رواية ذاري النجوم الفصل الثامن عشر بقلم زهراء السراي
:
:
:
:
:
:
والروح للروح
تدري من يناغمها
كالطير للطير
في الانشاد ميالُ
:
:
:
:
:
ليل
✥━━━༺✦༻━━━✥
فاتحة شباك الغرفة اهويها
كوب الچاي گدامي
وكليچة بيبي الشهيرة
ام التمر والسمسم مالية الصحن
مستمتعة فاتحة التلفون اقره
واكل فاصلة بهدوء عن الدنيا
خرب لحظات الصفاء والراحة صوت
التلفون شفت الرقم مظلم الشاشة مكتوب
جاثوم سحبت نفس طويل كأني
استعد للمعركة
- نعم تفضل
گلتها بنبرة باردة جامدة
-اعتقد ان لازم اشكرچ
صوته جان هادئ وساكن وكأنه متصل اسقاط
واجب
- تعتقد
-امممم
سكت شوين كأنه يستمتع باللي يگوله
حسيت بالاستفزاز وجاوبته بحدة
-عالعموم هذا واااااجبي وحتى لو چنت دكتورة بيطرية هم راح اؤدي ذات الخدمات للحيوانات المصابة فماكو داعي للشكر
ساد صمت مرعب عالخط لدرجة عبالي انگطع
بس فجأة سمعت ضحكة خفيفة باردة ورد بتوعد
مبطن
-تمام تماااااااااام الأيااااااام هووواي دكتورة والحيوان المصاب من يطيب
أول شي يسويه يطلع مخالبه
لا تنسين هاي المعلومة
- اوك
رجعت غلقت الخط بلا اهتمام
البليد عدييييم الذوق حتى كلمة
شكرا تطلع منه مثل السسسسم
رجعت اقرأ اجتني رسالة
عالماسنجر استغربت
فتحتها طلع اسمه وصورته الشخصية داير
وجه بملابسه العسكرية والشمس
وراه وقت مغرب ضاربة على رموشه
الرسالة بيها فيديو
فتحته صقر ينزل من مكان
عالي يحاول يصيد غزال صغير
وراجع كاتبلي
-اللبيب بالأشارةُ يفهم
خليتلة اوك عالرسالة وطلعت
النرجسية وشوفة الحال وحب الأنا
مرتفع عنددددده زايد
صابني الفضول ودخلت على
حساب الفيس بوك التايم لاين كله
صور شهداء وتعزية وشفت
صورته ويه اثنين كاتب
ابو الصعبااااات وابو روووانة
والتعليقات بينهم والضحك
قبل ثلث سنوات البوست انقهرت
واني اصعد واشوف تعزيته بثائر
تعزية حزينة تعبر عن عمق الصداقة بينهم
كاتب
- يامن من عبرت جسر الدنيا بخفة الطير
كيف أرثيك والكلام يتقزم أمام طهر دمك
وكيف أنعيك وأنت الحي الذي يُرزق
رفيقي بالأمس كنا نقتسم الرصيف
والضحكات وأحلامنا الصغيرة
واليوم أقتسم مع طيفك صمتاً يمزق الروح
فسلاما عليك يامن اخترت الرحيل بكرامة
في زمن قلت فيه المواقف
لبست كفنك كأنه ثوب عرس
ومضيتَ إلى ربك مبتسماً
تاركاً لنا غصةً لا تبرد
وفخراً لا ينتهي
أبا روان نم قرير العين يا رفيقي
فأنا على العهد باقون
التعليقات عالصورة كلها تعزي
هاجس وتتحمدله بالسلامة
واضح منزلها من طلع من العملية
الاولى بعد الغيبوبة
طلعت من الحساب ثواني
ودزلي طلب صداقة
ورجع دزلي رسالة
-لازم عجبتچ الصورة
اباوع للرسالة وصفنت صخاااااام
رجعت لحسابه انحبش وشفت اللايك
اللي مخليته بلا مااحس على صورة
اله جگارته بحلگه ومبين عصبي
وبنص الاليات العسكرية
كسسسسر باصبعي مسوووويته رجاج
ميطلعلي صووووووت اللايك
حذفت اللايك بسرعة
ورديت بكبرياء
-خطأ غير مقصود
-دزلي ايموجي بوسة
ورجع دز
-خطأ غيييير مقصود
طلعت من المحادثة شگد غثييييييث
وثقيييييل
ثاني يوم دووووام صبحت بخبر حلو
اني ونوح بنفس الخفارات
بس نوح چان ضايج ووجهه متغير
-هاااااا قريبي العدوووو اشوفك
ضااااايج
-يمنى نقلوها هنا
-الله علييييك
-اي والله وجايه هاليومين
-والمفروض تزعل على هالخبر
-مااگدر اكون حواليها هووووايه شغلات
تغيرت
-بس مشاعرك مثل ماهي وبعدك تحبها
ابتسم بتعب واشرلي
-اليوم وحدة الكسور صعببببة عائلة كاملة
بسيارة متهشمين والهوووسة قائمة
شفتيهم
-لا رايحة هسه راوند العلاج بده
اشوووفك بعدين
اشرتله وطلعت الملفات متكومة
اقرأ الملف للصيدلاني اللي يطلع العلاج
ويحدد الجرعات حسب كلام الدكتور
دخلت الردهة النسائية الخاصة بالكسور
ثلاثة نسوان كبار من عائلة وحدة
وبنات صغار اثنين وطفلة
الكسور متفاوتة وصوت انينهم
يكسر الگلب والامهات فوگ المهم
يفكرون بأطفالهم الكل حواليهم يفتر
واني عيني تروح وتجي على وحدة منهم
سمرة حلوة بعيون واسعة رغم الاصابات
تشع حسن متغطاية وايدها على بطنها
واضح حامل ملفها يمها رفعته
اسمها ايمان رحت يمها افحصها
-شلونچ ايمان
-زينة
گوة طلعت الكلمة من شفافها
-شكم شهر حامل
-بالسادس
-فحصوچ سونر علموده بالنسائية
-اي گالو ماكو شي الضربة كلها
بچتافي وگالو يسوولي عملية عاجلة اليوم
بسسسس......
سكتت ماكملت قريت الملف
الخلع المترافق مع كسر
المفصل طالع من مكانه ومتحطم جزء
من العظم بهالحالة ميصير ارجاع المفصل يدويا
والعملية ضرورية
اباوعلها تلوب من الالم وبانتظار الجراح
يجي
تبچي ووجها شاحب ومثبتيها
بمسند خاص الى ان يجرون العملية باوعتلها
حتى افحصها
ردت ارفع البطانية عنها افحصها
لزمتها حيل وبچت
-بردانة لا تشيلينها
-ميخالف حبيبتي لازم افحصچ
-بسسسس ......
من رجفة ايدها وخوفها گعدت
بمستوى وجهها
-باوعيلي حاسة بشي
-رطوووبة جواي
-متدررة عااادي تصير هسه ادزلچ
المساعدات ينظفونچ تمام ارتاحي
-دكتورة
-گولي حبيبتي
-اني انزف
-مجررروحة بمكان
هزت راسها بخوف وعيونها نزلت
على بطنها
رفعت طرف البطانية بهدوء
وشفتها نازفة وجواها بقعة دم صغيرة
بسرعة صحت للمساعدات
-كررررسي بسرعة
وحدة من النسوان صاحت
-يااا اموووونة شبيچ
-تنززززف
لطمت وحدة على خدها والثانية
بس تباوع وتبچي
واني استعجلهم اخذوها بعد مابهدوء
حركناها واني رحت
وياها للنسائية بسرعة سوولها السونار
الدكتورة مااخذت وقت گالت
-ميت الطفل ببطنچ لازم ينزلو
هزت راسها وبكل اصرار گالت
-مامييييت ميموت
-حبيبتي ضررروري ناخذچ لصالة
الولادة الطفل لازم ينزل
-لا فدوووة اروحلچ فحصيني مرة
ثانيييية عيووووني
لزمت ايدها واشرتلهم يمشون
-هاي هي الفحص خاف غلط
نعيده بالصالة شگلتي
-اييييي اي نعيييييده
دخلنا بيها الصالة بسرعة
فحصتها وفجأة سمعنا صوت النبض
بچت بصوت يكسر الگلب
-عااااااااايش مو
نزلت من سدية الفحص ووگفت
على جهة لازمة بطنها تتلوى من الم
كتفها وتبچي
-عايش ماما بس النبض ضعيف بسبب
النزف الاحتمال ببقاءه ضعيف
واذا راح ربي يعوضچ
وگعت دموعها ومسحتها بحجابها الاسود
-مايتعوووض صار ١٧ سنة متانيته
شلووون يتعوووض فدوووة بس خلو
يظل
اشرتلي الدكتورة ووكفت تحاجيها
-صحتچ هسه اهم راح نوقف النزف تمام
تتحملين تبقين هنا بالمستشفى
-كل شي اتحمل
سألت الدكتورة عن زوجها يوقع
الاوراق مالتها
صعد رجال اني بره شفته وقع
وراح بره ينتظر وچان لازم يدخلوها عملية
علمود كتفها وحيييرة دخلوها على امل
بقاء الحمل طلعوها بعد وقت بس تهذي
دموعها تنزل على خدودها وتختفي
بطيات رگبتها وكلمتها وحدة
-برهااااان
طلعناها والرجال ويانه حدة لباب الصالة ونزل
ولگينه بالغرفة نسوان منتظريها هم لابسين
أسود
رحتلها خليتلها مسكن لأن بدت تصحى
والمرية الچبيرة يمها تنعى بصوت
حزين
تعبي ييمه ضيعيته
وبخت اليحفظك مالكيته
لو ينشره البخت اشتريته
بس التعب بعدك حويته
غدار يايمه زماني
طكني على اعيوني وعماني
طكاته توجع مرمراني
كون ابمكان ابني خذاني
نزلت راسها على ايد ايمان باستها
وايمان صاحية صافنة بالسگف
گوه تجر النفس
گعدت يمها
-ايمان واعية
هزت راسها بالأيجاب
-حبيبتي شتحسين
-وجع ببطني بس لا طاااح
-لا ماكو طول العملية يفحصون نبضه
وموجود
وگعت دموعها والمرية الچبيرة يمها
مسحت دموعها وباوعتلي
-وين الله واهل بيته يثبت ببطنها
سوووودة بوجهي ابو مافرح بي
ولا هي فرحت راح لرحمة الله وهي بالرابع
باوعتلها متأسفة طبطبت على كتفها
-ربي يملي كلبچ صبر
ويقويچ
طلعت تاركتهم ورجعت لليل لگيتهم منطيهة
علاج ب٨ لگيت بس المرية
الچبيرة يمها مگومتها تغسل
-السلام عليكم شلونچ ياحلوة
ابتسمت بتعب وجاوبتني
-الحمد لله اشكره واحمده
باوعت للحجية عيونها حمرة
-خالة تجين افحص ضغطچ
-اي والله يايمه راسي موتني
گعدت وفحصت ضغطها
-مرتفع شويه ضغطچ لازم ترتاحين
-مااگدر انام وامونة گاعدة
-اني يمها خالة
-يابعد روووحي تعوفين شغلچ
وتگابلينها لا ماارضى تنضرين
-لا ماكو ضرر ارتاحي واني ساعة
واجي اشوفها اذا احتاجت شي
باوعتلها ايمان وردت عليها
-خالة والله زينة نامي
تركتهم ورحت بحدود ال١١ دخلت
لگيت ايمان واگفة عالشباك تباوع ووياهة الستاند
ساحبته بي محاليل
-السلام عليكم
-هلا دكتورة تفضلي
رحت وگفت يمها عينها على نقطة معينة
بالشارع كشك مال جگاير وحلويات بالشارع
-ادزلچ احد يشتريلچ شي محتاجة شي
ضحكت وعيونها مليانة دموع باوعتلي
-شوفي ذاك الدكان دكتورة
هنا برهان اسبوع مرابط
من تمرضت ببداية حبالتي
بالليل مايرجع للبيت يخابرني
يگلي عايني من الشباك اعاينله
يرفعلي ايده
بس شوفته چانت ترد روحي
سبحان ربي الردني لنفس الغرفة
بس هالمرة مكسورة ووهو غايب
بالتراب
-شگد چان يحبچ
-موووت دكتورة
گالها گال اموت واني احبچ بس امر
الله نفذ وراح
گعدتها وگعدت يمها
-خالتچ اخت امج
اشرتلها اسألها عالحجية
-لا خالتي ام برهان
ام رجلي
-حبابة خطية خايفة عليچ
-هاي لو انام جوة رجلها عمر كامل
مااوفيها تحبني على حب ابنها
شفتي وحتى هوو غايب عينها مني
سودة عليه من ركدت حبالتي اني
گلتلهة وديني ازورة بگبره وافرحه
بوليده بس اندعمنا تكسرن حمواتي
وجهالهن وحماي هم تاذه وخالتي خطيه
رجلها انرضت رض
-شنو قصة الحب العظيمة هاي
رايحتله وانت تعبانة
ضحكتها انخلطت بدموعها وذبت حسرة
-يضحك عليه يگلي احنة روميو وجولييت
العشيرة كلها تضرب مثل ببرهان ودلاله لأيمان
-حبيتي وانتِ طفلة
-لا چنت اكرهه
ذبت حسرة وجاوبتني معتذرة
-دوختچ بسوالفي وشغلتچ
-لا اليوووم حابة اگعد واسمع
قصة ايمان وبرهان
طبطبت على كفها واشرتلها عالسرير
-تمددي ارتاحي
تمددت وسندت نفسها عالسرير واني گعدت
گبالها طلعتلها من جييبي نستلة
فتحتها الها
-سكرچ هابط اكلي
اكلت وباوعتلي
-اسولفلچ سالفتي
قاطعنا دخول الممرضة وياها ابر
لازم تاخذها أيمان هسه ضربتها
وسألتها كم سؤال بخصوص العلاج
وطلعت واعتدلت ايمان
و بدت تستعيد
ذكرياتها بهدوء وبصوت رقيق
-چنت طفلة عمري ٩ سنوات
وراكضة لفرن الصمون وبيدي
فلوس ودتني مرت ابوي اجيب
ريوگ الها ولرجلها وره مامات ابوي
ظليت يمها لأن البيت بيت ابوي
والي حق بي
راكضة خايفة واتراجف اذا
تأخرت تصيح وتجر اذني
علما وصلت الفرن صحتله
-عمي اريد خمس صمونات
-وين فلوسچ
مديت ايدي لجيب القمصلة
مالگيتهن
عاينتله
-عمي مااااادري
طاحت دموعي وهو عود نعرفه وكل يوم
نشتري منه صاح
-جيبي فلوسچ وتعاي
-والله مرت ابوي تكتلني اطيني
هسه وباچر اجيب فلوس
-رووووحي عمي روحي
ركضت ابچي شويه وولد صاح
وراي عاينتله العامل الجديد
بالفرن
-ياحليوة
درت وجهي علي وامسح بدموعي
-شگد فلوسچ
گتله شگد وهو گال
-تعاي دليني منين مشيتي
بلكي نلگاهن
مشيت ويا ووين ماتدوس رجلي
وماالگاهن افحط بالبچي
شويه وصاح
-هاااااا اها لگييييتهن شوووفي
مدلي ايده بيها الفلوس بس
ذني جدد وفلوسي ملزگات
عرفته هو حطهن منه لأن ابچي
بس سكتت من الخوف رجعني
ويا اطاني الصمونات ومد ايده
لرصعة خدي طبب اصبعه بيها وضحك
-هاي رصعة لو نگر دعابل
طبگت حواجبي ماراضية عليه
وركضت للبيت احنجل فرحانة
طبيت للبيت اطيتها الصمون
طول النهار تخدم عليه حتى
درب السوگ اندليته اروح اتسوگ
واسكت مالي غيرها
لا عمام الترحم ولا خوال اليردوني
الصفحتين يصيحون هذا بيت ابوچ
صارت فرض عليه كل روحة للفرن
برهان يلزم خدي ويسوي هالحركة
واني صرت اعض ايده
وهو يضحك ولا عبالك وسنة
على سنة اكبر لحد ماصار عمري ١٤
صار رجل مرت ابوي يضوجني
وبالرايحة والرادة لو يگرصني
لو يسويلي حاجة ذبلت وخدودي
الحلوة راحت
وبرهان اليشاقيني من كبرت صار
بس يحاچيني مايلزم خدي
بس گام كل مايشوفني ذبلانة
اكثر واكثر يسألني
-وين راحت خدودچ الحلوة
-ذبلهن التعب عمو
گمت اذوي كل يوم مثل شمعة مشعولة
بظلام
لحد ما بمرة رايحة للسوگ والمسافة
بعيدة سمعت صوت وراي
-ام خدود
التفتت شفته وراي
-شلونچ
-الحمد لله
-بيچ شي هالايام مختفية
-مايردون صمون
-ايمان
-ها عمو
-شگد عمرچ
-١٤
-اذا اجاچ واحد يخطبچ تقبلين
باوعتله وصفنت علي
ومشيت بسرعة معقولة
هو هذا الچبير يريد تزوجني
واني لهسه غسل مااغسل والشهرية
ماجايتني
شهر مر التعب زاد وتصرفات رجل
مرت ابوي صارت تخوف
گلت لخالاتي گالن تضيعين حقچ
بس تطلعين من البيت وگلت
لعماتي گالن خوش ولد مايسويها
سليت بوكتها وبچيت بالليل گتله
الهي اليتيم انت اله
طلعني من هالضيم برحمتك
نمت بليتها شفت برهان حاطني
بسلة خوص بهذا كبري
وحاط السلة على راسه ويمشي
بيه براحة ومطر خفيف ينث
على راسي
گعدت الصبح اني جاهل مافاهمة الحلم
بس گلت مالي مفر من هالقهر غيره
هو اروحله ارد على طلبة
الصبحية اشتري صمون ووگفت
بباب الفرن اجاني هو
-منين طلعت الشمس
-عمو اريد اگلك شغلة
تقرب من الشباك يحاچيني
-شنو
-اذااا شمسسه ......
-شبيچ صاير شي
-بس انت ذاك اليوم مو سألتني
ابتسم بوجهي
-يعني تردين تتزوجين
-اذا انت اييييي اقبل
شردت بعد حتى صموناتي نسيتهن
ركض وراي خلاهن بيدي وگال
انتظري للاسبوع الجاي
واني مثل النايم على جمر
لحد مايوم خميس واجن
نسوان اثنين
امة وخالته مرت ابوي
طاررررت من الفرح بس تريد
تخلص مني
بس اني الصدگ اريد اخلص منهم
امه من شافتني گالت صغيرة
وبين صد ورد عمامي رضو
وخوالي رضو ولا گالو اكبر منها
ولا ابد
-اكبر منچ بشگد
-١٣سنة
-وتزوجتي
-اجة بالخطوبة جايبلي حلقة
ومحبس وگلادة رغم ذاك
الوقت ماكو والوضع مخربط
سنة ٢٠٠٠ بأسبوعين صار
الزواج وبس عقد شيخ لأن
مابالغة وعمي الوقع بدالي
من تزوجت اول يوم گضيتها
ابچي وهو خطيه مگابلني
-امونة شتگولين نگعد بالسطح
-خاف ......عيب
-لا تبچين شو كهرباء وطافية
شعدنا هنا
-بس ......
-گومي
شالني شيل واني تذكرت الحلم
عاينتله وضحك
-ها ولچ لازم عجبتچ
-اريد احچيلك سالفة
نزلني بالگاع جاب بساط نگعد
علي ومخدة وگعد
-يلا سولفي
گعدت حچيتلة الحلم وضحك
-هاي رؤيا وصدگ اشيلچ بعيوني مو بس
فوگ راسي
تعاي نامي على رجلي
خليت راسي عالمخدة على رجله ويسولف
وياي منا لمن تعبنا وطبينه لغرفتنا من
اجت الكهرباء لحد ما عدى هاليوم
ثاني يوم لزمني وگعد يفهمني من
عرف بعدني مابالغة ماتجيني
الشهرية ماسوه اي شي بقى
مثل ماهو يجي تارس العلاگة
غراض اليه ولاخته الصغيرة
يلاعبني مثل الصغار ويشاقيني
وكل يوم يمشط شعري ويگعد
يحچيلي قصص سنة الا شهر
مادنت نفسه عليه لحد مابلغت
بوكتها راح الخوف لأن تعلمت
علي
وصار برهان مو بس رجل
لا عايلة كاملة زوج واخ واب
وام واخوووات
حبني وبطيبته حبيته
والسنة تبتعتها سنة وماصار
جاهل واليسأله يگله هي
بتي شسوي بالخلفة
امه صارت امي واخواته
ونعم الاخوات مايوم حسيت
روحي يتيمة وصارت الحرب
من الخوف يفرشلنا بالگاع
ويحاوطني بالمخاد ويحضني
مثل الجاهل لان ابچي ومرت السنوات
لحد ماقبطن خمس سنين
والرايح والجاي يگله عرس
خصوصا من عرفو السبب
مني وهو وين مايروح يگلهم
مااخذ غيرها اكو واحد عاشگ
ياخذ على معشوگته اخوته
خلفو والناس تسأل واني مدللة
فتح فرن اله وبعدين صارن خير
اكثر من فرن ويحير شيبلسني
وشيشتريلي راضي الكل
والكل يحبه لحد ماوصلنا
للعام وهاي ١٧ سنة بلايه خلفة
اتشاقه ويا گتله
اريد شربت زبيب جامد
يمكن اتنسى اني اتشاقه
وهو سواها صدگ جاب الشربت
وجمده
شو وراها روحي هفتني عالنبگ
وجابلي بليلتها اكل واذب فصم وهو
يباوعلي
-اممم خدود شو خدودچ ذابلة
ماتاكلين
-اصلا اكل مثل الافة البارحة خالتي
تگلي سمچ واني الوب گامت تضحك
علية گالت چنچ بزوووون وبالمنور
وهي تگلي جابتلي خبزة وسوتلي لفة
اتشهى اليسمعني يگول حامل
صفن بوجهي
-وليش مو حامل
-هااااا
-شهرية ماكو
-هاي شهرين
بس غير من العلاج
-اگلچ خل اخذچ حللي
-ماااريد كل مرة ارجع وجهي
خالي واستحي اخليهم يتأملون
-مانحچي لاحد بس نشوف
وبطريقنا نفتر شويع مو تگولين اريد
كم غرض لرمضان
-يلا شخسرانة هن خمس الاف تحليل
وطلعنا واني اضحك علي
سوينة التحليل والمحللة گالت
حمل واضح
اني من شدهتي ماانتبهت
گتله
-شفت ماكو شي ......
باوعتله بيده الورقة وصافن
-هاي كالت حامل
-اي
سحبني من ايدي للمختبر الثاني
ونفس الكلام مارجع للبيت دخلني
لدكتور سونار طلعتله دموعي مااسيطر
عليها
-سمعت گلبه يدگ
-والله
-والله وروح ابوي
بساعتها استحى يحضني
عصر چفي عصر بين ادي وطلع
للبيت طب لأمه گبل والهلاهل ترست
البيت ترس اسبوع وترس البيت ذبايح
وعزم العالم وراها تمرضت وبين عليه
نقص الحديد وفقر الدم نمت هنا
بهالغرفة خاصة مارادني اتعب
منا لمن صعدو دمي بالنهار هو رايح
راد
وبالليل يگابل الشباك يسولف وياي
لحد ماطلعت
وطبيت الرابع وعرف ولد
گلب البيت كلاب سوالة غرفة شكبرها
ترسها ترس غراض بليتلها گاعدين
ويباوعلي
-تدرين على عينچ ربي رزقني
وبدل الفرن صارت افران
تدرين سميت الفرن الجديد
الأيمان
-ياااا شتگول الناس
-يگولون مسودن وحبلة
حليوة
بعد روحي ثاني يوم
صاعد للكيبل بالفرن يسوي
ولزمته الكهرباء
وراح ابو روح الحنينة
وراحت روحي وياه
وشوفة عينچ حتى الطفل يريد يلحگه
بس ارريد ربي يجبر خاطري بهالولد وراح اظل اني
كل يوم ادعيله وراح اظل ادعيله
الرجال العزني وخلالي قيمة
بعيونه وگلبه قبل الناس
كل يوم ادعيله بالرحمة
لأن حتى من راح خلاني
بين اهل صارو اهلي
ولموني مثل مالمني
گعدت احچي وياها بمحاولة مني
لتخفيف وجعها لكن الحقيقة
مرة فقدت حبيب وسند
الها كل الحق بالوجع اللي
تحسه
تركتها ترتاح وطلعت تلفوني
عالمكتب واصلتني رسالة
عالماسنجر
-دكتورة ليلة من الادب اذا
شخص يدزلچ طلب توافقين
فتحت الطلبات دست موافقة
بنفس الثانية دزلي
-عفييية بالشاطرة
تركته وتوجهت لمهامي الى أن حل
وقت رجعتي للبيت
الصبحية دخلت واسمع صوت ركضت
لغرفة بابا وماما واشووووفه منور المكااان
شمرت نفسي بحضنه
-ياااااحبيبي الحمد لله على سلامتك
ليييش مگلت جاي
-ردت افاجئكم
-عمليتك
ابتسم وباوعلي ووگف
-عشششرة على عشششرة الحمد لله
-حببببيبي الحمد لله والشكر
-دروووحي ارتاحي راح انام شويه
قبل لا ينگلب البيت بالناس
-ماما شو بيبي ماكو
-راحت ويه خالچ عبد الله ابن خالتي نعمة
اجاها اخذها
-شنووو وتبقى يمممممهم
-يوميييين
-والله ماكو اجيبها العصر
-ولچ عيييب
-شلون ضووووجة بدونها وبعدين مامعقولة
تدري ببابا جاي وتروح
-لا متدري
ضحكت وماما صاحت
-لتخابريها ولج زحمة يزعل خالچ
ركضت للغرفة اتصلت بتلفونها وكالعادة
انتظر لحد مااحد يفتحلها الخط اجاني صوتها الحلو
-ها بيي ليلوة
-عذاااابي رايحة وعايفة سلطاااان يبچي
عليچ
-يابعد روووووحي رد للبيت
-اييييي رجع ارتاحي بالليل اني اجي
اخذج وعنديييي موووضوع وياچ
-خوووش انتظرچ بيبي
ودعتها ورحت لغرفتي
سبحت وارتاحيت للعصر
اجه ضرغام وزوجته واولاده خطيه
طول فترة سفرهم
ماما تروحلها تزورها وترجع بالبيت
همزين قريبة على اهلها
وبين لعب وسوالف والعطر كالمعتاد
جايبلي علبتين عطر وصيته
تعشو وراحو واني لبست ووگفتلهم
-راح اجيييب بيبي وارجع
بابا گوه وافق طلعت منطقتهم
مسافة ربع ساعة عنه دخلتلهم
بين سلام وكلام جبت بيبي ورجعت
بالطريق سألتها
-بيبي اريد اخذ رأيچ بموضوع
-گولي بعد روحي
-بيبي جدو أبو كمال......
-گلابچ انت وياه
-ههههههههههه بيبي چبير بالعمر
شسمي قابل
-كملي ولچ
-اي گال من يرجع ابوچ من السفر
وديلي خبر نزوركم
باوعتلي صفنت شويه وردت
-اي غصبا علي يجي چا ابوچ مو راحله
من ماتت مرته
-يعني ابلغ نوح
-اي بلغي خل نشوف
بالله شيجيب المسودن
وصلنا للبيت اول مادخلت هلهلت بصوتها
الناعم وطلعلها بابا باس ايديها
-بعد روحي الحمد لله من رديت بخير وسلامة
-الله يسلمچ شووو تعاي
شو طالعة بدوون محرم
-شسوي نغيييوة وطالعة ويه صااااحبي
طگها بابا ضحكة وكعدنا بوجودها
ملتمين فرحانين بحدود الساعة ١٢
صورت كتاب وكوب گهوة والعطر وراهن
وورد برتقالي وكتبت
-المرأة القارئة تعرف متى تغلق الكتاب
ومتى تضع نقطة في آخر السطر
شويه واجتني رسالة عالماسنجر منه
-والعطر اليخنگ شنو موقعه من البوست
-الذوق معدوم للأسف
-ذووووقي حلوو حييييل حلو
-لا واااااضح
-راح تعرفين لاحقا
-اشك ومو مهتمة اعرف
-دكتورة ظلام سؤال
-نعم جواب
-الغرور هذا تعالي لو عيارة
-والكبرياء وشوفة الحال العندك
شنو
-رجوووولية
استغفر الله حرت شرد اخر شي
گتله
-وصل للحجي سلامي وگله
ابويه رجع من السفر اذا يحب يتفضل
-تمام جايينكم باچر
-اهلا
-تنگطييييين سم بكل شي ايييييدچ
اثگل من الچاكوچ حتى بضربة الأبرة
تنفست حتى اگدر استجمع كلامي وكتبتله
-سيادة النقيب بما انك فتحت الموضوع
وبما أنك جاهل بالأمور الطبية
فأحب انوهلك ان السوووويته كله وياك
چان تفضلاً مني كل اللي سويته
لخاطر نوووووح واحنه الاثنين اني
ونوح تجاوزنا حدودنا المهنية والوظيفية
وقمنا بأدوار مو أدوارنا بدايتاً من التمريض
للعلاج وحتى متابعتك بصورة دائمة
مو من ضمن صلاحيات عملي
المعاجبتك والأيدها سممممممم
اخذت تنبيه ولفت نظر من ادارة
المستشفى بسبب هالشي بسبب شكوى
بعض الزملاء
من الصيدلانين وغيرهم بسبب تجاوزنا على مهام عملهم وبما اني احتراماً لصلة الدم
والقرابة واحتراماً لنوح مگلت شي لازم
انت هم تقدرررررررر وتنتبه لأسلوبك
مرة لخ
ثواني ورد
-نعتذر حضرررررتچ
-اوك
گلتها وطلعت من المحادثة ورجعت لكتابي
اقرأ عن قصص العشاق واني الجفاف
محاوطني من اربع جهات
ثاني يوم استراحة وصبحية
دگ تلفوني استغربت رقمه
-نعم
-انعم الله عليچ
تحبين ورد برتقالي
-ورديش
- للوالد جدي يسأل
شيجيب ورد
-جيتكم كاااافي
سد التلفون اني مبلغة ماما
جهزنا ضيافة ورتبنا الصالة وبخرنا
لبست گلابية مرتبة وشمرت حجابي
واندگت الجرس طلعت اني افتحها
دخل الجد سلم عليه كالعادة باس راسي
ودخل وراه وطن يلعبلي بحواجبه
-شبعوووو لحم بجال الاعداء
جبنالكم خروف مربرب
ضحكت وسمعت صوت الخروف بره
رجع وطن دخله للگراج جاي اسد
الباب ودخل هاجس بملابس شبابية
جينز غامق وتيشرت أسود طالع انيق الحقير
بيده ورد وعلبة حلويات
مدلي الورد
-الحمد لله على سلامة الوالد
-شكرا
دخل ووطن ربط الخروف بالشجرة
بالحديقة واجاني وديته للمغسلة
يغسل ابدي
-گتله جدي اشتري بطانية ام احبك
ماقبل الا خروف
جيبيلي عطرررررر ريحتي تكتل
همه بالصالة واني ركضت جبتله عطري
رش منه
-ايباااااااخ عطور ماركة
غمزلي ودخل للصالة سلم
دخلت للمطبخ ماما تسوي بالگهوة
-روحي يمهم اني اكمل
-لتخلين شكر لأحد ميصير
-تمام
رتبت الفناجين ووياهن قطع التمر
ودخلت خليت صينية گدام بابا وجدو
وبيبي گاعدين سويه بقنفة وبيبي بصفهم بكرسي
منفرد
ماما يم وطن وتضحك واضح بده
بسوالفه گعدت اني عالكرسي وحد بجهتي
هاجس بس بعيد
بصفي تلفوني اجتني رسالة منه
-استكان چاي سوالف القهوة والكتاب ماتخدمني
وگفت ومن حسن الضيافة لازم اسوي
سويت چاي للكل حتى ميگولون ليش
بس اله ووگفت خليت اول استكان
گدام الجد
-جدو ماشفتك شربت گهوة اشرب چاي
بيبي ماصبرت
-وبيبيتچ نسيتيها ولچ
ضحك وطن ووگف
-اني اجيبلچ چاي حجية
-شني ولك هازة كاروكك
ضحك وخله الاستكان گدامها
جرته باسته
-ولك انت طالع على مرحوم عمي
وجهك يضحك للهوا مو مثل ناس
هاجس ضحك وحاچاها
-شنو حجية مو بعينچ اني
-شيطببك بعيني صماخك شگده
وطن فحط من الضحك
گعد بالگاع يم بيبي مدت ايدها
لشعره واني افهمها تنقهر علي
-شو حبيتك ولك حتى اسمك
حلو
-اگلچ حجية
-گلي بيبي لو حبوبة
-بيبي شو انت عيونچ خضر
اولاد عمي علي شفتهم ببغداد
كلهم ملونين
شمالنا احنه چلحان
ماسكتت بيبي الا تقصف
-اي حبوبة طالعين على بيت اللواء
اجدادكم
الجد ماگدر يسكت ضحك
وسألها
-لا طالعين على جدهم
سمران
-چلحان ابو كمال چلحان
بابا گوه لازم ضحكته وماما التفتت لهاجس
-بيبتكم هذا طبعها خالي يعرف
بسرعة دزلي رسالة
-زييينة عذبة لسانها يبرد برد
بس نفسيتها حلوة
انت نفسيتچ سم عليمن
-على واحد اقربائي من بعييييد
صورته ودزيتله الصورة وكتبت
-هذاااااا
باوعتله ارتفعت شواربه وضحك
ودزلي
-ينگط شبوبية
-ينگط سسسسم
كتبتها ورسلتها
ردلي
-لازم مجربة سمي
شنووو گارصچ قبل
بلا تردد حضرته التفتلي وضحك رافع
حاجبه وطن گال لبيبي
-شلوووون جبتلچ خرووووف
حتى صوووه حلووووو ينفع يصير نغمة
-اي حبوبة من لحم ثووورة واطعمه
صفنت على بيبي الجد ضحك ورد عليها
-اييييي البيت واحد ام ريحانة
احسبي هدية من مرحوم ابوي
ذبت حسرة بيبي ترحمت لعمها
رفعت راس وطن باوعتله
-تشبه عمي سالم ولك لو عندي
بنية اشيلها واطيها الك
-مااتزوج اريد اظل اعزب
شو الزواج مو حلو
-لا حبوبة اذا تاخذلك وحدة
ادمية تعيش مرتاح
-صح لسانچ
جاوبهة الجد وهي ردت
-حتى اسأل جدك
-اي جدي اسمع حچاية بيبيتك
رجعت كالت لوطن
-ولك خاف عاشگ
سواها وطن بالضحك
-اي حبيت وماحصلتها ومااريد غيرها
واجه جواب جدو بكلمات مااعرف حسيت
بلحظتها گلبي انعصر من قوتها
واكتشفت حتى بعد الشي البسيط
السمعته عن خيانته لبيبي ان الحب
الاول يبقى حتى لو يتعدى عمرك السبعين
ابتسم وگاله
-حقك ياجدي العشگ الاول
ماينسي مثل الشيب الأبيض
شما تصبغه يرجع ومحد يعوض مكانه
رجع جدو بعد كلمته ويحچي ويه بابا
وطن يلعب بحاجبه لهاجس
وهاجس تقرب على حافة القنفة
-شوفي اجوبتهم واحد للثاني يگول
قاذفات وانت مگضيتها فهاوة
رفعت الحضر عنه ودزيتله
-لأن مااريد اجر نفسي لحرب
غير متكافئة
-تعرفين بنفسچ متگدريلي
-لا لأن اترفع عن السخافات
ثواني واجتني صورة شفة عبالك
بوسة ودزلي
-بعدچ ماشايفة سخافة وگومي
جدديلي الچاي
گمت جبت استكانين اليه واله
سويت الچاي حلووو حيل
شرب وكش وجهه دزلي رسالة
-تجزع روحي من كل شي حلووو
الچاي والبشررررر وحتى العطور
-لأن ماعندك ذووووق
التفتلي مزعوج رجعت اكدتله
-ونظرتك هايه متخوفني
دار وجهه مزعوج
بعد ساعة سوالف ماما وهاجس
حوارهم واعي ونقاش حول الوضع
ووطن وبيبي واني سوالف وضحك
وجدو وبابا يسولفون عالتقاعد
وجدو ينصح بابا ميگعد بالبيت
حتى ميضوج ونصحه يفتح مجمع
او محل غذائية لأن اكثر شغلة ماشية
وهيچ ودعونا وطلعو بابا وگف بالگراج
يحچي ويه ماما
-شو عجبتني فكرة خالچ
-والله احسنلك تتونس
باوعت للخروف خطيه ياكل حشيش
-بابا راح تذبحه
-اكيد
-خطيه خلي
-لاماما يعدم البيت ريحة
-كم يوم حبابة خطيه
ضحك بابا موافق
دخلنا وبيبي صاحتلي
رحتلها للغرفة
-هذا الضويبط ابو نجمات شراد
منچ
-راد چاي
-هذا منفوخ مثل جده
-شو جدو زين حتى اسلوبه
ذبت بيبي حسرة وضحكت
- يابيبي خلي السوالف بالگلب
هذا الندم خلا هيچ صار وطخ
-سولفييييلي القصة
-بعدددددد موو هسه
اشرتلي اطلع
-روحي ولچ جيبي هذا الجهاز شو
راسي يوجعني
-حبيبتي مريضة حاسة بشي
-لا انقهرت عالوليد ولچ
هذا صدگ حاب ومامحصلها شو حسرته
شكبرها
-الله يصبره بيبي مارهمت خطيه
وضاع خبرها بالموصل
-يابعد روحي هالمسوي روحه يضحك
وهو كاتله القهر
-هااااااااا عذابي شووو
حبيتيهم
-على حب عمي سالم وابوهم خير
-وجدهم
-ما محالل والبيني وبينه يم الله نتحاسب
علي
گالت كلمتها بقهر و طلعت تاركتها
جبت الجهاز ضغطها
طبيعي گعدت يمها
-بيبي نامي شويه تعبانة خاف
-اي والله شو مدري شبية دايخة
رجعت لغرفتي واجاني اتصال من نوح
-اعتذرررر مااجيت طالع بشغلة مهمة
-معذوووور
-باچر تداوم يمنى
-اي تداوم
-تجيبها وياك
-اكييييد
ودعته واخذت استراحة
ثاني يوم صحيت بهمة وماببالي
بس ايمان بوجهي اول موصلت
صعدتلها
وجهة مرتاح
-شلونچ اليوم
-الحمد لله نعمة
-النزف
-توقف الحمد لله
بس گالو ابقى اخذ علاج
لحد الولادة
-ميخالف حبيبتي
-اني باچر اطلع اررريد اشكرچ
لأن وگفتيلي وطولتي خلگ وياي
وبفضل الله وفضلچ فحصوني
مرة ثانية چان نزلو ابني
-الفضل لرب العالمين
باستني وطلعت وهاي قصة
ثانية مرت عليه رغم الألم
انتهت بأمل
رحت للمكتب واتفاجأ بيمنى كاعدة
بس شافتني ركضتلي
-ادررررري اني بذااااتة ونحسة
-وحقييييرة
حضنتها وهي تضحك
-شفتي التدرررج شلووونه
-حقچ والله تجي ايام
مااشوف اهلي من المستشفى للنوم
ومن النوم للمستشفى يادوب اكل
-اشتاقيت لهنا عبالك چنت مااتنفس ببغداد
-اني گلت راح تبقين هناك
-ماگدرت حسيت بديت اخسر
نفسي والحواليه
باوعت بعيونها واضح رجعت علمود
نوح
بدينة شغلنا وهاليوم متفارگنا اني
وياها بالليل تقريبا يخف الضغط
گاعدين واندگت الباب
دخل نوح بيدة علاگة
-السلام عليكم تاكلون
التفتت يمنى
-جوووعانة اريد شي حلو
-جبتلچ كيك
طلع الكيك وهي ابتسمت
-بعدددك تتذكر احب هالكيكة
باوعلي محرج وطلع اثنين لخ
-لا جبتلنا كلنا
گعدنا ناكل وعيني منهم
نظراتهم تنطق حب كلامهم
كل شي بس شنو سبب عدم اعتراف
يمنى مااعرف
كملنا الاكل وهي راحت لشغل عدها
ومر هاليوم والبعده واسبوع وهم
واحد منتظر بس كلمة من الثاني حتى
يعترف
بعد ١٠ ايام كاعدين
هي اجاها اتصال
راحت كملته ورجعت وگفت
وهو سألها
-صاير شي
-عمة تلح عليه تريد ترجعني لبغداد
يمها وابنها گاللها عادي اسوي واسطة
-وانت شنو رأيچ
-خابرتة گتله لتسوي شي اني
اريد ابقى هنا بعد
بقت تسولف وطلعت من صاحوها
التمريض
باوعتله رفعت حاجبي بأستفهام
-لتباوعيلي مااحچي ولا اقدم
مشاعري اذا مااعترفت بنفسها
-خلي ببالك البنات يحبوون اللي
يقاتل علمودهم
صفن بوجهي ووگف
-هاااااا
-ادگ الحديدة وهي حامية
موووو
-انطلق
ضحكت وهو طلع
رجع من الباب مد راسه
-انتحررررر بيچ اذا
رفضت
ساعة ودخلتلي يمنى وجهها ينطي
الوان
-شبيچ وجهچ احمرررر
بلعت ريگها
واشرت على خدها
-شبيچ
-نووووح
-ضربچ
مسحت خدها بهدوء والكلمة طلعت
مرتجفة من شفافها
-باسني مناااااا
لزمت خدها واني انفجرت ضاحكة
-صدگ
-والله
-وانت شسويتي
-رجعتله البوسة
گالتها وغطت وجها تضحك
مشيتلها
-شعدكمممممم اعتررررفو
-اسكتييييي لو ما انت دازته عليه
كممت حلگي اضحك وهي عيونها تلمع
-اعتراف مو
-من زمان معترف بس اني
چنت اشوفه قريب اليه كأخ
من ابتعدت عرفت حقيقة مشاعري
وماگدرت اعترفله
شويه ودگ تلفوني نوووح اتصل
-بيها شي
-لا بس خدها احمر
ضحك ورد
-ماااااافوتها والله هالشهر اخطبها
هاي عقلها مفوت خاف تغير رأيها
هي واگفة يمي سمعته وگالت
-مااااغيره
ضحك وسد الخط ومن الخجل لا هو
رجع ولا هي راحت يمه
والاسبوع البعدة صار اللي
صار وصدگ تقدملها مجرد
قراءة سورة الفاتحة واتفقو
على حفلة بعد شهرين بسبب وضع
هاجس مثل ماگال نوح وان
جدة وابو رافضين رجعته
للالتحاق وبعد كلام ومشاكل
تقدم بطلب وصار دوامه داخل
المدينة بس يگول صحته تعبانة
الايام البعدها عيني عليهم
مثل العصافير سبحان الله
شگد متشابهين بالصفات
واختفى هاجس بعد ردي الساحق اله
واني هم ارتاحيت
من كلامه ورسائله المزعجة
وتخلصت منه وبيوم هادئ
ببعد العشرة بالليل
اندگت باب غرفة الاستراحة
واني جاي اقره بكتاب صحت
-تفضل
ودخل عليه بقيافته ومسدسه
عالجانب ونظرته المتعالية
-السلام عليكم
-وعليكم السلام تفضل
رديت السلام ورجعت اباوع لكتابي
گتله
-تفضل
گعد وضرب بيده عالمكتب حيل باوعلي
-بعيدا عن التعجرف بالرد بس
جايچ بسؤال
-نعم
عض لسانه باوعتله مبتسمة بحقارة
-بما انچ چنتي مشرفة
على علاجي اريد ملفات المستشفى
واريد اعرف وضعي كامل الكل
يطالبني بأستراحة فگليلي كل
شي وارفقيلي كل شي بملف احتفظ
بي وبلا عبارات تطمين واااهية
اريد بس الحقيقة رد مهني بحت
وبدووووون لغوة زااااايدة
باوعتله حتى بأحلك اوضاعه مستفز
رديت علي ببرود
-اللي يگولو اهلك صحيح وتحتاج راحة
وجسمك بده يتمرد على عجرفتك وبده
ينهااار
-لسااااانچ
-اجيت علمود الحقيقة هاي الحقيقة
جسمك ميتحمل اهمالك اله ومن
زمان گالولك ضغطك عالي
والحقيقة الثانية انت مو بطل
خارق وتحتاج للراحة اللي
گالولك عليها وضروري تلتزم بالعلاجات
-واذا ماالتزمت
-العواقب انت تتحملها
وللأسف تنتهي لقاءاتنا الغير
مرغوب بيها بممرات
هالمستشفى
رفعلي حاجبه معاجبة الكلام رديت
-تحب عگب باچر تجي تلگى تقرير على مكتبي بي
كافة الامور اللي تخص حالتك
الصحية ونرجع نسوي فحوصات جديدة
اذا حاب تتأكد بنفسك هاي اذا چنت حاب تواجه
ضعفك
-احسبي موعد
هزيت راسي وهو طلع بشكل عاصف
من المكان
ومر يوم الاوف مالتي ثالث يوم
الصبح داخلة للمستشفى
ابدي الدوام فرة منا ومنا دخلت
للمكتب لگيته گاعد براحة
وساند نفسة عالكرسي برهاوة وعينه بتلفونه
-صباح الخير
-هلا
رد من وره خشمه وسألته
-تحب تسوي فحوصات
-فضيني
گمت ويا سويناله كافة الفحوصات
جمعت النتائج بعد ساعتين ويا
ورجعنا للمكتب طلعت ملفه
من المجرات وگعدت خليته گدامه
-الزبدة شنووو
گالها ووگف مستعد
-شلون اگلك على حالتك الصحية التعبانة
وانت واگف كأنما مستعد للحرب تفضل نحچي
الواقع وبدووون تزييف جسمك بده
يخونك
باوعلي وخزرني
-الخيانة كلمة چبيرة
-هذا الواقع والتقارير هي تحچي
-دخليلي بالنظيف
-تمام ضغطك عالي وهاي من الصبح
اكيد بعدك حتى ممتريگ
لزوجة بالدم بسبب الارتفاع واكيد
بسبب التدخين
-كلهن اعرفهن كمممممملي
-مقاومة انسولين جسمك عنده استعداد
كامل للاصابة بالسكر
اذا مبديت علاج
-جيد وبعد
-عضلة گلبك متضخمة بسبب الارتفاع
الراحة ضرورة حتى ينزل ضغطك
-دوامي ماااتركه غيرها
-مو شرط تترك الدوام هدي نفسك
اثناء الدوام
-اي احقق ويه المتهمين واضربهم
بالكلينكس
-بعيدا عن السخرية بس هاي
حياتك جاي نحچي عنها وانت مخيييير
تريد اگل لنوح ............
-لا اني اتولى موضوعي
بلا ثرثرة نسووووان
-بعيدا عن كلامك بس ياحضرة النقيب
كلبك ميتحمل وخلي ببالك هو مجرد
الة لضخ الدم لاااازم تحافظ علي
-وغيييرها
-وهذا كل شي تريد تفجع اهلك بموتك انت
حررررر الخيار الك
تكسر گلب جدك وابوك وتترك اخوانك
-بلا لطم واحاسيس
-اها جيييد هسه المطلوب عرفته
وهذا كل شي يخصك
وهاي وصفات العلاج حسب مكتبها
الدكتور الك وسمعته بنفسك تصرفها من بره
اذا تحب تعيش وتاخذ راحة لأنك
ببساطة هالفترة عاجز
ضرب المكتب بكل قوته ووگف
-شنوووو عاجز
-عاجز عن اداء مهامك ضغط مرتفع
سكر محتمل قلب تعبان هالاشياء
تعجز الجسم وتنهي
سحبت ورقة من الملف خليتها گدامه
-هالورقة تگدر من خلالها تقلص
دوامك اووو تاخذ مهام اقل او حتى
تاخذ اجازة
لزم الورقة باوعلها بعدم اهتمام اشرلي
-هسه انتِ الزعطوطة بورقة ترديني
اترك دوامي وانهي مسيرتي العسكرية
-زعطوووطة
گلتها مستنكرة ورديت
-اخر الكلام اهلك ممكن يحبوك لذلك
مگلولك الواقع بس بما اني مااحبك والحمد لله اكرهك
فراح اجرحك بالواقع براحتك تريد
تموت تووووكل وروح سوي اللي تسوي
ووصلك لهالحالة
-تكرهيني جيييد شعور متبادل
المهم النهاية شنوووو
رد عليه بملل
-تريدها نهاية روح واستمر باللي
تسوي او تريدها بداية
بلش علاج واسمع الكلام
اخذ الملف ومشى خطوات راد يطلع
رجع بعدين باوعلي
-شگد يتطلب العلاج وتبين نتائجه
-حد اقصى شهرين
فتح عيونه
-شهرررررين
-مع التزام كاااامل بالعلاج والاكل
ومو هوايه على صحتك وترجع للمسدسات
والسلاح والمشاكل والمجرمين
-والاشراف عالعلاج انتِ اكيد
-انت تشرف علي اذا حسب كلامك
متريد احد يمن عليك
-انتِ انسانة جبانة
وانهزامية شغلة بديتيها انهيها
انتِ مشرفة عالعلاج وانتهى
گال كلامه دفعة وحدة وطلع
لليل اتصل بيه
-نسيت الراچيتات يمچ
صوريهن ودزيهن هسه
صورتهن ودزيتهن اله
ساعة ودزلي صورة واتصل
-حددولي الجرعات حسب الوصفات
الموضوع يمچ بعد
گالها وراح شو ثاني يوم
دزلي صوتية
-رتبي العلاجات والاوقات ودزيلي
مگلت شي گتبتله
-سوي منبهات للعلاج كل وقت بوقته
دزلي صوتية وهو مستمتع ومرتاح للرزالة
-شگد انهزامية كاتبتلي كتابة
بابا دزيلي صوتية اني حسب كلامكم
جاي انام هووووايه
رجعت دزيتله صوتية
-اكو علاج ينوم لذلك تحس بالنعاس
-بيها الخيييييير خدرتيني
صوتية كل وقت بيها اللي احتاجه
لو سمحتي
راح وانطلاقا من مبدأ القرابة
قررت اتماشى ويا لحد ميكمل
كل وقت ادزله رسالة
يرد تمام
لو اوك لحد ممر اسبوعين
دزلي صورة جهاز الضغط النبض
زين الضغط طبيعي دزلي
-شلونها القراءات
-تمام مضبوط والالتزام
-تمام
يومين بعدها دزلي رسالة الصبح بس صوته
تعبان
-دكتورة ليل اكو علاج خلص وغيرته
مالگيته جبت بديل وجاي يصيبني بغثيان
-صوره اليه بالله
صوره ودزه
-هذا واحد من اعراضه الغثيان
-شوفيييييلي بديل
-اول شي احنه مو بثكنة عسكرية
سيادة النقيييب وتأمرني أمر وثاني شي
اخذه هسه احسن من الارتفاع وتوقف
القلب المفاجئ والبديل يقرره الطبيب
المعاااالج مو انييييي
مارد عليه واختفى لثاني يوم بنص الليل
بيوم الاوف مالتي دزلي رسالة
- اريد جدول للممنوع والمقبول بالاكل
وبدون اضافات فلسفية ودزي على شكل
ملف حتى اطبعه
رديت بصوتية هم طافية نعسانة وهم
عصبييية
-يبدووووو ان الضغط المرتفع اثر
على مراكز الادب عندك
الجدول ادزه باااااچر بالوقت الطبيعي
اللي المريض يحاور بي الطبببببيب
رغممممم هذااااااااا مو شغلي
وبعدين الكلام بدون القاب غير مسمممموح
سيادتك
ولا اني اصغررررر جندي تحت ايدك
-تماااااام دكتورة ليل بااااااچر تلگيني
قبلچ بالمكتب اخذ من حضرتج التقرررررير
وهذا ابلااااااااغ بالحضووووور علم
هزييييت ايدي هذا مجنون مدري شبي
-علم سيادتك بس تذكر ان رتبتك من تدخل
مكتبي تبقى بره
داخل مؤوسستي وشغلي اني
الآمر الناهي مو حضرتك اللي تأمرني
-خييير خييير اشوف لسانچ
طويل ومتولية دفة قيادة الحديث
لأن بعيدة من خلف الشاشة
-والله خلف الشاشة بالحقييييقة
اني اللي اعرف وضعك وزمام الامور
بيددددددي
-اني هاجسسس زمام أموووري
بيدچ
-ومنوووو هاجس مثلاً فاتح الأندلس
محرر الأقصى بالنهاية تبقى مريض
ضعيف محتاج علاج حالك حال البقية
دزيتها ويبدو اني استفزيت رجولته
ومن يومها غلق باب الحديييث ومارد بعد
ومر الشهر وهو ماكو واني هم
ارتاحيت منه بس اسأل عنه
نوح اللي گال ان هو ماتحمل الراحة
ورجع للدوام قاطع الاجازة
ولسوء الحظ صار شفت
وتبديل بالخفارات والعصافير
صارو سويه واني رجعت لوحدي
لخفارات الطوارئ والفوضى
مالتها الاف الوجوه تمر علينه
بأشكال النفسيات والشخصيات
ليلة مليئة بالحالات بين المرضى
صدگ وبين المتمارضين
ممرات المستشفى تضج بالحركة
محاولة الحفاظ على هدوئي المهني المعتاد
توقفت على صوت مريضة وهي تبچي
والرجال وياها عصبي
سألتها عن حالتها وجهها متأذي
-مضروبة
جاوب هو بعصبية بدالها
-شمضرووووبة وگعت من الدرج
فحصتها واني متأكدة معنفه
-شعندچ الم
-براسي بس
كتبت للتمريض خلولها محلول مسكن
ويتابعوها خوفا من الارتجاج اي نزف
انف او تقيؤ معنى ارتجاج حتى نتخذ
الاجراء طلعت وگلت بس تطلع نتيجة
المتابعة ابلغ الشرطة من داخل المستشفى
لأن مسؤوليتي واتحاسب عن التغاضي
رجعت لغرفة الفحص ويايه دكتورة
ثانية والمكتب الثاني بي دكتورين
شباب الباب مسدود وانفتح
واستقبلني صوته الجهوري
المليان حدة وفضاضة قبل ماااشوف وجهه
-باباااااا شبيكم صداااااع خبصتوني
اسمع صوت يرد علي
-هسه مو گلنالك بس چيك نفسك
-ماااااابيه شي ياارتفاع هذا
وحتى لو ارتفع ضغطي فمن غبائهم
-كول ياالله موضوع بسيط
-اگلة منهزم وهو محكوم يگلي
بسيطة
دفع الباب شاب اسمر اگرع
ووراه هاجس
بملامحه التعبانة
وجهه محتقن دم
وعيونة غايرة وحمررر
رفع عينه شافني واشرله الشاب وياه
-اگعد
-تفضلو
گوه رد
-صداع عنده
رفع راسه لصديقه باشارة حتى
يحچي هو
-صداع قوي وبسسسسسس
گالها بعصبية
اشرتله اقترب فحصت ضغطه الجهاز
مااشتغل
-تفضل على الردهة التمريض يجوك يقيسون
ضغطك
طلعو گوه وهو يباوع معاجبه العجب
مختفي طول هالشهر وحسب كلامهم
متوتر بالبيت وعصبي مطايق نفسه
لأن انتقل وبعد ميلتحق للدوام
شويه وجاب الولد الويا ورقة الضغط حيل
عالي طلعت من المكتب اچيكه بنفسي
وگفت وهو گاعد عالسدية وحوالي البردة مغلقة
قست فعلا نفسه الضغط ١٧/١٠
-ضغطك عالي عالاقل تبقى هنا ساعتين
تحتاج محلول ينزل
ضغطك ضروري تتابع ويا دكتورك
الأخصائي
-مابيه شي انطوني علاج خل اووووولي
الولد مستحي ويعتذر
-تعبان اعذررررينه دكتورة
ابتسمتله ورديت على هاجس
-سيادة النقيب المستشفى مو مكان لاستعراض العضلات
هنا إما تلتزم بالعلاج أو تتحمل عواقب جلطة ممكن تنهي حياتك بلحظة
-وهسة انتِ ماكو غيييرچ تعالجيني بهالمستشفى
اقتربت منه خليت سماعة الفحص على صدره بهدوء مستفز وگلتله وأني أعدل السماعة على أذني
-بصفتي الدكتورة المسؤولة عن خفر الطوارئ
اليوم أنت مجرد حالة
تحتاج استقرار والضغط اللي مرتفع عندك
ما يتحمل عنادك المعتاد
ابقى هادئ حتى أسمع نبضك
سكت والولد صافن عالجدال بينه
-ضغطك مرتفع نبضك عالي
نفسك اسمع گوه جاي تسحبه
يعني حالياً حتى جسمك متملك زمام الامور علي
-انطيني الزبددددددة
لزمت الورقة اكتب بيها واحچي
-الزبدة براسيتول لتسكين الالم
ابرة حتى ننزل الضغط
والهدوووووء التاااام والراحة
مديت الورقة للولد وياه وهو گله
-اتعبك ابو صعبة
دگ على صدره وطلع اشرتله
-مدد ابلشلك بالعلاج
مدد وشويه واجه ابو صعبة بيده العلاج وتلفونه
يدگ
-العقيد يدگ راح اطلع احاچي وراجعلك
طلع واني اشرتله
-ارفع ردنك
-لييييش
-احقنك ابرة
-لا مااااكو انطيني حبوب
-متفيد ضروري انزل ضغط
-اببببرة مااخذ مو ضروري
-العسكري الشجاع خايف من الابرة
-لغوووتچ زادت بابا ياخووووف
عندي اجتماع امني
-ياااجتماع بينك وبين الجلطة
شعرررررة مجاي تحس بنبضك
-فضييييني وراي هووووسة
بلا كلام رفعت ردنه وهو فاتح عيونه
يريد يحچي راد يرفع راسه
نزلته بهدوء ردت اضرب الابرة
بقوة كفه لزم كفي رافض
ولا حچيت اخذت الابرة بالايد
الثانية بسرعة حقنتها
-ارتاااااح مدددددد
ولوووو انت واضح هاوي الانتحار عالطريقة
العسكرية سمعت انك قطعت الاجازة راجع
للميدان
-لأن ببساطة مااريد اصير مجرد
ملف انقاذ تضيفينه لملفاتچ
وتتفاخرين فد يوم بي
مدد سحبت المخدة من جوه راسه
-ماكو داعي اساساً
انت انسان غير ملتزم واني منسحبة
جر المخدة جوه راسه سحبتها
-لتخلي شي جوه راسك خل يستعدل
الضغط
اريد اطلع دخل الولد يضحك
-لززززمو هاجس
فز يريد يكعد اشرتله
-رجاءا نام خل نشوف شغلنا
صحت لكادر التمريض اجت الممرضة
خلتله الكانولا والبراسيتول وهو يسأل صديقه
-وين لاگينه
-كفختين للچان مسجون ويا مدليهم
مكانه ولگطو
ذب راسه براحة عالسدية واني طلعت
تاركتهم
ربع ساعة واجتني الممرضة تركض
-دكتوووورة البنية عالمراقبة
تقيأت دم
ركضت للردهة النسائية
وصارت گدامي تباوعلي
وخايفة
-حبيبتي حاسة بشي
-الصداااع ماراح
صرخ زوجها
-شسوووويتولها تتقيأ دم
-اهدأ اخي راح ندزها
للفحص
-شهدأ گتلكم واااااااگعة شووووفوها
حتى عيووونها حمر
-راح ناخذها للمفراس
رجعت تقيأت واحنه نحچي وهو
بده يشيل ويدفع بالأسرة ويعيط
واني اصيح
-اطلع برررررره رجاءاً لتخبصنا
الممرضين يحاچونه وهو يفشر
-هااااااي الگح*ة عود تعالجها
وخلتها ذبت دممممممم اليوم افلش
المستشفى على راسكم والله شبييييهة مرتي
جاي ارد ودخل هاجس والولد وياه
واني جاوبته
-طلعو بره ممسموح هالتجاوز
وللعلم زوجتك مبيييينة معنفة
وطلبت الشررررطة
يجون يستجوبوك
صرخ والناس هوسة
شفت هاجس وصديقه
مشاله يردون يطلعو ثواني
بين التفاتي وسرعته هو ماحسيت
بس بشي قوي انشمر عليه
مثل ضوه قوي جدح بنص عيني
ودم دااافي نزل على وجهي
والممرضات ركضولي
وشفت هاجس وابو صعبة هجمو
علي وغابت روحي بس احس
بكل شي صياح وهوسة
وهاجس يضرب على وجهي
وايده ترفعني للكرسي
غبت وانتبهت اني عالسدية
بالطوارئ هو واگف
والدكتورة زميلتي والدكتور
وهو يسألهم
-الاصابة قووووية
-لا لا بس هبط ضغطها
فتحت عيني غووواش بيها
وهو نزل راسه عليه
-تسمعيني ليل
هزيت راسي والدكتور يسألني
-تشوفين دكتورة ليل
غواش قوي بعيني والم لا يحتمل
مديت كفي اله بخوف حضن
كفي بقوة
ماحسيت بشي بعد غير
سواد وغمضت عيني
وصوته كام يتلاشى
وهو يحچي متوتر
-شبييييها شصاااار
