رواية حكاية ترف الفصل الرابع والعشرون
تمضي الأيام وتمر السنين وتبقى الذكريات الجميلة
مُعلقةٌ على جدران القلوب هناك أيام
كأنها أعوام
وأعوام كأنها أيام
هناك لحظات
تستحق تعب سنين
لحظات تنسى
وأخرى ترافقكَ مدى الحياة
هناك ثوانٍ
محفورة في القلب
بأدق تفاصيلها
وهناك ساعات
نتمنّى لو أنّها تعود
تارةً أخرى.
المواجهه مع امجد
وبيوم وصل خبر الأمي من وحده من الخالات.. امجد متعارك ويه مرته وبعدها صار طلاگ بينهم... ليش وشنو السبب.. محد يعرف..بس فوگ هذا كله هم صايره مشكله بين خالو دلير ومرته وهسه رايحه زعلانه عد اهلها... احنا استنتجنا هي زعلت لان أبنها امجد طلگ بنت أخوها واكيد خالو صار من طرف إبنه وزعلت يم اهلها يعني شي عادي وحتى ماما جانت رايده تتصل بكل الأطراف وتسوي مصالحه بينهم
بس القنبلة اجتنا ويه طبت خالو علينا ووياه امجد
وبدو يحچولنا
امجد يگول..
من چنت زغير جنت راسم بخيالي ترف تصير شريكه لحياتي...وما چنت ضام هالشي بگلبي ، لا چنت حاچي كلشي لأمي وأبويه..
خالو هو راسه بمعنى اي صحيح
وكمل امجد : ومن تقريباً صار الوكت الي لازم اعترف لـ ترف بهذا الحب واطلب منها الموافقة على الخطبه ولگيت حفلة التخرج مالتي هي الوقت المناسب وحتى تصير الفرحه فرحتين وعزمناكم على هاي الحفله وسوينا التحضيرات اللازمة لهالموضوع
بس قبلها بشكم يوم جتي امي وگالت ترف ماتريدك ولا تفشل روحك وياها لان عمتك حچتلي وگالت ترف وشهم چانت بينهم علاقة وشهم من شافها رعنه ورخيصه ومستعده تبيع روحها لأي واحد يگولها احبچ عافها وراح خطب غيرها..والله اعلم شچان بيناتهم
هذا كله چان يحچي امجد وهو خجلان وگوه تطلع الحچايات منه وامي رأساً فگت عيونها وبده على وجهها الاستغراب وتگول
- آني حاچيه هيچ والله كل الي گلته شهم صح چان رايدها بس من طلب منها تعوف الدراسة وخيرها بين لو زواج لو الدراسة هي اختارت الدراسة
- امجد : امي صورتلي وفهمتني شي صاير بينهم وگالت هاذ الشي ماراح يخليها تتزوج لامنك ولا من غيرك
- امي رأساً لطمت على وجهها وخالو لزم أيدها وگال ام سيف ام سيف لاتسوين هيچ ومسحيها بيه والله بعدين عرفنا بيها تچذب وعرفنا الحقيقة
أما آني فچنت بس استمع وعيوني تجري دموع
النوب خالو بدأ يوضح أكثر وگال
- من قررنا نحضر حفلة تخرج امجد ووياها راح يكون اعلان لخطوبته من ترف والله فرحت وچنت أنتظر يوم يوم بس شو فجأتا تغير كلشي وانت هم الصوچ منك (على أمجد) تصرفت انت وامك بدون ماتگلي أو تنطيني خبر
شو رأسا سويتو قصة انت شايف بت خالك وانعجبت بيها وتريد تخطبها وبدلت ترف بـ تاليا
ومع ذلك هم گلت يجوز هسه كبر واتخرج وافتهم هاي المشاعر الحقيقيه مو مشاعر مراهقه
ومن تزوجتو بدت بيناتكم المشاكل انت ومرتك وچان السبب حسب ما تحچيلي امك علمود الخلفه انت تريد منها خلفه وهي تأجل لان بعدها طالبه
بس تدرين يا أم سيف شنو طلع السبب.. ووجه كلامه لأمجد وگال
احچيلهم بابا احچي لعمتك خلي تصير عدها دراية بكلشي
أمجد.. من صرفت نظر عن ترف رأساً امي قدمتلي بنت أخوها تاليا وچان مبين عليها الاناقه واللباقه والشياكه والاهتمام بيّ
وكل مره امي تذكرني وين ترف ووين تاليا ...اي والله صحيح تاليا تحبني ومهتمه بيَّ
بس ببمرور الوكت قل هذا الاهتمام وبديت الاحظ تصرفات غريبة عليها
تأخرها المستمر بالكلية
بالبيت التليفون ما ينزل من أيدها
صرفها الغير عادي على الملابس والمكياج
سفراتها المستمرة مايمر شهر إذا ماسافرت لوتركيا لو مصر لو الأردن
وياويلي.. ياويلي إذا انتقدت تصرفاتها أو حاسبتها على شي رأساً اطلع آني الموخوش آدمي وزين منها رضت بيّ وبمستوايه
وعلى أدنى مشكلة تطلب الطلاق.. وامي دائما تصير من جانبها وتطلعني آني الغلطان... إلى أن بيوم رجعت للبيت قبل الوقت المعتاد وسمعتها تتصل بواحد من أصدقاء الجامعه وحچيها كله حبي وحبيبي وباجر نلتقي وعندي الك مفاجئة... آني بعد طگت فيوزاتي اخذت منها التليفون قبل لاتضمه وتخفي ولزمتها كسرتها اتكسر ماخليت بيها عظم صاحي .. وخابرت على أهلها اجوي نقلوها للمستشفى وبعد ما حچيت كلشي الهم وهددتهم اذا يسوون تقريرطبي أو يسجلون دعوة عليّ اهددهم بالتليفون مال بتهم المليان بلاوي من صور ومحادثات
وطلگتها بعد شرطي عليها تتنازل عن الحاضر والمؤخر
وكل هذا وأمي ماچانت راضية على الطلاگ.. وحذرتني احچي اي شي من الحقيقة لأبويه وخلت عذر الحمل هو سبب الطلاگ
بس آني رأساً حچيت كلشي لأبويه
خالو والله ياأم سيف من سمعت هاي البلاوي من ام امجد وبنت أخوها تمرضت وبقيت بالمستشفى كم يوم بس بعدين گدرت اگوم على حيلي وأطي لكل واحد استحقاقه كائن من يكون
ام امجد دزيتها لأهلها وهددتها بالطلاق لان بعد ماعندي ثقة بيها يعني ترف لأن بنت اختي غلطها زغير ماگدرت تعبره بس بلاوي بنت أخوها تگول عادي ومشوها
وبنت أخوها طلگناها رغم مكانة ابوها وعمامها بالدولة
وأمجد كسفت أحواله لان ماچان صريح ويايه وماچان يحچيلي الشي الصار وياكم وچان ابن أمه يسمعلها وتمشي مثل ماتريد ...
احنا گلنا مدنگين وآني وأمي دموعنا تجري
- وهسه الي اريده منچ انتي وترف تسامحونا وتعذرين تقصيري وياكم وتمسحون الصار بوجهي
- لا خويه حشاك من التقصير وحتى امجد ماله ذنب بالصار والحمدلله ربك أخذلنا حقنا من كل واحد ساء النا
- خالو هسه ولو يجوز الوقت غير مناسب بس حتى مثل مايگولون المياه ترجع لمجراها آني جاي اطلب أيد ترف لأبني امجد
آني وأمي رأساً باوعنا عليه لان استغربنا الطلب بس آني تشجعت وگلت
- ترف: خالو انت تعرف معزتك چبيره بروحي وبگلبي ويشهد الله عليَّ وعلى كل كلمة راح اگولها امجد أحبه واعزه ومعتبرته اخويه لاغير وماأكدر اغير هذا شعوري أخويه وبس
خالو فهم رفضي وقدر شعوري
استأذنو وهم خالو طلب نسامح ونغفر وترجع گلوبنا مثل الأول
امي رأساً حضنت وباست امجد وگالت هو آني أكدر ازعل عليك .. انت وليدي
آني هم سلمت عليه وگتله اتمنى تلگه بنت الحلال الي تصير شريكة حياتك وتعيش بسعادة
وهنا انطوت صفحة امجد للابد
وبقت زياراته النا كأخ وبس
هسه احنا بسنة 2018 السنه الي راح تتخرج بيها رهف ورغم فرحتها الي راح تصير فرحتين ..فرحة تخرجها صيدلانيه وهم فرحة خطوبتها من تميم الي چان مقرر أن تتم بعد التخرج..لكن چنا آني وأمي نشوف بعيونها حيره وخوف ..يمكن جاي تفكر شلون راح تكون حياتها الجايه ويه عمه سعاد ، ومن حچتلنا عن مخاوفها .. امي طمنتها وگالت عوفي كلشي عليّ ولا تفكرين بأي شي فكري بس بامتحاناتچ ومستقبلچ وسعادتچ ويه تميم
بدت امي تسأل عمه سعاد
- إذا خطبتو رهف وصار الزواج تگعدوهم وياكم لو تأجرولهم
- ليش انأجر تگعد ويانه
- بس انتو ماعدكم بالبيت غرفة فارغه
- صح بس شهم حصل قطعه ارض ولأن مكانها بعيد راح يبيعها وبالفلوس يبني مشتمل زغير بالحديقة اله ولجعويط البنات العده وغرفته الفوگ تصير لتميم
- اي خوش فكره حتى هم تعدلون الغرفه وتصير بيها اضافات
- تقصدين على الصبغ ، سهله بيوم واحد تكمل بس شنو الاضافات
- حمام مستقل الها فوگ وهم غرفة ثانيه للزايده والناقصه وإذا تسوون مطبخ نكون شاكرين وممنونين منكم
- ياا شنو حمام شنو مطبخ ، ليش عيني ماعدنا بالبيت حمام لو ماعدنا مطبخ
- عدكم بس هسه الوضع اختلف هسه كل البنات الجاي تتزوج أول شي تطلب بيت مستقل وإذا ما رهمت تطلب غرفة بحمام مستقل.. خو مو تبقي صاعدة نازله للحمام ويمكن انتي تفهمين شنو اقصد
- ساكته وبدون رد
- ها ام شهم وين رحتي
- وياچ وياچ
- هسه شگلتي؟؟ خوش فكره ؟؟؟
- ماتصور بالبيت يقبلون على هاي الفكرة لأن الميزانية ماتسمح
- إذا على الميزانية سهله اني اشارك واعتبرها هديه زواجهم
وبمرور الأيام عمه سعاد ماطت جواب لفكرة ماما لا گالت اي ولا گالت لا
لكن الي سمعناه بعدين شهم باع قطعة الأرض مالته وبعده هستوه جاي يصمم خريطة بناء مناسبة للمساحه صار شي غيّر حياة بيت عمو
امي تگول هالايام اشوف منى دوم تعبانه وجهها أصفر ومن اسألها تگول يمكن فقر دم ..
- رحتي طبيب فحصتي اتعالجتي
- لا والله ما عندي وكت اركض من الصبح لليل بين شغل وبين الجهال
- اي الله يساعدج بس صحتچ هم مهمه
- أن شاءالله ماكو شي ..هسه ادز على عصير زبيب واصير زينه
- أن شاء الله
لكن بدت حالتها تسؤ وآخرها صار عدها اغماء ومن شهم ركض بيها للمستشفى وكان التشخيص هو إصابتها بسرطان الدم وبدرجة عاليه
ولازم تبدي مرحلة العلاج وبأقصى سرعة
