روجداية ذاري النجوم الفصل التاسع عشر بقلم زهراء السراي
ويهزني شوقاً اليك اصده
فيعود أقوى أذ صددت ويكبر
واشيح عنك نواظري لكنني
في خلسةٌ أهفو اليك وأنظرُ
:
:
:
:
:
:
:
ليل
_______
ظلام يحاوطني بس الاصوات
اسمعها
فتحت عيوني على صوت هاجس
وضوه قوي يفحص عيني
ونبض عنيف ينبض براسي مثل
الچاكوچ يحطم جمجمتي من الداخل
حاولت افتح عيني اللي انضربت
بس چانت ثگيلة متورمة والتورم
مانع منها الضوه
اجاني صوته
-تسمعيني ليل
هزيت راسي والدكتور زميلي
يحچي وياه
-اغماءة بسيطة بسبب الخوف
ماكو شي
رجع يداوي بالجرح وهاجس
مثل الظل واگف فوگ راسه
سألني الدكتور
-دكتورة ليل ترى تحتاج خياط تگدرين ناخذج
للعمليات الصغرى
گعدوني زميلاتي وهو
مدلي كفه وگفت وترنحت
سندني بيده ومشى بيه ودخل ويانه
فوگ حاجبي اربع قطب تجميلية
باوعلي هاجس
-شتحسين
-مشوشة وراسي يأذيني
-راجعلچ
گالها طلع علما الدكتور والدكتورة خلصو
شويه وطلعوني عيني مربوطة بالكامل
رحنا للأدارة ولگيت هاجس هناك وشرطة
اثنين سوأل وجواب وشهدو الكل عالموضوع
-تقدمين شكوى
-مااعرف دكتور
-بعد احنه ناخذ اجراءتنا
-دكتور راح اطلعها
-مثل ماگتلك اجازتها اربع ايام
رجع المدير وجهلي الكلام
-حتى لو موجهتيله شكوى تبقين
شاهدة واكو اجراءات من ترجعين
والحمد لله عالسلامة
هزيت راسي وگمت وهاجس وياي
احس بأيده ورايه بس
مالامسني محاوطني خاف اوگع
-اوصلچ للبيت
-لا اتصل بأخويه
-اتصلي وانتظرج
مشيت كم خطوة ودخت وگفت استند
عالحايط
-امشششي بابا اوصلچ وهناك احچيلهم
طلعنا جابولي البنات جنطتي ومشينه
للسيارة اخذ السويچ وصديقه ماكو
صعدت بالسيارة واني دايخة
مااعرف بيش ضربني وشلون وليش
سندت راسي عالكرسي
وهو حرك السيارة
-ليل
فتحت عيوني لأول مرة
يحچي بأدب
-تسمعيني
-اي
-قدمي شكوى ونطيحلچ حظه
-خل يولي المهم زوجته
يشوفوها انطيت خبر للشرطة
يسألون عنها
-انت بيا حال
سكتت شويه ورديت
-بيش ضربني
-جهاز طبي صغير مخلي عالسرير اليمه
صفنت جهازيش
-تحسين بشي غير الالم
-لا
سكتت وغمضت اريد الصداع يروح
وصلنا البيت شكرته ردت انزل
-شكرا تعبتك
-نزلي بابا نزلي جاي وياچ
-شلووون
-شنو خاطفچ وخايفة امشي
فتحي الباب
وصلت فتحت الباب ودخلت اني من المطبخ
بس شافتني ماما عاطت ملابسي
بيها دم قليل وعيني مضمديها بابا
اسمع صوته يسلم وماما انخبصت
بابا صاح
-تعاي ام ضرغام
دخلت وبابا واگف بس شافني
فتح ايده
-يابابا ياحبيبتي
باسني واشر لهاجس
-ارتاح ابني ارتاح
گعد هادئ تولى دفة الحديث
-طبعا اعتذر عالدخلة المفاجأة
بس چنت بالمستشفى بشغلة
امنية وصارت فوضى وهوسة
وسمعنا مرافق مريض معتدي
على دكتورة فركضنا نفضها
وللأسف صار الموضوع يخصني
من شفت اختي مضروبة
اتخذت الاجراءات ويه الادارة
لأن هي فاقدة چانت واني ماعندي
ارقامكم لذلك بعد اذنك عمي اخذتلها
اجازة وكملت الاجراءات ووصلتها
واعتذر عن تصرفي بلا ماارجعلكم
صفنت منووو هذا ماعرفته اختي وحركات
وادب واخلاق وهدوء بابا شكره
-اصلا السويته جميل على راسي
وبالاخير الدم واحد وهي هم بت
عمتك مو غريبة ماقصرت ابني
-الحمد لله على سلامتها
ان شاء الله واني اترخص واي
شي قانوني يصير اتصل بيه
انطى لبابا رقمه وطلع
حاوطني بابا وماما بيبي ماكو طالعة
لبيت خالو عبد الله
-بابا ترى اشتكي معليه بكلامچ
-بابا دايخة چنت بس اريد ارجع
للبيت الصداع موتني
-ارتاحي واني ارتب كل شي ويه
هاجس الولد مرتب ولو مخليته هو متولي الموضوع
-ماگدرت بابا لهسه مصدومة
شلووون تجرأ هذا وهيچ ضربني
وگعدت حچيتلهم اللي صار
اخذتني بعدها ماما غسلتلي
اخذت مسكن وغطيت بفراشي
وبقيت افكر وأحاول فهم هالازدواجية اللي
نقذتني اليوم
عجيب بوقت الجد يتحول شخص ثاني
نمت بتعب لثاني يوم
دگ تلفوني الصبح فتحته
اجاني صوته
-شلونچ اليوم
تثاوبت ورديت
-الحمد لله
-جايينكم الاهل
-اهلا بيهم ليش تتعبهم
-واجب
شويه سكت ورجع گالي
-يلا اخذي راحتچ
غلقة واني گعدت رحت غسلت
ورجعت اخذ تلفوني من الغرفة فتحته
واني بالمطبخ يم ماما شفت
جايتني رسالة منه
فتحتها صورة ورد جوري برتقالي
وكاتبلي
-الحمد لله عالسلامة
دزيت الورد بدالي عالجايات
ان شاء الله اشوفچ
ابتسمت مستغربة هاللطافة
وفعلا للعصر اجه نوح ويا يمنى
والجد وابو هاجس
بين الضيافة والسوالف
يمنى سألتني
-خطوبتنا الاسبوع الجاي
بس اجللللتها علمودچ وانت
معزووووومة
-ببيت اهلچ
-لا ببيت جدو گال الا يمي
-مبروووووك ياحلووووة
بس احتمال مااگدر اجي
-الله عليچ تعاي
شبيچ هو بس انت صديقتي
واساساً خالو كمال راح يعزمكم
وصدگ اثناء الگعدة حلفو
بابا يحضر وبابا وافق خجل
من عدهم
بالليل اتصل بيه واني بالغرفة
مظلمة الغرفة من الصداع بچيت
هواية هم الم ميتوقف وهم موقفي
گدام زملائي واني واحد يهيني
فتحت الخط بس گلت
-الوو
-شبيچ تبچين
وچانت هاي كلمة السر اللي خلتني
ابچي من صدگ مسحت دموعي ورديت
-شويه تعبانة
-الم
-صداع ميروح
-مستحيل يبچيچ صداع
بلا شعور صرت احچيله
-الموقف كل شوووويه يرجع مثل
الفيلم ينرسم براااسي
مستحيل انسى نظرات الحوواليه
شلووون يتجاوز عليه بهالسهولة
-بهالحياة هووووايه تشوفين نماذج
ونفسيات وهذا واحد من هالنماذج الغير
مشرفة رجال يعتقد ان يحقق رجولته
بالضرب والعنف
سواء على زوجته لو عالغير
بس هذول مو رجال هذول ضعاف نفوس
يحاولون يغطون ضعفهم بالقسوة
سكت لحظة
چنت أسمع صوته ينساب بالخط هادئ
لأول مرة
-بس ليش حسيت نفسي صغيرة لهالدرجة
ليش نظرات الكل ظلت معلگة عليه
كأنهم شافوني واني انكسر ووگفو يتفرجون
-لأنچ إنسانة فاهية وحساسة زيادة عن اللزوم
سكتت وهو ضحك
-انت مو ضعيفة بس عندچ كرامة
لذلك انجرحتي
سكت منتظرني احچي واني الصداع موتني
گلتلة وأني أضغط إيدي على جبيني
-تتخيل كلما أغمض عيوني
أشوفه وهو يفشر ويغلط والله يمكن الضربة
انساها بس الاهانة مستحيل
والغريب الكل گالوله اسكت
محد تصرف ووگفة عند حده من شافو عنيف
-لأن أغلب الناس يخافون يدخلون بمشكلة مو إلهم
بس هذا ما يعني اللي صار طبيعي
-بس أني دكتورة واشوف اشكال
المفروض أكون أقوى من هيچ
-سمعي خلي أگلچ شي
هدأت حتى اسمعه
-تتذكرين الصار بيه وانتِ شاهدة صرت
خررردة بسبب الانفجار لا والحلو شنو
مفخخين جثة مال كلب وفجرونه
من اني تصوبت ووطن وصحباني استشهدو
هم گلت هانوني
وشلون الي وجه اروح اصلا وسام شررررف
اعلگة على صدري ان انصابيت
بشغلي بواااجبي ولو هسه يگلولي
تعال ارجع اطب نص الموووت
وااااجب هذا انت انضربتي بواجبچ
وهالأيدين اللي عالجن زوجة هذا السگط
ياما وياما عالجن جرحى ونازحين
فكري بيها هيچ
انكسرت كلماتي بحنجرتي وگلت
-بس احس اللي صار هانني
جاوبني فوراً
-لا اللي مد إيده هو اللي هان نفسه
مو إنتِ
سكتت
لكن الدموع نزلت مرة ثانية
انتبه لصوتي وگال بهدوء
-بعدچ تبچين
-حاولت أسكت
بس ما أگدر
سكت لحظ وكمل بصوت أخفض
-بس اسمعيني زين ليل
ذاك الموقف ما راح يحدد قيمتچ
-بس صورته براسي تتكرر
-ويه الوقت تبهت الصورة وتختفي
وبعدين شلوووون صورة حلوة شو
واحد حشاش عرگچي بساعة اللي لزمته
من ضربچ كفختني ريحة وصخ وعرگ
وجگاير خل يولي
ضحكت وهو ضحك وياي
-تركي الموووضوع ورجعي لدوامج
مرفوعة الراس وحقچ ماضاع
طيحنالج حظه
-والله
-والله حسبي الغلط بحقچ
غلط بحقي اني
واليغلط بحقييييي اويلي
العبه عالبسامير
-شنوووو
-بعدين اعلمچ شنو
ضحك وبقى يحچي
ويايه شفت بهالساعات هاجس
ثاني بعيد عن ضغط العمل
مثقف متحدث رغم لسانة يفلت ساعات
بس نسيت الوقت وياه
واستمر الحديث لساعات لحدما
حسيت إن الظلام بالغرفة صار أخف
گالي
-ادرك شهريار الصباح روحي
ارتاحي والتزمي بالعلاج مو بس
لسانج يرش تيزاب على هاجس ساعة المرض
-تصبح على خير
اليوم الثالث بالليل ماحاچاني بس
دزلي رابط دخلتله خالد الشيخ
مكتوب عيناك دخلت اسمعها موسيقى
هادئة وكلمات رقيقة
-عيناك الدمع الاسود فوقهما
يتساقط انغام بياني
عيناك وتبغي وكحولي
والكاس العاشر اعماني
أأقول احبك يا قمري اه لو كان بامكاني
وانا في المقعد محترق نيراني تاكل نيراني
سفني في المرفأ باكية تتمزق فوق الشطآنِ
أأسافر دونك ليلكتي يا ظل الله بأجفاني
يا صيفي الاخضر يا شمسي يا أجمل أجمل الواني
هل أرحل عنك وقصتنا أحلى من عودة نيسان
ياحبي الأوحد لاتبكي فدموعك تحفر وجداني
فأنا لااملك في الدنيا الا عينيك واحزاني
فأنا انسان مفقود لا أعرف في الارض مكاني
وره دقايق دزلي
-من مفضلاتي استمتعي
بالموسيقى
خليتله ايموجي قلب وطلعت
باليوم الرابع كتبلي
-مستعدة للعودة
-مترددة
-جاي باچر واشوف منو المتردد
ناااااااامي وراچ دوام
گالها بصيغة امر عجيييب ميتحمل
يكون رقيق اسبوع واحد
كعدت الصبح غيرت ملابسي
وتجهزت وصدگ داومت
الورم خف وبقى زراگ فوگ الجفن
دخلت المكتب وبعد الراوند المعتاد
اندگت الباب ودخل بيده علاگة
صغيرة
-صباح الخير
-صباح النور
-الحمد لله عالسلامة مرة ثانية
والدچ راح يجي وضرغام وحضورج
ضروري
-وييين
-للمركز
-يصير مااروح
باوعلي شالي شبه ملفوف
-عدلي نفسچ المركز مليان شكووول
باوعتله وايدي لا اراديا تلمست خصلات
شعري ضميتها
رفع حاجبه بمعنى فهمتيني باوعلي
ممقتنع رد
-ظلي مناخذچ اني احلها من يمي
تفضلي
مدلي العلاگة فتحتها بيها
علبة حلويات صغيرة ووردة
برتقالية
-شكرااا
وگف عدل ملابسه
-الموضوع انتهى تمام
مشى خطوتين ورجعلي
-چيكي ضغطي وسكري
اشرتله گعد عالسدية جبت الجهاز
قست ضغطه طبيعي بس سكره
هابط هوايه
-ممتريگ
-لا گطعت الريوگ حتى انزل التراكمي
رحت لعلبة الحلويات فتحتها
طلعتله قطعة
-عدل سكرك
اكلها بلگمة وحدة ووگف
جبتله مي
-تفضل
شرب نص البطل ومشى
-اني رايح منتظر ابوچ وضرغام
بالادارة اعتبريها انحلت
وطلع وصدگ تمت الاجراءات
بابا وضرغام وياهم
هاجس وكفولي وبعد سؤال
وجواب طلعت البنية صدگ
معنفة هو ضاربها والدم ويه
التقيؤ بسبب جرح صاير
وتقرحات بالبلعوم بسبب الصراخ
والعياط اثناء مشكلتهم
وره اسبوع كل يوم تتصل يمنى
لحد متاكدت راح الورم حتى
اروح لخطوبتها بس الخياط فتحته
وبقت سحجة دم متيبس فوگ الحاجب
اغطيه بلصقات طبية وقررت اروح
وطلعت ادور على شي
مرتب البسه بالحفلة
وبعد فرة وتعب حصلت فستان
اسود عدل مخصر بي ورد ماروني ووردي
ناعم وحجاب وردي حلو
بيومها لبست ورتبت مكياج بسيط
كحل لعيوني ومسكارا وحمرة بسيطة
وردية لماعة وشمرت الشال
على راسي مسشورة شعري
ولامته توجهنا اني وبابا الهم ماما
وبيبي مراحن ويانه حسب كلام بيبي
امها وخالتها ميسكتن وخاف تصير مشكلة
اتصلت بيمنى قبل لنوصل گالت منتظرتج
الحفلة مسوينها بالصالة وكعدة الرجال بالحديقة
وصلنا والشباب بالباب ردت ادخل هاجس
طلع لابس قاط اسود حتى القميص
وفاتح دگمتين من القميص بس شافني
اشرلي وهو يوجه بابا
-تفضل عمي البنات من باب المشتمل يدخلون
التفتت صدگ باب صغير
بصف بابهم
وصل يمي ابتسم
-شلونه الجرح
-الحمد لله
-ليش مضمدة المكان
-لأن بعد بس سحجة ودم متجمد
-سهلة عدت
هزيت راسي بأيجاب فتح الباب وأشرلي
-تفضلي
دخلت المشتمل هدوء اشرلي ممر جانبي
بي باب على منور البيت الچبير
-تفضلي منا
-شكرا
-تتدللين
كالها وبقى واگف گدامي ميفتحلي
الطريق
-بس طريق حتى افوت
-اي ليش لا
كالها ورافع حاجبه وعينه
افترت على وجهي
وحجابي اللي طالعة منه خصل
من گذلتي وعلى فستاني
اشرلي عالصالة دخلت لاگتني
زوجة كمال عرفتني سلمت عليه
ودخلت وشفت يمنى بجمالها الناعم
وفستانها الوردي الحلو وتسريحتها
والبنات حواليها بس شافتني وگفت
-اجييييتي ولچ منين دخلتي
اكو بنية وياها من ركزت بيها
عرفتها روان بنت صديق هاجس سلمت عليه
واني ارد
-هاجس گال البنات منا ندخلهن من باب المشتمل
ضحكت يمنى وباوعتلي
-هذا خاف يشوفونچ جماعته
طالعة تجلطييين بهالملابس
ضحكت
-شيشوفون حاجبي المشگوگ
روان باوعتلي
-حلوة الله يحفظج
يجوز لأن عمو شاف فستانچ ضيگ
وشعرچ طالع
باوعتلها يمنى بأستغراب واني مارديت
البنية شويه غريبة الاطوار واحنه نحچي
دخلت مجموعة بنات من باب الصالة
غمزتلي يمنى
-باوعي كلها تدخل من باب الشارع
باب المشتمل بس للvip
اخذتني يمها عرفتني على اخواتها
وعماتها اثنين شويه ودخلن امها
وخالتها گمت من باب الاحترام اسلم
وجهن انگلب بس ردن السلام
ماعرت اهمية لأي تصرف غير ايجابي
اني جايه اواجب صديقتي وصديقي
وبدت مراسيم الحفلة العراقية الاعتيادية
لحد العقد عقدولهم وارتفعت الهلاهل
والهوسات شويه وگالو يدخل العريس
وصدگ طل نوح باناقته المعهودة وترتيبه
وياه هاجس ووطن ويمنى مخليلها شال
على شعرها دخلو اقربائهم الكل محجب هوسو
شويه عيني عليهم وهاجس عينه
عليه اباوعله يأشرلي على جبيني مافهمته
طبگ حواجبه ضاج اخر شي اشرلي اروح
مشيت خطوات صرت يمه
-شنوو
-الجرح يذب دم
تلمست المكان وهو مد ايده بيها كلينكس
-امشي غسلي
طلعت شفت مغسلة بطريقي
من دخلت حمام بجانب المنور
وگفت عالمغسلة وهو واگف التفتت
خلصي وتعاي عقميها
-لا مبيها شي بسيطة
-ليش ذب دم
-مااعرف يجوز هسه من مسحت جبيني
-بكل شي عبثة
باوعتله بالمراية واني ادخل خصل شعري
واعدل الشال
اشرلي على باب مفتوحة وگبالي ميز مراية
-يمچ بالمجر صندوگ اسعافات بغرفة
نوح
دخلت فتحت المجر وهو واگفلي بزاوية الباب
مسنود
طلعت لصقة خليتها
بسرعة طلعت من جنطتي العطر رشيت
ووصلت للباب
-شكرا
-تتدللين
فتت منه وسمعت صوته وهو يجر
النفس التفتت
-انت ضغطك ممنتظم بعده
-ليش
-نفسك عالي
-الظاهر گلبي المامنتظم مو ضغطي
گالها وطلع گدامي بره
رجعت للصالة وگعدت شويه
اخذنا صور ويه العروس ساعة
وشويه واتصل بيه بابا
-يلا بابا تأخرنا
ردت اطلع مشيت وسمعت صوته
-ليل تعاي منا طلعي
بنفس اللحظة اجاني صوت روان ورايه
-عمووو توصلني اجي وياك
-اي طلعيلي بالباب انتظريني جايچ
مشت ورايه التفتلها
-مناك بابا انتظريني بالباب الچبير
مشت بسرعة تاركتنا وهو مشى گدامي
طلعت وصلت گراج المشتمل وگفني
-ليل
-نعم
سكت شويه وكأن
الكلمات تتزاحم بحنجرته و تتراجع
اخر شي گال
-اراسلچ فهميني
على شغلة
-تمام
طلعت من الباب گالي
-اوگفي وره السيارة
اصيح والدچ
اجاني بابا ورجعنا للبيت
بيبي تسألني
-الحيايا خوما حاچنچ
-لا بيبي بس شو المهر كلش عالي
وجدهم دخل شاور الام وطلعو ورجعو
تغير الرقم لأقل
-اي هاي سوالفهن هن
زلمهن هم من عشيرتنا وخوش ازلام
من هاي ابوها ماقبل
-هي ام يمنى المسمينها على اسمچ
-اي هي
تركت كل شي ودخلت
غرفتي عناية وتفريش اسنان
وطلبت منهم ميكعدوني فزيت بعد وقت
هدوء الليل فتحت الشباك وهوا
الحديقة الحلو لفح وجهي
بعد ماشبعت نوم سويتلي
گلاص عصير ورجعت للغرفة مگدرت
انام دخلت اتصفح فيس
نوح وهاجس ووطن مولعينها
تاگات بهالمناسبة
هاجس منزل اغنية حماسية
وكاتبله بالبوست
-دكتور العائلة صار عريس
والتعليقات عالصورة اشكال
الوان والشباب اغلبهم تعليقاتهم فاسدة
اما وطن فمنزل صورة الهم ثلاثتهم
وكاتب
-العريسسس الزين معقد العائلة
كسرررر الحصااااار وصار اول عريس
بالعائلة
وهم تعليقاتهم هوسة
وسوالف سخيفة مال شباب
اما يمنى فمنزلة
ايدها وايده ومسويتلنا تاگات اني
وهوايه بنات دخلت علقتلها
-اجمل عروووس مبارك ياحلووة
واني اتصفح اجتني
رسالة باوعت الاشعار منه
چنت متوقعة يسألني عن ضغطه
مثل ماگال بس الصار غير كل افكااااري وقلب
كياني
فتحت الرسالة بيها
صورة لخلفية سودة
يبرز بيها ورد وردي وماروني
ومكتوب على نهايتها شي
دققت النظر حسيت بقشعريرة
غريبة هذا مو ورد عادي
هذا قماش فستاني اللي چنت لابسته
مكبر الصورة لدرجة أني گدرت اشوف
خيوط القماش ونسيجة
نزلت للكتابة اقراها
-حتى رسمات الورد
بقماش ثوبك
ارد أشمهن
صفنت هووووايه بالرسالة
اللي بمثابة حجر شمره هاجس ببحيرة
سكون گلبي
والايام البعدها صارت
عبارة عن شعر غزل
وفيديوات رقيقة مارديت عليها
بس الصار بده حجرة اللي شمرها ناحية
هدوئي يأثر بدت الدوائر تتسع
ونبضات گلبي تضطرب
الصراع احتدم بين العقل اللي يحاول حمايتي
وگلبي اللي بده الاستسلام بعد
اخر رسالة دزها مكتوبة بشعر
بعد شهر كاامل
-كون اجيك بنار گلبي
چا حديدك كله اموعه
تنفست بعمق وابتسمت
تلفوني بيدي واني بخفارتي
قررت ارد كتبت
-لازم نسميك جمر مو هاجس
لحظات ورد
-واخيرا المدام تحننت وتمننت
وردت
-شفتك تدز رسائل وچنت مشغولة
ذيچ الفترة هسه ماعندي
شي گلت اررررد
-وياحلاته من رد فااااهي
بارد مثلچ
رغم حقارته ضحكت
رج التلفون بيدي بأتصال منه
جررريت نفس متوترة ورديت
-يابه حي الله الغيااااااب
شدعوووة شهرررر ماكو جواب
-مشغوووولة
-بيه اكيييييد
-غرووور
-شلونچ
-الحمد لله انت گلت احاچيچ
بفد موضوع ومحچيت
-گلت بلكي تحسين وتتطمنين عليه
بس البعيدة ماكو احساس
-جديات ضغطك شلونه
-مضطرب وغير مستقر
ارتفاع وهبوط
-رحت للأخصائي مراجعة
-ماالحگ شغل وفوضى تعرفين
-ميخالف يوم اخذ من وقتك روح
-اجيكم للمستشفى اچيك بس بشرررط
-حتى على صحتك تتشرط
-انتِ موجودة
-ليش مو ضايج مني وتگول ماكو
غيرچ بهالمستشفى
-نعقد هدنة
-تمام هدنة
ضحك وسألني
-شخبار عذبة
-بيبي بخير الحمد لله
-هاي طلعت فد وحدة عرمة
-هااااااااي شنو
-وحفيدتها مثلها انطي مجال لچ
-لتغلط
-المهمممم گعدت استفسر عنها
لاعبة لعب بوقتها الصلفة
-حقها
- بس هم عرمة
ولليوم بسامير وصواريخ وجدي
مسنح للوضع
-الينجرح من موضع ثقة مستحيل
يشفى وحسب اللي اعرفه
بيبي چانت ناذرة حياتها اله بس بعد
شصار الله اعلم بس عندي سؤال
-جووووواب
-ليش هيچ متحامل على بيبي
ضحك وگال
-سألييييها هي
هسسسه خلينه بموضوعنا
-واحنه من يمتى صارلنا موضوع
-من ساعة ما النسر طبب الغزال لغرفته
وگاللها هاي غرفة نوح
صفنت ورجع بهدوء
-رشيتي عطرچ اليخنگ ترستي
الغرفة ولهسه لازگ العطر بالمنشفة
ضاع الرد مني وضاعت الكلمات
كحيت وهو كمل ولا كانو گايل شي
-ليل
-هممم
-يابه معجب
حسيت هووووا بااااارد ضرب
وجهي ورجف گلبي بسرعة
غلقت الأتصال
ثواني ودز رسالة
-صوت انفاسچ المتوترة وصلني
وحقچ نقيب معجب بيچ
وانتِ مجرد دكتورة
استفزتني الكلمة ورديت مستنكرة
-مجررررد
-ايييييي طلعي لسانچ
القرچ الرقة متلوگلج
-وانت ويييييين محصلها وتعجب
بوحدة دكتوووورة مثقفة
مثلي
-اي والله وين محصلها بس
حفيدة عذبة
مووووو نسوان وارثات زلم
العائلة وماخذاتها حاااااااصل فاصل
كممت شفافي عالچفصة
ورجعت اكتب
-المطلوب شنوو
-تبادليني الاعجاب
دزلي بوسة دزيتله ايموجي ايكس
-راااافضة بت عذبة يلا القوي
اعجنه بديه اخلي يلين
بعد دقيقة دقيقتيين
مارد وماكو غير آخر كلمة منه تدور براسي
-بدية أخلي يلين
غمغمت بيني وبين نفسي
-مغروووووور
بعد شويه اهتز التلفون
رسالة جديدة منه
-هااااا شنو هالهدوء
لو صدمتچ كلمة معجب
تنفست ببطىء وكتبت
– لا مصدمتني انتم العسكر
متعودين عليكم تصدرون أوامر
حتى بأرق اللحظات واني مااااحب السلك
العسكري
رد بسرعة
-يعني لو هاجس مو نقيب
چان قبلتي
- لا
-ليش
-لأن الهواجس ما تطلع من الراس
ثواني وإجاني صوته ضاحك بتسجيل قصير
-هاااااي خطيرة هاي
يعني اعترفتي اني براسچ
ضحكت رغم عني
ورديت برسالة صوتية
- لا تستعجل هواي
يمكن مجرد صداع
-خييير خير هسه صرت صداع
-صداع يزعجني
-خوش المهم موجود
بأي صفة كانت
تأففت وكتبت
- انت شلون عندك ثقة بنفسك لهالدرجة
- مو ثقة قوة ملاحظة
-شنو الملاحظة
-من گتلچ معجب
سديتي الخط
-لأنك استفزيتني
-لا لأن ارتبكتي
حسيت وجهي حار رغم اني وحدي بالغرفة
كتبت بعناد
- انت هواي تحلل
- شغلي
-شغلك تحقيق مو تحليل
- التحقيق دائما يوصل للحقيقة
- والحقيقة شنو
تأخر بالرد دقيقتين كاملات
وبعدين كتب
- الحقيقة
انچ مو مثل ما تتظاهرين
گلبي دگ أسرع
-شلون يعني
- قوية بالكلام
بس صوتچ قبل شويه چان يرتجف
- توتر
-من شنو
-من قلة أدبك
دز رسالة صوتية ضحك هوووايه ورد
-هاي الكم كلمة يقطرن ادب ولا داخل
بالعميق چان خدودچ الحلوة تشتعل نااااار
بس هم اجي وياچ يعني لو أكون مؤدب
يروح التوتر
ضحكت رغماً عني
- مستحيل تكون مؤدب
- ليش
- لأنك ببساطة هاجس
-بعدچ مصرة تربطين الاسم بكل شي
- اي
- خوش
بس الهواجس عادة تظل
-واني عندي علاج
- شنو علاجچ
-التجاهل
سكت شويه
وبعدين كتب
-جربي
- جربت
- ونجح
كتبت بثقة
- اي
رد فوراً
- كذابة
وقبل لا أرد اتصل
ظل التلفون يرن بيدي مرة
مرتين الثالثة رديت
- شتريد
صوته هادي لكن بي ضحكة
- جاي أتأكد
- من شنو
-ان علاجچ فشل
-ليش
-لأنچ رديتي
سكتت لحظة
وهو كمل بمكر
-دكتورة ليل
- هممم
-اذا هذا التجاهل عندچ
شلون يصير الاهتمام
تنفست ببطىء ورديت ببرود
-ماكو اهتمام
ضحك بصوت خافت
- كذابة
- ليش بالله
- لأن صوت نفسچ هسه
كأنه راكضة مسافة
- من العصبية تنفسي عالي
- لا
– شلون عرفت حضرتك
تأخر لحظة وبعدين كال بهدوء
-كل شي اعررررف المهم
هسه الخطوة الجاية اسحرچ
واخليچ تعجبين بيه
-ثقة مفررررررطة
-اكييييييد
سكتت وبعدين گلت بهدوء متعمد
-لا تتعود
- على شنو
- على وجودي
- متأخر
- ليش
نبرته صارت هادئة
- لأن فات الوقت صار سنة
انت حواليه
سكتنا ثواني
وبعدين رجع بنبرة مشاكسة
-هااااااا نرجع لموضوعنا
- شنو موضوعنا
- الإعجاب
-گلتلك مرفوض
-ليش
- لأنك متغطرس
-مو مشكلة
- شلون مو مشكلة
- خلي يصير إعجاب من طرف واحد
- وانت تتحمل
- أجرب
-شگد
- لحد ما تلين بنت عذبة
ابتسمت رغم عني ورديت
- تحلم
رد بثقة هادئة
- لا اني عادة ما أحلم
اني أصبر
وسكت بعدين كمل
- واني صبري طويل
دكتورة ليل
سد الخط من يمه واني سكتت بعد
مااعرف هاربة من مشاعري
اللي اول مرة تتوجه لشخص
هاربة من اختلافنا اني ويا
من ماضي عوائلنا
ثواني اهتز التلفون رسالة منه
-اختفيتي
-اني ماسديت الخط
-اني السديته حتى أخليچ تفكرين بيه
- تفكيرك عالي بنفسك هواي
- مو تفكير خبرة
- بخبرة شنو
- بالنسوان
توقفت أصابعي لحظة
وبعدين كتبت ببرود
- خوش خبرة
روح جربها بمكان ثاني
دقيقة كاملة ما رد
وبعدين وصلتني رسالة قصيرة
- غرتي
حسيت الدم صعد لوجهي يمتى لحگت حتى اغار
كتبت بسرعة
- لا تتمادى غيرتيش
- مجرد سؤال
- وسؤالك غرررريب
- بس جوابچ أسرع من اللازم
- لأنك مستفز
- همين مو جواب
تنهدت وكتبت
- هاجس خل نكون واضحين
- تفضلي
- انت تعجبك لعبة الاستفزاز
- يمكن
- واني ما تعجبني
- بس تردين
- لأن عندي صبر
- خوش
يعني اثنينه عدنا صبر
- الفرق شنو
- اني استمتع
وانتي تتضايقين
- انت تراقب هواي
- لأن التفاصيل تهمني
لأول مرة ما لگيت رد سريع
دقيقة
دقيقتين
اهتز التلفون اتصال منه استغربت اصراره
ظل يرن اخر شي رديت
- شنو
صوته هالمرة هادي أكثر
- طولتي
- چنت أفكر
- بشنو
- بكلامك
- وأخيراً صدگتيني
- لا
ضحك بخفة
- عنيدة
- وانت مزعج
و لا تختبر صبري
- ليش
- لأنك راح تخسر
- مستحيل
- ليش هالثقة
سكت لحظة وبعدين گال بهدوء
- لأنچ لو فعلاً زاعجج
چان ما رجعتي تحاجيني
سكتت وحاولت أغير الموضوع
- شلون ضغطك اليوم
ضحك بخفة
- يرادله ضبط انت مو دكتورة ضبطي اليه
- مجرد دكتورة تتذكر
- لا
- شنو لا
- مو مجرد
- قبل شوي گلت مجرد
- چنت أستفزچ
- ونجحت بأستفزازي عبالك مستمتع
-جداااا غاية المتعة
سكت شويه وبعدين گال فجأة بنبرة مشاكسة
- ها دكتورة
- هممم
- بعدچ رافضة تبادليني الإعجاب
- اي
- ليش
- لأن عبالك متأكد راح انعجب بيك وجاي تتحداني
- صح خلينا نشوف منو يستسلم أول
- مستحيل أكون اني
ضحك ضحكة قصيرة
- خوش التحدي بدأ
- اي تحدي
- بيني وبينچ
– على شنو
- على گلبچ
تجمدت كلماتي لحظة
وهو كمل بصوت هادئ
- وصدگيني دكتورة ليل
اني ما أحب أخسر
رديت علي
-راح تخلص خفاااارتي تصبح
على خير
-جهزي اسلحتچ فالمعركة
راح تحتدم
والرابح
هاااااااجس
كالها وغلق الخط وماانكر گلبي
زادت دگاته فاحنة الاناث نحب التحديات
بعدها رجعت للبيت
بس ببالي شي واحد هوووايه
حابة اعرف عنه هو كلامه عن بيبي
من گال سأليها وايدها ثگيلة
بعد طقوس الراحة والنوم
گعدت على صوت بيبي وماما من الصبح
بالمطبخ
وبيبي گاعدة هم تأدي طقوسها
وتجهزلي الحنة عيني منها
ضافت مي الورد منقوع القرنفل
وهيل مطحون
بستها من راسها وسالتها
-الهيل شنو فائدته
-يعطر ضفيرتچ وامشي تريگي حتى
نگعد بالشميسة احنيچ
تريگت رحنه گعدنا بمكاننا المعتاد فتحت
شعري وتهوسلي هوساتها المعتادة
-بيبي
-يابعد روحي
-اررريد اسألچ سؤال
قبل فترة هاجس ابن كمال
گالي ايد بيبتچ ثگيلة
ضحكت وهي ترتب بخصلات
شعري حتى تحنيني
-هذا شبيه جده اكله من ايدي
كتلة يلا ارتاح ماتشوفينه
من نتلاگه انا ويا واحد يبز الاخر
بالحچي بس انا اضحك علي
عادته فريخ جاهل مثلج
ومثل اخوتچ
-هههههههههههه يابيبي شنو جهال
-جهال بعيني چا منيلچ الكبر
-اييييي بيبي احچيلي
-هاي من چان صغير هيچ عمره
بعده ما طاب العشرين رحنه للگاع
اني وابوج وضرغام انت وامج وفارس
بالبيت بأيامها نبني بيت للحارس
وهم نشوفها خفنا يوصلها الماي
من طوف الشط وصلنا لگينه المكان
خير من الله ماواصله شي ابوج وضرغام
راحو لذاك الصوب يجيبون الحارس لگيت
الوليد گاعد بسيارة جده
ووياه وليدات بعمره
تمشيت انا واريد اطب لگاعي
شو هذا نزل راكض
-وييييين وين حجية
-ولك گاعي شني الوييييين
هو شايفني چذاب من ماتت
حبوبته ومن ماتت امه
وبالفواتح والمناسبات
بس صلف ولسان
-ماكو گاعدين جماعتي هنا
-شو دوووووخر حبوبة
لا اتويك تووووي
شو هذا نفش روحه نفش ووگف
فوگ مني وشفتي شطوله
چنه فحل تووث شگده
-ماكو طبة للگاع ذاك
الوكت راااااح خوووش الگاع
كلها لجدي سالم
-گاعي وگاع عمي وگاع ابووووووي
دميل لغاد ماظل عليه بس
صل الحية
مد ايده راد يدفعني وانا صحت
-خااااااايب گلابك ابن هووووويجس
ولك تريد تدفعني
واطيح بي اول شي طگيته بعصاتي
ووگفت على طروف اصابعي
طگيته راشدي وهو تسودن
مايگدر يطگني بس صاح
-عذبة القرررررچ اني تضربيني
-واضرررررررب ابووووك واهلك
ساااااقط ميل ميل
عالحس العالي طلع ابو كمال
من البيت واجه يمشي بهمة
بس شاف الولد ينتففض ويصيح
علي طگه راااااشدي
-ولك هذا الغلط على جدتك
-مااااابقى هنا والله تضربني
لخاطر هاي
هو گال هاي واكل الراشدي الاخر
وطلع موذح راكض وجده واگف
-امسحيها بلحيتي
-الحيااااايا العندك بالبيت تاااارسات
راسه ترس ابوووو كمال
خلي الافاريخ الجهال بعيدين
عن سووووالف گبل الراح
راح ويه اهله وبناتك لهساعة
يطحنن برحى ذاك الوكت
تعذر مني ومشى ماخذ السيارة
بيها صحبان الولد وراح
ضحكت واني اذكر كلمة القرچ
كلما ضاج وعصب گالها
طلعت عادة عنده
كملت بيبي الحنة خلتها
وباوعتلي
-يابعد روحي نفس الضفيرة
باستها وهي محناية وگفت
اريد اعدل ملابسي بست راس
بيبي
-ربي يخليچ اليه وتخلين
حنة لبناتي
-خااااايبة دسويها وعررررسي
وشوفي ياهي الماتحنيهن
للظهر سبحت وگعدنا اني وبيبي بالحديقة
تمشطلي وجدلت شعري
بعدنا واگفين نحچي وطلعت
ماما تمشي بسرعة وجهه
احمر وعيونها من الدموع
متنشاف ركضتلها وبيبي ممنتبهة
-شبييييچ ماما
مشت تاركتني وراها وراحت
لبيبي اللي صفنت بوجهها وبخبرة
مرة كبيرة بالسن لطمت خدها وگوه
طلعت الحچاية من لسانها
-يااااهو منهم علاووووي لو سهامة
وباحساس أم ربت اولاد اختها
الاثنين ماما بچت وحضنتها
-سهامة يمه
گوة طلعت الحچاية من لسان بيبي
-ماتت
هزت ماما راسها وبيبي
تهاوت للگاع مغمى عليها مشاعر
الحزن والخوف كلها تجمعت بگلبي
واني أشوف بيبي الحزن غرف گلبها
وهوت للگاع من هول الصدمة
وبين حزني على خالة سهامة
ماما تشهگ ونزلت للگاع حضنت بيبي
واني احاول استوعب الاثنين
رفعنا بيبي اللي فاتحة عيونها
ومابلسانها غير كلمتين
-ياسهامة يايمه
ولچ يممممه صدگ تحچين
وگعت دموع ماما وهي تهون عليها
المصاب
-اي يمممه
دخلنا بيبي جوه واحنه نحاول نصبر
نفسنا ونصبرها خالة سهامة
الاقرب لماما وبيبي
ماما وبيبي يطلعن بملابسهن
وماما تحچي لبيبي
- سودة عليه وهي
نايمة غيد رايحتلها لأن متأخرة
بالنوم ولاگيتها بفراشها
-يممممممه يممممه ولچ
سهااااامة يمه يابعد خالتچ
غمضت عينچ گبلي سوووودة
بوجهي
نعت بيبي بحزن ودموعها ماتوقفت
ياشابه ومدري شجاها
وياعلتج ماعرفناها
والبارحه جنت انه وياها
واليوم وسفه انصب عزاها
بهاللحظات اختلف الزمن
وماعاد نفسه الزمان اللي انعرفه
حسيت توقفت عقارب الساعة ببيبي
وطلع بالهوا ريحة ذكريات من ماضي
بيبي وذكريات خالة سهامة وياها
اباوع لماما اللي تكفكف دموعها خوفا
على بيبي من الانهيار
وبيبي اللي انفرط عقد صبرها
وتناثرت سنوات عمرها وذكرياتها
ويه خالة بلحظة وصول الخبر
الموت مو بعيد عنه
بس هالمرة اجه داخل من شقوق الباب
بدون ميدگه
مامهلنا حتى نودع ضحكة خالة سهامة
او نحفظ نبرة صوتها الأخيرة
بقارورة للذكرى
-سهاااامة
صرخة بيبي مو بس صرخة حزن
بس بيبي چانت تسترجع عمر كامل
بلمح البصر
تخيلت غيد
مدللة خالة سهامة
اللي ولدتهة بعمر ٤٥ بعد ماانقطعت عنها
الشهرية وظنته سن اليأس
وطلعت حامل بغيد اللي دللتها
خالة وسمتها بزر الشيب
صغيرتها اللي ظنت امها نايمة نوم
استراحة
شنو چان شعورها وهي تلمس
خدها البارد
شنو چان شعورها من صاحت بأسمها
وماردت عليها
كلمة ماما بقت تتردد براسي
-ماتت بالفراش
الموت بالفراش هو أقسى أنواع الموت
أن ينام الإنسان بأمان بيته
ويگعد واحد من اهله يلگا رايح
لعالم ثاني يستحيل بي اللقاء
عله صوت بيبي وهي تعدد صار يثقب روحي
ورجعت تون
-والبارحه جنت انه وياها
واليوم وسفه انصب عزاها
باوعت لماما تلبس الاسود وتبچي
على اختها وبنت خالتها
بهالساعات وبهالغرفة
ما چان عدنا سلاح غير الدموع
نواجه بيها سچاچين الحزن المفاجئ
اللي حل بحياتنا وسرق أحن
امراة مرت بحياتي
بابا اجه بسرعة غالق المجمع
وطلب من عدنا نتجهز
-تجهزو بابا
-بابا منين وصلك الخبر
-كمال ابن الحجي اتصل بيه
اولاد جعفر مخابرينه وهو
اتصل گال بلغ الحجية لأن
خالچ علي مصدوم ومتخربط
حچاها بصوت ناصي خاف بيبي
تسمع
وتجهزنا وطلعنا بالطريق كل
مرة نطلع هالطريق بفرح
وتلفون ماما وبيبي ميسكت
وخالة سهامة كل شويه تتصل تتأكد
يمتى نوصل حتى تستقبلنا
الا هالمرة حسيت الطريق باهت
ومابي روح يمكن لأن متاكدة راح
نروح ومنلگاها بالبيت
اني وطول عمري اتصالي وثيق
باقربائي من جهة ماما اكثر بما
ان بابا وحيد اهله واقربائهم قليلين
الطريق القصير صار طويل
وبيبي ماغفلت لحظة بودها تطير
وتحط ببغداد
ووصلنا بس شوصلنا التابوب عالسيارة
وبيبي فتحت الباب تريد توصللها وتطير
صارت عين بعين ويه خالو علي اللي
بس شافها ركضلها وصاح
-يااااايمه خلييييتها لحد ماتوصلين
واعلن الحزن بروح بيبي ونعت بصوت
وهي تباوع للتابوت احتضنها
خالو علي واخواته واخوانه واولاد
خالة سهامة الكل بره منتظر بيبي
اللي اصرت تروح للدفن وماما وياها
دخلت اني للبيت وانصدمت بهاجس
ووطن سلمت وفتت جوه گلبي
يدور على غيد وشفتها بس ششفت
مصدومة گاعدة منكمشة على نفسها
واخواتها حواليها والبكاء يكرب الروح
يبين مدى عمق المصاب
مشيتلها وگعدت گبالها رفعت راسها
ومثل طفلة صغيرة وكعت دموعها
-ماتت ماما
كالت هالكلمة وحضنتها معبرة
عن حزني بفقدان هالشخصية الجميلة
اللي مشفتها مرة الا وضحكتها مالية
وجها الدافي
حضنتها واختها گومتها واشرتلي
-ليل اخذيها لغرفتها فدوة مرتين يغمى عليها
دخلتها الغرفة متگدر تمشي
خليتها عالسرير مددت وخلت راسها
على رجلي
امسح على شعرها ودموعها تنساب بهدوء
صوتها رايح مسحت دموعها
نص ساعة وحسيتها غفت بس
الصار چان العكس جسمها برد
ونبضها ضعف
خليتها عالسرير وطلعت راكضة
برة لأختها الچبيرة
-منوووو موجود من الولد بره
-شصاااار
-تخربطت غييييد
-يمممممممه
فزت تاركة المكان وراحت ويايه
شافتها ولطمت تركتها وطلعت لأن گالت
اخوانها اثنين راحو للدفنة
باوعت لوطن وهاجس بره ولمة
رياجيل بالگراج اجه وطن بسرعة
-وطن شغل سيارة غيد
بت خالة تخربطت
ركض تاركني وراح لهاجس
باوعلي واجاني
-وطن راح يشغل السيارة
انت لميييييي حجابچ عدل وطلعو البنية
بسرعة
لااراديا مديت ايدي للشال عدلته
ودخلت اني واختها الچبيرة
شلناها وطلعنا بيها باوعتلي
-فدوة ليل وياها مااگدر اترك البيت
والنسوان
مسحت دموعها ودخلت وصعدت اني ليوره
يمها ساندتها بحضني
ووطن وهاجس ويانه
لأقرب مستشفى مشيتها مگدرت
سندها ويايه وطن وبعد الفحص
سكرها نازل لمستوى مرعب بينها
وبين الغيبوبة شعرة صعدو الها
بمحاليل لمدة اربع ساعات يراقبوها
واگفة بره يم شباك چبير بالممرات
وهاجس بصفي عينه عالشارع سألني
-ليش تاركة البنية
-غفت خطيه
حقها والله مصدووومة لحد الان
قبلها بيوم تحجي ويه بيبي
واتفقن يطلعن زيارة
سويه
- لا حول الله الموت حق
بس ممكن اگلج شغلة
عبالي عندة شي مهم رفعت راسي
اباوعله
-گول
-عدلي حجابچ
-يبووووووو
-شبيچ لچ
-كل ماشفتني وگتلي عدلي شالچ
اني بياااااا حال
-والحال شعلي بشعرج الاحمممر
باوعتله صفح ورجعت الطالع من شعري
جوة الشال
حسيت بيده وهي ترفع ضفيرتي
ويخليها على كتفي
-وهاي شنوووووو
لو هاي والگذلة خاااارج منطقة التغطية
مداخلات الاسلام بعدهن
سحبت ضفيرتي دخلتها جوه العباية
اللي لابستها وهو عينه مني
-ليش صابغة
-صبغيش
-شعرج چان اسود
-حنة
-اووووويلي
گالها وتركته هووو وسخافاته ورحت شبه
راكضة لغيد گعدت يمها وطن چان راجع
للسيارة منتظر بقينا
الى أن استقرت حالتها رجعنا بيها للبيت
ابرة مهدئة انطوها خلوها غطت
بالنوم حتى جسمها يرتاح
وطلعت ويا بنات خالة وحدة
راحت وياهم والاثنين الكبار
بقو لمينه البيت وجهزنا الصالات للمعزين
وهاجس ووطن وولد جعفر اخو
زوج خالة سهامة تولو
مسؤولية استقبال الرجال
لحد ميجون من الدفن
اني صارت غيد مسؤوليتي
كل شويه اطمأن عليها الى
ان صار الليل ودخلو من الدفنة
بيبي خلصانة وماما واخوات خالة
سهامة منتهيات
گعدناهم يرتاحون واكلولهم شي
ودخل ابن خالة الچبير
صاح
-اللطم والبچي ميرجع امي
بيده قرآن مجزأ صاح لاخواته
-وصلولها أجر ختمة الليلة
تحتاجها
وفعلا اخذنا الاجزاء وبدينا
نختم
لحد ماهدأ الكل وبيبي اقتنعت
تنام وترتاح كم ساعة طلعت من الغرفة
بس تأكدت منها
رحت لغرفة غيد اخواتها نامن
وبناتهم واولادهم
عيني ماغفلت من القهر
باوعت غيد ماكو
طلعت بره گاعدة بالحديقة
عالكراسي ساندة
راسها بتعب عالميز وگفت يمها
-گعدتي غيودة
هزت راسها
-غيد اسويلچ شي تاكلي
-مااگدر
-چاي او حليب دافي ترتاح
بلاعيمچ
-مااگدر ليل شلووون افارگها
شلووون اعيش بدونها
انفجرت باچية تشرحلي الصار بنبرة حزينة
مليانة اشتياق
البارحة أمي چانت مو على بعضها
وكأن روحها بدت ترفرف
وتريد تودع كل ركن بالبيت گالت
تعاي وياي نعدل البيت گلتلها
-ماما البيت نظيف
-خايبة يجي خطار شي عاد البيت مرتب
وگعدت تسولف ويايه عن بيبي عذبة
وشلون عاشت وياها بأول شبابها
وشلون تزوجت بابا وردت اسوي غدة
مقبلت گالت اني اسويلچ
وصدگ سوتلي تضحك تگلي
خل ادللج
من خلصنا بالليل گعدت يمي
بغرفتي سحبتني يمها خلت راسي بحضنها وبدت تمسح عليه بإيدها الدافية
وسولفت لي السالفة اللي چنت أسمعها منها بس هالمرة چان الها طعم ثاني طعم الوداع
-تدرين جيتچ للدنيا چانت مثل المطر
بنص تموز چنت أگول خلاص
العمر ذبل وكبرت وسن اليأس دگ بابي وطفى شموعي چنت محضرة
روحي للوحدة وللبيت الفارغ اخوتج
كبرو واستقرو بين الدوامات وعوائلهم والشغل
ايام واني مريضة ورحت للدكتورة
گلت تطيني شي يگطع الشهرية
فد مرة گالت سويلي تحاليل
وسويت صدگ رديت للدكتورة
حتى الطبيبة تعجبت
گالتلي هذا حمل متأخر ومعجزة
اذا ثبت وأني چنت أبچي وأگول
يا ربي هذا جبر خاطر لو اختبار
لأن كبرت وبعد ماظل بالحيل باقي
بس من نبضتي ببطني وحسيت بيچ
صدگت ويامحلا من يوم
من اجيتي للدنيا بسلامة
و شفت عيونچ عرفت إن الله
راد يملي حضني من جديد حتى
مااظل وحيدة
وجابچ إلي ضوه بآخر ايام الشباب
فرحتي بيچ يا يمه ما شالتها گاع
ولهسه بعدني فرحانة ومامصدگة
عندي بنية صغيرونة تارسة البيت عليه
كملت كلامها وحضنتني
نمت وطلعت راحت لغرفتها
فزيت الصبح على خيوط الشمس
واني بعدني سكرانة بدفو وسوالف ذيج
الليلة
اباوع الوقت متأخر گمت رحت للمطبخ
مالگيتها رحت للغرفة استغربت
شفتها نايمة بست ايدها اريد اگعدها
بس حسيت ببرودة غريبة
برودة جمدت روحي
-ماما ماما گعدي ليش نايمة لهالوقت
ماردت هزيتها على كيف عبالي غاطة بالنوم
بس أمي چانت رايحة لعالم مابي
بس رحمة الله
تلمست وجهها چان أبيض وهادئ
ومبتسمة نفس الابتسامة اللي نامت عليها وهي تسولفلي عن معجزة جيتي لهالدنيا
وگعت دموعها وگوه حچت
-مو مستوووعبة ليل
شلووووون راحت شلون راح افارگها
لهالعمر ومتنام اذا متتطمن عليه
وتگعد من ادرس يمي حاستني
طفلة مو بنية بآخر سنة
جامعة
شهگت وحضنتها اواسيها
بس بقت تبچي
وهالليلة بقيت سهرانة
وياها للصبح قام العزاء
وبين الفرق بفراغ مكان خالة سهامة
صارت ظهرية ورجعت غيد تخربطت
بسرعة اتصلت بهاجس لأن باقي
بره بالچادر اللي ناصبي
يطبخون ويكملون امورهم والبقية
بالحسينية مسوين العزاء ثواني رفع الخط
-الو
-هلاااا
-تگدر تاخذنا غيد تخربطت
-انتظركم يلا
دخلت لبستها ومشيتها وصلت
باب الگراج وشفته واكف
مسنود عالباب وجگارته بين شفافه
ويضحك ويه وحدة اسمها أسماء
حفيدة جعفر اخو زوج خالة سهامة
وصلت يمهم وهي تگله
-وهاي كلكم العسكر يختاروكم هيييبة
وضخامة
وگفت باوعلي ونفخ الدخان ورد
-اكييييد
باوعتلة مرتاااااح وفرحااان بمياصة وعيارة أسماء
سألته
-جاهزة السيارة
اشرلي طلعت جاي ادخل غيد للسيارة
وسمعت صوته الحقير المتلاعب
-تعاي ويانه اسماء
هي ماصدگت اجت راكضة صعدت
ليگدام
گعدت اني وغيد ليوره وعدل مرايته
ناحيتي وطلع باوعتلي الخفيفة وسألتني
-ليل شعجب معالجتي غيد بالبيت
انت مو دكتورة
-امور طبييييية متعرفيها
حبيبتي
-شيرادلها قياس ضغط
قياس سكر وفضت
-امممم صح يلا اجيبلج الاجهزة وتعاي عالجي
المرضى
-ليش لا شوووو الاطباء صارو
عشرة بألف
-ماصرتي دكتوووورة
اباوعله مبتسم ويسوق
بهدوء وهي التفتتله تضحك
-وليش ماااااصير شناقصني
سألها هو
-موو گلتي خلصت تربية قسم
تاريخ شجابج عالطب
-اذا اخلي شي براسي اسوي
ضحك هو وغمزلي بالمراية ورد
-واني كذلك الاخلي برااااااسي
اسووووووي وقناص اقنص
الطيييير بالسما
بقت هي تلغي واني على اعصابي
دخلنا المستشفى واجه دكتور
مقيم دوري بقيت اتناقش وياه
بالعلاج والكلام اغلبه مصطلحات
طبية ثواني وهاجس صار بينه
-حبيبي ابو الشباب تعبناك
طلع الدكتور واسماء بسخافة سألت
-ليش ترطنون رطن خو احچي
عربي موضوعها بسيط هبوط ميحتاج
فرد عضلات وشوفوني اني احجي انجليزي
فعلا ثارت اعصابي وتمنيت انطيها
كف اطير حواجبها اللي التاتو مالتهم
واصل لأذنها رديت بعصبية واضحة
-تفضلي عالجي البنية اقريلها
تعريف النبات الطبيعي
ورسميلها خارطة العراق وعددي
عناصر المناخ حتى تتتحسسسسسن
يعني عجيب شنو هالتدخل
التفتت هي لهاجس تريد ترد
مااعرف شبيه بكف ايدي
لزمت فكها خليتها تباوعلي وبعدت ايدي
ورديت واني اباوع
بعينها
-من الثقافة ان يكون ردج
للمتحدث موووو للي بصف المتحدث
كلامج ويايه اني
تباوعيله وتردين ليش
هو عيونه تتلاعب وفرحان بهالعرض
المسرحي صار بينة
-هاج أسماء فتحي السيارة
جايچ اني اوصلج وارجع للبنات
باوعتلي صفح هزت ايدها ومشت
-رووووح وراها وصلها ولترجع
اني اخذ تكسيييي
-انچبي
گالها واني شطت ردت ارد
-وفرررررري لسانچ الطويل وردودچ
للرد عليه مو معلگتني
بت عذبة منتظرررر ردچ
-لووووو تموت
-الغيييييرة تجدححححح نار
هزيت ايدي وتركته
ورجعت دخلت گعدت الوم نفسي
واعاتبها عالصار صدگ گلبي احسه
يغلي
وكأن أسماء تقربت لشي يخصني
الي
نص ساعة وصار يمنا
غيد بعدها عالمحلول اشرلي من الباب
و طلعت
-نعممممممم
-خلصتو
-شويه باقي
-تمام
مشيت خطوة ورجعت
-وين السنيورة
-رجعتها واجيت
-بييييها الخير
ضحك وصوته رن بالممر
باوعلي
-ماباقي شيييي دكتوووورة
تركته ورجعت طلعنا غيد ورجعنا للبيت
صارت احسن
وانشغلنا بين المعزين والفوضى عيني
من غيد اللي كلما يگلولها اخواتها
بابا يريدچ متروحله وهو ميدخل
لأن عزاء النساء
ثالث يوم بالليل راحت الناس
ومابقينه بس احنه وارتفع صوت
الخلاف بالصالة خالو علي
وزوج خالة سهامة وأولاده
بيبي ماگدرت تسكت سندتها
ودخلتلهم وهنا چانت الصدمة الچبيرة
وخالو علي صوته رايح حزنا على اخته
وقهرا من الموقف
-استعجلت صااااادق
شنو خوووويه صغير جاهل نغييييوة
زين انت فايت بفالك ومتزوج
صار بال١٢ سنة وعندك اثنين من
الخاتون لييييش تصدمها
هاااااي ماتت مجلووووطة شحصلت
بيبي بهتت روحها وتسندت عليه
-معرس على سهامة
گعد عمو صادق وگوة گدر
يرد
اولاده كبار صافنين
-ابني من زواجي الثاني صار
زلمة اسمه محمد علي ويتصل
وكاتب علي بالتلفون محمد ٢
دگ التلفون وهي صاحتلي واني بالحمام
-التلفون دگ
-منو يتصل
-محمد
-اني عبالي محمد ابني
محمد ابن خالو چبير مواليده سبعينات
باوعله
-متزوج ياااااابة وبهالعمرررر
-ماغلطان مازاني يابويه
خالو علي باوعله
-لووووو مخليها سكتة ولا كاسر گلبها
-موووو اني اگللكم محمد ابني الصغير
هي عبالها محمدنا ردت علي كاللها اريد بابا
من سمعتة صوته صغير سائلته انت منو
گايللها اني محمد علي بابا وينه
من سائلته ابوك منو راد مطيها اسمي
من طلعت من الحمام گعدت حلفتني
وحجيتلها بس صار اسبوعين
وهي سكتت گالت عيب بهالعمر اعاتبك
ماااااادري هالخبر يكتلها
بيبي ضربت ايد بأيد ووگفت بوجها
-كسرت جنحها من هي بنية
وظلمتها واذيتها وشوفتها الوووويل
وسكتت لخاطر ولدها وبناتها
تاليتها تطلع معررررس
ذبت بيبي حسرة ووگفت
-امشينه يمممممه ابو ضرغام
ردني لبيتي هالبيت
الماتت بي بنيتي مكسورة گلب
مالي بي گعدة
تركنا الصالة مصدومين
بس الصدمة الاكبر بغيد
اللي لابسة ملابسها وبيدها
جنطتها وواگفة واختها تتوسل بيها
-فدووووة غيد گعدي
تعوووفين ابوي وحده بهالمصاب
-مااگعد وبابا يرررروح لمرته
الثانية الكسر بيها گلب ماما
رجعت صاحت
-گلوووووله لبابا مو عباله ماما متدري
بسسسسس چانت طوووول السنين
شاكة ومن تأكدت طگ گلبها وقررت تثور
علي للمرة الاخيرة بس للأسف
ثورتها چانت فراااااق وموووووت
-امشي يمي بيبي
باوعت لبيبي وشمرت نفسها بحضنها
-بيبي من القهرررر ماتت
والقاهرني اكثر محچتلي ان هي عرفت
حتى لااختلف ويه بابا
لزمتها ماما ودخلتها ويانة للغرفة
-سمعي ماما غيد اول شي
متگدرين تحاكمين ابوچ هذا عقوق
غلطان اييييي غلطان من ساسه لراسه
ثاني شي مباقي شي لتخرجج
اريدچ بطلة سباعية
تخلصين هالسنة واخذچ يمي ويم
ليل وبيبي والله ماارجعج هنا الا لمن
تملين من عدنا
هزت راسها وحضنت ماما
اخوواتها الكبار حواليها
واخوتها
بيبي اصرت نرجع وفعلا رجعنا
بعد ماتطمنا على غيد
بالطريق وتلفوني رج بأيدي
فتحتة رسالة من وطن
-ليل رجعتو
-اي بالطريق
-احنه هسه وصلنا
اگلچ
-گول
-غيد شلون صارت
-الحمد لله احسن خطيه منهارة
-حقها هي دگة ابوها تنلم
صفنت هذا شعرفة
-شعرفك
-غير صارت هوسة بالحسينية ونسابة
زوج خالتج الجدد اجو وصارت طگة
وطيح بين خالج علي وابو محمد زوج خالتج
-استغفر الله كارثة يعني
مصدووومين من قهرها والكتمان
ميتة
-الله يرحمها يلا لچ ظلام ولي
نعسان
-روووح عراق روح نام وخلصني من
شرررررك
ودعني وراح واني بس وصلت نمت
لأن ثاني يوم دوام گعدت الفجر كالمعتاد
بيبي تصلي صليت وياها ورحت للمطبخ
سويت چاي الي والها ورجعتلها
-حبيبتي شربي چاي دافي صوتچ
راح
-يابيبي گلبي هذا اهجسه يرفرف
يريد يفر مني ويروحلها
ولچ ليلة اخذها لبغداد وغربها
عنه وحرمها شم الهوا من الشك
چيف هو چلب ويدري بروحه
نگس يخاف ويشك
وصبرت رغم قوتها وترده بكل
وكت بس مافاد والله ظنيته
چن وگعد بس لا لهالعمر بعده
خنزير يدور وراها وهاي التالية
انكسر كلبها وراحت
-بيبي ١٢ سنة معقووولة ماعرفت
خالة
-لا طول ذيچ السنين چانت تگول
ادري بي عنده شي بس مالازمة علي
لزمة ولا مواجهته
-لا حول الله
-گلبي ظل يم غيدة سودة عليه
-بس تمتحن نجيبها يمنا ترتاح
بستها بعدها وطلعت
لدوامي ماشية بالسيارة وسط
هدوء الطريق ودگ تلفوني رفعته
اسمه مالي الشاشة
جاثووووم رفعت الخط واجاني
صوته
-الووو
-هلاااااا بالغياب
-ياغياب يومين العزاء اني
اشوفك
-يومين قليلات لتتأخرين
-شنووو
سألتة مصدومة
-على شنو مااتأخر
-عليه
گالها وغلق الخط خلاني
بحيرة
وصلت المستشفى واني بحيرة من كلمته
ركنت سيارتي والگراج چان شبه فارغ
هدوء يسبق عاصفة مشاعري
مشيت خطوتين واجاني صوته
-ليل
شي دافي تسلل لأحشائي
وسكون غريب سكن أطرافي ورضى غروري كأنثى وهو منتظرني بهذا الوقت التفتت
شفته بزيه العسكري وقيافته المعتادة
وبخطواته الواثقة اجه يتمشالي
-صباح الخير سيادتك
-صباح النور دكتورة وين رااااايحة
-بده دووووامي
-وين الرد
-أي رد
-الرررررد على كلااااامي
-لتصييح
عض لسانه بحركتة كالمعتاد
ورفع عينه لحجابي بنظرة فاحصة
-ريحة الحنة بعدها
باوعتله صفح وهو ابتسم
-بس خلي الشعرات داخل الحجاب
رحمة لدين محمد
عدلت خصلة كذلتي الطالعة بعناد
وگعت لاحت اطراف شفتي بحركة عفوية
رفعت عيني بتحدي وگلت بصوت واثق
-يعجبني ألبسه هيج
تقرب بخطوة سريعة واني ابتعدت
حاصرني بظله وهمس
- ماباقي شي وأسوي اليعجبني
-شنووووو
-مثلاً هالشعر والحنة اللي تتطاير من بين خصلاته يختفي جوه الحجاب ومحد يشوفه غير……
-غير منو
- غيررررررري
-تمام نسيت اسألك سؤال
-جواب
-اسماء شلونها
-بخيييير
-روحلها تنفعك متشابهين
ومارس عليها دور العاشق
عض شفافه بخباثة ورد
-دور العاشق مايلوگلي الا وانت
المعشووووقة
- تحلم
گلتها ودرت وجهي وردت أمشي
بس صوته ورايه وگفني
چان صوته بي نبرة تملك
خلت القشعريرة تسري بدمي
- جهزي نفسچ هاليومين
التفتتله ورديت بتحدي عيوني بعيونه
-لشنوووو
نزلت عينه لشفافي
سكنت نظراته هناك لثواني
همس بكلمتين بصوت هامس
ومشى تاركني غارگة بحيرة
والكلام يرن مثل صدى يملى روحي غرابة
- لشفافچ الرطبات انشف مايهن
