رواية سلسلة قضايا الجميع مشتبه بيهم القضية الثاني والعشرون كورو الفصل الاول 1 بقلم اية السحماوي

كان صوت الحج رؤوف، جار الحج سعيـد صاحب محل الكفته. 

جاي يشتكي و اتحول ليا مخصوص، نبرة صوته في الشكوى فيها غل و حقد و إن الزباين عنده بقت قليله خالص.. 

شاورتله يكمل كلامه كان كريم دخل سلم علينا و قعد جنبي، الحج رؤوف راجل على قده و في حدود خمسة و أربعين سنة:-

_ أنا عندي محل كفته على أول الشارع، و الحج سعيد عنده محل كفته على أخر الشارع.. أنا محلي مشهور و الناس كلها كانت بتيجي عندي، و محل الحج سعيد مكنش عليه حد، يمكن زبون أو اتنين في اليوم.. 

لكن الموضوع دلوقتي بقاله شهرين او تلات شهور، الناس مش بتنقطع من المحل حتى معتش حد بيجي عندي.. المحل عليه زحمه غريبة. 

شكيت فيه بصراحه، إن هو يكون حاطط للناس مادة وحشة في الكفته.. حشـ.يش أو حتى مخـ.ـدرات.. الناس يا باشا زي ما تكون بقت مدمنه للكفته دي. 

لفيت عنيا لكريم اللي قال بسخرية:-

_ إيه يحج انت بتنق على الراجل.. دا رزق.. بجد مستغرب انك جاي تبلغ عشان هو عنده زباين كتير و انت لأ؟ ألا صحيح شعب بيحب بعضه أوي. 

الحج رؤوف اتعدل في قعدته و حسيت ان في توتر ظهر عليه و بقى يبلع ريقه و قال:-

_ أبداً والله يا باشا.. أنا بس مستغرب، معرفش ايه السر. 

ضحكت لما كريم قاله:-

_ ألاه.. يعني مش عارف تاخد منه سر الوصفه، جاي تبلغ عشان تاخدها؟ و يا جاحد جاي لقسم الجنايات كمان! ألا صحيح دماغك عاليه.. 

ميلت على الترابيزة شبكت إيدي في بعضها، في نوع من الناس مفكر نفسه ذكي و مبيحسبش لأي حاجة بيعملها.. يعني الحج رؤوف بيحقد على الحج سعيد عشان ميعرفش سر الوصفه.. و جاي يبلغ و من الممكن ان هو يكون عامل كمين للحج سعيد و حاطت اي حاجة في المحل و لما نروح، نقفش الحج سعيـد. 

« ألا صحيح الرجالة قلبت على كيد النسا فجأة » 

_ شكوتك مش منطقيه يحج رؤوف.. ليه نروح نقبض على واحد بيشوف رزقه.. ربنا فتحها عليه فجأة.. نروح نحقق معاه و نقوله ازاي؟! 

مال على الترابيزة بسرعة و كأنه خايف الفرصة تضيع من ايده:-

_ يا باشا اقسم بالله حاسس ان في حاجة غلط.. أنا بسأل زبون كان بيجي عندي على طول و بطل يجي.. بقوله ألا إيه السر يعني شبط عند الحج سعيد و معتش بتيجي عندي.. قالي الكفته طعمها ميتنسيش يجدع.. يا باشا مش هتخسر حاجة، أنا شاكك ان في حاجة غريبة.. 

بصيت لكريـم و شاورتله يلا بينا.. 

خرجت انا و كريم بعد ما اخدنا العنوان من الحج رؤوف. 

بعد ربع ساعة نزلنا في شارع كله محلات و سوق خضار. 

نزلنا بهدوء كأننا من الشعب عادي، و انا مكنتش لابس البدلة. 

هندخل المحل لو حسينا بحاجة غلط، هنشمع المحل و يتحقق مع سعيد.. 

وقفنا قدام المحل لقينا كل خمس رجالة قاعدين على ترابيزة و بياكلو كفته مع عيش و سلطه و طحينه، و بيتكلمو و يتناقشو عادي، زي أي مطعم و محل في البلد.. 

دخلت عشان أطلُب، لقيت راجل باين عليه الغُلب لابسة عباية فلاحي و بيصبع الكفته و يحطها على الفحم، المحل نضيف و اللحمه في حلل لوحدها.. و ريحيتها شهية و باين عليها طِعمه.. 

شافنا قرب مننا و هو بيضحك و كأن الدنيا ضحكت ليه فجأة و بيسمح ايده في الجلابية و قال:-

_ اتفضل يبني.. طلبك ايه؟ 

_ عايز طبق كفته مع عيش بلدي و سلطه و طحينه و شيبسي، هنقعد هنا يعمي سعيد.. 

ضحك و راح يقضي طلبنا، قعدت انا و كريم على ترابيزة، انا مش شاكك في حاجة و الحج سعيد أصلًا مش وش شك. 

لكن الكلية علمتني منثقش في أي حد مشتبه فيه بنسبة واحد في المية حتى. و إن الغلبان ممكن يطلع تِعبان في الأخر. 

بصيت بعيد لقيت الحج رؤوف واقف على باب المحل بتاعه بيبص علينا، الدنيا بقت سوده أوي و الخير للغير بقى تقيل على القلب. 

الحج سعيد حط الكفته و الطلبات قدامنا، بدأت أكل أنا و كريم و احنا بنتكلم و نتناقش في شوية أمور، و نسينا أصلًا إننا جايين في مهمه. 

لكن فعلاً الكفته لذيذه.. حقهم يقفو طوابير.. 

بعد وقت دفعت الحساب، و ركبت العربية انا و كريم راجعين. 

كان ممكن اعمل بلاغ كاذب في الحج رؤوف، بس مش مشكلة.. 

رجعت على القسم اشوف الملف اللي بعته اللواء حسن ليا، القضية الجديدة.. هو قالي إلقي عليها نظرة، كان مستلمها ظابط متخرج جديد و عايزني اشوف تحقيقه صح ولا محتاج تعديل. 

فتحت الملف، شوفت الصور للجريمة، بنت صغيرة مدبـ.ـوحه في شارع جنب المدرسه.. و كل كلمة مكتوبة و المشتبه فيهم و صور البنت و الأقوال و القاتل.. 

مسكت القلم و بقيت اعدل شوية حاجات و كان المفروض دي بدل دي، و تبدأ بدي الأول.. الوقت عدى يمكن ساعتين و انا لسة مكفي بصلح الأخطاء و اعدل. 

كل شوية امسح العرق من على وشي، أول مرة اعرق كده ولا اسخن كده.. شديت السلة بصقت فيها و مسحت بوقي بالمنديل و رجعت أكمل تاني.. 

قفلت الملف و وقفت اعمل فنجان قهوة، حاسس بشعور غريب، حاسس إني عايز اروح للكفته دي تاني!!!!!! 

قعدت على الكرسي و بقيت اشرب فنجان القهوة و أنا ساند راسي، حاسس عنيا تقيله و في حاجة مقبوضة على صدري..

شربت الفنجان و وقفت عملت كمان واحد.. 

طب حتى لو الكفته فيها حاجة، مخدر يعني.. مستحيل و من سابع المستحيلات يشتغل بالسرعة دي.. 

ازاي جسمي طالب ياكلها تاني بالسرعه دي!! 

وقفت اشرب من الفنجان و أنا بحاول اهدى، دا لو فعلاً جسمي بيُطالب بأكل الكفته تاني بالسرعه دي، يبقى فيها حاجة.. 

و لو روحت تاني تبقـى كارثـــــة. 

افتكرت كريـم، قعدت بسرعة رنيت عليه انا نزلته قدام المشرحه و رجعت انا للقسم، اشوف هو كمان زيي و لا أنا بدأت أهلوس. 

رنيت عليه ثواني و الخط فتح قولتله بسرعة و لهفة:-

_ كريم انت كويـ... هو انت فين؟؟ 

سألته بسرعة لما سمعت دوشة حواليه، رد عليا و بوقه مليان أكل و قال بصوت كله تلذذ:-

_ أنا عند عمك سعيد.. ياخي الكفته دي سرها باتع فعلاً. 

_ دا سرها أحيه يا كريم.. عارفها؟... متاكُلـــــش. 

ــــــــــــــــــــــــــــــــــــــــــــــــــــــــــــــــــــــــــــــــــــــــــــ. 

الفصل الثاني من هنا