رواية ذاري النجوم الفصل الثاني العشرون 22 بقلم زهراء السراي

لا تهدني الوطن حيطانه بعيدة

وما يلم الينتچي

آنه من تغيب يستفحل على عيوني البچي

ياحبيبي شلون لو شحت مكاتيبك

الغيم ميودي حچي

:

:

:

ليل

___________________________

معاذ الله اني مايأست

ولكنها والله أيام ثقال

ليلة راس السنة 

١/١/٢٠١٧

ويه تحول الساعة من ١١ و٥٩

دقيقة ل١٢ تحول التاريخ والسنة

ودخلنا عام جديد 

متمددة عالسرير ومظهر الاحتفال

الوحيد بالسنة الجديدة چان الجواريب

اللي مرسوم عليهن شجرة كرسماس

دموعي تنحدر من خدي تنزل وتختفي

امسحها واني ساكنة هادئة خوفا ان يطلع

صوتي ويسمع واحد من أهلي

شهرين مرو وبعدني ابچي

بكل لحظة فراق مرت بهالشهور

انتظرت وانتظرت الى ان تعبت

غطيت بنوم مرغمة نفسي

حتى اغفى رغم اني اعرف هالنومة

تسببلي صداع بس دوامي

الصبح ومجبرة انام 

عقلي واعي بس عيوني مغمضة

ساعة مرت ومافاد الصداع اذاني

الجو چان بارد والمطر يفوح ريحة

طيبة ويا سقوطة عالگاع طلعت

بره بباب الصالة اباوع للمطر

وجمال الجو بس گلبي المتعب رجعني

لغرفتي يبدو ان موجة الاكتئاب راح تخليني

اسهر للصبح

ويا دخولي للغرفة ارتفع صوت

التلفون ركضتله ولمع عالشاشة

أسم وطن رفعت السماعة جليت 

صوتي حتى ميبين باچية ورديت

-هلووو عراق سنة سعيدة

-سنة سعيدة ظلام ليش

صوتچ تعبان

-فلاووونزا قوية

-وهاي انتِ كل يوم فلاونزا

-هههههه من اختلاطي بالمرضى

-ليل

-ها

-ابوچ رجع من السفر

-لا بعده مراجع ماكو اخبار عن هاجس

-لا ماكو ادري بيج مشتاقتله

-شويه بس

مارد عليه وطن واجاني

صوتة هوو

-افااااا بس شووويه اشتياق

واني المشتعل عليچ نار

-هاجس......

وگعت دموعي وماگدرت ارد

-حبيبتي فتحيلي الباب

كتلني المطر نگعت

وگع التلفون من ايدي وركضت

للمراية فتحت الضوة

اباوع لوجهي وشعري المهوس

عدلت بسرعة وركضت لغرفة ماما

دخلت لأن بابا مموجود بتركيا

على كيف صحيتها فزت خايفة

-ماماااا شبيييچ حبيبتي

-ماما هاجس جاااي بالباب

-عزززة بعينچ ومافاتحتله

-غير اگلج ماما

-ركضي فتحي غبررررة

ركضت للباب جوه المطر

خليت الكلاو على راسي عبالي

وطن بعده يمه

فتحت الباب ولاحلي طوله

بملابسه العسكرية ووجهه الاسمر

من الشمس والجو

اييي كلمة ماگال دخل طبگ

الباب ورا وحضني جوه

المطر ويذب النفس براحة

سحبتة راكضة ضحك

-ابوچ لو موجود چان شگني شگ

سحبني وحضني جوه جناحه

-البييييت فااااارغ

هيا للأغتصاب

تمسكت بزنده ودخلتة للصالة

شعلت الاضوية والتدفئة

-لغرفتچ نروووح

غمز ويه دخول ماما وگف مؤدب

-عمة حبيبي شهالغيبة

باس راسها واشرتله يگعد

-ليش ماما بملابسك العسكرية

وناگع

-من الحرب لهنا اشوف ......

اشووفكم 

-حبيبي اگعد راح اسويلك شي

دافي تشربه

-لا عمة والله متعشي بالطريق

وشارب چاي

-اخذ راحتك البيت بيتك

طلعت ماما بعد ماصاحتلي

-ها ماما

-الولد مبلل ومن الحرب والتعب ليجاي

ترحين تطلعين تراك اكو مال ضرغام بكنتور

بابا ومنشفة خل ينشف راسه

واني راح اسوي چاي ويمچ

كيك بالثلاجة

سحبتني من اذني

-واحترمي نفسچ من تگعدين وياه

-ماما صار شهرين مشايفته

-ميخالف ماما

سويت اللي گالت علي

واخذتله التراك ورجعت للمطبخ

اخذت الچاي والكيك باوعتلي

-اني بغرفتي

لا تنسين الگلته

ضحكت وتركتها راجعتله

لگيته لابس التراك وينشف براسه

قربت الصوبة يمه وكعدت خليت الچاي

-قللي الاضاءة عندي صداع

-اجيبلك بنادول

-لا شربت حبايتين بس الاضاءة تأذيني

خليت بس البراكيتات الصفر

والصوبة ونارها الهادئة

گعد سحب استكان الچاي وعينه

عليه

-الكلبة شگد مشتاقلچ

-خلف الله عليك

-ليش تبچين من اتصل وطن

-لأن مشتاقتلك

وگعت دموعي وهو ذب استكان الچاي وحاوطني بيده

-واستاهل تبچين عليه

بعد ماگلتي قهرتني

-قهرتني لأن محچيت وگتلي شتعتقد

ماعندي غيرة على بلدي بس......

-ادري تصوبت ووصلت الموت بس

هذا مايمنع

مااااباقي شي ليل التحرير صار

قاب قوسين او ادنى

-ياااارب

-وبعدين هييييچ مستعجلة عالزززواج

منيييي

صوتة المتلاعب وخباثته

خلتني اسحب كفه اعضه كالعادة

وهو يضحك

-هاي اقوى شي عندچ

-لاااااا

رفعت راسي وبست خدة 

وهو ضحكة دافية ملت وجها

-صايرة قرچ جداااا

-ليش تلفونك مغلق

-شبكات ماكو سبع اليلگه

اتصال الا نبعد عن الموقع

-وبيت جدو شلون يطمأنون عليك

ووطن يگلي بخير

-ابو صعبة يروح للاطراف ويا

جماعة الدعم اللوجستي

ومناك يتصل

-احچيلي الصدگ

باوعلي وعدل شعري باعدة عن عيني

-ردتچ تهدين والله لو سامع شهگة

وحدة من شهگاتچ چان رجعت وتوانيت

عن واجبي 

-يعني غالق تلفونك

هز راسه بالرفض

-لعد شنو

-خل يوووولي الحچي هسه

سكتي خل اباوعلچ

سكتت حتى مااعكر صفو هالجية

مسح على رموشي

-عيونچ تعبانة

-شغل الأرياف متعب

مو الناس لا الطريق تخيل ساعة بساعة 

ساعتين باليوم اخلصها بالسيارة

-ترحين بسيااااارتچ

-لا خط ياخذنا احنة ثلاثة

-ومرتاحة بالمكان

-عادي 

-ممرتاحة اكو احد زاعجچ

-لا بس تفكيري متعب واشوف شغلات

مااگدر اسكت عنها

-يعني صاير شي

-لا والله ماكو شي بس الاشوفه

صعب خليييك من دوامي

نزلتك شگد

-اسبوعين

ابتسمت وهو حاوط وجهي بيدة 

-فرحتي 

-اكيدد افرح مشتاقتلك وخاف اعاتبك

وتزعل مني

-عاتبيني بس ببوسة 

غمز وعيونه التعبانة محمرة

من التعب

اشرتله على رجلي تمدد وخله ايده على

عينه

-حتى بأحلك الظروف همجي

-شسوي چهرتچ تساعد عالانحراف

-نعسان

-هوووواي نعسان 

-استأذن من ماما وتنام

-لا ارجع هسه جدي يسمط ابوي

سمط

گعد وشال ملابسه عن القنفة

-خليهن اغسلهن الك

-اخخخخخ شعووور الزوجة

وهي تداريك حلووووو

يله حبيبتي اتصليلي بوطن يجي

-لا عيوني اخذ سيارتي

-لا هو دايح بالشارع مگضيها اتصالات

هسه منتظر اتصالي

-افتح تلفونك من ترجع للبيت

-تمام

اتصلت بوطن دقايق وصار يمه وراحو

واني الخبلة اللي طول الشهررين بس ابچي

هدأت روحي ورحت لغرفتي تمددت

ولاول مرة من شهرين انام مرتاحة 

واغط بنومة عميقة ماصحيت منها

الا على ايد ماما

-تأخرتي ماما راح يصير ظهر 

هيج مر اليوم ونمت ليلة الثانية

براحة من بعد شهرين 

ثاني يوم كعدتني ماما متأخرة

وگمت ركض ركض غيرت ملابسي

وطلعت للخط اللي ياخذني تقريبا

بالستة وبين طريق ووصول ابقى

ل٣ الدوام نرجع نوصل ويه المغرب

تقريبا

صبحت عالبنات واستقريت بمكاني

دگ تلفوني ورفرف گلبي لشوفة

أسمه عالخط فتحته واجاني

صوته النعسان

-صباح الخير حب

-صباح الخير عيوني ليش گاعد

من وقت

-صحاني جدي راشديات لأن ماگعدته

من وصلت وهسه طلع يجيب ريوگ

گلت اصبح عليچ

-تجيييني اليوم

-اكييييد سويلي عشا حلو من ايدچ

-تتدلل يله روح ارتاح وتريگ وارجع نام

-متجين ......

-احممم بالطريق اني

-العبببببب راح احچي ومتگدرين تردين

گدام زميلاتچ

وشمرله كم كلمة فاسدة مثله وودعني

ضحكت واني اشوفه منطلق

ومرتاح بنزوله

سندت راسي عالكشن مرتاحة

بعد ايام اشتياق وتعب وتذكرت اتصالنا قبل ليلتحق واخر كلماته

:

:

:

اني بعز فرحتي والابتسامة مزينة وجهي

فتحتُ الكاميرا واني

واگفة گدام المرايا الچبيرة بغرفتي

وفستان الحنة محاوط اكتافي وخصري

بلونه الأحمر الغامق

بالكصات الجانبية كأنها بتلات وردة مفتوحة

فتح الكاميرا ببيتنا مستند عالسرير

بغرفة النوم ماانتظرته حتى يرد

-شوف اللون انت مو تحبه يعني مراح نختلف

انتبه للتفاصيل القماش خيالي

والتطريز على الصدر نازك

افتريت حوالين نفسي اشوفه

-شوف شلون يلمع ويه الحركة

والحلو الحذاء اللي اشتريناه للعرس طلع مناسب جداً وياه

احچي واشوفه ذيل الفستان وتفاصيله

وهو صافن تماما

ماقاطعني بلسانه وسوالفة المعتادة

وعيونة بيها لمعة غريبة

غمزتله بضحك

-وحدة منهن لو الاتصال علگ

لو الفستان بهرررك وجمالي خااااارق

عدل گعدته وهمس

-بالله فتحي شعرچ اشوفه وياه

فتحت القراصة وتساقطت خصلات

شعري غطتني

ابتسم ساند وجهه على كفه ويباوعلي بنظرات

عميقة وطويلة

​-هاااا رأيك

-شگدر اوصف 

ابتسمت خجلانة وسألته

-يعني تمام متگلي مو مستور البسه بالحنة

سكت ​مرت ثانية ثانيتين وسكوت ثگيل

مر يلة رد تحركت شفافه وبصوت هادئ گال

-ليل وگفي كل شي

​توقفت ضحكتي تدريجياً 

وعقدت حاجبي بعدم فهم

لأن مفهمت القصد

-شوگف حبيبي......

قاطعني بنبرة واثقة

-وگفي كل شي ليل العرس ملغي

تراجعت بلا وعي مني وگعدت عالسرير

عاجزة عن الكلام ثواني استوعبت

حتى اغلق الأتصال وصاح

-افهمچ ليل

غلقت الاتصال بدون فهم

كل الاريدة هسه هو ان اطلع

من الفستان حتى أگدر اتنفس

اختنگت بي وطلعت راكضة لماما

-فتحي ماما

-دقيقة اغسل ايدي

كلها صابون

-فتحيييييي خنگني ماااااااما فتحيييي

-يممممه شبيچ ولچ ليل

فتحت الفستان ونزعته شمرته لبست

ملابسي وسديت اضوية الغرفة

نسيت اني ماسألته عن الاسباب 

ولا استفسرت دگ التلفون مرة

مرتين ثلاثة مارديت اجتني رسالة

منه

-ليل جايكم للبيت

نص ساعة واندگت الباب

طلعت ماما فتحتها وياه مفتحت الباب

لهاجس بابا دخل نازل من سيارته

سلمو على بعض ودخلو واني اباوع

من شباك المطبخ

شويه وصاحني بابا دخلت

للصالة غاسلة وجهي من الدموع

اشرلي بابا

-گعدي بابا

گعدت بصفه واشرلي على هاجس

-اسألج سؤال

-نعم

-من وافقتي على هاجس شچان

شجاع بطل طالع من نص الموت

لو لا

-اي

-يعني تعرفين اذا صار الطگ والصدگ راح يلبي رغم يعرف العواقب والاحتماليات ومنها الاستشهاد

-اي

-تمام هسه كلتيلي الوقائع

اني طالع ربع ساعة يتفاهم وياچ

واريدچ مثل مااعرفچ سبعة مو

طفلة حتى تبچين

-بس اني مفاهمة

-هو يفهمچ

طلع بابا وهو رفع راسه باوعلي

-ليل

مسحت دموعي بطرف إصابعي

ورديت وصوتي يرجف

-شنو السبب هاجس

ليش هسه ليش بنص الفرحة

-راح التحق 

صفنت بوجهه شريط ذكرياتي وياه مر كدام عيني إصاباته القديمة تعبه وجعه

-بعد كل اللي صارلك هاجس

أنت انطيت حصتك من الوجع وزيادة

-الوطن مو حصص وجع ليل

وحتى لو باقي بيه نفس واحد

وحتى لو تك رجل هم أرجع 

شفتي الأخبار انطلقت عملية

قادمون يا نينوى وهذا مو مجرد

شعار هذا وعد لآلاف الناس اللي تنتظرنا

أسألج بالله أنتِ دكتورة إذا بيدج حالة بين الحياة والموت حالة تلفظ أنفاسها الأخيرة

واني اتصلت بيج وكلتلج عوفيها ورجعي هسسه للبيت ضميرج يقبل ترجعين لو تنقذين الحالة

-أكيد انقذ الحالة

هز راسه وكأن كلامي جان الختم اللي يحتاجه

حتى ينطلق

-تخيلي هاي الحالة هي العراق 

هي الحالة الصعبة اللي لازم نلحك عليها قبل لا

تموت

هزيت راسي بصمت موافقته الكلام

- رايح بس ما أريد أروح وأنتِ مكسورة

ولا اريد اخر صورة منج تبقى وانت حزينة

ضحكيييي 

-قهرتني هاجس

-اجبر خاطرج والله

ماباقي شي كم شهرررر وتلگيني يمچ

جاي حتى اخطفچ من حضن سلطاااان

وگعت دموعي وابتسمت تقربلي

اخذ كفوفي باسهن بدفو 

-اريد اشوفچ تضحكين 

-مااااريد اضحك

سندت راسي على صدره وبچيت 

-عليك الله أرجعلي سالم 

طبطب على كتفي ورفع راسي

باس جبيني

-هالمرة بوسة مؤدبة شفتي شگد احبچ واحترمچ 

ضحكت وهو عدل گعدته

-خل نقفل الصالة ونمارس حقوقنا المشرووووعة

ضربته على صدره كمل

-رجال رايح للجبهة ماتحنين عليه بكلمة

حلووووة ببوسة تخليني صاببببر بنص

الحرب

بست خده ووگف وياي

حضني واشرلي نطلع

-مااااريد بچي خلي كل شي

جاهز على اي ساعة يجيچ

خبر النصر واجيج عريس بقاطي

-اوعدني

-وعد

ودعني واخذ ويا روحي وراح

وويا كل خطوة يخطيها ادعي يرجعلي

وراح هاجس وبدت أيام الانتظار

كل يوم ماامل من الاتصال واني ادري

الجهاز مغلق ورغم ذلك ادز رسائل بين عتاب وبين اشتياق

صارت سلوتي هالشغلة اشرحله

شصار وشسويت خلال اليوم

وارجع بآخر اليوم اعاتبة بقهر

واحلفة ميموت

احيانا وطن يگول وصلنا خبر واحيانا لا

الى أن بعد اسبوعين طلع تنسيبي

بمركز صحي بالاطراف فرق

المسافة ساعة عن المدينة

المسافة صارت رغم البعد والتعب

تسليني تخليني افرغ دماغي من التفكير

اما المركز الصحي فأكتشفت هووواي

ثغرات صحية بي اني وزميلاتي 

سوء ادارة وتصرف بالعلاج بلا خبرة

غيابات دائمة للموظفين لكن بدت

تدب بي الروح واحلى يوم عندي

هو يوم التلقيحات

اطفال حلوين واهالي حريصين

رغم بعد المسافة يجون صرت

احاول بقدر الامكان انقذ مايمكن

انقاذه بهالمكان اني وزميلاتي

ومر الشهر الاول صار وطن

ميفارگني وبعد مااتفق ويه

غيد على الخطوبة صرنا

نتصل اتصال جماعي نسولف

واحيانا نوح ويمنى بس هيهات

مااگدر مكانة تارك فجوة عميقة بصدري

صرت أسهر وبيبي لاحظت هالشي

وبليلة چنت تعبانة بيها من البچي

اخذتني يمها بالغرفة تسولفلي

خلتني اتمدد على رجلها وهي تحچيلي

قصص من الحرب العراقية الأيرانية

ومدى شجاعة بعض الأمهات بدتها

بأسلوبها المعتاد

-بيبي هاجس لا اول زلمة التحق

يدافع عن گاعه ولا اخر زلمة بس انتِ

غالبچ الشوگ خل انشدچ نشد بالله

-گولي بيبي

-تهجسين گلبچ بارد بغيابة

لو نار شابة بي

-مااعرف شوصفلج بيبي

گلبي احسه مطمأن واگول مادام

گلبي مطمأن يعني راجع بس بيبي ......

-ادري بيبي الشوگ متوليچ ومذبل عيونچ

چا دسمعي هاي السالفة نفس سالفتچ 

چانت عندي صاحبة اسمها غزالة

شني من بت هي بگد سهامة

زلمتها ضابط وبعز الطگ راح أسير

وصللهم الخبر وهي بطرگ البنيات

الاثنين اعمارهن ثلاثة واربعة

گاعدة عند العيال وتعرفين معزة

اليتيم اول سنة ثاني سنة وگف

حماها وعلمود طمعان بگاعها

گاللهم وصلت رسايل واخوي

من ضمنهم مكتول

گامت الدنيا وگعدت وسوو فاتحة

والناس كلها عابت على غزالة چيف

مابچت

رحتلها انا للعزة گعدت وياها

گلتلها احچيلي سر صبرچ

گالت نگعد عالحايط ونسمع الصوت

-شنو يعني

-يعني هسه يبين خبر سواية حماها

عاد هي گدام الناس لزمت عدة

بس خلصت عدتها راح حماها يخطبها

وشتردين بيومها فرجت علي امة

محمد گالتله يخسى الياخذني

وانا مرت اخو

-ليش بيبي رفضت زوجها مو مات

-دسمعي السالفة طلعو عيالها طمعانين

بگاع زلمتها وحقه بس هي هي چانت باردة

اگلها ليش ماحزنانة عليه

تگول گلبي بي نسمة هوا بااااردة

لو ميت صدگ چان اشتعل نار گلبي

انا مطاوعتهم وحزنانة بس رجلي يرجع

اذا مو اليوم باچر

وصارت مثل اللبوة واكفة وگوف بعيونهم

لحد ماصارت وگامت ترد الاسرى

ورد زلمتها بوكتها من التمت الناس

وگفتلهم وحجت الصار كله

ربت بنياتها وتعبت عليهن ومااطت روحها لييييش

-ليش بيبي

-چي گلبها هجس هو راد

انت هسه شتهجسين

-اني ادري بي يرجعلي بس بيبي ......

-يابيبي ليش طاحن دموعچ

رااااادلچ انا ليش جبتلچ السالوفة

چيف هجست تحبين المسووودن

حب خبال يابيبي گلبچ رهيف

لا تموتين من التفكير سوي مثل

غزالة كل ليلة گعدي دانشي گلبچ

وشوفي ان چان بارد معناها

ماكوووو شي وان شاء الله للدوم

ويرد واعرسلچ وندخل جحوووور

الحيايا وندوسهن دوس

ضحكت وبست اديها وهي

تقويني بسوالفها الحلوة 

بس من انفرد لوحدي اشتاقله

مدري شبية وسر هالتعلق شنو

ودخلنا الشهر الثاني بنصة 

وتعودت عالمركز الصحي

وناسة تعودو عليه وبيوم

جابولي طفل صغير متنگ

مدنفش ابيييض وحليو

ومعلگيله خرزة زرگة بگذلته

نازلة على عيونه افحص بي

ولزم اصابعي

-شنووو هالجمال هالخرزززة خلوها

من العين

ضحكت امه وباوعتلي

-هاي حبوبته خلتها اله

-شسمه الحلو

ضحكت امه وكممت شفافها خجل

-سميته مهند

-لتگليلي على اسم الممثل

-هههههههههه اي دكتورة

-لذلك طالع گمر

خمط السوار اللي معلگ بيدي يلعب

بي واني احچي وياها

-متنگ شي بسيط باوعي

كتبتلة العلاج ودخلي بالغرفة الگبالنه خلي

عالتبخير شويه تمام

-خوش دكتورة

طلعت وهو داير راسه اليه ويضحك 

اسويله بيباي وهو يعيد الحركة

گزگزت علي وگمت وراهم لغرفة التبخير

بس شافني رفرف بأيدي المدنفشة

رفعت امه راسها

-هذا بس واحد يضحكله يتخبل

اخذته من ايدها خليته بحضني

وهو سند نفسه على صدري

وحضن ايدي

واني مثل الخبلة سنحت وياه

وحضنته زميلتي تضحك

-انت ام جاهزة بس ناقصچ

طفل

بوستة واستأذنت امه

-عادي اخذ وياه صورة 

-اخذي كله وخل انام بالليل

-فدوة حبيبي ربي يحمي الچ

خلص التبخير ورتبتلها العلاج

وگفت يمي

-دكتورة احنه گبال المركز هاي الباب بالباب

-البيت البي محل

-اييييي هو هذا شتحتاجن انتن

تتدللن

-حبيبتي متقصرون

طلعت واني كملت شغلي

بس صارت الساعة ثلاثة

نريد نطلع دخلت البنية نفسها

وبيدها علاگة مرتبة

-هاي هدية من هنودي

-ليييش هالتكلفة

-چا غير صرتو صحبان بعد

سلمت عليه وطلعت وصلت البيت

ماما وبيبي فتحو العلاگة

بيها علبة دهن حر

وعلبة زبد وتمر مسوينه بسمسم

ودبة لبن صغيرة

النظافة واااضحة والترتيب

والعلب تلمع لمع

بيبي عينها من الغراض مبتسمة

ماما فهمتها حضنتها وباستها

-هااااا عذوووبة حنيتي

-خاااايبة حنيت لعمي سالم

الزبدة ياكلها من راس

الشچوة وهي دافية سودة عليه

-عذوووبة اجيبلچ بقرة هنا

باوعتلي وهزت ايدها

-بقرررة بت ريحانة اسمها هايشة

ياالدكتورة

ضحكت تاركتهم ورحت لغرفتي

وكالمعتاد جهازة مغلق كتبت

رسالة بلهجة قاسية 

وصارت هاي عادتي بالدوام

صرت كل يوم لازم امر اشتري

من المحل ابن عم مهند گاعد

بالمحل يطلعونه اليه ابوسه

ومن گد متولعت بسوالفه

اشتريتله العاب وملابس

ودخلت عليهم قبل لا ادخل

للدوام طلعت امه راكضة

باوستني ودخلتني صالة بسيطة

فرش ارضي ونظافة

-ليييش مكلفة نفسسسج فدوة

لگلبچ

-اگلچ اني هذا خطيبي راح اتركه

واخذ مهندددد

-خل اگعده الچ

-ابدددد والله خلي نايم

سلمت عليهم وبناتها الحلوات

اربعة بالمدرسة

فهمت منها ان سبب اعتزازهم بمهند

واهتمام بيبيته المبالغ بي

بسبب ان هو اجه على اربع بنات

طلعت للمركز راجعة

نص ساعة واجت شايله

علاگة خلتها يمي

-تريگي انت والبنات هني وعافية

-راح اصير دبدوبة على اكلج الطيب

-يجعلها مداخل العافية

ودعتني وطلعت وصار مهند

صديقي وامه البسيطة 

صديقتي بهالمكان البعيد

:

:

:

صحيت من امواج ذكرياتي على وصولنا

للمركز وباشرت الدوام 

بحدود العشرة الصبح اتصل بيه

-ها حبيبتي

-صح النوووم

-صح بدنچ جايچ اني

ارجعچ للبيت

-ليش تتعب نفسك

-استغل الطريق اشوفچ

مشتاقلچ 

-منتظرتك

واستمر هاجس يروح ويجي

علية للدوام

ووره اسبوعين 

من رجعتة خلصت امتحانات نصف السنة

چنت طالعة من الدوام

وتلاگت ويايه ام مهند شايلته

بيدها

-اجينة نودعج ونروح

بوستة وجعصت خدودة وهي

كملت

-رايحين لل......

لأهلي يتونسن البنات بالعطلة

-حبيبتي ترجعين بالسلامة

رجعت بوسته

-بالچ على خطيييبي

ضحكت وراحت واني

ركضت للسيارة هاجس منتظرني

بس دخلت السيارة باوعلي

-تحبين الاطفال

-هوووايه عائلتنا قليلة الاطفال بيها

-خطفچ مني هذا القرررد

-يجننننن هنودي

ضحك وهو ماشي بالسيارة

-وگعت على مايچ التمديد مال النزول

-والله ومرتاااااااحة

-شهرررررر كامل شتردين بعد

-اررررريد سلامتك

طلع بينه للبيت وسيارة الخط فاتت

-شو ابو الخط مو راحة

-بالعكس عينه ميشيلها

-هم عوووزة يشيلها

اگلچ تجهزتي لباچر

-ماعندي شي 

-والله والقرد راح يصير عريس

-ربي يوفقهم

طلعنا للبيت والصبح تجهزنا

اني وبابا وماما وبيبي وطلعنا

وهم طالعين مناك وصلنا كل

شي چان جاهز هي مشية وهي

عقد

نورت غيد وطلت بفستان اوف وايت

بعد توسل وكلام من بيبي يلا نزعت

الاسود

ووطن بترتيبه وبدلته البنية

خطوبة حلوة مريحة هااااادئة

تمت تحت فرحة الكل واصوات

الهلاهل

ورجعنا بعدها ثاني يوم اني 

ثاني يوم طلعت لدوامي

واستمريت هيج الى أن انتهت

العطلة الربيعية وباقي ايام على

انتهاء اجازة هاجس

وبنفس الوقت اني چنت بأنتظار

هنودي مجهزتله سيارة والعاب

صبحية وبدو المراجعين يهلون

عيني عالباب گلت هسه

تطب ام مهند وهو بيدها

متحملت اخذت الغراض

وتوجهتلهم دگيت الباب ودخلتلهم

طلعت امه وجهها تعبان

-شلووونج ام هنودي

ياااابه تأخرتو عليه

گلت ازووور خطيبي

ذبت حسرة ودخلت

-تفضلي دكتورة

هسة اجيبه الج

-خليييي نايم

-لا گاعد

ثواني ودخلت بس مو هو

هذا طفل ثاني يختلف

فزيت واگفة ماكو شي من ملامحه

الحلوووة بس الشذرة الزركة

اللي بشعره وادي الحلوات

اللي مدهم اليه

گوه طلعت الكلمة من لساني

-شبي

-رحت هناك يم اهلي ومرت اخوي

جايبة وشم نفااااس

-يا نفاااااس مررريض جفاف

امشششي وياي للمركز

-وديته اطو دويات بس ما طاب

- جفاف الطفل منتهي

-هو امي وعمتي گالن من النفاس

خليت مرت اخوي ترضعه حتى يغدي الشر بس بي ومايصير اسهال ويزوع

-صدگ تحجون ابو ويييين عيالج

-ابو وعمه تطوعو وراحو

وبس انا وعمتي ومرت حماي والجهال

بالبيت

-علااااااج ضروري

طبت عجوزها سلمت وگعدت

تستفسر حچتلها ام مهند

-لا خالة طبه طب عررررب مايفيده

طب الدكاترة 

فتحت ملابسه واني شهگت

-شنوووو هاي شجاااارمين بالطفل

بچت امة

-هاي اخذتة عمتي للعارفة چوته

وشرحت اذنه وحطتلة عرج كركم

تسحب النفاس منه 

-ماااااكو هسه ويايه تجون

جرته بيبيته

-وين ماخذته خالة

-اخليله محاليل ياااابس الطفل

حتى جلده منتهيييي

امة گامت تبچي وعددت الاعراض

-مامتدرر من البارحة بالليل

وگوة نام يلوووب عمممة فدوووة مو اگلج

نروح بي ماترضين 

البيبية رافضة من فحصته وحچيت الاعراض

گوه وافقت المركز بي سيارة اسعاف

بس فحصنا اكتشفنا ان لازم

يتدخل مستشفى

طلعت وياهم اني وامه وبيبته

للمستشفى اول تشخيص چان

-هو Severe Dehydration

جفاف شديد مصاحب لتنفس سريع

وضحل

الدكتور يتناقش ويايه

والام تبچي

چانت عيونه غايرة ليجوه

وجلدة فاقد المرونة

الاوردة مختفية

ورحلة البحث عن الوريد چانت

عبارة عن عذاب الى أن أستقر

الدكتور على ان تثبت قسطرة

وريدية مركزية على ايد دكتور

تخدير يخلوها برگبته

بدو بضخ السوائل والمحاليل

نسيت هاجس اللي ممكن يروحلي

اتصلت بي

-ها حبيبي

-جايچ صار ربع ساعة طالع

-ارجع هاجس اني بالمستشفى هنا

-شكووو صايرلچ شي

حچيتله بشكل مختصر وغلق الاتصال

اطمأنيت على هنودي واجاني

هاجس بالخمسة رجعني للبيت

رجعت بس منتهية اريد انام

حتى انسى منظره الحزين ونظراته

الحلوة الذابلة

حچيت لبيبي الصار

وبدت تحجيلي عن هواي عادات

بالية لازالت لحد الان يتداولها البعض

ثاني يوم الصبح طلعت لدوامي

ويه الخط هاجس يتجهز يريد يرجع

لدوامه بعد يوم واحد

رجعت بوجهي للمستشفى بعد ماانطيت لهاجس ولأهلي علم اني رايحة للمستشفى سرعت خطواتي

للردهة سريره عالشباك

فارغ ركضت بره لغرفة الدكتور صار بوجهي گاعد

باوعلي بأسف مسحت وجهي اتدارك

دموعي

-ماكو مهند

-للأسف ........

-مات مو

-بالليل البارحة بحدود الثنتين

للاسف متأخر اجانه

البوتاسيوم ناقص بشكل

ادى لأضطراب النبض بشكل خطير

​اضطراب حاد بمستويات الصوديوم

سبب نوبات تشنج 

وبحالته جفاف شديد توقف تدفق الدم للكلى

وادى لفشل كلوي مفاجئ وتراكم السموم 

بالدم

طلعت ماشية ادور

عليهم دموعي اللي نزلت غوشت الرؤيا

عندي وشفتها واگفة بالطب العدلي

وصوت صياحها وصراخها مالي

المكان حواليها نسوان ثلاثة

ورياجيل اثنين يحاولون يستوعبوها

ويلزموها ماكو

ليلت الدنيا واني متشنجة بمكاني

جامدة وهاجس يتصل رديت علي

-ليييش تأخرتي ومااتصلتي اخذچ

-مات هنودي

-لا حول ولا قوة الا بالله 

ساعة واجاني هاجس بس صعدت

السيارة انفجرت باچية مشى هو

وتحرك ابد محچه حرف ويايه

صامت هادئ خلاني براحتي

لحد ماوگف يم جسر صغير

يعبر لمنطقة خارج المدينة شط وهدوء

مدلي ايده بييها كلينكس

-مسحي دموعچ هذا امر ربنا

امسح بدموعي وشهگاتي

رافضة تتوقف

-بس چان الموضوع سهل لو معالجي

هاجس لاعبين بي لعب مچوينه

بأيدة وحتى بطنه مشرحين اذنه

بحجج واااااهية

رجعت ابچي وهو نزل من السيارة نزلني

ويا وگفنا عالشط والهوا باااارد ضرب وجهي

-مسحي دموعچ 

-ليييش خسرو بهالشكل

-الجهل آفة

-بس امة واعية وذكية

-ومحيطها جاهل اثرو عليها

سندت نفسي عالسياج

عيني عالمي صافنة تذكرت

ضحكته والشذرة الحلوة اللي

تلمع على جبينه رجعت أبچي

الى متى تقاليد وخرافات بالية

تقضي عالاطفال بحجج واهية

تقرب مني هاجس وحاوط اكتافي

نگر راسه براسي

-حبيبتي

-همممم

-ذكري الله

-لا الله الا الله

ثواني وحاوط اكتافي رافع ايده

-نييييلز باوعي ليفوگ ناخذ

صورة

التقط الصورة ضاحك 

يحاول يطلعني من المود اللي دخلته

بسبب الصار

اليوم الاوف گضيته نوم وكلما اگعد

ابچي الى أن اجاني هاجس بالليل

حتى يودعني وينزل بقى يصبر

بية ويسولف ان الحياة راح تخليني

اواجه اشياء هووووايه لازم اتعود

افصل هالشي عن حياتي العادية

راح بس هالمرة بوعد جهازه مفتوح

حتى نتواصل حصنته بسم الله

الرحمان الرحيم وراح

و رجعت ثاني يوم لدوامي اباوع الباب مفتوح

والناس طابة طالعة عليهم يعزون

دخلت للدوام بنهايته رحت واحتراما

الهم بهاليوم لبست اسود

عزيتها وهي دموعها تنزل مثل المطر

ماگدرت الومها لأن العمة چانت هي

السلطة اللي رافضة العلاج

طلعت منها بحزن عميق ونهاية

حزينة لروح حلوة غابت عن عالمنا بسبب الجهل

ورجع روتين حياتي الليل صار يخصنا

اني وهاجس اتصل بي بعد ماينام الكل وتهدأ الاصوات الغرفة ظلام مخلية التلفون على أذني

اسمع صوت الوشوشة الضعيفة بسبب ضعف الشبكات

دقايق واجاني صوته خشن وتعبان

بس بي هذيج لمحة الحب الخاصة بس اليه

-ها حبيبتي بعدج گاعدة گلت نستني ونامت

-وشلون أنام وانت بوسط النار هاجس طمني الصوت يمك قوي أنت وين شيصير يمك

ضحك ورد بأريحية

-بنص الفرررح گاعدين السما حمرة من الدخان

والموت يمر من يمنا ويسلم

بس أحنا وياه صحبة قديمة

-خوووفتتي والله مو تگول مايمي شي

-هاي كرزات نتونس عليها شبيج هسه هذا كله ماهامني بس تدرين شنو المصيبة

- اسم الله عليك شنو المصيبة

-بوسط هالضيم چهرتچ گدامي ماتفارگني

-خلف الله عليك

ضحكنا سويه وهو كمل

-لدرجة البارحة واني نايم حاضن ابو صعبة

وطايحله بووووس الولد فز خايف

اليوم وين ميشوفني يشررررد

-هههههههههههههه

-ضحكي حفيدة العرمة

-بطل سوالفك لا تتعاقب

-اخخخخخخ الله عاقبيني

يا محلى عقابچ بس خل أرجع 

وأني أسلمج روحي مكلبچة وأنتِ الحاكمة

-فسااااااد

-هوووو وين محصله

-ارجع وكل شي تريده اسوي بس

دير بالك على نفسك لخاطري

-راجعلچ هو اللي وراه هيج دعوات وهيج عيون الرصاص يستحي يكتله

-اي يستاذن يلا

-بربوق

-هههههههههههه هاي جديدة

-احدثلچ قاموس الغلط مادامني هنا

بس وحدة تبقى ثابتة

-القرچ طبعاااااا اعرف سوالفك

-والهمجيييي لا تنسينها

ضحكنا وتذكرنا لقاءانا الأول

وودعني غالق الاتصال

والايام مرت تجيب بعضها

الى أن ابو غيد دز عليهم

حتى يقدمون الزواج بليلتها

اتصلت بيه غيد تبچي

-ليش تبچين ياحبيبتي اول وتالي

تتزوجون

-لچ ليل يريد يزوجني

حتى يجيب زوجته للبيت اني ادري

-ليش مو عدها بيت 

-ايجار ويگول الاولاد هم اخوانجن

وهي خوش مرة ومن هالسوالف

-غيد تردين احچي الواقع لو اواسيچ

-الواقع طبعا 

-الواقع ان مهما طال الوقت بالنهاية

ابوچ راح يجيبها للبيت وتنفرض كأمر

واقع فيا حبيبتي امشي بموضوع

الزواج وتوكلي تعاي يم هذا

الخبل اللي منتظرج

اقتنعت بكلامي وغلقت الاتصال

واني اتصلت بهاجس حتى

اتأكد منه يگدر ينزل للعرس لو لا

اتصلت هالمرة من وقت مو على موعدنا

طلع مشغول

تركته گلت يتصل باخوانه

خلال ساعة خمس مرات اتصلت

وهو ماكو مشغول مااعرف ماارتاحيت للموضوع

لحد مصار موعد اتصالنا رفع الخط

خليت الموضوع طبيعي وثاني

يوم كررت نفس الشي

باليوم الثالث بموعد اتصالنا

بس فتح الخط وجهتله

السؤال

-سؤال واحد

-ياسااااتر شبيچ لچ شو عصبية

-اسمعني هو سؤال

ثلث أيام اتصل ب١١ للوحدة

انت خطك مشغول

سكت ثواني ورد ببرود

-غلطانة مفتوح الخط بس احتمال خلل

بالشبكة

-تمام مع السلامة

غلقت الاتصال وهو كذلك

مااتصل لنهاية الاسبوع تحدد

زواجهم على يوم الخميس الورا

وطن گال هاجس مراح يحظر

وبذلك بقينه معاندين احنه

الاثنين اجت غيد واخواتها

وكل بناتهم يمنا والزفة تطلع

من بيتنا

بديت وياها ترتيب وتجهيز

والبنات مجتمعات ولمة حلوة

اتصل بية وطن مستعجل

-اتصلي بهاجس بسرعة

مدري شبي

-شنوووو شصاير

-ماااعرف بس اتصلي

بسرعة تركت الهوسة ورحت لغرفتي

اتصلت شويه وفتح خط

-الگاطعة

عرفته سالفة من سوالفه ورديت

-نعم

-راح يصير اسبوعين شهالبرود

-بيمن تتصل

-بابا يااتصال ليش مترسخة ببالچ

مسالة ان عندي شي

-ابببببد مگايله عندك شي ولا شاكة

بس اكو شغلة اذا تأكدت منها بوقتها

رد الفعل يكون مختلف

رد بعصبية

-تهددين لچ

-شتحسبها احسبها تمام

غلق الخط واني رجعت للبنات

يصادف ثاني يوم الحنة

تركتهم الصبح رايحة لدوامي

رجعت كل شي جاهز حنة بنات

بسيطة بس الاستغربته وجود

روان هي علاقتها قوية ببنات ميعاد

عمة هاجس فأحتمال همة عازميها

بعد ماغيرت ملابسي سألت يمنى

-اگلج شعجب روان هنا

-هاجس اتصل بخالة ميعاد

كاللها عزميها هي وعمتها

-اهااااا

تركتها ومشيت لاگتني روان

سلمت عليه وعمتها كذلك

ابتسمت مجاملة لأن خطارنا

صاحتني عمتها گعدت يمها تسألني

اسئلة تخص صحتها

واجت هي گعدت

-شوفي خالة الضغط مينزل بس بالليمون مستحيل 

لازم علاج

ردت روان

-هم عمو گاللها ذاك اليوم من تخربطت

لازم ترحين للدكتور

باوعتلها بأبتسامة

-اي گالي اتصلت بي لگيته

مشغول گال چنت احچي ويه روان

صاحوها البنات راحت هي

وعمتها اعتذرت

-خالة خاف ماتقبلين تحچي

ويا

-صدگ تحچين خالة هو بمثابة

عمها وهو منطيني علم

باليوم ساعة ساعتين يحاچيها

-والله ياخالة عبالي ماتدرين

وكل يوم اني وياها عرك اگلها

خاف البت تفهم غلط

-لا بالعكس ليش

-هي نفسيتها من موتة ابوها سودة

عليه بعد گامت ماتنام

وهو خطية يحاچيها يوعيها

-الله يريح بالها

وهيچ عرفت وايقنت ان هو يحچي

وياها ادري ماعنده شي بس سوالف

اللف والدوران تخلي الانسان يتحذر

بالليل هدت الاوضاع والكل راح

والبنات ذبو نفسهم بعد ماعزلنا

البيت طلعت بالحديقة

بعد ما انتهت الحفلة وهدت الهوسه

طلعت للحديقة الهوى البارد وحلو اتصلت بي

هم مشغول دزيت رسالة

-عوود سلملي على روان

​ربع ساعة واتصل هو صوت التلفون جان مثل إعلان الحرب

​

-نعم تفضل 

صوته عصبي ومحتقن يريد ينفجر

-​ليل شبيج شنو هاي الرسالة شنو قصدج

رديت علي ببرود

-ما قصدي شي بس الواجب يحتم عليه أهنيك على سعة صدرك وعلى كرمك الفائض بالاتصالات

عبالي بس اني الي حصة بـيك ما دريت روان هم محجوزة بالجدول 

زفر النفس بضيق ورد

-​لا تتلاعبين بالألفاظ إنت تعرفين روان

وتعرفين وضعها وتعرفين أبوها شنو بالنسبة إلي البنية يتيمة وتعبانة والاتصال مجرد جبر خاطر

ليش تسوين من الموضوع مشكلة

- جبر خاطر حلووو يعني أنت صاير مصلح اجتماعي وأني ما أدري هاجس المشكلة مو بالثقة المشكلة بالوضوح اللف والدوران يخلي الواحد يشك حتى بخياله

لو گايلي أحجي وياها لأن محتاجتني جان معارضت بس تخليني أتصل بيك ساعة وساعتين والخط مشغول وتكولي خلل بالشبكة هاي استصغار بعقلي

-ما استصغرتج بس أعرف غيرة النسوان

وين توصل ردت أتفادى هذا الحجي لا تقارنين نفسج بطفلة جاهلة مثلها إنتي وين وهي وين

​- ومنو گلك قارنت نفسي

وية أحد بس إسمعني زين

من أغار مو معناها شاكة بيك

معناها جاي احس بسرقة لوقتنا لاهتمامك بمكانتي عندك

أنت انطيت روان حق مو إلها

وأخذت من وقتنا وقت هو بالأساس إلي 

سكت شويه ورجع رد بهدوء بس بنفس

النبرة المتنرفزة

- وضع البنية كسيف شفتي اذنها ومشاكل خوالها وأمها أني وأبو صعبة تعهدنا لأبوها نكون إلها سند

ضيفي لهالشي بس هي وعمتها

عايشات ماكو رجال فوگ راسهن

​-وأنت صرت هذا الرجال 

اللي يملي كل هاي الفراغات هاجس

اكو شعرة بين المروءة 

وبين فتح الأبواب اللي ما تنسد

أنت هسه فتحت باب التعود روان تعودت عليك

وباجر من نتزوج روان راح تبقى تتصل بـ ١٢ بالليل وتگولك عمو هاجس ضايجة سلييييني

رد بعصبية

-شنوووو تسليني بس بعيدا عن اسلوبج اللي بعدين

نتناقش بي أبوها چان يخليني

اني وابو صعبة بكل طلعة النه

يگول اذا متنا منو اليبقى عدل مسؤول عن روان

هي تربت بينه مثل أختي مثل بنتي إنت هسه جاي تحاسبيني على واجب أخلاقي 

رديت بهدوء وثقة بكلامي

​-مجاي أحاسبك على أخلاقك

بس خل اگلك شي اسمع هاجس اكو طبع نگس بيه متعرفه

-حشاج

-لا على شنو حشاية عندي طبع

ورثته من عذبة البشر اعاتبه مرتين

وبالثالثة اسكت وسكتي مكروووهه هووواي

مكروهه ماينعرف رد فعلي وراها

-اعتبره بسمار

-اعتبره واقع اللي يريحك سوي

اتصل احچي اجبر خواطر الدنيا كلها

بس اللحظة اللي أحس بيها إن كرامتي أو گلبي

راح ينمسون بأذية راح تشوف ساعتها ليل ثانية

تمام

​رد يحاول يلطف الجو بكلمته المعتادة

- إيبااااااااه كبرت عضلات ليل وصارت تهدد

اني هم زمال اختاريت وحدة لسانها اطول منها

-لساني يطول بس ويه اللي يحاول يستهين بيه هاجس لا تخليني أبرد تجاهك و البرود أصعب من العتب تمامممممم

-ما تبردين اني اشعلچ جمرية هسه بالاتصال

فكيها حب باجر عرس وطن لاترحين مبوزة مثل البوم

-بومة بعين عدواني 

-شگوووول عررررررررمة

ضحكت غصبا علية وبقينه

نحچي ساعة ودعته ونمت

ثاني يوم بلشنا تجهيز بين الصالون

والترتيبات حان وقت الزفاف

طلت غيد بفستانها الابيض

وبيبي تحاوطها بالمعوذات

وانزفت لعريسها بزفة عراقية حلوة

حسب طلبها مقبلت بالقاعة 

بس يرحون لفندق يومين

رجعنا من الزفة على البيت 

حفاظا على اعصابي متصلت بي

بهالوقت لأن مااضمن ردة فعلي

شراح تكون بعدها ثواني واتصل

-ليش اماتصلتي لچ

-خفت تكون مشغول

-افرغلچ روووووحي

-بس سؤال عندي

-جواب

-ليش روان وعمتها وحدهن ماكو اقرباء

شي يتولى مسؤوليتهم

-لا عمتها وابوها وحيدين

چانو عايشين عند بيت عمهم بس

مرت عمهم شوفتهم الويل 

بس صار ١٨ اخذ اخته وطلع

اشتغل بكل شي ورجع للدراسة

المسائية وتعرفنا علي

-اهاااا مو گتلك مبين اكبر منكم

-من يمها نحت الصخر حتى يعيش

لحد مااشترى هالبيت الصغير

وعاش هو واخته زوجها لواحد

تعرف علي وتزوج اخت الولد

اخته ماصار عدها اطفال

وزوجته قبل روان صار عدها

طفل بسبب مشكلة ضاربها

سقطت الطفل وصالحها وصارت

روان وراها رجع الخلاف بينهم

وكتلها دزها لأهله اخو زوجته

رجع اخته الة وطلگها

ابو روان گوم بالعناد طلگ مرتك وخربت

حياة الاثنين البنية بقت فترة

يم امها ومن اجاها نصيبها تزوجت

وروان صارت وين ميروح ابوها

ويا تعلقت بي وهذا كل موضوعهم

ماعدهم احد قريب

-بس عمتها مو چبيرة

-عمتها مو چبيرة بس تعبانة

ربچ بقى راتب اخوها عايشات علي

وهي هم تشتغل بعيادة سكرتيرة

-الله يوفقهم

-وهسه بعدچ ضايجة

-اني مو ماعندي احساس هاجس

بس هالبنية اكو شي بيها ميريحني

-اگلچ

-نعم

-خل توووولي الناس ماكو تصبيرة منا

منا

شمرتله بوسة بالتلفون ضحك

-الموضوع يرادله صبرررر يابشررررر

اررررريد اعررررررس

رد علي صوت جهوري

-تعااااااال عرسسس عليه بهالصحراااااء

لطمت خدي خجلانة

-انفضحنا يبووووو

يبوووووو

-ابو صعبة خليلك شويه حمرة 

صاح ابو صعبة

-متحرررررررش ررررركز بالعدوووو وعوف

الحب 

ضحكت على سوالفهم اللي يسووها

حتى يطلعون من جو الحرب والتعب

والشهر جر شهر وتم اعلان النصر وتحرير الموصل

بالكامل يوم ١٠ تموز بأيامها بدت علامات

التحرير تبين والأيام التي چانت تقتات على الصبر حسمت أمرها

واخيرا انبلج الصبح عن حقيقة وحدة

الموصل رجعت والعراق انتصر

المعركة مچانت مجرد معركة استعادة ارض وبس

چانت ملحمة استعادة كرامة

ضجت بيها أزقة الحدباء بهتافات التحرير اللي

غطت على صوت الرصاص والدمار

منظر الأهالي وهم يستقبلون القوات الأمنية وأبطال الحشد چان يفتح الگلب وينزل الدموع

أطفال يرتمون بأحضان رجال الأمن وكأنهم 

لگو الحضن الآمن الهم بعد سنوات خوف

كبار السن اللي تعبو 

چانو شباب الحشد يشيلونهم

على الأكتاف 

الأمهات والأخوات اللي

جفت عيونهم من الحزن

سالت دموعهن بس هالمرة فرح

وهن يبوسن روس جنودنا معلنات

للعالم أجمع أن الغيرة العراقية هي الحصن المنيع

هذا اليوم چان بالفعل عرس عراقي بامتياز

ان يطلع البلد سالم رغم الخسارات

من بين براثن الشر والظلام على أيد

وسواعد أبنائه هو المعجزة اللي تحققت بتظافر الجهود من اللحظة الأولى للفتوى المباركة اللي هزت الضمائر وحتى لحظة التحرير الأخيرة بأزقة الموصل القديمة چانت الگلوب تنبض بنفس النسق

إخواننا من المحافظات المنكوبة اللي ما بخلوا بقطرة عرق أو دم وگفوا جنباً إلى جنب ويا إخوانهم الجايين

من أقصى الجنوب والوسط

حتى يرسمون خارطة عراق جديد

ميفرق بين طائفة أو دين

بل توحد بمبدأ واحد هووو حب الأرض 

چان التحرير بمثابة فرح جماعي

انفجرتله سما العراق بأنوار الفرح

خلت الگلوب تشع سعادة

بعد ليل طال سواده لثلث سنوات

هالفرحة مو فرحة عابرة لا

هالفرحة وحدت ولمت شملنا

صار الغريب يحضن الغريب

والمسيحي يصافح المسلم

والإيزيدي يبارك للجنوبي

والكل متوحد على شعار وكلمة وحدة

يا رب ديم الأمان واحفظ بلدنا

اللي تعمد بدم شجعانه حتى يبقى عزيز

وراح يبقى هالنصر يروى للأجيال الجاية

بس رغم كل هذا فرحتي بعدها

ممكتملة هاجس مقطوع الاتصال بي

بگد فرحتنا بهالخبر بگد خوفي علي

واهلة كذلك الكل خايف متوتر

لا هو ولا ابو صعبة

اجهزتهم مغلقة

گمت اروح لدوامي بس مجرد

روتين واتمنى بس خبر عنه

لحد يوم ١٥ تموز بعز انشغالي بالمركز

دگ تلفوني

وفز گلبي ويا هاي النغمة المخصصتها

اله

ركضت لجنطتي اطلع الجهاز

ونور اسمه عالشاشة فتحت خط بچيت

-حبيبي

-يابعد نجوووومه

-تأخرت عليييييه

-اجيتچ بالنصر

وينچ انتِ

-بالمركز انت رجعت

صوتي يرجف واتمنى احضنه

-طلعي لوطن راح يرجعج للبيت

اهلچ يمنه

-الله عليك بيك شي

-اااااااخ بيييييه شووووگ يكسر ضلوعچ 

ضحكت وسديت الخط لميت

اغراضي استأذنت الادارة

وطلعت سيارة وطن بس رافع

الجامات ومخلي واقيات الشمس

حواليها

فتحت الباب وصار بوجهي

هاجس

بسمارة الزايدة حلا واثر الشمس

والحرب على عيونه الحلوة ووزنه

النازل

شهگت مكممة شفافي ونزلت

دموعي

نزل بطوله الحلو لابس قاط

مثل ماوعدني بس رابط ايده

بحمالة كسور گوة طلعت الكلمة

من شفافي

-هاجس

-اجيييتچ عالوعد

من الحرب لعيونچ

الفصل الثالث والعشرون من هنا