رواية سلسلة قضايا الجميع مشتبه بيهم القضية الثاني والعشرون كورو الفصل الثاني
_ أنا عند عمك سعيد.. ياخي الكفته دي سرها باتع فعلاً.
_ دا سرها أحيه يا كريم.. عارفها؟... متاكُلـــــش.
سمعت صوته و هو بيبصق على الأرض و بيقول بسرعة:-
_ في إيه يا احمد؟ مالها؟ أوعى تقول كفتة هوهو
_ أقفل أنا جاي.
قفلت الخط و شديت الجاكت بتاعي، و كلمت الفريق يعمل تشميع للمحل.. لما شربت فنجانين قهوة، بقيت حاسس إني احسن و الشهية مش عايزة كفته تاني.
بعد ربع ساعة بالكتير وصلت للمحل، الفريق شمع المحل.
و العساكر اخدت كل اللحمه المفرومة على المعمل للفحص.
و كريم واقف جنبي بصمت.. شاورت للعسكري يعمل فنجان قهوة كبير من القهوة اللي على جنب دي.. عمله و كريم اخده قولتله:-
_ أشربه.. و كمان عشر دقايق تشرب كمان واحد.
طلبت من العساكر تاخد كل الزباين دي يتعمل ليهم تحاليل و فحص.
ان يظهر علامات عليا في خلال ساعة، يبقى في حاجة غلط اكيد..
كريم حكى ليا ان فعلاً حس ان شهيته عايزة الكفته تاني، ليها طعم لذيذ و مختلف.. و دي مش حاجة كويسة، في الوقت ده نقلق.
الحج سعيد اخدوه على القسم عشان يتحقق معاه، و كان طالع اصلا و هو مفزوع و مش عارف في ايه.. حقيقي احنا كمان لسة منعرفش في ايه.
دخلت المعمل مع كريم، كان الفريق بدأ يجهز كل حاجة و اخدو عينات من اللحمه النيه، و الكفته المشويه.. كريم وقف لبس البالطو و الجلافز و قال بنوع من السخرية:-
_ تعرف يا احمد ان تخصصي تشريح و معامل، هي الكفته كمان بتتشرح؟ اشوفها لحم بقري ولا فراخ!! دا ايه الشغلانه الهم دي.
كنت قاعد على طرف المكتب بسمعه بصمت، لما ملقاش مني أي رد فعل هز راسه و قرب قعد و بدأ يشوف شغله.. و هو بيستغفر ربنا.
ضحكت بصمت على شكله، و وقفت قولتله بجدية:-
_ هروح اشوف الحج سعيد و سر الكفته الباتع.. اول ما توصل لحاجة كلمني على طول..
خرجت من المكان و رجعت للقسم، دخلت الأوضة لقيت الحج سعيد قاعد قلقان و متوتر، شديت الكرسي و قعدت قدامه عنيا عليه بصمت، بقرأ ملامح وشه و لغة جسده و نظرة عينه.. ميلت على الترابيزة و شبكت إيدي في بعضها و قولتله:-
_ بتحط إيه على الكفته يحج سعيد؟ و ياريت تتعاون معايا عشان منفرهدش بعض.. و نخلص بدري بدري.. لأن أنا جايب أخري بصراحه.
لقيته بدأ يعيط و يمسح دموعه بكُم الجلابية و بيقول:-
_والله يبني ما بحط حاجة، حسبي الله ونعم الوكيل في الحج رؤوف، هو عايز يخرب عليا و خلاص.. والله يبني دي لحمه بجيبها و اعمل الكفته.. أنا راجل غلبان و عندي خمس بنات بصرف عليهم.. مليش دعوة بحد.. أنا لقيت الناس بقت تيجي عندي و تشكر في الكفته قوي، و يقولو حلوة.. قولت الحمدلله يارب على نعمتك.. اجبر بخاطري دا انا راجل غلبان..
كنت مثبت عنيا عليه بهدوء، رجعت ضهري لورا و قولتله بتركيز:-
_ بتجيب اللحمه دي من مين؟ و ليه اللي بياكلها مرة بيدمنها!!
كشر وشه بستغراب و قال:-
_ بيدمنها؟ معرفش يا باشا والله.. اللحمه دي بجيبها من جزار، بيجيبها ليا لحد المحل، باخد منه بقالي اربع شهور.. دا جزار مشهور عنده جزارة كبيرة.. جزارة العربي.. عبدالحميد العربي.
مشيت لساني على صف اسناني و عنيا لسه عليه، المشكلة ان انا مش عارف اثق فيه، لان مينفعش..
وقفت و خؤجت لما العسكري ندالي، لقيته بيسلم ليا ملف و بيقول:-
_ اللواء حسن بيقول لحضرتك دا ملف من المستشفى العام، في ظهور حالات غريبة بتموت بشكل غريب.. و التحاليل مجهولة..
سندت راسي على الحيط و انا بتنفس، اخدت الملف فتحته.
صور تحاليل لسبع حالات موت بشكل غريب.
السبب مجهول.
اسمائهم مكتوبة.. و صورهم محطوطه.
شكيت في حاجة، دخلت الاوضة تاني شديت الصور حطيتهم قدام الحج سعيد و قولتله:-
_ تعرف حد من دول؟!
فِضل باصص للصور شوية و بعدين قال بكل بساطة:-
_ أيوا عارفهم.. دول كانوا اكتر زباين بتيجي عندي، عارفهم.
هزيت راسي كتير و انا بسحب الصور تاني، خرجت من الأوضة رنيت على المستشفى العام و قولت بجدية:-
_مقدم احمد علواني.. محدش يقرب من السبع الحالات المجهولين، يتحولو على المشرحة في خلال ساعة.. الجثث متتسلمش للأهل غير بتصريحي..
خرجت من القسم رايح لكريم، اعرفه بخصوص الحالات عشان يستلمها، بعد وقت مش طويل وصلت للمعمل طلعت فوق و دخلت، كان كريم لسه مخلصش و بيجهز شوية ورق..
انا قعدت على طرف المكتب مستنيه يخلص..
لقيته خلص و وقف قدامي و هو بيقلع النضارة الطبيه و حط التقرير قدامي:-
_ ظلمنا الراجل.. الكفته نضيقه، مفيش حشـيـ.ـش مفيش مخـ.ـدرات مفيش أي مادة مش مظبوطه.
اسغربت من كلامه، لما هي نضيفه كده؟ امال في ايه!؟
طلعت الملف بتاع المستشفى حطيته في ايد كريم.
كريم فتحه و بدأ يقرأ اللي فيه..و بيقول:-
_الأعراض غريبة.. رعشة غريبة، فقدان توازن بشكل ملحوظ، ضحك كتير بدون سبب.. هو إيه ده!؟ و سبع حالات؟
_ ممم.. و كانوا اكتر زباين بيروحوا للحج سعيد.. المهم اتحولو للمشرحه.. لأن التحاليل كلها مجهولة، و سبب الموت مجهول برضه.
لقيته لسه بيبص على الورق و الصور، و لف راسه يبص على مكان الأجهزة و الكفته و قال بتشويش:-
_ حتى لو في سبب للموت، مش هيظهر في التحاليل العادية.. يبقى كده مفروض تشريح برضه.. لكن قبل التشريح هعمل تحليل بروتين الأول للحمه دي.. لأن التحاليل اللي عملتها، كانت مخدر و مادة غريبة.. و كلها سليمه.. مفهاش أي حاجة.
_ يعني إيه تحليل بروتين؟ هو دا غير اللي كنت بتعمله.
سألته و أنا عنيا عليه بتركيز، رد و هو بيهز راسه و بيلبس جلافز تاني:-
_ أيوا غيره..
هزيت راسي بتمام، و خرجت أرد على الفون، كان العسكري اللي كلفته يعرف محل الجزارة بتاع العربي.. ثبت عنيا و أنا بسمعه بهدوء غريب:-
_ يفنـدم مفيش أي محل جزارة بالأسم ده، مفيش شخص أصلاً اسمه عبدالحميد العربي!!
اللي تحسبه موسى يطلع فرعون، قولتله:-
_ تروح محمل الكفته بتاع الحج سعيد، يتفتش كله حته حته..
قفلت المكالمه و دخلت تاني عند كريم، روحت وقفت جنبه كان لابس نضارة طبيه، عينه على الجهاز، و كل شخص متولي حاجة معينه..
عدى وقت كتير و احنا لسة على وضعنا، لكن حسيت ان اشمئزاز بيظهر على وش كريم، بعد عينه عن الجهاز بيشرب مايه و رجع تاني يكمل.
و أنا واقف مش فاهم حاجة، و هو ماله أصلًا.
لقيته بيقف بسرعة نقل على جهاز تاني، و اخد لحمه من الطريه.
ضغط على شوية ازرار كده، و شوفته بيكتب على ورقة.
« الهيموجلوبين البشري»
بلعت ريقي و أنا بحاول أبعد كل الشكوك اللي في دماغي..
بعد نص ساعة لقيته بيقف بسرعة و جري على الحمام، و بقى يستفرغ بصوت عالي.. كان صوته و هو بيستفرغ و بيتأوه بشكل عنيف.
جريت عليه بسرعة خبط على الباب:-
_كريم في ايه.. انت كويس؟ يبني!
كان لسه بيستفرغ فتحت و دخلت عليه لقيته قاعد غلى ركُبه في الارض و بيستفرغ جامد، خرجت تاني وقفت بره.
بعد عشر دقايق خرج و هو عينه حمرا جامد و بيمسح وشه.
_في ايه يا كريم! انت كويس!
هز راسه بهدوء و قعد على الكرسي و بدأ يشرح ليا و هو بيمد ايده بورق و بيخطط ليا على كل كلمة و صوته ضعيف:-
_ شكيت الأول في البروتين و طلع شكي صح، البروتين اللي في الكفته دي مش بقري و مش ضاني و مش فراخ حتى.. دا عالي جامد. عملت تحليل الهيموجلوبين البشري.. ظهر ليا كل حاجة إيجابي.. أنا مكنتش عملته من الأول لأن كنا شاكين في مخدر.. لكن لما لقيت الجثث قولت هنعلي التحاليل اكتر.. عملت تحليل دم بشري.. لقيته ظهر إيجابي في ثانية..
اتعدلت و أنا بحاول اتحكم في معدتي و قولتله بغباء عشان انكر الفكرة اللي فهمتها:-
_يعني إيه برضه؟ مش فاهم.
رفع عينه عليا و هو بيمسح وشه بالمنديل و قال:-
_ دا لحم بشري مية في المية.. الحج سعيد بيضرب كل كيلو لحمة مع كيس ملح صيني MSG كامل و معروف الملح الصيني أصلاً جلوتامات صناعي فهو بقى بياخد الجلوتامات الطبيعي اللي في اللحم البشري، ويضربها في 10 بالملح الصيني و النتيجة؟ الزبون بعد أول قطمة مخه بيضرب دوبامين كأنه خد جايزة.. بيعمل كمية قليلة كل يوم الطابور الطويل والزحمة دا بيخلي مخك يقول العرض والطلب الحاجة اللي عليها طابور لازم تبقى جامدة، و الشعب المصري عنده عرق كده اسمه الفضول، فأنت بتاكل وانت متهيأ أصلاً إنك هتدوق حاجة أسطورية فالطعم بيوصل لمخك مضروب في 2.. يعني أيه؟
يعني عقلك و مخك هما اللي بيتهيأو الأول، متشوقين للخاجة دي، فأول ما توصل يبقى كده اسطوري..
طيب ليه الشخص بيندمج ليها؟ لأن اللحمة فيها دهن الإنسان و لما بيتسيح على الفحم بيعمل ريحة عمرك ما شميتها ريحة مسكرة ومدخنة في نفس الوقت ريحة بتثبت في مناخيرك، ده غير إنه بيفرم حتت مخ مع اللحمة يبقى كده المخ دهون صافية + جلوتامات يعني بترمي قنبلة طعم في بق الزبون.. و مش الجسم اللي بيدمن، دا الشهية نفسها لأن الجلوتامات بتلعب على الحس الشهي، و توصل للمخ بسرعة.
كذالك بتبقى لذيذة، فبيبقى الشخص عايز يجرب الشعور دا تاني..
يعني الراجل ده مش بيحط لحمة عادية دا بيفرم لحم بشري واللحم البشري فيه حمض الجلوتاميك Glutamic Acid أعلى 3 مرات من البقري ده بقى بيدي طعم الأومامي الخام يعني اللسان يدوقه مرة والمخ يعمل save زي الباسورد.. ميتنسيش.
و اللي أنا و انت حسيناه و كنا عايزين منها تاني، دا مش ادمان و مش حب فيها.. دا لأن الجلوتامات بتشتغل على الشهيه في خلال ساعة بالكتير.. عشان كده كنا عايزين منها كتير.. و على فكرة كويس اننا شربنا قهوه، لأن علمياً الكافيين بيقفل الشهية موقتاً..
كنت بسمعه و أنا دافن وشي بين إيدي، معدتي قلبت عليا..
كلت لحم بشري؟! مخ انسان نزل في بطني!! دهون انسان!
رفعت عنيا على كريم و أنا حاطط منديل على بُقي لأني حاسس إن هيغمى عليا، اتحركت على الحوض معدتي بتتقلب حرفياً.. لكن مفيش استفراغ و كأن جسمي و عقلي مش مصدقين.
غسلت وشي و رجعت لكريم و شكلي جالي قرفه من كل اللحوم:-
_ طب الجثث دي نظامها ايه؟
مسح وشه و هو بيقول و صوته لسه مرهق و تعبان:-
_ الأعراض اللي شوفتها في الملف.. و التحاليل اللي انا وصلتلها، بتثبت بنسبة 90٪ أنهم عندهم كـورو ولما اشرح الجثث هتأكد بنسبة100٪.
. و في خلال اربعة و عشرين ساعة.. المستشفى مش هيكون فيها مكان لحالة جديدة..
عنيا وسعت و أنا ببصله، كمل قبل ما اسأله و قال:-
_ كورو ملهوش علاج نهائي.. الشخص بيفضل يضحك لحد ما يموت..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
