رواية دخيله الشيخ زين العابدين الفصل الواحد والعشرون بقلم أوتار حزينه
زين العابدين
جالس وحدي بمضيف ابويه وبالي يم هيله وشلون هساع حالها عگب ماامات
شهم ماشفتها ولا لاحت لي طول هالايام جنت اسري يم الشاخه اريد المح طيفها لجن ماهيه ولا بينت سالت ساريه من شفتها هي وريهام كالت
ماالها خلگ وبس تبجي على شهم
غمضت عيوني ورددت بحسره
ااخ ياويل گلبي من هالعشگ ياويل
روحي والكاعد تعمل بي من وره هالبنت
تنهدت وصفنت على نار الجمر كملت بغصه
والله لو آخر الليل يشرحلك عن احوالي
يلگاك بأول سـواليفـه وبـأخرهـا
نزلت راسي عدلت العبايه رساله اجتني
من صعب مارديت علي بالي
مشغول ولا انتبهت احد دش الا من سمعت
صوت
انا دخيله عندك ياشيخ
وصلتي
درت روحي عكدت حواجبي من ميزت
الصوت كلت ماهيه مديت
ايدي رفعت البوشيه شهگت وردت ليوره
خزرتني وكالت
اانت
فگيت عيوني من شفتها هيله حالها حال وتبجي والوجه غادي دم فزت وكامت فزيت معها تكلمت بغضب
وش بلاج ووشصاير لج ااحجي
رجعت ليوره تبجي وتشهك غطت وجهها
بالبوشيه تكلمت بتوسل
يولي اااحجي وش بلاج من معج
انا عندج ولج تكلمي انطقي ياابنت الناس
ياازين وين عمي الشيخ
عمج الشيخ بدارو
ووديني علي ااريدو
عرفتها ماراح تحجي لي وش بها
تكلمت
ااسري معي
سريت وهي ورايه صوت شهگتها زرفت گلبي
وكل ساع ادير وجهي عليها دشيت
مجلسنا بدارنا حجيت معها
اجلسي هساع اصيحو الج
ظلت واكفه ماكعدت سريت لابويه بدارو باب مفتوح دشيت توه مكمل صلاه حجيت
يااابه تعال للمجلس بدارنا
صفن عليه وسال
خير وش صاير
هيله يابه اجتي ووكعت دخيله يمي
افااا من هيله بنت حميد
اي يابه وماتقبل تحجي الا معك تعال
افهم وش بلاها
ابويه فز بسرعه جدتي طلعت من دارها دحكت
لنا سالتني
خير يازين
يااجده بنت عم حميد اجتنا دخيله
من بنت مله حميد
اي ياجده
دشينا للمجلس وجدتي وارنا ،،، هيله
شافت ابويه وخرت البوشيه تكلمت
وهي تبجي
ياعم الحك ابويه عال علي الشيخ صگبان
وراد ينهبني غصب الحك علي ياعم جتلو هو وامي
وخوااتي
انهارت تبجي وتشهك
بااااطل يخسى ويعگب وانا الشيخ شعلان
ابويه صاح بغضب دمي كام يفور بجسمي
جزيت على سنوني لميت قبضه
ايدي وصحت بااعصاب
ينهبج وانا موجوود بااطل ياهيله ماظلت
زلم عجل ولا ظلت شوارب
هديت اسري بسرعه اسمع صياح ابويه
ورايه مادرت بال رگبت سيارتي
وشحطتها طلعت للشارع سيارات تبعنا لحگتني
دست بها وانا اشوف دم بين عيوني
ونار شبت بجسمي كلو
اصيح وانا جاز على سنوني
جتالك اناااا ياعار الزلم اعلمك اليوم شلون
تمد ايدك على شي يخصني اعلمك
يول شلون تريد تنهب هيله
انهب بالسيارة واسمع صوت الهورن ورايه
عرفتو ابويه مايردني اتلاطش معه
من بعيد لاحت لي سيارة طلعت من كاع الردي
وسرت للشارع العام عرفتو هوو زدت السرعه وصلتو هو والجلاب تبعو
صرت جدامو شحطت السياره وگطعت علي الطريق
دورت سلاحي ماهو عفتو ونزلت اصيح
وووينك ياااعار الشيوخ وين يالناقص اانزل ووولك ااانزل كووواد
ازلامو نزلو وبنفس الوقت ابويه وربعنا وصلو
هديت على واحد راد يضربني بجعب سلاحوو
لزمت ايدو وضربتو گله،،، دفرته من جدامي
وكع هديت على سياره الردي فزاع جتفني
هو وجم واحد دوريه لفت يمنا نزولو،،،،
بسرعه علينا ذاك العار
نزل يهوس ويجسر عليه
تهد عليه يبن شعلان وتجسر بالقران فلا افوتها
بك وشوف شراح اسوي يم القاضي
ااايدك الك يااعار الزلم شتريد سووي سووي
هديت بجنون والزلم گاضبتني بگوه ابويه صار بوجهي يخزر بيه مادرت بال اجسر علي جروني وانا اريد اجتلو
سمعتو صاح بابويه
اااكضب ابنك يااشيخ لااايصير شي مايعجبك
صاار يااشيخ وسالفتك السويتها راح تصل للقاضي هناك نكعد وكل واحد ياخذ حگو
ردو بغضب
ازلامو وولدنا رادو يتذابحون الدوريه بينا وبينهم والضابط يحجي بهدواه
ياشيخ استهدو بالرحمن وان جان اكو مشكله
بينكم حلوها يم القاضي
عكبو ياولد
ابويه صاح بهم،،،، اخزر بالعار وانا مجتف واريد بس يهدوني علي جان سويتو
مداس رجل صحت بجنون
اااسمع ولك ياااشيخ الصخول هيله تخصني انااا الشيخ زين العابدين بن شيخ شعلان تخصني منا الما اموووت الي يطخها بنسمه هوى اشيلو من كاعو بزوبعه
جسر عليه هو وجم واحد رشگتهم بتفله ونعلت
عليهم الزلم گوه جروني من الشارع والشرطه تهدي الوضع
صعدت اغلي من الغضب وارجف من اعصابي ادحك لهم حركو بسرعه والدوريه بعدها واكفه تخاف لاتعلك بينا ابويه صاح
حرگ واطلع من هينه للمزرعه
🌿🌿🌿🌿🌿
هيله
كعدت بمجلس عم شعلان ابجي وانوح على اهلي الي ظلو تحت رحمه الشايب الردي
ام الشيخ شعلان جلست معي سألتني وحجيت
لها الصار بينا ام زين تفتر يمي ومبين عليها الخوف تكلمت بغضب
وش جابج علينا وانتي تعرفين الدم الي بينا
وبينو
يااافضه وش بلاااج نسيتي العرف نسيت من احنا البنت دخيله عدنا والدخيل نحمي بدمنا وارواحنا
ولدي راااح يااعمه
وولدي معه ااجلسي عااد واستجني فريتي راسي بسج تسرين منا ومنا مثل الدجاجه المصروعه
يارب الطف بولدي وزلمتي يارب عدي هاي الليله على خير
هاجر دشت جايبه مي تكلمت
هاج اشربي مي وجهج غادي اصفر
مااريد اريد اهلي عفتهم تحت رحمتو ومدري
شصار بهم هساع
رديت بدموع وشهگه ترست صدري
الحجيه تكلمت بغضب
هو خسي وعار من يومو هالردي شايب ورجلو بالگبر من لفه واخذو،،،،قصص وروايات عراقية كرار صلاح
يريد يصبغ شيباتو الما يستحي بنت من گصه
بنات اولادو
ام زين صاحت بهاجر
ووج ااسري جيبي جهازي خل اشوف وش صار
بنتها راحت تركض رجعت جابت جهاز امها اتصلت محد رد
محد يرد يااارب شلون بهل المصيبه الحدرت علينا
غمضت عيوني وزدت بالبجي انگسرت مرتين من مات شهم ومن وكعت دخيله من وره الردي صگبان
بسج تنوحين يافضه ولا تفاولين بالشر شعلان
عاقل ويعرف يتصرف
يااعمه اعرف الشيخ عاقل لجن زين نار وشرار وتعرفي الغضب من يترس گلبو شراح يسوي وشيعمل
ماايسوي ابوه معه
هاجر كعدت يمي تكلمت
لاتخافين ياهيله هساع ابويه يجيبهم يمنا
يارب الطف بيهم
🌿🌿🌿🌿
زين العابدين
وصلنا مزرعتنا ردنا نحدر لگاع الردي نشوف عم حميد لجن تفاجأنا من مشعل طلع بسرعه علينا وكال يااشيخ مله حميد هينه هو واهلو
سرينا بسرعه للجوه وكفت وصفنت على عم حميد الدم تارس وجهو وثيابو مشككه
بناتو يم امهن يشهكن وياها ويبجن وحالهن حال كام بوجهنا ابويه راح الو بسرعه تكلم بغضب
بااطل ياخويه يصير بيك هيج وانا خشمي يشتم الهوه
بنتي يااشيخ وصلت
وصلت ياحميد
كعد مهدود حيلو وكمل بتعب الحمدلله
عيوني راحت لساريه وريهام حد امهن يدحكن عليه مكسورات ويبجن سألتني بدموع
هيله بخير بنتي زينه
بخير ياخاله بخير لاتخافين
جاوبت بصوت مخنوك وگلبي يغلي من الحقد على هالردي والمسوي بيهم
صحت بغضب
والله مااهده والله مااعوفو جتالو انا للهل العار
عم حميد رد بتعب
ياازين مااريد شي عوفو ياولدي الله ياخذ حگي منو
لااا ياحميد مااعوفو وانا الشيخ شعلان وراح تشوف وش راح اسوي به
يااشيخ ماانكدر كلشي نسوي له يطلبنا جثير
ام هيله تكلمت
عم حميد نزل راسو راح كعد ولزمو بين ايدو ابويه كعد يمو وسال
احجي ياخويه وش صاير بك تكلم انا عندك
ماتكلم دحكت لريمه تبجي تكلمت بشهكه
الردي يطلبنا ملايين من وره الحريق الصار بالحنطه وكلو لابويه انطيني هيله
واعوف نص الدين والباقي حولين تشتغل بلاش وتسدو
ااخ ردي وعااار
صحت بخبال وانا واكف گوة حتى مااعگب واروح اجتلو ابويه دحك لعم حميد تكلم بعتب
هذا كلو صاير بيك وماتجي عليه ياحميد
هذني ملاييين ياخويه مو شويه شلون تردني اجي واطلبها منك
يابو هيله انت شكاعد تتكلم روحي الك افداك بها وترخصلك
هاله تكلمت بشهكه راح يحجز ابويه ياعم
ابويه ابتسم ورد
لاتبجين يبعد عمج يحجزو وانا موجود ،،، يحلم هالردي يسويها وخشمي يشتم الهوه
كام وكمل
انهض يبو هيله ولاتشيل هم حگك من هالشارب تاخذو اشر على شواربو وكمل
وحك الحك والي خلق الارض وسواها الصار
بك الا اخذو مربع من عيونو للهذا العار وشوف شراح اسوي به
مااريد شي يااخويه
رديت بغضب
لجن اااحنا نريد احنا نريد ناخذ حكك من العال عليك انت تخصنا ياعم واليعيل
عليك جن عال علينا وياك
ابويه هز راسو بأي كمل
ياحميد دينك بهل الرگبه
خله ايدو على ركبتو وكمل
انا سدادو كلو
ياابو زين جثير
ماهو جثير عند الله ولا عندي انت اخويه ياحميد لو انت حاسب روحك غير شي
سكت ماتكلم ام هيله جاوبت بصوت رايح
اخوك ياشيخ اخوك والله يحفظك من كل شر ويخليلك الزين
تشكرين خيه وهساع يله اسرو معي لداري هيله هناك وبالها مشغول عليكم
اخذناهم وعگبنا لدارنا،،،،
وصلنا دشينا بيهم للمجلس هي شافتهم شهگت واجتي بسرعه لحضن ابوها لمها بحضنو
ادحك لها بقهر وخرت عيونها اجتي بعيوني الوجه مطعون والدمعه تلالي بالعيون تكلمت بصوت مخنوگ
وحك هو الله وحگ هالدموع الي بعينج الا
اخذلج حگج من هالردي وهساع تشوفين وش
راح نعمل به انا وابويه
🌿🌿🌿🌿🌿
ليان
طلعت داروح اني ووسيم نجيب عشه وهم جنت محتاجه كم شغله اليه كلت امر على كوزمتك واخذه منه باب بيتنا شفته واكف
وي هذا شكول الاجرام
باوعت علي بضوجه
صفن عليه للحظه وهو عاكد الحواجب بعدين دار وجهه اخويه حجه وياي
ها ليونه نروح
ااي يله
رديت بنترة وسيم صفن عليه ذاك ترخص ورجع لبيتهم
صعدت بسيارتي اخويه اجه صعد يمي سال
خير ليونه شبيج
مابيه شي
صفن عليه سال بقلق
احد مضوجج صاير شي
لا وسيم ماكو شي بس
بس شنو
صفنت لبيته وكلت
هذا ماارتاح اله ولا احب علاقتك بي انت وبابا
عكد حواجبه ورد
منو مالك ليش ليونه تره خوش ولد
ابتسمت باستهزاء ورديت
والله ياوسيم محد خوش ولد غير انت
مسويلج شي احجي حاجي وياج كلمه
رديت بغضب
منوو هذا يكدر هوو غير امسح الگاع بي
اي على كيفج بس لا تصيرين عصبيه وفهميني شبي سامعه شي علي
حجيتله السمعته صفن بوجهي بعدين على بيت الافندي هز راسه وردد
من هذا الحزن تارس وجهه ولابس اسود وكل ساع يتخربط
من عساه لايطيب من ايده ويستاهل من وره سوالفه الموزينه قتل مرته ويتم
بنته وحرمها من امها
امر الله هذا ليان اجلها اجه هو صح غلط بس ماانجي ونذب سبب موتها براسه
هزيت راسي بلااا ورديت
انت هذا رايك واني هذا رأيي لو ما هو يحس بالذنب ماجان هذا حاله ولا جان
لبس اسود عليها
اخويه سكت شغلت سيارتي وطلعت بيها للسوك اخذنا عشه ورحنا لكوزمتك بعيد
مسافه عن بيتنا نزلت اني وياه وكال
اريد اخذ عطر شويه قوي ويصطر
ابتسمت
خاف تخلي وتنصطر
ههه واغفى بالدوام وشلوني اني من انام
ااي تعلمني بيك مدفع يله يگعدك
احجي ويا ونفتر بالكوزمتك اشرت اله
وسيم راح اشوف الكريمات المرطبه
روحي اني هنا يم العطور
مشيت على طول الممر ادور كريم استعمله لأيدي لگيته اخذت اثنين وظليت ادور على كم شغله انداريت على قسم قصص وروايات عراقية كرار صلاح..الشامبو وكفت وجمدت بمكاني من شفت افنان رفعت راسها شافتني دارت وجهها على ممر جانبي بعدين عليه الخوف انرسم بملامحها سمعت صوت هاا كملتي
لزمت السله بقوه جسمي كام يرجف من سمعت صوت عذابي والجلاد الي ذبحني عيوني راحت علي اجه يمشي ووكف يمها
داسلج كملتي
ماردت صافنه عليه بذهول دار راسه عليه شافني بس التقت عيوني بعيونه درت وجهي بسرعه رجعت للممر الطلعت منه
ليااان
صاح بصوت مخنوگ
افنان حجت عوفهااا ايهم لايصير بيها شي
ذبيت السله من ايدي وطلعت امشي بسرعه
كاتمه دموعي ونبضات گلبي زادت كلت راح تضربني ذبحه اللخ
يم الباب وكفت اتنفس بقوه درت راسي شفته واكف مسافه بعيده يباوع عليه غمضت عيوني بقوه جزيت على سنوني فتحت
وسيم صار كدامي صاح بخوف شبيج ليان
اخويه جان ظهره لايهم
اخته تجر بي وتحجي ويا بتوسل وهو مايتحرك حجيت بصعوبه واني خايفه
لا يشوفه ويتعارك ويا
خلي نروح تعبت
اامشي اامشي
ذب الي بايده وطلعنا لسيارتي ماكدرت اسوق
هو ساق ورجعنا للبيت دموعي تنزل وشهگه صارت بصدري سأل بخوف
ليان گلبج يوجعج وج احجي حتى اوديج
للمستشفى
كلشي جان يوجعني گلبي جسمي روحي عقلي شوفته هيجت جروحي وخلتني انمرد
وصلنا للبيت اريد انزل مااكدر رجلي راحن واي قوه ماظلت عندي حجيت
بخنكه
وسيم خلي ارتاح شويه
اخويه خاف من شاف وضعي وعباله هم رجعتلي الذبحه كال
ليان راح اروح اجيب ماما حتى ناخذج للمستشفى خاف گلبج بي شي
هزيت راسي بلااا
لعد شااسويلج كولي
وديني جوة
كومي ارتاحي جوه واشربي دواج
سندت روحي علي
باب بيت مالك
انفتح طلعت اخته شافت وضعنا تقربت سألته بخجل
خير اخويه شبيها اختك
والله تخربطت قبل شويه
سلاامتها ماتشوف شر محتاجين شي
لا تسلمين وبارك الله بيج
ترخص وطبينا جوه من طبيت للمطبخ امي فزت بخوف وصاحت
اااسم الله شبيج شبيها ااختك وسيم
ماادري ماما تخربطت عليه بالكوزمتك
گلبج يوجعج
لااا
رديت مختصر وكملت
اخذوني لغرفتي
رحت الها تمددت بهدومي بالفراش اخويه يفتر يمي امي كعدت تسأل بيه وهي
خايفه
ليان ماما كولي اذا گلبج يوجعج حتى نوديج للمستشفى
ماابيه شي بس خلوني ارتاح
كعدت يمي وهي خايفه وتباوع لاخويه الي حجه
ماما خلي نطلع ونعوفها ترتاح
ولك احد خابرها احد حجه وياها مغثوثه من شي
اخويه صفن عليه غمضت عيوني رديت بخنگه
محد خابر ولا احد غثني اني تعبت شويه هسه ارتاح واصير زينه
سكتو للحظه بعدين اخويه كال كومي ماما وخليها ترتاح
طلعو من يمي وخلو الباب مفتوح صورته ظلت بين عيوني شلون صفن عليه
صافي للنص وضعفان كلش مو ذاك ايهم الي اعرفه واصلا اني طلعت مااعرفه لان طلع جواه انسان ثاني واحد غدار وخاين
وحدي بالغرفه جوه الغطه
بجيت فرحتي الراحت بجيت غدره وغدر اختي الي تزوجته وعاشت بيت اهله
اخذت مكاني بعين صلفه واخذت الي جان مفروض يصير الي
كعدت من سمعت بجي تاليا صفنت على الشباج تبحي ودموعي تنزل وياها هي مكسوره من اقرب الناس الها واني هم انكسرت من اقرب الناس اليه
🌿🌿🌿🌿🌿
مالك
الشغل صار جثير علينا وكمنا اني وبشير مانلحك
علي خصوصا الحسابات كاعد ارتب بيهن بالحاسبه بشير سأل
هااا مالك مافضيت الحسابات
لا يمعود دخت بيهن ولعبت نفسي اصلا اني مااعرف بالحسابات دوخه راس ويرادلها واحد مضبوط يكعد ويرتب كلشي حتى نعرف راسنا من رجلينا
كتلك خلي نجيب محاسب انت ماقبلت
ماجان هيج الشغل وجنا مصيطرين علي بالسجلات بس الشغل كبر وتوسع عدنا والحمدلله وهساع عاد لازم نجيب واحد بس منين نجيب واحد ثقه
هينه الدوخه
تنفست بضوجه ورثت جگاره صفنت على شاشه الحاسبه هو رد
اكلك مو ابن حجي مصطفى محاسب
رفعت حواجبي
يمكن ااي اعتقد محاسب بس هو يشتغل بشركه اهليه
هو شلونه امين يعني ثقه
والله الولد خوش ولد يعني ماشفت علي شي مو زين الظاهر شغله حلو لان
ظل يشتغل بهل الشركه الاهليه
سكتت بعدين سالت
ليش تسأل تريدو يشتغل عدنا
اي والله كلت هو تعرفه وجيرانك وسمعت منك
عندك علاقه طيبه ويا هو والحجي ابوه
رجعت ليوره سندت ظهري جريت نفس طويل ذبيتو وجاوبتو
ااخ يول هم خوش ناس الله شاهد الحجي ومرتو ذهب ووسيم هم معدنو طيب
وابن اصول بس هااي اختو كسرتهم بعملتها السوده
ااي والله كسرتهم كلهم واكثر واحد تاذه هي هاي ام شعر احمر
رد عليه وصفنت للبعيد تذكرت واني مو ناسي شلون انهدت بيه وسمعتني كلام ذبحني ذبح
غمضت عيوني بتعب تنهدت هو كمل
الله يساعدها ويساعد گلبها الغدر اجاها من اقرب الناس الها زين منها ظلت
عايشه وتشتم الهوه
رديت
اكو جثير بشر تشوفو يتنفس ويحجي ويشتغل بس هو من جوه ميت فاقد شعور الحياه ومايحس حتى بطعم الاكل الي ياكله
صفن عليه كملت بخنگه
الحمدلله الگلب مغطه ومحد يشوف شنو بي
لان لو شافو شنو بي اقرب الناس الك راح تعيرك بجروحه
ااي لا عاب حلكك كلامك صدك
سكت واني هم رجع كال
شوف الولد وكله اذا اله واهس من يكمل دوامه
يجي يشتغل يمنا من العصر لليل
هزيت راسي بأي سأل
مالك انت مااعندك اعتراض علي يعني تعرف من ورة وضع اخته والسمعه الجابتها الهم
عكدت حواجبي ورديت لاا هذا شغل قابل اريد اناسبه لو يناسبني
يعني ماكو مشكله
لاا بشير اكله واشوف شيكول
🌿🌿🌿🌿🌿
هيله
ابويه ظل يم عمي الشيخ
بالمجلس واحنا كعدنا كلنا بغرفه بدار عم شعلان ادحك لامي تعبانه ودمعتها ما نشفت ووجهها غادي دم
خواتي الزغار لازكات بيها ومبين عليهن تعب الصار بينا ريمه صافنه عليه ازلام الردي ضاربيها على وجهها كدمه زرگه جوه عينها وحنجها وهاله مشدوده ايدها لان العارات جاريها بگوة وفاصخيها لها الحجيه رجعتها لها وشدتها بشداد
صافنه بقهر عليهم وگلبي ممرود بعدني بصدمه شهم الي فارك وسگن الگبور واجتني هالضربه الكسرت ظهري وي كسرته
وكعت دخيله على من على زين العابدين الي ماجنت اظن بيوم الوكت راح يلفي بي يمو شهكه طلعت من صدري بقوه وصحت
ااااخ يااابه اااخ يمه
الكل فز واجه عليه غطيت وجهي وكمت ابجي بصوت عالي شهكه تطلع واحس روحي تريد تطلع وياها ارددد
ااخ يابه ااانكسرنا حسبي الله حسبي الله عليك يااالردي حسبي الله عليكم من كسرتونا وخليتونا بهل الحال
ابجي وامي حدي هنا وخواتي يبجن على تردد بخنگه
ااذكري الله يابنيتي
ماسكتت انهاريت وانا الگويه والدمعتي عزيزه
حدرت وكسرت نفسي وعزتها....
الباب اندك ريمه كامت له فتحت عيوني صارت بعيون زين واكف مسافه عن الباب دحك لي ووجهو مطعون درت وجهي منو الحجيه دشت تكلمت
عش هالبجي يايمه جاي تاذين روحج تره وماراح يسويلج شي اذا ظليتي
تنوحين على الصار
غمضت عيوني بقوه ظليت اشهك بالبجي هو تكلم بصوت مخنوك
ياهيله بسج عاد تره نوحج كاعد ياااذي......
ماكمل رفعت راسي له صفنت علي وكلامو القديم يدك بگلبي رديت بصوت رايح من البجي والتعب
ياازين الردتو صار
صفن عليه كملت والعيون عليه وعلي
الوگت غدرني به وخلاني اكع عليك دخيله باب السما جان مفتوح لك ووصلت دعوتك يم ربك
وجهو انطعن كملت بشهكه
عز الله انغدرت به والوكت لفه بي يمك وصرت دخيله
رد بخنگ
ياهيله عز الله ماانتي دخيله انت بنت عمي واليصيبج يصيبني حزنج حزني توجعني هالدمعه وان جانت محدره لواحد ميت
شهكت بصوت قوي وختلت بحظن امي تحاول تهدي بيه ماكو بس صوت بجي
وشهگه صدري تنسمع
سمعت شي انكسر بالصاله والحجيه تكلمت
تخبل هالولد وماظل عگل براسو
🌿🌿🌿🌿🌿
زين العابدين
شفتها وشلون صاير بحالها ذكرته لذاك النام بالگبور تبجي علي وتذكر شلون
دعيت علي بذاك اليوم الماطر اسمع صوت شهكه صدرها تزرف گلبي ودمعتها تحرگني حتى وان جانت لغيري حتى وجانت لميت صارت عزيزه گلب وروح والي يأذيها يأذيني الجاي يصير بها احسو صاير بي
اتنفس الهوه لجن مااحسو يترس صدري مخنوگ وروحي تلوب من الكاعد اهوجس به
ياازين
دحكت ليوره جدتي ورايه صفنت بملامح وجهي رديت گوة
ها ياجده
وش بلاك يبن فضه
مخنوك ياجده من الكاعد احس به
صارت يمي وكفت حدي ردت
يازين البنت مفجوعه وگلبها مكسور ابن عمها وليفها جان من زغرها فتحت عيونها علي تحبو ويحبها
ياجده لاتحجين هالكلام تره گلبي يكوم يوجعني بالزايد
ااسمع يابن فضه
انهدت بي بعصبيه سكتت كملت
افهم الجاي اتكلم به ولاتظل تحوم على البنت
خلها تطيب جروحها خل الايام تنسيها ابن عمها ووالي عاشتو معه
هيله ماراح تنسى ياجده
تنسى يااازين اذا شافت الي احسن من ابن عمها
صفنت عليها كملت بحزم
يابن فضه اذا تريد تصير خيال السمرة عدل حالك وبطل الدرب الماشي به
يااجده والله بطلت كلشي من زمان
ااعرف لجن السمعه بعدها يبعد جدتك
سكتت هي كملت
اسمعني زين ياولد ولدي
اسمعج ياجده
محد يكدر يمحي هالسمعه الشينه الي جبتها لروحك والنا غيرك انت
سكتت وكملت وهي ادحك للمضيف
انت يازين تكدر تخلي الناس تنسى الجنت ماشي به والسويتو بروحك وبينا
اكعد حد ابوك بكل وكت
خلهم يشوفوك يمو وتشاركو بكلشي تكلم مع الكل اسمع منهم وحل مشاكلهم اسري مع ابوك للكعدات والفصول تعلم من هذا جلمه ومن ذاك قصص وروايات عراقية كرار صلاح جلمه تعلم شلون ترد وانت هادي مو معصب
سكتت دارت وجهها على دارنا اشرت لجوه
الناس ماتنسى بسهوله لجن اذا شافو الزين عمل زين وتبدل حالو راح ينسوها لك
وهي من هالناس وحرمه
ومكسوره وگلبها راح يميل لك من تشوفك تريدها وتحبها وتغيرت لاجلها
تظنين هيج ياجده
اي يازين وانت تعرف جدتك ماتتكلم كلام الا ويطلع صدگ
سكتت هي كملت
عدل حالك ياولد وهي هاا صارت حدك والوگت
كسرها والمكسور وش يريد
صفنت بعيونها ابتسمت ورديت
يريد احد يجبرو
اها هساع انت بديت تفكر صح
ضحكت وكملت
يگول يااازين
من ياجده
يگول شريان عيونها قصه
وسمارها شي ثاني
اجتي بين عيوني رديت
والشامه حدر الشفه
ولو تگحلت العين تذبح هي والرمش ياجده
ياويل ويلك يبن فضه مااهو حب لاااا والله
صفنت بعيوني جدتي كملت بحنيه
هذا عشگ ووله تولعت بها ياابن الخايبه ومادواك غير الوصل
ذبيت حسره ومارديت
رفعت ايدها للسما ودعت
ياارب الي رافع السما من غير عمد يارب يااسامع دعائنا من غير حجب ادعيك
باسمك الاعظم الي تعرفو انت وعلمتو للعبد من عبادك تجعل هالبنت من نصيبو للزين وتفرح گلبه بها
اللهم امين
رديت وانا اريدها بتوسل من رب العالمين ردتها تصير حرمتي حدي اكعد اصبح بوجهها اسمع صوتها بيتنا وبغرفتنا اريد نظره عينها تصير مثل نظره عيوني من ادحك لها حب ولهفه وعشگ كلت وي روحي راح اكبر بعيونها بس اخذلها حگها من هالردي راح تشوفني سند وعزوة لها اذا سويت هذا ااشي
بغرفتي كاعد ومو مصدك هيله ويايه بنفس الدار ابتسم وي روحي مره وگاضبها كوه حتى ماانزل جوة احوم يم دارها
الصبح طلع وانا مو غافي غير ساعه نزلت من وكت بلكي المح طيفها ماهيه دارهم مسدود بابها سمعت صوت ابويه وعم حميد
بالمجلس سريت لهم
صبحت وسالتو
شلونك هساع ياعم
بخير ياولدي
كعدت جنب ابويه الي تكلم
يبو هيله انا خابرت القاضي خبرتو بالصار وكال اذا هيج صار بهل الزلمه انا اخذولو حگو من الشيخ صگبان واعلمو شلون يسامو على شرفو وعرضو
ياخويه مااريد اي شي اعرف العداوه الي بينكم ومااريد اي شي يصير لكم من وره وجهي
ابويه دحك لي ابتسم ورد
تخاف علينا من من ياحميد من هالعار الي بس شافك حدرت على كاعي لم ازلامو
وانهزم
اابو زين اعرفو جبان واعرفو غدار مالو امان
سكت للحظه دحك لي وكمل
ياشيخ انا ماشفت بعيوني لجن اشك به وره صواب زين
ابويه هز راسو ورد
اعرفو هو وراه هالشي كالت هيله وحذرتني منه
صفنت على ابويه من تكلم هالكلام
كمل وي عم حميد
البنت خافت عليه من شافت حالي عگب ماتصوب
زين وماهان عليها زعلي حذرتني منو وكالت خذ حذرك منو ياعم صگبان غدار وهو ورة صواب زين
ليش گلبي كام يدك بجنون مدري ليش حسيت بالفرح مااعرف هي حجت بي وي ابويه حتى لو جانت شايل همو الو انا ظليت بالها ووتكلمت وحذرت ابويه من غدرو للردي
هيله مااتهاب احد ياشيخ تحجي الچلمه لو تعرف بها حزة رگبتها لجن
سكت وكمل بغصه
الوكت كسرها من راح تعبنا ووابن اخويه استشهد
عكدت حواجبي ابويه رد
الله يرحمو برحمته الواسعه
اللهم امين
شوف يااخويه انا الي راح احجي واتكلم ما اريدك
من اكول انا سداد دينك تفز وتتكلم بشي ثاني
يبو زين جثيره الفلوس
يابو هيله لاتزعلني منك
ماازعلك ياخويه لجن هذني مو شويه ملاييين وراح يصيرن برگبتي
ماراح يصيرن برگبتك محلل وموهوب دنيا واخره
مااكدر يبو زين مااكدر اخذهن
تكلمت من بعد اذنك يابه
كول يازين
ياعم انت شنو الي يريحك كول حنا تحت امرك
سكت ظل يگلب عيونو بيني وبين ابويه تكلم گوة
يابو زين اشتغل عندك بگاعك انا وعيلتي واسدك من تعبي عاد انت اصبرلي جم حول الما اسدهن
يااحميد مااريد تشتغل وتسدني والله من نفس
كريمه كاعد انطيهن لك ووالخير جثير وكلو من فضل الله
الله يزيدك من فضلو لجن انا هيج اريد وياريت تقبل به
ابويه دحك عليه اشرت اشاره لان شفتو مصمم ومايقبل نتفضل علي كلت بعدين افهمو وش نسوي
تريكنا ومالمحت هيله سألت ساريه من لفت يمنا بالمجلس وكعدت حدي ابويه طلع مع ابوها بره
ياساريه وش اخبار هيله سكتت لو بعدها تنوح
لاا سكتت يازين
تنفست براحه سالتها مرة اللخ كاعده هي
اي كاعده لجن ماتريكت بس صافنه علينا ومبين عليها مقهورة من الصار
سكتت سالتني بخوف
يازين
سم ياساريه
شراح يصير بنا هذا الشايب طردنا من ارضو وين راح نروح واحنا ماعدنا شي
روحي انمردت عليها جاهله وشايله هم روحها هي واهلها رديت مبتسم
تفرحين اذا تظلين هينه
ابتسمت جاوبتني بفرح
اي افرح اكعد حدك لان انا احبك
سكتت وملامح الفرح راحت دحكت للباب سالتها
خير وش نوحج سكتي والفرحه راحت من وجهج
يازين اكلك شي
كولي يااساريه اسمعج
فرت راسها على المجلس اشرت
گرب
گربت يم حلگها حجت بهمس
انا احب اظل هينه لجن هيله مااتريد تظل
اعرفها ماراح تقبل تظل بدرانا لجن هي هساع
دخيله عدنا والدخيل ملزومين به نحمي الما نفض سالفتو
هي كملت بخوف
يازين اسالك هي هساع دخيله عندك يعني انت لازم تحميها من هالشايب الي راد ياخذها غصب
اي ياساريه هيله صارت دخيله عندي وياويلو الي يگرب منها اجتلو بمچانو واحسب الله ماخلقو
ابتسمت وردت
كتلهم زين يكدر يحمينا من كلشي كتلها لهيله زين سبع ونشمي ومايخاف احد
اي وشردت
سكتت ونزلت راسها سالتها بهدؤ
احجي ياساريه ولاتخافين
يازين هيله ماتودك
ذبيت حسره هزيت راسي بأي هي كملت
لاتزعل هي كالت
اعرفو شجاع ومايهاب احد لجن مااريدو يتفضل عليه بشي
ابتسمت ورديت
ياساريه كولي لها فات الاوان انتي هساع صرتي دخيلة الشيخ زين العابدين وبحمايتو والشجاع من يكول جلمه تظل علي عهد للموت
🌿🌿🌿🌿🌿
ايهم
انتهيت بذاك اليوم من شفت ليان كدامي وعيونها صارت بعيوني بسرعه دارت وجهها وانهزمت من المكان الي احنا بي مشيت وراها بسرعه اختي لازمتني بقوه وتتوسل بيه مااروح عليها
ايهم الله يخليك عوفها راح تضربها ذبحه اللخ
جمدت بمكاني من شفتها وكفت وسندت روحها على الباب الخوف ترس گلبي كلت صار بيها شي اخوها صار يمها تباوع عليه وجهها مطعون وصاير احمر دم
ردت اروح الها افنان صارت كدامي وكالت بخوف
ايهم لاااتروح اخوها وياها
مشت ويا وعيوني عليها رحت امشي بسرعه اختي وياي تحاول ماتخلينيو اشوف روحي الهم
وصلت الباب تحركو وراحو
وكفت صافن بقهر عليهم افنان وكفت يمي تباوع عليهم درات وجهها عليه حجيت بصوت مخنوك
شضيعت ااني من اايدي وليش سويت بروحي هيج ليش افنان
اختي سكتت تباوع عليه بقهر رددت واني اباوع للبعيد سيارتها راحت واختفت بس هي بعدها بين عيوني
ااخ لو ميت ولا مسوي السويته ااخ
ليان راح تظلين جرح بگلبي طول العمر
اايهم خلي نرجع
غمضت عيوني بتعب لزمتني مشت بيه مثل الطفل رگبت سيارتي صافن ومخنوگ مسحت وجهي اريد وعي يرجعلي اريد
اشم هوه لان اختنگت
اخابر اياد
لااا
رديت بنترة شغلت وطلعت للبيت ساكت طول الطريق واختي هم ساكته وصلنا نزلنا سوه طبيت بالصاله شفت العذاب المصيبه الطاعون الي خليته برگبتي
كاعده وامي يمها اياد هم ومرته عكدت حواجبي وكلت
خير صاير شي
هي كامت وحجت بفرح
ايهم اني حامل
فگيت عيوني وصحت بخباااال
شنووووو ولج
فزت ورحت وكفت يم اخويه من كام لحيله
تقدمت عليها اصيح
مااايظل بالقران ماايظل تذبي لهذا مااريد اي طفل منج سمعتي سااقطه مااريد
اي شي يربطني بيج
كامت تبجي اياد صاح بيه
منااا ابويه شتريد هم تضربه جلطه اللخ من وراك
مااايظل اياد خله تذبه مااريد منها جاااهل تفهم وولج گحبه گوة تريدين تربطيني بيج
لاااتظل تغلط عليه ومااذبه وشتريد تسوي سووي
هديت عليها لزموني كلهم ابويه طلع من غرفته باوع عليه بقهر حجه گوة
تالي وياك كلي شااسويلك حتى ترتاح وتخليني ارتاح
ياابه مااريد منها طفل جااي تفهمون هاي تريد تربطني بيها للابد
اذااا ماتريد طفل شكو تتقرب مني
جزيت على سنوني هديت ولزموني بصعوبه فشرت عليها فشار مو صاير امي انهدت بيها
ووولي من كدامه ااادبسسز طايحه الحظ
خزرت امي تخبلت مزهريه على الطبله شلتها بسرعه وضربتها اخويه تلگاها بايده
وكعت وتطشرت بالگاع
ووولي مناااا
صاح بيها مشت تهدد بيه وبيهم
ابويه هز راسه بعدم رضى طب للغرفه وسد الباب اياد انهد بيه
ووولك كااافي عاد وحس ابوك راح يروح من ايدينا يوميا مغثه يوميا صياح
شتريده يموت ايهم من ورة
قهرك
لاااا مااريد احد يموت اني الي راح اولي منا بلكي اروح وبعد ماارجع
هجيت من يمهم اسمع امي تصيح ورايه هي واختي مادرت بال رگبت سيارتي وشحطتها من يمهم
رحت شردت وليان بين عيوني الذكريات ظلت
براسي تفتر وتذبح بيه كمت وره ساعه وعي نص ونص
رجلي اخذتني لبيتهم ردت اشوفها اسمع صوتها حتى لو اموت من وراها راضي والله بالموت بس اشوفها واخذها لحظني ولو مرة
وحده
🌿🌿🌿🌿🌿
مالك
تعشيت ووره العشه خابرت وسيم حتى احجي ويا بموضوع الشغل كال طالع
بشغله من ارجع اخابرك
نحجي بي
نوار رادت جم شغله لتاليا اخذتها هي وياها تغير جو شويه وهم تشتري لروحها وياها افترينا واخذت الها ولتاليا وهم اشتريت عربانه
الها حتى تخليها يمها من تشتغل
رجعنا ساعه 12 تاليا نايمه حجيت وي اختي من فتحت الباب
روحي نيميها جوه اني انزل الغراض
تمام
طبت نزلت الغراض ووديتهن لجوه رجعت سياره الحجي اجتي ووكفت يم بابهم نزل وسيم اجه باتجاهي سلم بالايد
الله يساعدك مالك
هلا وسيم شلونك شخبارك
الحمد لله بخير انت شلونك ضغطك شخباره
الحمدلله مستقر صارله جم يوم
الحمدلله
طلعت مسدسي من الجكمجه وخليته وره
ظهري صفن عليه وكال
شايل سلاح مالك
ابتسمت ورديت
اي والله لان الدنيا صايره ماتتأمن
هز راسه بأي حجيت ويا
عندك مجال نحجي بشغل
اي عندي تعال تفضل جوه
لاا خلينا هينه احسن
براحتك
حجيت ويا على الشغل الولد وافق وكال اجيك وره الدوام من اخلص احنا واكفين نحجي سياره طبكت وره سيارته عكدت
حواجبي من شفت واحد نزل يترنح عرفتو شارب وسيم اندار شافه لو تلبس بي جن صاح بخبال
ووولك شجااابك هنا
هد علي لزمته بقوه تلاوه وياي وذاك اجه يترنح ضرب بابهم بقوه وصاح
ليااان وينج ااطلعي اريد اشوفج
وسيم فلت من ايدي ضربه
بوكس ذاك وكع لزمته وصحت
يمعووود عوفه سكران
ووولك باااي عين جاااي بعد السويته وولك هدددني خليني اقتله لهذا العار
شباب كاعدين بره اجوي لزموه ابوه طلع وامه اخته من شافته جمدت بمچانها رجعت ليوره عرفت هذا رجلها الي خانها وي اختها
اسمع وسيم يفشر علي ولازمي كوه الحجي انهد بي وكام يغلط علي دفعه ،،،،
عيونو على ليان امها كامت
تبجي وتغلط علي
ليااان ااسمعيني
صرت كدامه من دفع ابوها دفعته بقوه وكع ليوره كام يسند بروحه بالگاع صاح بيه
وووخر ولك
ووولك ااايهم شجااابك ااجيت للموت تريدني اقتلك
وسيم ينفض بروحه ويريد بس يفگ روحه من ايد الي لازمي ماخلوه ذاك هد عليه وكام يفشر عليه فشار مو صاير
وسيم مااعرف شلون فلت من الشباب هد عليه وضرب بوكسات جريته
بقوه واسمع عياط امه واخته وابوه مدري شلون سحب المسدس من ورايه
تلاويت ويا اريد اخذو منو
قبل لايسوي مصيبه بلحظه رديت ليوره من حسيت شي
ضربني بصفحتي
