رواية تحت ظل السعف الفصل العشرون 20 بقلم ميار

واتحدى البعد يجبرني يوم انساك

وعمت عين الصدف غيرك تشوفني

رغم بعد المسافه وانت ترس العين

والناس الشفتهم ماجزوا جفني

بخيالي شكد صور ماخذلك ولقطات.

من اشتاق كلش هو يسعفني... 

ـــــــــــــــــــــــــــ♛ــــــــــــــــــــــــــــ

♕فاطمه ♕

وره ما زفو جهاد لغرفته رجعنا كلنه لبيت ابوي عمامي كلها

كل من اخذ عائلته ورجع لبيته ما بقى غير عمتي امل وبيت

السيد فرحانه بيهم بس شنو تعبت تعب ما صاير طبيت اسبح حتى اريح جسمي وحتى عقلي احسه تعب كملت

وطلعت جاي امشط وابالي وين راحن البنات وتذكرت عمتي 

ما شفتها لا هي ولا بناتها ريتاج من وره العشا بعد ما شفتها

لبست حجابي وطلعت اسمع صوت البنات بالسطح صعدت

لكيتهن فارشات وناس بسد ناس ويتمضحكن عجبتني لمتنهن وهبه لازم تبارك عود تقنع بيها حتى تصير ضرتها

هبه:: وعلي يونسج فد حنين وزلمه حوك 

تبارك:: خلي الج عيني شبيهم ولدنه لا ما حبيتها منج

زينب:: زين ننطيكم مره وناخذ منكم ها شكلتي 

رقية:: ما يحتاج جتي فاطمه تعالي فطوم شتكولين

-جيت كعدت يمهن اضحك على سوالفهن جريت مخده

وكعدت يمهن ظلمه ما ينشافن زين وين يلا ركزت بمهى

موجوده كتلهن.. شكو شجاي تسولفن و وين وصلتن

هبه:: اني السولفلج خيه اريدن اختج لزوجي ابو بيتي

واختج قافله كل ما حجينه وكالت وشبيهم ولدنه اظن

والله العالم اختج مخيله على واحد هل ما ترضي بينه

-هههههههه 

فاطمه:: هههههههه اي عجل صدك شبيهم يمه ولدنه

شو طول وجمال وهيبه واحدهم يعادل الف زلمه 

رقية:: بنات اني وامي العرس كله انخطط حتى المهر حددنا وعجبتنه ابنيه ونريدها وبلي تردونه احنه حاضرين

مهى:: هههههههه الله اي منو هي عاد

تبارك:: يارررب صابرين صدك دخذو بنت عمي والله خلصونه منها فد بنيه اجعليها زمال النهار كله يكربون 

على ظهرها وما تحجي فد بنت مطيعه و وفيه مثل... 

-سكتت ما كملت والبنات على ضحكة وحده اريدهن يسكتن عزاا بعيني هسه يجونه ولجنن اششش مو فوك

السطح شو كومن ننزل انتن مو مال كعده فوك السطح

هبه:: والحسين بس ارجع اسولف الـ ليث عليها اكول

فد لكيتلك مره هههههههه بس اخاف يكتلني هههههههه 

-هههههههه 

فاطمة:: غير لو يسكتن خو زينب تمدد على ظهرها من الضحك موبايلي بحضني دك شلته عرفته واحد من الولد

معاذ:: فاااطمه نعلل شنو هللصووت فضحتنه

-هاي عليمن نعل انيي 

-خزيتنه بيتت فرات وصوت ضحكجن يمنه وين كاعدات 

فاطمه:: بالسطح عيب عليك تره غير فرحانات 

معاذ:: وروح ذاك العزيز اذا اجي اكسر حلوكجن وسكتي

هاي بنت... صوتها ليمي سهله سهله يلااااا نزلن نزلن

-بعدني ما سادته واتصل جهاد عزاا بعيني حتى العريس سمعنا خفت اجاوب اذا معاذ بس يهدد هذا يطيح حظنه

البنات من شافن الاتصالات صارت بفلس سكتن ورجع

جهاد دك اخذت موبايلي وكفت على صفحه وجاوبت 

وجاني صوته العذب الرنان.. 

جهاد:: هذاااا شنووو ولجن وين كاعدات بنااات الـ... 

استغفرالله فاطمه فاطمه وحگ هو الله اجي اطيح

حظكم كاعدات بالسطوح وصوت ضحكت تباررك بأذني بس حكجن اخوتج مكورنين هااا اهااا اني اشدلي ومعاذذ يشدله بنااات الاوادم الا بالسطحححح

-غير لو ينطي مجال ابرر ردت عود اهدي كتله تره هذن 

بنات السيد رادن يكعدن وتره مو صوتنه شببييك جهاد 

جهاد:: لا لا شبيه عمي شبيه شوفي هسه هسه تنزلن ومعتب هاا معتب اذا ما لحمت سرگي باب السطح اخليجن بس بالحلم تشوفنه انتنن مال اسطووح يلااا انزلن

-اريد اسده اسمع ريام تكوله

-شنو ملتمات وعايفتني 

جهاد:: تريدين اغرددلج انتي همم وين موليه غيرر عرروس

فاطمه:: سديته گبل لا يرجع عليه ورجعت يمهن لكيت

هبه هم تخابر وتضحك وصوت الولد امر من جهاد اشرتلها

حتى ننزل ما رضن سدته وتمددت ولا يمها اسحيت اكوللها

كلهن تمددن ونامن بس اني جفى النوم عيوني بيدي موبايلي دحكت الساعه 2 كمت افتر بالسطح نفوف هوى بارد بسبب البستان جان اكو بسد سياج السطح بلوكه صعدت عليها رغم اشوف بس قليل من صعدت على البلوكه

لا صرت اشوف طبيعي ارتجيت على السياج وادحك على بيوت هدوء بس صوت الشجر والطيور صافن ومواقف فرات براسي مرات اعذره اني الي رفضته بس تعلمت على 

تعامله بلطف وحنيه صارت عيني على بيته اكو اثنين واكفين جفلت عرفته واخد منهم فرات سحب الي بصفه وكعده 

رن موبايل بنفس اللحظه دحكت رقم فرات نزلت كعدت على بلوكه وجسمي يرجف شلون نسيت ضوه البلوجكتر على بيتنا دك اكثر من مره يلا رديت جاني صوته

فرات:: احمم الوو

-... ال.. الوو

فرات:: شكو صاعده على سطح تره اليوم سويتنها بلا ملح صدك مو مال واحد ينطيجن مجال شكو فاطمه 

شكو واكفه موو تشوفين العامود بسدكم والضوه

مشتغلل روحي ناميي شكووو كاعده شافج ليث شسوي هسه والله لا حول ولاقوة الابالله لا توايجين

رحممممه للانبياااء تره اليوم حررركتي گلبي وزياده

-رديت بزعل كتله

-شبيكم اليوم عليه كلها ياهو الزعل وعاط عليه تره مو بس

اني كلهن موجودات وضحكن وراحن للزفه لو بس اني تقهروني وعلى كد ايدكم بس ترزلون بيه مكفخه الكم

زعلت وسديته بوجهه قهروني اخلص من اخوتي يجيني فرات ذبيت الموبايل وتمددت بسد مهى جريت الغطى ونمت.... 

✿مروى✿

كعدنه من الصبح لان عدنه خطار لكينه فاطمه كاعده گبل 

الكل واكفه تسوي ريوك للزلم وكفت اشتغل وياها ومهى

خطيه ما قصرت من البارحه وهي ما كعدت تساعدنه 

كملنه تحضير الريوك وطب معاذ عبالنه ياخذ الاكل صد على مهى وهي حتى ما اهتمت رادت تطلع من المطبخ وصاح بيها

معاذ:: هييي شبيج ناكلج 

مهى:: شتريد وليش تحاجيني هاا ترضى اخوتي يحاجون وحده من خواتك وبعدين لا تكول هيي 

عندي اسم ما عنده شغل عمل غيري عوفني يا اخي

معاذ:: عابت هل السان جنج امج ما واحد يسلم منها

-لا تغلط على امي ما اسمحلك 

معاذ:: كافيي عاد امشي اخوج بالباب ينتظرج

فاطمه:: يااا ليش مستعجلين خليها تتريك من بعد بيتهم 

معاذ:: والله حجينا ابتلينه هذا ابن خالج ما يتفاهم

-راحت مهى بدون ما تناقش لبست عبايتها وطلعت ضجنه

هسه لو متريكه بس نعرف هاي سوالف امها وست رحاب

قليل تشتغل من انخطب لهسه يلا حايره بروحها اخذ معاذ

الريوك واحنه هم صبينه للنسوان نسوان عمامي من الصبح يمنه بحجت يباركن للعرسان للعشره يلا طلعو العرسان من بيتهم طلعنه بالحوش نستقبلهم وتلكتهم فاطمه بالهلاهل وجهاد يخزرها ولا يمها بس دخلو الاستقبال ام ليث هم هلهلت وجهاد عيونه بالكاع ما رفع 

عينه ويتشكر منها كلنه عينه على امي وايدنه على گلبنه

لا ما تسلم على ريام على الاقل جدام الخطار بس ما فاد

جت وحضنت جهاد وسلمت من بعيد على ريام وسلمو

فاطمة وره ما حظرت ريوگهم اترخصت من ام ليث

فاطمه:: من رخصتج خاله ومن رخصت الموجودين

عرسانه تفضلو حتى تتريكون بالغرفه ينتظرونك عريسنا

جهاد:: من رخصتج خاله ام ليث وجيتج هاي هي الي كملت فرحتنا وانت تدرين مقامج من مقام الوالده

ام ليث:: بعد عيني يا يمه فدوه لطولك شايفين الخير

بجاه الحسين ويوم ان شاء الله اشوفكم و ابنك بحضنك

جهاد:: ههههه الله يسلمج خاله ان شاء الله يوم للولد

وتفرحين بيهم 

-بعد گلبي اخذو راحتكم 

مروى:؛ طلعو واني لحكت فاطمه اساعدها بس اختنا حتى

غداها جهز واكفه جاي تصب جاي واني وصاح جهاد علينه

جهاد:: ما تجووون فااطمه

فاطمه:؛ هاا هاا رايد شي عيوني

جهاد:: ما تجن تاكلن شنو وحدنه نتريك

فاطمه:: يبوو جهاد هو ظل ريوك بس غير 

انتو عرسان تريگ الف عافيه يروحي انت 

ريام:: عوفها جهاد فاطمه يلا حايره تسهر وتتريك ويا بنات السيد هي خواتك خلي نتريك وحدنه شكو تصيحهن 

-هههههههه 

فاطمه:: هههههه عود زعلانه غير انتي العروس بس تره

اني ولا سهرت السهرن تبارك ومهى ازعلي عليهن 

مروى:: اي والله صار عدهن صديقات غيرج اني وفاطمه 

ما نبدلج وانوب صرتي ابنيتنا وجنتنا شعدنه غيرج عمري

ريام:: شووف هذن الخوات الكفوو ارضي بس عليهن 

جهاد:: هاي هي تأمرين اكلي يابه حتى نروح انشوف خطارنه

ريام:: غير تستأذن مني يجوز ما اقبل 

-لا بالله 

ريام:: وداعت جدك عبدالله جهاد لازم تحسسني اني مسيطره لا تشمت البنات بيه على الاقل جاملني جدامهن

جهاد:: خوش يابه يلا الف عافيه انتي خليج ويا خواتج 

واني هم اروح اشوف خطار واخوتي شيسون ما يسون

مروى: طلع جهاد وكعدنه نسولف ويا ريام ويانه طبيعيه

ولا عبالك عروس بس من جن البنات استحت وطول 

الوكت وعينها على الباب تنتظر عمتي الي صدك استغربنه

ما جت لا هي لا البنات شويه وترخصو بيت السيد وشكد

رادو منهم يبقون على الغده ما قبلو وكالو على عرس حسين يجون ودعناهن ورجعنا ما بقى عدنه بس عمتي

امل الي طول الوكت كاعده وتذب بحجيها وتوز بأمي 

كاعدين كلنه ودخل ابوي و الولد ريام جانت كاعده بسد

جده فرحه يسولف من دخل ابوي ارتبكت وكفت كوه سلمت وهو ما ادري ليش حتى ما يدحك عليها بس سلم

عكس امي كعد جهاد ضايج مدري شبي واستلمه زياد گاله

زياد:: يابه شتشوف جهاد مو وجهه طالع علزواج 

معاذ:: ولك ما لحك دصبر على الاقل اسبوع 

زياد:: لا لا هذا خما علاج اسبوع يلا يبين تأثيره 

-هم صدك لا عاد جهاد امبين عليه صدك محلوو

زياد:: اگوول مرت اخووي عجبج البيت كله مني

تره افلوسي كلهن حطيتهن على صبغ بيتكم 

ريام:: حلو عاشت ايدك 

زياد:: والفلوس جاي اكولج صرفت فلوسي اشرلي لزلمتج يبحبح منا منا اني هم طالب وراي مصاريف

جهاد:: سوده بوجهك لو ما اني دفعت الفلوس 

زياد:: لا ما يصير مو جدام العروس تفشلنه بيني خير

مروى:: ظلو يتشاقون وگبل الغده راحو جهاد وريام لبيتهم

لان تريكو متأخرين ما رادو اكل صبينا الغده وكعدنا ناكل

وره الغده كلها راحت تنام الظهر او مثل ما تسميها جديتي

تجياله ظلينه اني وفاطمه وتبارك نفتر ما جتنه النومه والجو

حار وحايرين شنسوي وفاطمه طول الوكت حاير ليش عمتي امنه ما جت واني وتبارك وحده ادحك على الثانيه نريد نروح يم ريام وفاطمه ما تقبل وكضتها عليها عيب ما عيب

فاطمه:: اوو وجع شبيجن وين رايحات تره راحو ينامون

ما تنخمدن تنامن وانتي تبارك مددي لا تظلين تفترين

تبارك:: ما نعسانه دخلي نروح يمهم والله ذيج الساع كعدو ما لحكو ينعسون بس تره جهاد ضاج من امل

فاطمه:: امل؟ عمتج امل لا تقللين ادب بعدين عيب افهمن خما زمايل عرسان شكو ترحن يمهم اكعدن واسكتن اني وين وانتن وين اني حايره بعمتي بس لا زعلت

مروى:: جاي تسولف ودك موبايلها وهي مثل العجز تربعت

وفتحت السماعه وتسولف ويا جهاد واحنه كعدنه گبالها 

جهاد:: شنوو نايمات كاعدات

فاطمه:: لا والله كاعدات تعرف خواتك ما ينامن الظهريات

جهاد:: عجل جيبهن وتعالي كاعدين وحدنه تعالن نتونس

فاطمه:: لا مو عدنه شغل وعمتي هسه تكعد نسوي عصريه

جهاد:: شبيج يابه مرتي ضايجه تعالن يمها احس ما اكتلها

ريام:: دحكت عليه رافعتله حجابي وهو سد الموبايل يضحك عليه واني كل ما يكولي سالفه اكوله اني ما ردت 

اتزوج انت لعبة بعقلي اخلي يفور جن البنات وهو بس

دخلت تبارك بلا حجاب كام وهي كبل لا يصلها حطت الشال

عود على راسها سحبها من شعرها عود يهدد بس هي ولا يمها دخلن كعدنه جنت حاطه حلويات وعصاير ادحك على

فاطمة الوحيده مستحيه من كعدتها يمنه بس جهاد ظل يشاقيها وكل شويه يفتحلها نستله وهي ذيج الساعه اتذكرت عود هي زعلانه على اخوتها دارت عليه وكالتله

فاطمه:: اني اكوول تهتم بيه تره ما نسيت شلون البارحة 

تصيحون عليه شوف هذا الموبايل واخذه لا بحجة عندي 

موبايل تخابروني ترزعلون بيه شنو صغيره اني تحجون عليه

جهاد:: افااا هاي فطومه الورده بس صدك ولج تبارك 

والله اذا انوب اسمعج صاعده على السطح رجليج اكسرهن وشنو هل ضحكه تكول برنو ويطگ فضيحه انتي

تبارك:: سويت نفسي فقيره حتى لا يزيدها تكحزت وكعدت 

گباله.. يابه تره مو اني هاي مهى وجنة السيد خما اكوللها

لا تضحكين وهي سالفته اتضحك قابل افشلها وما اضحك

جهاد:: خويا بلا لواته غير صوتج ترس اذني ولج ابيتي وبنص الغرفه صوتج وصل عجل الكاعد بالجول شلون شاده سماعه بزردومج تدرين معاذ يكول كاعدين وصوتهن بنصنه

ريام:: ادري عدهم اذانات فرس دخلوهن يفرحن حتى الضحكه حرام بعدين انتو شكد ما حاطين بالكم يمهن

جهاد:: اي اي برري مدام برري والله شوفن انتن الاربعه

اذا يوم اسمع صوتجن طالع حظجن اطيحه عيب بابا وين

كاعدات وبهيج مناسبات ممنوع تصعدن على السطح. 

ريام:: ظل يرزل بينه بحجة ينصحنه بس تونسنه ساعه

نضحك ساعه نحش اني والبنات اذن عصر كام جهاد 

يصلي واحنه بعدنه على نفس كعدتنه ما خلينه بشر 

يعتب علينه ما ضحكنه عليه وغبناه صلى وجيه لكانه

بعدنه نسولف وكف فوك روسنه ويحجي علينه حتى نصلي

جهاد:: ما تخلصن يابه ما يجوز الغيبه شعليجن يعني 

عايفات صلاتجن وحايرات بفلانه شلبست وشأكلت

ريام:: اني ولا حجيت هسه اكوم اصلي بس اكمل نستلتي

جهاد:: اي الحكي اكلي لا النستله الطير كومي صلي وعوفي الاكل لاحكه عليه ويلا انتن الاربعه خمس دقايق 

اريدجن متوضيات واكفات كبالي اتصلن ما فالحات بس بالغيبه 

-كمنا كلنه ومروى بحجة توضه بيتهم واهناك تصلي لان

مجازه وتستحي من جهاد وهو ما لح عليهن شلت الصينيه

وتوضيت وصليت جاي انعزل بالمطبخ وندك الباب راح جهاد يفتح سمعت صوت عمتي امنه عفت البيدي وطلعت

تلگيتها يمه احس صار سنه ما شايفتها تعودت عليهم كلش

امنه:: هلا يمه هلا 

-هلا عمري عمه شلونج 

امنه:: يمه والله البيت خله علينه اني وعمج حتى الريوك 

ما تريكنه وكوه يمه تحملت كتلهم اروح اشوف بنيتي واجي

-كل الهلا بيج عمه والله اني هم من الصبح وعيني على

الباب كل شويه اكول لجهاد شو ما جت عمتي امنه

جهاد:: راح تخلينها واكفه بالباب تفضلي عمه 

ريام:: من فرحتي نسيت والله تفضلي دخلنه كعدنه

وجهاد عافنه كال يروح يشوف الولد جبت حلويات 

وعصير وكعدنه نسولف اني وياها وهي تنصح بيه

امنه:: يمه تحملي اسمعي وعبري لا تظلين تهتمين

عمتج اكو من يوزها ويلعب بعقلها وهي مكيفه شعلينه

اهم شي بيتج وزلمتج زين شتريدين منها ويمه اريدج 

نبهه على ملابس زلمتج اكلته شربته وبيتج اربعه وعشرين

ساعه نظيف وهذا الشي ما يحتاج اوصيج بي بس ميخالف

انبهج لا تخلين على نفسج زله خوش يمه واني مازال الله

منطيني عمر وصحه ما اعوفج والله الليل ما نمته خايفه

عليج بس اصبر بروحي اكول بنيتي سباعيه وجهاد خوش 

زلمه وداعتج حتى عمج ضايج وراج بس يستحي يجيكم

- عمه والله حتى اني ولا عبالك البارحه طلعت من يمكم

ولا يظل بالج عمه جهاد حيل زين وعمتي اتحملها لخاطره

امنه:: اي عفية يمه حرمه جبيره هم حسبيها امج يلا يمه 

هسه تغرب الدنيا واروح اشوف خياتج عود بالليل يچنچ

ريام:: كل الهلا بيهن عمه سلميلي على عمي والولد

-يسلمج الله يا يمه ويسعدج ويوفقكم وان شاء الله الذريه الصالحه ديري بالج على نفسج اني هم ما يصير اجي يوميه

-ان شاء الله عمه 

ريام:: وصلت للباب وهي تنصح بيه كبل لا تطلع وصتني

لو اروح لبيت عمي لو ادك على جهاد يجي يمي سديت

الباب وراها ورجعت لبيتي دنيا مغرب اذن وياما كملت صلاتي ودخل. جهاد 

جهاد:: تقبل الله مدامتي

ريام:: ههههه منا ومنك صالح الأعمال 

جهاد:: عمتي غير حركت الموبايل عليه خفت بيج شي 

-ليش توه ما صار جثير من راحت

جهاد:: شمدريني تكول لا تخليها وحدها وتستحي تروح لبيت اهلك 

ريام:: كمت شلت المسجد واسولفله ... اي غير عمه 

تكول العروس الا تطلع سبعتها لازم ما تظل وحدها 

-هههههههه والله عمتي عليها سوالف لو تشوفين 

وسام وحسين تكول مسوي جريمه حتى سلامهم 

ثجيل وحسين كل شويه وكال ضحكت علينه شبسرعه

اخذت بنتنه يردون ارجعج لو تتذبح الناس كلها ما انطيج

ريام:: اي شوف خاف تكول ما عدها احد عندي صلاوات

كومه اخوه يسدون عين الشمس لا تفكر تغثني تره ارجع

-تعالي

-مدلي ايده حطيت ايدي بيده وهو جرني كعدني بحضنه

جهاد:: ريام لا تفكرين بيوم ازعلج لو اغثج انتي عزيزة خالي

وغاليتي اني البارحه الليل كله اتأمل وجهج ما مصدك ريام

الجانت تفتر وتلعب جدامي ريام البنت الي جت تبجي بحضني لان ما عدها احد يمشط شعرها ما انسى هذا الموقف من جيتي تبجين لان تاخرتي على مدرستج 

وماكو احد يمشط شعرج ولازم المشط والقراصه بيدج

وكعدتي بحضني امشط شعراتج تدرين بذيج اللحظه عرفت

شكد اعزج واغليج بوقتها جان عمرج 10اسنين من وكتها

واني اذا اشوف بدله اتمنى اخذها الج شكو شغلات بنات

احب اشتريهن بس جان خالي ما يقبل لحد ما كبرتي يوم

عن يوم دخلين گلبي ويشهد الله نيتي ونظرتي الج بصافي

نيه ولا يوم نظرت الج بغير نظره لحد ما يوم الي شفتج بيها

بدون الثام بيت خالي محمد وراها بالبستان كمت من ارجع

احط راسي على المخده وصورة وجهج ما تروح من بالي 

ويوم شفت نفسي بعد ما اكدر جيت وحجيت وطلبتج من خالي احبج وحگ راية ابو الحسنين عيونج سبتني اسبايه

ريام:: ما اعرف كلامه خلاني فراشه واطير بنفس الوقت

خجلانه سحبني لحضنه حاضني بقوه حضن الامان والحنيه

هذا الامان الي جنت مفتقدته تعامله وياي كم بنته مو مرته

دك عليه معاذ حتى نروح يمهم نتعشه رتبت نفسي وطلعنه

لبيت اهله سلمنه وكعدنه نتعشه جهاد توه حط ايده بالاكل

ودك موبايله سحبه ايده من الاكل و رد توه كال الوو وفز

كام وعاف الاكل طلع يركض واخوته لحكو واحنه غير نخمشت گلوبنه ظلينه ننتظر فزينه كلنه من دخل زياد يركض جيه عليه ينفت كوه يحجي وكف يمنه وكال

زياد:: سرريع ريام محفظة جهاد سرريع

-ركضت للبيت اخذتها من الميز ورجعت انطيتها اله

درت على البنات اسال بيهم بلجي زياد كاللهن شكو وصدمتني تبارك من كالت.... 

-فرات مضروب بسجينه......