رواية بديلة اختي الفصل الثامن عشر بقلم خاتون الكعبي
تذكير
اوتار بستفزاز : دا اكلك تدلل خوية لأن اكيد انتة معتبرني مثل وحدة من اخوانك حتة دصخرني صح
محمد : لا غلط لا ابن امج ولا ابن ابوج منين اجيت اخوج ويلة اكوي بسرعة
اوتار : اباوعلة عافني وطلع ضربت رجلي بالكاع بغيض فعلاً مستفز ورحت جريت قميصة ونزلت الغرفة بيبي لأن بيهة الأوتي طلعت الميز مالتة فتحتة وشغلت الأوتي وبديت اكوي واني اشوفة من باب الغرفة واكف يم باب المطبخ يحجي بتليفون ويضحك حاولت اشكد ما اكدر اعرف ويامن ديحجي بس ماكو مسمعت اباوعلة رفع عينة علية وهوة مبتسم بسخرية خررب والله فشلة دنكت راسي بسرعة واني اكمل بكوية اباوعلة كام يحجي بصوت عالي اكثر معرف يمكن تقصد يسمعني وهوة يكول حبيبتي واي جايج هسة
وجذب اذا ما اكول ما اهتميت او مغرت حسيت اعيوني غرغرن بالدموع واني الغبية واكفة اكويلة كلت هيج واني احط الأوتي بنص القميص موخرتة الحد مشفت الدخان طلع منة وطفيت الأوتي وشلت القمصي واني اباوعلة ببتسامة احس روحي انتصرت علي صحت علي واني رافعة القميص الة وكلت
اوتار ببتسامة : محمد شوف اباوعلة فتح اعيونة بصدمة وهوة يشوفة وعاط بصوت عالي وهوة يتقرب علية ويسحب القميص من ايدي
محمد بعصبية: لجج هااي شمسوي عمية متعررفين تكووين
اوتار برود : اسفة بدون قصدي كلت هيج وعفتة ورحت للمطبخ اشعبالة الحقير اسكتلة ساعدت البنات بالعشة واني اشوف محمد يطب ويطلع مبين ايريد يحجي شي بس ميكد لأن امي والبنات يمي
خلصنة عشة وتعشينة بس محمد منزل مدري ليش واول مبدينة انشيل بالمواعين نزل محمد وهوة يلبس بساعتة وعطرة يعط باوعلي بمكر وابتسم كلبت اعيوني بملل ودخلت للمطبخ حطيت المواعين ع الكاونتر وصعدت فوك رحت بسرعة ع الشباك شفتة طلع معقول راح حتة يشوفة زين منو ومعقول فعلاًحبيبتة اشكد حاولت ما افكر بي او انسى بس مأكد شي بداخلي يرفض هل شي اعرف جرحني واعرف اذاني ونزلت من كرامتي ع مودة بس رغم كل هذة احبه ودا
احاول بكول الطرق اني انسى بس مو سهلة حب مراهقتي وطفولتي وكبرتي مستحيل ينسي بهل سهولة كلت هيج واني ارجع راسي ع تاج الجرباية وغمض اعيوني بقهر و..............
___________________
مرسلين
مرسلين ببتسامة : اي اني
شاهين بحدة : ومن سمح الحضرتج تنطين رقمي هااا
مرسلين : ليش شكو بيهة خطية رادتك اساعدهة وهمين انتة مهنتك تحتم عليك اساعد كول العالم مو ناس وناس اباوعلة سكت اشوية وبعدين طكاهة بضحكة قوية خلاني اتوتر وكال
شاهين : ههههه لج انتي تعرفين بشنو تريدني اساعدهة
مرسلين : اي تريدك اطلع كرايبهة خطية مسجون ظلم وعائلتة ظالة وحدهة
شاهين : وتلوميني اذا اكلج طفلة
مرسلين : اجيت ارد علي بس كام علوشي يبجي جريتة علية وحطيتة بحظني وكلت
مرسلين : وليش طفلة قابل كايلتلك روح ازوجهة خطية ابنية وطلبت المساعدة ليش مساعدهة حالهة حال الناس التجيك للم.. اووي وخرر صحت بألم واني اجر ابأيد علوش من شعري واكول
مرسلين : حقير ع خالك
شاهين وهوة رافع حاجبة : منو الحقير
مرسلين بأحراج : علوش
شاهين برود : ومنو خالة
مرسلين : انتة اكيد
شاهين : وليش يابة محقر ع الخلفج
مرسلين بعصبية : لا بس محقر ع بنتة يا حقيرررر
شاهين : طفلة ما عليج عتب عتبي ع ارباج شكلي لازم اعيد تربيتج من جدة وجديد
مرسلين بسخرية : اخي ربي نفسك بألاول يلة تربيني
شاهين وهوة يبتسم بخبث : اي ليش لا اربي نفس واربيج وياي شكو بيهة
مرسلين برود : المهم شكوت اجيب السيد واطلكني رسمي ترى مليت وكتلك من قبل يا اطلكني يا اكول الجدو
شاهين بستهزاء : كولي الجدو ما لازمج
مرسلين بتعب : شاهين
شاهين : همم
مرسلين : كافي والله تعبت والسنة الجاية سادس وما اريد شي يقلقني
شاهين : صارلنة خمس اسنين من عاقدين ليش مكلتي هذة الحجي قبل اشمعنة بهل فترة بالذات
مرسلين : شنو قصدك
شاهين برود : قصدي واضح خاف شفتيلج واحد صكط نفس اختج لهيج تردين تطلكين وتزوجي
مرسلين : اي شفتلي واحد وحبيتة وفعلاً اريدك اطلكني ع مود ازوجة فياريت اطلكني ونخ.. سد التليفون بوجهي قبل لا اكمل كلامي ابتسمت بقهر وشمرت التليفون ع الجرباية هاي ثالث مرة يشك بية وممكن فعلاً حقة بعد السوتة اختي انو يشك بية وبنفس الوقت سالفة الشك تقهر يعني يجي واحد ويتهمك بشي انتة ممسوي لا بي ولا علي فعلاً تنقهر وتحس لو شمسوي مستحيل ترجع ثقتة بيك كلت هيج واني ارجع اهز بعلوش الحد منام حطيتة ع الجرباية وبدية اقرة امتحاني صاحوني ع العشة بس كتلهم ما اريد وللتسعة اجت مرة اخوية اخذت علوش وكالت
زهراء : ترى الولد كلهم مجتمعين بالستقبال خاف تنزيلن
مرسلين : يا همة
زهراء : اخواني شاهين ومصطفى ووسام ولد عمو محمد واحمد وعادل وياهم
مرسلين بستغراب : شعجب كلهم جايين
زهراء : ما ادري بس فجئة قررو ايسون كعدة ع اساس ابيت جدو بس الولد كالو لا اهنا احسن وهسة خطية وسن الي دتعمرلهم بناركيل وسوي جاايات الهم انزلي ساعديهة بين ما اخلص شغلي
مرسلين : هزيت راسي بلا مبالا ولميت كتبي باوعت ع ملابسي برمودة سودة وتشيرت وردي ردت اغيرة انوب كلت يلة همة كاعدين بالستقبال خو ميدخلون للمطبخ كلت هيج ولميت شعري كعكة ونزلت جوة دخلت للمطبخ واني اشوف وسن واكفة ع الطباخ وتعمرلهم بالنركيلك ولازمة خاصرتهة ابتسمت وكلت
مرسلين : اصعدي فوك اني اكمل عنج اكيد تعبتي من الوكفة
وسن ببتسامة : لا حياتي عادي ما عندي شي
مرسلين :واني هم خلصت اقرايتي فصعدي ارتاحي مو زين ع النونو واني حكمل عنج
وسن : ههه مشكورة يعمري وتصبحين ع خير
مرسلين : ولو اجمعين كلت هيج ورحت ع الطباخ كلبت الفحم وطلعت صينية غسلت الستكاين وحطيتهن واول مأجيت اصبح دخل اخوية محسن ابتسمت واني اشوفة بس اختفت ابتسامتي واني انتبه ع شاهين الي داخل وراه وبعلت ريكي بخجل واني اشوفة يباوعلي ورافع حاجبة ومحسن باوعلي وكال
محسن : وين زهراء
مرسلين : فوك دتنظف اباوعلة حط الفحم ع النركيلة وشالهة وكال روحي صيحيهة الشاهين وعافني وطلع باوعت ع شاهين واكف اباب المطبخ يباوعلي وبعيونة نظرات غريبة مكدريت افسرهة خلاني ارتبك واول مردت اطلع من المطبخ كال بحدة
شاهين : اشون تنزلين هيج ما خفتي واحد من الولد يشوفج
مرسلين : ما ادري معبالي واحد حيدخل للمطبخ
شاهين بعصبية: مو هاي اني دخلت
مرسلين : بس انتة عا..عضيت شفتي الجوة واني استوعب كلامي ورفعت راسي علي اباوعلة يباوعلي ويبتسم بمكر دنكت راسي بسرعة وكلت
مرسلين بأحراج : اسفة وان شألله متتكرر يلة اترخص خووية صريت بسناني ع الكلمة الأخيرة وعفتة وصعدت فوك صحت الزهراء وكتلهة شاهين يريدج وكتلهة اصبلهم الجاي بطريقة ودخلت الغرفتي واني احس وجهي حيطك من الخجل باوعت بالمراية ع وجهي مصبوغ بالأحمر
نفيت كل الأفكار الراودتني علي وكلت مشاعر مراهقة لا اكثر ورحت غسلت وجهي بمي بارد وحضرت ملابس المدرسة وحاولت اشكد ما اكدر ما افكر بي بس ماكو اذن اذان الفجر واني بعدني منايمة كمت صليت ورجعت
المكاني وكل ما اغمض اعيوني يجي طيف شاهين ع بالي معرف ليش بس بديت اخاف من هاي افكاري لأن اعرف نفسي اذا تعلقت بي راح انكسر حطيت ايدي ع كلبي واني اكول
مرسلين : لا اتحبة لا تحبة ميستاهل حبك حيكسرك لا ادكلة لا تفكر بي اعتبرة شخص عادي كلت هيج وغمضت اعيوني بتعب دقايق قليلة مرت علية وغفيت و.......
___________________
شاهين
دخلت للمركز رحت المكتب الأمر حجيت ويا اشوية ورجعت المكتبي دخلت واول ما كعدت ع الكرسي اندك الباب صحت برود ادخل دخل نصر والبتسامة مرسومة ع وجهة باوعلي وكال
نصر : مشتهي يوم اشوفك متأخر
شاهين برود : عندك شي كولة ما عندك تندل الباب ما حاجة ادليك
نصر : هههه اعتبرهة طردة
شاهين برود : جنت راح اكلك اعتبرهة طردة بس اعرفك عار ماكو احساس
نصر بضحك : هههه لا عبالك ترفعت يعني اسكتلك ترى بال.. قاطعة شاهين وهوة يكول برود
شاهين : بشنو
نصر : هههه انسى ما اريد انطرد واني بعدلي اشكم سنة واطلع تقاعد
شاهين وهوة رافع حاجبة : ليش اشكد عمرك
نصر ببتسامة :خمسة وربعين
شاهين وهوة مدنك راسة ع الملف : ما شألله الي مثلك شابعين مي ورد صدك لو كالو العار ميموت
نصر : ضحكت واني اكعد اكبالة واكول
نصر بهدؤ : المهم ما كلتلي شمسوي هل صكط حتة سجنتة
شاهين برود: مالكم علاقة بس كون اهتميت بي مثل ما وصيتك
نصر : هههه مو بس اهتميت بي دلعتة اخر دلع بالنتل والسوط
شاهين : خوش بس ديربالك ايموت بيدك ترى يحسبو علينة زلمة
نصر : تأمر يلة طالع بس اخذ حذرك من الي اسمة حزام ترى جاي يفتر وراك ايدورلك الزلة
شاهين برود : هذة هم احسابة عندي بعدين
نصر : ليش سوالك شي
شاهين بسخرية : وشحدة يقرب علية ما عيب
نصر : ضحكت ع غرورة نفس الطينة هوة وجده الشاهين وطلعت من مكتبة و..............
__________________
مسلم
كاعد من الصبح وفاتح تك عين من النعاس وراية دوام وكل ساعة اباوع ع جهة ادرج بس ماكو مختفية الحد مكال عمي
ابو تقى : لعد وين تقى ام مسلم شنو ما كعدتيهة
ام مسلم : لا خوية كعدتهة بس خطية مبينة تعبانة وعدهة اصخونة خفيفة فخليتهة نايمة
مسلم بلقلق واضح : خل نأخذهة للمستشفة احسن يفحصوهة ويطوهة علاج خاف بيهة شي
ام تقى : لا يمة ماكو داعي ان شألله منا للعصر تكعد كولشي مبيهة
مسلم : تمتمت بكلمة ان شألله واني ارجع عيني ع الدرج وباوع علي بقلق اعرفهة من الزغر اذا مرضت تنتهي و.......
___________
اوتار
اوتار بعصبية : عود صدوك تحجين حتة اليوم ماكو
فجر : هههه لجج شنو مخلفتج وناسيتج وغير عروسة ولازم احضر الخطبتي
اوتار : لا اتخليني اسبج ومو هذة فادي امداوم اشعدج انتي غايبة
فجر : حياتي قابل هوة تحضيراتة نفسي ولج صارلي يومين ع فرد وكفة احس رجلية حيتكسرن
اوتار : امين
فجر : حقيرة مو بيدج المهم مو تنسين باجر من الصبح اريدج وياي ترحين للصالون
اوتار بملل : فجيرة تعرفين بأمي مستحيل تقبل هية خطبتج وكوات قبلت اروحلهة مو انوب اجي وياج للصالون
فجر ببتسامة : لا حبيبتي قبل اشوية خليت مامة تخابرهة وتقنعهة
اوتار بصدمة : احلفي
فجر : ههه والله بعد
اوتار بفرح : لجج صارلي اسبوع اقنع بيهة وماكو اشعبج وافقت
فجر : بعد امي حجت وياهة اشون متوافق المهم هسة ادسوين معندج محاضرة ولا تنسن بقيلي عينج ع فادي خاف يلعب بذيلة منا منا
اوتار : هههه خبلة وربي اشون حتزوجين ما ادري وفادي عندة محاضرة واني كاعدة بالحديقة الدكتورة حنان اليوم مجاية
فجر : بختت اشو بس اداوم اني حتة استراحة ماكو
اوتار : هههه غير فكر
فجر : والله ما فكر الة انتي دولي حروح انجيب البدلة
اوتار : ههه اوكي حياتي باي كلت هيج وسديتة منهة وكمت اتمشة بلكلية احاول اضيع وكت بين ما تبدي المحاضرة الثانية ظليت اتمشة الحد ما حسيت ابواحد يهز بجتفي من ورة درت بسرعة واني قاطبة حاجبي بعصيية باوعت ولكيتة نسر باوعلي وكال
نسر : اسف ما قصدي اضايقج بس صحتج اهواية وشكلج بغير عالم لهيج لزمتج اعتذر مرة ثانية
اوتار بتوتر : لا عادي بس استغربت اشوية عبالي رجعت للبصرة
نسر : لا مو كتلج عندي واجب ابغداد تقريبن راح ابقة اسبوعين وراهة ارجع واليوم اجيت اشوف صديقي أستاذ اهنا وحبيت اعتذر منج خاف البارحة سببتلج ازعاج وية الأهل
اوتار ببتسامة : لا بلعكس ولازم اني الاشكرك ع التوصيلة وهسة تقبل عزيمتي ع كوب كهوة كعربون شكر مني
نسر : ولو بوية ما سويت شي انتي بحسبت عرضي وليش لا تفضلي
اوتار : معرف ليش ابتسمت ع كلمة بوية حسيتهة طالعة من كلبة مدري اني لأن فاقدتهة هيج حسيت بشعور غريب واني اسمعهة
ورحنة اني ويا للسنتر دخلنة وراح طلبنة كهوة واني كعدت ع طاولة ع صفحة بعيدة عن الهوسة ورة خمس اجة وهوة شايل الكهوة حط كوب كدامي وكعد اول شي جنت متوترة منة بس بعدين لا اخذت علي وكأنما صارلي اهواي من متعرفة علي حسيت شخصيتة حلوة واضح وبسيط كلامة لبق وموزون محسيت عندة جانب الغرور الي دايماً احس بشخصية محمد
فعلاً استمتعت واني احجي ويا حسيت بيناتنة نقطة مشتركة وهية الفقدان كل واحد منا فاقدلة شخص عزيز علي بس جان هوة جرحة اكبر يحجي ويضحك بس اكو كمية الم غريب بعيونة
وضحكني وهوة يحجيلي ع عيشتهم اهناك ومواقف صارت ويا بدوامة فعلاً تغير مودي كولة بسببة الحد مباوعت ع الساعة وكمت بسرعة لأن بدت محاضرتي وترخصت منة واول مدرت ظهري ع جهة الباب لكيت محمد بوجهي واكف والعيون نار وشرايين ادي وكصتة ناطات من العصبية بلعت ربكي بخوف واني اشوفة يتقرب من جهتي واجة وكف كدام نسر الي كام بحترام اول مشافة ومد ايدة الة وكال
نسر : هلة بمحمد شلونك
محمد وهوة يمد ايدة ويقبض ع ايد نسر بقوة ويكول بصوت حاد : زين الحمد لله ما شألله كثرانة جياتك للكلية
نسر : صديقي اهنا واجيت اشوفة وهمين مريت ع اوتار سلمت عليهة وعزمتني ع كوب كهوة ما اكدريت ارفضهة
اوتار : اباوع عليهم واحد قابض ع ايد الثاني بقوة اكبر والثنين اضخام وطوال بس نظرات الحقد والعصبية جانت اكبر بعيون محمد ترخصت منهم اثنيناتهم بتوتر ورحت القاعتي بسرعة و...........
______________
مرسلين
كعدت الصبح كل عادة ع صوت اعيط امي ومرة اخوي كمت غسلت وصليت ولبست ملابس المدرسة ونزلت السريع ما اريد اتأخر نفس البارحة تريكت واخذت مصرفي ورحت البيت تقى دكيت الباب وكالت عمتهة متروح اليوم سئلتهة ليش كالت تعبانة كتلهة مبيهة غير العافية وترخصت منهة ورحت للمدرسة احس واهسي كولة ونشاطي راح لمن عرفت بتقى متجي
وصلت وكل عادة اصطفاف اول شي ورزالة ناشفة من المديرة بس الغريب بالموضوع ست سلوى تباوعلي بالصفطاف بنظرات حادة خلتني اتوتر واول مكمل الصطفاف ودك الجرس للصفوف صاحتني ست سلوى وشارتلي اتقرب تقربت عليهة بستغرب وكلت
مرسلين : صباح الخير ست
سلوى بنرفزة : صباح الخير عيني ومبروك البارحة يلة عرفت بيج مزوجة من السيد شاهين لعد متكولين قابل حنحسدج
مرسلين بتسرع : شنو لا ست ممزوجة
سلوى بستغرب : شنو ممزوجة البارحة السيد شاهين بنفسة كال انتي زوجتة
مرسلين بتوتر : هوة مو زوجتة زوجتة وانما فقط عاقدين عقد سيد
سلوى ببتسامة مكر : يعني مخطوبين صح
مرسلين : نعم ست
سلوى بخبث : زين اشعجب اهلج مزوجيلج الواحد بكد ابوج لو ع مود شغلة
مرسلين برود : لا ست بس هوة ابن عمي واحبة ويحبني من الطفولة يلة اترخص عندي درس كلت هيج وعفتهة ورحت الصفي الحقيرة اشون حركت دمي ومبينة مثل مكالت تقى انو هية معجبة بي واني العوبة انقهر عليهة غميت نفسي واني ادخل للصف واكعد برحلتي اشوية ودخلت المدرسة وتوالت علية الدوس بشكل ممل وعادي الحد مرجعت البيتنة واني متكسرة من التعب والنعاس لأن البارحة منايمة زين كتلهم ما اريد غدة وصعدت بوجهي الغرفتي بدلت ملابسي وغسلت وجهي واول منمطلت ع الجرباية اجت ابالي تقى ردت اتصل بيهة واطمن عليهة كمت اخذت تليفوني فتحتة وشفتة رسالة من الصبح جايتني من رقم غريب كاتب بيهة هلو عقدت حاجبي بستغراب واني اجاوابة واكتب هلاوات بس منو انتظرت لحظات قليلة واجاني ارد مكتوب بي
💬: اني عماد
مرسلين : عقدت حاجبي بستغرب بس لا عماد حمة هدى كتبتلة يا عماد اشوية ودزيلي
💬: عماد حمة اختج هدى
مرسلين : زفرت انفاسي بنرفزة ودزيتلة
💬 هلة بيك بس منين جبت رقمي
عماد 💬 : مصادري الخاصة
مرسلين 💬 :وهسة اشرايد خوية
عماد 💬 :....................
______________
اوتار
خلصت دوامي وكل عادة رحت للكراج حتة انتظر محمد بس الغريب هل مرة جان موجود قبلي بصف السيارة واول مشافني ركب سيارتة وشغلهة ركبت ويا بستغراب وكلت
اوتار : شعجب جاي اليوم قبلي اباوعلة بدة يسوق وكال بصوت بارد ومستفز
محمد : كلت خاف اتأخر وهم الاكيج راكبة وية واحد غريب زحمة اصير مو ست اوتار
اوتار بحدة : نسر مو غريب انتة والكل يعرفة بعد شهل حجي مو عيب
محمد بصوت جهوري : العيب يا بتل أصول يا محترمة انج تحجين وية واحد بنص الكليلة وتتمضحكين ويا وانتي مصارلج اسبوع من متعرفة علي
اوتار : باوعتلة بستغراب زين هذة شيسمي معقول غيرة ضحكت ع نفسي واني اتوقعة ايغار مني ورجعت راسي بتعب ع الكشن ورة فترة وصلنة للبيت نزلت من السيارة ودخلت سلمت ع بيبي وجدو الكاعدين بالصالة ورحت الغرفتي بدلة ملابسي وغسلت ولبست شالي ورحت للبنات صبيت وياهن غدة اتغدينة ورحت سويت جاي صبيتلهم يا وزعتة وكعدت بصف اختي سارة اباوع ع التلفزيون واحس بعيون محمد بين فترة وفترة علية ورة اشوية باوعت الأمي وكلت ببتسامة
اوتار : صدوك موافقة اروح وية فجر للصالون باجر
ام اوتار : اي بن.. قاطعة محمد وهوة يكول بحدة
محمد : وين امولية هية خطوبة وبعدين بصفتهة شنو تروح وياهة للصالون حتة مو حدة من كرايبنة وحتة الخطوبة مبلازم تروحيلهم يكفي امج تروح تنطي الواجب وتجي
اوتار بعصبية : لا والله وانتة اشدخلك عندي ام واخ همة المسؤلين عني فهمت انتة ملك علاقة
محمد :...............
______________
شاهين
اتأففت للمرة الألف واني اسمع بمبايلي يدك من الصبح لجاي ما سكت اخذتة برود وفتحت خط وكلت
شاهين : خيرج اليوم
تمارة : واخيراً جاوبت من الصبح لجياي واني اتصل بيك
شاهين برود : اشرايدة
تمارة بمكر : انتة
شاهين بلا مبالا: تماررة
تمارة : اروح فدوة الأسمي اليطلع من حلكك والله مشتاقتلك اوت البارحة اجيتني ورحت بسرعة مشفت منك شي والبارحة ادك وماكو
شاهين : عندي شغل مفاضيلج
تمارة بخبث : يعني ممشتاقلي
شاهين برود : لا
تمارة : تعرف شغلة اكثر شي يعجبني بيك برودك ا.. قاطعهة شاهين بحدة وهوة يكول
شاهين : وتالي تحجين اشرايدة لو اسدة
تمارة : اريدك تجي اليوم منتظرتك
شاهين : احاول
تمارة بدلع : كل مرة تكولي هيج
ومتجي فددوة تعال ترى حيل مشتاقتلك
شاهين : كللت احاوول
تمارة : اوكي براحتك زين اريد اطلع
شاهين برود : اطلعي منو لازمج
تمارة : يعني تقبل اطلع وحدي
شاهين بسخرية : ليش ترديني اني اوصلج مثلاً
تمارة بثقة: شي اكيد غير انتة زووجي
شاهين : هههه حلوة هاي عجبتيني يحلوة لا تنسين نفسج ترى بكلمة وحدة مني اكدر ارجعج انفس الزبالة الجبتج منهة
تمارة : مناسة نفسي بس سواء قبلت او لا ابقة مرتك حتة لو لشكم شهر يعني من واجبك انتة اتوصلني
شاهين : ................
