رواية لست غجرية الفصل العشرون بقلم روز الحيدر
التفت بدهشة
نسر : شنووو!
وردة : مثل ماسمعت.. لاتحبني ولا حتى مجرد
تفكر
سكت ورجع عينه على شارع
نسر : ليش؟ شلون عرفتي أحبج ؟ يمكن توقعج
غلط
وردة : غلط أو صح مااريدك تفكر أصلًا
ابتسم طرف شفته
نسر : عجيب حتى مشاعري صار لازم آخذ إذن
بيها منج؟
نزلت عيني
وردة : أريد مصلحتك
نسر : لو تريدين تشردين؟
وردة : وين أشرد؟ ماعندي شخص ألتجأ له غير
الله
هز راسه بخفة
نسر : زين فهميني شنو شايفة مني حتى حكمتي؟
وردة : ألاغنية ومساعدتك ألي
هز راسه
نسر : أني إذا ساعدت إنسان صار لازم أحبه؟
إذا وكفت يم أحد صار عاشق؟ الدنيا أسهل من
هيچ!
سكتت، وانحرجت من كلامه
وردة : مو قصدي...
نسر : أدري مو قصدج وفاهمج والله تفكرين
ساعدتج خلاص اريد مقابل بس لا تفسرين كل
خطوة على كيفج
وكفنا بالازدحام.. لتفت
نسر : أني رجال عندي واجب وعندي ضمير وعندي
كلمة مو كل مرة أسوي زين يعني وراه قصة حب
نزلت راسي أكثر وحسيت بحرارة وجهي رجعت
وردة : اعتذر...
سكت ثواني رد بنبرة أهدأ
نسر : لا تعتذرين بس ارتاحي من هالأفكار وطمأني
اعرف المجروح يبقى خايف
سكت ثواني يتاملني
نسر : وانتِ مو بس مجروحة مكسورة
وخايفة من الاقتراب حقج تسوين النفسج درع لان
كل لي أمنتيهم خانوج
بلعت ريكي وعيوني نازلة
نسر : بس تأكدي مااريد مقابل ولا أريد افرض نفسي
عليج
رفعت عيني
وردة : بس...
قاطعني
نسر : واذا تخافين أرتبط بيج لأنج تحسين نفسج
غريبة أو مو مناسبة فهذا مو ذنبج هذا اللي عشتي
خلاج تفكرين هيچ
رفعت عيني له بصدمة خفيفة
نسر : ماكو شي بيج يحتاج تنرفضين بسببه بالعكس
بنية مؤدبة وصاينه نفسها
ضحكت مو مقتنعة
وردة : لا تبالغ عاد مو جنت تكول تربية شوارع
ضحك
نسر : لا مو تربية شوارع بس عرمة شوية هواي
وتجرين زياجة
ضحكت
وردة : والله غير دوسون بطني شنو تردوني اظل
ساكته؟ اني ماسمح لشخص يقلل من نفسي لان
اعرف شنو عشت وشلون وصلت لهل مرحلة
نسر : فعلاً نتبهت اذا مااحجي وياج ومااغثج
ماتنترين وتطلع الانثى اللي بداخلج
وردة : هههههه لا بربك؟
ضحك وحرك السير
نسر : وبالنسبة للـ عرمة مو إهانة هاي طريقتي
أوصفج بيها لأنج مو سهلة تنفهمين من أول مرة
رفعت حاجبي
وردة : هاا
نسر : اي والله تسوين اللي براسج وهل مشيتني
بمزاج
وردة : والله مو بمزاجي بس هيج اكون مرتاحة
نفسياً ومااظل بقلقل ها حجو ها كالوا اختصر ؏
نفسي قهر وتعب
هز راسه
نسر : حقج
تنفست براحة وبتسمت
وردة : أييهه الحمدلله
نسر : بس سؤال
وردة : شنو؟
نسر : تشوفين مااستحقج؟
وردة : لاعمي شاب عين الله عليك جمال واخلاق
وشخصية واصل وفصل خو مو مثلي طالعة من
فطر الگاع
سكت وبقت عينه علية فهم شي جنت اخفي
نسر : هسه فهمت
عقدت حاجبها
وردة : شنو فهمت؟
نسر : إنتِ مو شايفة نفسج قليلة بس خايفة أحد
يشوفج بعينه قليلة
سكتت نزلت عيني
نسر : كل ما يقربلج شي زين دفعيه بعيد قبل
لا ينوخذ منج كل ما أحد يحترمج تكولين أكيد
وراه مقابل كل ما تشوفين أمان تكولين لا فـخ
رجف صوتي
وردة : لأن هاي الحقيقة
هز راسه بهدوء.
نسر : لهذا ما ألومج بس لا تخلين الماضي والخوف
يتحكم بيج ولهذا قبل لا أحد يرفضج ترفضين نفسج
أول
بقيت ساكته ماعرفت ارد
نسر : اي كلتي حلو؟
بتسمت وهزيت راسي
نسر : وشنو المانع اذا حبيتيني؟
التفت بسرعة
وردة : هااا شوف هذا كلامك تلعب ساعة مااحبج
وساعة شنو المانع وتكلي لاتفسرين على كيفج!
ضحك
نسر : لااا ولج قصدي يعني _
رفعت حاجبي
وردة : زين هسه شنو قصدك الحقيقي؟
سكت صف السيارة وكفت.. تنحنح وعدل كعدته
لف جسمه علية
نسر : اي قصدي.... شنو المانع اذا اني أحبج؟
او حبيتيني!
نزلت عيني بخجل
وردة : انت تستاهل وحدة احسن مني بنت ناس
وكدك من تاخذها تتفاخر بيها هذا اللي يلوكلك
مو غجرية مماعرف اصلها شنو!
نسر : لا تحجين هالكلمة على نفسج لا غجرية ولا أقل
من أحد الناس تنولد بأهل بس القيمة تنخلق بالمواقف
وردة : انت تكول هيج بس الناس لا
نسر : لان ميعرفون وردة عاشت بنص مستنقع قذر
وماتلوثت بقت محافظة على عطرها
نزلت راسي
نسر : هواي ناس عايشين بقصور وريحة أرواحهم ما تنطاق لاتقيسين نفسج بعنوان الناس قيسيها بضميرهم
تقرب كأنه يريد يلزم أيدي بس تراجع
نسر : شوفي اني ضابط ومرت على راسي قصص
لو اسولفها محد يصدكها ولهذا أعرف أميز مو من
الشكل من الموقف
رفعت عيني له
وردة : ماتعلمت أخذ شي اكبر من مستواي ولا رفعت
راسي لفوك
اخذ نفس وكال
نسر : المشكلة مو إنتِ مو كده المشكلة إنج للآن ما تعرفين قدرج
بتسمت ونزلت راسي
وردة :بالعكس كلش زين اعرف قدري سالفة حبوبتي تكول مدي رجلج على كد غطاج ولاطلبين شي اكبر
ممكن ماتتحملين
رفعت عيني شفت عيونه ثابته بوجهي بتسمت
وردة : وهنيالها ومحضوظة الي تاخذك لان حصلت
سند مثلك
ميل راسه وعينه بعيني كال
نسر : أخذيني وصير هنيالج
وردة : هاااا شوف كلامك
ضحكت
وردة : ان شاءلله تلكه بنت الحلال اللي تناسبك
سكت ماكدر يحجي فهم نهيت الموضوع من يمي
نسر : اي... يله نزلي
وردة : وين؟
نسر : للصيدلية خلي تنطيج علاج
هزيت راسي ونزلنا اكو بنية حجى وياها
نسر : شوفيلي هل وردة وكفت بالشمس وماتحملت
بسرعة ذبلت
البنية باوعلتي وبتسمت
:: شنو بيج؟
وردة : ماعرف فجأه وجهي صار بي بقع حمرة
:: بس وجهج؟
وردة : لا شوفي
رفعت ردني ونزلت البلوز شوية شوفتها البنية
قربت خطوة وباوعت بتركيز
:: عندج حساسية؟
وردة : اول مرة هيج يصير بية
:: هاي مو بسيطة هذا تهيج من الشمس واضح
وردة : يعني شنو؟
:: جلدج حساس والشمس بهالوقت سوت تفاعل
سريع خاصة إذا لابسة ثكيل أو تعرقتي
وكف يباوع بهدوء وما قاطعها
:: عندج حبوب صغيرة هم طالعة بالبداية؟
هزيت راسي بخفة
وردة : إي ماجانت موجودة
هزت راسها البنية ودخلت بسرعة على الرفوف
:: خلي أجيب لج شي يهدي الالتهاب حتى ما يزيد
رجعت بأيدها أدوية وكريمات خفيفة
:: هذا كريم تبريد للحساسية وهذا غسول خفيف
وهاي حبوب إذا صار حكة أو التهاب أقوى
حطتهم على الطاولة
:: أهم شي تبعدين عن الشمس وما تستخدمين
أي كريم ثكيل أو عطور على الجلد
نسر : يعني مو شي خطير؟
:: لا بس إذا أهملتوه ممكن يسوء بس هسه بسيط
وردة : مشكورة
هزت راسها وابتسمت ابتسامة خفيفة
:: عندج العافية
بعد ماكملت تأشير اخذ العلاج وحاسبها لتفت
نسر : يله نرجع
طلعنا
نسر : ماتوقعت هيج يصير بيج
وردة : گتلك لان لابسة ثكيل وحر الشمس
التفتلي
نسر :هذا ترحيب بغداد ماتشقة
ضحكت
وردة : بغدادكم ماحباتني
ضحك
نسر : لا من حبك لاشاك وهي رحبت بيج بطريقة
توجع
ضحكنا وصعدنا السيارة
وردة : هسه نكول كردستان ترحب بكم!
يباوع للطريق
نسر :بس مااكدر اروح وارجع بسيارة
التفت بسرعة
وردة : هاااا!
نسر : ولج ظالمة ارحمي بحالي
وردة : مو انت كلت أرجعج!
نسر : اي بس مو بسيارة بطيارة
وردة : شلون ماعندي جواز!
نسر : وين مسافرا ترا داخل العراق الهوية كافي
وردة : هااا زين
نظرلي صفح كال
نسر : واذا حتاجوا طليقج طلعلج جواز لاتخافين
مارديت وغيرت الموضوع
وردة : بس أخاف من طيران شلون!
نسر : اختاري طيران لو نبقى هنا أسبوع؟
وردة : طيران
ضحك
نسر : كفوا اختاريتي الصح
وردة : ليش؟
نسر : لأن أسبوع هنا يعني أغير رأيي وأخليج
ما ترجعين أبد
رفعت حاجبي بسرعة
وردة : شلووون؟
ضحك أكثر وبصوت أخف
نسر : أشاقه شبيج يعني اتحجج يومية عندي شغل
موفارغ وهكذا
وردة : أي اضرب الحديد دام حامي
نسر : بس قبل مانروح ابدل ملابسي
وردة :وين تبدل؟
نسر : بالسيارة
سكتت وتوجهنا للمطار قبل مانوصل صف السيارة
ونزل طلع ملابس مدنية من الجنطة ورجع اول ما
صعد شو هذا فتح زراره
وردة : ياءءءء
نسر : وعلاه
وردة : تعلك شو تعرينت؟!
نسر : غير ابدل
وردة : ماتستحي تبدل كدامي؟
نسر : وشتسويلي مثلاً؟
وردة : اكو شي أسمه حياء واحترام
ضحك وغمز
نسر : هااا خاف تنعجبين
وردة : شو ماتستحي؟
نسر : ديري وجهج ولاتباعين
وردة : يعععع ميته عليك واباوع والله يالله
هزيت ايدي وفتحت الباب نزلت صاح بضحك
نسر : ولج وريدة استحي دير وجهج
اشرت بأيدي ونزلت نفسي
وردة :ااييييي تخرخر مستحه
حجيتها وسديت الباب ضحك الفيت وجهي بين
مابدل ملابسه صاح
نسر : العرمة
بدون مالتفت
وردة : كملت؟
نسر : أي صعدي يله
رجعت صعدت وهو يعدل ويرتب بشعره بالمراية
التفت
نسر : حلو؟
باوعتله صفح
وردة : اي
نسر : شو من ورا خشمج؟
وردة : حلو لو مو حلو اني شعلية الله يحفظك لأمك
نسر : ويحفظج أللي
وردة : يله توكل ورانا طريق
شغل السيارة وكملنا الطريق وصلنا نزلت اغراضي
نسر : خو مانسيتي شي
وردة : احس ناسية شي بس مدري شنو
نسر : موبايلج افلوسج ملابسج
وردة : كلهن موجودات تاكدت مرتين
نسر : علاجج؟
وردة : هذا
نسر : هاج خلي ملابسي وياج ونطيني أشيلهم
اخذت ملابسه وخليتهم بالجنطة ودخلنا من الباب
اشر بأيده بدون مايلتفت يعني لزميها لزمتها ضغط
بخفه...ايد لازم اغراضي وأيد لازمني
امشي ويا وماعرف شي هو رتب كلشي وگلبي كلش مطمأن بعدها كعدنا وبتعد عني يحجي اتصال كمل
ورجع
نسر : نطيت خبر الأهلي حتى ماينشعل بالهم
نزلت راسي
وردة : كلش تعبتك والله خجلانه منك
ضحك وكعد يمي
نسر : العرمة تعرف الخجل؟
سكتت وخجلت اكثر
نسر : إي هيج أول مرة أشوفج خجولة
وردة : لا تتعود عليها لحظة وتروح
ضحك وهز راسه
نسر : لا هدوءج ينفع ولا شراستج تروح
وردة : شلون يعني؟
نسر : يعني هاي العرامة مالتج عاجبتني
سكتت وحتاريت بي ساعة يمدح ساعة يذم تنفست
طلعت تنهيدة
نسر : شبيج ليكون خايفة من طيارة؟
وردة : اجذب اذا اكول لا
نسر : لاتخافين ماتحسين بشي
وردة : ان شاءلله
بقينا ننتظر مايقارب ساعتين حسيت بي تعب هواي
سند راسه على كرسي وخله ساعد أيده على عيونه
واضح عليه التعب
استحيت من نفسي لان تعبته هـواي وهو متحـمل مسؤوليتي بدون ما يقصر بشي
بقيت أتأملة ولا أرادياً حسيت نفسي بتسمت ماعرف
ليش من يكون يمي احس بطمأنينة وماافكر بشي
هو يكون متحمل مسؤولية حتى مزاج
تنهدت وطلعت نبرة خفيفة
وردة : بس الدنيا خلتني اخاف حتى من الامان
شوي وصاحوا هو فز
نسر : صار وقت الرحلة؟
وردة : ماعرف
نهض شوي ورجع
نسر : يله كومي
نهضت ويا لزم أيدي واخذ الجنطة دخلنا واني اتلفت
صعدنا الطيارة وبدأ الخوف يسيطر علية
نسر : كعدي يم الشباج حتى تشوفين الغيم
هزيت راسي وكعدت بين ما ربط الاحزمة قلعت
واني ملزمة بالكرسي اردد
وردة : يالله.. يالله.. يالله.. يالله
نسر : لاتخافين ماكو شي
وردة : لا موخايفة
بتسم
نسر : واضح
وردة : الله لايكولها وكعنا شلون؟
نسر : شلون يعني.. ترحين بالجو الله يعلم شلون
تموتين اما توكعين على حديد لو حجر لو بشارع
وردة : لا ياربي حباب عليك الله
نفجر من الضحك وجهه احمر هدأ الوضع وكدرت
اتنفس بس بخوف
نسر : والله عجيبه انتَ
وردة :هسه شنو؟
نسر : ستقرت
وردة : يعني معلكين لا حنا بالكاع ولاحنا بالسما
نسر : ستمتعي بالمنظر
اشر على جامة التفت أشوف الجو بتسما وخف توتر
وردة : الله حلوو
رجعت التفت
وردة : تدري من جنت صغير كلشش كلش عبالي
اكدر اصعد للسما واشوف رب العالمين
بتسم
وردة : وعبالي اكو ناس مثلنا عايشين ومانشوفهم
نسر : وهسه كبرتي وعرفتي؟
سكتت ثواني رفعت عيني له
وردة : أي عرف الله دائماً وياي مو لازم اروح لمكان
حتى اشوفه لو يسمعني احس يسمعني بدون ماحجي
رفع حاجبه بتعجب
نسر : شلون؟
وردة : دائماً جان وياي وماعافني ابد مثلاً شكم مرة حاولوا يعتدون علية بس هو انقذني
قبل ماتوكع دمعتي مسحتها
وردة : انقذني من أيد سلطانة واني طفلة وانقذني
من لملعون ظافر وأبنه حتى باهر لما كان زوجي
وحلالي الله ماسمح يتمم زواجه مني
بتسمت ورجعت الفيت وجهي للشباج
وردة : دائماً ينقذني من عبادة لان يعرف نواياهم
ويعرف البگلبي شنو
لمس جف أيدي
نسر :لا تخافين الله دائماً حق
التفت
وردة : و تعبك وياي هواي مااعرف شلون أرد هل
جميل
سمعت تمتم
نسر : سويني بابا
وردة : شنوو؟
سحب ايده وغير
نسر : اكول لاتسويها طلابة جميل شنو! اعتبريها
واجب وانتهى
وردة : اممم
رجعت الفيت وجهي عنه وأني متأكدة كال سويني
بابا.. غمضت عيوني ودعيت
وردة : ياربي حباب لو أمير عنده نيت سوء أبعده
من طريقي ولو حباب عوفه
بقيت عيني على الجو اجت المضيف ضيفتا ورجعت
ماحجيت شي ويا لحد مانزلنا خفت شوي ولزمت
بتجوات الكرسي بس الحمدلله عدت.. ونزلنا اول
ماخليت رجلية بالكاع
وردة : الحمدلله ياربي شكراً
باوعلي وبتسم
نسر : أمشي راح يصير علينا الليل
وردة : وين نروح
نسر : جان لازم تفكرين قبل مانوصل لهنا
وردة : نروح ندور بيت او شقة أبجار؟
باوعلي ومشي بدون مايحجي اني سكتت لان فعلاً
ماعرف شسوي مشيت وراه طلب مني انتظر ماعرف
وين راح ربع ساعة ورجع بسيارة
وردة : هاي منين؟
نزل اخذ الجنطة من أيدي
نسر : صعدي
وردة : شلون جبتها؟
نسر : اجرتها
وردة : ااا والله يأجرون؟
نسر : اي
صعدت وطلعنا ثنينا مانعرف وين نروح بس اني
گلبي مطمأن وياي شهم مااخاف غير من فلتات
السانه
نسر : أي ست وين تردين موقع بيتج
بتسمت
وردة : ماعرف بس أريد يكون بنص الناس وقريب
على سوك
نسر : تأمرين أمر
التفت
وردة : كول والله
نسر : والله المكان اللي تردي
وردة : شلون؟
اخذ موبايله وتصل طلب من شخص يدزله الموقع
بعد ماكمل
وردة : شنو؟
نسر : هذا صديقي اللي كعدنا بالمجمع مالته دزني
على واحد هنا عند مكتب عقار كال اذا مالكيت الي
تريده يدليك على غيره
وردة : الحمد لله وشكر سهلت
نسر : ان شاءلله بس كون موجود
وردة : يارب
بقيت متوترة دزله الموقع والرقم اتصل بي وكاله
اريد بيت او شقة تكون قريبة على سوك بعد ماكمل
اتصال
وردة : بشر؟
نسر : كال ماعندي بس يدليني على شخص عنده
وردة : اي يله نروح
باوعلي
نسر : ولج كال باجر اليوم مايكدر
وردة : ياااا وين نام؟
صاح بقهر
نسر : بحصني
فتحت عيوني ومانطقت حرف ماباوعلي عينه
على طريق
نسر : وين نام يعني بالسيارة لحد مالله يفرجها
سكتت ونزلت راسي ماكدرت احجي شي حقه تعب
هواي وياي.. رجع صاح
نسر : شو خنستي! السانج وين؟
منزله راسي رديت
وردة : حقك تعبتك
سكت دقايق واني ابد مارفعت عيني ولا حجيت شي
مااريده تطلع منه كلمة تهدم اللي بناء من الثقة داخلي
تنفس بعمق
نسر : اعتذر بس أعصابي تلفت والله ومانايم
هزيت راسي
وردة : لا تعتذر عاذرتك
نسر : شو باعيلي
مارديت بقيت منزله راسي
نسر : بس بلا تبجين ولج شووو!!
صف بسرعة ورفع وجهي بأيده عينه صارت بعيني
خاف يشوف دمعه
نسر : جوري والله موقصدي بس تعبان ورفعت
صوتي
وردة : والله اعرف واني هم تعبت.. خلاص اللي
تشوفه صح سوي
بتسمت
نسر : تمام بس اول شي نتعشا
هزيت راسي ورجع كمل الطريق الدنيا صارت لليل
نزل يم مطعم جاب اكل ورجع خلا ع تجوة واكلنا
اكل وبلكوة أبلع الكمة من الخجل
أستحيت وحسيت أريد أبجي بس قاومت ومااريد
ينتبه وبس مااكل يجرني.. فأكلت واني ساكته واكل
لكمة اشرب وراها ماي
نتبه
نسر : عطشانه؟
هزيت راسي بأي قدملي بعد بطل ماي ماكدرت اكمل
تركت من ايدي
وردة : الحمدلله
نسر : على اقل كملي نصها
وردة : والله شبعت اكلها بمكاني
نسر : جؤؤ خليها خاف تجوعين بعد الليل طويل
عزلها على جنب بين ماكمل التفت
نسر : جوري
التفت
وردة : ها
نسر : نبقى الليلة بفندق والصبح نطلع نشوف المكان
وردة : بكيفك
نسر : هاي هي نتوكل على الله
نزلنا يم فندق وكفت وراه
نسر : اريد غرفيتين
من سمعت غرفتين گبر بعيني أكثر.. كمل حجز التفت
نسر : يله
مشينا ويانه شخص وصلنا للغرف ورجع بقينا بس
احنه
نسر : ورد جوري
رفعت عيني
وردة : هاا
نسر : هاي غرفتج نامي ورتاحي لاتخافين اني يمج
اشر على عرفة جنبي
نسر : هاي غرفتي واي شي تردين تصلي
هزيت راسي
وردة : تمام
نسر : هاا وغسلي وبدلي وخلي من علاجج والحبوب
كالت عند الحاجة لاتاخذين
وردة : صار
نسر : يله نامي ولاتفكرين بشي
رفعت عيني بعينه عاجزة عن شكره
بتسم
نسر : يله شبيج
وردة : هاا اي يله تصبح على خير
نسر : وانت الخير واهله
بتسمت ودخلت للغرفة قفلت الباب خليت الجنطة
على سرير واول شي طلعت ملابسي دخلت سبحت
وطلعت لفيت راسي بالبلوز وكعدت اخلي كريم
لجسمي...
اتصل فيديو رديت وبعدت الكامرة
نسر : وينج؟
وردة : لحظة بس
نسر : شسوين؟
لبس فوك الكيمونه قميص ودكمته من بداية الصدر
واخذت المبايل
نسر : نعيماً
وردة : نعم الله ضلوعك..
ضحك.. نتبهتله لابس بس فانيلة بيضه وشعره
مبلل
وردة : هم الك نعيماً
نسر : ينعم عليج بالصحة والعافية
بتسمت بخجل
وردة : خجلتي
نسر : هههههههه ميلوكلج عرمة
ضحكت سكت ثواني كال
نسر : ريحتج طلعت من المبايل
وردة : لا بربك شلون؟
نسر : هيج شامبو على نظافة
وردة : يا وين اكو شامبو غسلت بماي حتى واخلي
من العلاج
نسر : تردين اجيبلج شامبو؟
وردة : لا يخوي شسالفة
ضحك اخذت الكريم وقربت المبايل خليت الوجهي
نسر : ولاتخافين ترا خف
وردة : نتبهت الحمدلله
نسر : بعد منا ماخليتي
وردة : منا؟
نسر : لااا منا الجهه الثانية
وردة : هااي؟
نسر : اي
وردة : هسه
نسر : شتحسين خو مايحرك؟
وردة : لا بالعكس بارد
نسر : وخلي الرگبتج وايدج
وردة : اي خليت
نسر : عجبتج الغرفة؟
وردة : اي حلوة واهم شي نظيفة
نسر : جوعانة تردين شي؟
وردة : لا سلامتك
نسر : يله نامي زين حتى الصبح نطلع
وردة : ان شاءلله
نسر : اا شعرج مشطي
وردة : اي امشطة واظفرة وانام
نسر : تصبحين على خير
وردة : وانت بخير يارب
بتسم وسد الخط طلعت المشط مشطت وظفرت
شعري وطلعت ملابسي فرشتهم مثل الجرجف
على فراش وخليت الوسادة جنطتي
حسيت بجوع كمت اكلـت الفة اللي خـلاها واذكـر
تصرفاته وياي كملـت ورجعـت تغطـيت بگلبـيتـي
ونمت الغرفة دافية اول نومة بعد تعب وقلقل رغم مامستقرة بس حسيت براحة وأمان ولو قليل
صحيت على صوت مبايلي رديت بصوت ناعس
وردة : الو
نسر : بعد روحي الو.. يله صحي النوم
وردة : صار الصبح؟
نسر : لا منتظرج تصحين
ضحكت
وردة : هنيالي اصحى على هيج كلام
نسر : هههههههه يله ترا بالباب
وردة : اجيت
ضحكت وكمت بسرعة فتحت الباب حتى ماشفت
وجهي بالمراية
واكف ومبتسم
نسر : صباح الخير
وردة : صباح الخير تفضل
دخل
نسر : لحظة وجهج شبي؟
وردة : شبي؟!
لمس خدي
نسر : شنو هذا خط احمر؟
وردة : يمكن مالت الجنطة جنت نايمة عليها
باوع للسرير عقد حواجبة ونظرلي بأستغراب
نسر : ليكون عندج هوس؟!
وردة : لا بس مااحب على فراش غيري
نسر : هههههههه يله لميهن حتى نروح مااريد نتأخر
وردة : صار
لميت اغراضي كلهم بالجنطة وتأكدت منهم مرتين
ومابدلت ملابسي بقيت بالتراك لان جان كلش حلو
ومرتب ولا مبين تراك بيت.. طلعنا متوجهين للمكان
نزل حجى وي الرجال وبعدها
رجع
اول ماصعد
وردة : ها شكال؟
نسر : كتلج ماعند بس ياخذنا الشخص متوفر اللي
نريده واهم شي يكون قريب مثل ماطلبتي
طكطكت أيدي ورددت بصوت مسموع
وردة : باربي حباب سهلها
ماكدر يضم بتسامته شغل ومشينا بالسيارة وراه
الرجال لحد ما وصلنا مكان يجنن كلش قريب مثل
مااريد
نزلنا وصرت الف براسي لزمته
وردة : حبيت المكان
نسر : حلو واهم شي حرس باب العمارة
وردة : اي والله أأمن
حجى الرجال
:: تردوها مأثثة لو بدون أثاث؟
نسر : اذا بأثاث يكون أفضل
:: تفضلوا
صعدنا الطابق الثاني
:: شتقربها؟
نسر : خطيبتي
:: عدكم عقد؟
نسر : اي.. بس حالياً بس هي تبقى بعد الزواج نستقر
سوه
:: اذا موجود عقد الزواج نطينيا
نسر : تمام .. كم عائلة متواجد هنا؟
:: هذا الطابق كله مسكون عدا هاي الشُقة كان
مستأجريها عرسان خلصو شهرين بيها ورجعو
نسر : هي ملك المرأة صح؟
:: بلي.. مرأة كبيرة بالعمر ماعندها غير ولد واحد
هز راسه والرجال فتح الباب دخلنا الشقة عبارة عن
صالة مفتوحة وبيها مطبخ على جنب وصحيات
ونوب كعدة وغرفتين وبلكون صغير
وكل اثاثها نظيف ومرتب والشقة كلش شرحة ضوء
الشمس يملي المكان
اتفرج على كل زاوية واني مبتسمه اجه
نسر : ورد جوري
بتسمت
وردة : هاا
نسر : عجبتج؟
همست
وردة : كلش وانت؟
رجع همس
نسر : هووواي عجبتني
وردة : بس شلون طلب عقد زواج؟
همس
نسر : لاتهتمين خليها عليه
ضحكت الرجال شافنا
:: عجبتكم؟
نسر : ان شاءلله بس نتفق على سعر
:: تفضلوا للمكتب
نسر : تمام
تاكدنا من كل الاجهزة تشتغل ونزلت تحت السرير
اشوف اذا اكو وصاخه بس الشقة تلمع بعدها طلعنا
للمكتب تفقوا على سعر ومثل ماتوقعت السعر غالي
كلش دفع أجار شهرين ولما امير طلع هويته للرجال
نسر : واذا حتاجيت عقد زواج ضروري بس اكمل
معاملتي واجيبه ماعندي مشكلة
:: ماحاج أبني وتاكد كل اللي ساكنين هنا ناس راقين ومحترمين
نسر : لو مااعرف مستحيل أكدر أامن زوجتي وحدها
بس اعرف مكان محترم واهله راقين هل شي كافي
اخليها واروح للدوام
نطانا المفاتيح
:: شايفين كل الخير يارب
سلموا على بعض وطلعت فرحانة
نسر : مبروك
وردة : ربي يبارك بيك ويحفظك ويحققلك اصعب
امنية
نسر : اي اهم شي أصعب أمنية
وردة : والله عاجزة عن شكرك
نسر : لاتشكرين ولا شي أمشي عدنا هواي شغل نسوي
ضحكت وصعدنا
نسر : اول شي ابدل قفل الشقة ونشوف شنو تحتاج
وردة : ياربي الحمدلله والشكر
نزلت راسي بصوت ناصي
وردة : تمنيت حبوبة
نسر : وياج وتشوفج مرتاحة هي ترتاح بقبرها
وردة : متأكدة من هل شي هي دائماً تدعيلي حتى
من رحت زرتها اخر مرة كتلها دعيلي انت قريبة
من الله
نسر : يمتى رحتي؟
وردة : طلبت من باهر ياخذني ألها عبالي ماشوفها
بعد
تنفس بعمق ومارد هم سكتت لحد ما نزلنا للشقة
صور القفل ورجعنا اشترى قفل وتسوك واني اخذت
كم شغلة للمطبخ احتاجهم
نسر : صرتي ام بيت بعد و اليوم اريد ريوك من أيدج
بتسمت
وردة : بعيوني
نسر : بعد محتاجة شي؟
وردة : مدري حالياً هذول بس واشوف اذ حتاجيت
اكو اسواق اجيب منها
نسر : يله لان جعت
وردة :هههههه تجوع واني موجودة ياكاع نشگي
وبلعيني
ضحك وصعدنا السيارة متوجهين للشقة خليت
الاغراض واول شي بلشت اسوي ريوك وهو يبدل
القفل
صحت
وردة : أميررر
نسر : يبعد عيونه
ضحكت
وردة : شكر جبت؟
نسر : أي يمج شوفي بالعلاليك
دورت
وردة : لكيته
نسر : ترا كملت
وردة : واني هم بس يتخمر الچاي
التفت
نسر : جبتي قوري وكلاصات؟
وردة : اييي جبت قوري صغيرون على كدنا
نسر : هههههههه شنو ناوين نبقى ثنين؟
وردة : شلون يعني؟
نسر : قصدي نچيب چايچي صغير
وردة : يااا چايچي ؟
نسر : اي ولج قصدي قوري صغير خاف ميكفي لازم
قوري جبير مثل الچايجي
وردة : لا شدعوا ترا هذا كافينا بي كلاصين ونص
نسر : هو النص منو يشربة؟
وردة : اعوازه
هز راسه وكال
نسر : يله كملت
وردة : غسل وتعال سويتلك مخلمة بعرس امك
ماماكل مثلها
سد الباب ودخل يغسل
نسر : طبعاً بعرس امي جنت بظهر ابوي
ماعدنا صينية بس اكو بار حاجز بين المطبخ والصالة
وبي كراسي خليت الاكل وكعدنا
نسر : اويلييي
وردة : حتى اذا موطيبة تكول عاشت ايدج
نسر : لا وعلي مبينة طيبة من شكلها وريحتها
صبيت الچاي
وردة : الف عافية
نسر : يعافيج
بدينا ناكل
نسر : جوري
رفعت عينيه له
وردة : هاا
نسر : عرفتي ليش كتلهم خاطبين؟
هزبت راسي
وردة : اي زين تسوي حتى محد يحجي ويكول
ليش يجيها
نسر : مااريد أي شخص يحجي عليج
بتسمت
وردة : متأكدة من هل شي
رجعت اكل رن مبايله رفضه اكثر من مرة كملنا
اكل وغسلت الماعين رجعت
وردة : عادي بس تاخذني اشتري فراش وجرجف؟
نسر : عادي ونص يله
وردة : لا مو هسه بس اكمل تنظيف
نسر : تمام
رجعت خلطت معقمات وعطور وبديت انظف اجه
نسر : أساعدج؟
وردة : لا زحمة
نسر :زحمة اذا اني كاعد وانت تشتغلين
وردة : هاا؟
نسر : أي والله
وردة : تعال
اخذ من ايدي صار يمسح عجبني شكلة وهو يشتغل
نسر : تدرين احنا ثلاث ولد ثلاث بنات
وردة : الله يحفظكم
نسر : ويحفضج ألي
بتسمت
نسر : احنا الثلاثة اذ موجودين وامي تسوي حملة
تنظيف للبيت مانخليها تشتغل بس هي تأمر واحنه
نفذ
وردة : وخواتك؟
نسر : ثنين متزوجات وحدة طالبات ماتعرف طك
بيضة الله وكيلج تحجين وياها صاحت عندي متحان
بتسمت
وردة : الله خليني أصير اختك
رفع راسه
نسر : عفتي قرابت الدنيا كلها وماتمنيني له أختي!
وردة : غير مدللات
نسر : عادي هم ادللج
وردة : متقصر
سكتت وسويت غير شغلة تاخرنا المكان نظيف بس ترتيب بسبط ومسحة بعد ماكملنا
نسر : ان شاءلله يوم البيتنا
وردة : ان شاءلله ربي يرزقك البيت اللي تريده
نسر : والمرأة الأريدها
وردة : ان شاءلله يارب
نسر : هسه نروح؟
وردة : يله
طلعنا مكان قريب شتريت اللي احتاجة ورجعنا
غيرت الفراش والجراجف صار مثل مااريد واكثر
تعبت بس تعب براحة
كعدت اجه
نسر : كملتي؟
وردة : الحمدلله بس ملابس بالليل اعزلهم
نسر : احممم عادي ادخل أسبح لان شتغلت وتربت
وردة : اي اي عادي ملابسك بالجنطة هسه أطلعم
نهضت للغرفة طلعت ملابسه نطيتها طلع اللي
يحتاجهم
نسر : هذول اخليهم بالغرفة
هزيت راسي وراح للغرفة واني هم رجعت للغرفة
خلي ياخذ راحته تعب وياي
بقيت ارتب بملابسي بين مايكمل بس نتبهت الفلوس
على حطتهم خليتهم على صفحة ورجعت اكمل لحد
ماسمعته طلعت
وردة : أمير
نسر : ها عيني
وردة : فلوس الإيجار
نسر : شبيهم؟
وردة : منين دفعت؟
كعد
نسر : مو مهم
خليت الفلوس كدامة
وردة : احسب واخذ اللي دفعته
رفع عينه
نسر : عيب هل حجي
وردة : لا مو عيب بس عيب اذا اخذ هيج مبلغ منك
نسر : جوري شكم مرة احجي وافهمج والله ماعندي
نيّة سوء
وردة : اعرف والله بس اني ماتقبل الله عليك افهمني
نسر : وليش ماانتِ تفهميني؟
وردة : والله فاهمتك
قربتله
وردة :اعرف غيرتك وشهامتك ماسمحتلك تعوفني
وحدي والله الساني عاجز عن شكرك لولاك ماعرف
شسوي
نسر : لو تقدريني ولو شويـ ـ
قاطعتة
وردة : اقدرك على عيني وراسي بس والله ماكدر
اتقبل.. تعبتك هواي اخذتني وياك ورجعتني واخذت
علاج وصرفت علية كل هذا مقدرته والله بس اعذرني مااكدر اتقبل هيج مبلغ
راد يحجي ماسمحت
وردة : واذا تكول لا فأني هسه اطلع من البيت
نسر : هااا هيج صارت؟
هزيت راسي نهض بسرعة وحجى بعصبية
نسر :تمام اخذهن واني أطلع
سكتت صاح
نسر : يعني موافقة اطلع؟
سكتت عصب اكثر وكعد حسب الفلوس واخذ
اللي دفعهم وراح للغرفة بسرعة رحت قفلت باب
الشقة وضميت المفتاح
نسر : هاي هي مثل متردين ست جوري
طلع شافني واكفه
نسر : رح اطلع ومتشوفين وجهي بعد
سكتت هو صار بركان لا اكدر احجي ولا اكدر اسوي
شي راح يريد يطلع لزم قبضة الباب مانفتح التفت
نسر : وين المفاتيح؟
بتسمت ورفعت كتافي
وردة : مدري
نسر : جووووري
تقربتله
وردة : ماتطلع منا وانت زعلان
نسر : مو زعلان ولا شي نطيني المفاتح خلي اولي
وردة : يولي عدوك
نسر : المفاتيح ترا ماعندي صبر
وردة : ماندلهم مو انت اخر شي
قبل مااكمل كلامي سحبني من خصري
نسر : طلعيهن لو أطلعهن بطريقتي؟
بالعت ريكي
وردة : شلون!
نزل عينه على صدري
نسر : أعرف وين تضميهن
دفعته وبتعدت خطوة ضحك
نسر : هااا خفتي؟
وردة : لا
رجع سحبني هل مرة بقوة أكبر
نسر : ليش مو لازم تخافين!
رفعت عيني له
وردة : أميير حباب
نسر : منو گلج أمير حباب؟ هممم
رجفت وطلع صوتي يرجف اكثر
وردة : أميررر لا
دفعني بخفة بعدني عنه وحجاها بصوت
مكسور
نسر : مو دائماً هيج تفكرين بيه؟
لفيت طلعت المفاتيح وشمرتهم عليه وصحت
ودموعي تنزل
وردة : روووح بقت عليك؟
حجيتها وكعدت أبجي بصوت قوي عاف كلشي
واجاني نزل بمستواي
نسر : جووري
وردة : عوفني يله انت هم عوفني مااريدك
رفع وجهي يين أدي كال
نسر : أني أريدج والله أريدج
واني ابجي
وردة : جذاب متريدني
بتسم وحضن راسي الصدره لزمت قميصة
وردة : راح تعوفني اعرف بيك والله راح تعوفني
نسر : والله مااعوفج
وردة : جذاااب والله ادري بيك تعوفني
بعد راسي عن صدره مسح دموعي
نسر : شلون اعوفج؟
وردة : مو هسه ردت تعوفني
بتسم
نسر : أجذب عليج والله ردت تغيرين رأيج
وردة : كول والله
هز راسه
نسر : والله
بلعت ريگي ونهضت امسح دموعي
وردة : خوش اخذهن واسكت لان مااتقبل منك
لو ربع
نهض
نسر : بس ـ
قاطعتة
وردة : لو تحترمني ولو شوية تاخذهم بدون ولا
حرف واذا تكول لا والله مااحترمج وماعندج قيمة
يمي راح اتقبلهم
فتح عيونه
نسر : لا والله
وردة : اختار؟
نزل راسه
نسر : احترمج وعلى راسي واخذهم واني ساكت
وردة : من الاول لو له تبجيني
بتسم
نسر : اعتذر
عفته ودخلت للغرفة وقفلت الباب دكه
نسر : وينج؟
وردة : عوفني
نسر : ماعوفج.. كافي افتحي الباب
وردة : ماا
نسر : يله رح اروح
رحت فتحت الباب صحت
وردة : تريد تولي ولي لا تهددني بوجودك
ضحك
نسر : أريد اعرف غلاتي يمج
بصوت اهدا
وردة : سالب صفر
قلدني
نسر : لا بربج!
بتسمت
نسر : تدرين ضحكتج حلوة
بانزعاج
وردة : ادري
نسر : يله بدلي خلي نطلع نفتر ونتعشا
وردة : مااريد
نسر : والله اشيلج
وردة : لا والله مابية حيل اطلع كلش تعبت
نسر : حقج لعد اني اروح اجيب عشا وأجي
هزيت راسي قرب بهدوء وكأنه متأكد ماابتعد طبع
بوسه براسي وكال
نسر : واسف واعتذر بجيتج
رفعت عيني له
وردة : لاتعيدها بعد
بتسم
نسر : ابد
نزلت عبني
نسر : يله اروح وشنو تحتاجبن خابري
وردة : خوش
طلع وسد الباب واني بسرعة اخذت ملابسي ودخلت
للحمام استحي اسبح وهو هنا.. بعد ماكملت طلعت
لكيت مكالمة فائتة رجعت اتصلت
وردة : الو
نسر :يمعودة ليش ماتردين؟
وردة : ماكو شي لاتخاف جنت بالحمام
نسر : تمام بس أصلي بالجامع واجي تحتاجين شي؟
وردة : سلامتك
نسر : يله
بتسمت وسديت الخط مشطت شعري وخليته
مفتوح شوي واجه عاد هو رتب العشا اجيت
وردة : هم زين ماطلعنا احس برجلية خيوك من
التعب
رفع عينه أللي
نسر : يوجعج شي؟
وردة : لا تعب عادي لاتهتم
نظرلي ثواني ساكت بعدها نزل عينه وبدينا ناكل
بعد ماكملنا اعرف يحب الچاي سويته وصبيت
قدمتله هو كاعد يرتب بقنوات التلفزيون كعدت
مقابيله أشرب
نسر : جوري
رفعت عيني له
نسر : باجر الصبح أروح
فتحت عيوني ورد بگلبي
: هاي الصعبة المافكرت بيها..يعني اول وتالي يعوفني
نزلت عيني بسرعة
وردة : درب السلامة يارب
نسر: بس؟
ما رفعت عيني بقيت مركزه بالكلاص بين إيدي
وردة: شتريد أگول يعني؟
سكت ثواني واضح ماعجبه الرد
نسر: يعني عادي عندج أروح؟
رفعت عيني
وردة: منو أني حتى أگلك لا تروح؟
عقد حواجبه وباوعلي بنظرة أطول
نسر: جوري لا تتهربين
وردة: ما أتهرب هذا الواقع
سكت ثواني كال
نسر: يعني لو رحت ما راح تفتقديني؟
ابتسمت غصب
وردة : أفتقدك
رفع عينه بسرعة وكأنه يدور شي بوجهي
نسر: جذب
نزلت عيني فوراً
وردة: ليش؟
نسر: لأن عيونج ما تحچي نفس كلامج
ما كدرت أرد مرت لحظات سحب نفس
نسر: أني هم مو مرتاح أروح
وردة: ليش؟
نسر: لأن تعلمت على وجودج
رجف گلبي وحجى الما كدرت أحجي سكت واني
هم سكتت حتى يبرد الموقف وخف التوتر بدون
مايباوع
نسر : لاتخافين مااعوفج
رفعت عيني بگلب مطمأن
نسر : ابقى وياج وحتى اذا رجعت مااخليج
تحسين بغيابي
نزلت راسي وبتسمت هو نتبهه سكتت عدل كعدته
نسر : يعني ماتملين مني؟
بسرعة
وردة : لااا ابد والله
ضحك
نسر : ايي هم زين
بتسمت بخجل ترك من ايده ونهض
نسر : اروح وشنو تحتاجين اتصلي
نهضت ويا بسرعة
وردة : مو گلت باجر؟
نسر : اي بس ارجع للفندق
وردة : لا ليش ابقى هنا شنو اول مرة نبقى سوة؟
وكف باوعلي ثواني
نسر: مو سالفة أول مرة بس ما أريد أتعود زيادة
استغربت
وردة: يعني؟
تنهد
نسر: يعني إذا بقيت يمكن ما أعرف أروح باجر
سكت كلامه لمس گلبي رفعت عيني
وردة : ومنو كال أريدك تروح؟
ابتسم ابتسامة بس بيها تعب
نسر: وانت منو حتى تمنعيني؟
نزلت عيني
وردة: صح
نسر: جوري...
قرب خطوة
نسر: إذا بقيت مو لأن ما عندي مكان أبقى لأن أريد
وردة: وشنو المشكلة؟
ابتسم بخفة
نسر: المشكلة مو بي.. بيج انتِ
رفعت عيني
وردة: شلون؟
نسر: لأنج تثقين ما أريد أخيب هالثقة
وردة: مو خايفة منك
ابتسم بخفة
نسر: أدري ولهذا دا أنتبه أكثر
سكت لحظة بعدها تنهد
نسر: زين أبقى
بتسمت
وردة: صدك؟
هز راسه
نسر: بس لاتخافين من شي ولو وجودي حسسج
ولو بذرة خوف كولي
وردة : لا والله كلش حباب
ضحك
نسر : تمام اروح انام لان وراي كعده من الصبح
وردة : اي واليوم هواي تعبتك
نسر : ولو دللي ست جوري
بتسمت
وردة : تصبح على خير
ضحك وهو يغمز
نسر : شسوي بالخير بوجودج
خجلت ورحت للمطبخ وهو دخل للغرفة غسلت
الكلاصات ورجعت الغرفتي سديت الباب كدرت
اخذ نفس الاستقرار
مشيت بتجاة السرير كعدت اخذت صور حبوبتي
احجي وياها
وردة : تمنيتج وياي كلشي صار مثل ماردت بس
بصعوبة
خليت راسي على وسادة
وردة : تدرين اصعب شي صار فراكة مافكرت بي
هيج صعب
دمعت عيوني وغفيت بس كعدت على وكت بعده
نايم جهزت ريوك وخليت ريحة الچاي تصحي
فتح الباب وهو مبتسم من شافني بالمطبخ كال
نسر : واحد شيريد من الله بعد!
بتسمت
وردة : وجودك
ضحك وقرب
نسر : صباح الخير والعافية
وردة : صباح الورد
نسر : اويلي عليك امير وجهه حلو تصبح بي وبيت
دافي وكلام معسل شكلي راح اتراجع وماروح
بتسمت
وردة : يله تعال تريك
نسر : اغسل واجيج ثواني
راح ورجع صبيت الچاي
نسر : هذا كله الدلال أللي؟
وردة : ماسويت شي قليل بحقك اتجاة اللي سويته
ألي
باوعلي ثواني رد بجدية
نسر: جوري...
نظرتله
نسر: لا تربطين كلشي أسويه بـ رد جميل
نزلت عيني
وردة: مو هيج قصدي بس أحس لازم أعوضك
تنهد بخفة وقرب خطوة
نسر: وجودج كافي
رجف گلبي من الكلمة
نسر: وإذا تردين تعوضيني خلي هالابتسامة تبقى
نزلت عيني بخجل
وردة: أحاول
ابتسم
نسر: هم زين
كعد مد إيده أخذ الكلاص من عندي
نسر: والله الچاي من إيدج غير
وردة: حتى لو مو مضبوط؟
نسر: حتى لو ماي حار بس
ضحكت
وردة: خوش ذوق
نسر: لا والله صراحة چايج يعدل الراس
بتسمت و
نسر: يله خلص حتى ألحك أمشي
رجع نفس الإحساس راح يروح نزلت عيني وأني
أحرك الكلاص بيدي لا أكدر امنعه ولااكدر اروح ويا
نسر : ليش ماتاكلين؟
وردة : ماحب اكل الصبح مو جوعانة
نسر : صح هم نتبهت بس اهم شي تشربين چاي
هزيت راسي سوه الفة ومد أيده
نسر : بس لكمة من أيدي
قبل مااحجي
نسر : هاا تلعب نفسج؟
بدون ولا حرف قربت اخذاها بحلكي ضحك
نسر : عفية
شربت چاي بين ماكمل اني كل مايقرب الوقت گلبي
ينعصر دخل للغرفة غير ملابسه وطلع
نسر : ملابسي يبقن هنا حتى من أجي اجي بدون
شي
بتسمت
وردة : أي احسن
وكف
نسر : نتبهي على نفسج وممنوع تفتحين الباب الأي
شخص وكتبتلج رقم الاسعاف ورقم الشرطة لا سامح
الله صار شي
تقرب
نسر : واني مااعوفج والله اخليج تملين مني
رفعت عيني له
وردة : ما أمل
بتسم وقرب اكثر طبع بوسه طويلة براس وسحب
نفس قوي...
قربت غمضت عيوني سحبت نفس نترس صدري
من عطره
نسر: ديري بالج على نفسج
ما كدرت أجاوب بس هزيت راسي
مد إيده ولمس خدي بخفة كأنه يتأكد إني زينة
نسر :أي شي تحتاجين بس تصلي
نزلت عيني
وردة: تمام
سكت واضح ما يريد يبتعد وأني هم ما أريد هاللحظة تخلص بس ابتعد خطوة غصب عنه
نسر : أحمم... يله اروح
هزيت راسي
مشى للباب، فتحه وبقى واكف ثواني
نسر: راح أتصل
هزيت راسي مدري شجلني الساني نربط ماكدرت
احجي ويمكن خفت أحجي وتفضحني نبرة صوتي
ابتسم وطلع فزيت على طبكت الباب ركضت لزمت
المقبض نفسي يركض
وردة : عافني...
كعدت بعتبت الباب وأيدي على گلبي ودموعي تنزل
وردة : لاتخافين وردة أني يمج..
دموعي نزلت أكثر بقيت اواسي بروحي
وردة: انت قوية...
بلعت ريگي وكملت بصعوبة
وردة : لأن أول وتالي راح يعوفج
رن مبايلي كمت قبل ماارد نتظرت ثواني حتى
صوتي يبين طبيعي رديت
وردة : هلا
نسر : خو ما بجيتي؟
وردة : لا ابد لازم اتعود على وحدة
سكت ثواني كأنه ما اقتنع
نسر: جوري...
حاولت أثبت صوتي
وردة: ها؟
نسر: صوتج مو طبيعي
ابتسمت غصب
وردة: لا والله طبيعي بس تعبانة شوي
نسر: تعبانة لو تبجين؟
سكت وما جاوبت تنهد بصوت خفيف
نسر: ديري بالج على نفسج زين؟
وردة: حاضر
نسر: كتلج اتصلي بالوقت اللي تردي
وردة: تمام
لحظة قبل لا يسد
نسر: جوري...
وردة: ها؟
نسر: لا تتعودين على الوحدة وأني موجود
رجف گلبي بس تماسكت
وردة: الله كريم
كال بصوت أخف
نسر: راح أدگ من أوصل
وردة: تمام انتظرك
ودعته سد الخط...
نزلت المبايل من أيدي ورجعت كعدت بالصالة
ماعرف شسوي وحدي مر الوقت واني على نفس
الكعدة
وردة : مو هذا الي ردته ليش هسه ضحت!
اخذت موبايلي ورجعت ألعب ماعرف شكد مر وقت
اتصل بسرعة رديت
نسر : شلونها الحلوة
وردة : وصلت؟
نسر : الحمدلله هسه باب البيت بس ادخل تسلم
ع اهلي وبعدين اتصل بيج
وردة : الحمدلله على سلامتك
نسر : يسلمج ربي خو ماضجتي
وردة : لا وين رجعت العب بالعبة
سكت وكأن يفهم الشي اللي مااحجي
نسر : تمام شوي واتصل
وردة : على راحتك
سدينا الخط ورجعت للغرفة رتبت اغراضي شوية
واصل هم طمأن عني وبعدها كال راح انام
مر أكثر من أسبوع وفعلاً ماحسيت بغيابة باليوم
أكثر من مرة يتصل حتى وان كان مشغول كأنه
عايشين سوه يسألني على ادق التفاصيل حتى
شكم مرحلة وصلت اليوم بالعبة
ولما اروح للمقبرة هو يبقى وياي على اتصال لحد
ماارجع وقبل ماانام يأكد علية لازم اطفي الغاز
واتاكد من الباب والسخان وهاي السوالف
وبديت اتعود واتعلق بي أكثر رغم خايفة من هذا
التعلق خاف نهايته تكون هاوية بس عاجبني شعور
الأمان اللي احس بي ويا
وبيوم
منتظرته مثل كل مرة بس يرجع من الدوام بس يدخل الغرفته يتصل بية..
واتصل كامرة رديت
نسر : خو ما نمتي؟
وردة : جؤ جنت اتابع مسلسل
شافني منزله راسي
نسر : شتسوين؟
رفعت ايدي
وردة : أصبغ اضافري
نسر : جوري
وردة : هاا
نسر :اريد احجي
وردة : ماتحجي لازمتك
ضحك
نسر : لا يعني كلام ممكن يزعجج
برطمت شفتي
وردة : احجي تعديت هل مرحلة
نسر : هاا؟
وردة : والله شيصير خل يصير
شفته خله راسه على وسادة وصفن بية گلبي
صاير يفز من نظراته
وردة : تاخذ خيرة؟
نسر : شنو؟
وردة : ماتحجي شبيك؟
نسر : اي.. تذكرين كتلج دزيت الرقم للتحقيق؟
تركت من أيدي نظرتله بتركيز
وردة : اي شصار؟
تنهد
نسر : طلع الرقم الشخص متوفي من 2005 والرقم
مسروق
وردة : اااا لا بربك؟
نسر : اي والله
وردة : شنو يعني؟
نسر : خاف جان عندي شك واحد بالمية انتِ مو
مخطوفة هسه تأكدت
وردة : بس المرأة اللي شفتها مستحيل تكون هيج
جانت انسانة راقية ومثقفة
تنهد
نسر : دوختني قضيتج بس والله ماعوفها وله اعرف
اهلج
وردة : ييي عليهم العين همالة
سكت وكعد
نسر :زين تذكرين شكل المرأة؟
وردة : اي جانت حلوة كلش ومحترمة
نسر : ولج شكلهااا
وردة : اي حلوة
نسر : شلون يعني الحلوات هواي قصدي اوصفيها
وردة : اللي اذكرة طويله تقريباً اطول مني وجسمها
حلو
نسر : بوية اريد خلقتها شصخم بجسمها
وردة : غير جاي اوصفها الك اسمع ولابسه حجاب
حلو وهي بيضه بس موكلش مثلي وشكلها عادي
يعني حليوة ماشي حالها
نسر : لا حول ولاقوة الابالله زين شكد عمرها؟
وردة : أيچة مضبوطة
نسر : وبَطل صفين بيج دفرة افرج فر ولي مني
وردة : انت ولي يله فوك ما اوصفها اله
نسر :**** شوصفتي ماتكليلي؟
ضحكت
نسر : اي فتحي حلگج
وردة : هااا تعااال تعااال ولك ذكرت
نسر : نجبي ولاتكولين ولك لا اطلعلج من المبايل
اهلس كفشتج
وردة : لاجذب شوف سرحت شعري وين الكفشه!
ضحك
نسر : احجي شنو؟
وردة : شوف..صار اكثر من شهر من سحبت احتماال
هسه حولت فلوس لحسابي
صاح
نسر : وليش ماحجيتي!
وردة : هسه حجيتلك
سكت ورجع نام
نسر : المشكلة مااكدر اجي هل فترة
وردة : ليش؟
نسر : مااكدر اعوف عمي
وردة : عمك شعلي؟
نسر : عمي مدير *****
فتحت حلكي
وردة : اااااااااا لا بربككك
نسر : وربج..نفسه اللي حجيتي ويا
شهكت
وردة : جذاب والله
نسر : نجبي ولج شنو جذاب شو ماتستحين!
وردة : لا اعتذر والله موقصدي بس هيج من
الصدمة
سكت
وردة : زين شبي؟
نسر : مابي بس عنده شغل ولازم اروح ويا
ماكدر اعوفه وهو ميأمن غير بيه
وردة : اي عادي اجلها لاتجي لحد ماتكمل كل
شغلك
نسر : هم هيج حتى ابقى يومين
وردة : امم هله بيك
بتسم
نسر : شو من ورا خشمج؟
وردة : لا من كدامه شوف
قربت المبايل على خشمي ضحك سكتنا ثواني
كال
نسر : ماتنامين؟
وردة : مو نعسانة
نسر : تمام راح انام
وردة : ماتنام لازمة عيونك!
عدل الوسادة ونام على ايده
نسر : اششش مااريد اسمع صوت أريد انام
وردة : ماتسده
نسر : لا عوفي هيج ثبتي المبايل ونامي موزين
السهر
وردة : اهمم
نسر : طفيتي الغاز
وردة : اي
نسر : كومي تأكدي
اخذت المبايل ونهضت كل يوم نفس الروتين هو هم
اخلي يشوف ورجعت ثبتت المبايل وخليت راسي
وغمضت عيوني
نسر : نمتي؟
وردة : اممم اسكت
سكت وماجانت نيتي انام بس مدري شلون غفيت
صحيت ونسيت الخط مفتوح
نزعت السترة وشمرتها تتلفلف وتضايقني بقيت بس بالكيمونة والفيت نفسي بالغطأ ماعرف شكد نمت
بس
فتحت عيوني ببطء واشوفه بعده بنفس المكان
ساند راسه على إيده وعينه علية تجمدت بمكاني
وردة: بعدك؟
ابتسم بخفة
نسر: صارلي فترة
رفعت نفسي شوي وتلففت أكثر بالغطا
وردة: ليش ما نمت؟
نسر: نمت بس كعدت صليت
سكت لحظة بنبرة أخف
نسر: شفتج نايمة ما حبيت أسد الخط
نزلت عيني بخجل
وردة: ليش يا مؤمن؟
ابتسم
نسر: لأنج هادئة مو مثل وإنتِ واعية
رفعت حاجبي
وردة: شنو يعني؟
ضحك بخفة
نسر: يعني ماكو عرامة
لفيت عيني
وردة: خوش
سكت وبقى يباوع هالمرة نظرته أطول أهدأ نظراته
تخربط دكات گلبي مدري شيصيرلي
نسر: جوري...
وردة: ها؟
نسر: مرتاحة؟
هزيت راسي
وردة: اي
نسر: خاف بردانة؟
وردة: لا
سكت لحظة كال
نسر: تمام... نامي
نزلت عيني
وردة: وانت؟
نسر: أبقى شوية وبعدين اطلع
وردة: تمام سد الخط
ابتسم
نسر: خلي أتأكد إنج بخير وبعدين اطلع
وردة : لا
نسر : تمام رجعي نامي ومن تصحين اتصلي
هزيت راسي من الخجل سديت بدون مااحجي
بعد مرور شهر ونص
خلال هاي الفترة جنت اروح الحبوبتي بين يوم
ويوم واطبخ واوزع ثواب للجوارين وامير ولا
مرة أجه واني مااريدة يجي اخاف اتعلق بي ومن
يروح انقهر
بقينا بس اتصال ومثل كل يوم اتصل رديت اجه
صوته
نسر : اني شلون نسيت
وردة :شنو؟
نسر : وعدتج اخذج المدينة الألعاب
وردة : ايي بس لاتخاف اكو حديقة قريبة بين يوم
ويوم من اطلع اتمرجح بيها
نسر : لا هاي هي باجر اني يمج
وردة : لا يمعود شيجيبك
نسر : لا باجر ستراحتي واخذت يومين زيادة
احس گلبي صار دمام ماعرفت شكول طلع صوتي
يرجف
وردة : هله بيك
ضحك
نسر : شبيج؟
وردة : مابية فرحت
خليت أيدي على گلبي مدري شجاني صدك جذب
شبيك تخرفنت أركد فضحتني
نسر :شوفي حتى الاحد نروح للصرف بلكت أكدر
اعرف شي بسيط وحضريلي الاگل اليحبة گلبي
وردة : صار
نسر : باجر العصر ان شاءلله يمج
وردة : خوش حتى اطبخلك
نسر : تمام
من التوتر سديت الخط وكمت اروح وارجع ماعرف
ليش هيج توترت
وردة : شطبخ؟ برياني؟ لو تبسي لو دولمة اي اسوي
دولمة
وركضت نزلت للمجمع اتسوكت شنو ينقصني ورجعت
بديت اجهزها حتى باجر بس اخليها على نار رجعت
ارتب البيت بس حتى اهرب من احساسي
ثاني يوم الصبح كعدت سويت اكلات خفيفة طلعتها
من اليوتيوب ومقبلات وخليت الدولمة على نار
ودخلت للحمام..
طلعت بدلت وتعطرت وكفت اسرح شعري للعصر اتصل
رديت وگلبي طار من صدري
وردة : ها
نسر : بالباب
وردة : اجيت
لزمت گلبي وكمت أكمز من الفرح ومستغربة تصرفي
بعدها شديت نفسي وثگلت حالي ورحت فتحت
الباب وريتني مافتحته مو زلمه قُنبلة
جمدت بأرضي وبس عيوني ضربته سونار من ساسه
الراسه تكرمون برجله الاسود يلمع ولابس بدلة رسمية قميص سماوي ومرتب شعره اكثر من لازم وبأيده
كارتون وباقة ورد احمر العطر منه مدري من الورد
صفنت بوجهه مومستوعبه هو مبتسم وحفرة خدة
برزت أكثر
رفع حاجبه كال
نسر : شنو ابقى على باب؟
وردة : يا باب!
ضحك ودخل تمتمت
وردة : دخيلك ربي شهل صاروخ الوكع بالشُقة
التفت
نسر : اويلي مسوية دولمةةة؟
وردة : أي عرفت تحبها
سديت الباب دخلت
نسر : اموت عليها واهم شي حامضة ولاجعة وبيها
بصل
وردة : حسب الطلب
قدم الباقة
نسر : تفضلي
اخذتها بخجل
وردة : تعبت نفسك
نسر : ولو كدامج يذوب
مارفعت عيني
نسر : اي شلونج شخبارج!؟
وردة : يومية نحجي وتعرف اخباري
نزلت راسي قرب بعد الشعر عني
نسر : مشتاقلج جوري
بالعت ريكي بصعوبة ومو بس گلبي رجف كل جسمي
نسر : صار خمسة واربعين يوم ماشايفج
بصوت خافت
وردة : يومية تشوفني
نسر : بس مو مثل الواقع
قرب نحنى باس راسي
نسر : اوووف شتاقيت العطر الجوز الهند اللي يملي
شعرج
غمضت عيوني لحظة بدون ما أحس
وردة: أمير...
نسر: ها؟
فتحت عيوني بسرعة وباعدت خطوة
وردة: الأكل جهز
ضحك بخفة واضح فاهمني
نسر: دائمًا تهربين بهالوقت
وردة: ما أتهرب
رفع حاجبه
نسر: لا؟
نزلت عيني
وردة: لا
سكت لحظة
نسر: تمام.. ما راح أضغط عليج
هالكلمة ريحتني وبنفس الوقت وجعتني شوي
وردة: شلون؟
نسر: يعني إذا قربي يربكج أبتعد
رفعت عيني بسرعة
وردة: لا
باوعلي
نسر: لا شنو؟
تلخبطت
وردة: يعني مو لهدرجة
ابتسم بخفة
نسر: فهمت
وردة : أكعد هسه أجهز الاكل
تركت الورد من أيدي ردت اروح للمطبخ لزم أيدي
نسر : تعاي
وردة : ها
نسر : شنو رأيج ناكل برا
وردة : بس طبخت!
نسر : اي هو ناخذه ونطلع والجو صاير حلو
وردة : بكيفك
نسر : يله..
وردة : خليني اجهزة
نسر : لا عوفي من ايدج اني اجهزة
اخذ الكارتون قدمها رفعت عيني له
وردة : شنو؟
نسر : فتحي وشوفي تذكري لولا
بدون تردد بسرعة فتحاها وعيوني نطت والضحكة
شكت حلكي من شفت الفستان ذاته اللي عجبني
بالمحل
باوعتله
وردة : أميرررر
نسر : هو نفسه اللي عينج صارت علية
وردة : شلووون هيج؟
نسر : اذكر سألتج عجبج
بتسمت
وردة : وكتلك يجنن
هز راسه
نسر : لما رحتو رجعت اخذته وصراحة ماعرف ليش
بس.. انتِ حبيتي ليش غيرج تلبسه
وردة : متتوقع شكد فرحت شكراً
نسر : يله ألبسي وخليني أجهز الاكل
وردة : تمام اني كلشي مجهزة بس نزلهم بالسيارة
نسر : صار
اخذت الفستان وركضت للغرفة بدلت ببطء وكفت
كدام المراية رسمت عيوني رسمه ودمجت لونين
حمرة وسرحت شعري اكثر رشيت عطر وكملت
سحبت نفس وطلعت
فتح باب واكف ينتظر أول ما شافني عدل وكفته
تجمد بمكانه عيونه ثبتت علية
وردة: شبيك؟
ما جاوب بس قرب خطوة
نسر: جوري...
رجف گلبي
نسر: شمسوية بنفسج؟
ارتبكت
وردة: شنو يعني موحلو؟
هز راسه ببطء وعينه ماترمش
نسر: لا ياخذ العقل
وكف كبالي قريب بس هالمرة بدون مزح كال
نسر: كل ما أغيب ترجعين أجمل
نزلت عيني بسرعة
وردة: يله نتأخر
ما تحرك
نسر: تعرفين شنو ليش مااجي
رفعت عيني له
نسر : أتأكد إني ما أگدر أروح
قرب أكثر
نسر: أخاف أبقى وأنسى أروح
دمعت عيوني بدون ما أبين شلون اكوله
وردة: وأني أخاف تبقى وأتعود عليك
باوعلي بنظرة طويلة
نسر : جوري...
وردة : هاا..
نسر: شكلي متأخر من زمان
ما فهمت
وردة: شنو؟
ابتسم ابتسامة بيها اعتراف
نسر: لأن اللي دا يصير مو اشتياق بس
سكت وكمل بصوت اخاف
نسر : بس الليوم أخلي نهاية
وردة : نهاية شنو؟
نسر : العلاقتنا
دگ گلبي بقوة بس قبل لا نحچي أكثر
مد إيده بهدوء
نسر: يله
باوعت لإيده ثواني وبعدين حطيت إيدي بإيده
وأني متأكدة من أحساسي وتوقعي صح بس..
شلون ممكن يتقبلني؟
اما تكون بداية
أو يمكن... هاي الغلطة اللي راح أحاسب روحي
طول عمري عليها
