رواية دخيله الشيخ زين العابدين الفصل الثالث والعشرون بقلم أوتار حزينه
الشيخ شعلان
من لفه حميد واهلو يمنا زين حالو ماركد اشوفو بس صافن ووالهم جاتلو ساكت وكلامو قليل كاعد حدي بالمجلس لجن احس
به مو يمنا بغير مچان
اعرف وش بلاه وبيش يفكر
الله بلاه بعشك وحده ماتريدو ولا تطيق شوفه
وجهو وقهرو زاد من صارت گريبه منو
ادحك له دايخ به ومقهور علي لان حالو صاير ما يعجب وهم مابأيدي شي مااكدر اطلبها له وانا اعرفها ماتودو ولا تحبو
وهم اذا تكلمت بها اخويه راح يفكر انا اريدها له مگابل الفلوس الي دفعتها له
كام من يمي وترخص كمت وراه من فض المجلس سريت لدار حميد اشوفو
واتطمن علي جان جالس بره بالحديقه شافني كام سلمت
الله يساعدك يبو هيله
هلاا ياشيخ تفضل اجلس
لاا خلينا نسري للبستان شويه
براحتك ياابو زين
سرى حدي سالتو
مرتاح جاري يبو هيله
الحمدلله مرتاح والفضل لله ولك ياخويه
الحمدلله عساني ماقصرت معك بشي
لاا حشه ياشيخ ماقصرت بشي وكفتلي وكفه الاخ لاخوه
ابتسمت ورديت
ادلل يبو هيله انت غالي عليه جثير
يعز غاليك يبو زين ويخليك هالنشمي لان هم ما قصر معانا بشي
وكفنا اثنينه من سمعنا صياح
هذا زين وهيله وش بهم متهاوشين
حميد تكلم ،،،،، لزمتو من ايدو من راد يسري لهم
اخذتو ورحنا وگفنا يم نخله
گلبي وجعني من سمعتو يتكلم بقهر وخبال ويريدها تحس به وهي تردو كلام يوجع
عگبت تبجي ادحك لولدي غادي دم ويرجف من قهرو ضرب شجره يمو وصاح
اااخ وج ااخ منج تنوحين على واحد ميت ماااسولج شي وهان علي يحجون بج
وزاااد ياهيله من مد ايدو وضربج
سكت ادحك له يتنفس بقوه ويرجف من غضبو دعى
الله يبليج بيه مثل ماااابلاني الله بيج عسى نار گلبي تندار بيج وتحسين
بالكاعد يصير بيه
ضرب الشجره بوكس وعگب يدعي علي روحو وعليها
صفنت علي مقهور كلش وممرود علي ذبيت حسره دحكت لحميد صافن على الصار وساكت ...
شارريد اتكلم هو شاف الوضع شاف ابني شصاير به من ورة بنتو وهم الرجال ماا بيدو شي شيريد يغصبها علي
ياابو زين
اعرف ياحميد انت ماابيدك شي
رديت سكت ماحجينا شي
الشفتو قهرني بعد اكثر وهو هم انقهر لان مابيده
شي يسوي لابني
🌿🌿🌿🌿
زين العابدين
دشيت دار اهلي مورث وغادي دم امي بالصاله شافتني فزت صاحت بخوف
خير وش بلاك احد غاثك
مارديت صعدت الدرج بسرعه طبيت غرفتي هي اجتي ورايه سالتني بسرعه
ولك مااتحجي شبيك صاير شي غاثك احد
يمممه غاثتني روحي غاااثني گلبي هذااا
دكيت علي بگوة صاحت
ااسم الله عليك يمه وش بلاك فهمني
اانا مو فاهم روحي شلوووون تريدني افهمج
اانا اريد افتهم وش بلاني وليش راكض وره ناس ماااتريدني ليييش يمه
صحت بخبال كملت بقهر
وووين عزة نفسي يااايمه وي غروري عش انكسر كلشي بيه من حبيتها
للللذيج
اشرت بجنون على جهه دارهم
هاجر دشت هي وجدتي ادحك لي بغضب تكلمت
هووو هيج الحجي يبن فضه
صفكت ايد بايد بقوه وصحت
ياااجده مااظل حجي ماظل كلام گوة هي مااتحبني ولا راح تحبني عقلها كلو يم ذاااك الهون وعافها
للحلوك واولهم ااانا
من ولك هيله بنت حميد
لااااحد يذكرها جدامي حتى اسمها من ينذكر چدامي يوجع گلبي
خلهااا تولي شنو الخلقها ماخلق غيرها
خلق يمه خلق لجن گلبي حبها هي عيوني هاااي كامت ماتشوف غيرها شااسوي كولو لي تعبت وتعلل گلبي من وراها
ياااخايب يبن الخايبه الي مااايريدك لا تريدو
امي انهدت بيه جدتي سرت ليمي ساكته بس تخزر بيه امي كملت بغضب
عش كاعد تسوي بروحك هيج عش تقهر نفسك من وره وحده ماتسوه فلس ولك ااانت شيخ ابن شيوخ والكل يتمنى ينطيك بنتو
كعدت مهدود حيلي جدتي انهدت بها
ااااي شيخ يبعدي هو خله كدر للهل الچلمه شوفي وش عمل هدتو حرمه يافضه خلتو يتوسل بها ويشحذ منها الچلمه
يااجده لا تذبين فوك ناري حطب
ااااذبو يبن شعلااان واشعلك بالزايد
صاحت بي بغضب كملت
وووش بلاك ماكتلك لااا تروح لها خلها تبرد من
صوابها ماگتلك حديدتها حاميه ومقهوره من الصار بها
وااانا ياجده انا مو مقهور من الجاي احس به مااا تعرفين انا شجاي يصير بيه
ابويه دش وكفت دحك لي وهو عاكد الحواجب تكلم بهدوء
خلونا وحدنا انا وزين
امي دحكت عليه وعلي اشر لها براسو سرت
وجدتي وراها تردد
تعلل ابنك يااشعلان وبعد مالو دوه غير وصل هالبنت
هز راسو الها وماتكلم بشي هي دعت
ااي الله يبدل حالها لهل البنت وادكول اي حتى تبرد نار هالمجنون
طلعت من يمنا ابويه سد الباب سرى ليمي عيونه بعيوني نزلتهن تكلم
يازين وش بلاك وين عزه نفسك وين غرورك تكسرك بنت ياولدي تكسرك وتخليك تتوسل حبها
ياابه
ااسمعني
صاح بغضب
سكتت وانا اتجنب اخلي عيوني بعيونو
ردد
استغفر الله استغفر الله
هدأ وكمل
ااسمعني،،، وافهم كلامي انت شيخ ابن شيوخ زلم مااتكسرنا موو عاااد حريم
لميت ايدي بگوة
من انت
دحكت بعيونو كمل بصوت قوي
انت شيخ زين العابدين ابن الشيخ شعلان ولد شيوخ ابا عن جد اليسمعك
تصيح من وره حرمه ما تريدك وش راح يكول راكض وره وحده ماا تريدو ويتوسل بها ترضى به اانت يازين وانت اول واحد تعرف قدر نفسك وقدر الاسم الشايلو
درت وجهي منو كمل بغضب
عمك حميد اخويه غالي عليه هو وبنتو لجن انت
اغلى من الكل واكولها لك الي ماتريدك ربح لاتريدها خساره
غمضت عيوني فتحت من كال
سمعتني يااازين
هزيت راسي باي رديت بصوت مخنوك
اي يابه
🌿🌿🌿🌿🌿
هيله
كلام زين ظل يدك براسي كلامو عن تهديد الشيخ صگبان لابويه خلاني اعيش بخوف ورعب كلت هذا غدار وحقود حقد الجمل من يحقد على احد الا ياخذ ثارو منو يله يرتاح
انتبهت بهل جم يوم ابويه مالو خلك وجهو غادي دم ويشكي من وجع براسو
كاعدين كلنا على الريوك صافنه علي له يحسب بدفتر يردد وي روحو لازم حولين او ثلاث يله نسد الشيخ شعلان يعني لازم ااقصر عليكم كلش يله اكدر اسدو وهم لازم اخلي جوة ايدي مصرف خاف يصير شي لاسامح الله
يبو هيله خذ الذهب العندي التراجي والحلقه
وهم تراجي البنوات بيعهن وخليهن مصرف جوة ايدك
ابويه وجهو انطعن بعد اكثر سكت رد ليوره وسند ظهرو على الحايط ردد بقهر
الردي نهب كلشي نص الحلال الي النا اخذهن
والفلوس الضاميها هم نهبوها ردت احجي اكول
يم القاضي ماكدرت خفت لا هم ابو زين يدك على صدرو وينطيهن اليه
ذبيت حسره وظليت ساكته امي تهون علي وتحاول تشيل من همو لزم راسو
سالتو
ها هم راسك يوجعك
ااي والله احسو يريد يطك من الوجع
تروح لدكتور
لاا شاسوي اروح للدكتور وانا اعرف وش بيه كلو قهر ومراره بالحلك صارت من وره هالردي والي عملو معنا حسبي الله علي
يابه اكلو لزين من يعكب يوديك للدكتور
ساريه تكلمت بخوف دحك لي وصفن ذب حسره رد
لا يابه مايحتاج ابوج بخير لاتشيلين هم
زين بهل جم يوم ماشفتو بعد سمعت من خواتي
سكن الفله هو وجم واحد
وماعكب بعد
العصر تفاجأنا بجيه الحجيه علينا هي وهاجر والهنوف كعدن بالاستقبال امي هلت بيهن جثير وكعدت يمهن
انا وريمه وكفنا نحضر لهن ضيافه اختي مسويه كيكه وعدنا كعك وحلويات من المسواك الدزو عم شعلان
انتبهت لاختي ادحك لي وبعيونها كلام لجن ماحجت شي ودتو الهن رجعت تكلمت
هيله امي ادكول خلي تجي تسلم
مارديت سريت لهم دشيت شفتهن كاعدات وحده بصف اللخ رحت للحجيه
سلمت
شلونج شيخه
ماخليتها تنهض نزلت بستها ردت
هلا ياهيله شلونج يايمه عساج بخير
الحمد لله بخير
الهنوف كامت بوجهي تكلمت
البقيه بحياتج ياهيله
رديت بصوت مخنوك
وحياتج ياشيخه
هاجر حبتني سالت عن حالي
الحمد لله بخير
امي اشرت اكعدي يمي كعدت حدها ما ادحك
لهم الهنوف تكلمت
شلونكم حدنا مرتاحين ان شاء الله
مرتاحين ياام يزن وماقصرتو بشي وخلفه عليكم دنيا واخره
هالكلام هو حگ وينكال الهم لان وكفو لنا وكفه
الاخ لاخوه لجن انا گلبي ينمرد واحس الوكت ذلنا من صار بينا الصار
غمضت عيوني مااريد تنزل دمعتي الي صارت گريبه من عيوني الحجيه حست بي
تكلمت
ياهيله صيري گويه على زمانج ولا يوليج الوگت
من يغدر بج
فتحت دحكت لها،،،،، ملامحها قاسيه وگويه
لجن عيونها بها حنيه رديت
عزه الله مايلويني شي الا اذا صار شي لاسامح الله بابويه او واحد من هلي
ابتسمت ردت
ان شاااء الله ماتشوفين هاليوم
امين ياشيخه
امي ردت الهنوف تكلمت مبتسمه
انتو ماتعرفون ابويه شكثر يحبكم ويعزكم غالين ياام هيله وغلاتكم من غلاه عم
حميد
يعز غاليج ياام يزن وانتو هم غالين علينا وبحسبه اهل لنا
اي اهل ياايمه حتى وان جان الدم مو واحد
الحجيه ردت هاجر اخذت ستكان وقطعه كيكه انطتها لها اكلت شويه وكالت
طيبه هالكيكه من مسويها
ريمه
هااي ام عيون وسيعه الدشت قبل شويه
اي ياشيخه
حلوه مثلها لجن هيله احلاهن
عيوني صارت بعيونها مبتسمه واحس بگلبها
كلام يخص ولد ابنها لجن ماحجت شي حجن عن الصار وغير شي بعدين
عگبن لدارهن
وره جم يوم الصبح ابويه حدر لمضيف الشيخ شعلان يكعد يمو ويعكب وره صلاه الظهر
مشوار ساريه طلعت تلعب هي وريهام وهاله يمهن مشوار دشت تبجي وصاحت بخوف
يممه الحكي يكولون ابويه متخربط وماخذي للمستشفى
فزيت من مچاني انا وامي
وريمه لفيت شالي شلون مچان طلعت اركض بدون شعور للمضيف واحد من الحرس تلگاني صحت به
وش به ابويه وش بلاه
مابه شي لاتخافين هساع يرد من المستشفى
امي وصلت تبجي وتردد
وينو ابو هيله وش بلاه احجي ياخويه زلمتي شجاه وتخربط
مدري ياخيه وكع على غفله وشالو وي الشيخ
للمستشفى
امي فزعت صرخت
طيب شالو طيب
ااي ياخيه طيب مابه شي هدي وانا اخوج
هديت للشارع لحكني هو عوض من طلع من
المضيف تكلم معي
وين رايحه ياخيه
اريد ابويه اريد اشوفو
ااحجي وابجي امي حالها مثل حالي وخواتي يحورن يمنا وصوت بجيهن ينسمع
امشي انا اوديج انتي والخاله
يااهيله نسري معج
ريهام صاحت بشهكه صحت بريمه من شفت الزلمه ظلت ادحك لنا بقهر
اااخذي خواتج وااكعدن بالدار
ااابويه ياهيله اابويه وش به
تبجي وتشهك صحت بصوت مكتوم وانا اتجنب ادحك لاحد
عگبي ياريمه من اصل اطمنج علي
انتبهت لروحي بس بالشال وطالعه بدشداشه عگبت اسري بهن للدار امي وياي وصلنا لبست عبايتها وانا صايه طلعت اهف واردد
يارب الطف بابويه يارب الطف بينا ولاتختبريني به اختبرتني مره لا تختبرني
مرة اللخ
ابجي بدموع واردد ادعيه له واتوسل برب العالمين ما يفجعني به،،،،
عوض اخذنا وسرى بينا للمستشفى امي تلوب
وتبجي وانا معها هو يهدي بينا ويكرر
شالو طيب لعم حميد والله مابه شي بأذن الله
يارب مابه شي يارب الطف بحالي انا وبناتي
امي تردد وانا معها وصلنا نزلت اريد اطير له كدت امي من كامت تتعثر بخطواتها من بعيد لاح لنا فزاع اشر لنا عوض راح يركض له وكف يمو يتكلم گلبي راد يگف من الخوف كلت راح انصدم بابويه وانا مكسوره ظهر
لجن حدر بسرعه علينا
امي وكعت بالگاع من رعبها وخوفها صاح
الله ياخاله مابه شي لا تخافين هيانو نايم بالردهه ويمو عمي الشيخ
يممه گوي گلبج خلي نسري لابويه ونشوفو وش بلاه
تكلمت وكدتها سرينا له دشينا شفتو متمدد بالسرير وجنبو عم شعلان تگربت له امي شهكت بالبجي راحت له عمي تكلم
ناايم ياام هيله خله يرتاح ويمشي الدوه بجسمو
وش بلاه وش صار به
رددت بشهكه ادحك لابويه وجهو اصفر ووشكلو مو هوو سالتو بخوف ودموع
ابويه وش به ياعم
ذب حسره دحك له تردد سالتو مره اللخ وكلت ابويه به شي جبير رد بصوت مخنوك
الضغط صعد عندو وضربتو جلطه خفيفه بالگلب
امي خرمشت خدها هوت لزمتها كعدتها على كرسي ضمت وجهها بين ايدها
تبجي بخنگه
وكفت مصدومه يمها جن واحد ضربني براسي بيده الهاون ادحك له مو ابويه ذبل بلحظه
دموعي نزلت شهكت بصوت سريت له وكفت حدو تكلمت گوة
ياعم ابويه راح يطيب موو
اي يابه يطيب بس لازم ياخذ دوه ويظل راكد وماينقهر
غمضت عيوني بگوة گلبي ينزف دم وعيوني تبجي دمع على الصار بينا وعلى وگعه ابويه عرفتو من وره القهر الضمو بگلبو ضربتو جلطه
ياهيله لاتخافين مااخلي وانا عمج بس يكعد ووضعو شويه يتحسن اخذو لاحسن
دكتور يعالجو ومايخلي هالمرض يظل به
فتحت صفنت علي رددت
بعد شيريد يصير بينا يااعم
انهاريت ونزلت للگاع لزمت ايد ابويه حبيتها ابجي واردد
اموت اذا صار به شي كلها خل تكسرني الا ابويه ياعم
ماايصير به شي وانا عمج
سمعت صوت ثاني تكلم بخوف
🌿🌿🌿🌿🌿
مالك
ظليت تحت اقامه الجبريه تبع الحجيه ماتقبل اتحرك لباب الشارع وگوة فكيت روحي منها طلعت بعد 20 يوم ورحت للمكتب بشير هناك شافني كام بوجهي
هلاا والله نورت المكتب
هلا بيك يابو ود شلونك وشلون الشغل
بخير لاتشيل هم.. وسيم اجه وانقذني من الحسابات
اي كتله باشر قبل جم يوم شلون شغلو
ورده تحفه هالولد وشغله توب
هاا يعني راضي علي
اي ومايحجي هوايه ساكت وخال عيونه بالحاسبه
ابتسمت ورثت جكاره رد حجه
اكعد خلي اسويلك كهوه ولاا تسوي شي استر علينا رامبو
ضحكت وكتله
غير لو اني المتعارك ولك رحت افكو لهذا الخبل وصوبني بدال ذاك العار
اكلك هو صدك اجه سكران ويريد يشوف ام شعر الاحمر
سكتت اجتي بين عيوني تذكرت روحي من تصوبت جانت اگبالي وكعت وهي
اجتي عليه اخذتني لحظنها
وبعد ماادري شصار
مااالك يمعود وين رحت
هااا
سالمين يابه اليشوفك يكول عاشك
يااخره ياعشك ماظل واهس لهل السوالف
كم مرة اكلك انتقي الفاظك تثقف شويه
ههه بله هو اني شكلي مال واحد مثقف
ههه لا والله مال واحد طالع من البتاوين مجرم وخريج سجون ناقصك كم وشم وتتخرج بامتياز
عجل هاي شنوو
اشرت على ندبه بحاجبي ويم حنجي
ههه هم صدك بس دك وشم جمجه يم زندك وتكمل السبحه
لااا عيني مااشوه جسمي
اوي عيني ماعرفتج ست محاسن
هههه انجب ولك هاي ياامحاسن
مااعرف والله اسمعها من مرتي من اتسدنس
عليها
ههه طاح حظك استرجل ولك هي مال سندس هو احنا بينا نقص
هههه بس حجي ولك شبيك صدكت كل
هالضخامه واصير سندس
اكلك صدك اشو صاير ثور ضعف ولك كرشك صاير يدك بالميز
ولك اسكت اتعشه مرتين ماادري شبي مفجوع على الاكل وام ود مامقصره بالحلويات تجيب وتسوي ترجلي وبسبوسه وكيك
واخوك يكعد تالي الليل
يضرب بالخمسه
بالعافيه بس داري صحتك
اريد اسجل جم بس ماكو وكت
روح بليل من نفضو للشغل
الله يساعدهم
وسيم طب شافني وجهه فرح اجه ليمي كمت بوجهه بوسني وكال
شلونك هسه احسن ان شاء الله
ابتسمت بوجهو رديت
اي زين بس اعتب عليك صوبتني وبعد مااجيت عليه غير بس مرتين
ارتبك وبين الخجل بوجهو رد
حقك بس والله استحيت اجي لان شفت الاهل شويه ضايجين مني
كلامو صح امي استقبلتهم بوجه ثكيل وبعد مااجه لا هو ولا امه بس خابرو علي وتطمنو عليه
رديت بضحك
لا محد وجهو ثكيل بس الحجيه تعرف بعد ابنها وتصوب شتريد يابه اطش
جكليت عليك من اطب علينا
ابتسم ورد
طبعا لااا مو همزين ما نضربت بشي من عدها الله سلمني من ست الحبايب
ضحكت كعدت كاتم ضحگتي ولازم جرحي
هاا خير صوابك كام يوجعك
لاا يمعود صارت الشغله لاراديا مابيه شي خلونا نشتغل لان صار بيه ملل من الكعده
🌿🌿🌿🌿🌿
ليان
جبت سمج زينه ورتبت الاحواض الي هن بيهن برفوف والحمدلله اول وجبه نباعت وجبت اللخ هم بعتهن وبقت وحده
حمره تتحرك بنشاط شكلها حلو كلش عجبتني كلت اخذها للبيت
بليل عزلت اخذتها ووياها شتله بنت القنصل ردتها هديه لنوار لان البنيه اكلت
هبطه من وره اخويه
والسواه باخوها
كلت انطيها لماما هي توديها الها خليت السمجه يمي ليكدام هي والشتله كعدت بسيارتي شغلتها عدلت المرايه نزلت راسي
اريد اتحرك عكدت حواجبي رفعت عيوني باوعت
بالمرايه مره اللخ من انتبهت سياره واكفه بعيد على الجهه الثانيه بمسافه مو غريبه علي گلبي كام يدك بسرعه من عرفته ايهم
حرك بلحظه وطلع بيها على الاستداره استدار وعيوني علي وراح كلت مو هوو لان
اخذو تعهد منه بعد مايتقرب مني
بس ليش،،،،گلبي يكول هوو ليش احساسي بي هو الجان واكف ويراقبني
جهازي دك جان وسيم فتحت الخط حجه
هلو ليونه
هلو وسيم
سكت سال
بيج شي
لاا مابيه شي ليش تسال
ماادري حسيت صوتج بي شي
لاا ماكو شي
انتي وين
طالعه للبيت تريد شي
لا والله اخابر ماما ماترد كولي الها راح اتاخر بالشغل لايظل بالكم عليه
تمام من ارجع اكل الها
اي محتاجه شي من ارجع اجيبه الج
لا سلامتك مااريد
يله لعد مع السلامه
الله وياك
سديت الخط حرگت ورجعت لبيتنا اخويه بده يشتغل وي مالك بمكتبه بابا ما اعترض بالعكس شجعه وماما هم اني ما حجيت شي صح ضجت لان اشتغل وي هذا بس كلت مااحجي شي لان اخويه ما اعترض على كلشي يخصني بالعكس دائما واكف وياي وساندني وصلت لبيتنا نزلت شايله السندانه خليتها على البنيد وطلعت السمجه تفتر بالمي سديت باب سيارتي سمعت صوت
هلو ليان
انتبهت نوار طالعه وشايل علاكه تريد تذبها بالحاويه رديت
هلو نوار
مشيت الها شايله السمجه تباوع الها باعجاب حجيت بتردد
الحمدلله على سلامه اخوج واعذرونا على الصار
ااسكتي ليان متت بدمي من شفت اخويه واكع يمج والدم يفلت من صفحته
حجت بسرعه وخوف كملت
تصدكين مااجنت اعرف اخوج الي صوبه كلت اكيد متعارك وي احد وضربه
اي اني هم ماصدكت اخويه الي ضربه
سكتت سمعت صوت بجي تاليا حجت
اوكفي بس اروح اجيبها واجي
اااخذي راا
ماكملت كلامي طبت بسرعه للبيت رجعت شايله تااليا اجتي ليمي صفنت
على الطفله مااعرف ليش حبيتها ودخلت گلبي من اول مره سمعتها تبجي حسيتها تشبهني بكلشي
توته شوفي هاي السمجه شلون حلوه
هاا هي الج اخذيها
صفنت عليه وردت
هااا اليه
الصراحه اني جبتلج ذيج السندانه هديه بس هاي لتوته
صدك تحجين هديه اليه والها
ابتسمت ورديت
اي شبيج مو مصدكه
الله احلى هديه هاي،،،مو توته
باستها من خدها تناغي بصوت حلو وتباوع عليه
حجيت بتردد
اكدر اشيلها
ههه اي تكدرين ليش لااا اخذيها بين مااودي هديتج الحلوه ياحلوه
تغزلت بيه انطتني تاليا وباستني من خدي
تفاجات بحركتها ضحكت وكملت هاي بوسه الج هديه
ابتسمت لميت تاليا بحظني فرحانه بيها مااعرف ليش
خلي اودي السمجه للمطبخ ها صدك شاانطيها
اكل
بالجنطه هسه انطي الج
تمام بس علميني كل شكد انطيها اكل خاف هههه انطيها جثير وتفطس
هالبنيه بس تضحك عبالك فطيرة
طبت للبيتهم ورجعت تاخذ السندانه من طبت مره اللخ تاخرت شويه سياره اجتي عرفته اخوها نزل بسرعه حجه بخوف
خير صااير شي
رديت
لااا ماكو شي
نوار طلعت شافته ارتبكت مااعرف ليش انتبهت اله خزرها وخافت مشيت بتاليا
الها كلت
السمجه انطيها اكل مره باليوم ولا هوايه شويه ونظفي الحوض كل اسبوع
والزرعه مره اسقيها هم كل
اسبوع كلاص مي
تمام تمام شكرا ليان على الهديه
ردت رفعت عيوني اله يباوع عليه عاكد الحواجب ومبين علي ضايج مادرت بال
مشيت من يمهم طبيت لبيتنا تذكرت الاكل ما انطيته الها
كلت انطي لماما هي تنطي الها لان مالي خلك ارجع عليهم واشوف خلقته الحلوه
🌿🌿🌿🌿🌿
زين العابدين
سكنت الفله عگب اخر شي صار بيني وبين هيله عزه نفسي وكلام ابويه خلوني
اجفيها وادوس على گلبي
ذليت روحي لها جثير ونزلت من قدري لوحده
عميه ماجاي تشوف انا شكاعد اسوي لها وشلون بحت الي بگلبي اكثر من مرة
كاعد ادحك للنجم بالسما والهواجيس لافيه براسي ومكدر حالي
حمد تكلم
وش بلاك ياازين اهوجس صاير بك شي اليشوف حالك وصفنتك يكول عليك عاشك
دحكت للولد بعيدين عنا شاعلين نار وكاعدين
يتگهون يمها كمل
تكلم يول وش نوحك هالايام مختفي وماتجي
لجلساتنا انا وصعب والربع شبيك
جريت من مالك وزهدت
بهل الدنيا
ااي زهدت بكلشي الا شي واحد
رديت بحسره تربع دحك لي بتركيز رد
ياازين من العاشگها تكلم يول هالحسره حسره عاشك
صب گهوة
اصب بس تكلم كول المن عاشك ولك
ماجنت اريد اتكلم بها عزيزه نفس وروح وگلب ماردت احد من ربعي يكول زين عاشك.. هيله اسمها ما ردت يحجون بها ولا نصير سالفه بحلوگهم
التزمت الصمت لح ما انطيتو نشده ظليت ساكت
ادحك للنار توج بلهيب وصوت الحطب يتكسر
سكون الليل والفلاه الوسيعه هدأت بالي شويه لجن الشوگ ظل يحن للسمره غمضت عيوني
بتعب هو تكلم
يازين راح تظل هينه ساكن الفله
اي ياحمد الما نشوف وين راح تصل بينا الامور
بعدو ابوك يهوجس بالشر
الشر حوالينا يااحمد وابويه يشوف شي حنا مانشوفو
عيل خير يمعود تراها مو عايزه البله كل جم سنه يلفنا من فگينا عيونا واحنا من حرب لحرب كلشي ماشفنا من عمرنا
ابتسمت ورديت
من انت حمد ماشفت شي من عمرك
ههه شفت لجن بعد اريد اشوف
سكتت هو كمل
ورطه وتورطت من سريت وياك ملل ياخويه مدري شلون متحمل الكعده بهل الفله
جابتو صافن واشوفها بين
عيوني
هينه يبرد الراس ويصفى البال نبعد بلكي يبرد البينا وتطفى ذيج اللهبه الشابه
بصدرونا
والله انت مو خالي وبك شي
مارديت شبيت النار بالعود صوت ساير صدح بموال
ااانا المشتاگ روحي تلوح
انا المشتاگ اي والله والروح تلوح
والله وحرت بيش اصبر الروح ولها
يااولها يااولهان ياولها
يهون على الگلب كثر العذاب ااي والله
غمضت عيوني بگلبي رددت
والعذاب لفاني وخلاني ولهان وساكن الفله
صرت حالي حال مجنون ليلى واخاف عشگج يبنت العرب يجتلني
ياازين
عواد صاح رديت
هااا وش تريد
باجر نعكب نحمل زاد ونرد
عگبو انتو انا اظل هينه
جدتي ذهب تريد تشوفك يازين هي وجده فضه
سكتت من سمعت حمد تكلم
عگب معنا شوف الاهل صارلك ايام غايب عنهم
هزيت راسي باي
عگبنا قريب الظهر لان سياره واحد من الولد صبحت عاطله صلحنها وطلعنا لديرتنا
وصلنا سريت للمضيف تااسلم على ابويه سلمت على الحرس واحد منهم
تكلم
يااشيخ اذا تدور على عمي الشيخ تراه مو موجود
وين راح
عبالي كعده لو فصل لو شغل رد
مله حميد تخربط ونگله للمستشفى هو وفزاع
والولد
فكيت عيوني صحت به
وش ادكول من عم حميد
اي ياشيخ مدري وش بلاه وگع من طولو وشالو بسرعه
متى متى صار هالشي
ساعه عشره يااشيخ
مااجاكم خبر منو
والله ياشيخ يكولون ضاربتو جلطه
وو
ماانتظرتو يكمل كلامو سريت بسرعه حمد بعدو بسيارتو كاعد ويحجي بجهازو شافني اسري بسرعه
نزل صاح
يااازين وش بك صاير شي
صعدت بسيارتي حركت بسرعه وطلعت بها
للمستشفى سريت مسافه عينت الو ورايه جهازي
دك
جان هو فتحت الخط تكلم بسرعه
خير وش بلاك طلعت تطرد على وجهك
عم حميد ضاربتو جلطه
ماات
فال الله ولا فالك ياوجه البومه روح خليني اركز بالطريق
سديت الخط بوجهو هي اجتي بين عيوني تكلمت بقهر
شحالج هساع يولي كثرت عليج المصايب وهالمصيبه غير اعرف ابوج عزيز عليج ومااتتحملين يصيبو شي
ذبيت حسره رددت بصوت مخنوك
لو يصير والله اشيل من حزنج واخلي بگلبي لخاطر ماينكسر شي بگلبج
غمضت فتحت وانا احس بها هساع مكسورة بعد اكثر والدمعه حدرت وجرحت الخد
كملت
انجرح هالخد جثير ياهيله والدمعه الجانت عزيزه صارت تحدر بسهوله من كثر المصايب الي حدرت عليج ومانطتج مفكه
اخذت جهازي خابرت ابويه مارد خابرت فزاع
رد
هلا يازين
هلا يافزاع عم حميد شخبارو صدك السمعتو
اي والله الرجال وكع علينا بالمضيف يم عمي الشيخ وشلناه لا ايد ولا رجل
يارب دخيلك وهساع شلونو
والله يازين يكولون ضاربتو جلطه خفيفه خلوه بالانعاش وكاعدين ننتظرو يكعد
رديت بصوت مخنوك
اهلو عرفو
اي مرتو وبنتو الجبيره اجني يبجن وحالهن حال مگابلتو وعمي يمهن
جااي انا جاي
تعال يازين ابوك احسو مو على بعضو انكسر على مله حميد وانقهر جثير
جااي هياني مابقى شي واصل
انتظرك بره
سديت الخط حمد بعدو ورايه وصلنا سوه نزلت من سيارتي فزاع بره اشر لي سريت له انا وحمد
عم حميد شلونو
سالو رد
بعدو ماكعد
اهف بالمشي وانا ادعي بگلبي هالزلمه الطيب ما يصير به شي لان اعرفو اذا
راح يكسر ظهر هيله وعيلتو وابويه وياهم
وصلنا للردهه عوض واكف وجم حارس سلمت ودشيت تكلمت بسرعه من شفت ابويه
وش به عم حميد الف سلامه له
وكفت من شفت هيله حد ايدو تكهد بالبجي رفعت راسها الدموع تارس الخلقه تكلمت بصوت رايح
ياعم ابويه راح يروح من ايدي
گلبي انمرد عليها هي تبجي يمو وامها هم مگابلتو تبجي معها
كملت بشهكه
لو قابله بشيخ صگبان جان مو هذا حال ابويه جان بعدو طيب ويسري على رجلي انا السبب انا يابه الي
مااضحيت لخاطرك انت وامي وخواتي
انهارت يمو تبجي بشهكه ممرضه طبت تكلمت
مايصير الكاعد تسوه يمه المريض محتاج راحه وهدؤ
يااهيله بسج عاد ابوج مابه شي
ابويه تكلم بصوت مخنوك راح لها الممرضه كومتها من يمو تشهك مثل البنت الزغيره وادحك له بخوف
الله يخليك شيخ خل كلها تطلع من يمو حتى يرتاح
انا اظل يمو
مرتو انتي
اي مرتو
ظلي بس انتي
اانا اريد اظل يم ابويه
لااا مايصير بس مرافق واحد يظل يمه
اسري ياهيله معي
ابويه تكلم ظلت ادحك لابوها امها تكلمت
روحي هيله انا اظل يمو
ااكعد بره يمه اي شي يصير صيحني
ماايصير شي وانا عمج امني بايد الله وادعيلو
يارب يالله ابويه وديعه يمك لاتفجعني به
سرت تبجي وتدعي له طلعنا كلنا بره الحرس
شافوها معنا سرو هم والولد مسافه
كعدت اگبال الردهه تبجي علي
ابويه كعد تعبان يمها يهون عليها الصار
مابه شي يابنتي لاتظلين تبجين
ابويه انضرب جلطه من وره القهر ياعم قهرتو الحنطه وهالردي قهرو العوز وقله الحيله
تحجي وهي تشهك بالبجي
ادحك لها گلبي ممرود عليها لجن مابايدي اسوي شي تكلمت وره لحظه
يابه خل نطلع بي لاربيل
خل يكعد ونشوف وضعو يفحصو الدكتور اذا حالتو تسمح نطلع به مااخلي
هينه لا والله اخذو لاحسن دكتور باربيل
شهكت وضمت وجهها بين ايدها ابويه
تكلم
گوي گلبج ياهيله خابرج گويه وماتنهدين بسهوله
هذا ابويه ياعم بيمن اتعزز اذا راح
مااراح ياهيله بعدو طيب وصوابو بأذن الله خفيف
عم حميد كعد العصر والدكتور كال وضعو يسمح تطلعون به باجر الصبح لاربيل
ظليت وي ابويه وهيله وامها،،،دشيت شايل العشه بعد ماجابو الولد
شلونك ياعم هساع
اشر براسو جان مايكدر يتكلم خليت العشه على الميز ادحك لابويه صافن
علي ومقهور كلش
هيله يمو تفرك بايدو وجهها ذبلان ودمعتها
بعيونها
ياام هيله عگبي مع زين شوفي البنات ولمي جم هدمه الج والو حتى نطلع من الفجر لاربيل
مااروح ياشيخ مااعوف حميد خل هيله تروح تشوف خواتها وتجيب الهدوم
براحتج يابه ظلي يمو وانتي ياهيله روحي طمني خواتج هساع روحهن مفرفحه
على ابوج انا طمنت الاهل
علي لجن اعرفهن ماراح يتطمنن الا منج
🌿🌿🌿🌿🌿
هيله
دحكت لعمي الشيخ من تكلم امي كملت
روحي يمه جيبي الكتلج علي وعگبي
اروح معكم ياعم مااعوف ابويه
اي تروحين يابه بس حضرو كلشي حتى نسري من وكت
تمام عم هساع اروح واعكب بالغراض
رديت ونهضت من يم ابويه ادحك له عيونه عليه اشر بهن روحي دنكت بستو من
راسو وكلت
لاتشيل هم يابه انا عندك انا سندك وحزام ظهرك
ابتسم بتعب روحي اختنگت رديت بصوت رايح من البجي
بيه ولا بيك يابه
يله ياهيله اسري من وكت يابنيتي
عم شعلان تكلم طلعت مااشوف احد ولا اميز اي شكل اريد اروح واعگب بسرعه خايفه بهل الساعه ابويه يصير به شي
يابنت العم من هينه
سمعت صوت زين وكفت ادحك وعيت انا اسري معه وحمد ورانا هو والحرس صفنت علي وجهو مطعون ومبين علي القهر تكلم بصوت مخنوك
منا السياره اسري معي
سريت معه فتح الباب الجدام ماتكلمت شي صعدت حالي حال وابجي
بصوت مخنوگ
صعد يمي شغل وطلع درت وجهي على الجامه اريد اسكت مااكدر ابويه غالي
علي جثير وقطعه من گلبي روحي معلكه به اذا صار بي شي انا اموت انتهي
شهگت بصوت كتمته بايدي
سمعتو ذب حسره بس ما تكلم اي چلمه يدحك
للطريق وهو عاكد الحواجب
وصلنا لدارهم سرى بالسياره لدارنا نزلت خواتي طلعن يركضن الخوف تارس ملامحهن واثر البجي
بعيونهن هاجر معهن والحجيه طلعت ووكفت يمهن
ريمه سالتني وهي خايفه
هاا ياهيله وش صار بابويه
ماردت اخوفهن تماسكت گوة وجاوبت
ما به شي كعد وهو بخير
دشيت انا وخواتي اسمع الحجيه تسال
بزين بسرعه اخذت جنطه خليت هدوم لابويه خواتي يحورن يمي ريمه سالت
عش تاخذين هدوم لابويه صاير شي تكلمي ياهيله وش صاير ضامه شي عنا
لااا ياريمه ماكو شي بس عمي الشيخ يريد ياخذ ابويه لاربيل حتى يشوفو دكتور
زين
ساريه گضبتني من هدومي تكلمت بشهكه
ياهيله كولي ابويه به شي
اخذت نفس وذبيتو رديت
لا ياساريه مابه شي كعد وفتح عيونو لجن لازم يشوفو دكتور زين حتى يتاكد من وضعو
تصدگين ياهيله
هاله سالتني ريهام هم
صدك هالكلام
اي والله كعد مابه شي وباجر اخابركم اطمنكم علي
يابنوات انا اخابر على زين كل مشوار نتطمن علي لعم حميد
هاجر تكلمت معهن سكتن ظلن يدحكن علي شلون افتر والم بغراضنا انا وامي وابويه هاجر ساعدتني ونبهتني لجم شغله
ريمه اخذت جنطه وهاله اللخ غسلت وجهي اكثر من مرة اريد اصحى اريد بس وعي يرجعلي حتى اعرف اتصرف
طلعت من يمهن لحكني يبجن شديت حيلي بره وتكلمت بحزم
مااريدجن تبجن گون گلبجن وياي وادعن ابويه يكوم من هالشده
يااهيله خاف مايعگب
هاله تكلمت بشهكه رديت بسرعه
لاااتفاولين علي وادعيلو خلن الايمان بگلبجن الله موجود ويدحك لحالو ولحالنا
خواتي ظلن يرددن
يالله يالله رجع النا ابونا سالم وما به شي
التفتت الحجيه صافنه عليه زين يم السياره ولا رفع راسو ولا دحك لنا
جدتو تكلمت
روحي يمه والله يرجعلكم ابوكم سالم ومتعافي من هالشده
امين امين ياشيخه
رديت زين فتح باب السياره
رگبت تكلمت مع ريمه
ديربالج على روحج وخواتج ولا يظل بالجن بس اتطمن علي اخابرجن
اي هيله خلي زين يتصل عليه وانا اطمنهن
هزيت راسي لهاجر تحرك وسرى بينا للمستشفى طول الطريق ساكته وادعي لابويه
انتبهت له ماتكلم ولا دحك لي ساكت وعيونو على الطريق عاكد الحواجب ومبين علي القهر
وصلنا سريت له گلبي نار وخايفه علي شفت عم شعلان بره كاعد تطمنت من شفتو هادئ
دشيت للردهه امي يم ابويه كاعده وصافنه علي جان نايم ووجهو مو مثل الاول
ارتاحيت شويه زين طب
تطمن علي وعگب
الفجر طلعنا بابويه لاربيل عمي الشيخ وداه لمستشفى تركيه سواله فحوصات جثيره وتحاليل هم ظلينا هناك يومين والدكتور طمنا
كال الجلطه عابره والحمد لله لجن لازم يرتاح وما ينقهر ولا يتعب روحو
اسمع الكلام وانا صافنه واردد منين تجي الراحه وهو مطلوب ملايين لشيخ
شعلان واعرف ابويه
مستحيل يكعد ويخليهن برگبتو
غمضت عيوني بتعب اسمع امي تحجي مع عمي وخالتي الي تحولو لكاعهم وكعدو بيها تعذرو مايكدرون يجون لاربيل كالو من تعكبون نجيكم
سدت الخط رددت بقهر وبجي
هذا الماعنده ولد يظل طول عمرو مكسور الظهر
زين سمعها رد
انا ولدج ياخاله ليش تحجين هيج انا عندج وحزام ظهر الج ولعم حميد
مااقصرت يايمه لا انت ولا ابوك وخلفه عليكم دنيا واخره لو مااانتو فوك راسي انا مااعرف شلون اتصرف وي هالمصيبه الحدرت فوك راسنا
سكتت تبجي،،، وتتحسب على الي حرگ الحنطه وعلى الردي صگبان
كمت رحت للشباج وكفت ادحك للشارع لجن ماشوف شي بس كلام الدكتور يتردد براسي
لايتعب لاينقهر ولازم يرتاح ديربالكم علي الجلطه ترجع اذا ماتوفرت اله راحه البال
والجسد
درت وجهي لغرفتو زين ساند روحو على الحايط
ومغمض عيونو ،،،فتح دار وجهو علي شافني ادحك له صفن بعيوني ملامح وجهو تغيرن عكد الحواجب وكام من مچانو سرى لبره سندت راسي على الجامه وظليت افكر بابويه والصار به وبحالنا الي ترده فرد مرة
دخت وراسي افتر وكمت اهوجس اذا ابويه ماارتاح وظل يفكر بالدين الي برگبتو وش راح يصير به
يكع مره اللخ ويجوز يموت
گلبي هبط بس اجه بالي هالشي مسحت دموعي انتبهت زين بره واكف يدخن ويدحك للشارع
صفنت علي تذكرت كلامو من دعى عليه مرة اللخ وكال
ياااهيله ااادعي من الله ذله حبي الي انا بها تصير بج وتجيني برجليج وانتي مذلوله
دار رحو دحك لفوك عيونو صارت بعيوني تگلمت بقهر وخنگه روحي
شنو الي بينك وبين الله حتى يسمع دعائك بكل مره تدعي بها عليه
