسه من اتخرج تعاي ندخل يمهم
اخذتها ودخلنه واني بداخلي اكول ما ازوره الا ماخذين حقه
♛فاطمه ♕
وره نتائج البنات وفرحتنا بيهن صح اعلاهن ريام بس
تمنيت ثلاثتهن سوه بس مروى معدلها انزل منهن
مروى معدله 80 ومهى 94 ماشاء الله عليهن ما توقعنا
هيج معدلات ابوي بنفسه راح وجاب لمروى محبس هديه
فرحان بيها كاعدين نتسحر كلنه وامي تاخرت يلا جت من
كعدت ابوي حجه وياجهاد وبنفس الوقت حسيته يقصد امي
احمد:: شو ماكو تجهيزات فرش لبيتك جهاد ادري
الي يجيكم تكعدونه بالكاع شتنتظر تره ما ظل وكت
جهاد:: والله يابه شمعرفني بهاي السوالف غير هذا
شغل النسوان والظاهر محد اله نيه يسويلنه فرش
فاطمه:: ادحك عليهم ابوي يرفع وجهاد يكبس يدقون بامي
بس هي ولا حجت حددو عرس جهاد ثالث يوم العيد وكلنه
مخبوصين ما ظل شي يلا 15يوم خطيه عمتي حايره بتجهيز
ريام مسويتلها هم جودليات اثنين ومخاد ما مخليه شي
كملنا سحور وغسلت المواعين بين ما اهلي صلو وكل واحد راح لمكانه كملت ورحت صليت ورجعت لفراشي
ما جاني نوم اليوم كلت اروح ويا ريام هم اشتري جم شغله
جاي اگلب بموبايلي دخلت على وتساب رحت على محادثة
ريام متصل گبل طلعت ورحت لجهاد هم طلع متصل ضحكت عرفت لو يتخابرون لو يتراسلون جهاد تغير هاي الفتره امبين عليه متونس الحمدلله الله يسعدهم توه
اريد اسد الموبايل جاني اشعار دخلت على واتساب رساله
من فرات ترددت اجاوبه رغم ماسحه رقمه بس من صورته
عرفته ظليت صافنه اريد افتحه واخاف بس فضولي كتلني
فتحها جان داز شعر محمد مهدي الجواهري كاتب
كأنَّ بعينيكِ ياقوتتينِ .. صاغهما جوهريٌّ جَلاولو لم يُخبِّرْ بريقُ النبوغِ .. بعينيكِ عن مثلِ سفعِ الذّكا لنَمَّ الجُحوظُ على شاعرٍ .. بعيدِ الخيالِ عـنيفِ الرؤى
فاطمه:: ظليت صافنه ما اعرف شكتب وكل ساع اقره
الشعر حتى حسيت حفظته ادحك كل شويه يطلع ويرد
اخر شي مل و رجع هو كتب
فرات:: ما راح تردين حگج يابه بس وداعت علاوي
گضيت سنين عمري على بصيص امل ريحيني أمليني
فاطمه::ظليت اقره برسالته ما اعرف شرد عليه ما عندي
شي أمله بي گبل جان حياتنا واحلامنه نبنيها سوه بس هسه
شبقى من يوم الي تزوجت بي وخلفه ما خلفت عليش اظلم
فرات ويا اني ابن عمي ما تحمل وحگه الضنا زين الحياة
ذبيت التلفون ومددت ودموعي تچري اني عليمن اعتب
اذا امي هي الي جبرتني اعوف فرات لان مقتنعه محد
خله حارث يروح لبيت خالي خالد غير فرات وشك جهاد
بخالي جاسم خلاها تتأكد رغم تشوف جهاد شكد يحب فرات بس هاي امي اذا قفلت على شي مرات احس عمتي
ابتهال هي تحش براس امي بس استغفرالله مجرد ضن
فزيت على صوت الرساله دخلت للمحادثه جان كاتب
فرات:: فاطمه وداعت ابو راس الحار انتظرج
سنه سنتين عشره والله لو يكولولي تعيش وياها
ليله وراها تموت اقبل فاطمه اريد احاجي جهاد
بس خوفي لا ترفضين خلي ابالج وره عرسه احاجي
-فرات لا تحاجي اني زواج ما اتزوج رجاءاً بعد لا تراسلني
لا أملك ولا تفكر قسمه بينا ماكو عيش حياتك ويا غيري
شافها وظل شويه وكتب
فرات:: فاطمه صايم لا تفطريني هو اني اكدر اعيش
ويا غيرج عجل عليش جايج وج جاي اخون صاحبي
واراسلج وهذا ردت نعله على گلبي بيوم عشگج
فاطمه:: بعدني ما راده عليه تفاجئت من حظرني العبره
شگت زردومي وظليت الوب وبعد ما اخذت عيني نوم طلعت
بالحوش وافتره وعيوني ورمن من البجي رحت غسلت وجهي وكعدت بالحديقه حاضنه رجليه وادحك على النخل
صار الجو حار كمت دخلت جوه تمددت على القنفه اريد
بس انام ما اكدر اخذت الموبايل بلجي وخر الحظر بس
ماكو متت قهر غير كتلتني الملامه ظليت افتر بالهول شفت
ابوي مخلي موبايله على معرض الي بالهول اخذت وظليت
حايره مدري اخابر لو لا طلعت اسمه وظليت متردده توه
ادوس على الاتصال يرن واحس گلبي دكاته خانكتني توه
رد وفزيت...
-شجاي تسوين
