رواية الرجل الاخر الفصل الثامن عشر بقلم جوهرة
ﺍﻥ ﺍﻟﻌﻴﻮﻥ ﺍﻟﺘﻲ ﻓﻲ ﻃﺮﻓﻬﺎ ﺣﻮﺭ
ﻗﺘﻠﻨﻨﺎ ﺛﻢ ﻟﻢ ﻳﺤﻴﻨﺎ ﻗﺘﻼﺍﺍﻧﺎ ...
ﻳﺼﺮﻋﻦ ﺫﺍ ﺍﻟﻠﺐ ﺣﺘﻰ ﻻ ﺣﺮﺍﻙ ﻟﻪ
ﻭﻫﻦ ﺍﺿﻌﻒ ﺧﻠﻖ ﺍﻟﻠﻪ ﺍﺭﻛﺎﺍﺍﺍﻧﺎ .
🌷🌷🌷🌷🌷🌷🌷
******
ﻧﺸﻮﺍﻥ ﺑﻘﻰ ﻳﻮﻣﻴﻦ ﺭﺗﺐ ﺍﻟﻮﺿﻊ ﻭﻫﻤﺎﻡ ﻭﻓﺎﺭﺱ ﻳﺴﺎﻋﺪﻭﻧﻪ ﻓﺎﺭﺱ ﺗﺒﺮﻋﻠﻪ ﺑﺘﻜﺎﻟﻴﻒ ﺍﻟﻌﺮﺱ ﺍﻋﺘﺮﺽ ﻣﻴﻘﺒﻞ ﻭﻓﺎﺭﺱ ﻛﻞ ﻋﻘﻠﻪ ﻫﺪﺩﻩ ﻳﺰﻋﻞ ﺍﺫﺍ ﻣﻴﻘﺒﻞ ﻓﻘﺒﻞ
ﻣﺮﻏﻢ ﻛﻮﻟﺸﻲ ﻭﻻ ﺯﻋﻞ ﻓﺎﺭﺱ .
ﺍﻣﻪ ﺣﺠﺖ ﻭﻳﺎﻩ ﻳﺠﻴﺒﻬﺎ ﻳﺘﻌﺮﻓﻮﻥ ﻋﻠﻴﻬﺎ ﻭﺣﺘﻰ ﺗﺎﺧﺬﻫﺎ
ﻳﺸﺘﺮﻭﻥ ﺍﻟﺬﻫﺐ ﺍﻗﻠﻬﺎ ﻛﺪﺍﻡ ﺍﻟﻌﺎﻟﻢ ﻳﺸﺘﺮﻭﻥ ﻧﻴﺸﺎﻥ ﻟﻠﻌﺮﻭﺱ .
ﻫﻮ ﻣﻮﺟﺮ ﻛﻠﺒﻪ ﻋﻠﻴﻬﺎ ﻣﻦ ﻗﻔﻠﺖ ﺍﻟﻤﺤﺎﺩﺛﻪ ﻣﺠﺎﻭﺑﺘﻪ
ﺭﺟﻊ ﻣﺒﺎﺷﺮﺓ ﻟﻠﺪﻭﺍﻡ ﺍﻟﺘﻘﻰ ﺑﻤﺎﻫﺮ ﺍﻟﺠﺎﻥ ﻻﻑ ﺟﺘﻔﻪ
ﻧﺸﻮﺍﻥ ﻣﻦ ﺷﺎﻓﻪ ﺗﻔﺎﺟﻰﺀ .. ﺳﻼﻣﺎﺕ ﺷﻨﻮ ﺍﻟﺴﺎﻟﻔﺔ
_ ﺍﻃﻤﻦ ﺷﻮﻳﻪ ﺧﻠﻊ ﺑﺎﻟﻜﺘﻒ .
_ ﺷﻨﻮ ﺍﻟﺴﺒﺐ .. ﺣﺠﻰ ﻧﺸﻮﺍﻥ ﻭﻋﻴﻨﻪ ﻋﻠﻰ ﻣﺎﻫﺮ ﻗﻠﻘﺎﻥ
ﻳﺮﻳﺪ ﻳﻄﻤﻦ .
_ ﻣﺪﺍﻫﻤﺎﺕ ﻟﻮﻛﺮ ﺍﻟﻌﺼﺎﺑﺔ ﻭﺍﻟﺤﻤﺪﻟﻠﻪ ﻧﺤﺠﺖ ﺑﻬﺎﻱ ﺍﻟﻤﻬﻤﻪ ﻭﻃﻠﻌﺖ ﺑﺲ ﺑﺨﻠﻊ ﻛﺘﻒ .
_ ﺍﻟﻒ ﺳﻼﻣﻪ ﻋﻠﻴﻚ ﻭﻋﺎﻟﺨﻴﺮ ﻋﻠﻰ ﻧﺠﺎﺣﻚ ﺑﻴﻬﺎ .
ﺍﻻﺳﺒﻮﻉ ﺍﻟﺠﺎﻱ ﺭﺍﺡ ﺍﺳﻮﻱ ﻋﺮﺱ ﺍﻣﻲ ﺻﺎﺭ ﻋﺪﻫﺎ ﻋﻠﻢ
ﺑﻌﺪ ﺷﻜﻮﻝ ﻻﺯﻡ ﺍﺳﻮﻱ ﺍﻟﻌﺮﺱ ﺭﺍﺡ ﺍﻋﺰﻡ ﺍﻟﻮﻟﺪ ﻭﻃﺒﻌﺎ
ﺍﻧﺖ ﻭﺍﻟﻌﺎﺋﻠﺔ ﺑﺎﻟﻤﻘﺪﻣﻪ .
ﻣﺎﻫﺮ ﻓﺮﺣﻠﻪ .. ﻫﻬﻬﻬﻪ ﺷﺎﻳﻒ ﺍﻟﺨﻴﺮ ﻳﺎﺑﻪ ﻭﺍﺧﻴﺮﺍ ﻟﻜﻴﺖ
ﺍﻟﺪﻭﺭ ﻋﻠﻴﻬﺎ .
_ ﻫﻬﻬﻬﻪ ﺍﻱ ﻭﺷﻠﻮﻧﻬﺎ ﻣﺴﻠﻔﻨﻪ .. ﻏﻤﺰﻟﻪ ﻭﺭﻓﻌﻠﻪ ﺗﻚ ﺣﺎﺟﺐ .
_ ﻋﻠﻴﻚ ﺍﻟﻠﻪ ﺻﺪﻙ ﺗﺤﺠﻲ ﺷﻨﻮ ﻣﺴﻠﻔﻨﻪ ﻭﻟﻚ ﻧﺸﻮﺍﻥ
ﺍﺣﺠﻲ .
ﻧﺸﻮﺍﻥ ﻭﻣﺎﻫﺮ ﻋﻼﻗﺘﻬﻢ ﻗﻮﻳﻪ ﻭﺑﻴﻨﺎﺗﻬﻢ ﻣﻴﺎﻧﻪ ﻭﻣﻴﺘﺮﺩﺩ ﻣﻦ ﻳﺴﻮﻟﻒ ﻭﻳﺎ ﻭﻣﺎﻫﺮ ﻧﻔﺲ ﺍﻟﺸﻲ ﻣﺎﺣﺠﺎﻟﻪ ﺑﺲ ﻣﺠﺮﺩ ﺍﻛﺘﺸﻒ ﺯﻭﺟﺘﻪ ﻋﺬﺭﺍﺀ ﻻﻥ ﻋﺼﺎﻡ ﻣﻤﺘﻘﺮﺑﻠﻬﺎ .
ﻣﺎﻫﺮ ﺿﺤﻚ ﻣﻦ ﻛﻞ ﻛﻠﺒﻪ .. ﻫﻬﻬﻬﻬﻬﻬﻬﻪ ﺍﻟﻠﻪ ﺍﻟﻠﻪ ﺍﻟﻠﻪ ﺑﻌﺪ ﺷﺘﺮﻳﺪ ﻧﻔﺲ ﺍﻟﻤﻮﺍﺻﻔﺎﺕ ﺍﻟﺘﺮﻳﺪﻫﺎ ﻫﻬﻬﻬﻬﻪ
ﻣﻦ ﻳﻮﻣﻚ ﻣﺤﻈﻮﻅ ﻳﻼ ﺑﺎﻟﻌﺎﻓﻴﺔ ﻋﻠﻴﻚ .
ﺧﺰﺭ ﻧﺸﻮﺍﻥ ﺑﺲ ﺟﺎﻥ ﻣﺒﺘﺴﻢ .. ﺍﻱ ﻃﻜﻨﻲ ﺑﻌﻴﻦ ﺗﺮﻭﺡ
ﺍﺻﻜﻄﻨﻲ .
_ ﻫﻬﻬﻬﻬﻪ ﻳﺎﺑﻪ ﺍﺷﺎﻗﻴﻚ ﻭﺍﻟﻠﻪ ﺗﺴﺘﺎﻫﻞ ﺑﻌﺪ ﻛﻠﺒﻲ .
_ ﺳﺎﻟﻢ ﻛﻠﺒﻚ ﺿﻠﻊ ﻳﻼ ﺍﻧﻲ ﺍﺭﻭﺡ ﻟﻠﻤﻜﺘﺐ ﺍﺭﺗﺐ ﺍﻟﻮﺿﻊ
ﺑﺎﺟﺮ ﺍﺭﺟﻊ ﻟﺪﻳﺎﻟﻰ ﺍﻟﻮﺍﻟﺪﻩ ﺗﺮﻳﺪ ﺗﺘﻌﺮﻑ ﻋﺎﻟﻤﺮﻩ ﺣﺘﻰ ﺗﻘﺘﻨﻊ ﻫﻬﻬﻪ .
_ ﺳﻠﻤﻠﻲ ﻋﻠﻴﻬﺎ ﻣﺸﺘﺎﻕ ﻻﻛﻠﻬﺎ .
_ ﺻﺪﻙ ﺗﺤﺠﻲ ﺍﺩﻟﻞ ﻫﺴﻪ ﺍﺟﻴﺒﻠﻚ ﺣﺎﻓﻀﺔ ﺷﻠﻮﻥ ﻛﺒﻪ
ﺣﻠﺐ ﺗﺨﺒﻞ . ﺧﻄﻴﻪ ﺍﻟﻔﺠﺮ ﻛﻌﺪﺕ ﻛﻠﺘﻬﺎ .
_ ﻫﻬﻬﻬﻪ ﺩﺭﻭﺡ ﺟﻴﺒﻬﺎ ﺧﻞ ﻧﺘﺮﻳﻚ ﺑﻴﻬﺎ ﻭﺍﻟﻠﻪ ﻋﻤﺘﻲ
ﻣﻌﺪﻟﻪ .
ﻭﺭﻯ ﺍﻟﻈﻬﺮ ﻧﺸﻮﺍﻥ ﻃﻠﻊ ﻟﻠﻤﺴﺘﺸﻔﻰ ﻳﺪﺭﻱ ﻣﻼﺫ ﺍﻟﻴﻮﻡ ﺩﻭﺍﻣﻬﺎ ﺩﺧﻞ ﻣﻦ ﺷﺎﻓﻪ ﻣﻮﻇﻒ ﺍﻻﺳﺘﻌﻼﻣﺎﺕ ﻋﺮﻓﻪ ﺭﺍﺡ ﻋﻠﻴﻪ ﺳﻠﻢ ﺑﻌﺪﻫﺎ ﺳﺄﻟﻪ ﻋﺎﻟﺪﻛﺘﻮﺭﺓ ﻛﺎﻟﻪ ﺛﻮﺍﻧﻲ ﺍﻧﺘﻈﺮ
ﺍﻟﻤﻬﻢ ﺑﻌﺪﻣﺎ ﺧﺒﺮﻩ ﻣﻮﺟﻮﺩﻩ ﺑﻐﺮﻓﺔ ﺍﻻﺳﺘﺮﺍﺣﺔ ﺷﻜﺮﻩ
ﻧﺸﻮﺍﻥ ﻣﺘﺼﻞ ﻋﻠﻴﻬﺎ ﺩﺧﻞ ﻣﺒﺎﺷﺮﺓ ﻟﻠﻐﺮﻓﻪ ﺟﺎﻧﺖ ﺗﺤﺠﻲ ﻭﻳﻪ ﻋﻼ ﺗﻔﺎﺟﺄﺕ ﺑﺸﻮﻓﺘﻪ ﻭﻛﻠﺒﻬﺎ ﻛﺎﻡ ﻳﺪﻙ
ﺑﻘﺖ ﻣﻔﻬﻴﺔ ﻋﻼ ﺩﻏﺘﻬﺎ ﺑﺄﻳﺪﻫﺎ ﻭﻛﺎﻣﺖ ..
_ ﺍﻟﺴﻼﻡ ﻋﻠﻴﻜﻢ ﺳﻠﻢ ﻭﺑﻘﻰ ﻭﺍﻛﻒ ﺑﺎﻟﺒﺎﺏ ﻭﻋﻴﻨﻪ ﻋﻠﻰ ﻣﻼﺫ ﺍﻟﺼﺎﻓﻨﻪ ﻋﻠﻴﻪ ﻳﺒﻮﻭﻭﻭ ﺷﻜﺪ ﺣﻠﻮ ﻭﻓﺨﻢ ﺑﺎﻟﻌﺴﻜﺮﻱ ﺍﻟﻤﺮﻗﻂ .
_ ﺷﻠﻮﻧﻚ ﺳﻴﺎﺩﺓ ﺍﻟﻨﻘﻴﺐ ﺍﻥ ﺷﺎﺀ ﺍﻟﻠﻪ ﺑﺨﻴﺮ .
ﺭﺩﻟﻬﺎ ﺑﺄﺣﺘﺮﺍﻡ ﻭﺍﺑﺘﻌﺪ ﻟﺪﺍﺧﻞ ﺍﻟﻐﺮﻓﻪ .. ﺍﻟﺤﻤﺪﻟﻠﻪ ﺗﻤﺎﻡ .
ﺍﻟﺘﻔﺘﺖ ﻋﻼ ﻟﻤﻼﺫ ﻭﺧﺰﺭﺗﻬﺎ .. ﻳﻼ ﺍﺧﺬﻭﺍ ﺭﺍﺣﺘﻜﻢ ﻻ ﺗﻨﺴﻴﻦ ﻛﻼﻣﻲ ﻭﺍﺷﺮﺕ ﻟﺮﺍﺳﻬﺎ ﻓﻜﺮﻱ ﺯﻳﻦ .
ﺳﺪﺕ ﺍﻟﺒﺎﺏ ﻭﺭﺍﻫﺎ .
ﻧﺸﻮﺍﻥ ﻋﻴﻨﻪ ﻋﻠﻴﻬﺎ ﻣﺸﺎﻟﻬﺎ ﻫﻲ ﺣﺴﺖ ﺭﻭﺣﻬﺎ ﺭﺍﺡ ﺗﺨﺘﻔﻲ ﻭﺗﺼﻐﺮ ﻣﻦ ﻧﻈﺮﺍﺗﻪ ﻭﺍﻧﻮﺏ ﻣﻴﺤﺠﻲ ﺧﺮﺏ ﺣﻈﻲ ﺷﻜﺪ ﺷﺎﻳﻒ ﺭﻭﺣﻪ .
ﻧﺸﻮﺍﻥ ﻣﺮﻛﺰ ﻋﻠﻴﻬﺎ ﺟﺎﻧﺖ ﻻﺑﺴﻪ ﺑﻨﻄﺮﻭﻥ ﻛﺎﺑﻮﻱ ﺛﻠﺠﻲ ﻭﻗﻤﻴﺺ ﻣﻘﻠﻢ ﺍﺑﻴﺾ ﻭﺍﺣﻤﺮ ﻭﺷﺎﻝ ﺍﺣﻤﺮ ﻃﺎﻟﻌﻪ ﺣﻴﻞ ﺣﻠﻮﺓ ﺗﻘﺪﻡ ﻳﻤﻬﺎ ﻫﻲ ﻣﻦ ﺷﺎﻓﺘﻪ ﻛﺎﻣﺖ ﺩﻧﻚ ﻋﻠﻴﻬﺎ
ﻭﻧﺘﺮ ﻣﻦ ﺑﻴﻦ ﺳﻨﻮﻧﻪ ﻛﻮﺓ ﺗﻄﻠﻊ ﺍﻟﻜﻠﻤﻪ .. ﺟﻨﺎﺑﺞ ﻟﻴﺶ ﺗﻠﻐﻴﻦ ﺍﻟﻤﺤﺎﺩﺛﺔ ﺷﺎﻳﻔﺘﻨﻲ ﺯﻋﻄﻮﻁ ﻛﺪﺍﻣﺞ .
ﻣﺘﻤﺘﺖ ﺑﺤﺠﻴﻬﺎ ﻫﻲ ﻓﻌﻼ ﺗﺼﺮﻓﻬﺎ ﺟﺎﻥ ﻣﺤﻠﻮ .. ﺍﺍﺍ ﺷﺒﻴﻚ ﻗﺎﺑﻞ ﺷﺴﻮﻳﺖ .
ﻧﺘﺮ .. ﻭﺷﺒﺸﺎﺑﻪ ﻋﻴﺪﻳﻬﺎ ﻭﺷﻮﻓﻲ ﺷﺴﻮﻱ ﺑﻴﺞ .
ﺩﺣﻜﺖ ﺑﻮﺟﻬﻪ ﻭﺑﻠﻌﺖ ﺭﻳﻚ ﻣﺼﺖ ﺷﻔﺎﻳﻔﻬﺎ ﺍﻟﻮﺭﺩﻳﺔ
ﺑﻘﻰ ﺻﺎﻓﻦ ﻋﻠﻴﻬﺎ ..
ﺭﻣﺶ ﺑﻌﻴﻨﻪ ﻭﺗﻨﺤﻨﺢ .. ﺟﻴﺖ ﺍﺧﺬﺝ ﺍﻣﻲ ﺗﺮﻳﺪ ﺗﺸﻮﻓﺞ .
ﺗﻔﺎﺟﺄﺕ ﻣﻤﺘﺤﻀﺮﺓ ﻟﻬﺬﺍ ﺍﻟﺸﻲ .. ﺩﻭﺍﻣﻲ ﺷﻠﻮﻥ ﺧﻠﻴﻬﺎ
ﻟﻼﺟﺎﺯﺓ .
ﻣﺤﺐ ﻟﻬﺠﺘﻬﺎ .. ﺷﻨﻮ ﻫﺎﻟﺤﺠﺞ ﺍﺧﺬﻱ ﺍﺟﺎﺯﺓ ﻭﻓﻀﻴﻬﺎ ﻳﻼ
ﺍﻣﺸﻲ ﻟﻠﻤﺪﻳﺮ ﺍﻧﻲ ﻭﻳﺎﺝ ﻭﺭﺍﺡ ﺍﻓﻬﻤﻪ .
ﻣﻜﺪﺭﺕ ﺗﻌﺘﺮﺽ ﻣﺒﻴﻦ ﺟﺎﻱ ﻳﺪﻭﺭ ﺣﺠﻪ ﻋﻠﻴﻬﺎ ﻟﻴﺮﺯﻟﻬﺎ
ﺍﻟﻠﻪ ﺍﻟﻴﺴﺘﺮ ﺍﻟﻴﻮﻡ ﺷﻠﻮﻥ ﻳﺨﻠﺺ .
ﻳﻢ ﺍﻟﻤﺪﻳﺮ ﺍﻟﻌﺮﻑ ﻧﺸﻮﺍﻥ ﻭﺭﺣﺐ ﺑﻲ ﻓﻬﻤﻪ ﻧﺸﻮﺍﻥ ﻋﻠﻰ ﺍﻟﻤﻮﺿﻮﻉ ﺯﻭﺍﺝ ﻭﻓﻬﻢ ﺍﻟﻤﺪﻳﺮ ﻣﻼﺫ ﺗﻜﺘﺐ ﺍﺟﺎﺯﺓ ﺯﻭﺍﺝ ﻭﺍﻓﻖ ﻋﻠﻴﻬﺎ ﻣﺒﺎﺷﺮﺓ ﻭﺗﻤﻨﺎﻟﻬﻢ ﺯﻭﺍﺝ ﺳﻌﻴﺪ .
ﺑﺎﻟﻄﺮﻳﻖ ﺳﺄﻟﺘﻪ .. ﺷﻠﻮﻥ ﻗﺒﻞ ﺭﺃﺳﺎ ﻫﻮ ﻛﻮﻟﺶ ﺷﺪﻳﺪ .
ﻣﺎﻟﺘﻔﺖ ﻋﻠﻴﻬﺎ ﺭﻛﺰ ﺑﺴﻴﺎﻗﺘﻪ .. ﺷﻨﻮ ﺗﺸﻜﻴﻦ ﺑﻘﺪﺭﺍﺗﻲ .
ﺭﺩﺕ ﺭﺃﺳﺎ .. ﻻ ﻻ ﻣﻘﺼﺪﺕ .
ﻣﺤﺠﻰ ﻭﻳﺎﻫﺎ ﺑﻌﺪﻩ ﺑﺎﻳﻊ ﺑﻮﺯﻩ ﻋﻠﻴﻬﺎ ﻭﻫﺬﺍ ﺍﻟﺸﻲ ﺧﻼﻫﺎ
ﺗﻀﻮﺝ ﻭﺗﻘﻠﻖ ﺍﻛﺜﺮ ﻭﺑﺎﻟﺸﻘﻪ ﺭﺍﺣﺖ ﺗﺤﻀﺮ ﻣﻼﺑﺴﻬﺎ ﺑﺠﻨﻄﻪ ﺻﻐﻴﺮﺓ ﻣﻴﺤﺘﺎﺝ ﺗﺎﺧﺬ ﻣﻼﺑﺲ ﻫﻮﺍﻱ ﻻﻥ ﺍﻟﻔﻬﻤﺘﻪ ﺭﺍﺡ ﻳﻜﻮﻥ ﺍﻟﺰﻭﺍﺝ ﻧﻬﺎﻳﻪ ﺍﻻﺳﺒﻮﻉ ﺑﺲ ﻣﺘﺪﺭﻱ
ﻭﻳﻦ ﺭﺍﺡ ﺗﺴﺘﻘﺮ ﻗﺮﺭﺕ ﺗﺴﺄﻟﻪ ﺑﻌﺪ ﻣﺎﻗﻔﻠﺖ ﺳﺤﺎﺏ ﺍﻟﺠﻨﻄﻪ ﻃﻠﻌﺖ ﻟﻠﺼﺎﻟﻪ ﺟﺎﻥ ﻛﺎﻋﺪ ﻭﻣﺪﺩ ﺭﺟﻠﻴﻪ ﺑﻌﺪﻩ ﺑﻤﻼﺑﺴﻪ ﺍﻟﻌﺴﻜﺮﻳﻪ .
ﻫﻲ ﺷﺎﻟﻬﺎ ﺫﺑﺘﻪ ﺟﻠﻨﺖ ﺗﺮﻳﺪ ﺗﺪﺧﻞ ﺗﺴﺒﺢ ﻭﺗﺤﻀﺮ ﺭﻭﺣﻬﺎ ﻻﺯﻡ ﺗﻜﺸﺦ ﻋﻴﺐ ﺩﺍﺧﻠﻪ ﻋﺎﻟﻌﺎﻟﻢ ﺍﻭﻝ ﻣﺮﻩ ﻻﺯﻡ ﺗﺘﺄﻧﻖ .
_ ﻧﺸﻮﺍﻥ ﻭﻳﻦ ﺭﺍﺡ ﻧﺴﺘﻘﺮ .
ﺍﻟﺘﻔﺖ ﻋﻠﻴﻬﺎ ﺟﺎﻧﺖ ﻭﺍﻛﻔﻪ ﻛﺒﺎﻟﻪ ﻋﺪﻝ ﻛﻌﺪﺗﻪ ﻭﺳﻨﺪ ﺍﻳﺪﻳﻪ ﻋﻠﻰ ﺭﻛﺒﻪ .. ﻳﻢ ﺍﻫﻠﻲ ﻭﻳﻦ ﻳﻌﻨﻲ .
ﺑﻠﻌﺖ ﺭﻳﻜﻬﺎ ﻣﺼﺪﻭﻣﻪ ﻣﻤﺘﻮﻗﻌﻪ ﺗﻌﻮﻑ ﺑﻐﺪﺍﺩ .. ﺑﺴﺴﺲ
ﺩﻭﺍﻣﻲ ﺍﻭﻭﻭ ﻭﻣﺎﺍﻛﺪﺭ ﺍﺭﻳﺪ ﺍﺑﻘﻰ ﻣﺎﺍﻛﺪﺭ ﺍﻋﻮﻑ ﺑﻐﺪﺍﺩ .
_ ﺍﻧﻘﻠﺞ ﻟﻤﺴﺘﺸﻔﻰ ﺍﻟﻌﺎﻡ ﺍﺻﻼ ﻗﺮﻳﺐ ﻋﻠﻰ ﺑﻴﺘﻨﺎ ﺑﻌﺪ ﺷﺎﺭﻋﻴﻦ .
ﺿﺎﺟﺖ ﻫﺬﺍ ﺍﻟﻤﺠﺎﻧﺖ ﺣﺎﺳﺒﻪ ﺣﺴﺎﺑﻪ ﺿﺮﺑﺖ ﺭﺟﻠﻬﺎ ﺑﺎﻟﻜﺎﻉ .. ﻣﺎﺭﻳﺪ ﺍﻋﻴﺶ ﻫﻨﺎﻙ ﺍﻧﻲ ﻣﺘﻌﻮﺩﻩ ﻫﻨﺎ .
ﻛﺎﻡ ﻭﺻﺎﺭ ﻗﺮﻳﺐ ﻋﻠﻴﻬﺎ .. ﺗﻨﻬﺪ ﺑﻘﻮﺓ .. ﻻﺩﻭﺧﻴﻨﻲ ﻭﻣﺎﺭﻳﺪ
ﻋﻨﺎﺩ ﺗﺮﺍ ﻭﺍﺻﻠﻪ ﻟﻬﻨﺎ ﻭﺍﺷﺮ ﻟﺨﺸﻤﻪ .
ﻣﻼﺫ ﻭﺷﻠﻮﻥ ﺑﻄﺒﻌﻬﺎ .. ﺷﻨﻮ ﻣﻦ ﺣﻘﻲ ﺍﻋﺘﺮﺽ ﻣﺎﺭﻳﺪ
ﺍﻋﻴﺶ ﻫﻨﺎﻙ .
ﻫﺰ ﺭﺍﺳﻪ .. ﺍﻱ ﻣﻮ ﺍﻟﺴﺎﻟﻔﻪ ﻋﻠﻰ ﻛﻴﻔﺞ .
_ ﻟﻌﺪ ﻣﻨﻮ ﺍﻟﻤﻮﺿﻮﻉ ﻳﺨﺼﻨﻲ ﻭﺍﻋﺘﻘﺪ ﺭﺃﻳﻲ ﻣﻬﻢ .
_ ﺗﺮﺣﻴﻦ ﻭﻧﻌﻴﺶ ﻫﻨﺎﻙ ﻛﺎﻓﻲ ﻟﻮ ﻫﻮ ﻋﻨﺎﺩ ﻭﺧﻼﺹ .
_ ﺷﻨﻮ ﺗﻐﺼﺒﻨﻲ ﻋﺎﻟﺮﻭﺣﻪ ﺭﻭﺡ ﺍﻧﺖ ﺍﻧﻲ ﺑﺎﻗﻴﻪ ﻫﻨﺎ .
ﻧﺸﻮﺍﻥ ﻋﻴﻮﻧﻪ ﻃﺎﺭﺕ ﺟﺮﻫﺎ ﻣﻦ ﺯﻧﺪﻫﺎ ﺑﻘﻮﺓ .. ﻭﻟﺞ ﻛﺘﻠﺞ
ﻻﺗﺴﺘﻔﺰﻳﻨﻲ ﻭﺍﺻﻠﻪ ﺣﺪﻫﺎ ﺗﺠﻴﻦ ﺗﻌﺎﻧﺪﻳﻦ ﻟﻴﺶ .. ﻻﻋﺒﺎﻟﺞ ﻋﺼﺎﻡ ﺍﻟﺨﺮﻛﻪ ﺍﻟﺠﺎﻥ ﺳﺎﻛﺘﻠﺞ ﻻﺍﺍﺍ
ﺍﺻﺤﻲ ﺑﺎﺑﺎ ﻭﺷﻮﻓﻲ ﻭﻳﺎﻣﻦ ﺟﺎﻱ ﺗﺤﺠﻴﻦ ... ﺟﺎﻥ ﻳﺤﺠﻲ ﻭﻻﺯﻣﻬﺎ ﺑﻘﻮﺓ ﺍﻳﺪﻩ .
_ ﺍﻳﺪﺩﺩﻱ ﺷﺒﻴﻚ .
ﺭﺟﻊ ﺩﻍ ﺭﺍﺳﻬﺎ ﺑﺄﺻﺒﻌﻪ .. ﺍﺻﺤﻲ ﻭﺟﺮﻱ ﻋﺪﻝ ﻭﻳﺎﻱ ﻩﺀﺍ ﺍﻟﻌﻨﺎﺩ ﺍﻟﺘﺎﺭﺱ ﺭﺍﺳﺞ ﺑﻄﻠﻲ ﻷﻥ ﻣﻴﻔﻴﺪ ﻭﻳﺎﻱ ﻻﺷﻔﺘﻴﻨﻲ
ﻛﺘﻠﺞ ﺍﺣﺒﺞ ﻋﺒﺎﻟﺞ ﻫﺬﺍ ﺿﻌﻒ ﺗﺮﺩﻳﻦ ﺗﺴﻴﻄﺮﻳﻦ ﺟﺠﺞ
ﻣﺘﻮﻫﻤﻪ ﺭﻭﺣﻲ ﻣﻦ ﻳﻤﻲ ﻻ ﺍﺧﺮﺑﻄﻠﺞ ﻭﺟﻬﺞ ﺑﺮﺍﺷﺪﻱ ﻳﻌﺪﻟﺞ ﺩﻣﺎﻏﺞ ﺍﻟﻤﺘﺮﻛﺐ ﺍﻋﻮﺝ ..
ﺩﻓﻌﻬﺎ ﺭﺟﻌﺖ ﻟﻠﻮﺭﺍ
ﻣﺬﻫﻮﻟﻪ ﻣﻦ ﻋﺼﺒﻴﺘﻪ ﺭﻛﻀﺖ ﻟﻠﻐﺮﻓﻪ ﻭﺳﺪﺕ ﺍﻟﺒﺎﺏ ﻛﻠﺒﻬﺎ ﻳﺪﻙ ﺳﺮﻳﻊ ﻭﻋﻴﻨﻬﺎ ﺩﻣﻌﺖ ﻫﺬﺍ ﺷﻜﺪ ﻋﺼﺒﻲ
ﻫﺬﺍ ﺑﺲ ﺣﺠﻲ ﻫﻴﺞ ﺳﻮﺍ ﺑﻴﻪ ﻟﻌﺪ ﻟﻮ ﻳﻀﺮﺑﻨﻲ ﺻﺪﻙ ﺷﻠﻮﻥ .
ﺑﻘﺖ ﺗﻔﺘﺮ ﺑﺎﻟﻐﺮﻓﻪ ﺍﺧﺮ ﺷﻲ ﺧﺎﺑﺮﺕ ﺛﺮﻳﺎ ﻭﺣﺠﺘﻠﻬﺎ
ﺑﺲ ﻣﺴﻮﻟﻔﺖ ﻋﻠﻰ ﻋﺼﺒﻴﺘﻪ ..
_ ﻋﻴﻮﻧﻲ ﺍﻧﺘﺒﻬﻲ ﻟﻌﻼﻗﺘﺞ ﻭﻳﺎ ﻻ ﻋﺒﺎﻟﺞ ﻣﺜﻞ ﻋﺼﺎﻡ ﺍﻟﺠﺎﻥ ﻣﺨﻠﻴﺞ ﺑﺮﺍﺣﺘﺞ ﻣﻼﺫ ﻣﻮ ﻛﻞ ﺍﺻﺎﺑﻴﻌﺞ ﺳﻮﺍ
ﺣﺎﻭﻟﻲ ﺗﺘﺄﻗﻠﻤﻴﻦ ﻭﻳﺎ ﺗﺮﻯ ﻃﻼﻝ ﻣﺒﻴﻦ ﻣﺮﺗﺎﺣﻠﻪ ﻫﺎﻟﻔﺘﺮﺓ
ﻣﻴﻮﻛﻊ ﻣﻦ ﻟﺴﺎﻧﻪ ﻳﺤﻤﺪ ﺑﻲ ﺣﺎﻭﻟﻲ ﺗﻜﺴﺒﻲ ﺷﺒﻴﺞ ﻳﺤﻈﻲ ﻭﺍﻟﻠﻪ ﺗﻜﺪﺭﻳﻦ ﻣﺒﻴﻦ ﻳﺤﺒﺞ ﺑﺲ ﺍﻧﺖ ﻣﺪﺭﻱ ﻟﻴﺶ ﻗﺎﻓﻠﻪ .
ﻣﻼﺫ ﺳﻤﻌﺖ ﻛﻞ ﻛﻼﻣﻬﺎ ﺑﻌﺪﻳﻦ ﺭﺩﺕ .. ﺛﺮﻳﺎ ﺧﺎﻳﻔﻪ ﺍﺣﺒﻪ
ﻭﻳﻄﻠﻊ ﻭﺭﺍ ﺳﻮﺍﻟﻒ ﺧﺎﻳﻔﻪ ﺍﻧﺼﺪﻡ ﺑﻲ .
_ ﻭﻟﺞ ﻫﻮ ﺍﻟﺤﺐ ﻳﺠﻲ ﻓﺠﺄﻩ ﻣﻨﺤﺲ ﺑﻲ ﻣﻦ ﺗﺸﻮﻓﻴﻦ ﺭﻭﺣﺞ ﻣﺘﻌﻠﻘﻪ ﺑﻲ ﻣﺘﻜﺪﺭﻳﻦ ﻋﻠﻰ ﻓﺮﺍﻛﻪ ﺫﺍﻙ ﺍﻟﻮﻛﺖ ﻛﻮﻟﻲ ﺣﺒﻴﺘﻪ .
_ ﻋﺰﺯﺯﺯﺍ ﺻﺪﻙ ﺗﺤﺠﻴﻦ ﻫﺬﻧﻲ ﻛﻠﻬﻦ ﻫﺎﻻﺳﺒﻮﻉ ﺣﺴﻴﺘﻬﻦ ﻭﻳﺎ .
_ ﻫﻬﻬﻬﻬﻬﻬﻬﻬﻪ ﻭﺍﻟﻠﻪ ﺍﻧﺘﻲ ﻧﻜﺘﻪ ﻛﻮﻟﺸﻲ ﻣﺎﻛﻮ ﺧﺮﺏ ﺣﻈﻲ ﻋﻮﺩ ﺩﻛﺘﻮﺭﺓ ﺍﻛﻠﺞ ﻻﺗﺤﺠﻴﻦ ﺧﺎﻑ ﻳﺼﺤﻜﻮﻥ ﻋﻠﻴﺞ ﻳﺎﻟﻔﻄﻴﺮﺓ .
_ ﻳﻮﻭﻭﻭ ﺛﺮﻳﺎ ﺑﺲ ﺗﺮﺯﻟﻴﻦ .
_ ﻣﻼﺫ ﻋﻴﻨﻲ ﺍﻧﺘﻲ ﺣﺒﻴﺘﻲ ﻭﺧﻼﺹ ﻋﺎﺩ ﺩﻳﺮﻱ ﺑﺎﻟﺞ ﻋﻠﻴﻪ ﻻﻳﺮﻭﺡ ﻳﺪﻭﺭ ﺑﺮﺍ .
_ ﺷﻨﻮ ﻗﺼﺪﺝ ﺷﻴﺪﻭﺭ .
_ ﺍﻭﻳﻠﻲ ﻋﻠﻰ ﺣﺎﻟﻲ ﺷﻴﺪﻭﺭ ﻏﻴﺮ ﻧﺴﻮﺍﻥ .
_ ﺛﺮﻳﺎﺍﺍﺍ ﻛﺎﻓﻲ ﺍﻧﻲ ﺍﺗﺼﻠﺖ ﺍﺭﺗﺎﺡ ﻟﻮ ﺗﻘﻬﺮﻳﻨﻲ .
_ ﻭﻟﺞ ﺍﻧﺘﻲ ﺗﺤﺒﻴﻨﻪ ﻭﻣﺤﺎﺳﻪ ﻋﻠﻰ ﺭﻭﺣﺞ ﻓﺘﺤﻲ ﻋﻴﻨﺞ
ﻻﻳﻄﻴﺮ ﺍﻟﺮﺟﺎﻝ ﻭﺍﻧﻮﺏ ﻫﻮ ﺷﻠﻮﻧﻪ ﻫﻴﺒﻪ ﻭﺭﺗﺒﻪ ﻭﺳﺎﻣﻪ
ﺭﻭﺣﻲ ﻣﻼﺫ ﺑﻌﺪ ﻣﺎﺍﺣﺠﻲ ﻣﻠﻴﺖ ﻣﻨﺞ ﺍﻧﺼﺢ ﻭﻣﻴﻔﻴﺪ .
_ ﻣﺸﻜﻮﺭﺓ ﺛﺮﻳﺎ ﻣﺮﺍﺡ ﺍﺯﻋﻞ ﻣﻨﺞ .
ﺳﺪﺗﻪ ﻭﺭﺍﺣﺖ ﺍﺧﺬﺕ ﻣﻼﺑﺲ ﺗﺴﺒﺢ ﺭﺍﻗﺒﺘﻪ ﺑﻌﺪ ﻛﺎﻋﺪ ﻣﺮﺗﺠﻲ ﻋﺎﻟﻘﻨﻔﻪ ﺭﺍﺳﻪ ﻣﺮﺟﻌﻪ ﻟﻠﻮﺭﺍ ﻭﺷﺎﺑﻚ ﺍﻳﺪﻳﻪ ﻋﻠﻰ ﺻﺪﺭﻩ .
ﺑﻌﺪ ﻓﺘﺮﺓ ﺟﺎﻧﺖ ﺟﺎﻫﺰﺓ ﺗﻘﺪﻣﺖ ﺷﺎﻓﺘﻪ ﻏﺎﻓﻲ .. ﻧﺸﻮﺍﻥ ..
ﻓﺰ ﻋﻠﻰ ﺻﻮﺗﻬﺎ ﺷﺎﻓﻬﺎ ﻣﺒﺪﻟﻪ ﻻﺑﺴﻪ ﻓﺴﺘﺎﻥ ﺗﻠﺚ ﺍﺭﺑﺎﻉ
ﺑﻴﻨﺴﻞ ﺣﻠﻮ ﻋﻠﻴﻬﺎ ﻟﻮﻧﻪ ﺗﻔﺎﺣﻲ ﻭﺣﺠﺎﺏ ﻣﺮﻫﻤﺘﻪ ﻃﺎﻟﻌﻪ
ﻛﻮﻟﺶ ﺍﻧﻴﻘﻪ ﻭﺣﻠﻮﺓ .
ﻛﺎﻡ ﻭﻫﻮ ﻳﻔﺮﻙ ﺑﻮﺟﻬﻪ ﻓﺎﺕ ﻏﺴﻞ ﻭﺟﻬﻪ ﻋﺎﻟﻤﻐﺴﻠﻪ ﻳﻢ ﺍﻟﺤﻤﺎﻡ ﻧﺸﻔﻪ ﻭﺭﺟﻊ ﺍﺧﺬ ﻣﻮﺑﺎﻳﻠﻪ ﻭﺳﻮﻳﺠﻪ ﻭﺍﻟﺴﻼﺡ
ﺣﺠﻰ ﺑﺜﻜﻞ ﻭﻫﻮ ﻳﻄﻠﻊ ﻛﺪﺍﻣﻬﺎ .. ﺍﻣﺸﻲ ﺍﻟﺴﺎﻋﻪ ﺻﺎﺭﺕ
ﺑﺎﻟﺜﻨﺘﻴﻦ ﻋﻠﻰ ﺍﺳﺎﺱ ﻧﺘﻐﺪﻯ ﻫﻨﺎﻙ .
ﻣﻼﺫ ﻓﺸﻠﺖ ﻻﻥ ﻣﻦ ﺍﺟﻮ ﻟﻠﺸﻘﻪ ﻣﺴﺄﻟﺘﻪ ﻳﺘﻐﺪﻯ ﻭﺍﻟﺘﻬﺖ ﺗﺘﻌﺎﺭﻙ ﻭﻳﺎ ﻳﺮﺑﻲ ﻫﺴﺔ ﻳﻜﻮﻝ ﻫﺎﻱ ﻋﻮﺑﺔ .
ﻗﻔﻞ ﺑﺎﺏ ﺍﻟﺸﻘﻪ ﻭﺳﺤﺐ ﺍﻟﺠﻨﻄﻪ ﻣﻦ ﺍﻳﺪﻫﺎ ﺷﺎﻟﻬﺎ ﻭﻧﺰﻝ ﻛﺪﺍﻣﻬﺎ ﺣﺒﺖ ﺗﺼﺮﻓﻪ ﻭﻳﺎﻫﺎ ﻣﻦ ﺷﺎﻝ ﺍﻟﺠﻨﻄﻪ ﻭﺣﺴﺖ ﺑﻨﺪﻡ ﻻﻥ ﺗﻌﺎﺭﻛﺖ ﻭﻳﺎ ﺑﻘﺖ ﺳﺎﻛﺘﻪ ﺍﺫﺍ ﺍﻋﺘﺬﺭﺕ ﺭﺍﺡ
ﺗﺤﺲ ﺑﻀﻌﻔﻬﺎ ﻛﺪﺍﻣﻪ .
ﺑﺎﻟﻄﺮﻳﻖ ﻭﻛﻒ ﻳﻢ ﻣﻄﻌﻢ ﻭﺍﺧﺬ ﻟﻔﺎﺕ ﺻﺎﺝ ﻭﺑﺒﺴﻲ
ﺍﻧﻄﺎﻫﺎ ﺍﻟﻌﻼﻛﻪ .
ﻣﻼﺫ ﻃﻠﻌﺖ ﻟﻔﻪ ﺟﺎﻧﺖ ﻛﻮﻟﺶ ﺟﻮﻋﺎﻧﻪ
ﺍﻧﻄﺘﻪ ﻣﻔﺒﻞ ﻳﺎﺧﺬﻫﺎ ﺍﺻﻼ ﻣﺤﺠﻰ ﺑﺲ ﻫﺰ ﺭﺍﺳﻪ ﺑﺎﻟﺮﻓﺾ ﺑﺎﻟﺒﺪﺍﻳﺔ ﺍﺳﺘﺤﺖ ﺗﺎﻛﻞ ﺑﺲ ﺟﻮﻋﺎﻧﻪ ﻛﻮﻟﺶ
ﻃﻠﻌﺘﻬﺎ ﻣﻦ ﻭﺍﺧﺬﺕ ﻋﻀﺔ ﻣﻤﻤﻢ ﻃﻴﺒﻪ ﺍﻟﺘﻬﺖ ﺗﺎﻛﻞ ﻭﻋﻴﻨﻬﺎ ﻋﺎﻟﻄﺮﻳﻖ ﻃﻠﻌﻮﺍ ﻣﻦ ﺑﻐﺪﺍﺩ ﻣﺘﻮﺟﻬﻴﻦ ﻟﺪﻳﺎﻟﻰ
ﻧﺸﻮﺍﻥ ﻛﻞ ﻓﻜﺮﻩ ﻳﻢ ﺍﻣﻪ ﺷﻠﻮﻥ ﺭﺍﺡ ﺗﺴﺘﻘﺒﻞ ﺯﻭﺟﺘﻪ
ﻭﻫﺎﻱ ﺍﻟﻜﺎﻋﺪﻩ ﺑﺼﻔﻪ ﻣﻴﺤﺴﻬﺎ ﺍﻻ ﻭﻃﻚ ﺑﺮﺍﺳﻬﺎ
ﻋﻨﺎﺩ .
ﻣﻦ ﺩﺧﻠﻮ ﺍﻟﺘﻘﺎﻃﻊ ﺍﻟﻴﻮﺻﻞ ﻟﻤﺪﺧﻞ ﻣﺪﻳﻨﻪ ﺑﻌﻘﻮﺑﺔ
ﺍﺧﻴﺮﺍ ﺣﺠﻰ ﻭﻳﺎﻫﺎ .. ﺗﺼﺮﻓﻲ ﻃﺒﻴﻌﻲ ﻭﻳﻪ ﺍﻣﻲ ﻷﻥ ﻣﺘﺤﺐ ﺑﻨﻴﺔ ﺗﺘﻔﻴﻚ ﻭﺗﺘﻌﻴﻘﻞ ﻭﻻﺗﺤﺎﻭﻟﻴﻦ ﺗﻌﺎﻧﺪﻳﻦ .
ﻣﻼﺫ ﺑﺪﺍﺧﻠﻬﺎ ﻣﺘﺨﻮﻓﻪ ﻣﻦ ﻣﻘﺎﺑﻠﺘﻬﻢ ﺑﺲ ﺑﻘﺖ ﺳﺎﻛﺘﻪ
ﻗﺎﺑﻞ ﺷﺘﻜﻮﻝ .
ﺯﻣﺦ ﺑﻴﻬﺎ ﻻﻥ ﻣﺮﺩﺕ ﻋﻠﻴﻪ ..
ﻣﻮ ﻭﻳﺎﺍﺍﺝ .
ﺍﻟﺘﻔﺘﺖ .. ﻧﺸﻮﺍﻥ ﺷﺘﺮﻳﺪ ﻣﻨﻲ ﺟﺒﺘﻨﻲ ﻭﺍﻧﻲ ﻣﻘﺎﺑﻠﻪ
ﻛﻠﺖ ﻣﻴﺨﺎﻟﻒ ﺍﺭﻭﺡ ﻭﺍﺷﻮﻑ ﻫﺴﺔ ﺷﺘﺮﻳﺪ ﻋﻤﻲ ﻣﺎ ﺍﺗﻔﻴﻚ ﺑﺲ ﺣﻞ ﻋﻨﻲ ﺗﺮﻯ ﻭﺍﻟﻠﻪ ﻃﻜﺖ ﺭﻭﺣﻲ .
ﻋﺎﻁ ﺑﻴﻬﺎ .. ﺻﻮﺗﺞ ﻻﻳﻌﻠﻰ ﻣﻔﻬﻮﻡ .
ﺍﻟﺘﻔﺘﺖ ﻋﻠﻰ ﺷﺒﺎﻙ ﺍﻟﺴﻴﺎﺭﺓ ﻭﺗﻨﻬﺪﺕ .
ﻧﺸﻮﺍﻥ ﻛﻮﺓ ﻣﺴﻴﻄﺮ ﻋﻠﻰ ﺍﻋﺼﺎﺑﻪ ﻣﻴﺮﻳﺪ ﻳﺄﺫﻳﻬﺎ ﻳﺮﻳﺪﻫﺎ
ﻋﻠﻰ ﻣﺎﻳﻪ ﺑﺲ ﻣﺠﺎﻱ ﺗﻔﻬﻤﻪ ﻭﺿﻌﻬﻢ ﻣﻴﻌﺠﺒﻪ ﻳﺮﻳﺪﻫﺎ
ﻣﻴﺖ ﻋﻠﻰ ﻗﺮﺑﻬﺎ ﺑﺲ ﻣﻦ ﻳﺸﻮﻓﻬﺎ ﺗﺘﻤﻨﻊ ﻭﺗﺒﺘﻌﺪ ﻋﻨﻪ
ﻣﻴﻄﻴﻖ ﺭﻭﺣﻪ .
.....
ﺩﺧﻞ ﺑﺴﻴﺎﺭﺗﻪ ﻟﻤﻨﻄﻘﺘﻬﻢ ﺷﺎﺭﻉ ﻣﺮﺗﺐ ﻭﺍﻟﺒﻴﻮﺕ ﻛﻮﻟﺶ ﺣﻠﻮﺓ ﻭﻛﻒ ﺍﻟﺴﻴﺎﺭﺓ ﻳﻢ ﺑﻴﺖ ﻃﺎﺑﻘﻴﻦ ﻣﺮﺗﺐ ﻧﺰﻟﻮﺍ ﻭﻧﺰﻟﺖ ﺟﻨﻄﺘﻬﺎ ﻓﺘﺢ ﺍﻟﺒﺎﺏ .. ﺗﻔﻀﻠﻲ ﺩﻳﺎﻟﻰ ﺗﺮﺣﺐ ﺑﻴﺞ .
ﻧﺸﻮﺍﻥ ﻛﺎﻟﻬﺎ ﻣﺘﻘﺼﺪ .
ﺍﻟﺘﻔﺘﺖ ﻭﻛﻮﺓ ﻣﺒﺘﺴﻤﻪ ﻻﻥ ﺟﺎﻧﺖ ﻣﺮﺗﺒﻜﻪ ﻭﺧﺎﻳﻔﻪ .
ﺩﺧﻞ ﻛﺪﺍﻣﻬﺎ ﻭﻓﺘﺢ ﺑﺎﺏ ﺳﻴﻢ ﻭﺻﺎﺡ .. ﻳﻮﻭﻭﻡ ﻭﻳﻨﺞ
ﻓﺎﺗﻮ ﻣﻦ ﺍﻟﻤﻄﺒﺦ ﺷﺎﻓﺘﻪ ﺣﻴﻞ ﺍﻧﻴﻖ ﻭﻳﺸﻊ ﻧﻈﺎﻓﻪ
ﺷﻮﻱ ﻭﺳﻤﻌﺖ ﺻﻮﺕ .. ﻳﻤﻪ ﻫﻼ ﺑﻮﻟﻴﺪﻱ ﺩﻧﻚ ﻋﻠﻴﻬﺎ
ﺑﻮﺳﺘﻪ ﺑﺨﺪﻭﺩﻩ ﺭﺟﻊ ﺑﺎﺱ ﺭﺍﺳﻬﺎ .
ﺍﺷﺮ ﻋﻠﻰ ﺟﻬﺘﻬﺎ ﺟﺎﻧﺖ ﻭﺍﻛﻔﻪ ﻭﺭﺍﻩ .
_ ﻳﻤﻪ ﻫﺎﻱ ﺯﻭﺟﺘﻲ ﻣﻼﺫ
ﺟﻨﻬﺎ ﺗﺪﺭﻱ ﺑﺠﻴﺘﻬﺎ ﻣﺘﻔﺎﺟﺄﺕ ﻣﻼﺫ ﺗﻘﺪﻣﺖ ﺳﻠﻤﺖ ﻋﻠﻴﻬﺎ
_ ﺷﻠﻮﻧﺞ ﺧﺎﻟﻪ .
ﺍﻡ ﻧﺸﻮﺍﻥ ﺑﺎﺳﺘﻬﺎ .. ﻫﻼ ﺑﻴﺞ ﻳﻤﻪ ﻛﻞ ﺍﻟﻬﻼ ﺗﻌﺎﻟﻮ ﻗﺎﺑﻞ
ﻧﺒﻘﻰ ﺑﺎﻟﻤﻄﺒﺦ ﺑﻌﺪﻳﻦ ﺷﻠﻮﻥ ﺗﻔﻮﺕ ﺍﻟﺒﻨﻴﺔ ﻣﻦ ﺍﻟﻤﻄﺒﺦ
ﺍﻭﻝ ﻣﺮﺓ ﺗﺪﺧﻞ ﻟﻠﺒﻴﺖ .
ﺍﺑﺘﺴﻤﻠﻬﺎ ﻧﺸﻮﺍﻥ ﻭﻻ ﺗﺒﻄﻞ ﺳﻮﺍﻟﻔﻬﺎ ﺍﻣﻪ ﺗﻤﻮﺕ ﻋﺎﻻﺗﻜﻴﺖ .
ﻓﺎﺗﺖ ﻛﺪﺍﻣﻬﻢ ﻟﻼﺳﺘﻘﺒﺎﻝ ﻓﺘﺤﺖ ﺍﻟﺒﺎﺏ ﻭﺩﺧﻠﺖ ﻭﻫﻲ ﺗﻬﻠﻲ ﺑﻴﻬﺎ ..
ﻛﻞ ﺍﻟﻬﻼ ﻣﺎﻣﺎ ﺗﻌﺎﻱ ﺍﺳﺘﺮﻳﺤﻲ .
ﻛﻌﺪﻭﺍ ﻧﺸﻮﺍﻥ ﺗﻨﻔﺲ ﺑﺮﺍﺣﻪ ﻻﻥ ﺑﺪﺍﻳﺔ ﻣﻮﻓﻘﻪ
ﺷﻮﻱ ﻭﺩﺧﻠﻮﺍ ﻫﻤﺎﻡ ﻭﻧﻮﺭﺓ ﺳﻠﻤﻮﺍ ﻭﻧﻮﺭﺓ ﺑﻮﺳﺖ ﻣﻼﺫ ﻭﻛﻌﺪﺕ ﻳﻤﻬﺎ ﺑﻘﺖ ﺗﺴﻮﻟﻒ ﻭﻳﺎﻫﺎ ﻣﺒﻴﻦ ﻣﻼﺫ ﺍﺭﺗﺎﺣﺘﻠﻬﺎ
ﺑﻌﺪﻫﺎ ﺭﺍﺣﺖ ﺟﺎﺑﺖ ﺿﻴﺎﻓﻪ ﻋﺼﺎﺋﺮ ﻭﻛﻴﻚ ﻭﺯﻋﺖ ﻋﻠﻴﻬﻢ .
ﺍﻡ ﻧﺸﻮﺍﻥ ﺑﺪﺍﺧﻠﻬﺎ ﻓﺮﺣﺖ ﻣﻦ ﺷﺎﻓﺖ ﺍﻟﺒﻨﻴﺔ ﺣﻠﻮﺓ ﻭﻧﺎﺯﻛﻪ ﻭﺗﻌﺮﻑ ﺗﻠﺒﺲ ﻣﺒﻴﻨﻪ ﺫﻭﺍﻗﻪ ﺑﺲ ﻃﺮﻳﻘﻪ ﺯﻭﺍﺟﻬﻢ ﻣﻌﺎﺟﺒﺘﻬﺎ ﻻﺣﻈﺘﻬﺎ ﺍﻧﺪﻣﺠﺖ ﻭﻳﻪ ﻧﻮﺭﺓ ﺑﺎﻟﺴﻮﺍﻟﻒ ﻃﻠﻌﺖ ﻣﻦ ﻳﻤﻬﻢ ﻭﺭﻯ ﺷﻮﻱ ﻟﺤﻜﻬﺎ ﻧﺸﻮﺍﻥ ﻭﻫﻤﺎﻡ ﻟﻠﻤﻄﺒﺦ
ﺟﺎﻧﺖ ﻭﺍﻛﻔﻪ ﻣﺘﺨﻮﺻﺮﺓ .. ﻫﻤﺎﻡ ﻣﺎﻣﺎ ﻋﻴﺐ ﻣﻦ ﺍﻟﺒﻨﻴﺔ
ﺍﻭﻝ ﻣﺮﺓ ﺗﺪﺧﻠﻨﺎ ﺟﻴﺐ ﻋﺸﺎ ﻣﺮﺗﺐ ﻣﻦ ﺍﻟﻤﻄﻌﻢ ﻭﺍﻧﻲ
ﻋﻨﺪﻱ ﻛﺒﺐ ﻭﺑﻮﺭﻙ ﺣﻜﻠﻲ .
_ ﺻﺎﺭ ﻳﻮﻡ ﺑﻌﺪ ﻭﻛﺖ ﻫﺴﺔ ﺑﺎﻟﺴﺘﻪ ﻭﻧﺺ .. ﺷﺎﻳﻒ ﺍﻟﺨﻴﺮ ﺿﻠﻊ ﺍﻟﺒﻨﻴﺔ ﺍﻟﻠﻪ ﻳﺴﺘﺮ ﻋﻠﻴﻬﺎ ﻣﺒﻴﻨﻪ ﺣﺒﺎﺑﻪ .
ﻧﺸﻮﺍﻥ ﺍﺑﺘﺴﻤﻠﻪ ﺗﻚ ﺧﺪ
ﻫﻤﺎﻡ ﺭﻓﻊ ﺣﺎﺟﺒﻪ ﻣﺴﺘﻐﺮﺏ ﺟﺎﻥ ﻳﺮﺩﻟﻪ .. ﺩﺭﻭﺡ ﻟﻠﻤﻄﻌﻢ ﺗﺘﺄﺧﺮ ﺗﺮﻯ .
_ ﺭﺍﻳﺢ ﻻﺩﻓﻊ .
ﻃﻠﻊ ﻫﻤﺎﻡ ﻭﺍﻣﻪ ﺍﻟﺘﻔﺘﺖ ﻋﻠﻴﻪ .. ﻧﺸﻮﺍﻥ ﺍﻟﺒﻨﻴﺔ ﻣﺒﻴﻨﻪ ﺛﻜﻴﻠﻪ ﻭﻫﺎﺩﺋﺔ ﻟﻮ ﺟﺎﻱ ﺗﺒﻴﻊ ﻓﻴﻜﺎﺕ ﺑﺮﺍﺳﻲ ﺗﺮﻯ ﺍﻧﻲ
ﻣﻨﺎﻗﺼﺔ .
_ ﻻ ﻭﺍﻟﻠﻪ ﻫﺎﻱ ﻃﺒﻌﻬﺎ ﻫﺎﺩﺋﺔ ﺑﺲ ﻣﺮﺍﺕ ﺍﻃﻨﻜﺮ ﻫﻬﻬﻬﻪ .
_ ﻳﺎﺍﺍﺍ ﺻﺪﻙ ﺗﺤﺠﻲ .
_ ﺷﺒﻴﺞ ﻳﻤﻌﻮﺩﻩ ﻛﻞ ﺍﻧﺴﺎﻥ ﺑﻲ ﻟﻮﻟﻪ ﻣﻮ ﻫﺬﺍ ﺣﺠﻴﺞ .
_ ﺍﻳﻴﻴﻪ ﺩﻳﻼ ﺧﻞ ﺍﺭﻭﺡ ﻳﻤﻬﺎ .
_ ﻫﻬﻬﻬﻪ ﺍﻱ ﺩﺧﻠﻴﻬﺎ ﺑﺘﺤﻘﻴﻖ ﻭﺳﻴﻦ ﻭﺟﻴﻢ ﻟﺤﺪ ﺟﺪﻫﺎ ﺍﻟﺴﺎﺑﻊ .
_ ﺍﻱ ﺍﺑﻘﻰ ﺻﻨﻒ ﺻﺪﻙ ﻣﺎﻛﺘﻠﻲ ﺷﻨﻮ ﺍﺻﻠﻬﺎ ﺍﻗﺼﺪ ﻋﺸﻴﺮﺗﻬﺎ .
_ ﻣﻦ ﻋﺸﻴﺮﺓ ﺍﻝ .....
_ ﺍﻫﺎﺍﺍ ﻭﺍﻟﻨﻌﻢ ﻋﺎﻟﺮﺍﺱ .
_ ﺩﻳﻼ ﺍﻧﻲ ﺍﺭﻭﺡ ﺍﺳﺒﺢ ﻣﻦ ﺍﻟﺼﺒﺢ ﺑﺎﻟﺒﺪﻟﻪ ﺍﻟﻌﺴﻜﺮﻳﺔ .
_ ﺭﻭﺡ ﻳﻌﻤﺮﻱ ﻭﺍﻟﺒﺪﻟﻪ ﻋﻠﻜﻬﺎ ﺑﺎﻟﺤﻤﺎﻡ ﻣﻦ ﺗﻜﻤﻞ ﺍﻏﺴﻠﻬﺎ ﺍﻟﻚ .
_ ﻻ ﺗﻌﺒﻴﻦ ﺭﻭﺣﺞ ﻣﻼﺫ ﺗﻐﺴﻠﻬﺎ .
_ ﺍﻱ ﻋﻔﻴﺔ ﺑﺄﺑﻨﻲ ﺧﻠﻴﻬﺎ ﺗﻌﺮﻑ ﺷﻐﻠﻬﺎ ﺯﻳﻦ .
ﻣﻼﺫ ﺍﺭﺗﺎﺣﺖ ﻟﻨﻮﺭﺓ ﻻﻧﻬﺎ ﺍﺟﺘﻤﺎﻋﻴﺔ ﻳﻌﻨﻲ ﺑﺤﻜﻢ ﻭﻇﻴﻔﺘﻬﺎ ﻣﺤﺎﻣﻴﺔ ﻭﺍﺻﻼ ﻧﻮﺭﺓ ﺣﺒﺎﺑﺔ ﻭﻛﻠﺒﻬﺎ ﻃﻴﺐ
ﺍﻡ ﻧﺸﻮﺍﻥ ﺟﺎﻧﺖ ﺗﺮﺍﻗﺐ ﺑﻴﻬﺎ ﻭﺑﺎﻟﻬﺎ ﺗﺴﺄﻟﻬﺎ ﺟﻢ ﺳﺆﺍﻝ
ﺑﺲ ﺑﻌﺪ ﺍﻟﻌﺸﺎ ﻣﻮ ﻭﻛﺘﻪ ﻫﺴﺔ .
ﺑﻮﻛﺖ ﺍﻟﻌﺸﺎ ﻣﺪﻭﺍ ﺍﻟﺴﻔﺮﺓ ﺑﺎﻟﻬﻮﻝ ﺍﺷﻜﺎﻝ ﺍﻻﻛﻞ ﻧﻮﺭﺓ
ﺣﺠﺖ ﻭﻳﻪ ﻣﻼﺫ .. ﺗﻌﺎﻱ ﺣﺒﻴﺒﺘﻲ ﻏﺴﻠﻲ ﺍﻟﺼﺤﻴﺎﺕ ﺑﻬﺎﻱ ﺍﻟﺠﻬﺔ .
ﻣﻦ ﻛﻌﺪﻭ ﺻﺎﺭﺕ ﺑﺼﻒ ﻧﺸﻮﺍﻥ ﺣﺴﺖ ﻳﻤﻪ ﺑﺎﻻﻣﺎﻥ
ﺭﻏﻢ ﺍﻟﺠﻮ ﺍﻟﻌﺎﺋﻠﻲ ﻛﻮﻟﺶ ﻳﻄﻤﻦ ﺑﺲ ﻣﺘﻌﺮﻑ ﻟﻴﺶ ﺍﺭﺗﺎﺣﺖ ﻻﻥ ﺻﺎﺭﺕ ﺑﺼﻔﻪ ﻛﻌﺪﻭﺍ ﻳﺘﻌﺸﻮﻥ ﻭﻫﻲ ﺍﺳﺘﺤﺖ ﻧﺸﻮﺍﻥ ﺭﺍﻗﺒﻬﺎ ﺗﺎﻛﻞ ﻗﻠﻴﻞ ﻛﺎﻡ ﻳﺤﻂ ﻛﺪﺍﻣﻬﺎ ﻭﻳﺎﻛﻞ ﻭﻳﺎﻫﺎ ﺍﻧﺘﺒﻬﻮﺍ ﻋﻠﻴﻪ ﻧﻮﺭﺓ ﺍﺑﺘﺴﻤﺖ ﻟﻬﻤﺎﻡ ﺍﻟﻜﺎﻡ
ﻳﻘﺪﻣﻠﻬﺎ .. ﻫﺎﺝ ﻣﺮﻳﺘﻲ ﺍﻛﻠﻲ ﺻﺪﻙ ﺟﺬﺏ ﻭﺍﻧﺘﻲ ﻫﻢ ﻳﻮﻭﻡ ﺍﻟﻠﻪ ﻋﻠﻴﻬﺎ ﺍﻟﻤﺎﺗﺎﻛﻞ ﻣﻦ ﺍﻳﺪﻱ ﻛﺎﻣﻮﺍ ﻳﻀﺤﻜﻮﻥ
ﻣﻼﺫ ﺷﻮﻱ ﺍﺑﺘﺴﻤﺖ ﻣﺮﺗﺎﺣﻪ .
ﺑﻘﻮﺍ ﺑﺎﻟﻬﻮﻝ ﻳﺸﺮﺑﻮﻥ ﺟﺎﻱ ﻭﻧﻮﺭﺓ ﺭﺍﺣﺖ ﺗﻐﺴﻞ ﺍﻟﻤﻮﺍﻋﻴﻦ ﻣﻼﺫ ﺭﺍﺩﺕ ﺗﺴﺎﻋﺪﻫﺎ .. ﻻ ﻋﻴﻮﻧﻲ ﺍﻟﻴﻮﻡ ﺍﻧﺘﻲ
ﺧﻄﺎﺭﻧﺎ ﻣﻦ ﺗﺒﻘﻴﻦ ﺑﻌﺪ ﻣﺎﻋﻮﻓﺞ ﺍﻟﺸﻐﻠﻪ ﻛﻮﻟﻪ ﻋﻠﻴﺢ
ﺍﺑﺘﺴﻤﺘﻠﻬﺎ .. ﺍﺩﻟﻠﻲ ﺣﺒﻴﺒﺘﻲ .
_ ﺍﺷﺎﻗﻴﺢ ﺣﺒﻲ .
ﻫﻤﺎﻡ ﻃﻠﻊ ﻓﻮﻙ ﻟﻐﺮﻓﺘﻪ ﻭﻧﺸﻮﺍﻥ ﺭﺍﺡ ﺑﺎﻻﺳﺘﻘﺒﺎﻝ ﻳﺘﺼﻞ
ﻋﻠﻰ ﻓﺎﺭﺱ .
ﺟﺎﻧﻦ ﻛﺎﻋﺪﺍﺕ ﻭﺣﺪﻫﻦ ﺍﻡ ﻧﺸﻮﺍﻥ ﺣﺠﺖ .. ﺍﻧﻲ ﻧﺸﻮﺍﻥ
ﺣﺠﺎﻟﻲ ﺳﺎﻟﻔﺘﻜﻢ ﺻﺮﺍﺣﻪ ﺍﻧﺼﺪﻣﺖ ﻣﺠﻨﺖ ﺍﺗﻮﻗﻊ ﺍﺑﻨﻲ
ﻫﻴﺞ ﻳﺘﺰﻭﺝ ﺑﺲ ﻳﻼ ﺑﻌﺪ ﺷﺎﺳﻮﻱ ﺍﻟﺼﺎﺭ ﺻﺎﺭ ﺑﺲ ﺍﻧﺘﻲ
ﺷﻠﻮﻥ ﺗﻘﺒﻠﻴﻨﻬﺎ ﻋﻠﻰ ﺭﻭﺣﺞ ﺗﺘﺰﻭﺟﻴﻦ ﺑﻬﻴﺞ ﻃﺮﻳﻘﺔ
ﻭﺍﺧﻮﺝ ﺷﻠﻮﻥ ﻳﻘﺒﻞ ﻋﻠﻰ ﻧﻔﺴﻪ ﺻﺮﺍﺣﺔ ﺍﻧﻲ ﺟﻨﺖ ﺭﺍﻓﻀﺘﺞ ﺑﺲ ﻣﻦ ﻧﺸﻮﺍﻥ ﻛﺎﻝ ﺑﻌﺪﺝ ﺑﻨﻴﺔ ﺗﻘﺒﻠﺘﺞ
ﻣﻼﺫ ﺟﺎﻧﺖ ﺗﺴﻤﻌﻬﺎ ﻭﺳﺎﻛﺘﻪ ﻛﻮﻩ ﻻﺯﻣﻪ ﺍﻋﺼﺎﺑﻬﺎ
ﻫﻲ ﻛﻮﻩ ﻗﺒﻠﺖ ﺗﺠﻲ ﻭﻳﻪ ﻧﺸﻮﺍﻥ ﻭﻫﺴﺔ ﺗﺠﻲ ﺍﻣﻪ ﺗﺮﺯﻝ ﺑﻴﻬﺎ .
_ ﻳﻌﻨﻲ ﻫﺴﺔ ﺍﻧﺘﻲ ﻣﻤﻮﺍﻓﻘﻪ ﻋﻠﻰ ﺯﻭﺍﺟﻨﺎ .
_ ﻟﻴﺶ ﺍﺟﺬﺏ ﻋﻠﻴﺞ ﺍﻧﻲ ﺟﻨﺖ ﺭﺍﻳﺪﻩ ﺑﻨﺖ ﺍﺧﺘﻲ ﺑﺲ
ﻣﻜﺪﺭﺗﻠﻪ ﺍﻟﺒﺮﺍﺳﻪ ﻳﺴﻮﻱ . ﺑﻌﺪ ﻛﻠﻤﻦ ﻭﻗﺴﻤﺘﻪ .
ﻛﺎﻣﺖ ﻣﻼﺫ ﻣﻀﺎﻳﻘﻪ .. ﻋﻴﻨﻲ ﺧﺎﻟﻪ ﺍﺷﻜﺮﺝ ﻋﺎﻟﺼﺮﺍﺣﻪ
ﺭﻏﻢ ﺍﺳﻠﻮﺑﺞ ﻭﺍﺳﺘﻘﺒﺎﻟﺞ ﺍﻟﺤﻠﻮ ﺑﺲ ﻋﺮﻓﺖ ﺍﻧﺘﻲ ﻣﺘﺮﻳﺪﻳﻨﻲ .
ﻣﺎﺟﺪﻩ ﻛﻤﺰﺕ ﻣﻦ ﺷﺎﻓﺘﻬﺎ ﻋﺼﺒﺖ .. ﺷﻨﻮ ﻫﺎﻟﺤﺠﻲ ﺍﻧﻲ
ﻣﻜﻠﺖ ﺭﺍﻓﻀﺘﺞ .
_ ﺑﺲ ﺣﻀﺮﺗﺞ ﻛﺎﻋﺪﻩ ﺗﻌﺎﻳﺮﻳﻨﻲ ﺗﺮﺍ ﻣﻮ ﺍﻧﻲ ﺍﻟﺬﺑﺤﺖ ﻧﻔﺴﻲ ﻋﻠﻰ ﺍﺑﻨﺞ ﻫﻮ ﺍﻝ ....
_ ﻣﻼﺍﺍﺍﺍﺍﺍﺫ
ﺍﻟﺘﻔﺘﺘﻦ ﻋﻠﻴﻪ ﺩﺧﻞ ﻋﺼﺒﻲ ﻋﺘﻬﺎ ﻣﻦ ﺟﺘﻔﻬﺎ .. ﺍﻧﺘﻲ ﺷﻠﻮﻥ ﻫﻴﺞ ﺗﺤﺠﻴﻦ ﻭﻳﻪ ﺍﻣﻲ
_ ﻧﺸﻮﺍﻥ ﻛﺎﻋﺪﻩ ﺗﻌﺎﻳﺮﻧﻲ .
_ ﺍﻧﺠﺒﻲ ﻭﻻ ﻛﻠﻤﻪ ﺍﻛﺴﺮ ﺭﺍﺳﺞ ﺍﺫﺍ ﻋﻠﻴﺘﻲ ﺻﻮﺗﺞ ﻋﻠﻰ ﺍﻣﻲ .
ﻣﺎﺟﺪﻩ ﻣﻦ ﺷﺎﻓﺖ ﺍﺑﻨﻬﺎ ﻋﺼﺒﻲ .. ﻣﺎﻣﺎ ﻧﺸﻮﺍﻥ ﺍﻫﺪﺃ ﺍﻟﺒﻨﻴﺔ ﺿﺎﺟﺖ ﻻﻥ ﺍﻧﻲ ﻟﺤﻴﺖ ﻋﻠﻴﻬﺎ ﺑﺎﻟﺤﺠﻲ .
ﻧﺸﻮﺍﻥ ﻭﻋﻴﻮﻧﻪ ﺑﻜﺼﺘﻪ ﻭﺑﻌﺪﻩ ﻻﺯﻡ ﺟﺘﻔﻬﺎ ﺑﻘﻮﺓ ﻭﻳﻌﺼﺮ ﺑﻲ ﺑﻄﺮﻳﻘﻪ ﺧﻠﺘﻬﺎ ﺗﺘﺄﻟﻢ .. ﻳﻤﻪ ﻻ ﺍﺩﺍﻓﻌﻴﻠﻬﺎ ﺍﻧﻲ ﺳﻤﻌﺘﻬﺎ ﺷﺤﺠﺖ ﺣﻀﺮﺗﻬﺎ ﻣﻌﺎﺟﺒﻬﺎ ﻣﻮ ﻣﻼﺫ .
ﺩﻣﻌﺖ ﻋﻴﻨﻬﺎ ﻣﻘﻬﻮﺭﺓ ﻳﺪﺍﻓﻊ ﻷﻣﻪ ﻭﻫﻲ ﺍﻟﺴﺒﺐ ﺍﺳﺘﻔﺰﺗﻬﺎ ﻛﺄﻧﻤﺎ ﻣﺘﻌﻤﺪﻩ ﺗﻬﻴﻨﻬﺎ .
_ ﻣﺎﻣﺎ ﺻﻠﻲ ﻋﺎﻟﻨﺒﻲ ﺍﻟﺒﻨﻴﺔ ﻣﺤﺒﺖ ﺍﺳﻠﻮﺑﻲ ﻻﻥ ﻣﻤﺘﻌﻮﺩﺓ ﻋﻠﻴﻪ ﻣﻦ ﺗﻌﺎﺷﺮﻧﻲ ﺭﺍﺡ ﺗﻌﺮﻓﻨﻲ ﻧﺸﻮﺍﺍﺍﻥ
ﻋﻮﻓﻬﺎ ﺷﺒﻴﻚ ﻣﺘﺸﻮﻓﻬﺎ ﺟﺎﻱ ﺗﺘﻮﺟﻊ .
ﺗﺮﻛﻬﺎ ﻭﺑﻘﺖ ﺗﻔﺮﻙ ﺑﺠﺘﻔﻬﺎ ﻭﺧﺰﺭﺗﻪ .. ﻫﺴﺔ ﺗﺮﺟﻌﻨﻲ ﻟﺒﻐﺪﺍﺩ ﻣﺎ ﺍﺑﻘﻰ ﺩﻗﻴﻘﺔ ﻫﻨﺎ .
ﻋﺎﻁ ﺑﻴﻬﺎ .. ﺍﺵ ﻭﻻ ﻛﻠﻤﻪ .
_ ﻭﺍﻟﻠﻪ ﺍﻟﻌﻈﻴﻢ ﺣﻠﻔﺖ ﻣﺎ ﺍﺑﻘﻰ ﺍﻃﻠﻊ ﻫﺴﺔ ﺍﺧﺬ ﺗﻜﺴﻲ ﻭﺍﺭﺟﻊ .
ﺗﻘﺪﻡ ﻋﻠﻴﻬﺎ .. ﻻﺗﻜﺒﺮﻳﻦ ﺍﻟﺴﺎﻟﻔﻪ ﻟﻮ ﺑﺲ ﺍﺩﻭﺭﻳﻦ ﺣﺠﻪ .
ﻫﺰﺕ ﺭﺍﺳﻬﺎ ﻭﻛﺎﻣﺖ ﺗﺒﺠﻲ .. ﻻﺍﺍﺍﺍ ﻣﺎ ﺍﺩﻭﺭ ﺣﺠﺞ ﺑﺲ ﺍﻟﻔﻬﻤﺘﻪ ﻣﻦ ﺍﻟﻮﺍﻟﺪﻩ ﻣﺘﺮﻳﺪﻧﻲ ﺟﺎﻱ ﺗﻌﻴﺮﻧﻲ ﻭﺍﻧﻲ ﻛﺮﺍﻣﺘﻲ ﻣﺘﺨﻠﻴﻨﻲ ﺍﺑﻘﻰ ﺩﻗﻴﻘﺔ ﺑﻌﺪ ﻧﺸﻮﺍﻥ ﺍﻧﻲ ﻣﺬﺑﻴﺖ
ﻧﻔﺴﻲ ﻭﻻﺑﻌﺘﻚ ﻧﻔﺴﻲ ﻟﻴﺶ ﺗﺤﺴﺴﻨﻲ ﺍﻧﻲ ﺑﻴﻪ ﺧﻠﻞ
_ ﻣﺎﻣﺎ ﺍﻧﻲ ﻣﻘﺼﺪﺕ ﺍﺍﺫﻳﺞ ﺑﻜﻼﻣﻲ ﻭﺍﺫﺍ ﺗﺮﺩﻳﻦ ﺍﻋﺘﺬﺭﻟﺞ ﻻﻥ ﺍﻧﻲ ﺍﻫﻢ ﺷﻲ ﺳﻌﺎﺩﻩ ﺍﺑﻨﻲ ﻭﺍﺑﻨﻲ ﺭﺍﻳﺪﺝ .
_ ﻳﻤﻤﻤﻪ ﺷﻨﻮ ﺗﻌﺘﺬﺭﻳﻦ ﻣﺎﻛﻮ ﺩﺍﻋﻲ .
ﺍﻟﺘﻔﺘﺖ ﻋﻠﻴﻬﺎ .. ﻻ ﺧﺎﻟﻪ ﻣﺎﻛﻮ ﺩﺍﻋﻲ ﺍﺷﻜﺮﺝ ﺑﺲ ﻓﻌﻼ ﺑﻌﺪ ﻣﺎ ﺍﻛﺪﺭ ﺍﺑﻘﻰ ﺍﺭﻳﺪ ﺍﺭﺟﻊ ..
ﻃﻠﻌﺖ ﺷﺎﻳﻠﻪ ﺟﻨﻄﺘﻬﺎ ﻣﺘﺪﺭﻱ ﻭﻳﻦ ﺗﺮﻭﺡ ﻃﻠﻌﺖ ﻟﻠﻄﺮﻣﻪ
ﺍﻡ ﻧﺸﻮﺍﻥ .. ﻣﺎﻣﺎ ﻭﺍﻟﻠﻪ ﺍﻧﻲ ﺍﺳﺘﻔﺰﻳﺘﻬﺎ ﺍﻟﻠﻪ ﻳﻠﻌﻦ ﺍﻟﺸﻴﻄﺎﻥ ﺧﻄﻴﻪ ﺭﻭﺣﻠﻬﺎ ﻳﺒﻮﻭﻭﻭ ﻋﻠﻰ ﻟﺴﺎﻧﻲ .
ﻧﺸﻮﺍﻥ ﻃﻠﻊ ﻭﺭﺍﻫﺎ ﺷﺎﻓﻬﺎ ﻭﺍﻛﻔﻪ ﻳﻢ ﺍﻟﺒﺎﺏ ﻛﺰﻛﺰ ﺑﺴﻨﻮﻧﻪ
ﻧﺘﺮ .. ﻓﻮﺗﻲ ﻟﻠﻐﺮﻓﻪ ﻧﺘﻔﺎﻫﻢ ﻻﺗﺨﻠﻴﻨﻲ ﺍﻗﺴﻲ ﻋﻠﻴﺞ .
ﻃﻜﻜﺖ ﻋﻴﻮﻧﻬﺎ ﻋﻠﻴﻪ .. ﻳﻌﻨﻲ ﺣﻀﺮﺗﻚ ﻣﺎﻗﺴﻴﺖ ﻋﻠﻴﻪ .
_ ﻣﻼﺍﺍﺍﺍﺫ ﻻﺗﺨﻠﻴﻨﻲ ﺍﺿﺮﺑﺞ .
